Published 11 Dec 2022

✳️ တွစ်တာက စာလုံးအရေအတွက်ကို လက်ရှိ စာလုံး၂၈၀ သတ်မှတ်ကန့်သတ်ထားရာမှ နောက်ဆုံးတွင် စာလုံးရေ ၄၀၀၀ အထိ တိုးမြှင့်ပေးမယ်လို့ ကုမ္ပဏီရဲ့ စီအီးအို အီလွန်မတ်စ်က တွစ်တာကနေ အတည်ပြု

✳️ တွစ်တာက စာလုံးရေ ၄၀၀၀ အထိ တိုးမြှင့်ပေးမယ်လို့ သတင်းတွေထွက်နေတာ ဟုတ်သလားလို့ တွစ်တာပေါ်မှာ တစ်ဦးကမေးမြန်းတဲ့အခါ အီလွန်မတ်စ်က “ဟုတ်ပါတယ်” လို့ ပြန်ဖြေခဲ့ခြင်းဖြစ်

✳️ သို့သော် သူက အသေးစိတ်ကိုတော့ ထုတ်မပြောသေး

✳️ တွစ်တာဟာ အစပထမမှာ စာလုံးရေ ၁၄၀ကန့်သတ်ပေးခဲ့ပါတယ်။အဲဒီကနေ ၂၀၁၇ခုနှစ်မှာ စာလုံးရေ ၂၈၀အထိတိုးပေးခဲ့

✳️ ထို့အတွက်တွစ်တာအသုံးပြုသူတွေဟာ သူတို့ရဲ့ဘလော့ခ်ထဲကစာအရှည်ကြီးတွေကို တွစ်တာတွင် ပို့စ်တင်နိုင်တော့မည်ဖြစ်

✳️ တွစ်တာက ယခုအပတ်အတွင်း ယင်း၏ Twitter Blue လစဉ်ကြေးပေးအစီအစဉ်ကို တနင်္လာနေ့တွ် ပြန်လုပ်မည် ဟုကြေညာခဲ့

✳️ အဆိုပါအစီအစဉ်အရ အသုံးပြုသူများသည် အပြာရောင်အမှန်အမှတ်အသားတစ်ခုရရှိမည့်အပြင် အခြားအခွင့်အရေးတွေ ဖြစ်သည့် တွစ်ပို့စ်များကိ တည်းဖြတ်နိုင်ခြင်းနှင့် 1080p ဗွီဒီယိုများတင်နိုင်ခြင်းတို့ ရရှိမည်ဖြစ်

✳️ Twitter Blue ကို အိုင်ဖုန်းအသုံးပြုသူများကိုပို၍ဈေးကြီးသော တစ်လ ၁၁ ဒေါ်လာနှုန်းကောက်ခံမည်ဖြစ်

✳️ အက်ပဲလ်က အက်ပလီးကေးရှင်းရောင်းရငွေမှ ကော်မရှင် ၃၀ ရာခိုင်နှုန်းအထိယူထားသဖြင့် အီလွန်မတ်စ်က ဝေဖန်ခဲ့ပြီးနောက် အိုင်ဖုန်းနှင့်အက်ပဲလ်သုံးသူများထံမှ ဈေးပိုတောင်းခဲ့ခြင်းဖြစ်

Source USA Today

#Twitter

#Elon_Musk

#Tweets_increase_charactors

Published 11 Dec 2022

တရုတ်နိုင်ငံ တောင်ပိုင်း ကွမ်တုံပြည်နယ် ကွမ်ကျူးမြို့တော်မှာ လူဖန်တီးသည့် သားဖောက်ခြင်းဖြင့် မွေးဖွားလာခဲ့တဲ့ ပထမဆုံးအသုတ် ဂျင်တို ပင်ဂွင်းငှက်သုံးကောင်ဟာ ယခုဆို တစ်လသားကလေးတွေရှိလာပါပြီ။ ပင်ဂွင်း ကလေး      သုံးကောင်ဟာ ကျန်းကျန်းမာမာရှိပြီး အခုဆို အများပြည်သူ ကြည့်ရှုနိုင်အောင်ပြသထားပါတယ်။

