Published 01 March 2022

ဂျပန်နိုင်ငံ တိုကျိုမြို့တော်က ကြယ်ငါးပွင့်ဟိုတယ်ကြီးတစ်ခုဖြစ်တဲ့ ဟိုရှီနိုယာတိုကျိုဟာ သူ့ရဲ့ဧည့်သည်တွေအတွက် “မီးအိမ်ညစာ” အတွေအကြုံတွေကို ကမ်းလှမ်းနေပါတယ်။ မီးအိမ်ညစာဆိုတာ ညစာစားပွဲပေါ်မှာ နှာခေါင်းစည်းတပ်စရာ မလိုဘဲ တစ်ဦးနှင့်တစ်ဦးခပ်ခွာခွာနေထိုင်ရင်း လွတ်လပ်စွာ စကားပြောဆိုနိုင်အောင် စီစဉ်ထားတာပါ။

မီးအိမ်ပုံစံ ဦးခေါင်းအမိုးတွေကို တပ်ဆင်ထားတာဖြစ်ပြီး လာစားကြတဲ့ ဧည့်သည်တွေနေရာယူပြီးတဲ့အခါ သူတို့ခေါင်းတည့်တည့်မှာ တပ်ဆင်ထားတဲ့ မီးအိမ်တွေကို စားပွဲထိုးတွေက ခေါင်းမှာ အသာအယာစွပ်ပေးလိုက်တာပဲဖြစ်ပါတယ်။

Source AFP

Published 01 March 2022

နေတိုးအဖွဲ့ဝင်နိုင်ငံ(၃)နိုင်ငံက ယူကရိန်းကို တိုက်လေယာဉ်အစီး(၇၀)ကျော် ပို့ပေးမယ်လို့ ယူကရိန်းနိုင်ငံရဲ့ စစ်ရေးကိုယ်စာလှယ်တွေက ဒီကနေ့ မတ်လ၁ရက် အင်္ဂါနေ့မှာ ပြောကြားပါတယ်။

ဖေ့စ်ဘုတ်ခ်မှာ တင်ထားတဲ့ သတင်းထုတ်ပြန်ချက်အရ ပိုလန်၊ဘူဂေးရီးယားနှင့် ဆလိုဗေးကီးယားတို့ဟာ ဆိုဗီယက်ခေတ်က တိုက်လေယာဉ်တွေဖြစ်တဲ့ MiG-29 နှင့် SU-25 တို့ကို ပိုလန်နိုင်ငံရဲ့ လေယာဉ်ကွင်းထဲမှာ အခြေစိုက်ထားရှိပေးမယ်လို့ သိရပါတယ်။

MiG-29 တိုက်လေယာဉ် (၁၆)စီးနှင့် လေယာဉ် (၁၄)စီးတို့ကို ဘူလ်ဂေးရီးယားက ထောက်ပံ့မှာဖြစ်ပြီး ပိုလန်က MiG-29 (၂၈)စီး၊ ဆလိုဗေးကီးယားက MiG-29 jets (၁၂)စီး ထောက်ပံ့ပေးသွားမှာဖြစ်တယ်လို့ တရားဝင်သတင်းထုတ်ပြန်ချက်ထဲမှာ ဖော်ပြထားပါတယ်။

“ကျွန်တော်တို့ရဲ့ မိတ်ဖက်နိုင်ငံတွေဟာ ကျွန်တော်တို့ကို MiG-25နှင့်SU-25တွေပေးပါတယ်။လိုအပ်လာရင် ပိုလန်လေယာဉ်ကွင်းတွေမှာ အခြေစိုက်ထားပြီး ယူကရိန်းလေယာဉ်မှူးတွေက အဲဒီကနေ တိုက်ခိုက်မှုစစ်ဆင်ရေးတွေ ဆောင်ရွက်နိုင်မှာဖြစ်ပါတယ်” လို့ ကြေညာချက်ကဆိုပါတယ်။ “ကိဗ်ရဲ့ တစ္ဆေတွေ” မကြာမီထပ်ပြီးလာဦးမယ်လို့လည်း ပြောဆိုထားပါတယ်။

