၁၇ ဒီဇင်ဘာ ၂၀၂၄

ရုရှားနိုင်ငံ မော်စကိုမြို့တော်မှာ လျှပ်စစ်စကူတာဆိုင်ကယ်ထဲ ဖွက်ထားတဲ့ ဗုံးတစ်လုံး အင်္ဂါနေ့ ဒီဇင်ဘာ ၁၇ ရက်နေ့က ပေါက်ကွဲတဲ့   အတွက် နျူကလီးယားကာကွယ်ရေးတပ်ဖွဲ့အကြီးအကဲ ရုရှားဒုတိယ   ဗိုလ်ချုပ်ကြီး  အီဂေါကီရီလော့ဗ် သေဆုံးသွားခဲ့ရပါတယ်။

ရုရှားနိုင်ငံ နျူကလီးယား၊ ဇီဝနှင့်ဓာတုလက်နက်များကာကွယ်ရေးတပ်ဖွဲ့ရဲ့ အကြီးအကဲဖြစ်တဲ့ ဒုတိယ ဗိုလ်ချုပ်ကြီး အီဂေါကီရီလော့ဗ်ဟာ  ကရင်မလင်ရဲ့ အရှေ့တောင်ဘက် လေးမိုင်လောက်သာဝေးတဲ့  ရာဇန်စကီပရော့ပက် လူနေအဆောက်အဦရဲ့ အပြင်ဘက်မှာ အဆိုပါဗုံးကြောင့် သေဆုံးခဲ့ရတာ ဖြစ်ပါတယ်။

သူနှင့်အတူ သူ့လက်ထောက်ပါသေဆုံးသွားတယ်လို့ စုံစမ်းစစ်ဆေးရေးကော်မတီက ထုတ်ဖော် ပြော ကြားပါတယ်။

ရုရှားရဲ့ အဆိုပါတပ်ဖွဲ့ဟာ RKhBZ လို့သိကြပြီး ရေဒီယိုဓာတ်သတ္တိကြွံနေချိန်၊ ဓာတုနှင့် ဇီဝဆိုင်ရာ ညစ်ညမ်းမှုတွေဖြစ်နေချိန်မှာ အလုပ်လုပ်ကြရတဲ့ အထူးတပ်ဖွဲ့တစ်ခုဖြစ်ပါတယ်။

ယူကရိန်းနိုင်ငံ တရားစွဲရှေ့နေတွေက ကီရီလော့ဗ်ကို ယူကရိန်းကိုတိုက်ခိုက်ရာမှာ တားမြစ်ထားတဲ့ ဓာတုလက်နက်တွေအသုံးပြုတယ်လို့ စွပ်စွဲကာ တနင်္လာနေ့ (ဒီဇင်ဘာ ၁၆ )ရက်က မျက်ကွယ်တွင် တရားစွဲခဲ့ပါတယ်။ရုရှားက အဆိုပါစွပ်စွဲချက်ကိုပယ်ချပစ်ခဲ့ပါတယ်။

Source Reuters

#Local_News
Published 17 December 2024

▪️ မြန်မာနိုင်ငံမှ ကျွမ်းကျင်အလုပ်သမားများခေါ်ယူနိုင်ရေး အခြေအနေများနှင့် သိရှိ လိုသည်များကို မေးမြန်းစုံစမ်းနိုင်ရန်ရည်ရွယ်၍မြန်မာနိုင်ငံ၏ လူ့စွမ်းအားအရင်းအမြစ် မြှင့်တင်ရေးဖိုရမ်ကို ဂျပန်နိုင်ငံတွင် ဒီဇင်ဘာလ ၁၃ရက်က ကျင်းပခဲ့ကြောင်း သိရသည်။

▪️ ဂျပန်နိုင်ငံ၊ နာဂိုယာမြို့အခြေစိုက်၊ မြန်မာနိုင်ငံဆိုင်ရာ ဂုဏ်ထူးဆောင်ကောင်စစ်ဝန်ရုံးမှ ကြီးမှူး၍ “မြန်မာနိုင်ငံ၏ လူ့စွမ်းအားအရင်းအမြစ် မြှင့်တင်ရေးဖိုရမ်” ကို  နာဂိုယာမြို့ရှိ Nagoya Chamber of Commerce and Industry ခန်းမ၌ ကျင်းပခဲ့ရာ ဖိုရမ်သို့ မြန်မာသံရုံး၊ တိုကျိုမြို့မှ သံအမတ်ကြီး ပါဝင်တက်ရောက်ခဲ့‌ေကြာင်း သိရသည်။

