#World_Science
Published 18 December 2025

■ မားစ်ဂြိုဟ်ပေါ်မှာ လျှပ်စီးလှုပ်ရှားမှုကို ပထမဆုံးအနေဖြင့် သိပ္ပံပညာရှင်များ မှတ်သားရရှိတယ်လို့ ယုံကြည်နေကြပြီး မိုးကြိုးထုတ်လွှတ်နိုင်တယ်လို့ ယူဆလာကြပါတယ်။

■ နာဆာရဲ့ Perseverance အာကာသယာဉ်က ၂၀၂၁ မှာ မားစ်သို့ ရောက်ခဲ့ပြီး ၄ နှစ်ကြာအောင် လေ့လာစူးစမ်းနေခဲ့ပါတယ်။

■ လျှပ်စီးထုတ်လွှတ်မှုငယ်လေးတွေက အသံနဲ့ လျှပ်စစ်သံလိုက်ဖမ်းယူခြင်းကနေ ရရှိခဲ့ပါတယ်။

■ လေထုထုတ်လွှတ်မှုတွေ တိုင်းတာဖို့ ကိရိယာအသစ်တွေ အာရုံခံနိုင်စွမ်းပိုကောင်းတဲ့ ကင်မရာတွေဖြင့် အတည်ပြုရှာဖွေဖို့ မျှော်လင့်နေကြပါတယ်။

■ ပြင်သစ်မှ သုတေသီအဖွဲ့က ၂၈ နာရီကြာမြင့်တဲ့ မိုက်ခရိုဖုန်းမှတ်တမ်းတွေကို ဆန်းစစ်ခဲ့ကြပါတယ်။

■ လျှပ်စီးထုတ်လွှတ်မှုတွေက သာမန်အားဖြင့် လေပွေမှုန်များ၊ မုန်တိုင်းမှုန်များနဲ့ ဆက်စပ်နေပါတယ်။

■ လေပွေမှုန်တွေက မြေပြင်မှ လေပူတွေကနေ ဖြစ်ပေါ်လာပြီး အတွင်းပိုင်းလှုပ်ရှားမှုတွေကနေ လျှပ်စီးများဖြစ်လာစေပါတယ်။

■ ဒါဟာ တွေ့ရှိမှုကြီးတစ်ခုဖြစ်ပြီး မားစ်ဂြိုဟ်ရဲ့ လေထုဓာတုဗေဒ၊ ရာသီဥတု၊ နေထိုင်နိုင်မှု၊ အနာဂတ်လေ့လာစူးစမ်းမှုတွေအတွက် တိုက်ရိုက်အကျိုးရှိစေမယ်လို့ သုတေသနဦးဆောင်သူ ဒေါက်တာ ဘက်တစ္စတေချိုင်ဒီက ပြောပြပါတယ်။

■ အခုဆိုရင် လေထုထဲ လျှပ်စီးလှုပ်ရှားမှုရှိတယ်လို့ သိထားတဲ့ ကမ္ဘာ၊ စေတန်၊ ဂျူပီတာဂြိုဟ်တွေထဲ မားစ်လည်း ပါဝင်လာပြီဖြစ်ပါတယ်။

■ ယခုလျှပ်စီးတွေကို ကြားသာကြားရပြီး မမြင်ရတာကြောင့် တကယ်ပဲ မိုးကြိုးဟုတ်ရဲ့လားဆိုတာတော့ သံသယဖြစ်စရာ ရှိနေပါတယ်။

■ ယခုချမ်းအေးတဲ့ရာသီဥတုရှိတဲ့ မားစ်ဂြိုဟ်ဟာ ယခင်က ရေနဲ့ ထူထဲတဲ့လေထုရှိခဲ့ပြီး သက်ရှိတွေအကြောင်း လေ့လာလို့ကောင်းတဲ့နေရာ ဖြစ်နေပါတယ်။

Source: BBC

#World_Health
Published 18 December 2025

■ အိမ်သာအနီးမှာ သွားတိုက်တံထားရှိခြင်းက မသင့်လျော်ဘူးလို့ ယူဆထားသလို သိပ္ပံနည်းအရလည်း သတိပေးလာပါတယ်။