“ကိဗ်ရဲ့တစ္ဆေတွေ” ဆိုတဲ့ ဝေါဟာရဟာ ယူကရိန်းလေယာဉ်မှူးတစ်ဦးက ရုရှားတိုက်လေယာဉ်(၆)စီးကို တစ်ခါတည်းနှင့် ပစ်ချနိုင်ခဲ့တယ်ဆိုတဲ့ သတင်းတွေကိုတွေ့ရအပြီးမှာ အဲဒီစကားက မီဒီယာမှာ အကျော်ဇေယျဖြစ်လာတာပါ။

 ဒါပေမယ့် နောက်ပိုင်းမှာ အဲဒီ တစ္ဆေ(လေယာဉ်)ဟာ ကွန်ပျူတာဂိမ်းတစ်ခုဖြစ်တဲ့ ‘Digital Combat Simulator’ထဲက ဗွီဒီယိုအပိုင်းအစတစ်ခုဖြစ်ကြောင်း ဖော်ထုတ်ခဲ့ကြပါတယ်။

Source RT/Agencies

Published 1 March 2022

ရုရှားနှင့်ဆက်လက်ဖြစ်ပွားနေတဲ့ ပဋိပက္ခတွေကြောင့် အခြေအနေတွေ တင်းမာနေတဲ့ အကျိုးဆက်တွေဟာ ယူကရိန်းနယ်စပ် လုဗျူးနယ်စပ်မြို့ကလေးရဲ့ ဒေသခံတော်တော်တော်များများနှင့် တစ်နိုင်ငံလုံးကို ရိုက်ခတ်နေပါတယ်။

လုဗျူးမြို့က ဒေသခံတွေဟာ ဆီရီယယ်လ်တွေ၊ရေနှင့် အခြားအစားအစာတွေ၊ပြီးတော့ အိမ်မွေးတိရိစ္ဆာန်အစားအစာတွေကို စတိုးဆိုင်တွေမှာ ဝယ်ယူနေကြပါတယ်။ သူတို့ဟာ ဆေးဆိုင်တွေမှာလည်း ဆေးတွေ အမျာကြီးကို ဝယ်ယူနေကြပါတယ်။ ဓာတ်ဆီဆိုင်တွေမှာ ဆီလက်ကျန်မရှိသလောက်ဖြစ်နေပြီး အေတီအမ်စက်တွေမှာလည်း ငွေလက်ကျန်မရှိနီးပါးဖြစ်နေပါတယ်။

ဒေသခံတွေနှင့်စစ်ဘေးရှောင်တိမ်းလာကြသူတွေရဲ့ ကိုယ်တွေ့ခံစားချက်တွေကို ရုပ်သံတင်ဆက်ထားပါတယ်။

Source CMG

 #WorldPolitics
Published - 1 March 2022

နယူးယော့ခ်မြို့ရှိ ကုလသမဂ္ဂဆိုင်ရာရုရှားဝန်ထမ်း ၁၂ ဦးအား အမေရိကန်တို့ကနှင်ထုတ်လိုက်ပြီဖြစ်ကြောင်း တနင်္လာနေ့က ကြေညာလိုက်ပါတယ်။ထိုသို့ နှင်ထုတ်လိုက်တဲ့အတွက် အမေရိကန်-ရုရှားသံတမန်ဆက်ဆံရေးကတော့ ပိုမိုဆိုးရွားလာမှာသေချာပါတယ်။
ကုလသမဂ္ဂဆိုင်ရာ ရုရှားသံအမတ်'ဗာဆယ်လီနီဘန်ဇီယာ'က သူ့ကိုနှင်ထုတ်လိုက်ပြီဖြစ်ကြောင်းသိရှိပြီးနောက် တနင်္လာနေ့ကပဲ မီဒီယာရှင်းလင်းပွဲတစ်ခုပြုလုပ်ခဲ့ပါတယ်။

