#WorldHealth
Published- 19 February 2022
ကိုဗစ်ကာကွယ်ဆေးထိုးနှံခြင်းမရှိဘဲ ကိုဗစ်ရောဂါအပျော့စားမှ အလယ်အလတ်အဆင့်ခံစားရတဲ့ လူလတ်ပိုင်းတွေကို အစာအိမ်အက်ဆစ်ဓာတ်ထိန်းညှိပေးတဲ့ အန်တဆစ်(Antacid)ဆေးဝါးအမျိုးအစား ဖာမိုတဒင်း(Famotidine)ဖြင့် ကုသကြည့်ရာမှာ ရောင်ရမ်းခြင်းနဲ့ ရောဂါလက္ခဏာတွေ အလျင်အမြန်သက်သာလာကြောင်း စမ်းသပ်ချက်တစ်ခုမှာ တွေ့ရှိရပါတယ်။

Pepcid အမှတ်တံဆိပ်ဖြင့် ဖာမိုတဒင်းဆေးတွေဟာ အစာအိမ်အချဉ်တက်ခြင်းဝေဒနာကို သက်သာစေဖို့ အသုံးပြုလေ့ရှိတဲ့ဆေးဖြစ်ပြီး တစ်နေ့သုံးကြိမ်ဖြင့် ၂ ပတ်တာ သောက်သုံးရလေ့ရှိပါတယ်။

ဖာမိုတဒင်းကို Johnson & Johnson ကိုဗစ်ကာကွယ်ဆေးမှာလည်း တွေ့ရှိရပြီး စမ်းသပ်လေ့လာမယ့် လူနာ ၅၅ ဦးရဲ့တဝက်နီးပါးခန့်ကို အသုံးပြုစေခဲ့ပါတယ်။
ကျန်တဲ့လူနာတွေကို အာနိသင်မပါဝင်တဲ့ဆေးများ အသုံးပြုစေခဲ့ပါတယ်။

ဖာမိုတဒင်းအသုံးပြုတဲ့လူနာတွေမှာ ရောဂါလက္ခဏာ ၁၆ မျိုးထဲက ၁၄ မျိုးလောက် အလျင်အမြန်သက်သာလာခဲ့ပြီး အနံ့အရသာပျောက်ခြင်း၊ အသက်ရှူရခက်ခဲခြင်း၊ ဝမ်းဗိုက်အောင့်ခြင်းတို့ ပါဝင်ပါတယ်။

ဒါ့အပြင် လူနာရဲ့ခန္ဓာကိုယ်ခုခံအားစနစ်အပေါ် ဆိုးကျိုးသက်ရောက်ခြင်းမရှိဘဲ ရောင်ရမ်းခြင်းလက္ခဏာတွေကို လျင်မြန်စွာသက်သာလာစေကြောင်း Gut ဂျာနယ်မှာ ဖော်ပြထားပါတယ်။

လေ့လာခဲ့တဲ့လူနာတွေရဲ့ ၃ ပုံ ၁ ပုံက လူမည်းလူမျိုးတွေဖြစ်ပြီး ၄ ပုံ ၁ ပုံက အမေရိကအလယ်ပိုင်းနဲ့တောင်ပိုင်းမှ လူမျိုးများဖြစ်ပါတယ်။

"ကျွန်တော်တို့ မျှဝေခဲ့တဲ့ လေ့လာမှုအချက်အလက်များဖြင့် ကိုဗစ်ရောဂါလူနာတွေမှာ ဖာမိုတဒင်းဆေးဝါးများ အသုံးပြုနိုင်ကြောင်း အနာဂတ်မှာစမ်းသပ်ချက်တွေ ပြုလုပ်နိုင်မှာဖြစ်ပါတယ်" လို့ နော့သ်ဝဲလ်ကျန်းမာရေးနှင့် Cold Spring Harbor ဓာတ်ခွဲခန်းမှ ဦးဆောင်လေ့လာသူ ဒေါက်တာ'တိုဘီယပ်စ်ဂျန်နိုဝစ်ဇ်'က သတင်းစာရှင်းလင်းပွဲမှာ ပြောကြားခဲ့ပါတယ်။
Source: Reuters.