ကွမ်ကျိူးက ဂရင်းဗျူး အဏ္ဏဝါပြတိုက်မှာ နိုဝင်ဘာလက အဲဒီပင်ဂွင်းကလေးသုံးကောင်ဟာ သားဖောက်မွေးဖွားလာခဲ့တာ ဖြစ်ပြီး မွေးဖွားစဉ်မှာ ကိုယ်အလေးချိန် ၈၀ ဂရမ်ဆီရှိကြပါတယ်။ ပင်ဂွင်းမိဘနှင့် စောင့်ရှောက်ထိန်းသိမ်းရေးအဖွဲ့ရဲ့ ပြုစုမှု အောက်မှာ သူတို့ဟာ အခုဆို ကိုယ်အလေးချိန် ၂.၅ ကီလိုဂရမ်အထိ ကြီးထွားလာကြပြီဖြစ်ပါတယ်။

သူတို့ကျန်းမာစွာကြီးထွားလာကြဖို့အတွက် ပြတိုက်က သူတိုကလေးတွေကို အစာစားတာ၊ ဆော့ကစားတာ၊အိပ်စက်တာ နှင့် အခြားလှုပ်ရှားမှုတွေကို ၂၄နာရီမပြတ် စောင့်ကြပ်ကြည့်ရှုပေးနေကြပါတယ်။ပြီးတော့ သူတို့ရဲ့ကိုယ်အလေးချိန်နှင့် ကျန်းမာရေးအခြေအနေတွေကိုလည်း အမြဲစောင့်ကြည့်ပေးနေကြပါတယ်။

“ ငှက်ကလေးသုံးကောင်ဟာ အခုထက်ထိ ကျန်းမာနေကြပါတယ်။ နောက်ဆို ကျွန်တော်တို့စောင့်ကြည့်တဲ့အဖွဲ့ဟာ နေ့တိုင်း သူတို့ကို ကိုယ်အလေးချိန်ချိန်ပြီး သူတို့ဟာ ပုံမှန်ကြီးထွားလာနေသလား၊ ဒါမှမဟုတ် ကိုယ်အလေးချိန်  ကျဆင်းလာသလားဆိုတာ  စောင့်ကြည့်မှာပါ။ ပြီးတော့ ပင်ဂွင်းတွေကို အားဆေးတွေကိုလည်း တိုက်ကျွေးမှာဖြစ်ပါ  တယ်” လို့ ပင်ဂွင်းထိန်း ပင်န် ယူကျင်းကပြောပါတယ်။

ဂျင်တိုပင်ဂွင်းတွေကို အန္တာတိတ်မဟုတ်တဲ့ဒေသမှာ လူလုပ် သားဖောက်တယ်ဆိုဟာ ကမ္ဘာကအသိအမှတ်ပြုတဲ့ စိန်ခေါ်မှုတစ်ခုဖြစ်ပါတယ်။ ဒီလိုလူကဖန်တီးသားဖောက်ဖို့ ပြင်ထန်တဲ့သားဖောက်ဝန်းကျင်တစ်ခုနှင့် သိပ္ပံနည်းကျ နည်းစနစ်တွေလိုအပ်ပါတယ်။ အဲဒီအထဲမှာ အလင်းအား၊အပူချိန်၊စိုထိုင်းဆနှင့် ရေဝန်းကျင်ရဲ့သိမ်မွေ့တဲ့အပြောင်းအလဲ တွေ ပါဝင်ပါတယ်။ အဲဒါတွေဟာ သားဖောက်ဖို့ လိုအပ်တဲ့အချက်တွေပါ လို့သူကဆက်ပြောပါတယ်။

Source CCTV+

#Artificially_bred _Gentoo _penguins

#Grandview-Aquarium_Guangzhou

#Science_China

Published 11 December 2022

ကလေး(၆)ဦးရဲ့မိခင် ရာချယ်ရစ်ချ်ဝေးက သူမဟာ  သူမနောက်ဆုံးမွေးဖွားလိုက်တဲ့ကလေးတွေထက် အသက် (၃)နှစ်  (နည်းပညာသက်သက်အရ)သာ အသက်ကြီးနေတယ်လို့သိလိုက်ရတဲ့အခါ အတော်စိတ်လှုပ်ရှားသွားခဲ့ပါတယ်။

ပြီးခဲ့တဲ့ သုံးပတ်က မွေးဖွားခဲ့တဲ့ အမြွှာနှစ်ဦးဟာ တကယ်တမ်းတော့ အသက်အကြီးဆုံးသန္ဓေသားလောင်းတွေကနေ ဖန်တီးယူခဲ့တာဖြစ်ပါတယ်။

