ပြည်တွင်းပြည်ပခရီးသွား‌တွေကို ဆွဲဆောင်နိုင်ဖို့ အင်းသားရိုးရာလှေလှော်ပြိုင်ပွဲ‌တွေကို အခုလနောက်ဆုံးပတ်ကစတင်ပြီး ကျင်းပသွားမယ်လို့ သိရပါတယ်။
#Local_News
Published 27 December 2024
#အင်းသားရိုးရာလှေလှော်ပြိုင်ပွဲ #ပြည်တွင်းပြည်ပခရီးသွား‌
#YMG/SW #Yangon_Times

ဓာတ်ဆီတစ်လီတာ ကျပ်၁၀၀နဲ့ စက်သုံးဆီအားလုံးဈေးကျဆင်းလာတယ်လို့  စက်သုံးဆီတင်သွင်း သိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီရဲ့ ရန်ကုန် ဈေးကွက်အတွက်ဒီကနေ့ ထုတ်ပြန်ချက်အရ သိရပါတယ်။
#Local_News
Published 27 December 2024
#ဓာတ်ဆီဈေးကျ #စက်သုံးဆီ
#YMG/NN #Yangon_Times

#Local_News
Published 27 December 2024

▪️ တရုတ်နိုင်ငံ တဲဟုန်ပြည်နယ်ခွဲသို့ MoU စနစ်ဖြင့် မြန်မာအလုပ်သမားများစေလွှတ်နိုင်ရေးအတွက် ပြည်ထောင်စုဝန်ကြီးဦးမြင့်နောင်နှင့် တရုတ်နိုင်ငံ၊ တဲဟုန်ခရိုင်ပြည်သူ့အစိုးရ ယူနန်ပြည်နယ် ဒု-အုပ်ချုပ်ရေးမှူး Mr. Liu Yipeng တို့ယမန်နေ့က နေပြည်တော်တွင် တွေ့ဆုံဆွေးနွေးခဲ့ကြောင်း သိရသည်။

▪️ ပူးပေါင်းