#Local_News
Published-19 June 2023

ဧရာဝတီတိုင်း၊ ဖျာပုံမြို့အနီး မြန်မာပင်လယ်ပြင်အတွင်းတွင် ဗဟိုပြုပြီး အင်အားရစ်တာစကေး(၅.၁)အဆင့်ရှိ မြေငလျင်တစ်ခု လှုပ်ရှားသွားသည်ဟု မိုးလေဝသနှင့်ဇလဗေဒညွှန်ကြားမှုဦးစီးဌာန(မြေငလျင်ဌာနခွဲ)မှသိရသည်။

ဇွန်လ ၁၉ ရက် မနက် ၈ နာရီ ၁၀ မိနစ်တွင် ဖျာပုံမြို့၏ အရှေ့တောင်ဘက်မိုင် ၇၀ ခန့်အကွာ မြန်မာ့ပင်လယ်ပြင်တွင် ဗဟိုပြုပြီးတော့ လှုပ်ခတ်ခဲ့ခြင်းဖြစ်သည်။

‘‘ဖျာပုံမြို့အနီး မြန်မာ့ပင်လယ်ပြင်ကိုဗဟိုပြုပြီးလှုပ်ခတ်တာပါ။ အင်အားရစ်တာစကေး(၅.၁)အဆင့်ရှိပါတယ်’’ဟု မိုးလေဝသနှင့် ဇလဗေဒညွှန်ကြားမှုဦးစီးဌာန(မြေငလျင်ဌာနခွဲ)မှ တာဝန်ရှိသူတစ်ဦးက ပြောသည်။

၂၀၂၃ ခုနှစ်အတွင်း မြေငလျင်ငယ်များဆက်တိုက်လှုပ်ခတ်ခဲ့ပြီး စစ်ကိုင်းပြတ်ရွေ့စသည့်ပြတ်ရွေ့ကြောပေါ်တည်ရှိသည့် ဒေသများတွင်မြေငလျင်ကြီး၊ ငယ်တွေလှုပ်ခတ်မှုများခဲ့သလို ပြတ်ရွေ့ကြောပေါ်မရှိသည့် ဒေသများတွင်လည်း မြေငလျင်ကြီး၊ ငယ်တွေလှုပ်ခတ်နိုင်ခြေရှိတဲ့အတွက် သတိပြုနေထိုင်ကြရန် မိုးလေဝသနှင့်ဇလ ဗေဒညွှန်ကြားမှုဦးစီးဌာန(မြေငလျင်ဌာနခွဲ)မှ သတိပေးနှိုးဆော်ထားသည်။

#ymg/tthl #Local_News #ဖျာပုံမြို့အနီးအင်အား ၅.၁အဆင့်ရှိ ငလျင်လှုပ်ခတ်
#YMG #Yangon_Media_Group

#Local_News
Published-19 June 2023

မိုခါရန်ပုံငွေဘောလုံးပွဲမှ ရရှိသည့်ကျပ်သိန်း၉၅၀ကျော်ကို မိုခါမုန်တိုင်းဒဏ်သင့်ဒေသများ၏ ပြန်လည်ထူထောင်ရေးလုပ်ငန်းများတွင် အသုံးပြုသွားမည်ဖြစ်ကြောင်း
သိရသည်။

ရန်ပုံငွေဘောလုံးပြိုင်ပွဲတွင် ရုပ်ရှင်အသင်း(Movie FC)၊ဂီတအသင်း(Music FC)၊ Forever FC အသင်း နှင့်ညွန့်ပေါင်းအသင်း(Old Star FC)တို ပါဝင်ယှဉ်ပြိုင်ခဲ့ပြီး ရန်ကုန်မြို့ သုဝဏ္ဏဘောလုံးကွင်းတွင် ကျင်းပခဲ့ခြင်းဖြစ်သည်။

