#World_Politics
Published 10 August 2022

တောင်ကိုရီးယားနိုင်ငံနဲ့ တရုတ်နိုင်ငံတို့အနေဖြင့် ပိုမိုရင်းနှီးတဲ့ဆက်ဆံရေးတည်ဆောက်သွားရန်နဲ့ တရုတ်နဲ့ အမေရိကန်တို့ကြား ပြိုင်ဆိုင်မှုပြင်းထန်နေတဲ့အချိန်မှာ စက်မှုယန္တရားကဏ္ဍ တည်ငြိမ်စွာဆက်လက်လည်ပတ်စေရန် ဆောင်ရွက်သွားကြဖို့ တောင်ကိုရီးယားနဲ့တရုတ်မှ ထိပ်သီးသံတမန်တို့က အင်္ဂါနေ့မှာ ကတိပြုခဲ့ကြပါတယ်။

အမေရိကန်နဲ့ မဟာမိတ်ဖြစ်လာတာ အချိန်အတော်ကြာနေပြီဖြစ်တဲ့ တောင်ကိုရီးယားအနေနဲ့ နိုင်ငံခြားရေးမူဝါဒတဖက်သတ်ဆန်လာတဲ့ တရုတ်အစိုးရနဲ့ အမေရိကန်တို့ကြား ညီတူမျှတူဆက်ဆံရေးဖော်ထုတ်ဖို့ ခက်ခဲနေပါတယ်။

ထိုင်ဝမ်အရေးနဲ့ပတ်သက်တဲ့ အမေရိကန်နှင့်တရုတ်ပဋိပက္ခကြောင့်လည်း အဆိုပါနှစ်နိုင်ငံစလုံးနဲ့သင့်မြတ်ချင်တဲ့ တောင်ကိုရီးယားအစိုးရလို လူမျိုးတွေအတွက် ပိုမိုရှုပ်ထွေးလာရပါတယ်။

တရုတ်အရှေ့ပိုင်းမြို့ချင်ဒေါင်မှာ တောင်ကိုရီးယားနိုင်ငံခြားရေးဝန်ကြီး'ပါ့ခ်ဂျင်'နဲ့ တရုတ်နိုင်ငံခြားရေးဝန်ကြီး'ဝမ်ယိ'တို တွေ့ဆုံဆွေးနွေးကြရာ ဆယ်စုနှစ် ၃ ခုကြာသက်တမ်းရှိ နှစ်နိုင်ငံကုန်သွယ်မှုဆက်ဆံရေးလမ်းကြောင်းအပေါ် အခြေခံပြီး နောက်ထပ်ရင်းနှီးဆက်ဆံရေးများ ဖွံ့ဖြိုးတိုးတက်လာစေရန် ထုတ်ဖော်ပြောကြားခဲ့ကြပါတယ်။

ကုန်သွယ်ထုတ်လုပ်မှုကွင်းဆက်ပြဿနာများနဲ့ ပတ်သက်တဲ့ ဆက်သွယ်ဖြေရှင်းရေးများ၊ ရာသီဥတုဖောက်ပြန်ခြင်းနဲ့ ပတ်သက်တဲ့ ပူးပေါင်းဆောင်ရွက်မှုများ၊ ယဉ်ကျေးမှုအမွေအနှစ်လဲလှယ်ခြင်းများ စတဲ့ကိစ္စရပ်တွေမှာ အရှိန်မြှင့်လုပ်ဆောင်သွားရန် နှစ်နိုင်ငံသဘောတူညီခဲ့ကြကြောင်း တောင်ကိုရီးယားက ဆိုပါတယ်။

ဒါ့အပြင် ယခုနှစ်အတွင်း နိုင်ငံခြားရေးနဲ့ ကာကွယ်ရေးဝန်ကြီးဌာနတိုမှ ဒုဝန်ကြီးအဆင့်အရာရှိများ တွေ့ဆုံဆွေးနွေးဖို့ကိုလည်း သဘောတူညီခဲ့ကြပါတယ်။

