#Local_News
Published _ 6 July 2022

ရွှေဘိုပေါ်ဆန်းမွှေး(ထူးရှယ်)တစ်အိတ်ဈေးနှုန်း တစ်လအတွင်းမှာ ကျပ်နှစ်သောင်းဝန်းကျင်ဈေးမြင့်တက်နေကြောင်း ရန်ကုန်ဆန်ဈေးကွက်မှတဆင့် သိရသည်။

ပြီးခဲ့သည့် ဇူလိုင်လဆန်းက ရွှေဘိုပေါ်ဆန်း(ထူးရှယ်) တစ်အိတ်ဈေးနှုန်းမှာ ၆၉၅၀၀ ကျပ်သာရှိခဲ့ရာ ယနေ့သြဂုတ်လ ၆ရက်တွင် ရွှေဘိုပေါ်ဆန်း(ထူးရှယ်) ၂၄ ပြည်တစ်အိတ်လျှင် ၈၅၀၀၀ ကျပ်ကျော်အထိ ဈေးမြင့်တက်လာကြောင်း သိရသည်။

ဆန်ဈေးနှုန်းမြင့်တက်နေမှုကို ထိန်းချုပ်နိုင်ရန် ရန်ကုန်မြို့ဆန်စပါးကုန်စည်ဒိုင် (ဝါးတန်း)က ပြီးခဲ့သည့် သြဂုတ်လ ၃ ရက်မှစတင်ကာ ရွှေဘိုပေါ်ဆန်းတစ်အိတ်လျှင် ၇၅,၀၀၀ ကျပ်နှင့် ၇၇၀၀၀ ကျပ်ကြား၊ ဧရာဝတီပေါ်ဆန်း တစ်အိတ်လျှင် ၅၂၀၀၀ ကျပ်နှင့် ၅၅၀၀၀ ကျပ်ကြား၊ ကြားပျံတစ်အိတ်လျှင် ၅၅၀၀၀ ကျပ်နှင့် ၆၀၀၀၀ ကျပ်ကြား၊ ရက် ၉၀ အမျိုးအစားတစ်အိတ်လျှင် ၃၅၀၀၀ ကျပ်နှင့် ၃၇၀၀၀ ကျပ်ကြားဈေးဖြင့် ရောင်းချပေးခဲ့သည်။

ဧရာပေါ်ဆန်း၊ ကျားပျံနှင့် ရက် ၉၀ ဆန်များမှာ တစ်လအတွင်း တစ်သောင်းကျပ်ခန့် ဈေးတက်သွားခဲ့ပြီး ဆန်ချောဈေးနှုန်းမှာ လက်လီဈေးကွက်တွင် ရွှေဘိုပေါ်ဆန်းတစ်အိတ်လျှင် ၉၀၀၀၀ ကျပ်ကျော်၊ ဧရာဝတီပေါ်ဆန်းတစ်အိတ်လျှင် ၈၀၀၀၀ ကျပ်ကျော်၊ ရက် ၉၀ တစ်အိတ်လျှင် ၄၉၀၀၀ ကျပ်ကျော် ဈေးများရှိကြောင်း အဆိုပါ စျေးကွက်မှ သိရသည်။

ymg/NN
#Yangon_Media_Group

#Local_News
Published -6 August 2022

စက်သုံးဆီစျေးနှုန်းများ သြဂုတ် ၆ ရက်(ယနေ့) တွင် ထပ်မံကျဆင်းလာခဲ့ကြောင်း စက်သုံးဆီတင်သွင်း သိုလှောင်ဖြန့်ဖြူခြင်းလုပ်ငန်းကြီးကြပ်ရေးကော်မတီမှထုတ်ပြန်သည့် စျေးနှုန်းများအရ သိရသည်။

ရန်ကုန်တိုင်းအတွင်း 92 တစ်လီတာ ၁၆၁၅ ကျပ်ဖြစ်ပြီး အလားတူ မန္တလေး၊ နေပြည်တော်၊ ပဲခူး၊ မကွေး၊ ထားဝယ်၊ မုံရွာ၊ ပုသိမ်၊ ဘားအံ၊မော်လမြိုင်၊ လားရှိုး၊တောင်ကြီးတို့တွင်လည်း စက်သုံးဆီစျေးနှုန်းမှာ 92 တစ်လီတာ ၁၆၀၀ ကျပ်ကျော်သာရှိကြောင်း သိရသည်။