မိုခါရန်ပုံငွေ ဘောလုံးပွဲပြိုင်ပွဲတွင် ဂီတအသင်း(Music FC)ကပထမ၊ ရုပ်ရှင်အသင်း(Movie FC)ကဒုတိယ၊ ညွန့်ပေါင်းအသင်း(Old Star FC)ကတတိယနှင့် Forever FC အသင်းက စတုတ္ထနေရာကိုရရှိခဲ့ခြင်းဖြစ်သည်။

ပြိုင်ပွဲဗိုလ်လုပွဲကို ပြန်ကြားရေးဝန်ကြီးဌာန၊ ပြည်ထောင်စုဝန်ကြီး၊ မြန်မာနိုင်ငံရုပ်ရှင်အစည်းအရုံးဥက္ကဌ၊ မြန်မာနိုင်ငံဂီတအစည်းအရုံးဥက္ကဌ၊ ပြိုင်ပွဲကျင်းပရေးကော်မတီဥက္ကဌ၊ ရန်ကုန်တိုင်းဥပဒေချုပ်နှင့် တာဝန်ရှိသူများတက်ရောက်ခဲ့ပြီး ပြိုင်ပွဲဆုရရှိသူများကိုဆုချီးမြှင့်ခြင်း၊ အလှူရှင်များ၏ အလှူငွေများကိုလက်ခံခြင်းများကို ဆောင်ရွက်ခဲ့သည်။

မိုခါရန်ပုံငွေဘောလုံးပွဲတွင် ရန်ကုန်တိုင်းဒေသကြီးအစိုးရအဖွဲ့မှ ကျပ်သိန်း၃၀၀၊ စီးပွားရေးလုပ်ငန်းရှင်များမှ ကျပ်သိန်း၂၅၀နှင့် ကျန်အလှူရှင်များမှ အလှူငွေများလက်ခံရရှိခဲ့ပြီး စုစုပေါင်းကျပ် ကိုးရာ့ငါးဆယ်ငါးသိန်းငါးသောင်းကို မိုခါမုန်တိုင်းဒဏ်သင့်ဒေသများ၏ ပြန်လည်ထူထောင်ရေးလုပ်ငန်းများတွင် အသုံးပြုသွားမည်ဖြစ်ကြောင်း သိရသည်။

#ymg/tthl #Local_News #ကျပ်သိန်း ၉၅၀ကျော်ကို မိုခါမုန်တိုင်းဒဏ်သင့်ဒေသများပြန်လည်ထူထောင်ရေးတွင် သုံးမည် #YMG #Yangon_Media_Group

#Local_News
Published-19 June 2023

မြန်မာမူလတန်းကလေးငယ်တစ်ဦး မြန်မာနိုင်ငံကိုယ်စားပြုပြီး ကမ္ဘာ့အဆင့်”Chinese Brigde –Chinese Show’’ပြိုင်ပွဲတွင်ပါဝင်ယှဉ်ပြိုင်သွားမှာဖြစ်သည်ဟု မြန်မာနိုင်ငံဆိုင်ရာတရုတ်သံရုံး၏ထုတ်ပြန်ချက်အရ သိရသည်။

တတိယအကြိမ် ကမ္ဘာ့မူလတန်းကျောင်းသားကျောင်းသူများ ”Chinese Brigde –Chinese Show’’ပြိုင်ပွဲကို ဇွန်လ(၁၈)ရက်တွင် ရန်ကုန်တရုတ်ယဉ်ကျေးမှုစင်တာမှာ ကျင်းပခဲ့ပြီး ရန်ကုန်မြို့ရှိ တရုတ်ဘာသာစကားကျောင်းအဖွဲ့ အစည်းတွေမှ ကျောင်းသား၊ ကျောင်းသူပြိုင်ပွဲဝင် ၂၀ဦး ပါဝင်ယှဉ်ပြိုင်ခဲ့ပြီး ဆရာဆရာမ၊ ကျောင်းသားကျောင်းသူ ၁၀၀ ကျော် တက်ရောက်ခဲ့သည်။