ပြီးခဲ့တဲ့အပတ်က ထိုင်ဝမ်ကို အမေရိကန်အောက်လွှတ်တော်ဥက္ကဌ'နန်စီပယ်လိုစီ' လာရောက်လည်ပတ်ခြင်းနဲ့ ပတ်သက်ပြီး နိုင်ငံရေးတင်းမာလာခဲ့တဲ့အကြောင်းအရာတွေကိုတော့ 'ပါ့ခ်ဂျင်'နဲ့ 'ဝမ်ယိ'တို့ ထည့်သွင်းဆွေးနွေးခြင်းမရှိခဲ့ပါဘူး။

မတ်လကစပြီး တောင်ကိုရီးယားသမ္မတရာထူးကို တာဝန်ယူနေတဲ့ 'ယွန်ဆော့ယောလ်'က မြောက်ကိုရီးယားရဲ့ နျူကလီးယားခြိမ်းခြောက်မှုအန္တရာယ်ကို တုံ့ပြန်ဖို့အတွက် အမေရိကန်၊ ဂျပန်တို့နဲ့ လုံခြုံရေးပူးပေါင်းဆောင်ရွက်ဖို့ အလိုရှိနေပါတယ်။

မြောက်ကိုရီးယားရဲ့ အဓိကမဟာမိတ်ဖြစ်တဲ့ တရုတ်က ဂျပန်ကို ပြိုင်ဘက်အဖြစ်ယူဆထားသလို တောင်ကိုရီးယားရဲ့ အကြီးမားဆုံးတင်ပို့ကုန်ဈေးကွက်လည်း ဖြစ်နေပါတယ်။

ပြီးခဲ့တဲ့ရက်သတ္တပတ်က 'ပယ်လိုစီ' တောင်ကိုရီးယားသို့ရောက်ရှိချိန်မှာ 'ယွန်ဆော့ယောလ်'က ခရီးထွက်နေခဲ့ပြီး 'ပယ်လိုစီ'ကို ဖုန်းဖြင့်သာ စကားပြောဆိုခဲ့ပါတယ်။

ဒါကြောင့် တရုတ်နဲ့ဆက်ဆံရေးကို ကာကွယ်ထိန်းသိမ်းချင်လို 'ပယ်လိုစီ'နဲ့ တွေ့ဆုံဖို့ရှောင်ခဲ့တယ်ဆိုပြီး 'ယွန်ဆော့ယောလ်'ကို ဝေဖန်နေကြပါတယ်။

တရုတ်နည်းပညာပေါ်လစီများနဲ့ အမေရိကန်လုံခြုံရေးထိန်းချုပ်မှုတို့ကြား ကမ္ဘာ့ဈေးကွက်ပြိုလဲပြီး စံသတ်မှတ်ချက်တွေနဲ့ ထုတ်ကုန်တွေ သဟဇာတဖြစ်မလာနိုင်တာမျိုးနဲ့ ကုန်ကျစရိတ်မြင့်တက်လာခြင်းမျိုး ဖြစ်ပေါ်လာမှာကို စိုးရိမ်နေကြပါတယ်။

နိုင်ငံတကာတင်းမာမှုတွေကြား အပြောင်းအလဲများဖြစ်လာနိုင်ပြီး တွေ့ကြုံလာမယ့်အခက်အခဲများကို နှစ်နိုင်ငံစလုံးပူးပေါင်းကျော်လွှားကြဖို 'ပါ့ခ်ဂျင်'က မျှော်လင့်နေပါတယ်။

အမေရိကန်ဦးဆောင်တဲ့ နိုင်ငံတကာအသိုင်းအဝိုင်းအနေနဲ့ မြောက်ကိုရီးယားရဲ့ရန်စမှုများကို စည်းလုံးညီညွတ်စွာတုံ့ပြန်ရန်နဲ့ မြောက်ကိုရီးယားရဲ့ လက်နက်အင်အားတိုးချဲ့လာမှုအပေါ် တောင်ကိုရီးယားနဲ့ တရုတ်တို့ အနီးကပ်ညှိနှိုင်းဆွေးနွေးသွားရန် 'ပါ့ခ်ဂျင်'က တိုက်တွန်းလိုက်ပါတယ်။