#LocalNews
Published - 18 Feb 2022

မြန်မာနိုင်ငံမှာ ကိုဗစ်မျိုးကွဲသစ် အိုမီခရွန် ကူးစက်ခံရသူ စတင်တွေ့ရှိခဲ့တယ်လို့ ၂၀၂၁ ခုနှစ်၊ ဒီဇင်ဘာ ၂၈ ရက်မှာ ကျန်းမာ ရေးဝန်ကြီးဌာနက ကြေညာခဲ့ပြီး ငါးလအတွင်း ကိုဗစ်ကူးစက်ခံရမှုဟာ အမြင့်ဆုံးသို့ ပြန်ရောက်လာတယ်လို့ ISP Myanmar ၏ သုတေသနစစ်တမ်းတစ်ရပ်မှာ ဖော်ပြခဲ့ပါတယ်။

ကျန်းမာရေးဝန်ကြီးဌာနက အိုမီခရွန်တွေ့ရှိမှုနဲ့ပတ်သက်ပြီး (၁၅)ကြိမ် သတင်းထုတ်ပြန်ထားပြီး ၂၀၂၂ ခုနှစ်၊ ဖေဖော်ဝါရီ ၃ ရက်အထိ နောက်ဆုံးထုတ်ပြန်ချက်အရ ပိုးတွေ့လူနာ ၃၄၈ ဦးရှိခဲ့တယ်လို့ သိရပါတယ်။

သို့သော်လည်း ဖေဖော်ဝါရီ ပထမပတ်နဲ့ ဒုတိယပတ်အတွင်းမှာပဲ အိုမီခရွန် ကူးစက်ခံရတဲ့ လက္ခဏာရှိသူ လူအများစုမှာ ဖြစ်လာတာကြောင့် အိုမီခရွန်ကူးစက်ခံရမှုဟာ နစကရဲ့ ကျန်းမာရေးဝန်ကြီးဌာန၏ ထုတ်ပြန်တဲ့ပမာဏထက် အဆမတန်များပြားပြီး အလျင်အမြန် ကူးစက်ပြန့်နှံ့နေတယ်လို့ ယူဆနိုင်ကြောင်းကိုလည်း ISP Myanmar က ဆိုပါတယ်။

ISP Myanmar ၏ ထုတ်ပြန်ချက်အရ ကျန်းမာရေးဝန်ကြီးဌာန၏ တရားဝင်ကိန်းဂဏန်းတွေကို ဆန်းစစ်ကြည့်ပါက ကိုဗစ်ကူးစက်မှုဟာ ငါးလအတွင်း အမြင့်ဆုံးပြန်ရောက်လာတဲ့အပြင် နောက်ထပ် လှိုင်းတခုဖြစ်မယ့် အသွင်ဆောင်လာတာကို တွေ့ရကြောင်း၊ ဒါ့အပြင် ဒီကူးစက်မှုတွေထဲမှာလည်း ရန်ကုန်တိုင်းအတွင်း ကူးစက်မှုက အများဆုံးဖြစ်လာပြီး ဖေဖော်ဝါရီလ ၁၅ ရက်တာကာလ အတွင်း လူပေါင်း ၆,၉၀၀ နီးပါး ကူးစက်ခံခဲ့ရတယ်လို့ သိရပါတယ်။

တစ်နိုင်ငံလုံးကို ခြုံကြည့်ရင်တော့ ဖေဖော်ဝါရီလ ၁၄ ရက်တာ ကာလအတွင်း ကိုးဗစ်ကူးစက်မှုအားလုံးရဲ့ ၅၄ ရာခိုင်နှုန်းဟာ လူနေထူထပ်တဲ့ ရန်ကုန်တိုင်းအတွင်းမှာဖြစ်တယ်လို့လည်း ISP Myanmar က ဖော်ပြပါတယ်။

ထို့အပြင် ကမ္ဘာ့ကျန်းမာရေးအဖွဲ့ချုပ် (WHO) ကတော့ ကိုဗစ်မျိုးကွဲသစ် အိုမီခရွန်ဟာ မျိုးကွဲတွေထက် ကူးစက်နိုင်ခြေမြင့်မားပြီး ရောဂါလက္ခဏာမပြဘဲ (မပြင်းထန်တဲ့)ကူးစက်ခံရမှု အခြေအနေကတဆင့် အပြင်းအထန် ဖျားနာမှု၊ သေဆုံးမှုအခြေအနေ ကြုံရနိုင်ခြေလည်းရှိကြောင်း သတိပေးထားပါတယ်။