ယင်းပြိုင်ပွဲတွင် ရန်ကုန်မြို့ရှိ Bowen တရုတ်ဘာသာသင်သင်တန်းကျောင်းမှ ကလေးငယ်Tan Xianen ကပထမဆုရရှိခဲ့ပြီး တစ်ကမ္ဘာလုံး အဆင့်ဖိုင်နယ်ပွဲမှာ ပါဝင်ယှဉ်ပြိုင်ခွင့်ရရှိခဲ့သည်။

ပြိုင်ပွဲကို မြန်မာနိုင်ငံဆိုင်ရာတရုတ်သံရုံးသံမှူးကြီး Ms. Coa Jinguကတက်ရောက်ခဲ့ပြီး တရုတ်နိုင်ငံဖွံ့ဖြိုးတိုးတက်မှု နှင့် တရုတ်ဘာသာစကားနိုင်ငံရပ်ခြားတွင် ပြန့်ပွားစေရေးအတွက် တိုးတက်မှုအခြေအနေသစ်ကို မိတ်ဆက်ပေးခဲ့ပြီး မြန်မာနိုင်ငံမှ ပြိုင်ပွဲဝင်ကျောင်းသားကျောင်းသူများက တရုတ်ဘာသာစကားအားကြိုးစားသင်ယူကာ တရုတ်နိုင်ငံနှင့် ကမ္ဘာကြီး ကူးလူးဖလှယ်ချိတ်ဆက်သည့်စွမ်းရည်တိုးတက်စေကာ တရုတ်-မြန်မာချစ်ကြည်ရင်းနှီးစွာ ပူးပေါင်းဆောင်ရွက်မှု မြှင့်တင်ရေး၏ သံတမန်လေးများအဖြစ်ထမ်းဆောင်ရန်အားပေးခဲ့ကြောင်း ထုတ်ပြန်ချက်တွင် ဖော်ပြပါရှိသည်။

#ymg/tthl #Local_News #Chinese Brigde – Chinese Showပြိုင်ပွဲ #မြန်မာမူလတန်းကလေးငယ်သွားရောက်ယှဉ်ပြိုင် #YMG #Yangon_Media_Group

#Local_News
Published-19 June2023

ရာနှင့်ချီသော မြန်မာနိုင်ငံသားများထံမှ လာဘ်ယူ၍ ပန်းရောင်မှတ်ပုံတင်ကတ်လုပ်ပေးခဲ့သူ ထိုင်းအရာရှိများအား စစ်ဆေးနေကြောင်း ထိုင်းနိုင်ငံဒေသတွင်း သတင်းများက သိရသည်။

လွန်ခဲ့သောသုံးလအတွင်းက မြန်မာနိုင်ငံသား ရွှေ့ပြောင်းနေထိုင်သူ ၇၀၀ ကို ပန်းရောင်မှတ်ပုံတင်ကတ်များ ထုတ်ပေးရန်အတွက် ထိုင်းနိုင်ငံ၊ မဲဆောက်ခရိုင်၌ နိုင်ငံသားမှတ်ပုံတင်ဦးစီးဌာနမှ ထိုင်းအရာရှိသုံးဦးက တံစိုးလက်ဆောင် ဘတ်ငွေ သန်း ၃၀ ယူ၍ ဆောင်ရွက်ပေးခဲ့ကြောင်း သတင်းများထွက်ပြီးနောက် ယခုအခါ စုံစမ်းစစ်ဆေးမှုပြုလုပ်ခြင်းခံနေကြရပြီဖြစ်ကြောင်း အဆိုပါ ဒေသတွင်း သတင်းများက ဆိုသည်။