နျူကလီးယားအရေးနဲ့ပတ်သက်ပြီး 'ဝမ်ယိ'က ပြောကြားခဲ့ခြင်းမရှိပေမယ့် ကိုရီးယားကျွန်းဆွယ်တဝိုက် ငြိမ်းချမ်းရေးတည်မြဲဖို့အတွက် တရုတ်အနေနဲ့ ဆက်လက်ကူညီသွားမယ်လို့ 'ဝမ်ယိ'က 'ပါ့ခ်ဂျင်'ကိုအသိပေးခဲ့ကြောင်း တောင်ကိုရီးယားနိုင်ငံခြားရေးဝန်ကြီးဌာနက ထုတ်ပြန်ခဲ့ပါတယ်။

တရုတ်သမ္မတ'ရှီကျင့်ဖင်'အနေနဲ့လည်း တောင်ကိုရီးယားကို လာရောက်လည်ပတ်ဖို့ 'ပါ့ခ်ဂျင်'ကမျှော်လင့်နေကြောင်း ထုတ်ဖော်ပြောကြားခဲ့ပါတယ်။

Source: AP News
#Yangon_Media_Group

#Health_Tips
Published 10 August 2022

အအေးမိခြင်း၊ ချောင်းဆိုးခြင်း၊ နှာရည်ယိုခြင်း၊ ကိုယ်လက်ကိုက်ခဲခြင်းတိုကို လူတွေဟာ အနည်းနဲ့အများကြုံတွေ့ခဲ့ကြဖူးပြီး ဆေးဝါးတွေနဲ့ ချက်ချင်းသက်သာအောင် မလုပ်နိုင်ကြပါဘူး။

ဒါပေမဲ့ အိမ်တွင်းကုထုံးတွေနဲ့ သက်သာအောင် ပြုလုပ်လိုရနိုင်ပါတယ်။

*ကြက်စွပ်ပြုတ်
ကြက်စွပ်ပြုတ်ပူပူနွေးနွေးမှာပါဝင်တဲ့ ပရိုတိန်းဆစ္စတိန်းဟာ ဆဲလ်တွေကိုအားကောင်းစေပြီး ရောင်ရမ်းခြင်းကို တားဆီးပေးကာ ဗိုင်းရပ်စ်တွေကို ဟန့်တားပေးပါတယ်။

ဒါ့အပြင် ဇင့်နဲ့ ကယ်လ်စီယမ်ဓာတ်တိုက ရောဂါခုခံအားကို မြှင့်တင်ပေးပါတယ်။

ကြက်စွပ်ပြုတ်က ပြုလုပ်ရလွယ်ကူပြီး စွပ်ပြုတ်အရည်နဲ့ အသားနည်းနည်းစားသုံးခြင်းဖြင့် အကျိုးကျေးဇူးရရှိစေမှာ ဖြစ်ပါတယ်။

*လည်ချောင်းနာခြင်းအတွက် နာနတ်သီးဖျော်ရည်
လည်ချောင်းနာခြင်းကလည်း အအေးမိလက္ခဏာတစ်ခုဖြစ်ပြီး ချောင်းဆိုးခြင်း၊ အသံနာခြင်းတို့ခံစားရကာ လည်ချောင်းမှာ ပူထူနာကျင်ရပါတယ်။

နာနတ်သီးမှာပါဝင်တဲ့ဓာတ်ကြောင့် ကပ်ငြိနေတဲ့အချွဲအရည်များပျော်ဆင်းကာ လည်ချောင်းရောင်ရမ်းခြင်းကို သက်သာစေပါတယ်။

ဖျော်ရည်ထဲမှာပါတဲ့ ပိုလီဖီနောလ်က ဗိုင်းရပ်စ်နဲ့ဘက်တီးရီးယားများ အလုပ်မလုပ်အောင် ဟန့်တားပေးပါတယ်။