■ ဘိုထိုင်အိမ်သာအနီးမှာ သွားတိုက်တံ ထားရှိခြင်းဟာ ပတ်ဝန်းကျင်ညစ်ညမ်းမှုတစ်မျိုးနဲ့ ထိတွေ့စေတယ်လို့ သုတေသီတွေ မှတ်ချက်ပြုလာပါတယ်။

■ အိမ်သာရေဆွဲချတိုင်းမှာ လေထဲသို့ထွက်လာတဲ့ အလွန်သေးငယ်တဲ့ အမှုန်တွေ ပျံ့နှံ့သွားပါတယ်။

■ ဒီအမှုန်တွေထဲမှာ ဘက်တီးရီးယားနဲ့ အညစ်အကြေးအရာတွေမှ ရောက်လာတဲ့ အဏုဇီဝပိုးမွှားပါဝင်နိုင်ပြီး ထိတွေ့သမျှအရာကို ဘေးအန္တရာယ် ဖြစ်စေတတ်ပါတယ်။

■ အမှုန်တွေဟာ အပေါ်နဲ့ အပြင်ဘက်သို့ ပေအတော်များများအထိ လွှင့်စင်နိုင်ပြီး အနီးအနားက သွားတိုက်တံတွေဆီလည်း ရောက်ရှိသွားနိုင်တယ်လို့ ဆိုပါတယ်။

■ အဖုံးဖွင့်ထားတဲ့အချိန်မှာဆိုရင် အီးကိုလိုင်နဲ့ ကလော့စ်ထရီဒီရွိုက်စ် ဒစ်ဖီဆိုင်းတို့လို ပိုးမွားတွေ ပျံ့နှံ့သွားကြောင်း သုတေသနတွေ့ရှိထားပါတယ်။

■ အကြိမ်ကြိမ်ထိတွေ့လာတဲ့အခါ သွားတိုက်တံအမျှင်တွေမှာ ပိုးမွှားတွေများပြားလာနိုင်တယ်လို့ ဖော်ပြထားပါတယ်။

■ ခံတွင်းသန့်ရှင်းရေးကို ထိခိုက်လာနိုင်ပြီး ဘက်တီးရီးယားနဲ့ ထိတွေ့နိုင်ခြေများပြားလာကာ ကိုယ်ခံအားနည်းသူတွေဆိုရင် ပိုပြီးအန္တရာယ်ရှိစေနိုင်ပါတယ်။

■ သွားတိုက်တံတွေကို အိမ်သာတွေကနေ အဝေးဆုံးမှာ ထားရှိပြီး လေခြောက်သွေ့စေရန် အပေါ်ကိုထောင်ထားသင့်တယ်လို့ အမေရိကန် CDC က အကြံပြုထားပါတယ်။

■ သွားတိုက်တံအမျှင်တွေ စိုစွတ်တယ်ဆိုရင် ဘက်တီးရီးယားတွေ ကြာကြာအသက်ရှင်နိုင်ပါတယ်။

■ ဒါ့အပြင် အိမ်သာထဲမှ အမှုန်များမပျံ့နှံ့အောင် ရေဆွဲမချခင် အဖုံးအုပ်ထားသင့်ပါတယ်။

Source: India Today

ရှန်ဟိုင်းမှာပြုလုပ်တဲ့ နိုင်ငံတကာဉာဏ်ရည်တုထည့်သွင်းပြိုင်ပွဲနဲ့ ၂၀၂၅ ကမ္ဘာလုံးဆိုင်ရာ တီထွင်ထုတ်လုပ်သူများ အစည်းအဝေးပွဲမှာ စက်ရုပ်တွေရဲ့ လက်တွေ့အသုံးချစွမ်းရည်များကို ကဏ္ဍအသီးသီးမှာ စမ်းသပ်ခဲ့ကြပါတယ်။

World_Technology
Published 17 December 2025
#ရှန်ဟိုင်း #စက်ရုပ်ပြိုင်ပွဲ
#YMG #Yangon_Times #Yangon_Media_Group