ဒါကြောင့်လည်း အထူးသဖြင့် သက်ကြီးရွယ်အိုတွေ၊ နာတာရှည်ရောဂါအခံရှိသူတွေနဲ့ ကာကွယ်ဆေး မထိုးထားသူတွေ သတိပြုဖို့ အထူးလိုအပ်နေတယ်လို့လည်း ကျန်းမာရေးပညာရှင်တွေက အသိပေးနှိုးဆော်ထားတယ်လို့ ISP Myanmar က ဆိုပါတယ်။

ဒါ့အပြင် ယခုလက်ရှိကာလမှာ ကိုဗစ်အတည်ပြုလူနာသစ်တွေလည်း နေ့စဉ်တိုးမြင့်လာနေတာပါ။ ဖေဖော်ဝါရီ ၁၆ ရက်နေ့နဲ့ ၁၇ ရက်နေ့ နှစ်ရက်ဆက်တိုက် တစ်နေ့ကို လူဦးရေ နှစ်ထောင်ကျော်နှုန်းနဲ့ တွေ့ရှိခဲ့ပြီး လွန်ခဲ့တဲ့ တစ်ပတ်တိတိမှာလည်း တစ်နေ့ကို လူဦးရေ တစ်ထောင်ကျော်နှုန်းနဲ့ လူနာသစ်တွေ့ရှိမှုတွေ တိုးမြင့်လာတာ ဖြစ်ပါတယ်။

အခုလက်ရှိ ရောဂါပိုးတွေ့ရှိမှု ရာခိုင်နှုန်းမှာလည်း မူလ ၁ ရာခိုင်နှုန်းကနေ ၈ ဒသမ ၉၈ ရာခိုင်နှုန်းအထိ မြင့်တက်လာတာတွေ့ရပါတယ်။

ဒါ့အပြင့် ကျန်းမာရေးဝန်ကြီးဌာန၏ နောက်ဆုံးထုတ်ပြန်ထားသော အချက်အလက်များအရ ပြည်တွင်းမှာ
ကိုဗစ်ရောဂါပိုးကူးစက်ခံသူ ၅၅၆, ၂၅၆ ဦးအထိ ရှိနေပြီးဖြစ်တယ်လို့လည်း သိရပါတယ်။

Photo - CJ

ymg/kg
#Yangon_Media_Group

Published 17 February 2022

ပြင်သစ်နိုင်ငံမှာ ဗုဒ္ဓဟူးနေ့က ကိုဗစ်-၁၉နှင့်ပတ်သက်တဲ့ စည်းကမ်းသတ်မှတ်ချက်တွေကို ပြောင်းလဲပေးလိုက်ပါတယ်။ အဲဒါကြောင့် ညကလပ်တွေဟာ ပြန်လည်ဖွင့်လှစ်နိုင်ပြီး ကဖေးဆိုင်တွေဟာလည်း ထိုင်စားသောက်နိုင်ကြပြီဖြစ်ပါတယ်။

အဲဒီလျော့ပေါ့ပေးမှုကြောင့် ဒီဇင်ဘာတုန်းက ရုတ်တရက်ကန့်သတ်ထားမှုတွေရှိခဲ့တဲ့ ညအချိန် အပျော်အပါးနှင့်ဖျော်ဖြေရေး လုပ်ငန်းတွေ သက်သာရာရသွားကြပါတယ်။

Source AFP

#WorldHealth
Published - 17 February 2022
ကိုဗစ်နောက်ဆက်တွဲရောဂါလက္ခဏာတွေ ခံစားရတဲ့အကြောင်းအရင်းကို လေ့လာကြည့်ကြရာ ကိုရိုနာဗိုင်းရပ်စ်စတင်ကူးစက်ခံရစဉ် ခန္ဓာကိုယ်ထဲရှိ အရေးကြီးဆုံးအာရုံကြောနာ့ဗ်တွေထဲကတစ်ခုဖြစ်တဲ့ Vagus Nerve ထိခိုက်သွားတာကြောင့်ဖြစ်နိုင်ကြောင်း ယူဆထားကြပါတယ်။

