#Local_News
Published 28 April 2026

■ ဆော်ဒီအာရေဗျနိုင်ငံမှ မြန်မာနိုင်ငံ သို့ပြန်ရန်အခက်အခဲဖြစ်နေသည့် မြန်မာနိုင်ငံသူ(၈)ဦးကို ပြန်လည်ပို့ဆောင်ပေးခဲ့ကြောင်းသိရသည်။

■ မြန်မာသံရုံး၊ ရီရတ်ဒ်မြို့မှ ဆော်ဒီအာရေဗျနိုင်ငံတွင်ရောက်ရှိနေပြီး မြန်မာနိုင်ငံပြန်ရန် အခက်အခဲကြုံတွေ့ နေရသည့် မြန်မာနိုင်ငံသူ(၈)ဦးကို ဧပြီ ၂၅ ရက်က မြန်မာနိုင်ငံသို့ပြန်လည်ပို့ဆောင်ပေးခဲ့ခြင်းဖြစ်သည်။

■ အဆိုပါ မြန်မာနိုင်ငံသူ(၈)ဦးကိုမြန်မာသံရုံး၊ ရီရတ်ဒ်မြို့က ဆော်ဒီအာရေဗျနိုင်ငံ၊ လူဝင်မှုကြီးကြပ်ရေးဌာနနှင့်ညှိနှိုင်း၍ ရီရတ်ဒ်-ဒိုဟာ-ဗန်ကောက်-ရန်ကုန်လေကြောင်းခရီးစဉ်ဖြင့်ပြန်လည်ပို့ဆောင်ပေးခဲ့ခြင်းဖြစ်ကြောင်း သိရသည်။

#YMG/NN #Yangon_Times

#World_News
Published 28 April 2026

■ ပဋိပက္ခပြေလျော့ရေးကို ရည်ရွယ်ကာ အီရန်က သံတမန်ရေးရာ အဆိုပြုချက်အသစ်တစ်ခု အမေရိကန်ကို တင်ပြထားတယ်လို့ သိရပါတယ်။

■ ဒီအစီအစဉ်ထဲမှာ ဟော်မုဇ်ရေလက်ကြား ပြန်ဖွင့်ရေး၊ အီရန်အပေါ် အမေရိကန်ရဲ့ ရေကြောင်းပိတ်ဆို့မှု ပယ်ဖျက်ရေး၊ နောက်ပိုင်း နျူကလီးယားညှိနှိုင်းမှု ဖြေရှင်းရေးတို့ ပါဝင်ပါတယ်။

■ အီရန်နိုင်ငံခြားရေးဝန်ကြီး အက်ဘက်စ်အာရက်ချီက ဖြည့်စွက်ပြုပြင်ထားတဲ့ အဆိုပြုချက်ကို ဧပြီ ၂၆ ရက်နေ့မှာ ပါကစ္စတန်သို့ ပေးပို့ခဲ့ပါတယ်။

■ အီရန်ရဲ့ နောက်ဆုံးတင်ပြချက်ကို ပြန်လည်သုံးသပ်မယ့် အစည်းအဝေးပြုလုပ်ဖို့ ထရမ့်က မျှော်လင့်ထားပါတယ်။

■ အီရန်နိုင်ငံခြားရေးဝန်ကြီးက ရုရှားသမ္မတ ဗလာဒီမာပူတင်၊ နိုင်ငံခြားရေးဝန်ကြီး ဆာဂေးလက်ဗ်ရော့ဗ်တို့နဲ့ ဆွေးနွေးဖို့ ရုရှားသို့ ရောက်နေပါတယ်။

■ အမေရိကန် အိမ်ဖြူတော်ကတော့ အမေရိကန်ကသာ အသာစီးရထားပြီး ပြည်သူတွေဦးစားပေးရေးသာ ရရှိမယ့် သဘောတူညီချက်မျိုး ရယူမှာဖြစ်ကြောင်း၊ အီရန်ကို နျူကလီးယားလက်နက် ဘယ်တော့မှ ပိုင်ဆိုင်ခွင့်ပေးမှာ မဟုတ်ကြောင်း ပြောထားပါတယ်။

■ အီရန်က နျူကလီးယား အစီအစဉ်နဲ့ ပတ်သက်ပြီး ညှိနှိုင်းမှုတွေကို ပြင်ဆင်ဖော်ပြလာတာ ဖြစ်ပါတယ်။

