၁၀ ဒီဇင်ဘာ ၂၀၂၃

တောင်ကိုရီးယားနိုင်ငံ မြို့တော်ဆိုးလ်တွင် တနင်္လာနေ့မှစကာ မောင်းသူမဲ့ အလိုလိုမောင်းနှင်ပေးသည့် ညကြီးပိုင်းဘတ်စ်ကားများ စတင်ပြေးဆွဲ လျက်ရှိနေပါတယ်။ ဒါဟာ မီဂါမြို့တော်ကြီးမှာ အလိုအလျောက်ယာဉ်များသွားလာမှု တစ်ဆင့်တက်လှမ်းလိုက်တာဖြစ်ပါတယ်။

ရှေ့ပြေးအစီအစဉ်အရ လောလောဆယ်တော့ မောင်းသူမဲ့ဘတ်စ်ကားနှစ်စီးနှင့်စတင်ပြေးဆွဲနေပြီး လမ်းကြောင်းမှာ ဘတ်စ်ကားမှတ်တိုင်ပေါင်း ၄၀ ရှိပါတယ်။ ဒွန်ဒေးမွန်နှင့် ဟွန်ဒေးတို့လို ဆိုးလ်မြို့တော်ရဲ့ အစည်ကားဆုံးရပ်ကွက်တွေကို ယခုဘတ်စ် လိုင်းက  ၉.၈ ကီလိုမီတာ ခရီးရှိတဲ့လမ်းကြောင်းနှင့် ချိတ်ဆက်ပေးတာဖြစ်ပါတယ်။  အဲဒီဘတ်စ်ကားတွေကို ည ၁၁နာရီခွဲမှ မနက် ၅နာရီ ၁၀မိနစ်အထိပြေးဆွဲနေပြီး ခရီးသည်တွေအားလုံးထိုင်ခုံခါးပတ်ပတ်ပြီးစီးနင်းဖို့လိုအပ်ပါတယ်။ မတ်တပ်ရပ်ခရီးသည်ကိုလည်း ခွင့်မပြုပါဘူး။

ကားစီးရတာညင်သာတယ်လို့ ခရီးသည်တော်တော်များများက သတိပြုပြောဆိုကြပေမယ့် အချို့သော အခြေအနေတွေမှာ အန္တရာယ် တစ်ခုခုဖြစ်မှာကိုတော့ စိတ်ပူနေကြပါတယ်။

“ ရာသီဥတုက ဒီနေ့သာယာတယ်။ အဲဒါကြောင့် သက်သောင့်သက်သာတော့ အတော်ရှိပါတယ်။ ဒါပေမယ့် ဆိုးရွားတဲ့ရာသီဥတုအောက်မှာ ဒီဘတ်စ်ကားတွေ ချောချောမွေ့မွေ့မောင်းနိုင်ပါ့မလားဆိုတာတော့စိတ်ပူမိတယ်” လို့ ခရီးသည်တစ်ဦးကပြောပါတယ်။

မောင်းသူမဲ့အလိုအလျောက်မောင်းယာဉ်တစ်စီးမှာ  ဘေးကင်းရှင်းရေးဆိုင်ရာ အရာရှိနှစ်ဦးအနည်းဆုံးလိုက်ပါရပြီး အဲဒီသူတွေဟာ ခရီးသည် တွေဘေးကင်းရှင်းရေးအတွက် ယာဉ်မောင်းနှင်နေမှုကို အမြဲစောင့်ကြည်ကြည့်ရှုရမှာဖြစ်ပြီး အန္တရာယ်မဖြစ်ခင် ကြိုတင်တုန့်ပြန်မှုလုပ်ရမယ် လို့တော့ တောင်ကိုရီးယားနိုင်ငံ မြေယာ၊အခြေခံအဆောက်အဦနှင့်ပို့ဆောင်ရေးဝန်ကြီးဌာနက စည်းမျဉ်းတွေချမှတ်ထားပါတယ်။

လက်ရှိ ရှေ့ပြေးအစီအစဉ်အရ ညကြီးပိုင်းဘတ်စ်ကားမှာ ခရီးသည်တွေအားလုံးကို အခမဲ့စီးနင်းခွင့်ပြုထားပြီး မြို့အာဏာပိုင်တွေက ဘတ်စ်ကားခပေးစီးနင်းရမယ့်အစီအစဉ်နှင့်လမ်းကြောင်းတွေတိုးချဲ့ဖို့ ကို လာမယ့် နှစ်ပထမခြောက်လတာအတွင်း အကောင်အထည်ဖော်ဖို့ စဉ်းစားနေကြပါတယ်။