▪️ ဂျပန်နိုင်ငံအနေဖြင့် လက်ရှိရင်ဆိုင်နေရသည့် လူ့စွမ်းအားအရင်းအမြစ် လိုအပ်မှု အခက် အခဲကို ဖြေရှင်းနိုင်ရန် ပြည်ပမှလူ့စွမ်းအားအရင်းအမြစ်များ လက်ခံနိုင်ရေးကို အလေးထား စဉ်းစားလျက် မြန်မာနိုင်ငံမှ ကျွမ်းကျင်အလုပ်သမားများ ခေါ်ယူနိုင်ရေး အခြေအနေများနှင့် သိရှိ လိုသည်များကို မေးမြန်းစုံစမ်းနိုင်ရန်ရည်ရွယ်၍ အဆိုပါဖိုရမ်ကို ကျင်းပခြင်းဖြစ်ကြောင်း၊ ဖိုရမ်သို့ Aichi ပြည်နယ်အုပ်ချုပ်ရေးမှူး Mr. Hideaki OHMURA၊ ဂျပန်နိုင်ငံ အထက်လွှတ်တော်အမတ် Ms. Satsuki Katayama၊ Aichi ပြည်နယ်လွှတ်တော်အမတ်များ၊ မြန်မာ နိုင်ငံဆိုင်ရာ ဂုဏ်ထူးဆောင်ကောင်စစ်ဝန် Mr. Toshio Nishimura၊ စက်မှုနှင့် အလုပ်သမားဌာန၊ အာဆီယံသမဝါယမအသင်း၊ မြေယာ၊ အခြေခံအဆောက်အအုံ၊ ပို့ဆောင်ရေးနှင့် ခရီးသွားလာရေး ဝန်ကြီးဌာန၊ မြန်မာနိုင်ငံမှ ပြည်ပအလုပ်အကိုင် အကျိုးဆောင်လိုင်စင်ရ အေဂျင်စီတို့မှ တာဝန်ရှိ သူများ၊ ဂျပန်နိုင်ငံရှိ စီးပွားရေးလုပ်ငန်းရှင်များ အပါအဝင် ဖိတ်ကြားထားသော ဧည့်သည်တော် စုစုပေါင်း (၁၀၀) ဦး ပါဝင်တက်ရောက်ခဲ့ကြ‌ေကြာင်း သိရသည်။

▪️ ဖိုရမ်၌ သံအမတ်ကြီးက မြန်မာနိုင်ငံ၏ အလုပ်သမားစေလွှတ်ရေးဆိုင်ရာ မူဝါဒများနှင့် လုပ်ငန်းစဉ်များ၊ မြန်မာကျွမ်းကျင်အလုပ်သမားများ၏ ကြိုးစားမှုနှင့် စွမ်းဆောင်ရည်များကြောင့် ဂျပန်နိုင်ငံတွင် လာရောက်အလုပ်လုပ်ကိုင်ရန် သင့်လျော်သည့် အခြေအနေများကို ရှင်းလင်း ပြောကြားခဲ့ကြောင်း၊ ထို့နောက်ဂျပန်နိုင်ငံဘက်မှ မြေယာ၊ အခြေခံအဆောက် အအုံ၊ ပို့ဆောင်ရေးနှင့် ခရီးသွားလာရေးဝန်ကြီးဌာနမှ သယ်ယူပို့ဆောင်ရေးလုပ်ငန်းအတွက် ယာဉ်မောင်းကျွမ်းကျင်လုပ်သားများ အသစ်ထပ်မံခေါ်ယူမည့်ကိစ္စများကိုဆွေးနွေးခဲ့ကြောင်း သိရသည်။

#YMG/SW #Yangon_Times

#Local_News
Published 17 December 2024

▪️ ကရင်ပြည်နယ်၊  ဘားအံမြို့နယ်၌ ဈေးဆိုင်တန်း  မီးလောင်မှုတစ်ခု ယနေ့မနက်အစောပိုင်း၌ ဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့မှ သိရသည်။