ဖျော်ရည်နည်းနည်းစီကို ခဏခဏသောက်သုံးသင့်ပါတယ်။

*အိပ်မပျော်ခြင်းအတွက် နို့နှင့်ပျားရည်
အအေးမိဝေဒနာတွေခံစားရတဲ့အခါ အိပ်ရာထဲနေသင့်ပေမယ့် တစ်ခါတရံမှာ အိပ်ပျော်ရခက်လေ့ရှိပါတယ်။

နွားနို့ပူပူကို ပျားရည်ဖြင့်သောက်သုံးခြင်းဖြင့် အအေးမိတဲ့အခါ ညဘက်အိပ်စက်ခြင်းကို အထောက်အကူဖြစ်စေပါတယ်။

နို့မှာပါဝင်တဲ့ ထရစ်ပ်တိုဖန်ပရိုတိန်းက ဦးနှောက်ထဲမှာ အိပ်စက်ခြင်းကိုအားပေးတဲ့အရာအဖြစ် ပြောင်းလဲပေးပါတယ်။

ပျားရည်မှာပါဝင်တဲ့ ဂလူးကိုစ်အောက်ဆီဒေ့စ်က ပိုးသေစေနိုင်တဲ့ ဟိုက်ဒရိုဂျင်ပါအောက်ဆိုဒ်အဖြစ် ပြောင်းလဲပေးပါတယ်။

*ခြေထောက်ရေနွေးစိမ်ခြင်း
အအေးမိလက္ခဏာသိရှိပြီးတာနဲ့ ချက်ချင်းဆောင်ရွက်သင့်ပါတယ်။
ခြေထောက်သွေးကြောတွေနဲ့ အသက်ရှူလမ်းကြောင်းဆီသွားတဲ့ သွေးကြောတွေက ဆက်စပ်နေတာကြောင့် ခြေထောက်ရေနွေးစိမ်ခြင်းက နှာခေါင်းတွင်းအမြှေးပါးများဆီ သွေးလည်ပတ်မှုကောင်းမွန်စေပါတယ်။

ခြေထောက်ကို ဇလုံထဲမှာ ရေနွေးနဲ့စိမ်ပြီးတဲ့အခါ ခြောက်သွေ့အောင်သုတ်ပြီး အိပ်ရာပေါ်ဖြစ်ဖြစ် ဆိုဖာပေါ်ဖြစ်ဖြစ် ခြေထောက်တင်ကာ စောင်နဲ့နွေးထွေးအောင်အုပ်ထားသင့်ပါတယ်။

Source: Interesticle
#Yangon_Media_Group

#Health_Tips
Published 10 August 2022

အစာစားပြီးနောက် ခဏတဖြုတ်လမ်းလျှောက်ခြင်းဖြင့် သွေးတွင်းသကြားဓာတ်ကို လျှော့ချပေးပြီး ဆီးချိုရောဂါဒုတိယအမျိုးအစားဖြစ်နိုင်ချေကို လျော့ကျစေကြောင်း အကြံပြုထားကြပါတယ်။

စားသောက်ပြီး မိနစ် ၆၀ မှ မိနစ် ၉၀ အတွင်း သွေးတွင်းသကြားဓာတ်အမြင့်ဆုံးဖြစ်နေချိန်မှာ ပေါ့ပေါ့ပါးပါးလမ်းလျှောက်ခြင်းဖြင့် ကြွက်သားတွေအနေနဲ့ အစားအစာမှရရှိတဲ့ အဟာရလောင်စာများကို စုပ်ယူသုံးစွဲကြပါတယ်။

၁၅ မိနစ်ခန့် လမ်းလျှောက်သင့်ပေမယ့် အနည်းဆုံး ၂ မိနစ်မှ ၅ မိနစ်အတွင်းလျှောက်ရင်တောင် ကောင်းကျိုးရရှိစေမှာဖြစ်တယ်လို့ ကျွမ်းကျင်သူများက ဆိုပါတယ်။

