#Local_News

Published 05 August 2025

▪️ မြန်မာနိုင်ငံတော် ဗဟိုဘဏ်အနေဖြင့် နိုင်ငံခြားငွေကြေးဈေးကွက် (FX Trading Platform)တွင် သွင်းကုန်လုပ်ငန်းရှင်များအတွက် တရုတ်ယွမ် ၁၀ သန်းနှင့်ထိုင်းဘတ်သန်း (၅၀) ရောင်းချပေးမည်ဖြစ်ကြောင်း အသိပေးထုတ်ပြန်ထားသည်။

▪️ ဗဟိုဘဏ်က သွင်းကုန်လုပ်ငန်းရှင်များအတွက် နိုင်ငံခြားငွေထုတ်ရောင်းပေးရာတွင် ဇွန်လ ၁၆ ရက်၌ အမေရိကန်ဒေါ်လာ (၁၀)သန်းနှင့်ဇူလိုင်လ ၂ ရက်၌ တရုတ်ယွမ် (၁၀) သန်း ရောင်းချပေးခဲ့ကြောင်း သိရသည်။

▪️ ထိုသို့ ဗဟိုဘဏ်က သွင်းကုန်လုပ်ငန်းရှင်များသို့နိုင်ငံခြားငွေများရောင်းချပေးခြင်းအပြင် စက်သုံးဆီလုပ်ငန်းရှင်များအတွက်လည်း ယခု ၂၀၂၅-၂၀၂၆ ဘဏ္ဍာနှစ် ဧပြီလမှ ဇူလိုင် ၂၈ ရက်အထိ လေးလနီးပါးတွင် ဒေါ်လာ ၄၅၇ သန်းနှင့် ထိုင်းဘတ်သန်း (၂၀၀) အထိ ထုတ်ရောင်းပေးခဲ့‌ကြောင်းသိရသည်။

▪️ ဗဟိုဘဏ်၏ နိုင်ငံခြားငွေများ ရောင်းချပေးနေသည့် FX Online Trading Platform တွင် နိုင်ငံခြား‌‌ေငွ‌ေရာင်းချမှု ယနေ့ ပေါက်ဈေးမှာအမေရိကန်တစ်ဒေါ်လာ ၃၆၂၂ ကျပ်၊ ထိုင်းတစ်ဘတ် ၁၃၄ ကျပ်နှင့် တရုတ်ယွမ် တစ်ယွမ် ၅၅၃ ကျပ် ဖြစ်ကြောင်း သိရသည်။

#YMG/SW #Yangon_Times

#Local_News

Published 05 August 2025

▪️ တစ်ပတ်အတွင်း ကိုဗစ်-၁၉ ဓါတ်ခွဲအတည်ပြုလူနာသစ် (၄)ဦးတွေ့ရှိခဲ့ကြောင်း ကျန်းမာရေးဝန်ကြီးဌာန မြန်မာနိုင်ငံရောဂါကာကွယ်ထိန်းချုပ်ရေးဗဟိုဌာန(Myanmar CDC) က အတည်ပြုထုတ်ပြန်ထားသည်။

▪️ ပြီးခဲ့သည့် ဇူလိုင်(၂၇)ရက်ကနေ ဩဂုတ်(၃)ရက်နေ့အတွင်း စစ်ဆေးချက်များအရ ကိုဗစ်-၁၉ရောဂါ ဓါတ်ခွဲအတည်ပြုလူနာသစ်(၄)ဦး တွေ့ရှိခဲ့ခြင်းဖြစ်ပြီး ဓါတ်ခွဲနမူနာစုစုပေါင်း(၁၁၁၈)ခုကို စစ်ဆေးခဲ့ရာ ရောဂါပိုးတွေ့ရှိမှုနှုန်းမှာ ( ၀.၃၆)ရာခိုင်နှုန်းဖြစ်ကြောင်းသိရသည်။

▪️ အဆိုပါ စစ်ဆေးတွေ့ရှိသည့်လူနာများတွင်လက်ရှိအချိန်ထိ ပြင်းထန်လူနာ၊ အထူးကြပ်မတ်ကုသမှုပေးရသောလူနာနှင့် ကိုဗစ်(၁၉)ရောဂါဖြင့် သေဆုံးလူနာမရှိခဲ့ကြောင်း ထုတ်ပြန်ထားသည်။

#YMG/SW #Yangon_Times

#Local_News

Published 05 August 2025

▪️ ပြည်သူ့ကျန်းမာရေးဦးစီးဌာနတွင် ဝန်ထမ်းသစ် ၇၃၀၅ ဦး ခန့်ထားနိုင်ခဲ့ပြီး ၃၁၉၂ ဦးကို ရာထူးတိုးမြှင့်ပေးနိုင်ခဲ့မှုကြောင့် ကုသရေးလုပ်ငန်းများ ပိုမိုထိရောက်စွာဆောင်ရွက်နိုင်ကြောင်း ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်ခိုင်ဝင်းကပြောသည်။