▪️ ဒီဇင်ဘာ ၁၇ရက်နေ့၊  မနက်၁ နာရီ  ၀၃မိနစ်  အချိန်ခန့်က ကရင်ပြည်နယ်၊ ဘားအံခရိုင်၊ ဘားအံမြို့နယ်၊ အမှတ်(၂)ရပ်ကွက်၊ ဘုရားလမ်းနှင့်ဗိုလ်ချုပ်လမ်းထောင့်တွင် ဈေးဆိုင်တန်းမီးလောင်မှုဖြစ်ပွားခဲ့ကြောင်း သိရသည်။

▪️ အဆိုပါ သတင်းရရှိသဖြင့် ကရင်ပြည်နယ်မီးသတ်ဦးစီးမှူးရုံးမှ မီးငြှိမ်းသတ်ယာဉ်(၂)စီး၊ မီးသတ်ရေသယ်ယာဉ်(၁)စီး၊ ဘားအံခရိုင်မီးသတ်စခန်းမှ မီးငြှိမ်းသတ်ယာဉ်(၃)စီး၊ ဘားအံမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ မီးသတ်ရေသယ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များဖြင့် ထွက်ခွာငြှိမ်းသတ်ခဲ့ရာ မနက်  ၂နာရီ အချိန်၌  မီးငြိမ်းခဲ့ ကြောင်းသိရသည်။

▪️ မီးလောင်မှုဖြစ်စဉ်အပါအဝင်ပျက်စီးဆုံးရှုံးမှုတန်ဖိုးများအား ဆက်လက်စုံစမ်းလျှက်ရှိကြောင်း သိရသည်။

#YMG/NN #Yangon_Times

#World_News
Published 17 December 2024

▪️ တနင်္လာနေ့က အမေရိကန် ဝစ္စကွန်ဆင်ကျောင်း အတန်းတစ်ခုမှာ အသက်(၁၅)နှစ်အရွယ် မိန်းကလေးတစ်ဦးက သေနတ်ပစ်ခတ်ခဲ့တာကြောင့် အတန်းသားတစ်ဦးနဲ့ ဆရာတစ်ဦး သေဆုံးခဲ့ကာ (၆)ဦးဒဏ်ရာရရှိခဲ့ပြီး သူ့ကိုယ်သူ သတ်သေသွားခဲ့တယ်လို့ ရဲတပ်ဖွဲ့က‌ ပြောပါတယ်။

▪️ ယခုနောက်ဆုံး စာသင်ကျောင်း သေနတ်ပစ်ခတ်မှုဖြစ်ရပ်ဟာ မက်ဒီဆန်မြို့က Abundant Life Christian School ပုဂ္ဂလိကကျောင်းမှာ ဖြစ်ခဲ့ပြီး မူကြိုကနေ (၁၂)တန်းအထိ ကျောင်းသား (၄၀၀)ခန့်ကို ပညာသင်ပေးနေတဲ့ကျောင်း ဖြစ်ပါတယ်။

▪️ ဒဏ်ရာရသူတွေထဲက ကျောင်းသား(၂)ယောက်ဟာ အသက်အန္တရာယ် ခြိမ်းခြောက်ဖွယ်ရှိတဲ့ ဒဏ်ရာမျိုး ရရှိထားပြီး ဆရာတစ်ဦးနဲ့ ကျောင်းသား(၃)ဦးကတော့ အသက်ရှင်နိုင်ဖွယ် ရှိတယ်လို့ မက်ဒီဆန်ရဲမှူးချုပ် ရွှန်ဘားနက်စ်က မီဒီယာရှင်းလင်းပွဲမှာ ပြောကြားလိုက်ပါတယ်။

▪️ သေနတ်ပစ်ခတ်သူက နာတယ်လီရပ်နိုးလို့ သိရပြီး ဆာမန်သာလို့လည်း ခေါ်တယ်လို့ သိရပါတယ်။

▪️ မိန်းကလေးတစ်ယောက်က ကျောင်းမှာပစ်ခတ်တဲ့ ဖြစ်ရပ်ဟာ အလွန်ရှားပါးပြီး အမေရိကန်မှာ (၃)ရာခိုင်နှုန်းသာ ရှိပါတယ်။