အိုင်ယာလန် လိုင်မဲရစ်တက္ကသိုလ်မှသုတေသီများက နှလုံးကျန်းမာရေး၊ အင်ဆူလင်နဲ့ သွေးတွင်းသကြားဓာတ်ပမာဏတိုနဲ့ပတ်သက်ပြီး မတ်တပ်ရပ်နေခြင်းနဲ့ လမ်းလျှောက်ခြင်းတိုရဲ့ အကျိုးသက်ရောက်မှုများကို လေ့လာချက် ၇ ရပ်ဖြင့် နှိုင်းယှဉ်ခဲ့ကြပါတယ်။

စားသောက်ပြီးနောက် အပေါ့စားလမ်းလျှောက်ပေးခြင်းက သွေးတွင်းသကြားဓာတ်ပမာဏကို အကောင်းဆုံးထိန်းညှိပေးနိုင်ကြောင်း တွေ့ရှိခဲ့ကြပါတယ်။

စမ်းသပ်မှုမှာပါဝင်တဲ့သူတွေကို မိနစ် ၂၀ ကနေ မိနစ် ၃၀ ကြာတိုင်း ၂ မိနစ်မှ ၅ မိနစ်အထိ လမ်းလျှောက်ခြင်း ဒါမှမဟုတ် မတ်တပ်ရပ်ခြင်းတိုကို ပြုလုပ်ခိုင်းခဲ့ပါတယ်။

လေ့လာချက် ၇ ခုစလုံးမှာတော့ အစာစားပြီးနောက် မိနစ်အနည်းငယ်မျှ ပေါ့ပေါ့ပါးပါးလမ်းလျှောက်ခြင်းဟာ ထိုင်နေတာထက်စာရင် သွေးတွင်းသကြားဓာတ်ကို သိသိသာသာထိန်းညှိပေးနိုင်ကြောင်း တွေ့ရှိရပါတယ်။

ဆီးချိုရောဂါထိန်းနေရသူတွေကတော့ သွေးတွင်းသကြားဓာတ် အတက်အကျမများစေဖို့တော့ ဂရုစိုက်ဖို့လိုပါတယ်။

အတက်အကျများတယ်ဆိုရင် ဒါဟာ ဆီးချိုရောဂါဖြစ်လာနိုင်တဲ့ အလားအလာရှိနေပါတယ်။

မတ်တပ်ရပ်နေခြင်းကလည်း လမ်းလျှောက်ခြင်းလောက် မသိသာပေမယ့် သွေးတွင်းသကြားဓာတ်ကို လျှော့ချပေးနိုင်ပါတယ်။

လမ်းလျှောက်ခြင်းဟာ မတ်တပ်ရပ်နေတာထက်စာရင် ကြွက်သားများ ပိုမိုပါဝင်လှုပ်ရှားရပြီး သွေးထဲမှာလည်ပတ်နေတဲ့သကြားဓာတ်တွေကို အသုံးပြုရတာကြောင့်ဖြစ်ပါတယ်။

ရုံးတက်အလုပ်လုပ်နေရသူတွေက ပြေးစက်ပေါ်ပြေးတာတို၊ ရုံးထဲမှာပတ်ပြေးနေတာတို့ မပြုလုပ်ရတာကြောင့် ကော်ဖီထဖျော်တာပဲဖြစ်ဖြစ်၊ လျှောက်လမ်းမှာ ခဏတဖြုတ်လမ်းလျှောက်တာပဲဖြစ်ဖြစ် ပြုလုပ်နိုင်ပါတယ်။

စတန်းဖိုဒ်တက္ကသိုလ်မှ နှလုံးအထူးကုဒေါက်တာ'ယူအမ်အက်ရှ်လေ'က အနည်းငယ်မျှလှုပ်ရှားရင်တောင် သိသာတဲ့ပြောင်းလဲမှုတွေ ဖြစ်ပေါ်နိုင်ကြောင်း၊ လမ်းလျှောက်ဖို့အခွင့်မသာတဲ့သူတွေအနေနဲ့ မတ်တပ်ရပ်ခြင်းဖြင့် အကျိုးကျေးဇူးရရှိနိုင်ကြောင်း မှတ်ချက်ပြုသွားပါတယ်။

