၁၆ ဧပြီ ၂၀၂၅

မြန်မာနိုင်ငံတွင်လှုပ်ရှားခဲ့သည့် မန္တလေးငလျင်ကြီးနှင့်ပတ်သက်၍ ဧပြီ ၁၆ ရက် ညနေ (၆)နာရီအထိ နောက်ဆုံးရ သတင်းအချက်အလက်များကို ဖော်ပြပေးအပ်ပါတယ်။

၁၆ ဧပြီ ၂၀၂၅

မြန်မာငလျင်ကြီးတွင် အသက်ရှင်ကျန်ရစ်သူများကို လာရောက်ဆေးဝါးကုသမှုပေးခဲ့တဲ့ ဂျပန်ဆရာဝန် တစ်ဦးက နိုင်ငံတကာအကူအညီများ ဆက်လက်ပေးပါရန် နိုင်ငံတကာသို့ မေတ္တာရပ်ခံခဲ့ပါတယ်။

ဂျပန်နိုင်ငံ နီပွန် ဆေးတက္ကသိုလ်ဆေးရုံရဲ့  အရေးတကြီးစောင့်ရှောက်ရေးဌာနမှ ဆရာဝန်တစ်ဦးဖြစ်တဲ့ ဒေါက်တာ အီဂါယာရှီယူတာကာက  ဂျပန် NHK ရုပ်သံမှတစ်ဆင့် ယင်းကဲ့သို့မေတ္တာရပ်ခံခဲ့တာ   ဖြစ်ပါတယ်။

သူဟာ ဂျပန်နိုင်ငံရဲ့ အရေးပေါ်ကယ်ဆယ်ရေးအဖွဲ့နှင့်အတူ လိုက်ပါလာခဲ့ပြီး မန္တလေးသို့ ဧပြီ ၄ ရက်နေ့ မှာ ရောက်ရှိခဲ့ပါတယ်။

သူဟာ   အဆောက်အဦပြိုကျလို့ ဒါမှမဟုတ် ကယ်ထုတ်စဉ် အရိုးထိခိုက်ဒဏ်ရာနှင့် အခြားဒဏ်ရာရရှိ သူတွေကို ချက်ခြင်းဆိုသလိုဘဲ ဆေးဝါးကုသမှုပေးခဲ့ပါတယ်။

အချို့သူတွေဟာ သူတို့မိသားစုတွေကို ဝင်ကယ်နေခဲ့ကြရလို့ သူတို့မှာရရှိတဲ့ ဒဏ်ရာတွေကို ချက်ခြင်း ဆေးကုသမှုမခံယူနိုင်ခဲ့ကြဘူးလို့ သူက NHK ရုပ်သံကိုပြောပါတယ်။ အနာရင်းလာတော့မှသာ သူတို့ဟာ ဆရာဝန်ကိုပြသနိုင်တော့တယ်လို့ သူကဆက်ပြောပါတယ်။

ငလျင်လှုပ်ပြီး နှစ်ပတ်ကြာတဲ့အထိ မန္တလေးက လူတော်တော်များများဟာ အဆောက်အဦရဲ့ အပြင် ဘက်မှာ နေထိုင်နေကြရတုန်းပဲလို့သူက ပြောပါတယ်။ အချို့ဆိုရင် အအေးပတ်တာ၊ ဝမ်းပျက်ဝမ်းလျှော  လို ကူးစက်ရောဂါတွေ ဖြစ်နေကြရတယ်လို့ သူကဆက်ပြောပါတယ်။အချို့ကလည်း သူတို့ရဲ့ ကျောမှာ အမြဲနာကျင်တဲ့ဒဏ်ခံနေကြရတယ်လို့ သူ့ကို ညည်းညူပြောတယ်လို့ဆိုပါတယ်။

လူတော်တော်များများဟာ ရပ်ကွက်တွေထဲက ဆေးခန်းတွေကို မသွားနိုင်ကြဘူး၊ ဘာဖြစ်လို့လဲဆိုတော့  လူနာတွေသိပ်များနေတာ  ဒါမှမဟုတ် ပိုက်ဆံမရှိတာတွေကြောင့်ဖြစ်တယ်လို့လည်း အီဂါယာရှီက ပြောပါတယ်။

