#Local_News
Published 11 September 2026
■ ပဉ္စမအကြိမ်မြောက်တရုတ်နိုင်ငံသို့ ဆန်/ဆန်ကွဲတင်ပို့နိုင်ရန်GACC မှတ်ပုံတင်ခြင်းဆိုင်ရာ လုပ်ငန်းစဉ်များဆိုင်ရာ သင်တန်းကို ရန်ကုန်မြို့၌ကျင်းပပြုလုပ်ခဲ့ကြောင်း သိရသည်။
■ တရုတ်ပြည်သူ့သမ္မတနိုင်ငံသို့ ဆန်/ ဆန်ကွဲများ တင်ပို့ရာတွင် GACC မှတ်ပုံတင်ခွင့်ရရှိရေးသည် အခြေခံလိုအပ်ချက်ဖြစ်ပြီး၊ ယင်းသို့ဆောင်ရွက်နိုင်ရေးအတွက် မြန်မာနိုင်ငံ နှင့် တရုတ်နိုင်ငံတို့အကြား နှစ်နိုင်ငံချုပ်ဆိုထားသော Sanitary and Phyto-sanitary Protocol သဘောတူညီချက်နှင့် အညီ သိုလှောင်ရုံပိုးမွှားများ ထိန်းချုပ်ကာကွယ်ရေး၊ အစားအသောက်ဘေးကင်းလုံခြုံရေး (food safety) နှင့် ကောင်းမွန်သော သိုလှောင်ကြိတ်ခွဲထုတ်လုပ်မှုစနစ်ဖြစ်ရေး စသော လုပ်ထုံးလုပ်နည်းများကို လိုက်နာဆောင်ရွက်ရန် လိုအပ် ရာ ယင်းလုပ်ငန်းစဉ်များအား ပို့ကုန်ကုမ္ပဏီများ၊ အထူးသဖြင့် ကုမ္ပဏီအသစ်များအား သင်တန်းပုံစံဖြင့် သင်ကြားပို့ချပေးခြင်း နှင့် ဘာသာရပ်ဆိုင်ရာ ကျွမ်းကျင်သူများက ရှင်းလင်းဆွေးနွေးပေးခြင်း အစီအစဉ်ကို စက်တင်ဘာ ၉ ရက်နေ့တွင် ရန်ကုန်မြို့ ကုန်သည်စက်မှုအသင်းချုပ် UMFCCI (မင်္ဂလာခန်းမ)၌ ကျင်းပပြုလုပ်ခဲ့ခြင်းဖြစ်သည်။
■ အဆိုပါ သင်တန်းတွင် GACC မှတ်ပုံတင်ခြင်းဆိုင်ရာ လုပ်ထုံးလုပ်နည်းများ၊ Online Registrationဖြင့် ဆောင်ရွက်ရမည့် လုပ်ငန်းစဉ်များ၊ ဆန်တင်ပို့ရာတွင်လည်း တရုတ်နိုင်ငံတစ်ခုတည်း သာမက ဥရောပ၊ အာဖရိက၊ အာရှ ဈေးကွက်များအထိ ချိတ်ဆက်ဆောင်ရွက်သင့်သည့် ကိစ္စများ၊ ကုမ္ပဏီများ အနေဖြင့် Purchasing Plan၊ Export Planများဖြင့် စနစ်တကျ ဝယ်ယူခြင်း၊ တင်ပို့ခြင်း ဆောင်ရွက်ရမည့် ကိစ္စများ၊ ဆန်တင်ပို့သည့် ကုမ္ပဏီများအတွက် ပို့ကုန်ဝင်ငွေ အချိန်မီ ပြန်လည်ဝင်ရောက်ရေး ကိစ္စများ၊ MyRO တွင် သိုလှောင်ရုံ မှတ်ပုံတင်ခြင်းလုပ်ငန်း ကိစ္စများ၊ ပို့ကုန်ဆိုင်ရာ လုပ်ထုံးလုပ်နည်းများစသည်တို့ကို ထည့်သွင်း၍ ရှင်းလင်းတင်ပြ ဆွေးနွေးခဲ့ကြကြောင်း သိရသည်။
■ သင်တန်းတွင် မြန်မာနိုင်ငံဆန်စပါးအသင်းချုပ် ဥက္ကဋ္ဌ က ကြိုဆိုနှုတ်ခွန်းဆက်စကားပြောကြားပြီး၊ သင်တန်းဖွင့်လှစ်ရခြင်း အကြောင်း နှင့် ပို့ကုန်မြှင့်တင်ရေး ၊ ပို့ကုန်များ အရည်အသွေး အဆင့်မီစေရန် ဆောင်ရွက်ရမည့်လိုအပ်ချက်များအား ရှင်းလင်းဆွေးနွေးခဲ့သည်။