■ ဒီမတိုင်ခင်အထိတော့ ထရမ့်က အီရန်ရဲ့နျူကလီးယား ညှိနှိုင်းတင်ပြချက်တွေကို ငြင်းပယ်နေခဲ့ပါတယ်။

■ ယခုနောက်ဆုံး အီရန်အဆိုပြချက်ဗျူဟာမှာတော့ ပင်လယ်ရေကြောင်းနဲ့ စီးပွားရေးပြဿနာများ ဦးစားပေးဖြေရှင်းဖို့ ကြိုးပမ်းလာပါတယ်။

■ ဒီထဲမှာ ဟော်မုဇ်ရေလက်ကြားထဲ သင်္ဘောများဖြတ်သန်းကြေး ကောက်ခံသွားဖို့ ပါဝင်ပါတယ်။

Source: Reuters

#World_Health
Published 28 April 2026

■ ၅-၃၅ ရာခိုင်နှုန်းသော လူတွေဟာ တုပ်ကွေးဗိုင်းရပ်စ်နဲ့ ထိတွေ့ဖူးပေမယ့် တုပ်ကွေးမခံစားရဘူးလို့ သိပ္ပံပညာရှင်တွေ ခန့်မှန်းထားပါတယ်။

■ လူနာတွေနဲ့ အမြဲတမ်း ထိတွေ့နေပေမယ့် ဘယ်တော့မှ တုပ်ကွေးလက္ခဏာ မဖြစ်ကြတဲ့ ကျန်းမာရေးလုပ်သား ၁၉ ဦးထံမှ နမူနာများကို ကြည့်ရှုခဲ့ကြပါတယ်။

■ ဒီဗိုင်းရပ်စ်ကို ခံနိုင်ရည်ရှိသူတွေရဲ့ တံတွေးနဲ့ နှာခေါင်းလမ်းကြောင်းတို့ထဲမှာ ဒါမီဆိုင်ဒင်လို့ခေါ်တဲ့ ပရိုတိန်းတစ်မျိုး တွေ့ရပါတယ်။

■ ဒါ့အပြင် ချွေးထဲမှာလည်း တွေ့ရပြီး ရောဂါပိုးဆန့်ကျင်နိုင်တဲ့ အစွမ်းသတ္တိရှိတာကို တွေ့ရပါတယ်။

■ ယခုပရိုတိန်းတွေ့ရှိခြင်းကနေ နှာခေါင်းဖျန်းဆေး၊ မျက်စဉ်းဆေးတို့လို ကာကွယ်ရေးနည်းလမ်းတွေ ဖြစ်လာနိုင်ပါတယ်။

■ ဒါမီဆိုင်ဒင်က တုပ်ကွေးဗိုင်းရပ်စ် ပိတ်ဆို့ရုံမက ဝက်သက်၊ အချို့သော အအေးမိဗိုင်းရပ်စ်တွေ၊ ဆေးယဉ်ပါးတုပ်ကွေးမျိုးနွယ်တို့ကိုလည်း ကာကွယ်နိုင်ပါတယ်။

■ တစ်ပတ်ကို ပြင်းထန်တဲ့လေ့ကျင့်ခန်း ၁၅-၂၀ မိနစ်ခန့် ပြုလုပ်ခြင်းဖြင့် နှလုံးရောဂါ၊ ကျောက်ကပ်ရောဂါ၊ ဆီးချို၊ ဒီမန်ရှာတို့ ဖြစ်နိုင်ခြေ လျော့နည်းစေတာကို လေ့လာတွေ့ရှိထားပါတယ်။

■ ပြင်းထန်တဲ့ လှုပ်ရှားမှုဆိုတာဟာ အမြန်ဆုံးနှလုံးခုန်နှုန်းရဲ့ ၇၀-၈၅ ရာခိုင်နှုန်းအထိ ရောက်တာကို ဆိုလိုပြီး လှေကားမြန်မြန်တက်ခြင်း၊ အလေးအပင်သယ်ခြင်းတို့ ပါဝင်ပါတယ်။

■ သာမန်လှုပ်ရှားမှုမျိုး ကြာကြာလုပ်တာထက်စာရင် ပြင်းထန်တဲ့လှုပ်ရှားမှု တစ်ခဏပြုလုပ်ခြင်းက ပိုပြီး အကျိုးရှိစေနိုင်တယ်လို့ ယူဆရပြီး ကိုယ်ခံအားစနစ် ကောင်းမွန်စေကာ တုပ်ကွေးလက္ခဏာလိုမျိုး ရောဂါတွေကို ကာကွယ်နိုင်မှာ ဖြစ်ပါတယ်။