Source CCYV

#World_Health
Published 10 December 2023

ဂျပန်တို့ရဲ့ နာမည်ကျော် ဟင်းခတ်ပစ္စည်း ဝါဆာဘီဟာ မှတ်ဉာဏ်ပိုင်းတိုးတက်ရာမှာ အထောက်အကူဖြစ်စေတယ်လို့ သုတေသီများ တွေ့ရှိထားပါတယ်။

ဝါဆာဘီက ကျန်းမာရေးအတွက် အကျိုးရှိစေတယ်ဆိုတာကို သိရှိထားပြီးဖြစ်ပေမယ့် ရေတိုမှာရော ရေရှည်မှာပါ မှတ်ဉာဏ်ပိုင်းကို အကျိုးပြုစေတယ်ဆိုတာကိုတော့ ပထမဆုံး သိရှိလာတာ ဖြစ်ပါတယ်။

ဝါဆာဘီရဲ့ မှတ်ဉာဏ်ပိုင်း တိုးတက်စေမှုကို တိုဟိုကူတက္ကသိုလ်မှာ လေ့လာစမ်းသပ်ခဲ့ပါတယ်။

ဝါဆာဘီထဲက အဓိကပါဝင်ပစ္စည်း 6-MSITC ဟာ ဓာတ်တိုးဆန့်ကျင်ပစ္စည်းဖြစ်ကာ ရောင်ရမ်းခြင်းကိုလည်း ဆန့်ကျင်ပေးပြီး အခြားအပင်တွေမှာ အနည်းငယ်သာ တွေ့ရပါတယ်။

အသက် ၆၀ မှ ၈၀ ကြား ကျန်းမာရေးကောင်းမွန်တဲ့ လူ ၇၂ ဦးကို ခေါ်ယူကာ တဝက်ခန့်ကို ညအိပ်ချိန်မတိုင်ခင် ဝါဆာဘီ ၁၀၀ ဂရမ် စားသုံးစေခဲ့ပြီး ကျန်တဝက်ကိုတော့ အာနိသင်မရှိတဲ့အရာကို စားသုံးစေခဲ့ပါတယ်။

၃ လအကြာမှာ ဝါဆာဘီစားသုံးတဲ့အဖွဲ့က ဦးနှောက်သိရှိမှုစွမ်းရည်၊ ရေတိုမှတ်ဉာဏ်အပိုင်း၊ ရေရှည်မှတ်ဉာဏ်အပိုင်းတို့မှာ သိသိသာသာ မြင့်တက်ခဲ့တယ်လို့ တွေ့ရှိခဲ့ကြပါတယ်။

အပိုင်းအကန့်များပါဝင်တဲ့ မှတ်ဉာဏ်စွမ်းရည်ပိုင်းမှာ ပျမ်းမျှအားဖြင့် ၁၈ ရာခိုင်နှုန်း မြင့်တက်ခဲ့ပါတယ်။

ဝါဆာဘီဟာ မုန်ညင်းမျိုးနွယ်ဝင်ဖြစ်ကာ ပင်လယ်စာနဲ့ တွဲဖက်စားသုံးတဲ့အခါ အလွန်လိုက်ဖက်ပြီး ရောဂါပိုးမွှားဆန့်ကျင်နိုင်တဲ့ အစွမ်းသတ္တိလည်း ရှိပါတယ်။

တိုဟိုကူတက္ကသိုလ်က အခုဆိုရင် ပိုမိုငယ်ရွယ်တဲ့ လူတွေနဲ့ စမ်းသပ်သွားဖို့ ရည်ရွယ်ထားကာ ဒီမန်ရှာရောဂါ ခံစားနေရသူတွေမှာလည်း ဦးနှောက်အသိဉာဏ် ဆုတ်ယုတ်မှုကို လျော့ကျစေနိုင်မလားဆိုတာကို လေ့လာသွားဦးမှာ ဖြစ်ပါတယ်။