အဆိုပါ မှတ်ပုံတင်အရာရှိသုံးဦးက ဒုက္ခသည်များ၊ကယားပြည်နယ်တွင် လှုပ်ရှားနေသော PDF များကဲ့သို့ မြန်မာနိုင်ငံ နစက အစိုးရကို ဆန့်ကျင်ရေးအဖွဲ့ဝင် ၇၀၀ ခန့်အတွက် ပန်းရောင်မှတ်ပုံတင်များ ထုတ်ပေးခဲ့ခြင်းဖြစ်ကြောင်း ၊၎င်းတို့က တစ်နေ့လျှင်ပျမ်းမျှ ပန်းရောင်မှတ်ပုံတင်ကတ် ၁၅ ကတ်မှ ၂၀ ကတ်အထိ ထုတ်ပေးခဲ့ကြောင်းလည်း သိရသည်။

ကတ်တစ်ခုလျှင် ဘတ် ၄၀၀၀၀ မှ ၁၀၀၀၀၀ ထိ တောင်းဆိုခဲ့သောကြောင့် ဘတ်ငွေ ၂၈ သန်းမှ သန်း ၃၀ ထိ လာဘ်ရယူခဲ့ကြခြင်း ဖြစ်ကြောင်း တက်ခ်ပြည်နယ်အုပ်ချုပ်ရေးမှူး ဆွန်ချိုင်းထံ ဒေသခံများနှင့် တာဝန်ရှိသူများက ယင်း ၃ ဦးကို တိုင်ကြားခဲ့ကြခြင်းဖြစ်ကြောင်း သိရသည်။

မဲဆောက်မှတ်ပုံတင်ရုံးတွင် ပန်းရောင်မှတ်ပုံတင်ကတ်များရရှိရေး တန်းစီစောင့်ဆိုင်းနေသော ရွှေ့ပြောင်းနေထိုင်သူများ ပုံမှန်မဟုတ်ဘဲ ရှည်လျားစွာတန်းစီနေကြသည်ကို တွေ့ရှိခဲ့ကြသည့် ထိုင်းနိုင်ငံသားများက သတင်းပေးပို့မှုအရ မဲဆောက်ခရိုင် မှတ်ပုံတင်ရုံးကိုစစ်ဆေးရန် အမိန့်ထုတ်ခဲ့ခြင်းဖြစ်ကြောင်း သိရသည်။

#ymg/BM #Local_News #လာဘ်ယူ၍ပန်းရောင်မှတ်ပုံတင်ကတ်လုပ်ပေးခဲ့သူ
#YMG #Yangon_Media_Group

#Local_News
Published-19 June2023

မန္တလေးတိုင်း၊ အမရပူရမြို့နယ်၊ စစ်ကိုင်း-မန္တလေးလမ်းဘေးတွင် ဇွန်လ ၁၈ ရက်ညပိုင်းက အိမ်စီးကားတစ်စီး ပက်လက်လန်တိမ်းမှောက်၍ ကလေးငယ်တစ်ဦးအပါအဝင် လူနှစ်ဦးသေဆုံးပြီး၊ အမျိုးသမီး ၁ဦး ထိခိုက်ဒဏ်ရာရရှိခဲ့ကြောင်း လူမှုကူညီရေးအသင်းက သိရသည်။

ဖြစ်စဥ်မှာ ဇွန်လ ၁၈ ရက် ည၁၀ နာရီခန့်က အမရပူရမြို့နယ်၊ ရွှေဂဲပွားရပ်ကွက်၊ စစ်ကိုင်း-မန္တလေးလမ်းအတိုင်းမောင်းနှင်လာသည့် အိမ်စီးကားသည် ဒေါ်အေးကြင်ထမင်းဆိုင်အနီးတွင် အရှိန်မထိန်းနိုင်ဘဲ ပက်လက်လန်တိမ်းမှောက်ခဲ့ခြင်းဖြစ်ကြောင်း သိရသည်။

