#Local_News
Published_ 27 May 2023
တရားမဝင်ကုန်သွယ်မှုကို ဆက်လက်ကျူးလွန်ပါက အကောက်ခွန် ဥပဒေအပြင် ဆက်စပ်ဥပဒေများဖြင့် ပါ ပြင်းပြင်းထန်ထန်အရေးယူသွားရန် မေလ ၂၆ ရက်က နေပြည်တော်ရှိ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ညီလာခံခန်းမ၌ ကျင်းပသော တရားမဝင်ကုန်သွယ်မှုတိုက်ဖျက်ရေးဦးဆောင်ကော်မတီ လုပ်ငန်းညှိနှိုင်းအစည်းအဝေးအတွင်း တရားမဝင်ကုန်သွယ်မှုတိုက်ဖျက်ရေး ဦးဆောင်ကော်မတီဥက္ကဋ္ဌ နိုင်ငံတော်စီမံအုပ်ချုပ်ရေးကောင်စီ ဒုတိယဥက္ကဋ္ဌ ဒုတိယဝန်ကြီးချုပ် ဒုတိယဗိုလ်ချုပ်မှူးကြီးစိုးဝင်းက ပြောကြားခဲ့သည်။
တရားမဝင် ကုန်သွယ်မှုများတားဆီး အရေးယူမှုနှင့် ပတ်သက်၍ ယခင်ကကန့်သတ်ကုန်ပစ္စည်းများဆိုပါက ပစ္စည်းသိမ်းဆည်းခြင်း၊ အကောက်ခွန်မဲ့ပစ္စည်းများဖြစ်ပါက ရွေးယူဒဏ်ငွေတပ်ရိုက်ပြီး ရွေးယူခွင့်ပြုခြင်းများကို ဆောင်ရွက်ခဲ့ကာ တရားမဝင်ကုန်ပစ္စည်းများ တင်ဆောင်သည့် ယာဉ်များကိုလည်း အကောက်ခွန် လုပ်ထုံးလုပ်နည်းများအတိုင်း ဆောင်ရွက်ခဲ့ကြောင်း သိရသည်။
ယင်းကြောင့် အကောက်ခွန်ဥပဒေ၊ လုပ်ထုံးလုပ်နည်းများအရ ပစ္စည်းသိမ်း၊ ယာဉ်သိမ်းခြင်းများကို အများဆုံး ဆောင်ရွက်နိုင်ခဲ့သည့်အတွက်ထပ်ကာ ကျူးလွန်နေသူများကို ယခုထက် ထိထိရောက်ရောက် ဟန့်တားအရေးယူသွားရန်လိုအပ်ကြောင်းလည်း ယင်းကဆိုသည်။
ရည်ရွယ်ချက်ရှိရှိ၊ လက်တစ်လုံးခြား တရားမဝင်ဆောင်ရွက်နေသည့်ကုန်ပစ္စည်များပိုင်ရှင်နှင့် ယာဉ်ပိုင်ရှင်များအား ထပ်မံဖမ်းဆီးရမိပါကလည်း ကုမ္ပဏီပိတ်သိမ်းခြင်းနှင့် ယာဉ်သိမ်းဆည်းခြင်းများ ဆောင်ရွက်သွားမည်ဖြစ်ကြောင်း ခေါ်ယူသတိပေးခြင်း၊ ဝန်ခံကတိလက်မှတ်ရေးထိုးစေခြင်းများဖြင့် ဆက်လက်ထိန်းသိမ်းကြပ်မတ်သွားကြရန်နှင့် တားဆီးအရေးယူမှုများကြောင့် ရပ်တန့်မသွားသော ဆက်လက်ကျူးလွန်မှုများကို အကောက်ခွန် ဥပဒေအရသာမက ဆက်စပ်သည့် ဥပဒေများဖြင့်ပြင်းပြင်းထန်ထန်အရေးယူသွားကြရမည်ဟုလည်း နစက ဒု ဥက္ကဌက ဆိုသည်။