#World_Health #ဂျပန်ရိုးရာဟင်းခတ်ပစ္စည်း #ဝါဆာဘီ #အစွမ်းသတ္တိ #Source: WION

#World_Health
Published 10 December 2023

ဆီးကျိတ်ကင်ဆာဟာ ယောက်ျားတွေမှာ အဖြစ်အများဆုံး ကင်ဆာဖြစ်ပြီး အင်္ဂလန်လူမျိုး ၈ ယောက်မှာ ၁ ယောက်နှုန်း ခံစားရလေ့ရှိပါတယ်။

ဒါပေမဲ့ အတော်များများက အချိန်အတော်ကြာတဲ့အထိ ရောဂါလက္ခဏာတွေ မခံစားရတာမျိုး ဖြစ်တတ်ပါတယ်။

အသက်အန္တရာယ်ပေးတဲ့ ရောဂါမျိုးမဟုတ်ပေမယ့် စောစီးစွာ ကုသပါက ပျောက်ကင်းနိုင်ခြေများပါတယ်။

ဆီးကျိတ်ကင်ဆာ ဖြစ်နိုင်ခြေရှိတဲ့ အခြေအနေတွေကတော့..

(၁) အသက်အရွယ်

အသက် ၅၀ အထက် အမျိုးသားတွေမှာ အဓိက ဖြစ်ပွားနိုင်ပြီး အသက်ကြီးလာတာနဲ့အမျှ ဖြစ်နိုင်ခြေ ပိုများလာပါတယ်။

(၂) မျိုးရိုး

ဆွေမျိုးထဲမှာ ဆီးကျိတ်ကင်ဆာ ဖြစ်ဖူးသူရှိရင် ရောဂါဖြစ်နိုင်ခြေ ၂ ဆခွဲ ပိုများပြီး အမျိုးတွေထဲက အသက် ၆၀ ကျော်မှ ဖြစ်တာဆိုရင် သင်ဟာလည်း ဆီးကျိတ်ကင်ဆာ ဖြစ်နိုင်ခြေ ပိုများပါတယ်။

(၃) လူမျိုး

သေချာအတည်မပြုနိုင်သေးပေမယ့် လူမည်းတွေဟာ အခြားလူမျိုးတွေထက် ဆီးကျိတ်ကင်ဆာ ဖြစ်နိုင်ခြေ ပိုများပါတယ်။

လူမည်းမျိုးရိုးနဲ့ ရောစပ်တဲ့ သူတွေမှာလည်း ဆီးကျိတ်ကင်ဆာ ဖြစ်နိုင်ခြေရှိနေပါတယ်။

 
ဆီးကျိတ်ကင်ဆာ ဖြစ်နေနိုင်တဲ့ အချို့သောရောဂါလက္ခဏာတွေကတော့..

-          မကြာခဏ ဆီးသွားရခြင်း

-          အိမ်သာသို့ အလျင်စလို သွားလိုခြင်း

-          မတ်တပ်ရပ်ဆီးသွားရန် ခက်ခဲခြင်း

-          ဆီးသွားရန် ကြာရှည်ခြင်း၊ အချိန်ကြာခြင်း

-          ဆီးစီးဆင်းမှုအားနည်းခြင်း

-          ဆီးအိမ်မှ အပြည့်အဝ ဆီးမထွက်ဘူးလို့ခံစားရခြင်း

-          ဆီးထဲ ဒါမှမဟုတ် သုတ်ရည်ထဲတွင် သွေးပါခြင်း တို့ဖြစ်နိုင်ပါတယ်။

 
ဆီးကျိတ်ဆိုတာက ဆီးအိမ်အောက်ရှိ သစ်ကြားသီးအရွယ်ခန့် ဂလင်းဖြစ်ပြီး ဆီးပြွန်ကို ရစ်ပတ်ထားပါတယ်။

ဆီးကျိတ်ကင်ဆာဟာ လိင်အင်္ဂါပြောင်းလဲထားတဲ့ အမျိုးသမီးတွေမှာတောင် ဖြစ်နိုင်ခြေ ရှိနေပါသေးတယ်။

#World_Health #ဆီးကျိတ်ကင်ဆာဖြစ်နိုင်ခြေ #စက္ကန့်(၃၀)အတွင်းသုံးသပ်နိုင် #Source: The Sun