ဂျပန်ဆေးအဖွဲ့ဟာ တစ်ရက်ကို လူနာ၁၀၀ ကျော်ကြည့်ပေးခဲ့တယ်လို့လည်း သူကပြောပါတယ်။

မိသားစုဝင်တွေဆုံးရှုံးသွားခဲ့ရတဲ့ လူနာတွေဆိုရင် စိတ်ဓာတ်ခွန်အားတွေပေးဖို့လိုအပ်နေတယ်လို့ ဒေါက်တာက ဆက်ပြောပါတယ်။

အချို့သော နိုင်ငံခြား ဆေးဝါးအဖွဲ့တွေ ပြန်သွားကြပြီးဖြစ်ပေမယ့် မြန်မာနိုင်ငံရဲ့  ဆေးရုံဆေးခန်း တွေ ပုံမှန်ကုသမှုတွေ ပြန်လည်မစတင်မီအချိန်အထိ နိုင်ငံတကာအကူအညီတွေ ဆက်လိုနေပါတယ်လို့ သူက ပြောပါတယ်။

#ymg/knl

၁၅ ဧပြီ ၂၀၂၅

မြန်မာနိုင်ငံတွင်လှုပ်ရှားခဲ့သော အင်အားပြင်းငလျင်ကြီးကြောင့် အပျက်အစီးအပိုင်းအစပေါင်း တန်ချိန် နှစ်သန်းခွဲခန့်ရှိပြီး ယင်းသည် ထရပ်ကား ခေါက်ရေ ၁၂၅,၀၀၀ ခေါက်ရေခန့်နှင့် အကြမ်းဖျင်းညီမျှကြောင်း ရန်ကုန်မြို့ရှိ ကုလသမဂ္ဂဖွံ့ဖြိုးရေးအစီအစဉ်   က တွက်ချက်ပြောဆိုလိုက်ပါတယ်။

ပြင်းအား ၇,၇ အဆင့်ရှိငလျင်ကြီးရဲ့ အပျက်အစီးတွေကို remote sensing analysis နည်းဖြင့် တွက်ချက်ခဲ့တာလို့လည်း UNDP Myanmar ရဲ့ သတင်းထုတ်ပြန်ချက်ထဲမှာဖော်ပြထားပါတယ်။

အဲဒါကြောင့် လက်ရှိလုပ်ဆောင်နေပြီဖြစ်တဲ့ ပြန်လည်ထူထောင်ရေးလုပ်ငန်းကြီးရဲ့ အစိတ်အပိုင်း   တစ်ခုအဖြစ် ကြီးမားလှတဲ့ အပျက်အစီးအပုံတွေကို ဖယ်ရှားပစ်ဖို့၊ အခြေခံအဆောက်အအုံတွေနှင့် အိမ်တွေကို ပြန်လည်ပြုပြင်ဖို့နှင့်ပြန်လည်တည်ဆောက်ဖို့ အရေးတကြီးလိုအပ်နေပြီလို့လည်း UNDP Myanmar ကပြောပါတယ်။

အိမ်တွေနှင့်အစိုးရရုံးတွေ စုစုပေါင်း တစ်သောင်းကျော်ဟာ သိသိသာသာပျက်စီးနေတာ ဒါမှမဟုတ် ပျက်စီးသွားတာတွေရှိနေပြီး ကျန်းမာရေးစောင့်ရှောက်မှုနေရာ ၁၂၈ နေရာဟာလည်း သိသိသာသာပျက် စီးသွားတယ်လို့လည်း ဆိုပါတယ်။ အဲဒါကြောင့် ငလျင်ကြောင့်ထိခိုက်ခံစားနေရသူတွေအတွက် လုံလောက်တဲ့ ကျန်းမာရေးစောင့်ရှောက်မှုပေးနိုင်ဖို့ခက်ခဲ့နေတယ်လို့လည်း UNDP Myanmar က ပြောပါတယ်။

သုံးသပ်စစ်ဆေးချက်တွေအရ ငလျင်အဆင့် ၇နှင့်အထက်အတွက် အန္တရာယ်ရှိနိုင်တဲ့ အဆောက်အဦ  ပေါင်း ၁.၆ သန်းခန့် မြန်မာနိုင်ငံမှာရှိနေပြီး အဆောက်အဦတော်တော်များများဟာ အဲသလောက်ပြင်းအား ရှိတဲ့ ငလျင်ဒဏ်ကိုခံနိုင်တဲ့ ဒီဇိုင်းတွေနှင့် တည်ဆောက်မထားဘူးလို့လည်း UNDP Myanmar က သတင်းထုတ်ပြန်ချက်မှာ ဆက်လက်ရေးသားထားပါတယ်။