ရွေးယူဒဏ်ငွေတန်ဖိုးသတ်မှတ်ခြင်းမှာ ကျူးလွန်သူများအတွက်ဒဏ်ကြေးသတ်မှတ်ရာ မရောက်ဘဲ ပြင်ပပေါက်ဈေးထက်လျော့နည်းသက်သာနေမည်ဆိုပါက ကျေကျေနပ်နပ် လာရောက်ရွေးယူနေကြမည်ဖြစ်သောကြောင့် နောင်ကြဉ်မှုမရှိဘဲ ထပ်ကာထပ်ကာ ကျူးလွန်ရန်အားပေးရာ ရောက်သည့်အတွက် တရားမဝင်ကုန်သွယ်နေသူများအတွက် ဖြစ်သင့်ဖြစ်ထိုက်သည့် သင့်တင့်သည့် အရေးယူခြင်းမျိုး မဟုတ်ဘဲဥပေဒနှင့်အညီ ထပ်မံမကျူးလွန်ရဲစေရန် တရားမဝင်ကုန်သွယ်မှုများ ကြီးထွားမလာအောင် ဆင့်ကဲဆင့်ကဲ ပြင်းပြင်းထန်ထန် အရေးယူသွားရမည်ဖြစ်ကြောင်းနှင့် ရွေးယူဒဏ်ငွေတန်ဖိုးသတ်မှတ်ရာတွင် စနစ်တကျ သတ်မှတ်ဆောင်ရွက်ရေးသည်အရေးကြီးသည့် အချက်တစ်ချက်ဖြစ်ကြောင်း ၎င်းကပြောသည်။
၎င်းအပြင် One Stop Service များ၊ လမ်းခရီးတွင် လုံခြုံရေးအရ တာဝန် ထမ်းဆောင်နေရသည့်စုပေါင်းအဖွဲများအနေဖြင့် ပြည်သူလူထုနှင့် ဆက်ဆံရာတွင်ရိုင်းစိုင်းသည့်ပြောဆိုဆက်ဆံမှုအချို့ ရှိနေသည်ကို ကြားသိရသောကြောင့် ပြည်နယ်နှင့် တိုင်းများတွင်ရှိသည့် တရားမဝင်ကုန်သွယ်မှု တိုက်ဖျက်ရေး အထူးအဖွဲ့များအနေဖြင့် စစ်ဆေးရေးစခန်းများနှင့်လုံခြုံရေးဂိတ်များတွင် စစ်ဆေးသည့်အခါ အတတ်နိုင်ဆုံး ပြေပြေလည်လည် ဆက်ဆံသွားရန်၊ စည်းကမ်းဖောက်ဖျက်ပါက အရေးယူဆောင်ရွက်သွားကြရန်လည်း ယင်းက ပြောကြားခဲ့သည်။
ယခုအခါ နယ်စပ်ကျော် ကုန်သွယ်ရေးလမ်းကြောင်းဖြစ်သည့် မြဝတီ-ရန်ကုန် ကုန်သွယ်ရေးလမ်းကြောင်း၊ မူဆယ်-လားရှိုး-မန္တလေး လမ်းကြောင်းတစ်လျှောက်ရှိနေသည့် စစ်ဆေးရေးစခန်းများနှင့် လုံခြုံရေးစခန်းများတွင် တရားမဝင်ကုန်သွယ်မှုနှင့် ပတ်သက်သည့်စစ်ဆေးမှုအားနည်းချက်များရှိနေသည်ကို ကြားသိနေရပြီး ယင်းအားနည်းချက်များမှာ တရားမဝင်ကုန်သွယ်မှု တိုက်ဖျက်ရေးအတွက် ကြီးမားသည့် အဟန့်အတားတစ်ခုဖြစ်သောကြောင့် တရားမဝင် ဝင်ရောက်လာသည့် တရားမဝင်ကုန် ပစ္စည်းများကို ပြင်းပြင်းထန်ထန် တားဆီး စစ်ဆေးအရေးယူရန်၊ ပြည်နယ်နှင့်တိုင်းဒေသကြီး တရားမဝင်ကုန်သွယ်မှု တိုက်ဖျက်ရေး အထူးအဖွဲ့ဥက္ကဋ္ဌများအနေဖြင့် ပြည်နယ်နှင့်တိုင်းဒေသကြီးအတွင်းရှိ တရားမဝင်ကုန်သွယ်မှု တိုက်ဖျက်ရေး အဖွဲ့များ၊ One Stop Service အဖွဲ့များနှင့် လုံခြုံရေးအဖွဲ့များ မူလတာဝန် ထိခိုက်စေမည့် တရားမဝင်ကိစ္စများ ဆောင်ရွက်နေသည်ဟု သတင်းရရှိပါက ထိရောက်သည့် ပြစ်ဒဏ်ဖြင့် အရေးယူသွားကြရန် ပြောကြားခဲ့ကြောင်း သိရသည်။