တရုတ်နိုင်ငံ၏ အာကာသဥယျာဥ်ဒုတိယမျိုးဆက်မစ်ရှင်တွင် ဟင်းသီးဟင်းရွက်များအောင်မြင်စွာ ရိတ်သိမ်းနိုင်ခဲ့

အာကာသပတ်လမ်းရှိ တရုတ်နိုင်ငံရဲ့ ရှန်ကျိုး-၁၇ မှ အာကာသယာဥ်မှူးတွေဟာ တီယန်ဂေါင် အာကာသစခန်းမစ်ရှင်အဖြစ် အာကာသအခြေစိုက် ဟင်းသီးဟင်းရွက် စိုက်ပျိုးရေးယန္တရားဖြစ်တဲ့ အာကာသဥယျာဥ်ကနေ ဟင်းသီးဟင်းရွက်များကို မကြာသေးမီက နောက်ထပ်တစ်ကြိမ် ရိတ်သိမ်းခဲ့ပါတယ်။
#Asia_Development
Published 09 December 2023
#အာကာသဥယျာဥ် #ဒုတိယမျိုးဆက်မစ်ရှင်
#Yangon_Times #YMG_News #Yangon_Media_Group

#Daily_News
Published 09 December 2023

၁။ မြန်မာ့ကျောက်စိမ်းထည်များကို ဂျပန်၊ တရုတ်နှင့်ဟောင်ကောင်သို့စတင် တင်ပို့နေ

၂။ စက်သုံးဆီဝယ်ယူရခက်သဖြင့် လူမှုကူညီရေး အသင်းများ အခက်တွေ့နေဟုဆို

၃။ အွန်လိုင်းထရိတ်ဒင်း‌နှုန်းထားကြောင့် ရန်ကုန်ရွှေ‌ရည်ညွှန်းဈေးနှုန်း ကျပ်၃၅သိန်းကျော်အထိ ခုန်တက်

၄။ တရုတ်နိုင်ငံ၏ အာကာသဥယျာဥ်ဒုတိယမျိုးဆက်မစ်ရှင်တွင် ဟင်းသီးဟင်းရွက်များအောင်မြင်စွာ ရိတ်သိမ်းနိုင်ခဲ့ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

#World_News
Published 09 December 2023

ဂါဇာမှာဖြစ်ပွားနေတဲ့ အစ္စရေးလ်နဲ့ ပါလက်စ်တိုင်း စစ်သွေးကြွ ဟားမတ်စ်အဖွဲ့တို့ရဲ့ စစ်ပွဲမှာ လူသားချင်းစာနာမှု ချက်ချင်း အပစ်အခတ်ရပ်စဲရေးအတွက် ကုလသမဂ္ဂ လုံခြုံရေးကောင်စီ အဆိုပြုချက်တစ်ရပ်ကို အမေရိကန်က သောကြာနေ့မှာ ဗီတိုအာဏာသုံး ပယ်ချလိုက်ပါတယ်။

ဒါဟာ အမေရိကန်က သူ့ရဲ့မဟာမိတ် အစ္စရေးလ်ကို ကာကွယ်ပေးလိုတာကြောင့် သံတမန်ရေးအရ သီးခြားကွဲထွက်စေခဲ့ပါတယ်။

ယူအေအီးမှတင်သွင်းတဲ့ အဆိုပါမူကြမ်းကို  ကျန် ၁၃ နိုင်ငံက ထောက်ခံမဲပေးခဲ့ပြီး ဗြိတိန်ကတော့ ကြားနေဖြစ်ခဲ့ပါတယ်။

၂ လကြာမြင့်နေပြီဖြစ်တဲ့ စစ်ပွဲကြောင့် တစ်ကမ္ဘာလုံးအပေါ် ခြိမ်းခြောက်မှုရှိနေတာကို ကုလအထွေထွေ အတွင်းရေးမှူးချုပ် အန်တိုနီယိုဂူတာရက်စ်က ဗုဒ္ဓဟူးနေ့မှာ ကုလအဖွဲ့ဝင် ၁၅ နိုင်ငံကို သတိပေးခဲ့ပြီးနောက် မဲဆန္ဒပေးခြင်း ပြုလုပ်ခဲ့တာ ဖြစ်ပါတယ်။