Vagus nerve ဟာ အာရုံကြောနာ့ဗ်တွေထဲမှာ နံပါတ်(၁၀)မြောက်နာ့ဗ်ကြောဖြစ်ပြီး အရှုပ်ထွေးဆုံးနဲ့အရှည်လျားဆုံး အာရုံကြောဖြစ်ပါတယ်။သူဟာ ဦးနှောက်ကနေ မျက်နှာ ရင်ဘတ်နဲ့ ဝမ်းဗိုက်အထိ တည်ရှိနေပါတယ်။

ဦးနှောက်နဲ့ အစာအိမ်အူလမ်းကြောင်းကြား အဓိကချိတ်ဆက်ပေးထားပြီး အတွင်းအင်္ဂါတွေရဲ့ အခြေအနေကို ဦးနှောက်ဆီ သတင်းပြန်ပို့ ပေးပါတယ်။Vagus nerve ဟာ အစာအိမ်အူလမ်းကြောင်းစနစ်အတွက် အရေးကြီးတဲ့အပြင် ပါးစပ်ကနေ အစာအိမ်အထိ အစာသွားရာလမ်းကြောင်းနဲ့ အူလမ်းကြောင်းတလျှောက် ပို့ဆောင်ခြင်းကိုလည်း ထိန်းချုပ်ပေးပါတယ်။

နှလုံးခုန်နှုန်း၊ ချွေးထွက်ခြင်း၊ ပါးစပ်ရှိကြွက်သားလှုပ်ရှားမှု စတဲ့ဖြစ်စဉ်တွေမှာလည်း ပါဝင်ထိန်းချုပ်နေပါတယ်။လေ့လာစမ်းသပ်ချက်တွေအရ SARS-CoV-2 ကြောင့် Vagus nerve ထိခိုက်ခြင်း (VND) ဖြစ်ပွားရခြင်းတွင် ကိုဗစ်နောက်ဆက်တွဲရောဂါလက္ခဏာအများအပြား ပါဝင်နေပါတယ်။

အသံနေအသံထားမမှန်ခြင်း၊ အစာရေမြိုချရခက်ခဲခြင်း၊ မူးဝေခြင်း၊ နှလုံးခုန်မြန်ခြင်း၊ သွေးပေါင်ချိန်ကျခြင်း၊ အစာခြေစနစ်ထိခိုက်ခြင်းတို့ ဖြစ်နိုင်ပါတယ်။
ကိုဗစ်နောက်ဆက်တွဲရောဂါလက္ခဏာခံစားရပါက ခန္ဓာကိုယ်ထဲရှိ အင်္ဂါအားလုံးနီးပါး ထိခိုက်နိုင်တဲ့အပြင် စိတ်ကျန်းမာရေးအခြေအနေနဲ့ အာရုံကြောစနစ်တွေကိုပါ ထိခိုက်နိုင်ပါတယ်။

အဖြစ်အများဆုံး နောက်ဆက်တွဲလက္ခဏာတွေမှာ နွမ်းနယ်ခြင်း၊ ခေါင်းကိုက်ခြင်း၊ အသက်ရှူကြပ်ခြင်း၊ အနံ့အရသာပျောက်ခြင်း၊ ကြွက်သားအားနည်းခြင်းတို့ ပါဝင်ပါတယ်။

ဒီဖြစ်စဉ်တွေကိုပိုမိုသိရဖို့ အတွက် ကိုဗစ်နောက်ဆက်တွဲခံစားရတဲ့သူတွေမှာ vagus nerve စမ်းသပ်ချက်တွေ ပြုလုပ်ခဲ့ကြပါတယ်။အဖြစ်အများဆုံး vagus nerve ထိခိုက်မှုများထဲတွင် ဝမ်းလျှောခြင်းဝေဒနာခံစားရသူ ၇၃ ရာခိုင်နှုန်း၊ နှလုံးခုန်မြန်ခြင်း ၅၉ ရာခိုင်နှုန်း၊ မူးဝေခြင်း အစာမြိုရခက်ခဲခြင်း အသံပျက်ခြင်းတို့ က ၄၅ ရာခိုင်နှုန်း၊ သွေးပေါင်ချိန်ကျခြင်းက ၁၄ ရာခိုင်နှုန်းအသီးသီး တွေ့ရှိခဲ့ပါတယ်။