စက်သုံးဆီတင်သွင်း သိုလှောင်ဖြန့်ဖြူခြင်းလုပ် ငန်းကြီးကြပ်ရေးကော်မတီ၏ ယနေ့ ထုတ်ပြန်ခဲ့သည့် စက်သုံးဆီရည်ညွှန်းစျေးနှုန်းများအရ ရန်ကုန်တိုင်းအတွင်း၌ လက်လီစျေးအဖြစ် 92 တစ်လီတာ ၁၆၁၅ ကျပ်၊ 95 တစ်လီတာ ၁၆၆၅ ကျပ်၊ HSD (500 ppm) တစ်လီတာ ၁၉၇၀ ကျပ် သတ်မှတ်ထားသည်။

အလားတူ HSD (50 ppm)နှင့် HSD (10 ppm)တို့မှာ တစ်လီတာလျှင် ၂၀၂၅ ကျပ်အဖြစ် စက်သုံးဆီရည်ညွှန်းလက်လီစျေးနှုန်းများအဖြစ် သတ်မှတ်ထားသည်။

စက်သုံးဆီတင်သွင်း သိုလှောင်ဖြန့်ဖြူခြင်းလုပ်ငန်းကြီးကြပ်ရေးကော်မတီမှ MOPS စျေးနှုန်းအပေါ်တွင် အခြေခံတွက်ချက်ထားခြင်းဖြစ်ပြီး စက်သုံးဆီဝယ်ယူသူများအနေဖြင့် ကျေနပ်မှုမရှိပါက ကော်မတီသို့ ဆက်သွယ်တိုင်ကြားနိုင်ကြောင်းလည်း သိရသည်။

ymg/sth
#Yangon_Media_Group

#Local_News
Published_ 6 Aug 2022

နိုင်ငံတော်၏ ငြိမ်းချမ်းရေးဆွေးနွေးရေးအဖွဲ့နှင့် ရှမ်းပြည်တိုးတက်ရေးပါတီ(SSPP) ဒုတိယဥက္ကဋ္ဌ (၁) ဦးဆောင်သော ကိုယ်စားလှယ်အဖွဲ့တို့ တွေ့ဆုံဆွေးနွေးပွဲကို ဩဂုတ် ၅ ရက် နံနက်ပိုင်းတွင် နေပြည်တော်၌ ကျင်းပခဲ့ပါတယ်။

ဆွေးနွေးပွဲသို့ အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီဥက္ကဋ္ဌ၊ ငြိမ်းချမ်းရေးဆွေးနွေးရေးအဖွဲ့ခေါင်းဆောင် ဒုတိယ ဗိုလ်ချုပ်ကြီးရာပြည့်နှင့် အဖွဲ့ဝင်များ၊ ရှမ်းပြည်တိုးတက်ရေး ပါတီ(SSPP)မှ ဒုတိယဥက္ကဋ္ဌ(၁) စဝ်ခေးတိုင်း၊ ဒုတိယဥက္ကဋ္ဌ(၂) စဝ်ခွန်ဆိုင်၊ ဗဟိုကော်မတီဝင် စဝ်နော်လိတ်တို့ တက်ရောက်ခဲ့ကြပါတယ်။

ထို့နောက် ငြိမ်းချမ်းရေးဆွေးနွေးရေးအဖွဲ့ခေါင်းဆောင် ဒုတိယဗိုလ်ချုပ်ကြီး ရာပြည့်နှင့် ရှမ်းပြည်တိုးတက်ရေးပါတီ(SSPP) ဒုတိယဥက္ကဋ္ဌ(၁) စဝ်ခေးတိုင်းတို့က နှုတ်ခွန်းဆက် အမှာစကားပြောကြားကြပြီး တက်ရောက်လာသူများက ငြိမ်းချမ်းရေးနှင့် ဖွံ့ဖြိုးရေးဆိုင်ရာ ကိစ္စရပ်များကို အပြန်အလှန်ဆွေးနွေးကြကာ ဆွေးနွေးခဲ့ကြပါတယ်။