Source: NPR

#World_Health
Published 27 April 2026

■ ရာသီဥတုအပူချိန် မြင့်တက်လာတဲ့အချိန်မှာ နှာခေါင်းသွေးလျှံခြင်းပြဿနာ ဖြစ်လာတတ်ကြပါတယ်။

■ အပူချိန်၊ ခြောက်သွေ့သောလေ၊ ရေဓာတ်ခန်းခြောက်ခြင်းတို့ ပေါင်းစပ်သွားတဲ့အခါ နှာခေါင်းအတွင်းက နူးညံ့တဲ့ သွေးကြောလေးတွေ ပေါက်လွယ်နိုင်ပါတယ်။

■ မကြာခဏဆိုသလို သွေးအများအပြား လျှံတတ်တယ်ဆိုရင်တော့ နောက်ကွယ်မှာ ကျန်းမာရေးပြဿနာတွေ ရှိနိုင်တဲ့သဘောပါ။

■ နှာခေါင်းအတွင်းနံရံတွေ ခြောက်သွေ့တဲ့အခါ သွေးကြောတွေ ထိခိုက်ပေါက်လွယ်တတ်တယ်လို့ CK ဘာလာဆေးရုံမှ နှားနှာခေါင်းလည်ချောင်းဆရာဝန် ဒေါက်တာ ဒိတီဆင်ဟာက ပြောပါတယ်။

■ ခြောက်သွေ့သောလေနဲ့ အပူထိတွေ့မှု၊ ရေဓာတ်ခန်းခြောက်ခြင်း၊ ဓာတ်မတည့်ခြင်းနဲ့ နှာခေါင်းတွင်း ရောဂါပိုးဝင်ခြင်း၊ မကြာခဏ နှာခေါင်းနှိုက်ခြင်း၊ ပြင်းပြင်းရှူသွင်းရှူထုတ်လုပ်ခြင်းတို့ကြောင့် ဖြစ်နိုင်ပါတယ်။

■ ယခုလို နွေရာသီမှာ ကလေးတွေမှာလည်း နှာခေါင်းသွေးယိုရတဲ့ အကြောင်းအရင်းတွေက နှာခေါင်းတွင်းနံရံများ အထိမခံခြင်း၊ နှာခေါင်းနှိုက်တတ်ခြင်း၊ ရေဓာတ်ခန်းခြောက်လွယ်ခြင်း၊ အမှုန်အမွှား အပူတို့နဲ့ ထိတွေ့ခြင်းတို့ ဖြစ်နိုင်ပါတယ်။

■ မကြာခဏ အများအပြား သွေးလျှံတာမျိုးအပြင် ပင်ပန်းနွမ်းနယ်ခြင်း၊ ကိုယ်အလေးချိန်ကျခြင်းတို့ပါ ဖြစ်လာရင်တော့ ဆေးကုသတိုင်ပင်မှု ခံယူသင့်ပါတယ်။

■ ရေဓာတ်ပြည့်ဝအောင်နေခြင်း၊ နှာခေါင်းဆေးဖျန်းခြင်း၊ နှာခေါင်းအတွင်း ပက်ထရိုလီယံဂျယ်လီ အသုံးပြုခြင်း၊ နှာခေါင်းမနှိုက်အောင်နေခြင်း၊ အိမ်တွင်း စိုစွတ်မှုပေးခြင်းတို့ဖြင့် ကာကွယ်နိုင်ပါတယ်။

■ ချက်ချင်းအရေးပေါ်ကုသလိုရင်တော့ မတ်မတ်ထိုင်ပြီး ၁၀ မိနစ်ခန့် နှာခေါင်းပိတ်ထားခြင်း၊ ခေါင်းကိုအနောက်သို့ စောင်းထားခြင်းတို့ ပြုလုပ်နိုင်ပါတယ်။

Source: India Today

အီရန်တော်လှန်ရေးရင်ပြင်မှာ အင်္ဂါနေ့ညနေက ခိုရမ်ရှာ-၄ တာဝေးပစ်ဒုံးကျည်ကို ထုတ်ဖော်ပြသခဲ့တယ်လို ပြည်တွင်းမီဒီယာမှာ ဖော်ပြထားပါတယ်။