▪️ ယမာန်နေ့က ပြည်သူ့ကျန်းမာရေးဦးစီးဌာန ကုသရေးဦးစီးဌာနမှ တာဝန်ရှိသူများ၊ နေပြည်တော်၊ တိုင်းဒေသကြီး၊ ပြည်နယ် ပြည်သူ့ကျန်းမာရေးနှင့် ကုသရေးဦးစီးဌာနတို့မှ ဌာနမှူးများနှင့်တွေ့ဆုံအမှာစကားပြောကြားစဥ်
ထည့်သွင်း ပြောကြားခဲ့ခြင်းဖြစ်သည်။

▪️ အဆိုပါ တွေ့ဆုံပွဲသို့ ကျန်းမာရေးဝန်ကြီးဌာနဒုတိယဝန်ကြီး ဒေါက်တာအေးထွန်း၊ ပြည်ထောင်စုဝန်ကြီးရုံး၊ ပြည်သူ့ကျန်းမာရေးဦးစီးဌာနနှင့် ကုသရေးဦးစီးဌာနတို့မှ ဌာနဆိုင်ရာတာဝန်ရှိသူများ၊ နေပြည်တော်၊ တိုင်းဒေသကြီး၊ ပြည်နယ်ပြည်သူ့ကျန်းမာရေးနှင့် ကုသရေးဦးစီးဌာနတို့မှ ဌာနမှူးများ တက်ရောက်ကြပြီး တွေ့ဆုံပွဲတွင် ပြည်ထောင်စုဝန်ကြီးက ကျန်းမာရေးဝန်ကြီးဌာနအနေဖြင့် အခြေခံကျန်းမာ ရေးဝန်ထမ်း ၄၇၉၅ ဦး၊ သားဖွားဆရာမ ၁၀၅၈ ဦး၊ သွားဘက်ဆိုင်ရာဆရာဝန် ၂၂ ဦး အပါအဝင် ပြည်သူ့ကျန်းမာရေးဦးစီးဌာနတွင် ဝန်ထမ်းသစ် ၇၃၀၅ ဦး ခန့်ထားနိုင်ခဲ့ပြီး ၃၁၉၂ ဦးကို ရာထူးတိုးမြှင့်ပေးနိုင်ခဲ့ကြောင်း၊ ပြည်သူ့ဆေးရုံများတွင် ခုတင်(၅၀)အဆင့်အထိ အထူးကုဆရာဝန်များ ခန့်ထားနိုင်ခြင်းနှင့် သစ်လွင်လက်ထောက်ဆရာဝန်များနှင့် သစ်လွင်သွားနှင့် ခံတွင်းဆရာဝန်များ ထပ်မံခန့်ထားနိုင်ခြင်းကြောင့် ကုသရေးလုပ်ငန်းများ ပိုမိုထိရောက်စွာ ဆောင်ရွက်နိုင်ခဲ့ကြောင်းဆိုသည်။

▪️ ထို့အပြင် ပုဂ္ဂလိက ကျန်းမာရေးဝန်ဆောင်မှု အရည်အသွေးမြင့်မားစေရေးအတွက် ဗဟိုအဖွဲ့အနေဖြင့် စနစ်တကျကြပ်မတ်ဆောင်ရွက်နိုင်ခဲ့ကြောင်း၊ ပြည်သူ့ဆေးရုံများတွင် အခမဲ့ဓာတ်ခွဲ၊ ဓာတ်မှန်စမ်းသပ်စစ်ဆေးမှုများ တိုးမြှင့်လုပ်ဆောင်နိုင်ခြင်း၊ နိုင်ငံတော်ကတိုးမြှင့်ပံ့ပိုးပေးသည့် ကျန်းမာရေးရန်ပုံငွေဖြင့် လိုအပ်သည့် ဆေးနှင့်ဆေးပစ္စည်း၊ခေတ်မီစက်ကိရိ ယာပစ္စည်းများ ဖြည့်ဆည်းပေးနိုင်ခြင်းတို့ကြောင့် လူနာများ၏ စိုက်ထုတ်ကုန်ကျငွေ လျော့နည်းလာသည်ကိုကောက်ခံရရှိသော အချက်အလက်များအရ တွေ့ရှိရကြောင်း၊ ကျန်းမာရေးဝန်ထမ်းများကိုလည်း ပညာရှင်ဘွဲ့ချီးမြှင့်ခြင်း၊ လုပ်အားခများ ချီးမြှင့်ခြင်း၊ ဝန်ထမ်းအိမ်ရာများ ဖြည့်ဆည်းပေးနိုင်ခြင်း စသည်ဖြင့် ပံ့ပိုးမှုများဆောင်ရွက်နိုင်ခဲ့ကြောင်း၊ တွေ့ရှိခဲ့ရသော အားသာချက်များကို အရှိန်အဟုန်မပြတ် ဆက်လက်ဆောင်ရွက်ပြီး အားနည်းချက်များကို ပြင်ဆင်ဆောင်ရွက်ကာ စာမျက်နှာသစ်ကို ပိုမိုလှပစေရန်၊ နိုင်ငံတော်၏ရည်မှန်းချက်များ အောင်မြင်စေရန်နှင့် ကျန်းမာရေးအဆင့်အတန်း ယခုထက် ပိုမိုကောင်းမွန်လာပြီး နိုင်ငံတော်ဖွံ့ဖြိုးတိုးတက်ရေးအတွက် အခြေခံအဆောက်အအုံဖြစ်စေရန် မိမိတို့တစ်ယောက်ချင်းစီက ကြိုးပမ်းဆောင်ရွက်ကြရမည် ဖြစ်ကြောင်း ပြောကြားသည်။