UNDP ဟာ ယခုလိုဆန်းစစ်ချက်တွေကို UNOSAT ရဲ့ ခေတ်မီတဲ့ ဂြိုဟ်တုအခြေပြု အဆောက်အဦ ပျက်စီးမှုသတ်မှတ်ချက်တွေနှင့် မိုက်ခရိုဆော့ဖ်ရဲ့ အဆောက်အဦ footprint data တွေနှင့် ပေါင်းစပ် တွက်ချက်ထားတာဖြစ်ပါတယ်။

ယခုအခါ အချက်အလက်များရှိနေပြီဖြစ်လို့ ပြန်လည်ထူထောင်ရေးကို ခပ်မြန်မြန်စတင်ဖို့လိုအပ်နေပြီ ဖြစ်တယ်လို့ UNDP Myanmar ကပြောပါတယ်။ ကုလသမဂ္ဂဟာ ပြည်တွင်းနှင့်နိုင်ငံတကာမိတ်ဖက်အဖွဲ့ အစည်းတွေနှင့် ငလျင်ဘေးတုန့်ပြန်ရေးလုပ်ငန်းတွေမှာ လက်တွဲဆောင်ရွက်နေပြီး  မြန်မာနိုင်ငံမှာ ရေရှည်ပြန်လည်ပုံမှန်ဖြစ်စေဖို့နှင့် ကြံ့ကြံခံတဲ့အဆောက်အဦတွေဖြစ်စေဖို့  အပျက်အစီးအပုံတွေ ရှင်း လင်းဖယ်ရှားရေးဟာ အရေးကြီးတဲ့ ပထမအဆင့်ဖြစ်နေတယ်လို့လည်း UNDP Myanmar က သတင်းထုတ်ပြန်ပါတယ်။

#ymg/knl

၁၅ ဧပြီ ၂၀၂၅

မန္တလေးမြို့တွင် ငလျင်ဘေးသင့် ပြည်သူများအား ယာယီဆေးရုံများဖွင့်လှစ်ဆေးကုသမှုများ ဆောင်ရွက်ခဲ့ကြတဲ့ အိန္ဒိယနိုင်ငံနှင့် ရုရှားနိုင်ငံတို့မှ ဆေးအဖွဲ့များသည် လုပ်ငန်းများအဆုံးသတ်၍ ဧပြီ ၁၄ရက်တွင် ပြန်လည်ထွက်ခွာသွားခဲ့ကြပါတယ်။

ထိုအဖွဲ့များသည် မန္တလေးတိုင်းဒေသကြီး၊ ချမ်းမြသာစည်မြို့နယ်၊လေဆိပ်ဟောင်းနေရာ၌ အခြေပြု၍ယာယီဆေးရုံဖွင့်လှစ်ကာ ဆေးကုသမှုများ ဆောင်ရွက် ပေးခဲ့တဲ့  Lt. Col. Jagneet Gillဦးဆောင်သည့်  အိန္ဒိယတပ်မတော်ဆေးကုသရေးအဖွဲ့နှင့် မန္တလာသီရိ အားကစားကွင်းတွင် အခြေပြု၍ ယာယီ ဆေးရုံဖွင့်လှစ်ကာ ဆေးကုသမှုများ ဆောင်ရွက်ပေးခဲ့သည် Major General Sergey Voroutsov ဦးဆောင်သည့်ရုရှားဖက်ဒရေးရှင်းနိုင်ငံမှကူညီကယ်ဆယ်ရေးနှင့်ဆေးကုသရေးအဖွဲ့တို့ဖြစ်ကြပါတယ်။

ထိုအဖွဲ့များကို မန္တလေးတိုင်းဒေသကြီးဝန်ကြီးချုပ် ကာကွယ်ရေးဦးစီးချုပ်(ကြည်း) မှ အဆင့်မြင့် တပ်မတော် အရာရှိကြီးများနှင့် တာဝန်ရှိသူတွေက သွားရောက်နှုတ်ဆက်ခဲ့ကြပြီး ဂုဏ်ပြုမှတ်တမ်းလွှာ နှင့် အမှတ်တရလက်ဆောင်ပစ္စည်းများ အပြန်အလှန်ပေးအပ်ခဲ့ကြတယ်လို့ သတင်းထုတ်ပြန်ထားပါတယ်။