■ ထို့အပြင် စိုက်ပျိုးရေးဦးစီးဌာန၊ ဒုတိယညွှန်ကြားရေးမှူးချုပ် နှင့်စားသုံးသူရေးရာဦးစီးဌာန၊ ညွှန်ကြားရေးမှူး၊ မြန်မာကုန်ပစ္စည်းစစ်ဆေးရေးနှင့် စမ်းသပ်မှုလုပ်ငန်းလီမိတက်(MITS)မှ အုပ်ချုပ်မှု ဒါရိုက်တာတို့က GACC မှတ်ပုံတင်ရေး လုပ်ငန်းစဉ်များ၊ သတိပြုလိုက်နာဆောင်ရွက်ရမည့် အချက်များ၊ ဆန်စက်များ နှင့် သိုလှောင်ရုံများတွင် အရည်အသွေး စီမံခန့်ခွဲမှုဆိုင်ရာကိစ္စများကို လမ်းညွှန်အကြံပြုဆွေးနွေးခဲ့ကြောင်းသိရသည်။
■ စိုက်ပျိုးရေးဦးစီးဌာန၊ သီနှံကာကွယ်ရေးဌာနခွဲမှ ဘာသပ်ရပ်ဆိုင်ရာကျွမ်းကျင်သူများ၊စားသုံးသူရေးရာဦးစီးဌာန၊ မြန်မာကုန်ပစ္စည်းစစ်ဆေးရေးနှင့် စမ်းသပ်မှုလုပ်ငန်းလီမိတက်(MITS) နှင့် မြန်မာနိုင်ငံဆန်စပါးအသင်းချုပ်တို့မှ တာဝန်ရှိသူများ ဝိုင်းဝန်းအကြံပြုဆွေးနွေးတင်ပြခဲ့ကြသည်။
■ ထို့အပြင် ယခုသင်တန်းသည် တရုတ်နိုင်ငံသို့ တင်ပို့ရေးအတွက်သာမက အခြားနိုင်ငံများသို့ တင်ပို့ရာတွင် အဆိုပါ လုပ်ထုံးလုပ်နည်းများကို လိုက်နာခြင်းဖြင့် အစားအသောက် ဘေးကင်းလုံခြုံရေးနှင့်အရည်အသွေးထိန်းသိမ်းရေးတို့ကို ထိရောက်စွာအကျိုးရှိနိုင်မည်ဖြစ်ကြောင်းသိရသည်။
■ အသင်းချုပ် အနေဖြင့် အဆိုပါ သင်တန်းများကို နှစ်စဉ် ဖွင့်လှစ်ပို့ချ ဆောင်ရွက်လျက်ရှိရာ ယခု အကြိမ်သည် (၅) ကြိမ်မြောက် ဖြစ်ပြီး၊ ကုမ္ပဏီ (၃၇) ခု မှ သင်တန်းသားသင်တန်းသူ (၈၀) ဦး ပါဝင်တက်ရောက်ခဲ့ကြကြောင်း သိရသည်။
#YMG/NN #Yangon_Times
#Local_News
ဖနွမ်းပင်၊ စက်တင်ဘာ ၁၁
■ ကမ္ဘောဒီးယားနိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် (State Visit)အဖြစ် ရောက်ရှိလာသည့် ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတ ဦးမင်းအောင်လှိုင်အား ယနေ့ စက်တင်ဘာ ၁၁ ရက်တွင် ဖနွမ်းပင်မြို့၊ Techo အပြည်ပြည်ဆိုင်ရာ လေဆိပ်၌ ကမ္ဘောဒီးယားနိုင်ငံမှ အဆင့်မြင့်တာဝန်ရှိသူများက နွေးထွေးလှိုက်လှဲစွာ ဂုဏ်ပြုတပ်ဖွဲဖြင့် ကြိုဆိုဂုဏ်ပြုခဲ့ပါသည်။