ရာချယ်နှင့် သူမရဲ့ခင်ပွန်း ဖိလစ်တို့ဟာ ၁၉၉၂ခုနှစ်ဧပြီလတုန်းက တီမိုသီနှင့်လင်ဒီယာလို့အမည်ပေးထားတဲ့ သန္ဓေသား လောင်း သားနှင့်သမီးကို အေးခဲထားခဲ့ပါတယ်။

ကလေးတွေရဲ့ ဇီဝဆိုင်ရာမိဘနှစ်ပါး ဘယ်သူဆိုတာ မသိရပါဘူး။ သူတို့ဟာ IVF (ဖန်ပြွန်နည်းဖြင့် သန္ဓေအောင်စေပြီး) နောက် သူတို့ရဲ့ သန္ဓေသားလောင်းကို အမျိုးသား အဆင့် သန္ဓေသားလောင်း လှူဒါန်းရေးဌာန သို့မဟုတ် NEDC အင်န်အီးဒီစီထံ လှူဒါန်းခဲ့ကြပါတယ်။

“ဒီသန္ဓေသားလောင်းတွေ အသက်စရှင်တဲ့အချိန်မှာ ကျွန်တော်က ငါးနှစ်သားပဲရှိသေးတယ်ဗျ” လို့ ဖခင်ဖြစ်သူဖိလစ်က ပြောပါတယ်။အဲဒီတုန်းက သူ့ဇနီး ရာချယ်က (၃)နှစ်အရွယ်မိန်းကလေးတစ်ဦးသာရှိသေးတယ်လို့လည်း သူက ပြောပါတယ်။

“ဒီအကြောင်း ကျွန်တော်တို့ပြောပြတာကို နားထောင်မိကြတဲ့သူတိုင်း အလန့်တကြားတွေဖြစ်ကုန်ကြတယ်” လို့ ဖိလစ်က ဆက်ပြောပါတယ်။

အသက်(၂)နှစ်နှင့် (၈)နှစ်ကြား သားသမီး(၄)ယောက်ရှိတဲ့ ရစ်ချ်ဝေးဟာ၂၀၁၉ခုနှစ် ဒီဇင်ဘာလထဲ  ာ NEDC ကို ကနဦး ကတည်းက သွားရောက်ချည်းကပ်ခဲ့တာပါ။ “ ကျွန်မတို့ရဲ့ အကြီးဆုံးကလေး(၃)ယောက်ကိုယ်ဝန်လွယ်ရာမှာ မျိုးအောင်ဖို့ အကူအညီလိုအပ်ခဲ့တာပါ” လို့ ရစ်ချ်ဝေးကပြောပါတယ်။ သူမဟာ ဟိုမုန်းအားမြှင့်တဲ့ ကလိုမစ်ကို သုံးစွဲခဲ့ရပါတယ်။

အဲသလိုနှင့် ၂၀၂၀ မှာ စတုတ္ထမြောက် ကိုယ်ဝန်လွယ်ဖို့အတွက် သူတို့က NEDC က အေးခဲသန္ဓေသားလောင်းကို မွေးစားဖို့ စဉ်းစားခဲ့ပါတယ်။

“ အဲဒီသန္ဓေသားလောင်းမွေးစားဖို့ ကျွန်မတို့ ပိုက်ဆုံသုံးမယ်လို့ဆုံးဖြတ်ခဲ့ပါတယ်” လို့ သူမကပြောပါတယ်။ဒါပေမယ့် အဲဒီ အစီအစဉ်က လအနည်းငယ်အကြာမှာ ပြောင်းသွားပါတယ်။ ဘာဖြစ်လို့လဲဆိုတော့ သူမဟာ သဘာဝအတိုင်း ကိုယ်ဝန်ရ လာလို့ဖြစ်ပါတယ်။ အဲဒီကလေးက အခုဆို အသက်(၂)နှစ်ရှိပါပြီ။

ဒါပေမယ့် သူတို့က နောက်ထပ်ကလေးတွေထပ်ယူဦးမယ်လို့ ဆုံးဖြတ်ခဲ့ပြန်ပါတယ်။အဲဒါကြောင့် ယခင်စိတ်ကူးကို ပြန်ပြီး အကောင်အထည်ဖော်လိုက်ပါတော့တယ်။

ကျွန်တော်တို့က ဘုရားသခင်ပေးသလောက် သားသမီးတွေရချင်တယ်” လို့ ဘာသာရေးကိုင်းရှိုင်းတဲ့ သူတို့ကပြောပါ တယ်။