ဂါဇာမှာ တိုက်ခိုက်ခံနေရတာတွေကို ရပ်တန့်ဖို့ တောင်းဆိုရာမှာ မစည်းလုံးနိုင်ဘူးဆိုရင် ပါလက်စ်တိုင်းတွေနဲ့ အလားတူဖြစ်ရပ်မျိုး ကြုံတွေ့နေရတဲ့ ကမ္ဘာတဝှမ်းကလူတွေကို ဘယ်လိုဖြေသိမ့်ရပါ့မလဲလို့ ယူအေအီးမှ လက်ထောက်ကုလသံအမတ် မိုဟာမက်အဘူရှာဟက်က ကောင်စီမှာ တောင်းဆိုလိုက်ပါတယ်။

အမေရိကန်နဲ့ အစ္စရေးလ်တို့ကတော့ အပစ်အခတ်ရပ်စဲရေးကို ဆန့်ကျင်လိုက်ကာ ဒီလိုပြုလုပ်ခြင်းဟာ ဟားမတ်စ်တို့ အခွင့်သာစေလိမ့်မယ်လို့ ယုံကြည်နေပါတယ်။

ဒါပေမဲ့ အမေရိကန်က အရပ်သားများကို ကာကွယ်ပေးဖို့နဲ့ ဟားမတ်စ်တို့ဖမ်းဆီးထားတဲ့ အစ္စရေးလ်ဓားစာခံများကို ပြန်လွှတ်ရန်အတွက်တော့ ထောက်ခံထားပါတယ်။

ကုလသမဂ္ဂဆိုင်ရာ လက်ထောက်အမေရိကန်သံအမတ် ရောဘတ်ဝုဒ်က အဆိုပြုမူကြမ်းဟာ အလျင်စလိုချပြထားပြီး မမျှတတဲ့မူကြမ်းဖြစ်ကာ လက်တွေ့အခြေအနေတွေနဲ့ ကွဲလွဲနေကြောင်း၊ အပစ်အခတ်ရပ်စဲရေးက ရေရှည်မဟုတ်သလို နောက်ထပ်စစ်ပွဲကြီး ဖြစ်လာစေမယ့် လုပ်ရပ်မျိုးကို မထောက်ခံကြောင်း ကောင်စီမှာ ပြောကြားသွားပါတယ်။

ကုလဆိုင်ရာ ဗြိတိန်သံအမတ် ဘာဘရာဝုဒ်ဝါ့က အစ္စရေးလ်ဟာ ဟားမတ်စ်တို့ရဲ့ ခြိမ်းခြောက်လာမှုကို ဖြေရှင်းရန်လိုအပ်ကြောင်း၊ ဒီလိုဖြေရှင်းရာမှာ နိုင်ငံတကာ လူသားချင်းစာနာမှုဥပဒေများအတိုင်း လိုက်နာဆောင်ရွက်ရန် လိုအပ်ကြောင်း ပြောပြသွားပါတယ်။

ကုလဆိုင်ရာ အစ္စရေးလ်သံအမတ် ဂျီလတ်အာဒန်ကတော့ ဓားစာခံတွေအားလုံး ပြန်လွတ်ပြီး ဟားမတ်စ်တို့ပျက်စီးသွားပါမှ အပစ်အခတ်ရပ်စဲမှာဖြစ်တယ်လို့ ပြောကြားသွားပါတယ်။

အရပ်သားတွေကို ကာကွယ်ပေးလိုတဲ့ အစ္စရေးလ်ရည်ရွယ်ချက်နဲ့ မြေပြင်မှာဖြစ်နေတာတွေက ကွာခြားမှုရှိနေတယ်လို့ အမေရိကန် နိုင်ငံခြားရေးဝန်ကြီး အန်တိုနီဘလင်ကန်က ကြာသပတေးနေ့မှာ ပြောကြားလိုက်ပါတယ်။

အစ္စရေးလ်တို့ရဲ့ တိုက်ခိုက်မှုကြောင့် လူပေါင်း ၁၇,၄၈၀ သေဆုံးထားတယ်လို့ ဂါဇာကျန်းမာရေး ဝန်ကြီးဌာနက ထုတ်ပြန်ထားပါတယ်။

#World_News #အပစ်အခတ်ရပ်စဲရေး #ကုလသမဂ္ဂလုံခြုံရေးကောင်စီ၏မူကြမ်း #အမေရိကန်ဗီတိုအာဏာသုံးပိတ်ပင် #Source: Reuters