■ နိုင်ငံတော်သမ္မတ ဦးဆောင်သည့် မြန်မာအဆင့်မြင့်ကိုယ်စားလှယ်အဖွဲ့ စီးနင်းလိုက်ပါလာသည့် အထူးလေယာဉ်သည် Techo အပြည်ပြည်ဆိုင်ရာလေဆိပ်သို့ ဆိုက်ရောက်လာရာ ကမ္ဘောဒီးယားနိုင်ငံမှ အဆင့်မြင့်တာဝန်ရှိသူများ၊ ကမ္ဘောဒီးယားနိုင်ငံဆိုင်ရာ မြန်မာသံအမတ်ကြီးနှင့် သံရုံး တာဝန်ရှိသူများ၊ စစ်သံမှူးနှင့် စစ်သံရုံးမှ တာဝန်ရှိသူများက ကြိုဆိုနှုတ်ဆက်ခဲ့ကြပါသည်။
■ နိုင်ငံတော်သမ္မတ လေယာဉ်ပေါ်မှ ဆင်းသက်လာချိန်တွင် ကမ္ဘောဒီးယားနိုင်ငံမှ အဆင့်မြင့် တာဝန်ရှိသူများက ကြိုဆိုနှုတ်ဆက်ကြပြီး နှစ်နိုင်ငံမှတာဝန်ရှိသူများနှင့် မိတ်ဆက်ပေးခဲ့ကြပါသည်။
■ မြန်မာနိုင်ငံနှင့် ကမ္ဘောဒီးယားနိုင်ငံတို့သည် အစဉ်အလာအားဖြင့် ချစ်ကြည်ရင်းနှီးသည့် ဆက်ဆံရေးရှိသည့် အာဆီယံမိတ်ဖက်နိုင်ငံများဖြစ်ကြပြီး နှစ်နိုင်ငံအကြား နိုင်ငံရေးနှင့် သံတမန်ဆက်ဆံရေးသာမက ကုန်သွယ်ရေး၊ ရင်းနှီးမြှုပ်နှံမှု၊ ကာကွယ်ရေးနှင့် လုံခြုံရေး၊ စိုက်ပျိုးရေး၊ စွမ်းအင်၊ ခရီးသွားလုပ်ငန်း၊ ပညာရေးနှင့် ယဉ်ကျေးမှုအပါအဝင် ကဏ္ဍပေါင်းစုံ၌ ပူးပေါင်းဆောင်ရွက်မှုများ ဆက်လက်တိုးတက်လျက်ရှိပါသည်။
■ နိုင်ငံတော်သမ္မတ၏ ယခုခရီးစဉ်သည် မြန်မာနိုင်ငံနှင့် ကမ္ဘောဒီးယားနိုင်ငံတို့အကြား ရှိရင်းစွဲ ချစ်ကြည်ရင်းနှီးမှုနှင့် အပြန်အလှန်ယုံကြည်မှုတို့ကို ပိုမိုခိုင်မာစေပြီး နှစ်နိုင်ငံအကြား ဘက်စုံ ပူးပေါင်းဆောင်ရွက်မှုများကို ပိုမိုနက်ရှိင်းစွာ တိုးမြှင့်ဖော်ဆောင်နိုင်ရေးအတွက် အရေးပါသည့် နိုင်ငံတော်အဆင့်ချစ်ကြည်ရေးခရီးစဉ်တစ်ရပ်ဖြစ်ပါသည်။
#Local_News
Published 10 September 2026
■ ရှမ်းပြည်နယ်၊ နမ့်စန်ခရိုင်၊ နမ့်စန်မြို့နယ်အတွင်းရှိ ဧရိယာအကျယ်အဝန်း ၃၀,၇၅၅ ဧကရှိသည့် နယ်မြေကို “ခိုလမ်ကြိုးပြင်ကာကွယ်တော”အဖြစ် စက်တင်ဘာ ၁ ရက်မှစတင်၍ သတ်မှတ်လိုက်ကြောင်း သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနက ထုတ်ပြန်ထားသည်။
■ အဆိုပါသတ်မှတ်ချက်ကို ၂၀၁၈ ခုနှစ် သစ်တောဥပဒေ ပုဒ်မ ၆၊ ပုဒ်မခွဲ (င)အရ အပ်နှင်းထားသည့် လုပ်ပိုင်ခွင့်များကို ကျင့်သုံး၍ ၁၃၈၈ ခုနှစ်၊ ဝါခေါင်လပြည့်ကျော် (၄) ရက်ဖြစ်သည့် ၂၀၂၆ ခုနှစ်၊ စက်တင်ဘာ ၁ ရက်မှစ၍ သတ်မှတ်ခဲ့ခြင်းဖြစ်သည်။
■ ကြိုးပြင်ကာကွယ်တောသတ်မှတ်ခြင်း၏ ရည်ရွယ်ချက်မှာ ရေ၊ မြေထိန်းသိမ်းကာကွယ်ရေး၊ သဘာဝပတ်ဝန်းကျင်နှင့် ဇီဝမျိုးစုံမျိုးကွဲများ ထိန်းသိမ်းရေး၊ ရာသီဥတုကောင်းမွန်မျှတရေးနှင့် သစ်တောထွက်ပစ္စည်းများကို စဉ်ဆက်မပြတ်ထုတ်ယူသုံးစွဲနိုင်ရေးအတွက် သစ်တောများကို စနစ်တကျ ပြုစုထိန်းသိမ်းရန် ဖြစ်သည်။