အဲဒါကြောင့် ယခု ဝါရှင်တန်ပြည်နယ် ဗန်ကူးဗားမှာနေထိုင်တဲ့သူတို့လင်မယားဟာ NEDC ရဲ့ အထူးစဉ်းစားရွေးချယ်တဲ့ ဌာနခွဲကနေ သန္ဓေသားလောင်းတွေကိုရယူခဲ့ပါတယ်။ “အဲဒီဌာနခွဲကိုလူတွေက မကြာခဏကျော်သွားတတ်ကြတယ်။ ဘာဖြစ်လို့လဲဆိုတော့ မျိုးရိုးဗီဇပုံစံမမှန်တဲ့မိဘတွေက လှူဒါန်းထားတဲ့ နေရာဖြစ်လို့ပဲ” လို့သူမကပြောပါတယ်။

“ ကျွန်မက ပြည့်စုံကောင်းမွန်မှုရှိသမား မရှိဘူးလား အဲဒါကို အရေးမထားဘူး” လို့ အသက် ၂၄နှစ်အရွယ်ရှိပြီဖြစ်တဲ့ မိခင်ရစ်ချ်ဝေးကပြောပါတယ်။ အဲဒီအမြွာသန္ဓေသားလောင်းတွေရဲ ဖခင်ဟာ အေအယ်လ်အက်စ်ရောဂါလို့ခေါ်တဲ့ Lou Gehrig (အာရုံကြောရောဂါတစ်မျိုး) နှင့် သေဆုံးခဲ့တာလို့တော့ သူတို့သိခဲ့ပါတယ်လို့ဆိုပါတယ်။

“အဲဒါကြောင့်ကလေးတွေမှာ မျိုးဗီဇချို့ယွင်းမှုရှိရင်လည်းရှိမယ် မရှိရင်လည်းမရှိဘူး။ဒါပေမယ့် ကျွန်မတို့ ဒါကို ဂရုမစိုက်ဘူး” လို့သူမကပြောပါတယ်။

အခြားမိဘတွေနှင့်မတူဘဲ သူတို့က သန္ဓေသားလောင်းရဲ့ အသက်ကိုလည်း အရေးမစိုက်ဘူး လို့ ဖိလစ်ကပြောပါတယ်။ သူတို့ဟာ သူတို့ရွေးချယ်ခဲ့တဲ့ သန္ဓေသားလောင်း (၃)ခုထဲမှာ (၂)ခုက ကိုယ်ဝန်ဆောင်နိုင်ခဲ့တာဖြစ်ပါတယ်။ ရာချယ်လ်ဟာ ၂၀၂၂ခုနှစ် အောက်တိုဘာ ၃၁ရက်နေ့ ၃၇ပတ်နှင့် (၂)ရက် ကိုယ်ဝန်ဆောင်အပြီးမှာ အမြွှာကလေးတွေကို မွေးဖွားခဲ့ပါတယ်။ တင်မိုသီဟာ (၆)ပေါင်(၇)အောင်စနှင့် လင်ဒီယာက (၅)ပေါင်နှင့် (၁၁)အောင်စရှိပါတယ်။သူတို့ရဲ့ သန္ဓေသားလောင်းဟာ အသက်အကြီးဆုံးသန္ဓေသားလောင်းအဖြစ်  တင်နက်ဆီပရက်စွန်တက္ကသိုလ် ဆေးဝါးစာကြည့်    တိုက်ရဲ့ မှတ်တမ်း စံချိန်ချိုးခဲ့ပါတယ်။ သူ့အရင်က  ၂၀၁၇ခုနှစ်မှာ မွေးခဲ့တဲ့ မော်လီဂစ်ဆန်ကလေးရဲ့ အေးခဲသန္ဓေသား လောင်းဆိုရင် ၂၄နှစ်သားပဲရှိခဲ့တာဖြစ်ပါတယ်။

သူတို့ဟာနာမည်ကြီးချင်လို့ အခုလိုအသက်အကြီးဆုံးသန္ဓေသားကို ရွေးချယ်ခဲ့တာမဟုတ်ဘူးလို့လည်း သူမကပြောပါ တယ်။အမြွှာကလေးတွေ နားလည်တတ်တဲ့အရွယ်ရောက်ရင် သူတို့ဟာ အေးခဲသန္ဓေသားလောင်းတွေကို မွေးစားပြီး မွေးဖွားလာတဲ့အကြောင်း ပြောပြမယ်လို့လည်း သူတို့ကပြောပါတယ်။