အချို့ လူနာတွေမှာ အစာခြေစနစ်အတွင်း ပြောင်းလဲမှုများတွေ့ရပြီး အစာရေမြိုချရခက်ခဲခြင်းတွေ ကြုံတွေ့ကြရပါတယ်။
Source: The Jerusalem Post 

#WorldHealth
Published - 17 February 2022

လတ်တလောမှာ အိုမီခရွန်မျိုးဗီဇကွဲကူးစက်မှု လျော့ကျလာတဲ့အချိန်ကျမှ အိုမီခရွန်မျိုးဗီဇကွဲကို ကာကွယ်နိုင်မယ့်ကိုဗစ်ကာကွယ်ဆေးတွေကို သိပ္ပံပညာရှင်တွေက အသည်းအသန်ကြိုးစားစမ်းသပ်နေကြပါတယ်။နောက်ထပ်ထုတ်လုပ်နေတဲ့ ကာကွယ်ဆေးတွေရဲ့ ထိရောက်နိုင်စွမ်းကို သိရှိတဲ့အချိန်မှာ အိုမီခရွန်ကူးစက်မှုအမြင့်ဆုံးကာလကို ကျော်လွန်နေလောက်ပြီဖြစ်ပါတယ်။

နှာခေါင်းစည်းမဖြစ်မနေတပ်ဆင်ခြင်းစည်းကမ်းတွေ ဖြေလျှော့ပြီး ပုံမှန်အတိုင်းနေထိုင်သွားဖို့ စီစဉ်နေလောက်ကြပြီဖြစ်ပါတယ်။မျိုးဗီဇကွဲအသစ်တစ်ခုပေါ်ပေါက်လာတိုင်း ကာကွယ်ဆေးအသစ်တစ်မျိုး ဖန်တီးထုတ်လုပ်မယ့်အစား လက်ရှိကိုရိုနာဗိုင်းရပ်စ်တွေနဲ့ နောင်ထွက်ပေါ်နိုင်မယ့်မျိုးဗီဇကွဲအားလုံးကို ကာကွယ်ပေးနိုင်မယ့် ကိုဗစ်ကာကွယ်ဆေးတစ်မျိုးတည်းကို ထုတ်လုပ်နိုင်ရင် အခြေအနေတွေ တမျိုးဖြစ်သွားနိုင်ပါတယ်။

မျိုးဗီဇကွဲအသစ်တွေ ပေါ်ပေါက်လာတဲ့အခါ ဆေးဝါးထုတ်လုပ်ရေးကုမ္ပဏီတွေက လိုက်ပြီးကာကွယ်ဆေးတွေထုတ်လုပ်နေပေမယ့် ဒါဟာရေတိုအတွက်သာ အဆင်ပြေပြီး ရေရှည်မှာအသုံးမဝင်နိုင်ကြောင်း မြောက်ကယ်ရိုလိုင်းနားတက္ကသိုလ်မှ ခန္ဓာကိုယ်ခုခံအားဆိုင်ရာပညာရှင် 'ဒေးဗစ်မာတီနက်ဇ်'က ပြောလိုက်ပါတယ်။

ဒါကြောင့် လက်ရှိ SARS-CoV-2 ဗိုင်းရပ်စ်တွေသာမက နောင်ထွက်ပေါ်လာနိုင်တဲ့မျိုးဗီဇကွဲတွေကိုပါ ကာကွယ်ခုခံပေးနိုင်မယ့် ကိုဗစ်ကာကွယ်ဆေးတွေကို စမ်းသပ်တီထွင်နေကြပါတယ်။

တကယ်တမ်းမှာလည်း မျိုးဗီဇကွဲအားလုံးကို ကာကွယ်ပေးနိုင်မယ့် စွယ်စုံရကိုဗစ်ကာကွယ်ဆေး လိုအပ်နေတာဖြစ်ပြီး နောင်လာမယ့်နှစ်တွေမှာ တိရိစာ္ဆန်တွေကနေ လူသားတွေဆီကူးစက်နိုင်တဲ့ အမည်မသိကိုရိုနာဗိုင်းရပ်စ်တွေကိုပါ ကာကွယ်ပေးနိုင်ဖို့ လိုအပ်နေပါတယ်။