#World_Military
Published 27 April 2026
#အီရန် #အမေရိကန်
#YMG #Yangon_Times #Yangon_Media_Group

တနင်္သာရီတိုင်းဒေသကြီးအတွင်းရှိ ထားဝယ်လေဆိပ်နဲ့ မြိတ်လေဆိပ် Terminal တိုကို ၁ နှစ်လျှင် ခရီးသည် ၁ သန်းခွဲအထိ ဝင်ထွက်အသုံးပြုနိုင်တဲ့ လေဆိပ် ၂ ထပ်အဆောက်အအုံလုပ်ငန်းအပြင် လေယာဉ်ရပ်နားရန် နေရာတိုးချဲ့ခြင်းလုပ်ငန်းများကို ဆက်လက်ဆောင်ရွက်သွားမယ်လို့ တိုင်းဒေသကြီးဝန်ကြီးချုပ် ဦးဇော်နိုင်ဦးကပြောကြားပါတယ်။

#Local_News
Published 27 April 2026
#ထားဝယ် #မြိတ်လေဆိပ်
#YMG/NN #Yangon_Times

နိုင်ငံတော်သမ္မတရဲ့လမ်းညွှန်ချက်အရ ရက် ၁၀၀ အတွင်း ဆောင်ရွက်ရမယ့် Smart School နဲ့ Football For School Programကို တိုင်းဒေသကြီးနဲ့ပြည်နယ်ငါးခုမှာအကောင်အထည်ဖော်ဆောင်ရွက်သွားမယ်လို့ အားကစားရေးရာဝန်ကြီးဌာနမှ သိရပါတယ်။

#Local_News
Published 27 April 2026
#Smart_School #Football_For_School_Program
#YMG/SW #Yangon_Times

မီးလေ-ာင်မှုဖြစ်ပွားခဲ့တဲ့ ဧရာဝတီတိုင်းဒေသကြီး မအူပင်ခရိုင်၊ ဓနုဖြူမြို့ရှိ
ဓနုဖြူမြို့မဈေးနေရာမှာ ဈေးသစ်တည်ဆောက်ပေးသွားမယ်လို့ တိုင်းဒေသကြီးအစိုးရအဖွဲ့က သိရပါတယ်။

#Local_News
Published 27 April 2026
#ဓနုဖြူမြို့မဈေး
#YMG/NN #Yangon_Times

#Daily_News
Published 27 April 2026

၁။‌ ထားဝယ်နှင့် မြိတ်လေဆိပ်များကို အဆင့်မြှင့်တင်တိုးချဲ့ခြင်းလုပ်ငန်းများဆောင်ရွက်သွားမည်

‌‎၂။ ‌‌‌‌Smart School နှင့် Football For School Programကိုတိုင်းဒေသကြီးနှင့်ပြည်နယ်ငါးခု၌အကောင်အထည်ဖော်မည်

‎၃။‌‌‎ ဓနုဖြူမြို့မဈေးကို ဈေးသစ်တည်ဆောက်ပေးသွားမည်

၄။‎ ‌‌‌‌‌‌‌‌‌အမေရိကန်နှင့်ညှိနှိင်းဆွေးနွေးမှုမသေချာချိန်၌ အီရန်က တာဝေးပစ်ဒုံးကျည်အသစ်ကိုထုတ်ပြ... အစရှိတဲ့ သတင်းတွေကိုတင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

ဆဋ္ဌသင်္ဂါယနာတင်အောင်ပွဲ နှစ် (၇၀) ပြည့် အထိမ်းအမှတ်အဖြစ် သာသနာရေးဝန်ကြီးဌာနမှ အတည်ပြုထားတဲ့ ၂၀၀ ကျပ်တန် အထူးထုတ် စာပို့တံဆိပ်ခေါင်းသစ် (၇) မျိုးကိုထုတ်ဝေမယ်လို့မြန်မာ့စာတိုက်လုပ်ငန်းမှ သိရပါတယ်။

#Local_News
Published 27 April 2026
#ဆဋ္ဌသင်္ဂါယနာတင်အောင်ပွဲ #စာပို့တံဆိပ်ခေါင်းသစ်
#YMG/SW #Yangon_Times