လာမယ့်ဒီဇင်ဘာရုံးပိတ်ရက်ကာလအတွင်း ခရီးသွားပြည်သူနဲ့ ဌာနဆိုင်ရာဝန်ထမ်းများ အဆင်ပြေစွာ ခရီးသွားလာနိုင်စေရေးအတွက် ရန်ကုန်-နေပြည်တော်-ရန်ကုန် ခရီးစဉ်ကို ပုံမှန်ရထားများအပြင်အထူးရထားခရီးစဉ်‌ တွေပြေးဆွဲ‌ပေးသွားမယ်လို့ မြန်မာ့မီးရထားမှသိရပါတယ်။

#Local_News
Published 17 December 2025
#ရထား #ရန်ကုန်-နေပြည်တော်-ရန်ကုန်
#YMG/SW #Yangon_Times

တရုတ်ပြည်သူ့သမ္မတနိုင်ငံသို့ ရှမ်းပြည်နယ်ထွက်ထောပတ်သီးများတင်ပိုရောင်းချသွားဖို့ စီစဉ်ဆောင်ရွက်လျှက်ရှိတယ်လို့စီးပွားရေးဝန်ကြီးဌာန၊ မြန်မာကုန်သွယ်မှုမြှင့်တင်ရေးအဖွဲ့မှသိရပါတယ်။

#Local_News
Published 17 December 2025
#တရုတ်ပြည်သူ့သမ္မတနိုင်ငံ #ထောပတ်သီး
#YMG/SW #Yangon_Times

အာကာသပြတိုက် (ရန်ကုန်) ဖွင့်လှစ်ချိန်ကို ရုံးပိတ်ရက်တွေမှာအချိန်တိုးမြှင့်ဖွင့်လှစ်ထားတယ်လို့ သိရပါတယ်။

#Local_News
Published 17 December 2025
#အာကာသပြတိုက် #ရန်ကုန်
#YMG/NN #Yangon_Times

ဆန်အကြောင်းသိကောင်းစရာပြပွဲ ၂၀၂၅ ကို အခုလအတွင်း ရန်ကုန်မြို့မှာကျင်းပသွားမှာဖြစ်ပြီး ယင်းပြပွဲမှာအိမ်ရှင်မတွေကို Rice Ambassador တွေခန့်အပ်သွားမယ်လို့ မြန်မာနိုင်ငံဆန်စပါးအသင်းချုပ်က သိရပါတယ် ။

#Local_News
Published 17 December 2025
#ဆန် #Rice_Ambassador
#YMG/NN #Yangon_Times

Daily_News
Published 17 December 2025

၁။‌ ‎ဆန်အကြောင်းသိကောင်းစရာပြပွဲ ၂၀၂၅  ၌အိမ်ရှင်မများကို Rice Ambassador များခန့်အပ်မည်
‎
‎‎‎‎၂။ ‎အာကာသပြတိုက်(ရန်ကုန်)ဖွင့်လှစ်ချိန် ရုံးပိတ်ရက်များ၌ အချိန်တိုးမြှင့်ဖွင့်လှစ်ထား
‎
‎၃။‌‌‎ ‎‎‎‎‎‎‎တရုတ်နိုင်ငံသို့ ရှမ်းပြည်နယ်ထွက်ထောပတ်သီးများတင်ပို့မည်
‎
‎‎၄။‎ ‌‌‌‌‌‌‌‌‌‎လက်တွေ့တွင်အသုံးချနိုင်စွမ်းမြင့်မားသည့်ဉာဏ်ရည်တုစက်ရုပ်ပြိုင်ပွဲ
ရှန်ဟိုင်း၌ကျင်းပ... အစရှိတဲ့ သတင်းတွေကိုတင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#World_News
Published 17 December 2025

■ အမေရိကန်သို့ သွားလာခွင့် ကန့်သတ်ပိတ်ပင်တဲ့ နိုင်ငံစာရင်းအရေအတွက်ကို သမ္မတဒေါ်နယ်ထရမ့်က နှစ်ဆတိုးလိုက်ကာ စုစုပေါင်း ၃၉ နိုင်ငံအထိ ရှိလာပါတယ်။

■ ဇွန်လက အမေရိကန်သို့ လူဝင်မှုနဲ့ ခရီးသွားလာမှု အပြည့်အဝပိတ်ပင်တဲ့ ပထမဆုံး ၁၉ နိုင်ငံစာရင်းထဲမှာ အာဖဂန်၊ မြန်မာ၊ ဟေတီ၊ အီရန်၊ လစ်ဗျားစတဲ့ နိုင်ငံများအပါအဝင် ကျူးဘား၊ လာအို၊ ဗင်နီဇွဲလားတို့လို နိုင်ငံတွေအပေါ် တစ်စိတ်တစ်ပိုင်း ပိတ်ပင်ခဲ့ပါတယ်။