#ymg/pl #Local_News #ပြင်းပြင်းထန်ထန်အရေးယူသွားရန်နစကဒုဥက္ကဌပြော
#YMG #Yangon_Media_Group
#Local_News
Published_ 27 May 2023
ရွှေဈေးနှုန်းများ မြင့်တက်နေချိန် ရန်ကုန်ပြင်ပရွှေဈေးကွက်အတွင်း ရွှေကုန်သည်များအကြား ကျပ်သိန်း ၇၅,၀၀၀ ကျော်တန်ဖိုးအထိ ရွှေလိမ်လည်မှုဖြစ်ပွားခဲ့ကြောင်း ရန်ကုန်ပြည်တွင်းရွှေဈေးကွက်အတွင်းမှ သိရသည်။
ရွှေကုန်သည်လက်ကြီးသမားက ရွှေရောင်းမည်ဟုဆိုကာ ငွေအရင်ယူပြေးကာ လိမ်လည်သွားခြင်းဖြစ်ပြီး ကုန်သည်အချို့ထံမှ တစ်ယောက်ကို ရွှေနှစ်ပိသာမှ ရွှေသုံးပိသာ ခန့်တန်ဖိုးအထိ ပါသွားခဲ့ခြင်းဖြစ်ကြောင်း သိရသည်။
“အရင်ကတည်းကအရောင်းအဝယ်လုပ်နေတဲ့ ရွှေကုန်သည်ပါ။ ရွှေဝယ်ပေးမယ်ဆိုပြီး ပိုက်ဆံတွေယူပြီးမှ ထွက်ပြေးသွားတာပါ။ သူမိသားစုကကျန်ခဲ့ပေမယ့်ပိုက်ဆံပမာဏများလို့ အကုန်ရှင်းမပေးနိုင်ဘူးဖြစ်နေတာ” ဟု ရန်ကုန်ရွှေဈေးကွက် အတွင်းမှလုပ်ငန်းရှင်တစ်ဦးကပြောသည်။
ယင်းဖြစ်စဉ်အပေါ်သက်ဆိုင်ရာသို့ အမှုဖွင့်တိုင်ကြားခြင်းမရှိသေးဘဲ ကုန်သည်အခြင်းခြင်းကြားနားလည်မှုနှင့်သာ ကြိတ်ပြီးဖြေရှင်းနေကြောင်း သိရသည်။
ဗဟိုဘဏ်က ရည်ညွှန်းနိုင်ငံခြားငွေလဲလှယ်နှုန်း တစ်ဒေါ်လာ ကျပ် ၂,၁၀၀ သတ်မှတ်ထားသော်လည်း ယခုရက်ပိုင်းအတွင်း ဒေါ်လာဈေးကစားသူအချို့ကြောင့် မေလ ၂၆ ရက်တွင် တစ်ဒေါ်လာ ကျပ် ၂,၉၆၀ အထိမြင့်တက်မှုများရှိခဲ့သည်။
ယင်းကဲ့သို့ ဒေါ်လာဈေး မတည်ငြိမ်မှုများအပေါ် စိုးရိမ်စိတ်များကြောင့် ပြည်တွင်းရွှေဈေးကွက်၌ ယခုရက်ပိုင်းတွင် ရွှေဝယ်လိုအားများမြင့်တက်ခဲ့ပြီး မေလ ၂၆ ရက်တွင် အခေါက်ရွှေတစ်ကျပ်သား ကျပ် ၃၁ သိန်းနီးပါးအထိ မြင့်တက်ခဲ့ကြောင်း ပြည်တွင်းရွှေဈေးကွက်အတွင်းမှ သိရသည်။
#ymg/ppk #Local_News #ရန်ကုန်ရွှေဈေးကွက် #ရွှေလိမ်လည်မှုဖြစ်ပွား
#Yangon-Media-Group
#Local_News
Published_ 27 May 2023