#Local_News
Published 27 April 2026

■ တောင်ငူမြို့ရှိ သုတေသနပြု တူးဖော်ရာမှတွေ့ရှိထားသော အုတ်စီအုတ်ရိုးများ၊ အုတ်ကြမ်းခင်းများ၊ အုတ်ကြွပ်မိုးနှင့် သံမယ်နများကို စနစ်တကျထိန်းသိမ်းထားကြောင်းဟိုတယ်၊ ခရီးသွားလာရေးနှင့်ယဉ်ကျေးမှုဝန်ကြီးဌာနမှ သိရသည်။

■ ဟိုတယ်၊ ခရီးသွားလာရေးနှင့်ယဉ်ကျေးမှုဝန်ကြီးဌာန ဒုတိယဝန်ကြီး ဦးအေးထွန်းသည် ယမာန်နေ့နံနက်ပိုင်းတွင် တောင်ငူမြို့ရှိ ကေတုမတီမြို့ဟောင်း ဖော်ထုတ်ထိန်းသိမ်းထားရှိမှု အခြေအနေများကို ကြည့်ရှုစစ်ဆေးသည်။

■ ဦးစွာ ဒုတိယဝန်ကြီးသည် တောင်ငူမြို့ မြို့လေးခံတပ်နှင့် ယိုးဒယားပေါက် ဖော်ထုတ်ထိန်းသိမ်းထားရှိမှု၊ ကေတုမတီမြို့ဟောင်း မြောက်ဘက်မြို့ရိုးရှိ ရန်အောင်မြင်တံခါးမှ အနောက်မြောက်ထောင့်နေရာ၊ တောင်ငူခေတ် မြို့ပြယဉ်ကျေးမှုအမွေအနှစ်များဖြစ်သော မြို့ရိုး၊ တံခါး ပြအိုး၊ ရေကျုံးနှင့် နွံကျုံးဖော်ထုတ်ထိန်းသိမ်းထားရှိမှုများကို ကြည့်ရှုစစ်ဆေးသည်။

■ ထို့နောက် နန်းတော်ရာ၊ ပုတ်တလုတ်ကန်နေရာတို့ကို ကြည့်ရှုပြီး သုတေသနပြုတူးဖော်ရာမှတွေ့ရှိထားသော အုတ်စီအုတ်ရိုးများ၊ အုတ်ကြမ်းခင်းများ၊ အုတ်ကြွပ်မိုးနှင့် သံမယ်နများကို စနစ်တကျ ထိန်းသိမ်းသွားရန်မှာကြားသည်။

■ ယင်းနောက် ကေတုမတီမြို့ဟောင်း အနောက်ဘက်မြို့ရိုးရှိ စင်တံခါးနှင့် သစ်ရင်းတံခါး ဖော်ထုတ်ထိန်းသိမ်းထားရှိမှု၊ ရေပို့ကုန်းရွာရှိ အုတ်ကျောင်း၊ ကြာနီကန်ကျောင်းတိုက်အတွင်းရှိ ပရက္ကမသိမ် ထိန်းသိမ်းထားရှိမှုအခြေအနေများကို ကြည့်ရှုစစ်ဆေးရာ ဒုတိယဝန်ကြီးက ပဲခူးတိုင်းဒေသကြီး အစိုးရအဖွဲ့၏ ဘဏ္ဍာရန်ပုံငွေခွဲဝေချထားပေးမှုဖြင့် ဖော်ထုတ်ဆောင်ရွက်ခဲ့သော ယဉ်ကျေးမှုအမွေအနှစ်များ ဆက်လက်ဖော်ထုတ် ထိန်းသိမ်းကာကွယ်စောင့်ရှောက်ရန်၊ အမှိုက်ကင်းစင်သော သဘာဝပတ်ဝန်းကျင်ထိန်းသိမ်းရေးလုပ်ငန်းများ တစ်ပါတည်းဆောင်ရွက်သွားရန်နှင့် ယဉ်ကျေးမှုအမွေအနှစ်များကို ခရီးသွားလုပ်ငန်း ဖွံ့ဖြိုးတိုးတက်ရေးအတွက် ဆက်စပ်ဆောင်ရွက်နိုင်ရေး သက်ဆိုင်ရာဌာနများ အဖွဲ့အစည်းများနှင့် ပူးပေါင်းဆောင်ရွက်သွားရန် မှာကြားသည်။