"မိသားစု ၃ ယောက် အိမ်ပြန်လမ်းမှာဖြစ်တာ။ အဲဒီနားမှာ လူယက်မှုဖြစ်တတ်တော့ အမြန်မောင်းမိတာဖြစ်မယ်။မှောက်တော့ကားက ပက်လက်လန်သွားတယ်။ သားအဖ၂ ယောက် သေတယ်။ အမျိုးသမီးကတော့ ထိခိုက်ဒဏ်ရာတွေရရှိခဲ့ပါတယ်"ဟုအဆိုပါ လူမှုကူညီရေးအသင်းမှ သိရသည်။

အဆိုပါ ယာဥ်တိမ်းမှောက် မှုဖြစ်စဥ်ကြောင့် သားအဖ ၂ဦးမှာ အခင်းဖြစ်ရာနေရာ၌ပင်ပွဲချင်းပြီး သေဆုံး၍ အမျိုးသမီးမှာ စိုးရိမ်ရ ထိခိုက်ဒဏ်ရာများရရှိခဲ့ကြောင်း သိရသည်။

သို့ဖြစ်ပါ၍ ယာဉ်တိမ်းမှောက်မှုကြောင့် သေဆုံးခဲ့သူနှစ်ဦးကို ဒဏ်ရာရ ရှိသူ(အမျိုးသမီး) ကို သီရိဆင်ကာပရဟိတလူမှုကူညီ​ရေးအသင်းမှ မန္တလေးပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း သိရသည်။

#ymg/BM #Local_News #စစ်ကိုင်း-မန္တလေး ကားလမ်းဘေးတွင် အိမ်စီးကားတိမ်းမှောက်
#YMG #Yangon_Media_Group

၁၈ ဇွန် ၂၀၂၃

မြန်မာနစကကိုယ်စားလှယ်များ၏ အသံကို နားထောင်နိုင်ဖို့ အာဆီယံနိုင်ငံများနှင့် အခြားနိုင်ငံများမှကိုယ်စားလှယ်များ အတွက် ဖိုရမ်တစ်ခုကို ထိုင်းနိုင်ငံ အိမ်စောင့်အစိုးရက ကျင်းပပေးတာဟာ ဒေသတွင်း အကျိုးစီးပွားအတွက်ဖြစ်ပြီး အာဆီယံကိုယ်စားပြု လုပ်ဆောင်ခြင်းမဟုတ်ဘူးလို့ ထိုင်းနိုင်ငံခြားရေးဝန်ကြီး ဒွန် ပရာမွတ်ဝင်နိုင်းက ပြောကြား လိုက်ပါတယ်။

အစည်းအဝေးဟာ အာဆီယံအစည်းအဝေးမဟုတ်ဘဲ မြန်မာနိုင်ငံမှာ နိုင်ငံခြားရေးဝန်ကြီးအသစ်ခန့်အပ်ပြီးတဲ့နောက် မြန်မာနိုင်ငံရဲ့တိုးတက်မှုတွေကို နားထောင်ဖို့အတွက် အာဆီယံအဖွဲ့ဝင်နိုင်ငံတွေရဲ့ဖိုရမ်ဖြစ်တယ်လို့ မစ္စတာဒွန်က ဆက်ပြောပါတယ်။

“ ဒီလိုအစည်းအဝေးမျိုး ထိုင်းကကျင်းပပေးတာ ဒါပထမဆုံးမဟုတ်ဘူး။ ဒါဟာ တတိယအကြိမ်ဖြစ်တယ်။ ဒီလိုအစည်းအဝေးမျိုးနှစ်ကြိမ်လုပ်ပြီးပြီ။ သတင်းမထုတ်ပြန်တာပဲရှိတယ်။ သူတို့ဟာ မြန်မာက ဘာတွေလုပ်ပြီး သလဲဆိုတာ အကြိတ်အနယ် စဉ်းစားကြပြီး နားထောင်ခဲ့ကြတယ်” လို့ သူကပြောပါတယ်။

သူက အာဆီယံနိုင်ငံက ဝန်ကြီးအဆင့်တွေအားလုံးဖိတ်ကြားခဲ့ပြီး မတက်ရောက်ခဲ့သူတွေက လုံးဝပျက်ကွက်တာနှင့် ကိုယ်စားလှယ်လွှတ်ခဲ့တာတွေရှိပါတယ်လို့ သူကပြောပါတယ်။