■ ထို့အပြင် သစ်တောဖုံးလွှမ်းလျက်ရှိပြီး အစိုးရက စီမံခန့်ခွဲခွင့်ရှိသည့် မြေများတွင် ကြိုးဝိုင်းနှင့် ကြိုးပြင်ကာကွယ်တောများ တိုးချဲ့ဖွဲ့စည်းခြင်းဖြင့် သစ်တောနယ်မြေများ တိုးပွားလာစေရန်နှင့် ဒေသခံတိုင်းရင်းသားများ၏ အခြေခံစားဝတ်နေရေး လိုအပ်ချက်များကို ဖြည့်ဆည်းပေးနိုင်ရန်လည်း ရည်ရွယ်ထားသည်။
■ ခိုလမ်ကြိုးပြင်ကာကွယ်တော သတ်မှတ်ခြင်းကြောင့် အင်ကြင်း၊ ထင်းရှူး၊ သစ်ယား၊ ထောက်ကြံ့၊ ယမနေ၊ သစ်မန်၊ ကျည်း၊ သစ်နီ၊ ရင်းစပ်၊ သစ်စေး၊ ဆီးဖြူ၊ ကြို့၊ ရင်းတိုက်၊ လက်ပံနှင့် မျှင်ဝါးတောများကို ထိန်းသိမ်းနိုင်မည်ဖြစ်သည့်အပြင် ဝက်ဝံ၊ ယုန်၊ တောဝက်၊ ဂျီ(ချေ)၊ တောကြောင်၊ ကြက်တူရွေးနှင့် ဗျိုင်းငှက်များ၏ နေရင်းဒေသများကိုလည်း ထိန်းသိမ်းနိုင်မည်ဖြစ်ကြောင်း သိရသည်။
■ ယင်းသို့ ထိန်းသိမ်းကာကွယ်နိုင်ခြင်းဖြင့် ဂေဟစနစ် ပိုမိုကောင်းမွန်လာစေခြင်း၊ ဒေသခံပြည်သူများ၏ လူမှုစီးပွားဖွံ့ဖြိုးတိုးတက်ရေးကို အထောက်အကူပြုခြင်းနှင့် ရာသီဥတုပြောင်းလဲမှု၏ သက်ရောက်မှုများကို လျှော့ချနိုင်ခြင်း စသည့် အကျိုးကျေးဇူးများ ရရှိနိုင်မည်ဖြစ်ကြောင်း သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနက ထုတ်ပြန်ထားသည်။
#YMG/SW #Yangon_Times
#Local_News
Published 10 September 2026
■ ဂျပန်နိုင်ငံ၌ ကျင်းပမည့် (၂၀) ကြိမ်မြောက် အာရှအားကစားပြိုင်ပွဲ (20th Asian Games 2026) အမျိုးသမီး ဘောလုံးပြိုင်ပွဲတွင် ပါဝင်ယှဉ်ပြိုင်ရန် မြန်မာ့လက်ရွေးစင် အမျိုးသမီး ဘောလုံးအသင်း သည် စက်တင်ဘာလ (၁၀) ရက်နေ့၌ ဂျပန်နိုင်ငံသို့ ထွက်ခွာမည် ဖြစ်ကြောင်း မြန်မာနိုင်ငံဘောလုံးအဖွဲ့ချုပ်မှ သိရသည်။
■ မြန်မာ့လက်ရွေးစင် အမျိုးသမီးဘောလုံးအသင်းသည် အာရှအားကစားပြိုင်ပွဲ အမျိုးသမီး ဘောလုံးပြိုင်ပွဲ အုပ်စု (B) တွင် တောင်ကိုရီးယား၊ မြောက်ကိုရီးယား၊ ဘင်္ဂလားဒေ့ရှ် တို့နှင့်အတူ ကျရောက်နေပြီး အုပ်စုပွဲစဉ်အားလုံးကို ဂျပန်နိုင်ငံ Osaka မြို့ရှိ Nagai Stadium ၌ ယှဉ်ပြိုင်ကစားသွားမည်ဖြစ်သည်။