■ အင်္ဂါနေ့က အပြည့်အဝပိတ်ပင်တဲ့စာရင်းထဲသို့ ထပ်တိုးလိုက်တဲ့ ၇ နိုင်ငံထဲမှာ ဘာကီနာဖာဆို၊ မာလီ၊ နိုင်ဂျာ၊ လာအို၊ ဆီးရီးယားတို့ ပါဝင်လာကာ တစ်စိတ်တစ်ပိုင်းပိတ်ပင်နိုင်ငံစာရင်းထဲမှာတော့ အန်ဂိုလာ၊ ဘီနင်၊ ဒိုမီနီကာ၊ ဂမ်ဘီယာ၊ နိုင်ဂျီးရီးယား၊ ဆီနီဂေါ၊ ဇင်ဘာဘွေအပါအဝင် နောက်ထပ် ၁၅ နိုင်ငံ ထပ်တိုးလာပါတယ်။

■ တာ့ခ်မင်နစ္စတန်ကိုတော့ ကန့်သတ်မှုတွေ ဖြေလျှော့လိုက်ကာ ထိုနိုင်ငံဟာ အမေရိကန်နဲ့ အချက်အလက်မျှဝေရေးမှာ တိုးတက်လာတာကြောင့်လို့ ထရမ့်က ဆိုပါတယ်။

■ လူဝင်မှုနဲ့ သွားလာရေးကန့်သတ်မှုတွေထဲမှာ ခြွင်းချက်တွေတော့ရှိနေပြီး လာမယ့် ဖီဖာကမ္ဘာ့ဖလားပြိုင်ပွဲတွေမှာ ပါဝင်မယ့် အားကစားသမားတွေ၊ ဝန်ထမ်းတွေနဲ့ စာရင်းထဲကနိုင်ငံများမှ အမေရိကန်နိုင်ငံသား ဖြစ်ထားသူတွေ ပါဝင်ပါတယ်။

■ ထရမ့်က ပိတ်ပင်တဲ့နိုင်ငံတွေကို သတ်မှတ်ရာမှာ လုံလောက်စွာ လူဝင်မှုစစ်ဆေးခြင်းမရှိခြင်း၊ မှတ်တမ်းထိန်းသိမ်းမှု အားနည်းခြင်း၊ အကြမ်းဖက်ခြင်း၊ လိမ်လည်ခြင်း၊ အကျင့်ပျက်ခြင်းစတဲ့ ကိစ္စရပ်များကို ထည့်သွင်းစဉ်းစားပါတယ်။

■ အချို့သော ကာရစ်ဘီယံနိုင်ငံတွေက နေထိုင်ခွင့်မလိုအပ်ဘဲ နိုင်ငံသားဖြစ်ခွင့်ပေးအပ်တဲ့ သူတို့ရဲ့ပေါ်လစီတွေကြောင့် ပိတ်ပင်ခံရတာ ဖြစ်ပါတယ်။

■ ယခင်တုန်းက သွားလာခွင့်ပိတ်ပင်တာမျိုးတွေကို ဝေဖန်စွပ်စွဲခဲ့ကြပေမယ့် နိုင်ငံတော်လုံခြုံရေးအကြောင်းအရင်းအောက်မှာ ၂၀၁၈ က တရားရုံးချုပ်ကနေ ဆက်လက်ထိန်းထားခဲ့ပါတယ်။

Source: CBS News

#Local_News
Published 17 December 2025

▪️ ကချင်ပြည်နယ် မြစ်ကြီးနားမြို့ ၊ ရှမ်းပြည်နယ် ပအိုဝ့်ကိုယ်ပိုင်အုပ်ချုပ်ခွင့်ရဒေသ၊ ဆီဆိုင်မြို့၊နှင့်ဧရာဝတီတိုင်းဒေသကြီး၊ကျုံပျော်မြို့နယ်များ၌ ယမာန်နေ့ည ၈နာရီကျော် ဝန်းကျင် က မီးလောင်မှုများဖြစ်ပွားခဲ့ကြောင်း သိရသည်။