ဒုတိယနေ့ဆွေးနွေးပွဲကို ဩဂုတ် ၆ ရက်တွင် ဆက်လက်ကျင်းပသွားမှာဖြစ်ကြောင်း သိရပါတယ်။

ygm_mnn
#Yangon_Media_Group

#Local_News
Published_ 6 Aug 2022

(၅၅) ကြိမ်မြောက် အာဆီယံနိုင်ငံခြားရေးဝန်ကြီးများ အစည်းအဝေးအပြီး ထုတ်ပြန်ခဲ့တဲ့ ကြေညာချက်ပါ မြန်မာနိုင်ငံရေးကိစ္စနှင့်ပတ်သက်တဲ့ စာပိုဒ်အပေါ် မြန်မာနိုင်ငံအနေဖြင့် လက်မခံပယ်ချကြောင်း နိုင်ငံခြားရေးဝန်ကြီးဌာနက ဩဂုတ် ၅ ရက် တွင် ထုတ်ပြန်ထားပါတယ်။

ကမ္ဘောဒီးယားနိုင်ငံ၊ ဖနောင်ပင်မြို့တွင် ၂၀၂၂ ခုနှစ်၊ ဇူလိုင်လ ၃၁ ရက်နေ့မှ ဩဂုတ် လ ၆ ရက်နေ့အထိ ကျင်းပပြုလုပ်ခဲ့သည့် (၅၅) ကြိမ်မြောက် အာဆီယံနိုင်ငံခြားရေး ဝန်ကြီးများအစည်းအဝေးနှင့် ဆက်စပ်အစည်းအဝေးများသို့ မြန်မာနိုင်ငံက နိုင်ငံရေးအရ ကိုယ်စားမပြုသည့်ပုဂ္ဂိုလ်ကိုသာ အာဆီယံဥက္ကဋ္ဌ ကမ္ဘောဒီးယားနိုင်ငံက ဖိတ်ကြားခဲ့ရာ အာဆီယံ ပဋိညာဉ်စာတမ်း အပိုဒ်(၅)တွင် ဖော်ပြချက်နှင့် သိသာထင်ရှားစွာ သွေဖည်နေသဖြင့် မြန်မာနိုင်ငံမှ ကိုယ်စားလှယ်တက်ရောက်ခဲ့ခြင်းမရှိဘူးလို့ ဆိုပါတယ်။

(၅၅) ကြိမ်မြောက် အာဆီယံနိုင်ငံခြားရေးဝန်ကြီးများ အစည်းအဝေးဆိုင်ရာ ပူးတွဲထုတ်ပြန်ချက်ပါ “မြန်မာနိုင်ငံ၏ဖြစ်ပေါ်တိုးတက်မှုများ” ခေါင်းစဉ်အောက်တွင် မြန်မာ နိုင်ငံကတူညီဆန္ဒ (၅)ရပ် အကောင်အထည်ဖော်ရာတွင် တိုးတက်မှုမရှိကြောင်း ဖော်ပြ ချက်သည် မြန်မာနိုင်ငံ၏ အမှန်တကယ်ကြိုးပမ်းဆောင်ရွက်နေမှုများကို မျက်ကွယ်ပြု၍ လျစ်လျူရှုရာရောက်သည့်အတွက် ကန့်ကွက်ပါကြောင်း ဖော်ပြထားပါတယ်။

မြန်မာနိုင်ငံသည် နိုင်ငံတွင်း ငြိမ်းချမ်းတည်ငြိမ်မှုရရှိရေးအတွက် ကြိုးပမ်းနေ သကဲ့သို့ တစ်ချိန်တည်းမှာပင် တူညီဆန္ဒ(၅)ရပ် အကောင်အထည်ဖော်ခြင်းကို လက်ရှိ အာဆီယံဥက္ကဋ္ဌ ကမ္ဘောဒီးယား၏ အထူးကိုယ်စားလှယ်နှင့် အပြုသဘော နီးကပ်စွာ ပူးပေါင်းဆောင်ရွက်လျက်ရှိတယ်လို့ ဆိုပါတယ်။

မြန်မာနိုင်ငံ၌ ဒီမိုကရေစီ ပြန်လည်ဖော်ဆောင်ရေးအတွက် အစိုးရက ရှေ့လုပ်ငန်းစဉ်(၅)ရပ်ချမှတ်ကာ နစကဥက္ကဋ္ဌကိုယ်တိုင် ဦးဆောင်၍ ငြိမ်းချမ်းရေး ကြိုးပမ်းအားထုတ်မှုများ ဆောင်ရွက်နေခြင်းသည် သိသာထင်ရှားတဲ့ တိုးတက်မှုတစ်ရပ် ဖြစ်ကြောင်း ဖော်ပြထားပါတယ်။