■ ညနေပိုင်းတွင် ဒုတိယဝန်ကြီးသည် ဟံသာဝတီမြို့ဟောင်း အနောက်ဘက်မြို့ရိုးရှိ သိန္နီတံခါးဝဲယာ မြို့ရိုးနှင့်ကျုံး ဖော်ထုတ်ထိန်းသိမ်းထားရှိမှု၊ အရှေ့ဘက်မြို့ရိုးရှိ အင်းဝတံခါးပေါက်၏ ဝဲဘက်ယာဘက်တစ်လျှောက်ရှိ မြို့ရိုးနှင့်ကျုံးဖော်ထုတ်ထိန်းသိမ်းထားရှိမှု၊ ယင်းနေရာများရှိ မြို့ရိုးနှင့် ရေကျုံးကြားနေရာများတွင် ပြည်သူများ အနားယူအပန်းဖြေနိုင်ရန်၊ ကျန်းမာရေးလေ့ကျင့်ခန်းများ ဆောင်ရွက်နိုင်ရန်နှင့် ပြည်သူများတွေ့မြင်သိရှိပြီး ဂုဏ်ယူမြတ်နိုးတန်ဖိုးထားနိုင်စေရေးအတွက် ဖော်ထုတ်ထိန်းသိမ်းထားသော ဟံသာဝတီခေတ်၊ တောင်ငူခေတ် ယဉ်ကျေးမှုအမွေအနှစ်များနှင့် အပန်းဖြေနေရာများ၊ မြောက်ဘက်မြို့ရိုးရှိ ယိုးဒယားတံခါးပေါက်၊ တောင်ဘက်မြို့ရိုးရှိ ဇင်းမယ်တံခါးပေါက်နှင့် မိုးကောင်းတံခါးပေါက်များ ဖော်ထုတ်ထိန်းသိမ်းထားရှိမှုတို့ကို ကြည့်ရှုစစ်ဆေးပြီး ပဲခူး ဟံသာဝတီမြို့ဟောင်းရှိ ယဉ်ကျေးမှုအမွေအနှစ်များ ဖော်ထုတ်ထိန်းသိမ်းရေးကို ပဲခူးတိုင်းဒေသကြီးအစိုးရအဖွဲ့၏ ဘဏ္ဍာရန်ပုံငွေခွဲဝေချထားပေးမှုဖြင့် ဆောင်ရွက်ခဲ့ခြင်းဖြစ်ပြီး ဖော်ထုတ်ထိန်းသိမ်းဆောင်ရွက်ခဲ့သော ယဉ်ကျေးမှုအမွေအနှစ်များ ရေရှည်တည်တံ့ခိုင်မြဲစေရန်၊ အမှိုက်ကင်းစင်သော သဘာဝပတ်ဝန်းကျင်ထိန်းသိမ်းရေးလုပ်ငန်းများ တစ်ပါတည်းဆောင်ရွက်သွားရန်နှင့် ယဉ်ကျေးမှုအခြေပြု ခရီးသွားလုပ်ငန်းများဖွံ့ဖြိုးတိုးတက်အောင် သက်ဆိုင်ရာဌာနများ၊ အဖွဲ့အစည်းများနှင့် ပူးပေါင်းဆောင်ရွက်သွားရန် မှာကြားသည်။

■ ပဲခူးမြို့တွင် ဘုရင်မကြီး ရှင်စောပု၊ ဓမ္မစေတီမင်းကြီးနန်းစိုက်ခဲ့ရာ ဟံသာဝတီနန်းမြို့တော်နှင့် ဘုရင့်နောင်မင်းတရားကြီး (ခရစ်နှစ် ၁၅၅၁-၁၅၈၁) က ၁၅၅၃ ခုနှစ်တွင် အသစ်တစ်ဖန် ပြန်လည်တည်ထောင်ခဲ့သည့် ကမ္ဘောဇသာဒီနန်းမြို့တော်တို့ တည်ရှိပြီး ဘုရင့်နောင်မင်းတရားကြီး လက်ထက်တွင် အင်အားကြီးသည့် တောင်ငူအင်ပါယာ(ခေါ်)လက်နက် နိုင်ငံတော်ကို စည်းရုံးထူထောင်နိုင်ခဲ့ကာ ကမ္ဘောဇသာဒီသည် ဒုတိယမြန်မာနိုင်ငံတော်၏ အရေးပါသည့် အုပ်ချုပ်မှုဗဟိုမြို့တော်သမိုင်းဝင်နေရာဖြစ်ခဲ့ကြောင်း သိရသည်။