#ymg/knl

၁၄ ဧပြီ ၂၀၂၅

မန္တလေးငလျင်ကြီးတွင် ဂျပန်နိုင်ငံသားတစ်ဦးသေဆုံးခဲ့တယ်လို့ ဂျပန်နိုင်ငံထုတ် Mainichi   သတင်းစာ  ကြီး က  ဂျပန်နိုင်ငံခြားရေးဝန်ကြီးဌာန အရာရှိတစ်ဦးကို ကိုးကားပြီး ယနေ့ ဧပြီ ၁၄ရက်က ရေးသား  ပါတယ်။

သေဆုံးသူ ဂျပန်နိုင်င်ံသားဟာ မန္တလေးမှာ နေထိုင်နေသူတစ်ဦးဖြစ်ပြီး သူ့ရဲ့ရုပ်အလောင်းကို ပြိုကျနေတဲ့ အဆောက်အဦတစ်လုံးရဲ့ အပျက်အစီးတွေကြားထဲမှာ စနေနေ့က တွေ့ရှိခဲ့ရတယ်လို့ ဂျပန်နိုင်ငံခြားရေး ဝန်ကြီးဌာန အရာရှိကပြောပါတယ်။

ဂျပန်အစိုးရ ဝန်ကြီးရုံးအတွင်းရေးမှူးချုပ် ယိုရှီမာဆာ ဟာရာရှီက  ဝမ်းနည်းကြောင်းပြောဆိုလိုက်ပြီး သေဆုံးသူရဲ့ကျန်ရစ်သူ မိသားစုတွေကို‌ ထောက်ပံ့ကူညီပေးမယ်လို့ကတိပြုလိုက်ပါတယ်။ ရှာဖွေကယ် ဆယ်ပေးခဲ့ကြသူတွေကိုလည်း ကျေးဇူးတင်ကြောင်း သူကဆက်ပြောပါတယ်။

ဂျပန်အစိုးရက ပျောက်ဆုံးနေခဲ့တဲ့ ဂျပန်နိုင်ငံသားကို ရှာဖွေပေးဖို့ မေတ္တာရပ်ခံခဲ့ပါတယ်။ ငလျင်ကြီး ကြောင့် မြန်မာနိုင်ငံမှာ ဂျပန်နိုင်ငံသားနှစ်ဦး၊ ထိုင်းနိုင်ငံမှာ တစ်ဦးတို့ထိခိုက်ဒဏ်ရာရရှိခဲ့တယ်လို့ ဂျပန် အစိုးရထံမှသိရပါတယ်။

မန္တလေးငလျင်ကြီးကြောင့် သေဆုံးသူ ၃၆၀၀ ဦးကျော်သွားပြီဖြစ်ပြီးလူပေါင်း ၅၀၀၀ကျော်လည်း ထိခိုက် ဒဏ်ရာရရှိထားခဲ့ကြပါတယ်။

သေဆုံးခဲ့တဲ့ ဂျပန်နိုင်ငံသားနှင့်ပတ်သက်တဲ့ အသေးစိတ်အချက်အလက်တွေကိုတော့ ဂျပန်မီဒီယာ တွေမှာ ဖော်ပြထားခြင်းမရှိပါဘူး။

#ymg/knl

၁၄ ဧပြီ ၂၀၂၅

သင်္ကြန်အခါသမယနှင့်အတူ နှစ်သစ်တွင် မြန်မာပြည်သူများအားလုံး မျှော်လင့်ချက်နှင့် သတ္တိခွန်အားများ သယ်ဆောင်လာပါစေကြောင်း  အမေရိကန် နိုင်ငံခြားရေးဝန်ကြီး မာကိုရူဘီရိုက သင်္ကြန်ဆုမွန်ကောင်း တောင်းလိုက်ပါတယ်။

ရန်ကုန်မြို့အခြေစိုက် အမေရိကန်ပြည်ထောင်စုရဲ့ ဖေ့စ်ဘုတ်ခ်ပို့စ်မှာ နိုင်ငံခြားရေးဝန်ကြီး မာကိုရူဘီရိုရဲ့ ဆုတောင်းကို ဧပြီလ ၁၃ရက်နေ့က ဖော်ပြခဲ့ခြင်းဖြစ်ပါတယ်။