▪️ ဒီလိုလုပ်ရတဲ့ အကြောင်းအရင်းကို မသိရှိရသေးသလို ထိုမိန်းကလေးရဲ့ မိသားစုကလည်း စုံစမ်းစစ်ဆေးမှုမှာ ပူးပေါင်းပါဝင်နေပါတယ်။

▪️ ဒုတိယတန်းမှ အသက် (၇)နှစ်-(၈)နှစ်အရွယ် ကလေးတစ်ယောက်က ၉၁၁ ကို ခေါ်ဆိုတိုင်ကြားခဲ့တာ ဖြစ်ပါတယ်။

▪️ အမေရိကန်မှာ ယခုနှစ်အတွင်း စာသင်ကျောင်းအတွင်း သေနတ်ပစ်ခတ်မှု (၃၂၂)ကြိမ်ဖြစ်ပွားခဲ့ကာ ယမန်နှစ်က (၃၄၉)ကြိမ်ပြီးရင် ဒုတိယအများဆုံးနှစ် ဖြစ်နေပါတယ်။

▪️ သေနတ်အကြမ်းဖက်မှုတွေ ကာကွယ်ဖို့အတွက် ဒီထက်ပိုကောင်းအောင် လုပ်ဖို့လိုနေတယ်လို့ မက်ဒီဆန်မြို့တော်ဝန် ဆာတီယာရုတ်ဒ်ကွန်ဝေးက ပြောပါတယ်။

▪️ သေနတ်ပစ်သူက စတင်ပစ်ခတ်ချိန်မှာ ကျောင်းသားတွေဟာ စာသင်ခန်းတွေထဲမှာ တံခါးပိတ်နေခဲ့ကြပြီး ကောင်းစွာထိန်းချုပ် နေနိုင်ခဲ့ကြကာ နောက်ပိုင်းမှာတော့ အသက်ရှင်ကျန်ရစ်သူတွေအားလုံး မိဘတွေနဲ့ ပြန်လည်စုံစည်းခဲ့ကြပါတယ်။

#Source: Reuters

#Local_News
Published 17 December 2024

▪️ နှစ်သစ်ကူးပွဲတော်Myanmar Countdown 2025 ကို နေပြည်တော်ရှိ ဝဏ္ဏသိဒ္ဓိအားကစားကွင်း ၁၊ ၂တွင် ၃ရက်ကြာ ကျင်းပမည်ဖြစ်ကြောင်း သိရသည်။

▪️ Myanmar Countdown 2025 အား ဒီဇင် ဘာ ၂၉ ရက်မှ ၃၁ ရက်အထိ နိုင်ငံကျော်တေးသံရှင်များစွာ၏ ဖျော်ဖြေမှုများနှင့်အတူ ကျင်းပမည်ဖြစ်ရာဒီဇင်ဘာ ၂၉ ရက်ညပိုင်းတွင် တေးသံရှင်များဖြစ်သည့် Bobby Soxer ၊ ပုံရိပ်၊ လွှမ်းပိုင်၊ ချမ်းမြေ့မောင်ချို၊ ထက်ယံ၊ Examplez ၊ Double J နှင့် Team 143 တို့မှ လည်းကောင်း၊ ဒီဇင်ဘာ ၃၀ ရက်ညပိုင်းတွင် ဝိုင်းစုခိုင်သိန်း၊ အိမ့်ချစ်၊ ဖြိုးပြည့်စုံ၊ Jewel ၊ နေမင်းအိမ်၊ ဝေလ၊ ဘိုဖြူ၊ ဟဲလေး၊ နေနော်တို့ကလည်းကောင်း၊ ဒီဇင်ဘာ ၃၁ ရက်ညပိုင်းတွင် အိုင်းရစ်ဇင်မာမြင့်၊ ရဲရင့်အောင်၊ ယွန်းမြတ်သူ၊ ရတနာမိုင်၊ J Fire ၊ အစ္စဏီ၊ သိန်းလင်းစိုး၊ အောင်ထက်၊ Jason Ace ၊ မဟော်၊ ချစ်ကောင်း၊ Project K နှင့် Awasome Boyz တို့ကလည်းကောင်း ဖျော်ဖြေတင်ဆက်သွားမည်ဖြစ်‌ကြောင်း သိရသည်။