#YMG/NN #Yangon_Times

#Local_News
Published 27 April 2026

■ ရန်ကုန် - မန္တလေး အမြန်လမ်းရှိ ဒုဋ္ဌဝတီတံတား အသစ်ပြန်လည်တည်ဆောက်ခြင်းနှင့် လမ်း၊ တံတားများ ပြုပြင်ဆောင်ရွက်နေသည့်အခြေအနေများကိုဆောက်လုပ်ရေးဝန်ကြီးဌာန ပြည်ထောင်စုဝန်ကြီးမှ ကြည့်ရှုစစ်ဆေးခဲ့ကြောင်း သိရသည်။

■ ဆောက်လုပ်ရေးဝန်ကြီးဌာန ပြည်ထောင်စုဝန်ကြီး ဦးမျိုးသန့်သည် မန္တလေးတိုင်းဒေသကြီးဝန်ကြီးချုပ် ဦးမျိုးအောင်၊ တိုင်းဒေသကြီးဝန်ကြီးများနှင့်အတူ ယမာန်နေ့နံနက်ပိုင်းတွင် ရန်ကုန် - မန္တလေးအမြန်လမ်း၏ မိုင်တိုင်အမှတ် ၃၆၆/၃ မှ ၃၆၁/၃ အကြားရှိ မန္တလေးငလျင်ကြီးကြောင့် ပျက်စီးသွားသော ကွန်ကရစ်လမ်းများ ပြန်လည်ပြုပြင်ပြီးစီး၍ ကတ္တရာကွန်ကရစ်(AC)ခင်းခြင်းလုပ်ငန်းများ ဆောင်ရွက်ပြီးစီးနေ မှုအခြေအနေ၊ လမ်းဝဲ/ယာမြေ သားအမာခံရရှိရေး ဆောင်ရွက်ပြီးစီးသည့် အခြေအနေတို့ကိုကြည့်ရှုစစ်ဆေးသည်။

■ ထို့နောက် ပြည်ထောင်စုဝန်ကြီးနှင့် အဖွဲ့သည် မိုင်တိုင်အမှတ်(၃၆၀/၀)ရှိ မြစ်ဆွတ်ချောင်း တံတားသို့ရောက်ရှိရာ တာဝန်ခံအင်ဂျင်နီယာကလုပ်ငန်းများ ဆောင်ရွက်နေမှုအခြေအနေများကို ရှင်းလင်းတင်ပြပြီး ပြည်ထောင်စုဝန်ကြီးနှင့် တိုင်းဒေသကြီးဝန်ကြီးချုပ်တို့က ပြုပြင်ခြင်းလုပ်ငန်းများ ဆောလျင်စွာပြီးစီးစေရေးအတွက် လုပ်ငန်းလိုအပ်ချက်များကို မေးမြန်းဆွေးနွေး၍ လုပ်ငန်းခွင်အတွင်း ကြည့်ရှုစစ်ဆေးကာ လိုအပ်သည်များကိုမှာကြားသည်။