▪️ ထို့နောက် ဒုတိယဝန်ကြီးက ကျန်းမာရေးစောင့်ရှောက်မှု အညွှန်းကိန်းများ တိုးတက်စေရေးနှင့် တွေ့ကြုံရသည့် ကျန်းမာရေးဆိုင်ရာပြဿနာများကို လျင်မြန်စွာတုံ့ပြန်ဆောင်ရွက်နိုင်သည့် ကျန်းမာရေး စနစ်ဖြစ်စေရေး ဆက်လက်ဆောင်ရွက်ကြရန် ပြောကြားသည်။

▪️ ယင်းနောက် ညွှန်ကြားရေးမှူးချုပ်များက ဌာနအလိုက် လုပ်ငန်းပိုင်းဆိုင်ရာများကို မှာကြားကြပြီး တက်ရောက်လာကြသည့် နေပြည်တော်၊ တိုင်းဒေသကြီး၊ ပြည်နယ်ပြည်သူ့ကျန်းမာရေးနှင့် ကုသရေးဦးစီးဌာနတို့မှ ဌာနမှူးများက လုပ်ငန်းဆောင်ရွက်မှုနှင့် လိုအပ်ချက်များကို ဆွေးနွေးတင်ပြကြရာ ပြည်ထောင်စုဝန်ကြီး၊ ဒုတိယဝန်ကြီးနှင့် တာဝန်ရှိသူများက ပေါင်းစပ်ညှိနှိုင်းဖြည့်ဆည်းပေးခဲ့ကြကြောင်း သိရသည်။

#YMG/NN #Yangon_Times

#Local_News

Published 05 August 2025

▪️ ထိုင်းနိုင်ငံသို့ ရောက်ရှိနေသည့်  မြန်မာရွှေ့ပြောင်းအလုပ်သမားများအတွက် မည်သူမည်ဝါဖြစ်ကြောင်း သက်သေခံလက်မှတ် (Certificate of Identity – CI) စခန်း ၄ ခု ဖွင်လှစ်ဆောင်ရွက်ပေးမည် ဖြစ်ကြောင်း အလုပ်သမားသံအရာရှိရုံး (ဗန်ကောက်) က အသိပေး ထားသည်။

▪️ မြန်မာနိုင်ငံနှင့် ထိုင်းနိုင်ငံရှိ  အလုပ်သမားဝန်ကြီးဌာနနှစ်ခု ပူးပေါင်းဆောင်ရွက်မှုနှင့်  မြန်မာရွှေ့ပြောင်းအလုပ်သမားများကို စမုစခွန်စခန်း၊ စမုပရာကန်စခန်း၊ ဆူရတ်ဌာနီစခန်းနှင့်ချင်းမိုင်စခန်းတို့တွင်  သြဂုတ်လ (၆) ရက်နေ့မှစတင်၍  ဆောင်ရွက်ပေးသွားမည်ဖြစ်ကြောင်းသိရသည်။

▪️ အဆိုပါ မည်သူမည်ဝါဖြစ်ကြောင်း သက်သေခံလက်မှတ် (Certificate of Identity-CI) သက်တမ်းကုန်ဆုံးရန် (၆) လ အောက် ကျန်နေသူများ၊ သက်တမ်းကုန်ဆုံးနေသူများကို အသစ်လဲလှယ်ပေးခြင်း၊ ထိုင်းနိုင်ငံ၏  ဘတ်ကတ် (TR-38) လုပ်ငန်းစဉ်နှင့်အတူ CI စာအုပ်အသစ်များကို ထုတ်ပေးမည်ဖြစ်သည်။