▪️ ဒီဇင်ဘာ ၁၆ ရက်နေ့၊ ၈နာရီ ၅ မိနစ်အချိန်ခန့်က ကချင်ပြည်နယ်၊ မြစ်ကြီးနားခရိုင်၊ မြစ်ကြီးနားမြို့၊ တပ်ကုန်းရပ်ကွက်၊ နယ်မြေ(၈)၊ ဆွမ်ပရာဘွမ်လမ်းတွင် မီးလောင်မှုဖြစ်ပွားခဲ့ကြောင်းသိရသည်။

▪️ အဆိုပါ သတင်းရရှိသဖြင့် မြစ်ကြီးနားမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ မီးသတ်ရေသယ်ယာဉ်(၂)စီး၊ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များဖြင့် ထွက်ခွာငြှိမ်းသတ်ခဲ့ရာ ၈နာရီ၂၀မိနစ် အချိန် တွင် မီးငြိမ်းပါသည်။

▪️ ထို့အတူ ဒီဇင်ဘာ ၁၆ရက်နေ့၊ ည ၈နာရီ ၃၄ မိနစ်အချိန်ခန့်က ရှမ်းပြည်နယ်၊ တောင်ကြီးခရိုင်၊ ပအိုဝ့်ကိုယ်ပိုင်အုပ်ချုပ်ခွင့်ရဒေသ၊ ဆီဆိုင်မြို့၊ သီရိရပ်ကွက်တွင် မီးလောင်မှုဖြစ်ပွားခဲ့ကြောင်းသိရသည်။

▪️ အဆိုပါ သတင်းရရှိသဖြင့် ဆီဆိုင်မြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ မီးသတ်ရေသယ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များဖြင့် ထွက်ခွာငြှိမ်းသတ်ခဲ့ရာ ည၈နာရီ ၅၅မိနစ် အချိန် မီးငြိမ်းခဲ့ကြောင်းသိရသည်။

▪️ ထို့အပြင် ဒီဇင်ဘာ၁၆ ရက်နေ့၊ ည၈နာရီ ၄၅မိနစ် အချိန်ခန့်ကလည်း ဧရာဝတီတိုင်းဒေသကြီး၊ ကျုံပျော်ခရိုင်၊ ကျုံပျော်မြို့နယ်၊ ပင်လုံရပ်ကွက်၊ မန်းကျောင်းလမ်းတွင် မီးလောင်မှုဖြစ်ပွားခဲကြောင်းသိရသည်။

▪️ အဆိုပါ သတင်းရရှိသဖြင့် ကျုံပျော်မြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ မီးသတ်ရေသယ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များဖြင့် ထွက်ခွာငြှိမ်းသတ်ခဲ့ရာ ၉နာရီအချိန်၌ မီးငြိမ်းခဲ့ကြောင်းသိရသည်။

#YMG/NN #Yangon_Times

#Local_News
Published 17 December 2025

▪️ မြဝတီမြို့အတွင်း အွန်လိုင်းလိမ်လည်လောင်းကစားမှုကျူးလွန်သူများ ထပ်မံဖမ်းမိခဲ့ကြောင်း သိရသည်။

▪️ ယနေ့တွင် အဆောက်အအုံ ၄၃ လုံး ထပ်မံစစ်ဆေးနိုင်ခဲ့ပြီး အဆိုပါအဆောက်အအုံများ အနက်မှ မြဝတီမြို့၊ အမှတ်(၃) ရပ်ကွက်၊ အင်ကြင်းလမ်းရှိ အဆောက်အအုံ ၁ လုံးအတွင်း၌ တရားမဝင်တရုတ်နိုင်ငံသား အမျိုးသား ၃ ဦးတို့အား ဖော်ထုတ်ဖမ်းဆီးရမိခဲ့ပြီး စုံစမ်းစစ်ဆေးမှုများပြီးဆုံးပါက ဥပဒေ၊ လုပ်ထုံးလုပ်နည်းများနှင့်အညီ သက်ဆိုင်ရာ နိုင်ငံများသို့ လွှဲပြောင်းပေးနိုင်ရေး ဆက်လက်ဆောင်ရွက်သွားမည်ဖြစ်ကြောင်း သိရသည်။