■ မြန်မာ့လက်ရွေးစင် အမျိုးသမီး ဘောလုံးအသင်းသည် စက်တင်ဘာလ (၁၄) ရက် နေ့ မြန်မာစံတော်ချိန် ညနေ ၅ နာရီ တွင် တောင်ကိုရီးယားအသင်း၊ စက်တင်ဘာလ (၁၇) ရက် နေ့ မြန်မာစံတော်ချိန် ညနေ ၅ နာရီ တွင် မြောက်ကိုရီးယားအသင်း၊ စက်တင်ဘာလ (၂၁) ရက် နေ့ မြန်မာစံတော်ချိန် မွန်းလွဲ ၁ နာရီ ခွဲ အချိန်တွင် ဘင်္ဂလားဒေ့ရှ်အသင်းတို့နှင့်ယှဉ်ပြိုင်ကစားသွားမည် ဖြစ်သည်။
■ ယခုနှစ် အာရှအားကစားပြိုင်ပွဲ အမျိုးသမီးဘောလုံးပြိုင်ပွဲတွင် အသင်း ၁၂ သင်းကို အုပ်စု ၃ စုခွဲ၍ ယှဉ်ပြိုင်မည်ဖြစ်ပြီး အုပ်စုတစ်စုစီမှ အဆင့် (၁) နှင့် (၂) ရရှိသည့် အသင်းများအပြင် တတိယနေရာရ အသင်းများအနက် အကောင်းဆုံး ၂ သင်း၊ စုစုပေါင်း ၈ သင်းသည် ကွာတားဖိုင်နယ်အဆင့်သို့တက်ရောက်ခွင့်ရရှိမည်ဖြစ်သည်။
■ အဆိုပါ (၂၀) ကြိမ်မြောက် အာရှအားကစားပြိုင်ပွဲ (20th Asian Games 2026) အမျိုးသမီး ဘောလုံးပြိုင်ပွဲတွင် ပါဝင်ယှဉ်ပြိုင်မည့် မြန်မာ့လက်ရွေးစင် အမျိုးသမီးအသင်း၏ အပြီးသတ်ကစားသမား ၂၃ ဦးစာရင်းကို နည်းပြချုပ် ကောလင်းဘဲလ်က ယမန်နေ့ကထုတ်ပြန်လိုက် ကြောင်း သိရသည်။
#YMG/NN #Yangon_Times
နိုင်ငံတော်သမ္မတနဲ့ ပြည်ထောင်စုဝန်ကြီးများရဲ့ လမ်းညွှန်အကြံပြုချက်များကိုအခြေခံပြီးမြန်မာ-ဗီယက်နမ်နှစ်နိုင်ငံ B to B ဆန်စပါးလုပ်ငန်းပူးပေါင်းဆောင်ရွက်ရေးစီမံချက်ကို လုပ်ငန်းနယ်ပယ် (၉)ရပ် သတ်မှတ်ပြီး အရှိန်အဟုန်ဖြင့် အထူးဦးစားပေးမြှင့်တင်ဆောင်ရွက်သွားမယ်လို့ မြန်မာနိုင်ငံ ဆန်စပါးအသင်းချုပ်ကသိရပါတယ်။
#Local_News
Published 09 September 2026
#မြန်မာ_ဗီယက်နမ်
#YMG/NN #Yangon_Times
မြန်မာနိုင်ငံအထည်ချုပ်လုပ်ငန်းရှင်များအသင်းက ပြင်သစ်နိုင်ငံ၊ ပါရီမြို့မှာ ကျင်းပခဲ့တဲ့ Apparel Sourcing Paris 2026 ပြပွဲမှာ မြန်မာပြခန်းစီစဉ်ပြသခဲ့တယ်လို့ သိရပါတယ်။
#Local_News
Published 09 September 2026
#ပဲရစ် #အထည်အလိပ်ပြပွဲ
#YMG/SW #Yangon_Times
ဧရာဝတီတိုင်းဒေသကြီး၊ညောင်တုန်းကျွန်းတာထိန်းသိမ်းပြုပြင်နေမူ လုပ်ငန်းများကိုအရှိန်အဟုန်မြှင့် ဆက်လက်ဆောင်ရွက်နေတယ်လို့ တိုင်းဒေသကြီးအစိုးရအဖွဲ့ကနေ သိရပါတယ်။
#Local_News
Published 09 September 2026
#ညောင်တုန်းကျွန်း
#YMG/NN #Yangon_Times
Page 38 of 2527