အာဆီယံအဖွဲ့ဝင်နိုင်ငံများနှင့် ပြင်ပနိုင်ငံများသည် မြန်မာနိုင်ငံကို ပုံမှန်အနေအထားသို့ ပြန်လည်ရောက်ရှိရေးကူညီရန် အမှန်တကယ် ဆန္ဒရှိသည်ဆိုပါက အကြမ်းဖက် အဖွဲ့အစည်းများဖြစ်သည့် NUG နှင့် PDF တိုနှင့် ထိတွေ့ဆက်ဆံရန် ပြောဆိုမှုများနှင့် အားပေးသည့် လုပ်ရပ်များကို ရှောင်ရှားဖို့ တိုက်တွန်းထားပါတယ်။

အာဆီယံနိုင်ငံခြားရေးဝန်ကြီးများ အစည်းအဝေးဆိုင်ရာ ပူးတွဲထုတ်ပြန်ချက် တွင် အကြမ်းဖက်မှုနှင့် ရာဇဝတ်မှုကျူးလွန်သူ (၄)ဦးအား ပြစ်ဒဏ် ချမှတ်ခဲ့သည့်ကိစ္စအား စိုးရိမ်ကြောင်းဖော်ပြခဲ့ခြင်းနှင့် မလေးရှား၊ အင်ဒိုနီးရှား၊ ဖိလစ်ပိုင်၊ ထိုင်းနှင့် စင်ကာပူတို့မှ AICHR ကိုယ်စားလှယ်များက ဝေဖန်ပြစ်တင်သည့် ပူးတွဲထုတ်ပြန်ချက်တို့တွင် ယင်းပြစ်မှု ကျူးလွန်သူများကို “နိုင်ငံရေးတက်ကြွသူများအဖြစ်” ဖော်ပြချက်သည် ပကတိအခြေ အနေမှန် မဟုတ်ဘဲ မှန်ကန်မှုမရှိ လွဲမှားနေ၍ ကန့်ကွက်ကြောင်း ဖော်ပြထားပါတယ်။

မိမိတို့ချမှတ်ထားသော ဦးစားပေး ရှေ့လုပ်ငန်းစဉ်(၅)ရပ်ကို ဆက်လက် အကောင် အထည်ဖော်ဆောင်ရွက်သွားမယ်လို့ ဆိုပါတယ်။

အာဆီယံနှင့်လည်း အာဆီယံ ပဋိညာဉ် စာတမ်းပါ အခြေခံ “မူ” များ၊ အလေ့အထများနှင့်အညီ ဆက်လက် ပူးပေါင်းဆောင်ရွက်သွားမှာဖြစ်ပြီး အာဆီယံတူညီဆန္ဒ(၅)ရပ်ကိုလည်း မြန်မာပိုင်၊ မြန်မာ ဦးဆောင်မှုဖြင့် လက်ရှိအာဆီယံဥက္ကဋ္ဌ၏ အထူးကိုယ်စားလှယ်နှင့်အတူ မိမိနိုင်ငံ၏ အချုပ် အခြာအာဏာ ပိုင်ဆိုင်မှုကို မထိခိုက်စေဘဲ ညှိနှိုင်းပူးပေါင်း ဆောင်ရွက်သွားမယ်လို့ ဆိုပါတယ်။

ygm_mnn
#Yangon_Media_Group

#Local_News
Published _6 August 2022

မှတ်ပုံတင်အတုဖြင့် ရန်ကုန်သို့ လေယာဉ်ဖြင့် သွားမည့်သူများအားဖမ်းမိကြောင်း ရခိုင်ပြည်နယ်အစိုးရအဖွဲ့က သိရသည်။

ဖမ်းဆီးခံရသူများမှာ နူရ်မိုဟာမောက်(၂၉ နှစ်)၊ မဖဲလ်ဘာနူ (၂၀ နှစ်)နှင့် မရွှေနု (၂၁ နှစ်)ဆိုသူတို့ဖြစ်ပြီး ယမန်နေ့ ဩဂုတ်လ ၄ ရက် နံနက် ၁၁ နာရီခွဲခန့်တွင်စစ်တွေမြို့မှ ရန်ကုန်မြို့သို့ လေယာဉ်ဖြင့် လိုက်ပါရန် ပြင်ဆင်နေစဉ် စစ်တွေလေဆိပ်၌ ဖမ်းဆီးခံခဲ့ရခြင်းဖြစ်သည်။