“ ဒီအလုပ်ကို ကျွန်တော်တို့ပွင့်လင်းမြင်သာစွာလုပ်တာဖြစ်တယ်။ မြန်မာက နိုင်ငံခြားရေးဝန်ကြီးကို အစားထိုးပြီးပြီ။ သူ့ဆီက ကျွန်တော်တို့နားထောင်သင့်တယ်။ မြန်မာ(စစ်အစိုးရ)နှင့် စကားပြောဆိုမှုမရှိဘဲ ကျွန်တော်တို့ဘယ်လို နည်းလမ်းရှာမလဲ” လို့ ထိုင်းနိုင်ငံခြားရေးဝန်ကြီးကပြောပါတယ်။

ဒါဟာ အာဆီယံ ဒါမှမဟုတ် အာဆီယံဥက္ကဋ္ဌကို ကိုယ်စားပြုလုပ်တာမဟုတ်ဘူး။ ဒါပေမယ့် အာဆီယံဥက္ကဋ္ဌရဲ့ အလုပ်ကိ ကူညီထောက်ပံ့တဲ့အနေနှင့်ဖြစ်တယ်ဆိုတာ အာဆီယံနိုင်ငံတွေက ရှင်းပြပြီးပြီလို့လည်း မစ္စတာဒွန်ကပြောပါတယ်။

“ ထိုင်းက ဘယ်လိုနာမည်ကောင်းမှမလိုချင်ဘူး။ ဒါပေမယ့် အာဆီယံကို လုံခြုံမှုနှင့်တည်ငြိမ်ရေးပြန်ဖြစ်စေချင်တယ်။ ပြီးတော့ သူ့ရဲ့ အလားအလာအမှန်ကို ကောင်းစွာအသုံးချနိုင်စေချင်တယ်” လို့ မစ္စတာဒွန်ကပြောပါတယ်။

ပြီးခဲ့တဲ့လက အင်ဒိုနီးရှားနိုင်ငံ လာဘွမ်းဘာဂျိုမှာကျင်းပခဲ့တဲ့ အာဆီယံထိပ်သီးအစည်းအဝေးမှာ အာဆီယံ ခေါင်းဆောင် အများစုက မြန်မာနှင့်အပြန်အလှန်ဆက်ဆံမှုရှိသင့်တယ်လို့ သဘောတူခဲ့ကြပေမယ့် ဘယ်သူကမှ လက်တွေ့ မလုပ်ခဲ့ကြဘူး လို့လည်း သူကပြောပါတယ်။

“ အခြေအနေတွေက မြန်မာနိုင်ငံမှာ အကြီးကြီးပြောင်းလဲခဲ့တယ်။ ပဋိပက္ခတွေပိုများလာတယ်။ အများစုဟ တိုင်းရင်းသား လူနည်းစုတွေနှင့်ပတ်သက်နေတယ်။ အဲဒါတွေဟာ မြန်မာနှင့် ထိတွေ့ဆက်ဆံဖို့ လိုအပ်တယ်လို့ ကျွန်တော်တို့မြင်မိတဲ့ အကြောင်းရင်းတွေဖြစ်တယ်” လို့ မစ္စတာဒွန်ကပြောပါတယ်။

ထိုင်းနိုင်ငံဟာ မြန်မာနှင့် နယ်စပ်ခြင်း ၂၄၀၀ကီလိုမီတာထိစပ်နေတဲ့အတွက် မြန်မာနိုင်ငံမှာ ပြဿနာတွေ မြန်မြန်ပြီးလို့ ရရင် ပြီးစေချင်တဲ့ နိုင်ငံတစ်နိုင်ငံဖြစ်တယ်လို့ သူကဆိုပါတယ်။