“ သူတို့ဟာ မွေးစားထားတယ်ဆိုတာ သူတို့အမြဲသိနေရမယ်။ သန္ဓေသားလောင်းမွေးစားတာဟာ သူတို့အတွက် တကယ့် အထူးတလည်ဖြစ်စေခဲ့တယ်ဆိုတာသူတို့သိရမယ်” လို့ ရာချယ်လ်ကပြောပါတယ်။

Source: Insider

#Rachel_Philip

#30_years_old_Frozen_Embryos

#Science_Tech

Published 4 December 2022

အိန္ဒိယရုပ်သံ အမှုဆောင်တစ်ဦးဖြစ်တဲ့ အာသာ ရာရှက်ဟာ ထိပ်ပြောင်တစ်ဦးပါ။ သူဟာ ချောမောတဲ့သူတစ်ဦးလို့ဖြစ်ချင်ပြီး အိမ်ထောင်ပြုချင်ပါပြီ။ ဒါပေမယ့် အသက် ၃၀ အရွယ်သူအနေနှင့် အန္တရာယ်မရှိဘူးလို့ မြင်မိတဲ့ ဆံပင်အစားထိုးခွဲစိတ်ကုသမှုဟာ တကယ်တမ်းတော့ သေလုမျောပါးဖြစ်တဲ့အထိ မှားသွားခဲ့ပြီဆိုတာသူသိလိုက်ရပါတော့တယ်။

အမျိုးသမီးတွေဟာ သူတို့ရဲ့ ရုပ်ဆင်းသွင်ပြင်နှင့် ချိန်ထိုးတန်ဖိုးဖြတ်လေ့ရှိခဲ့ကြပါတယ်။ အခုတော့ ရုပ်ဝတ္တုနောက် လိုက်ပါလာမှု တိုးပွားလာနေတဲ့ အိန္ဒိယလူမှုအဖွဲ့အစည်းမှ အမျိုးသားတွေဟာလည်း သူတို့ကိုယ်သူတို့ နုပျိုလှပဖို့ ၊ကြည့်ပျော်ရှုပျော်ရှိဖို့နှင့် သူတို့ရဲ့ လူမှုရပ်တည်နေမှုတွေ ဆုံးရှုံးမှာ စိုးရွံမှုတွေရဲ့ ဖိအားကို ခံစားနေကြရပါတယ်။

အဲဒါကြောင့်  ဖြုန်းလို့ရတဲ့ ဝင်ငွေတွေမြင့်တက်လာပြီး တစ်ကိုယ်ရည်ရုပ်သွင်ကို  ပိုပြီး အားကောင်းလာဖို့  အာရုံစိုက်ကြတဲ့အနေနှင့် ထိပ်ပြောင်အမျိုးသားတွေဟာပိုပြီးတော့ ဆံပင်အစားထိုးခွဲစိတ်ကုသမှုခံယူလာကြပါတယ်။

ဒါပေမယ့် အားနည်းလှတဲ့ ဥပဒေတွေနှင့် လုပ်ထုံးလုပ်နည်းတွေကြောင့်  တစ်ခါတစ်ခါ အချို့ အပျော်တမ်းသမားတွေဟာ ယူကျုကနေကြည့်ပြီး ခွဲစိတ်ကုသမှုတွေလုပ်ပေးနေကြလို့ အသက်ဆုံးရှုံးမှုတွေအထိဖြစ်နေကြရပါတယ်။

ရာရှက်ဟာ မိသားစုတစ်စုလုံးကို တစ်ဦးတည်းလုပ်ကျွေးနေသူဖြစ်ပြီး အိမ်တစ်လုံးပိုင်ဆိုင်ဖို့နှင့် သူ့နှမနှစ်ဦးအိမ်ထောင်ပြုပေးဖို့ စတဲ့  ပိုကောင်းမွန်တဲ့ ဘဝကို မျှော်လင့်သူပါ။

ဒါပေမယ့် သူဟာ ပြီးခဲ့တဲ့နှစ်က ဒေလီမှာရှိတဲ့ ဆံကေသာခွဲစိတ်ခန်းတစ်ခုမှာ ဆံပင်အစားထိုးခွဲစိတ်ကုသမှုလုပ်ပြီးတဲ့နောက် ပိုးဝင်သွားခဲ့ပါတယ်လို့  တုန်လှုပ်နေတဲ့ အသက် ၆၂နှစ်အရွယ်သူ့မိခင်  အက်ဆီယာ ဘီဂမ်က အေအက်ဖ်ပီကိုပြောပါတယ်။