ရခိုင်မုန်တိုင်းဒဏ်သင့်ပြည်သူများအတွက် ဒုတိယမြိုင်ကြီးငူဆရာတော်အမှူးပြုသော ကရင်ပြည်နယ်နယ်ခြားစောင့်တပ် မိသားစု(BGF)နှင့် မြိုင်ကြီးငူအထူးဒေသမိသားစုများက အလှူငွေများပေးအပ်လှူဒါန်းခဲ့ကြောင်း သိရသည်၊၊
မူလမြိုင်ကြီးငူဆရာတော်ကြီးအားရည်စူး၍ ဒုတိယမြိုင်ကြီးငူ ဆရာတော်ဘဒ္ဒန္တဉာဏိကအမှူးပြုသော ကရင်ပြည်နယ်နယ်ခြားစောင့်တပ်မိသားစုနှင့် မြိုင်ကြီးငူအထူးဒေသမိသားစုများက ရခိုင်ပြည်နယ် မုန်တိုင်းဒဏ်သင့် ပြည်သူများအတွက်အလှူငွေများကို မေလ၂၆ ရက် နံနက်ပိုင်းတွင် ပြည်နယ်အစိုးရအဖွဲ့ရုံးသို့ လာရောက်လှူဒါန်းခဲ့ခြင်းဖြစ်သည်ဟု ဆိုသည်၊၊
လှူဒါန်းပွဲအခမ်းအနားသို့ နိုင်ငံတော်စီမံအုပ်ချုပ်ရေးကောင်စီအဖွဲ့ဝင်ဒုတိယဝန်ကြီးချုပ်နှင့်အဖွဲ့ဝင်များတက်ရောက်ခဲ့ကြပြီး ကရင်ပြည်နယ်နယ်ခြားစောင့် တပ်မိသားစုနှင့်မြိုင်ကြီးငူအထူးဒေသမိသားစုများကိုယ်စား တာဝန်ရှိသူများကအလှူငွေစုစုပေါင်း ငွေကျပ်သိန်း ၁၅၀၀ ကို ပေးအပ်လှူဒါန်းရာ ပြည်နယ်ဝန်ကြီးချုပ်နှင့် အနောက်ပိုင်းတိုင်းစစ်ဌာနချုပ် တိုင်းမှူးတို့က လက်ခံရယူကြပြီး ဂုဏ်ပြုမှတ်တမ်းလွှာများ ပြန်လည်ပေးအပ်ခဲ့ကြသည်။
ယင်းနောက် ဗိုလ်ချုပ်ကြီးတင်အောင်စန်း၊ ဒုတိယဗိုလ်ချုပ်ကြီးထွန်းထွန်းနောင်နှင့်ပြည်နယ်ဝန်ကြီး ချုပ် ဦးထိန်လင်းတို့က ဆရာတော်များထံနဝကမ္မအလှူ ငွေများ ဆက်ကပ်လှူဒါန်းကြကြောင်း ထုတ်ပြန်ချက်တွင်ဖော်ပြပါရှိသည်၊၊
#ymg/tthl #Local_News #ကရင် BGF နှင့် မြိုင်ကြီးငူဒေသနေဆရာတော်များ
#YMG #Yangon_Media_Group
#Local_News
Published_ 27 May 2023
ရန်ကုန်တိုင်း၊ မင်္ဂလာဒုံမြို့နယ်၊ ဇေကမ္ဘာဝန်းအတွင်း ရေမြောင်းထဲမှာ ပျောက်ဆုံးနေတဲ့ အငှားယာဉ်မောင်း အမျိုးသားတစ်ဦးရဲ့ ရုပ်အလောင်းကို မေလ ၂၆ရက်မှာ တွေ့ရှိခဲ့တယ်လို့ လူမှုကူညီရေးအသင်းမှ သိရသည်။
မေလ၂၅ ရက်၊ နေ့လယ် ၂ နာရီ ဝန်းကျင်မှာ နေအိမ်နဲ့အဆက်အသွယ်မရတော့လို့ မိသားစုဝင်တွေက ရဲစခန်းမှာအမှုဖွင့်ထားခဲ့တာဖြစ်တယ်လို့ သိရသည်။
မနေ့က မေလ၂၆ ရက်၊ မနက် ၇ နာရီကျော်မှာ ဇေကမ္ဘာဝန်း လုံခြုံရေးတွေက အဲဒီရုပ်အလောင်းကို တွေ့ရှိခဲ့ကြောင်း သိရသည်။