မြန်မာပြဿနာဟာ ဒေသဆိုင်ရာနိုင်ငံရေးကို အလွန်စိတ်ပူစရာဖြစ်ပြီး ကြီးထွားလာရင်  ဒေသတစ်ခုလုံးကို ရိုက်ခတ် နိုင်တယ်လို့လည်း ထိုင်းနိုင်ငံခြားရေးဝန်ကြီးကပြောပါတယ်။

အလွတ်သဘော အစည်းအဝေးကို တနင်္ဂနွေနှင့် တနင်္လာနှစ်ရက်မှာ ပတ္တရားမှာ ကျင်းပသွားမယ်လို့ မစ္စတာဒွန်က ဘန်ကောက်ပို့စ်ကို ပြောပါတယ်။  ထိုင်းအိမ်စောင့်အစိုးရက ဒီလိုအစည်းအဝေးတွေဆက်လုပ်မှာပဲဖြစ်တယ်၊ ဘာဖြစ်လို့ လဲဆိုတော့ ထိုင်းနိုင်ငံဟာ အခြားအာဆီယံနိုင်ငံတွေနှင့်မတူဘဲ မြန်မာနိုင်ငံထဲက စစ်ပွဲတွေရဲ့ ဆိုးကျိုးကိုရင်ဆိုင်နေရတာ ဖြစ်တယ်လို့ သူကပြောပါတယ်။

“ အစည်းအဝေးမှာ ထိုင်းရဲ့အခန်းကဏ္ဍဟာ အိမ်စောင့်အစိုးရရဲ့ အခန်းကဏ္ဍမဟုတ်ဘူး။ ဒါဟာ ဆက်သွားနေတယ့် မစ်ရှင်တစ်ခုဖြစ်တယ်။ ကိစ္စအသစ်မဟုတ်ဘူး။ ကျွန်တော်တို့ဟာ နိုင်ငံ့အကျိုးစီးပွားအတွက် ဒီကိစ္စကိုလုပ်နေ  တာဖြစ်တယ်” လို့ သူကပြောပါတယ်။

အာဆီယံနိုင်ငံအချို့က ဝန်ကြီးတွေ  အချိန်ကပ်အကြောင်းကြားလို့ မတက်ရောက်ပေမယ့် အစည်းအဝေးကိုဆက်လုပ်မယ် လို့ သူကပြောပါတယ်။

အာဆီယံဥက္ကဋ္ဌ အင်ဒိုနီးရှားနိုင်ငံခြားရေးဝန်ကြီးက ဒီကိစ္စနှင့်ပတ်သက်ပြီး ထိုင်းအပေါ် မအီမသာဖြစ်နေတယ်။  ဒီအလုပ်ကို ခင်ဗျားအတွက် မေတ္တာလက်ဆောင်အဖြစ် ကျွန်တာ်တို့လုပ်တာလို့ သူတို့ကိုရှင်းပြခဲ့တယ်” လို့သူကပြောပါတယ်။

အလွတ်သဘောအစည်းအဝေးကို တနင်္လာနေ့မှာကျင်းပမယ်လို့ သူက နောက်ပိုင်းမှာပြောခဲ့ပါတယ်။ မြန်မာနိုင်ငံရဲ့ ပဋိပက္ခအကျိုးဆက်ရိုက်ခတ်ခံရတဲ့ နိင်ငံတွေရဲ့ အလွတ်သဘောအစည်းအဝေးလို့သူကပြောပါတယ်။

အစည်းအဝေးကို ဘရူးနိုင်း၊ ကမ္ဘောဒီးယား၊ တရုတ်၊ အိန္ဒိယ၊လာအို၊မြန်မာနှင့် ဗီယက်နမ်တို့က အဆင့်မြင်ကိုယ်စားလှယ် တွေတက်ရောက်လိမ့်မယ်လို့ သိရပါတယ်။

Source Bangkok Post

#Thailand Forum on Myanmar

#Myanmar_Thailand

#Myanmarpolitics

#Yangonmediagroup

#Yangontimes