ဦးခေါင်းကစပြီး သူဟာဖူးရောင်လာပါတယ်။သူဟာ ကြောက်စရာကောင်းလောက်အောင် နာကျင်တဲ့ ဒဏ်ကိုခံစားခဲ့ရပါတယ်။

“ ကျွန်မသားလေးဟာ အလွန်နာကျင်တဲ့ဝေဒနာခံစားရပြီး ကွယ်လွန်သွားခဲ့တယ်။ သူ့ကျောက်ကပ်တွေက အလုပ်ဆက် မလုပ်တော့ဘူး။ အခြားကိုယ်အင်္ဂါအစိတ်အပိုင်းတွေလည်း ပျက်စီးကုန်တယ်” လို့ သူမက ကြေကွဲစွာပြောပါတယ်။

သေဆုံးခါနီးမှာ ရာရှက်ရဲ ရောင်ကိုင်းနေတဲ့ မျက်နှာကြီးနှင့် ခန္ဓာကိုယ်တစ်ခုလုံး အညိအမည်းစွဲနေတဲ့ ဓာတ်ပုံတွေနှင့်အတူ  မိသားစုက ရဲမှာ တိုင်ချက်ဖွင့်ခဲ့ပါတယ်။

သူ့ကို ခွဲစိတ်ပေးတဲ့သူနှစ်ဦးအပါအဝင် လူလေးဦးကို ရဲက ဖမ်းဆီးခဲ့ပြီး အမှုကိုစစ်ဆေးဖို့ စောင့်ဆိုင်းနေပါတယ်။

“ ကျွန်မသားကို ဆုံးရှုံးလိုက်ရပေမယ့် လူအချို့ရဲ့ မရိုးမသား လုပ်ဆောင်မှုတွေကြောင့် အခြားမိခင်တွေ ဒီလိုဆုံးရှုံးရတာမျိုး မဖြစ်စေချင်ဘူး” လို့ သူမကပြောပါတယ်။

ကျွမ်းကျင်တဲ့ ခွဲစိတ်ပညာရှင်တွေက ခွဲစိတ်ပေးရင်တော့ ဆံပင်အစားထိုခွဲစိတ်မှုဟာ ဘဝကိုပြောင်းလဲစေပြီး ကိုယ့်ကိုကိုယ် ယုံကြည်မှုတွေတိုးပွားစေတဲ့ အတွေ့အကြုံတစ်ခုဖြစ်ပါတယ်။အထူးသဖြင့် တစ်ကိုယ်ရည်နှင့်လုပ်ငန်းပိုင်းဆိုင်ရာတိုးတက်ဖို့ရှာဖွေနေသူ ငယ်ရွယ်တဲ့အိန္ဒိယအမျိုးသားတွေအတွက်ပါ။

အမျိုးသားတွေဟာ သူတို့ရဲ့တစ်ကိုယ်ရည်ကျော့ရှင်းမှုကို ဘဝဟန်ပန်ပြောင်းလဲမှုအဖြစ် ပိုပြီး အာရုံစိုက်လာကြတယ်လို့ လူမှုရေးသုံးသပ်ဝေဖန်သူ ဟာရစ်လိုင်ယာကပြောပါတယ်။

ဆံပင်အစားထိုးခွဲစိတ်ကုသမှုလုပ်ငန်းစဉ်မှာ မွေးညှင်းပေါက်တွေကို အမွှေးတွေထူထပ်နေတဲ့နေရာကနေ ခွာထုတ်ယူရပါတယ်။ အထူးသဖြင့် ဦးခေါင်းရဲ့နောက်ဘက်ဖြစ်ပါတယ်။ အဲဒီနောက် အဲဒီဆံပင်တွေကို ပြောင်နေတဲ့ ဦးရေခွံတွေနေရာမှာ ပြန်စိုက်ယူရတာပါ။

နယူးဒေလီအရပ်မှာ သူ့ရဲ့  ဈေးကြီးတဲ့ ဆေးခန်းမှာ တစ်လတစ်လကို ခွဲစိတ်ကုသမှု ၁၅ ခုလုပ်ပေးနေရပါတယ်လို့ ဒေါက်တာ မာယန့်ခ်ဆင်းက ပြောပါတယ်။ အများစုဟာ အသက် ၂၅နှစ်မှ ၃၅ နှစ်အကြား လူငယ်အမျိုးသားတွေဖြစ်ကြ ပြီး အိမ်ထောင်ပြုတော့မယ်သူတွေ ဒါမှမဟုတ် လုပ်ငန်းခွင်ထဲ တိုးတက်မှုရှာနေသူတွေလို့ ဆိုပါတယ်။