■ ယင်းနောက် မိုင်တိုင်အမှတ် (၃၅၈/၁)ရှိ ဒုဋ္ဌဝတီတံတား (ပေ ၁၀၀၀) အသစ်ပြန်လည်တည် ဆောက်နေသည့် လုပ်ငန်းခွင်သို့ရောက်ရှိပြီး ပြည်ထောင်စုဝန်ကြီးနှင့် တိုင်းဒေသကြီးဝန်ကြီးချုပ်တို့က တံတားဦးအပြည်ပြည်ဆိုင်ရာ လေဆိပ်မှ မန္တလေးမြို့သို့ တိုက်ရိုက်သွားလာနိုင်ရန်အတွက် ဒုဋ္ဌဝတီ တံတားတည်ဆောက်ပြီးစီးရန်လိုအပ်ပါကြောင်း၊ ငလျင်ဒဏ်ကြောင့် တံတားပြိုကျပျက်စီး၍ လမ်းပန်းဆက်သွယ်မှု ပြတ်တောက်နေသဖြင့် ခရီးသွားပြည်သူများ တံတားဦး - ပလိပ်လမ်းမှ တစ်ဆင့်ပတ်၍ မန္တလေးမြို့သို့ သွားလာနေရသောကြောင့် လေးလမ်းသွား တံတားဆောင်ရွက်နေခြင်းတွင် အပြန်လမ်းဘက်မှ နှစ်လမ်းသွားတံတားကို ၂၀၂၆ ခုနှစ် ကုန်မတိုင်မီ ပြီးစီးအောင်တွန်းအားပေးဆောင်ရွက်၍ လမ်းပန်းဆက်သွယ်မှုရရှိအောင် အလေးထားဆောင်ရွက်ရမည်ဖြစ်ပါကြောင်း၊ တံတားတည်ရှိသည့် နေရာသည် ပြင်းထန်သည့် လှုပ်ခါမှုကြောင့် အစိုင်အခဲမှ ရွှံ့ညွန်ကဲ့သို့ ဂုဏ်သတ္တိပြောင်းလဲခြင်းဖြစ်စဉ် (lique- faction) ဖြစ်နိုင်ခြေများသော မြေအမျိုးအစားဖြစ်သောကြောင့် လိုအပ်သည့် တွက်ချက်မှုများ လိုက်နာဆောင်ရွက်ရန် လိုအပ်ပါကြောင်း၊ တံတားပြီးစီးသည်နှင့် တစ်ပြိုင်တည်း ရန်ကုန်မှ မန္တလေးသို့ အမြန်လမ်းအတိုင်း လွယ်ကူချောမွေ့စွာသွားလာနိုင်ရန်အတွက် လမ်းတစ်လျှောက်ရှိ ပြုပြင်ထိန်းသိမ်းခြင်း လုပ်ငန်းများကိုလည်း ဟန်ချက်ညီစွာပြီးစီးစေရေး လမ်းပိုင်းအလိုက် တာဝန်ခံများနှင့် ညွှန်ကြားရေးမှူးချုပ်တို့က စဉ်ဆက်မပြတ် ကြပ်မတ်ဆောင်ရွက်သွားရန်လိုအပ်ပါကြောင်း မှာကြားကာလုပ်ငန်းခွင်အတွင်း အသေးစိတ်ကြည့်ရှုစစ်ဆေးသည်။

■ ထို့နောက် ပြည်ထောင်စုဝန်ကြီးနှင့်အဖွဲ့သည် ရန်ကုန်-မန္တလေး ပြည်ထောင်စုလမ်းမကြီး (လမ်းဟောင်း) မိုင်တိုင်အမှတ်(၃၅၅/၀)ရှိ ယုဇနတံတားတည်ဆောက်ရေးလုပ်ငန်းခွင်သို့ရောက်ရှိပြီး တာဝန်ရှိသူများ၏ တင်ပြချက်များအပေါ် အသေးစိတ်ဆွေးနွေးမေးမြန်းကာ လုပ်ငန်းခွင်အတွင်း လိုက်လံစစ်ဆေးပြီး လုပ်ငန်းလိုအပ်ချက်များကို တာဝန်ရှိသူများအား မှာကြားသည်။ ယခုတည်ဆောက်နေသော ယုဇနတံတားသည် အရှည်ပေ ၂၂၀ ရှိပြီး အကျယ် ၂၇ ပေရှိသော နှစ်လမ်းသွားတံတားဖြစ်၍ ၂၀၂၅ ခုနှစ် ဧပြီလတွင် စတင်တည် ဆောက်ခဲ့ပြီး ၂၀၂၆ ခုနှစ် ဇူလိုင်လတွင် ပြီးစီးစေရေး တွန်းအားပေးဆောင်ရွက်လျက်ရှိကြောင်း သိရသည်။

■ ဆက်လက်၍ ရန်ကုန်-မန္တလေး ပြည်ထောင်စုလမ်းမကြီး (လမ်းဟောင်း)အတိုင်း မော်တော်ယာဉ်များဖြင့် ဆက်လက်ထွက်ခွာလာကြရာ လမ်းတစ်လျှောက်တွင် အမာခံလမ်းပခုံးများ ဆောင်ရွက် ပြီးစီးသည့်အခြေအနေ၊ လမ်းအင်္ဂါရပ်နှင့်ကိုက်ညီစေရေး ပြုပြင်ထိန်းသိမ်းဆောင်ရွက်နေသည့် အခြေအနေတို့ကို ကြည့်ရှုစစ်ဆေးခဲ့ကြောင်း သိရသည်။

#YMG/NN #Yangon_Times