သေဆုံးသူဟာ အသက် ၃၈ နှစ်အရွယ် ကိုကျော်သူဝင်းဖြစ်ပြီး ကားနံပါတ် 5J-1837 Probox ကားကို မောင်းနှင်နေကြောင်း ပျောက်ဆုံးနေတဲ့ကားကိုတော့ မတွေ့ရသေးဘူးဟု သိရသည်။
သေဆုံးသူ အမျိုးသားရဲ့ ချိုင်းအောက်မှာ ထိုးသွင်းဒဏ်ရာတစ်ချက်တွေ့ရပြီး အဲဒီရုပ်အလောင်းကို အင်းစိန်ဆေးရုံသို့ ပို့ဆောင်ပေးခဲ့တယ်လို့ သိရသည်။
#ymg/ppk #Local_News #အငှါးယာဉ်မောင်းတစ်ဦးရဲ့ရုပ်အလောင်း
#YMG #Yangon-Media-Group
#Local_News
Published_ 27 May 2023
မြန်မာ-ဘင်္ဂလားဒေ့ရှ်နှစ်နိုင်ငံနယ်စပ်ဒေသအတွင်း လုံခြုံရေးဆိုင်ရာ ကိစ္စရပ်များ ပူးပေါင်းဆောင်ရွက်ရေး၊ တရားမဝင်နယ်စပ်ဖြတ်ကျော် ဝင်ရောက်မှုများအား တားဆီးထိန်းသိမ်း
ပေးရေးစသည့်အချက်များကိုတိုးမြင့်ဆောင်ရွက်ရန် စီစဉ်နေကြောင်း သိရသည်။
မြန်မာ-ဘင်္ဂလားဒေ့ရှ် ဒေသကွပ်ကဲရေးမှူးများ နယ်စပ်ဒေသ ပူးပေါင်းဆောင်ရွက်ရေးအစည်းအဝေးကို၂၀၂၃ ခုနှစ်၊ မေလ ၂၄ ရက်နေ့မှ ၂၅ ရက်နေ့ထိ ဘင်္ဂလားဒေ့ရှ်နိုင်ငံ၊ ကော့စ်ဘဇ္ဇားခရိုင်၊ တက္ကနာ့ဖ်မြို့၊ Central Resort ဟိုတယ်ရှိ အစည်းအဝေးခန်းမ၌ နှစ်ရက်တိုင် ကျင်းပပြုလုပ်ခဲ့ကြောင်း သိရသည်။
အဆိုပါ အစည်းအဝေးတွင်နယ်စပ်ကုန်သွယ်မှု ဖွံ့ဖြိုးရေးဆိုင်ရာကိစ္စရပ်များ ပူးပေါင်းဆောင်ရွက်ရေး၊ မူးယစ်ဆေးဝါးအန္တရာယ် တားဆီးကာကွယ်ရေး၊ နှစ်နိုင်ငံနယ်နိမိတ်အတွင်း ညှိနှိုင်းပူးပေါင်းကင်းလှည့်ဆောင်ရွက်ရေး၊ နှစ်နိုင်ငံနယ်ခြားစောင့်တပ်ဖွဲ့များအကြား အချိန်နှင့်တစ်ပြေးညီ သတင်းဖလှယ်ပေးရေး၊ အကြမ်းဖက်အုပ်စုများ၊ နယ်စပ်ဖြတ်ကျော်ဂိုဏ်းအဖွဲ့များက နှစ်နိုင်ငံ နယ်နိမိတ်မျဉ်းကို တရားမဝင်ဖြတ်ကျော်သည့် ဖြစ်စဉ်များနှင့် ပူးပေါင်းဆောင်ရွက်မည့်အခြေအနေများကို ပူးပေါင်းဆောင်ရွက်ခဲ့ကြသည်။
အစည်းအဝေးသို့ မြန်မာနိုင်ငံရဲတပ်ဖွဲ့၊ အမှတ်(၁)နယ်ခြားစောင့် ရဲကွပ်ကဲမှုအဖွဲ့မှူးရုံး၊ ကွပ်ကဲရေးမှူး ရဲမှူးချုပ်ထက်လွင် ဦးဆောင်သော ကိုယ်စားလှယ်အဖွဲ့နှင့်ဘင်္ဂလားဒေ့ရှ်နယ်ခြားစောင့်တပ်၊ ဒေသကွပ်ကဲမှုဌာနချုပ်(ကော့စ်ဘဇ္ဇား)၊ ဒေသကွပ်ကဲရေးမှူးနှင့်ပူးတွဲညွှန်ကြားရေးမှူးချုပ် ဗိုလ်မှူးချုပ် Najam-Us-Sakib ဦးဆောင်သော ကိုယ်စားလှယ်အဖွဲ့တို့တက်ရောက်ခဲ့ကြောင်း သိရသည်။