▪️ ထို Myanmar Countdown 2025 ဖျော်ဖြေပွဲကို မည်သူမဆို အခမဲ့ဝင်ရောက်ကြည့်ရှုခွင့်ပြုသွားမည်ဖြစ်‌ကြောင်း သိရသည်။

#YMG/SW #Yangon_Times

#Local_News
Published 17 December 2024

▪️ တနင်္သာရီတိုင်းဒေသကြီး၊ မြိတ်မြို့၌ မီးလောင်မှုတစ်ခု ယနေ့မနက်အစောပိုင်းကဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့မှ သိရသည်။

▪️ ဒီဇင်ဘာ၁၇ ရက်နေ့၊ မနက်၇နာရီခွဲ  အချိန်ခန့်က တနင်္သာရီတိုင်းဒေသကြီး၊ မြိတ်မြို့၊ မြိုသစ်ရပ်ကွက်၊ အောင်ဆန်းလမ်းမကြီးတွင် မီးလောင်မှုဖြစ်ပွားခဲ့ကြောင်းသိရသည်။ အဆိုပါ သတင်းရရှိသဖြင့် မြိတ်ခရိုင်/မြို့နယ်မီးသတ်စခန်းမှ မီးသတ်ယာဉ်များဖြင့် ထွက်ခွာငြှိမ်းသတ်ခဲ့ရာ မနက်၈ နာရီ ၅ မနစ်အချိန် ၌ မီးငြိမ်းခဲ့ကြောင်း သိရသည်။

▪️ မီးလောင်မှုဖြစ်စဉ်အပါအဝင်ပျက်စီးဆုံးရှုံးမှုတန်ဖိုးများအား ဆက်လက်စုံစမ်းလျှက်ရှိကြောင်း သိရသည်။

#YMG/NN #Yangon_Times

#Local_News
Published 17 December 2024

▪️ မိတ္ထီလာတပ်မတော်ချည်မျှင်နှင့် အထည်လိပ်စက်ရုံ၊ ၂/၈၀ ချည်ချောစက်ရုံခွဲမှ ထွက်ရှိသည့် ချည်ချောများကိုပြင်ပဈေးကွက်သို့ ဈေးနှုန်းသက်သာစွာ ဖြန့်ဖြူးရောင်းချပေးမည်ဟု နစက ဥက္ကဋ္ဌ ကပြောသည်။

▪️ ယနေ့ဒီဇင်ဘာလ ၁၆ ရက်တွင် ပြုလုပ်သည့် တပ်မတော်ချည်မျှင်နှင့် အထည်လိပ်စက်ရုံ(မိတ္ထီလာ) ၂/၈၀ ချည်ချောစက်ရုံခွဲ ဖွင့်ပွဲအခမ်းအနားတွင်ယင်းကအထက်ပါအတိုင်း ပြောကြားခြင်းဖြစ်သည်။

▪️ ယခုတည်ဆောက်တပ်ဆင်ပြီးစီးသည့် စက်ရုံသည်စက်စွမ်းအားပြည့် လည်ပတ်မည်ဆိုပါက တစ်ရက်ချည်ပေါင်ချိန် ၄၈၄၀၊ တန်အားဖြင့် ၂ တန်ခန့် ထုတ်လုပ်နိုင်မည်ဖြစ်ကြောင်း၊ ထွက်ရှိလာသည့် ၂/၈၀ ချည်ချောများကို ပြည်သူလူထုအတွက် လိုအပ်သည့် လုံချည်နှင့်ပိတ်များအဖြစ် ယက်လုပ်မည်ဖြစ်ပြီး ပိုလျှံသည့်ချည်များကို ပြင်ပဈေးကွက်ကို ဈေးနှုန်းသက်သာစွာဖြင့် ဖြန့်ဖြူးရောင်းချပေးသွားမည်ဖြစ်ကြောင်း ယင်းကဆိုသည်။