"ရုရှားသံတမန် ၁၂ ဦးကို မလိုအပ်တော့ဘူးလို့ ကြေညာလိုက်ပြီး မတ်လ ၇ ရက်နေ့မှာ နိုင်ငံမှထွက်ခွာသွားဖို့ အသိပေးထားတဲ့စာတစ်စောင်ကို အမေရိကန်တာဝန်ရှိသူတွေထံမှ ပေးပို့လာပါတယ်။ အမေရိကန်အာဏာပိုင်တွေက ကုလဆိုင်ရာရုရှားဝန်ထမ်းတွေကို နောက်ထပ်တစ်ခါမထီမဲ့မြင်ပြုလိုက်တာပါပဲ။ သူတို့ ထုတ်ပြန်ထားတဲ့ အိမ်ရှင်နိုင်ငံသဘောတူညီချက်ကတိကဝတ်တွေကို ပြင်းပြင်းထန်ထန်ချိုးဖောက်လိုက်တာပါ" လို့ 'နီဘန်ဇီယာ'က ပြောကြားခဲ့ပါတယ်။

ဝါရှင်တန်မြို့ ရုရှားသံရုံးမှ ဒုတိယအဆင့်သံတမန်'ဆာဂျီထရီပယ်ကော့ဗ်'ကို အမေရိကန်မှနှင်ထုတ်ကြောင်း ကြေညာပြီးတစ်ပတ်မပြည့်ခင်မှာပဲ အခုလိုနောက်ထပ်ရုရှားဝန်ထမ်းတွေကို ထပ်မံနှင်ထုတ်လိုက်တာဖြစ်ပါတယ်။

ရုရှားသံတမန်တွေကိုနှင်ထုတ်ရခြင်းက မော်စကိုရှိ အမေရိကန်သံရုံးမှ လက်ထောက်ဦးစီးချုပ်အား ရုရှားတို့ကအကြောင်းမဲ့နှင်ထုတ်လိုက်ခြင်းကြောင့်ဖြစ်တယ်လို့ အမေရိကန်နိုင်ငံခြားရေးဌာနက အကြောင်းပြလိုက်ပါတယ်။

ပြီးခဲ့တဲ့နှစ်ကုန်ပိုင်းလောက်ကလည်း ရုရှားသံတမန် ၂၇ ဦးနဲ့သူတို့ မိသားစုတွေကို အမေရိကန်ကပြည်နှင်ထုတ်ခဲ့ပြီး ဇန်နဝါရီ ၃၀ ရက်နေ့မှာ နိုင်ငံကထွက်ခွာဖို့ အသိပေးခဲ့ပါသေးတယ်။

အဲဒီအချိန်တုန်းက ရုရှားသံရုံးမှာ ဝန်ထမ်းပြတ်လတ်မှုကြုံတွေ့နေရကြောင်း အမေရိကန်မှရုရှားသံအမတ်'အန်နာတိုလီအန်တိုနော့ဗ်'က ပြောကြားခဲ့ပါတယ်။ထိုအချိန်များမတိုင်ခင် အမေရိကန်မှာအလုပ်လုပ်နေတဲ့ ရုရှားသံတမန်အယောက် ၂၀၀ နီးပါးခန့် ရှိခဲ့တာဖြစ်ပါတယ်။

'နီဘန်ဇီယာ'က သတင်းထောက်တွေကိုပြောကြားရာမှာ အမေရိကန်က အခုနောက်ဆုံးနှင်ထုတ်ခံရခြင်းက ဘာအကြောင်းပြချက်ကြောင့်လဲဆိုတာ မသိရှိထားကြောင်း၊ အသိပေးစာကိုလည်း သူကိုယ်တိုင်မဖတ်ကြည့်ရသေးကြောင်း၊ ထွက်ခွာဖို့ အမိန့်ပေးခံရတဲ့သံတမန်တွေက ဘယ်သူတွေလဲဆိုတာလည်း မသိရသေးကြောင်း ပြောဆိုသွားပါတယ်။

အခုနှင်ထုတ်ခံလိုက်ရတဲ့ ရုရှားဝန်ထမ်းတွေဟာ နိုင်ငံတော်လုံခြုံရေးကိုထိပါးစေသော သူလျှိုလုပ်ငန်းများတွင် ပါဝင်ပတ်သက်နေသည်ဟု ကုလဆိုင်ရာအမေရိကန်သံရုံးမှ ပြောရေးဆိုခွင့်ရှိသူတစ်ဦးက ရိုက်တာသတင်းဌာနကို ပြောကြားခဲ့ပါတယ်။