▪️ မြဝတီ-မဲထော်သလေး (KK Park) နယ်မြေအတွင်းရှိ အွန်လိုင်း လိမ်လည်လောင်းကစားမှုများ ကျူးလွန်ရာတွင် အသုံးပြုခဲ့သည့် အပိုင်း(၃) နယ်မြေ အတွင်းရှိ တရားမဝင် ၃ ထပ်အဆောက်အအုံ ၁ လုံး၊ ၂ ထပ်အဆောက်အအုံ ၁၁ လုံး၊ စုစုပေါင်း တရားမဝင်အဆောက်အအုံ ၁၂ လုံးကို ထပ်မံဖြိုချဖျက်ဆီးခဲ့သဖြင့် KK Park နယ်မြေအတွင်းရှိ တရားမဝင်အဆောက်အအုံ စုစုပေါင်း ၆၃၅ လုံး အနက် ၄၅၆ လုံးကို စနစ်တကျ ဖြိုချဖျက်ဆီးပြီးဖြစ်ကြောင်း သိရသည်။

▪️ ထို့ပြင် ကရင်ပြည်နယ်၊ မြဝတီမြို့နှင့် ပတ်ဝန်းကျင်ဒေသတစ်ဝိုက်ရှိ အဆောက် အအုံများ၌ တရားမဝင်ပြည်ပနိုင်ငံသားများ ဝင်ရောက်နေထိုင်ခြင်းနှင့် အွန်လိုင်းလိမ်လည် လောင်းကစားမှုများ လုပ်ကိုင်ဆောင်ရွက်ခြင်း မရှိစေရေးအတွက် လုံခြုံရေးတပ်ဖွဲ့ဝင်များ၊ အုပ်ချုပ်ရေးအဖွဲ့အစည်းများနှင့် ဒေသတွင်းတာဝန်ရှိသူများအပါအဝင် အဖွဲ့စုံပါဝင်သည့် ပူးပေါင်းအဖွဲ့ဖြင့် ဒီဇင်ဘာ ၈ ရက်မှ စတင်၍ ရှာဖွေရှင်းလင်းဆောင်ရွက်နေကြောင်း သိရသည်။

▪️ မြဝတီမြို့နယ်အတွင်းရှိ KK Park နယ်မြေနှင့် ရွှေကုက္ကိုလ်နယ်မြေတို့၌ အွန်လိုင်းလိမ်လည်လောင်းကစားမှုကျူးလွန်ရာတွင် အသုံးပြုသည့်ပစ္စည်းများအား ထပ်မံ၍အသုံးပြုနိုင်ခြင်းမရှိစေရန်အတွက်ယနေ့တွင်လည်း စနစ်တကျ မီးရှို့ဖျက်ဆီးခဲ့ကြောင်းသိရသည်။

#YMG/PP #Yangon_Times

#Local_News
Published 17 December 2025

▪️ စစ်ကိုင်းမြို့တွင် ငွေကျပ် ၁၅ ဘီလျံကျော်တန်ဖိုးရှိ ဘိန်းဖြူ ၅၇ ကီလိုကျော်နှင့် စိတ်ကြွရူးသွပ်ဆေးပြား ၅ သန်းကျော် ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က ထုတ်ပြန်လိုက်သည်။