▪️ ထို့အပြင် နိုင်ငံသားစိစစ်ရေးကဒ်မူရင်း၊ အိမ်ထောင်စုစာရင်းနှင့် CI စာအုပ်ရှိသူများကို အထောက်အထားစိစစ်ပြီးနောက် နိုင်ငံကူးလက်မှတ် (Passport for Thailand Only) ထုတ်ပေးခြင်းနှင့် Overseas Worker Identification Card – OWIC ကတ်ပြားထုတ်ပေးခြင်းများလည်း ဆောင်ရွက်ပေးမည် ဖြစ် ကြောင်း ၊CI စာအုပ်အသစ် လဲလှယ်ထုတ်ဝေပေးခြင်းအတွက် ဝန်ဆောင်ခအဖြစ် ၂,၆၇၀ ဘတ် သတ်မှတ်ထားပြီး 7/11 ဆိုင်များ ထံ  တိုက်ရိုက်ငွေပေးသွင်းရမည် ဖြစ်ကာ ပေးသွင်းပြေစာပြသပြီး စာအုပ်များ ပြုလုပ်ရမည် ဖြစ်ကြောင်း သိရသည် ။

▪️ ထို့အပြင် ရက်ချိန်းအတွက် နီးစပ်ရာစခန်းကို ရွေးချယ်ရယူနိုင်ပြီး စခန်းများတွင်  ဆောင်ရွက်ရာတွင်  တနင်္လာနေ့တိုင်းနှင့် မြန်မာသံရုံး (ဗန်ကောက်) မှ သတ်မှတ်ထားသည့်  ရုံးပိတ်ရက်များကို အလုပ်နားရက်သတ်မှတ်ထား ကြောင်းသိရသည်။

#YMG/NN #Yangon_Times

#Daily_News

Published 04 August 2025

၁။ ‌‌‌‎‎‎‎ရိုးမရိပ်သာအိမ်ရာ အခန်းဝယ်ယူခွင့် အကြောင်းကြားစာကို ယခုလ ၂၅ ရက်နောက်ဆုံးထားထုတ်ယူရမည်

‎၂။ ‌‎‎‎‌‎‎‎‎‎နှစ်လကျော်အတွင်း တောင်သူ၂သိန်းကျော်ကို စိုက်စရိတ်၂၀၈ ဘီလီယံကျော် ထုတ်ချေးထား

၃။ ‌‎စားအုန်းဆီအခြေခံလက်ကား ရည်ညွှန်းဈေး နှစ်ပတ်ဆက်တိုက်ပြန်တက်

၄။ စစ်ပွဲမှကျန်ခဲ့သောမပေါက်ကွဲသေးသည့်ဒုံးကျည်များကို ဗုံးရှင်းလင်းရေးအဖွဲ့များရှင်းလင်း  ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#Local_News

Published 04 August 2025

▪️ ဇူလိုင်လ (၃၀ )ရက်က စတင်ကာထုတ်ပေးနေသည့် ၂၀၂၅ ခုနှစ် တက္ကသိုလ်ဝင်တန်းစာမေးပွဲအမှတ်စာရင်းထုတ်‌ပေးမှုကို ယနေ့မှ စတင်ကာ ယာယီရပ်ဆိုင်းထားကြောင်း သိရသည်။

▪️ အဆိုပါ အမှတ်စာရင်းများကို မြန်မာနိုင်ငံစာစစ်ဦးစီးဌာနမှ ထုတ်ပေးနေခြင်းဖြစ်ပြီး ပြီးခဲ့သည့်ရက်ပိုင်းက အမှတ်စာရင်းထုတ်ပေးသည့် စနစ်ချို့ယွင်းမှုကြောင့် ဇူလိုင်လ (၃၀)ရက် မွန်းလွဲ ၂နာရီမတိုင်မီ ထုတ်ယူခဲ့သည့်အမှတ်စာရင်းများကို ပြန်လည်ထုတ်ယူရန် အသိပေး ထုတ်ပြန်ခဲ့ပြီးနောက် ယခုအခါ အမှတ်စာရင်းထုတ်ပေးမှုကို ယာယီရပ်ဆိုင်းခဲ့ ခြင်းဖြစ်သည်။

▪️ ပညာရေးဝန်ကြီးဌာန၊ မြန်မာနိုင်ငံ စာစစ်ဦးစီးဌာနအနေဖြင့် တက္ကသိုလ်ဝင်တန်း စာမေးပွဲ‌အောင်စာရင်းကို ဇူလိုင်လ (၂၇)ရက်က ထုတ်ပြန်‌ပေးခဲ့ပြီး အောင်စာရင်း/ကျစာရင်းအမှတ်စာရင်းများကို ဇူလိုင်လ (၃၀)ရက်မှစတင်ကာ ထုတ်ပေးလျှက်ရှိကြောင်း သိရသည်။

#YMG/SW #Yangon_Times