မျိုးဗီဇကွဲအများအပြားကို ကာကွယ်နိုင်ပြီး တာရှည်ခုခံအားပေးနိုင်မယ့် ကာကွယ်ဆေးကိုဖော်ထုတ်ဖို့ က သိပ္ပံနည်းအရ လိုအပ်ချက်များစွာရှိနေတာကြောင့် စိတ်ရှည်ရှည်ထားဖို့လိုအပ်ကြောင်း အိမ်ဖြူတော်မှ ဆေးပညာအကြံပေးဦးစီးချုပ် 'အန်သိုနီဖော့ချီ'က တိုက်တွန်းလိုက်ပါတယ်။

ပန်ဆယ်ဗေးနီးယားပဲရယ်မန်ဆေးပညာတက္ကသိုလ်မှ ကာကွယ်ဆေးထုတ်လုပ်သူ 'ဒရူးဝိုက်စ်မန်'က မျိုးဗီဇကွဲအသစ်တွေ အမြဲတမ်းပေါ်ထွက်နေတာကြောင့် အဲဒီနောက်ကိုလိုက်ပြီး ကာကွယ်ဆေးတွေထုတ်နေတာကို စိုးရိမ်လာကြောင်း၊ ၆ လကြာတိုင်း မျိုးဗီဇကွဲအသစ်ပေါ်ပေါက်လေ့ရှိကြောင်း၊ တစ်ကမ္ဘာလုံးကာကွယ်ဆေးမထိုးနိုင်သေးသရွေ့ အသစ်တွေထွက်ပေါ်နေမှာဖြစ်ကြောင်း ပြောကြားသွားပါတယ်။

ဒုခ်ဆေးပညာတက္ကသိုလ်မှ ကာကွယ်ဆေးကျွမ်းကျင်ပညာရှင် 'ဘာတန်ဟိန်းစ်'နဲ့အဖွဲ့ က မျိုးဗီဇကွဲအားလုံးကို ရပ်တန့်နိုင်မယ့်နည်းလမ်းကို ရှာဖွေနေကြပါတယ်။
မျက်နှာပြင်ပေါ်မှာ စပိုက်ခ်ပရိုတိန်းအစိတ်အပိုင်းလေးပါဝင်တဲ့ နာနိုအမှုန်လေးဖြင့်ပြုလုပ်ထားသော ကာကွယ်ဆေးတစ်မျိုးကို တီထွင်နေကြပါတယ်။

တိရိစာ္ဆန်တွေနဲ့စမ်းသပ်ရာမှာတော့ ထိုကာကွယ်ဆေးက မျိုးဗီဇကွဲအမျိုးမျိုး၊ နဂိုမူလ SARS ဗိုင်းရပ်စ်၊ လင်းနိုကိုရိုနာဗိုင်းရပ်စ်တို့ ကို ကာကွယ်ပေးနိုင်တဲ့ ခုခံအားကိုထုတ်လုပ်ပေးနိုင်ပါတယ်။

ယခုနှစ်အတွင်း လူသားတွေနဲ့စမ်းသပ်သွားနိုင်ဖို့ 'ဘာတန်ဟိန်းစ်'က မျှော်လင့်ထားပါတယ်။စွယ်စုံရကိုဗစ်ကာကွယ်ဆေး အစောတလျင်ရရှိဖို့ တောင်းဆိုနေကြပေမယ့် အရင်ကာကွယ်ဆေးတွေထုတ်လုပ်ရတာထက် အများကြီးပိုပြီးခက်ခဲနိုင်တယ်လို့ သတိပေးထားပါတယ်။

"တုပ်ကွေးဗိုင်းရပ်စ်တွေကို လေ့လာလာတာ နှစ်ပေါင်း ၇၀ ကျော်လာပါပြီ။ စွယ်စုံရတုပ်ကွေးကာကွယ်ဆေး ထုတ်လုပ်နိုင်ဖိုကြိုးစားနေပေမယ့် အခုထိ မလုပ်နိုင်သေးပါဘူး။ ဒါပေမဲ့ ကိုရိုနာဗိုင်းရပ်စ်ကိုလည်း ကြိုးစားကြည့်ရမှာပါပဲ" လို့ ဝစ္စကွန်ဆင်တက္ကသိုလ်မှ 'ယိုရှီဟီရိုကာဝါအိုကာ'က ပြောပြခဲ့ပါတယ်။
Source: The Washington Post