နှင်ထုတ်ခြင်းတွေပြုလုပ်ဖို့ လပေါင်းများစွာစီစဉ်နေခဲ့တာဖြစ်ပြီး ရုရှား-ယူကရိန်းပဋိပက္ခနဲ့ မသက်ဆိုင်ကြောင်း ရှင်းပြသွားပါတယ်။'နီဘန်ဇီယာ'ကတော့ နှင်ထုတ်ခံရတဲ့အတွက်ဝမ်းနည်းမိကြောင်းနဲ့ အမေရိကန်ဟာ အိမ်ရှင်နိုင်ငံရဲ့သဘောတူညီချက်အပေါ် မလေးမစားပြုမူတာဖြစ်တယ်လို့ ပြောကြားခဲ့ပါတယ်။
Source: RT

#WorldHealth
Published - 1 March 2022

အားပြင်းသည့် ကင်ဆာကုသနည်းများက ကိုဗစ်ရောဂါဖြစ်ပွားနေတဲ့ ကင်ဆာရောဂါသည်တွေရဲ့ အသက်သေဆုံးနိုင်ချေကို ပိုမိုဆိုးရွားစေခြင်းမရှိကြောင်း ယူကေမှ ကိုရိုနာဗိုင်းရပ်စ်နှင့်ကင်ဆာစောင့်ကြည့်ရေးအစီအစဉ်ရဲ့ သုတေသနအချက်အလက်များအရ သိရှိရပါတယ်။

ဓာတုဆေးဝါးကုထုံး၊ ကိုယ်ခံအားမြှင့်တင်ခြင်းကုထုံး၊ ဟော်မုန်းကုထုံး ဒါမှမဟုတ် ကင်ဆာဆေးဝါးများဖြင့် ကင်ဆာရောဂါကုသမှုခံယူနေတဲ့ ကိုဗစ်ရောဂါလူနာ ၂,၅၁၅ ဦးကို သုတေသီတို့က လေ့လာခဲ့ကြပါတယ်။

အဆိုပါလူနာတွေထဲက ၃၈ ရာခိုင်နှုန်းဟာ ကိုဗစ်ရောဂါလက္ခဏာစပေါ်ပြီး တစ်ပတ်အတွင်း ကွယ်လွန်ခဲ့ကြပါတယ်။စမ်းသပ်လေ့လာတဲ့လူနာတဝက်ခန့်ဟာ အသက် ၇၂ နှစ်အထက်လူကြီးတွေဖြစ်ပြီး ခြုံငုံကြည့်တဲ့အခါ အဆုတ်ကင်ဆာ သွေးကင်ဆာခံစားရတဲ့လူနာတွေဟာ အသက်သေဆုံးနိုင်ချေများနေပါတယ်။

ဓာတုဆေးဝါးကုထုံးဖြင့် ကိုဗစ်ရောဂါကြောင့်သေဆုံးနိုင်ချေကို မသက်ရောက်စေပေမယ့် ကိုယ်ခံအားမြှင့်တင်ခြင်းကုထုံးကတော့ အသက်ရှင်နိုင်စွမ်းကိုတောင် မြင့်မားစေနိုင်ကြောင်း JAMA Network Open ဂျာနယ်မှာ တနင်္လာနေ့က ဖော်ပြထားပါတယ်။

အစောပိုင်းလေ့လာချက်များအရ ကင်ဆာရောဂါအခံရှိတဲ့ ကိုဗစ်လူနာတွေဟာ အခြေအနေဆိုးရွားလေ့ရှိတယ်လို့ တွေ့ရှိခဲ့ကြပေမယ့် ဒါဟာ ကင်ဆာကုထုံးတွေကြောင့်ဆိုတာထက် အသက်အရွယ်၊ ကျား/မ၊ အခြားရောဂါအခံများနဲ့ ကင်ဆာအမျိုးအစားတို့ အပေါ် ပိုပြီးမူတည်နေနိုင်ကြောင်း သုတေသနအဖွဲ့ က သုံးသပ်သွားပါတယ်။
Source: Reuters