သင်္ကြန်စိတ်ဓာတ်က ပိုမိုကောင်းမွန်တဲ့ အနာဂတ်အတွက် အသစ်တစ်ဖန်ဖြစ်နိုင်ချေရှိမှုနှင့် မျှော်လင့်ချက်  တွေကို   ကျွန်ုပ်တို့ သတိရစေပါတယ်လို့လည်း မာကိုရူဘီရိုကပြောပါတယ်။

မြန်မာနှစ်သစ်ကူး သင်္ကြန်အခါသမယကို ကြိုဆိုသည့်အနေဖြင့် မြန်မာပြည်သူများ ကောင်းခြင်း မင်္ဂလာ  များနှင့် ပြည့်စုံပါစေကြောင်း၊ မြန်မာပြည်သူများအတွက် အမေရိကန်ပြည်ထောင်စုကိုယ်စား ပြောကြားပါ   တယ်လို့လည်း သူကဆုမွန်တောင်းပါတယ်။

သင်္ကြန်ဆိုသည်မှာ အတိတ်ကိုပြန်ပြောင်းဆင်ခြင်ပြီး ပိုမိုကောင်းမွန်သည့်အနာဂတ်ကို မျှော်လင့်ကြသည့် ကာလတစ်ခုဖြစ်ပါသည်။  ယခုနှစ်တွင် မတ် ၂၈ ငလျင်အပြီး၌ ဝမ်းနည်းပူဆွေးမှုနှင့် ပျက်စီးဆုံးရှုံးမှုများ  တွေ့ကြုံခဲ့ကြရသည့် လူ ပေါင်းများစွာနှင့်အတူ မိမိတို့  တစ်ပေါင်းတစ်စည်းတည်း ရှိနေပါသည်။ ဤခက်ခဲသောကာလအတွင်း မြန်မာပြည်သူများနှင့်အတူ အမေရိကန်ပြည်ထောင်စုက တစ်သားတည်း  ရပ်တည်နေတယ်လို့လည်း သတင်းထုတ်ပြန်ချက်မှာဖော်ပြထားပါတယ်။

ယင်းအပြင် အသက်ကယ်ဆယ်ရေးဆိုင်ရာ လူသားချင်းစာနာထောက်ထားမှုအကူအညီများ ပေးအပ်   ခြင်းနှင့် ပြန်လည်ထူထောင်ရေးဆိုင်ရာ ကြိုးပမ်းမှုများကို ပေးအပ်ရာတွင် နိုင်ငံတကာအသိုက်အဝန်းနှင့် မိမိတို့ ဆက်လက်ပူးပေါင်းသွားမယ်လို့လည်း သူကပြောပါတယ်။

ယခုကဲ့သို့ အခက်အခဲနှင့် ရင်ဆိုင်ရသည့်အခါ မြန်မာပြည်သူများ၏ သတ္တိနှင့် သဒ္ဓါတရားတို့မှာ ယခင်ထက်ပင် ပိုမိုထင်ရှားပေါ်လွင်လှတယ်လို့ သူကပြောလိုက်ပြီး ယခုသင်္ကြန်အခါသမယနှင့်အတူ နှစ်သစ်တွင် မြန်မာပြည်သူများအားလုံးအတွက် မျှော်လင့်ချက်နှင့် သတ္တိခွန်အားများ သယ်ဆောင်   လာပါစေကြောင်းလည်း သူကဆုမွန်ကောင်းတောင်းပါတယ်။

မြန်မာနိုင်ငံကို ဒီမိုကရေစီလမ်းကြောင်းပေါ်သို့ ပြန်လည်ရောက်ရှိရန် လုပ်ဆောင်နေသူများကို အားပေးကူညီသွားရန် မိမိတို့ ဆက်လက်သံန္နိဋ္ဌာန်ချထားပြီး ဒေသတွင်း ငြိမ်းချမ်းရေးနှင့် လုံခြုံရေးတို့အတွက် ဆက်လက်ပူးပေါင်းဆောင်ရွက်သွားမယ်လို့လည်း အမေရိကန်နိုင်ငံခြားရေးဝန်ကြီး ရဲ့ သင်္ကြန်ဆုတောင်းမှာဖော်ပြထားပါတယ်။

#ymg/knl