▪️ လုံခြုံရေးတပ်ဖွဲ့ဝင်များပါဝင်သော ပူးပေါင်းအဖွဲ့က ဒီဇင်ဘာလ ၆ ရက်ညနေ ၄ နာရီတွင် စစ်ကိုင်းမြို့၊ ရွာထောင်(မီးရထား)ရပ်ကွက်၊ ဈေးလမ်းရှိ စိုးလွင်၏ နေအိမ်ကို သတင်းအရ ဝင်ရောက် ရှာဖွေရာ နေအိမ်မှ စိုးလွင်နှင့် ခင်ဆွေမြင့်တို့ ၂ ဦးအား ဘိန်းဖြူ ၁၈ ဒသမ ၃၁၅ ကီလိုနှင့်အတူ ဖမ်းဆီးရမိခဲ့ပြီး အဆိုပါနေအိမ်ခြံဝင်းအတွင်း ရပ်တန့်ထားသည့် HYUNDAI PORTER II ယာဉ်နှင့် အတူ မိုးမင်းစံနှင့် မျိုးသူရတို့ ၂ ဦးကို ဘိန်းဖြူ ၂၅ ဒသမ ၇၄ ကီလိုနှင့် စိတ်ကြွရူးသွပ်ဆေးပြား ၁၃ ဒသမ ၆၅ သိန်းအားလည်းကောင်း၊ အလားတူ TOWNACE LIGHT TRUCK ယာဉ်နှင့်အတူ ချစ်ကိုကိုနိုင်နှင့် ခင်မောင်ဇော်တို့ ၂ ဦးအား ဘိန်းဖြူ ၁၃ ဒသမ ၈၆ ကီလိုနှင့် စိတ်ကြွရူးသွပ် ဆေးပြား ၃၇ ဒသမ ၀၅ သိန်းအားလည်းကောင်း ဖမ်းဆီးရမိခဲ့ကြောင်း သိရသည်။

▪️ ယင်းဖြစ်စဉ်မှ စုစုပေါင်းဘိန်းဖြူ ၅၇ ဒသမ ၉၁၅ ကီလို (၎င်းဒေသတန်ဖိုးငွေကျပ် ၂ ဒသမ ၈၉၅၇၅ ဘီလျံ)နှင့် စိတ်ကြွရူးသွပ်ဆေးပြား ၅ ဒသမ ၇ သန်း(၎င်းဒေသတန်ဖိုးငွေကျပ် ၁၂ ဒသမ ၆၇၅၁ ဘီလျံ) တို့အား သိမ်းဆည်းရမိခဲ့သဖြင့် စုစုပေါင်း ၁၅ ဒသမ ၅၇ ဘီလျံတန်ဖိုးရှိ မူးယစ်ဆေးဝါးများကို ဖမ်းဆီးရမိခဲ့ခြင်းဖြစ်ကြောင်း သိရသည်။

▪️ ကွင်းဆက်စစ်ဆေးဖော်ထုတ်ချက်များအရ ဥတ္တရသီရိမြို့နယ်၊ ကျွဲရှင်းကျေးရွာနေ ဘုန်းမြတ်စံ (ခ)သားငယ်(ဖမ်းဆီးရန်ကျန်)နှင့် ချမ်းမြသာစည်မြို့နယ်နေ အောင်နိုင်(ခ)ဖက်တီး (ဖမ်းဆီးရန်ကျန်) တို့၏ အစီအမံဖြင့် ဥတ္တရသီရိမြို့နယ်၊ ဇဝနသိဒ္ဓိရပ်ကွက်နေ တာဝန်ခံသယ်ဆောင်သူ ထွန်းထွန်းနိုင် (ဖမ်းဆီးရန်ကျန်)သည် ဖမ်းဆီးရမိ မူးယစ်ဆေးဝါးများအား ရှမ်းပြည်နယ်မှ စစ်ကိုင်းတိုင်းဒေသကြီးသို့ တစ်ဆင့်သယ်ဆောင်ပြီး မန္တလေးမြို့သို့ ဆက်လက်သယ်ဆောင်ခြင်းဖြစ်ကြောင်း သိရှိရသဖြင့် ၎င်းတို့အား မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားရှိကြောင်း သိရသည်။

▪️ လက်ရှိတွင် ကွင်းဆက်ပြစ်မှုကျူးလွန်သူများအား ဆက်လက်ဖော်ထုတ်လျက်ရှိကြောင်းနှင့် ၎င်းတို့၏ မူးယစ် ဆေးဝါးသယ်ဆောင်ရောင်းဝယ်ရာမှရရှိသည့် ငွေကြေးအကျိုးအမြတ်များ၊ ပိုင်ဆိုင်မှုများကို ပြည်သူ့ဘဏ္ဍာအဖြစ် သိမ်းဆည်းနိုင်ရေးအတွက် ငွေကြေးခဝါချမှု တိုက်ဖျက်ရေးဥပဒေဖြင့် ဆက်လက်အရေးယူဆောင်ရွက်လျက်ရှိကြောင်း သိရသည်။

#YMG/PP #Yangon_Times