▪️ တပ်မတော်ချည်မျှင်နှင့် အထည်စက်ရုံ (မိတ္ထီလာ)က တပ်မတော်တစ်ရပ်လုံးအတွက် လိုအပ်သည့် စစ်ဝတ်ထည်ပစ္စည်းများကို ဝါဂွမ်းကုန်ကြမ်းမှ စစ်ဝတ်ကုန်ချောအထိ ထုတ်လုပ်ပေးနေသကဲ့သို ယနေ့ ဖွင့်လှစ်လိုက်သည့် ၂/၈၀ ချည်ချောစက်ရုံသည် နိုင်ငံ၏အဝတ်အထည် လိုအပ်ချက်ကို တစ်ဖက်တစ်လမ်းမှ များစွာအထောက်အကူပြုစေမည်ဖြစ်ကြောင်း နစက ဥက္ကဌကပြောသည်။

▪️ ယခု ၂/၈၀ ချည်ချောစက်ရုံခွဲ ဖွင့်လှစ်နိုင်ခြင်းသည် မြန်မာနိုင်ငံ၏ ချည်ထည် ခေတ်တစ်ခေတ်ပြောင်းလဲမှု၏ အစဖြစ်သည်ဟုပြောလိုကြောင်း၊ မိမိတို့အနေဖြင့် အဆင့်မြင့်ချည်ထည်များ ထုတ်လုပ်နိုင်သည့် ဝါမျိုးကောင်း၊ မျိုးသန့်များကို စိုက်နည်းစနစ်မှန်ကန်စွာ ဆောင်ရွက်ပြီး ဝါအထွက်နှုန်း တိုးတက်အောင် ဆောင်ရွက်ကြရန်လိုအကြောင်း၊ တစ်ဖက်ကလည်း ဝါကြိတ်စက်ရုံများ၊ ချည်မျှင်နှင့်အထည် စက်ရုံများကို အဆင့်မြှင့်တင်ပေးပြီး ဝါကိုအခြေခံသည့်စက်မှုလုပ်ငန်းကို ဆက်လက်ဆောင်ရွက်သွားကြရမည်ဖြစ်ကြောင်း နိုင်ငံတော်စီမံအုပ်ချုပ်ရေးကောင်စီဥက္ကဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်က ပြောကြားခဲ့သည်။

Yangon -Times/PP

#World_Health
Published 17 December 2024

▪️ ရောဂါဆန်းတစ်ခုကြောင့် လူ ၃၁ ဦးကျော် သေဆုံးထားတဲ့ ကွန်ဂိုဒီမိုကရက်တစ် ပြည်သူ့သမ္မတနိုင်ငံသို့ ကုလသမဂ္ဂက ကျန်းမာရေးအဖွဲ့တစ်ဖွဲ့ စေလွှတ်လိုက်ပါတယ်။

▪️ တုပ်ကွေးကဲ့သို့သော ရောဂါဟာ ရောဂါကူးစက်နှုန်းနဲ့ သေဆုံးမှုနှုန်း မြင့်မားတာကြောင့် ပညာရှင်များ စိုးရိမ်နေကြပါတယ်။

▪️ ဘာရောဂါမှန်း မသိသေးတာကြောင့် WHOက ထိုရောဂါကို Xရောဂါအဖြစ် သတ်မှတ်ထားပါတယ်။

▪️ နိုဝင်ဘာ ၂၉ ရက်နေ့က ကွန်ဂို ပြည်သူ့ကျန်းမာရေးဝန်ကြီးဌာနက အမျိုးအမည်မသိ ရောဂါကြောင့် သေဆုံးသူများလာတဲ့အကြောင်း WHOကို အသိပေးခဲ့ပါတယ်။

▪️ ဝေးလံတဲ့ ကွမ်ဂိုဒေသမှာ ဖျားနာ ခေါင်းကိုက် ချောင်းဆိုး နှာရည်ယို ခန္ဓာကိုယ်ကိုက်ခဲဝေဒနာ ခံစားရသူ ၄၀၆ ဦးရှိပြီး သေဆုံးသူ ၃၁ ဦးရှိတယ်လို့ မှတ်တမ်းရထားပါတယ်။

▪️ ဓာတ်ခွဲခန်းစမ်းသပ်ချက်များနဲ့ စစ်ဆေးခြင်းများ ပြုလုပ်ပြီး ဖြစ်နိုင်တဲ့ရောဂါ အများအပြားကို ထုတ်ဖော်နေကြပါတယ်။

▪️ ဒီထဲမှာ ဝက်သက်၊ တုပ်ကွေး၊ အဆုတ်ရောင်၊ အီးကိုလိုင် ကိုဗစ်-၁၉ ငှက်ဖျားတို့မှ လက္ခဏာများ ဖြစ်နိုင်ပါတယ်။