၎င်းတို့ကိုင်ဆောင်ထားသည့် (ပြု)နိုင်ငံသားစိစစ်ရေးကတ်များတွင် မြေပုံမြို့နယ် တောင်ပေါ်ရပ်ကွက်ဟု ဖော်ပြထားသည်ကို မသင်္ကာဖြစ်သည့်အတွက် သက်ဆိုင်ရာ မြို့နယ်လဝကရုံးနှင့် တိုက်ဆိုင်စစ်ဆေးခဲ့ရာ ကွဲလွဲနေခြင်းဖြစ်ကြောင်း သိရသည်။

ဆက်လက်စစ်ဆေးခဲ့ရာ နူရ်မိုဟာမောက်၏ အမည်ရင်းမှာ မာမွတ်တာဟဲရ်၊ ရွှေနု၏ အမည်ရင်းမှာ ဖာတေမာနှင့် မဖဲလ်ဘာနူ၏ အမည်ရင်းမှာ မူစတော်ကာမာတိုဖြစ်ပြီး ဘင်္ဂလားဒေ့ရှ်နိုင်ငံ၊ အူခီးယားမြိုနှင့် တက္ကနာပ်ဖ်မြိုရှိ ဒုက္ခသည်စခန်းများတွင် နေထိုင်ကြသူများသာ ဖြစ်ကြောင်း၊ မလေးရှားနိုင်ငံသို့ သွားရောက်ရန် ဘင်္ဂလားဒေ့ရှ်နိုင်ငံမှတစ်ဆင့် တရားမဝင် ဝင်ရောက်လာသူများ ဖြစ်ကြောင်း ထုတ်ပြန်ချက်အရသိရသည်။

၎င်းတို့ ၃ ဦးအနက် မာမွတ်တာဟဲရ်သည် မလေးရှားနိုင်ငံသို့ သွားရောက်အလုပ်လုပ်ကိုင်ရန်ဖြစ်ပြီး အမျိုးသမီး ၂ ဦးမှာ မလေးရှားနိုင်ငံ၌ အိမ်ထောင်ပြုရန်အတွက် ဘင်္ဂလားဒေ့ရှ်နိုင်ငံ၊ နတ်တောင်ဆိပ်ကမ်းမှတစ်ဆင့် စစ်တွေမြို့၊ မိဇံရပ်ကွက်ရှိ ကိုရီးယားဆိပ်ကမ်းသို့ ဇူလိုင်လ ၁၅ ရက်က စက်လှေဖြင့် ရောက်ရှိခဲ့ခြင်းဖြစ်ကြောင်း၊
စစ်တွေမြို့သို့ ရောက်ရှိချိန်တွင် မှတ်ပုံတင်အတုရရှိခဲ့ပြီး လမ်းခရီးကုန်ကျစရိတ် အားလုံးကို မလေးရှားနိုင်ငံ၌နေထိုင်သည့် မာမွတ်တာဟဲရ်၏ အစ်ကို အာစ်တာရ်ကာမန်နှင့် အမျိုးသမီး ၂ ဦး၏ ခင်ပွန်းလောင်းများက ငွေထုတ်ပေးကာ ချိတ်ဆက်ခေါ်ယူခြင်းဖြစ်‌ကြောင်းလည်း ထုတ်ပြန်ချက်တွင် ဖော်ပြထားသည်။

ယခုအခါ ယင်းတို့ ၃ ဦးအား ဥပဒေနှင့်အညီ အမှုဖွင့်အရေးယူသွားမည်ဖြစ်ပြီး ဆက်စပ်တရားခံများ ဖမ်းဆီးရမိရေး ဆောင်ရွက်လျက်ရှိသည်ဟုလည်း သိရသည်။

ymg/mt
#Yangon_Media_Group

#Local_News
Published_6 August 2022

တေးသံရှင် အိမ့်ချစ် ၏ သမီးဦးလေးကို ယနေ့ နံနက်၇နာရီ ၁၃မနစ်အချိန်က ရန်ကုန်တိုင်းဒေသကြီးတာမွေမြို့နယ်ရှိ အာယုဆေးရုံကြီး၌ မွေးဖွားခဲ့ပြီ ဖြစ်သည်။

သမီးလေး၏အမည်ကို"အမရာ"ဟုအမည်ပေးထားပြီး မွေးဖွားချိန်တွင် ၆ ပေါင် ၁၂ အောင်စရှိကြောင်း သိရသည်။

လက်ရှိတွင် မိခင်‌ရောကလေးပါကျန်းမာကြကြောင်း ယင်း၏ မိသားစုဝင်များက ဆိုသည်။

ymg/mt
#Yangon_Media_Group