#ymg/ppk #Local_News #မြန်မာ-ဘင်္ဂလားဒေ့ရှ် #နယ်စပ်ဒေသလုံခြုံရေး
#YMG #Yangon-Media-Group
#Local_News
Published _27 May 2023
မိုခါ မုန်တိုင်းအလွန် ရခိုင်ပြည်နယ်၊ ပုဏ္ဏားကျွန်းမြို့နယ် ဂူဝဘုရား အလွန် ၄ ဖာလုံခန့်အကွာ၊ ရန်ကုန်ဖက်သို့အသွား ရန်ကုန် စစ်တွေ ပြည်ထောင်စုလမ်းမဘေးတွင် စတူပါစေတီများ တွေ့ရှိခဲ့ရကြောင်း သိရသည်။
မေလ ၂၆ ရက် ညနေ ၅ နာရီခန့်က ဦးသန်းရွှေကြီးပိုင် တောင်မှ မြေတူးရာစဉ်အမြင့် ၃ ပေခန့်နှင့် ၂ ပေခွဲခန့်ရှိ သဲကျောက်ဖြင့် ထုဆစ်ထားသော စတူပါစေတီ ၄ ဆူ ၊ မပြည့်စုံသည့်အစိတ်အပိုင်းများဖြင့် ၁ ဆူ တို့ကိုတွေ့ရှိခဲ့ရခြင်းဖြစ်ကြောင်း သိရသည်။
ယင်းအပြင် ကျောက်စာအချို့ကိုလည်းတွေ့ရှိရသောကြောင့် ရှေးဟောင်းသုတေသနမှ ကျောက်စာဖတ်ရှုနိုင်သူများ လာရောက်လေ့လာနိုင်ရန်နှင့် ဘုရားဖူးလိုသူများအား
ဖိတ်ခေါ်ထားကြောင်း သိရသည်။
#ymg/pl #Local_News #စတူပါစေတီများနှင့်ကျောက်စာအချို့တွေ့ရှိ
#YMG #Yangon_Media_Group
#Local_News
Published_ 26 May 2023
ရန်ကုန်တိုင်းဒေသကြီး၊ သန်လျင်မြို့နယ် သီလဝါကားလမ်းဘေးတွင် မေလ ၂၇ ရက်နေ့ ယနေ့ မနက်အစောပိုင်းက ဆီဘောက်ဆာ ကားတိမ်းမှောက်မှုဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့မှ သိရသည်။
အဆိုပါ ဆီဘောက်ဆာယာဉ်တိမ်းမှောက်မှုကြောင့် ယာဉ်တစ်စီးလုံးမီးလောင်မှုဖြစ်ပွားခဲ့ပြီး ယင်းမီးလောင်မှုကို ၂နာရီနီးပါး မီးငြှိမ်းသတ်ခဲ့ရကြောင်း မြန်မာနိုင်ငံမီးသတ်တပ်ဖွဲ့မှ ထုတ်ပြန်ထားသည်။
ယင်းမီးလောင်မှုကို သန်လျင်ခရိုင်မီးသတ်စခန်းမှ မီးငြှိမ်းသတ်ယာဉ်(၃)စီး၊ သန်လျင်မြို့နယ်မီးသတ်စခန်းမှ မီးငြှိမ်းသတ်ယာဉ်(၂)စီး၊ သန္ဓေမီးသတ်တပ်ဖွဲ့ဝင်များဖြင့် ထွက်ခွာငြှိမ်းသတ်ခဲ့ရကြောင်း မြန်မာနိုင်ငံမီးသတ်တပ်ဖွဲ့မှ သိရသည်။
#ymg/ynzw #Local_News #ဆီဘောက်ဆာကားမီးလောင်မှုဖြစ်ပွား
#YMG #Yangon-Media-Group
Page 1011 of 1973