ခွဲစိတ်ကုသစရိတ်ဟာ တစ်ဦးကို ရူပီး သုံးသိန်းခွဲခန့်(ဒေါ်လာ  ၄၃၀၀) ရှိနေပါတယ်။ လူသန်းပေါင်းများစွာဟာ တစ်ရက်ကို နှစ်ဒေါ်လာအောက်ပဲဝင်ငွေရှိနေတဲ့ အိန္ဒိယမှာ ဒီပိုက်ဆံဟာ နည်းနည်းနောနောတော့ မဟုတ်ပါဘူး။

ဒေါက်တာရမ်းကုတွေကြောင့် ဒီအလုပ်ဟာ အတော်နာမည်ပျက်နေပါပြီ လို့ အိန္ဒိယနိုင်ငံ ဆံပင်ပြန်ပေါက်ခွဲစိတ်ကုဆရာဝန်အသင်းရဲ့ အတွင်းရေးမှူးလည်းဖြစ်တဲ့ ဒေါက်တာဆင်းကပြောပါတယ်။

လူတွေက ဒီခွဲစိတ်မှုကို အသေးစားလေးလို့ထင်ကြတယ်။ တကယ်တမ်းက ခြောက်နာရီကနေ ရှစ်နာရီလောက်အထိ အချိန်ကြာတတ်တယ်လို့လည်း သူကပြောပါတယ်။

တင်းကြပ်တဲ့ လမ်းညွှန်ထိန်းကျောင်းမှုတွေ တကယ့်ကိုလိုအပ်နေပါပြီလို့လည်း သူကပြောလိုက်ပါတယ်။

Source AFP

#Hair_transplant

#Deadly_hair_tranplant_india

#India_hair_transplant

Published 30 Nov 2022

ရုရှားလေတပ်နှင့် တရုတ်လေတပ်တို့ဟာ အာရှပစိဖိတ်မှာ ပူးတွဲ လေ့ကျင့်ပျံသန်းမှုတွေ ပြုလုပ်ခဲ့ကြပါတယ်။ အဲဒီပူးတွဲ လေ့ကျင့်မှုတွေကို မှတ်တမ်းတင်ထားတဲ့ ဗွီဒီယိုကို ရုရှားကာကွယ်ရေးဝန်ကြီးဌာနက နိုဝင်ဘာ (၃၀)ရက်မှာ ထုတ်ပြန်ခဲ့ ပါတယ်။ “ ရုရှား လေတပ်ရဲ့ Tu-95ms မဟာဗျူဟာမြောက် ဒုံးကျည်တင် လေယာဉ်တွေနှင့် တရုတ်လွတ်မြောက်ရေး  တပ်မတော်ရဲ့ Xian-6k အပါအဝင် မဟာဗျူဟာမြောက် ဗုံးကြဲလေယာဉ်တွေပါဝင်တဲ့ လေယာဉ်အုပ်စုဟာ ဂျပန်နှင့် အရှေ့ တရုတ်ပင်လယ်အပေါ်ကနေ ကင်းထောက်ပျံသန်းမှုတွေပြုလုပ်ခဲ့ကြတယ်”လို့ ကြေငြာချက်မှာ ဖော်ပြထားပါတယ်။

Source: AFP

#Joint_air_patrols_Strategic_Planes

#Russia_China_Joint_Air_Patrols

#Asia_Pacific_Politics

Published 27 Nov 2022

တရုတ်နိုင်ငံတောင်ပိုင်း ကွမ်ရှီးပြည်နယ်က ယူလင်းပြည်နယ်က ကြက်မွေးမြူရေးစခန်းတစ်ခုမှာ မွေးမြူရေးလုပ်ငန်းတွေ တိုးတက်ဖို့အတွက် စက်ရုပ်နှင့် ဒစ်ဂျစ်တယ် ပလက်‌ဖောင်းတွေကို စတင်အသုံးပြုနေပါတယ်။