▪️ ရောဂါဖြစ်ပွားတဲ့သူတွေမှာ အာဟာရဓာတ် ချို့တဲ့ကြတယ်လို့ ဆိုပါတယ်။

▪️ ထိုဒေသမှာ ဆေးဝါးပစ္စည်းများ၊ သယ်ယူပို့ဆောင်ရေး၊ ကျန်းမာရေးလုပ်သားများ ရှားပါးနေသလို ငှက်ဖျားထိန်းချုပ်ဖို့ကလည်း ခက်ခဲပါတယ်။

▪️ အသက်အန္တရာယ် ဆက်စပ်နေတဲ့ လက္ခဏာတွေကတော့ အသက်ရှူခက်ခြင်း၊ သွေးအားနည်းခြင်းနဲ့ အာဟာရချို့တဲ့ခြင်းတို့ ဖြစ်နေပါတယ်။

▪️ Xရောဂါကို WHOက အထူးသတိပေးထားကာ ကိုဗစ်-၁၉ထက် အန္တရာယ်ပိုပေးနိုင်မယ်လို့ ဆိုထားပါတယ်။

▪️ ဘယ်ဗိုင်းရပ်စ်ကြောင့်လဲဆိုတာ မသိရသေးပေမယ့် အသက်ရှူလမ်းကြောင်းဆိုင်ရာ ဗိုင်းရပ်စ်ကြောင့် ဖြစ်နိုင်ခြေအများဆုံး ရှိနေပါတယ်။

#Source: India Today

#World_Health
Published 17 December 2024
▪️ အသိအမှတ်ပြု မေ့ဆေးဆရာဝန် ဒေါက်တာ ဒေးဗစ်မာဂျူဘီက Sleepinox ရဲ့ သဘာဝ အိပ်စက်မှု ဖြည့်စွက်ဆေးကို ဖော်စပ်ခဲ့ကာ အိပ်စက်မှုကို တိုးတက်စေရုံမက ကိုယ်ခံအားစနစ်နဲ့ ဦးနှောက်စွမ်းရည်တို့ကို မြှင့်တင်ပေးနိုင်တယ်လို့လည်း ထုတ်ဖော်ပြောလိုက်ပါတယ်။

▪️ ဒါ့အပြင် လော့စ်အိန်ဂျလိစ်နဲ့ အောရင့်ဂျ်ကောင်တီမှ ကီတမင်းဟီးလင်းဆေးခန်း ပိုင်ရှင်လည်းဖြစ်ကာ သောကစိတ်တွေများပြီး စိတ်ဓာတ်ကျတဲ့ လူနာတွေအများကြီး တွေ့ရတယ်လို့ ပြောပါတယ်။

▪️ အချို့သောဆေးညွှန်းတွေက ရေရှည်အသုံးပြုတဲ့အခါ ဦးနှောက်အတွက် ကျန်းမာရေးမကောင်းစေတာကြောင့် သဘာဝအတိုင်း ထိရောက်မှုရှိတဲ့ ဆေးကို ဖန်တီးဖို့ဆုံးဖြတ်ခဲ့ကြောင်း ပြောပါတယ်။

▪️ မာဂျူဘီက Sleepinox ကို လွန်ခဲ့တဲ့ ၃ နှစ်က ထုတ်လုပ်ခဲ့ကာ ယခုနှစ်အစောပိုင်းမှာတော့ ဖော်စပ်မှုအသစ် ချပြခဲ့ပါတယ်။

▪️ ဖော်စပ်မှုအသစ်မှာ မဂ္ဂနီဆီယမ်အောက်ဆိုဒ်အစား မဂ္ဂနီဆီယမ်ဂလစ်ဆနိတ် ပါဝင်ပြီး ဗလေရီယန်မြစ်နဲ့ အက်ရှ်ဝါဂန်ဒါတို့ ပမာဏများပြားစွာ ပါဝင်ပါတယ်
မဂ္ဂနီဆီယမ်ဂလစ်ဆနိတ်က စိတ်ပြေလျော့စေတဲ့ အစွမ်းသတ္တိရှိပြီး စိတ်အခြေအနေကို ထိန်းညှိပေးကာ အာရုံကြောစနစ်ကို ငြိမ်သက်စေပါတယ်။