#LocalNews
Published- Feb 16 2022

ရခိုင်ပြည်နယ်၊ ကျောက်ဖြူမြို့ ၌ လေယာဉ်စီးနင်းလိုက်ပါကြမည့်ခရီးသည်များကို ကိုဗစ်ပိုးရှိမရှိ(Swab) ယူကာ R.D.T test kit နဲ့ ဖေဖော်ဝါရီလ ၁၅ရက်နေ့ မွန်းလွဲပိုင်းက ခရိုင်ပြည်သူ့ ကျန်းမာရေးဦးစီးဌာနရုံးဝင်းတွင်စစ်ဆေးရာ ခရီးသည်သုံးဦးတွင် ကိုဗစ်-၁၉ ရောဂါပိုးတွေ့ရှိခဲ့သဖြင့် ၎င်းတို့ အား ကျောက်ဖြူခရိုင်ပြည်သူ့ဆေးရုံကြီးရှိ Isolation Ward နှင့် Home Isolation နေရာများ တွင် သီးသန့်နေထိုင်နိုင်ရေး ဆောင်ရွက်ပေးထားတယ်လို့ သိရပါတယ်။

ပိုးတွေ့ရှိသူများမှာ ကျောက်ဖြူမြို့ ၊ ကညင်တောရပ်ကွက်တွင်နေထိုင်တဲ့ အမျိုးသားတစ်ဦး၊ တည်းခိုခန်းများတွင်တည်းခိုနေတဲ့ အမျိုးသားနှစ်ဦးတို့ ဖြစ်ကာသုံးဦးအနက် နှစ်ဦးအား ကျောက်ဖြူခရိုင်ပြည်သူ့ဆေးရုံကြီးရှိ Isolation Ward နှင့် ကျန်တစ်ဦးအား ၎င်းတို့ ရဲ့နေအိမ်များတွင် Home Isolation Guide Line အတိုင်း နေထိုင်စေတယ်လို့ သိရပါတယ်။

ကျောက်ဖြူမြို့မှလေယာဉ်စီးနင်းလိုက်ပါကြမယ့် ခရီးသည်များအနေနဲ့ ဖေဖော်ဝါရီ ၁၅ ရက်နေ့မှစတင်ကာ R.D.T test kit ဖြင့်စစ်ဆေးခြင်းကို ခရီးစဉ်မတိုင်မီ (၄၈)နာရီအတွင်း ကျန်းမာရေး ဦးစီးဌာနကိုသွားရောက်စစ်ဆေးသွားရမှာဖြစ်ပြီး ခရီးသည်များအားလုံး စစ်ဆေးပြီးထားတဲ့ရောဂါကင်းရှင်းကြောင်း အသိအမှတ်ပြုလက်မှတ် Negative Test Result ပါရှိရမည်ဖြစ်ပြီး မျက်နှာအကာ Face Shield နှင့် နှာခေါင်းစည်း Mask တပ်ဆင်လာရမှာဖြစ်တယ်လို့ ကျောက်ဖြူမြို့ နယ် အထွေထွေအုပ်ချုပ်ရေးဦးစီးဌာနကသိရပါတယ်။

ကျောက်ဖြူမြို့ တွင် လေယာဉ်စီးနင်းလိုက်ပါကြမယ့် ခရီးသည်များကို သန်ပန်ချောင်းရပ်ကွက်ရှိ ခရိုင်ပြည်သူ့ကျန်းမာရေးဦးစီးဌာနမှူးရုံးတွင် လေယာဉ်မထွက်မီတစ်ရက် ကြိုတင်ကာ မွန်းလွဲ ၁ နာရီမှ ၃ နာရီအတွင်း ကျန်းမာရေးစစ်ဆေးမှုများကို ပြုလုပ်ပေးနေတယ်လို့ သိရပါတယ်။

ymg/hm
#Yangon_Media_Group