မွေးမြူရေးစခန်းမှာ စမ်းသပ်မှုတွေပြုလုပ်ပြီးနောက် နိုဝင်ဘာလကစပြီး ဒစ်ဂျစ်တယ် ပလက်ဖောင်းကို စတင်အသုံးပြု ဆောင်ရွက်နေတာဖြစ်ပါတယ်။  ကြက်လှောင်အိမ်ထဲမှာရှိတဲ့ အတန်းတစ်တန်းစီက ကြက်တွေကို စက်ရုပ်တစ်ရုပ်က မျက်မြင်စစ်ဆေးပေးပါတယ်။ အပူချိန်၊စိုထိုင်းဆ၊အလင်းရောင်အခြေအနေနှင့် နေမကောင်းတဲ့၊သေသွားတဲ့ကြက်တွေရဲ့ အနေအထားစတာတွေကို ဒစ်ဂျစ်တယ်ပလက်ဖောင်းကနေ ပြသပေးနေပါတယ်။အဲဒီသတင်းအချက်အလက်တွေဟာ ဝန်ထမ်းတွေရဲ့လက်ကိုင်ဖုန်းတွေဆီမှာ ထည့်သွင်းထားတဲ့ အက်ပလီကေးရှင်းတွေဆီ စဉ်ဆက်မပြတ်ပို့လွှတ်ပေးနေပါတယ်။

“ အရင်တုန်းက ကြက်အကောင်ငါးထောင်ကို မျိုးဖောက်သူတစ်ဦးထားခဲ့ရာက အခု ကြက်အကောင် တစ်သိန်းရှစ်သောင်းကို တစ်ယောက်အထိ ရလာပါတယ်”လို့ စိုက်ပျိုးရေးနှင့် တိရိစ္စ္ဆာန် မွေးမြူရေးခြံများရဲ့ နည်းပညာ ဒါရိုက်တာ လီဖားရှန်းက ပြောပါတယ်။

သေနေတဲ့ကြက်တွေရဲ့ ၉၉ရာခိုင်နှုန်းလောက်အထိ စက်ရုံတွေက သိနိုင်ကြတယ်လို့ ဝန်ထမ်းတစ်ဦးကပြောပါတယ်။  စက်ရုပ်ပေါ်မှာရှိတဲ့ အမှတ်အသားကနေ အလုပ်သမားတွေဟာ ဖျားနာနေတဲ့ သေနေတဲ့ကြက်တွေကို ရှာနိုင်ကြတာ ဖြစ်ပါတယ်။

ကွမ်ရှီးက စိုက်ပျိုးရေးလုပ်ငန်းတွေကို big data(ဘစ်ဒေတာ)နှင့်ပေါင်းစပ်ဖို့အတွက် ဉာဏ်ရှိတဲ့ မွေးမြူရေးသုံး စက်ရုပ်တွေကို ရွေးချယ်အသုံးပြုတာဟာ အထင်ကရ စီမံကိန်းတစ်ခုဖြစ်နေပါတယ်။ ဒါဟာ  အမေရိကန်ဒေါ်လာ ၉.၈၁ သန်းနှင့်ညီမျှတဲ့ ရင်းနှီးမြှပ်နှံမှု ယွမ် သန်း၇၀ကျော်ရှိတဲ့ အလိုအလျောက်ထိန်းချုပ်သည့် ဉာဏ်ရည်ရှိစိုက်ပျိုးမွေးမြူရေး ဂေဟနည်းကျလူ့အသိုက်အဝန်းစီမံကိန်းကြီးရဲ့ အစိတ်အပိုင်းလည်းဖြစ်ပါတယ်။

“ ကြက်ဥတွေနှင့် မွေးမြူရေးလုပ်ငန်းအတွက် ဒစ်ဂျစ်တယ်စီမံခန့်ခွဲမှုပလက်ဖောင်း သုတေသနနှင့်ဖွံ့ဖြိုးရေးလုပ်ငငန်းဟာ ထုတ်လုပ်မှုကုန်ကျစရိတ်ကို သိသာစွာလျှော့ချပေးပါတယ်။  ကျေးလက်ဒေသဖွံ့ဖြိုးတိုးတက်ရေးကို အရည်အသွေးမြင့် ဒစ်ဂျစ်တယ်စိုက်ပျိုးရေးတိုးတက်မှုနှင့်အတူ လုပ်ဆောင်ဖို့ ကျွန်တော်တို့အားပေးနေပါတယ်” လို့ အဲဒီ ခြံရဲ့ ဘုတ်အဖွဲ့ ဥက္ကဋ္ဌ တန်ရှန်ဆောင်းက ပြောပါတယ်။

Source: CCTV Plus

#Robots_and_Digital_platforms_in _livestock

#China_ Guangxi

#China_Modern_farming