▪️ စိတ်ဓာတ်ကျခြင်းနဲ့ ဦးနှောက်ထိုင်းမှိုင်းခြင်း ဖြစ်စေနိုင်တဲ့ မယ်လာတိုနင်ကိုတော့ အသုံးမပြုထားဘဲ သူ့ဆေးကို သုံးစွဲတဲ့ လူနာတွေဟာ နံနက်ပိုင်းမှာ ရွှင်လန်းစွာ နိုးထလာတယ်လို့ ပြောပါတယ်။

▪️ ဖလော်ရီဒါမှာ ထုတ်လုပ်တဲ့ Sleepinox တစ်ဗူးမှာ ဆေးတောင့် ၉၀ ပါပြီး ၄၅ ဒေါ်လာဖြင့် ရောင်းချပါတယ်။

▪️ အိပ်မပျော်တတ်တဲ့ ဝေဒနာရှင်တွေအနေနဲ့ အိပ်ရာမဝင်ခင် ၂-၃ တောင့် အသုံးပြုသင့်တယ်လို့ ပြောထားပါတယ်။

▪️ ကမ္ဘာတဝှမ်းမှာ အိပ်ဆေးဈေးကွက်နဲ့ ပတ်သက်လို့ ဒေါ်လာ ၅.၂ ဘီလီယံကျော် ထွက်ရှိထားကာ နှစ်စဉ် ၅ ရာခိုင်နှုန်းနီးပါး တိုးတက်ဖို့မျှော်မှန်းထားပါတယ်။

#Source: New York Post

၁၆ ဒီဇင်ဘာ ၂၀၂၄

ထိုင်းနိုင်ငံတွင်ပြုလုပ်မည့် မြန်မာနိုင်ငံနှင့်ပတ်သက်သည့် အစည်းဝေးများကိစ္စနှင့်ပတ်သက်၍ နစက သတင်းထုတ်ပြန်ရေးအဖွဲ့ခေါင်းဆောင်က ရှင်းလင်းပြောကြားခဲ့ပါတယ်။

အဲဒီပြောကြားချက်အပြည့်အစုံကိုဖော်ပြပေးအပ်ပါတယ်။

@ymg/knl

တရုတ်နဲ့ ရုရှားနိုင်ငံကြား ချစ်ကြည်ရင်းနှီးတဲ့ ဆက်ဆံရေး တိုးတက်မှုဟာ ယုတ္တိဆန်တဲ့ သမိုင်းကြောင်းရလဒ်တစ်ခုဖြစ်ပြီး ပြင်းပြတဲ့ဆန္ဒကြောင့် တွန်းအားဖြစ်စေကြောင်း တရုတ်သမ္မတ ရှီကျင့်ဖျင်က ကြာသပတေးနေ့မှာ ပြောပါတယ်။
#World_Politics
Published 16 December 2024
#တရုတ်သမ္မတရှီကျင့်ဖျင် #ရုရှားပါတီဥက္ကဋ္ဌ
#YMG #Yangon_Times #Yangon_Media_Group

#Daily_News
Published 16 December 2024

၁။ MSME လုပ်ငန်းများ ပိုမိုဖွံ့ဖြိုးတိုးတက်လာစေရန် နည်းပညာ၊ ငွေကြေးနှင့်အခြေခံ လိုအပ်ချက်များကို နိုင်ငံတော်ဘက်မှ ဖြည့်ဆည်းပေးလျှက်ရှိ

၂။ ၈ လတာအတွင်း ပြည်ပသို့ပဲမျိုးစုံတင်ပို့မှုမှ  ကန်ဒေါ်လာတစ်သန်းကျော်ရရှိ

၃။ နိုင်ငံအထက်ပိုင်း၌ အအေးပိုလာနိုင်ပြီး တိုင်းနှင့်ပြည်နယ်ရှစ်ခု၌ မိုးရွာသွန်းနိုင်

၄။ တရုတ်သမ္မတရှီကျင့်ဖျင်က တရုတ်ရုရှားဆက်ဆံရေးတိုးတက်မှုသည် သမိုင်းရလဒ်တစ်ခုဟု ရုရှားပါတီဥက္ကဋ္ဌကိုပြော ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group