Source: Daily Mail
#Yangon_Media_Group

Published 9 August 2022

တောင်ကိုးရီးယားနိုင်ငံ ဆိုးလ်မြို့တော်နှင့် အနီးတစ်ဝိုက်မှာ တနင်္လာနှင့် အင်္ဂါနေ့တွေတုန်းက မိုးကြီးပြီး ရေလွှမ်းမိုးခဲ့တဲ့အတွက် အနည်းဆုံး လူ(၈)ဦးသေဆုံးပြီး ၁၄ ဦးဒဏ်ရာရသွားခဲ့ပါတယ်။

မုန်တိုင်းကြောင့် ရေလွှမ်းမိုးခဲ့တဲ့အတွက် လူ(၆)ဦးလည်း ပျောက်ဆုံးနေပါတယ်။

အင်္ဂါနေ့ မနက်၅နာရီအထိ ဆိုးလ်မြို့တော်မှာ မိုးရေချိန်လက်မ၄၂၀ မီလီမီတာရှိခဲ့ပြီး မိုးတွေထပ်ရွာဦးမယ့် အခြေအနေလည်းရှိပါတယ်။

မိုးကြီးလေကြီးထဲမှာ အချို့သောလမ်းတွေ၊ပန်းခြံတွေနှင့် မြေအောက်ရထားဘူတာရုံတွေ ရေနစ်မြုပ်ခဲ့ပြီး လူတွေဟာ ရေတွေထဲမှာ ပိတ်မိနေပါတယ်။ ရေလွှမ်းမိုးခံရတဲ့ အိမ်ခြေ ၁၀၀ ကျော်ကို ဘေးကင်းရာ ရွှေ့ပြောင်းပေးခဲ့ရပါတယ်။

မုန်တိုင်းကြောင့် မြေပြိုမယ့်အန္တရာယ်ကို သက်ဆိုင်ရာက သတိပေးထားပါတယ်။ လာမယ့်ရက်အနည်းငယ်အထိ မိုးသည်းနေဦးမယ်လို့ မိုးဇလဌာနက ပြောပါတယ်။

Source: CCTV Plus

#Heavy_rainfall_Seoul

#South_Korea_Seoul_Flood

#Climate_Change

#World_Climate
Published 9 August 2022

ဩစတြီးယားနိုင်ငံ ဂျမ်တယ်လ်ရေခဲပြင်ကြီးမှ နှင်းများနဲ့ရေခဲများ အရင်ကထက် ပိုမိုလျင်မြန်စွာအရည်ပျော်လျက်ရှိပြီး သိပ္ပံနည်းကျဆိုင်ရာ အဖိုးတန်အချက်အလက်များ အပြီးတိုင်ပျောက်ကွယ်သွားမှာကို သိပ္ပံပညာရှင်'အန်ဒရီယာဖစ်ရှာ'က စိုးရိမ်နေပါတယ်။

#Yangon_Media_Group

#DailyNews
Published - 9 August 2022

၁။ မြန်မာ-တရုတ် နယ်စပ်ဂိတ်များဖြစ်သည့် ကန်ပိုက်တီနှင့် လွယ်ဂျယ်ကို အဆင့်မြှင့်တင်မည်

၂။ ထိုင်းနိုင်ငံသို့ MoU စနစ်ဖြင့် သွားရောက်သည့်အလုပ်သမားများ စာချုပ်ပါအတိုင်း မကိုက်ညီမှုရှိနေသည်ဟုဆို

၃။ မွန်ပြည်နယ်တွင် မိုးအဆက်မပြတ်ရွာသွန်းနေပြီး သဘာဝဘေးကြုံတွေ့နိုင်၍ ကြိုတင်ပြင်ဆင်နေ

၄။ ရေခဲပြင်များ အရည်ပျော်ကျလာခြင်းနှင့် ပတ်သက်၍ ဩစတြီးယားသိပ္ပံပညာရှင်များ လျှို့ဝှက်ချက်တွေ ဖော်ထုတ်နိုင်ရန်ကြိုးပမ်းလာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group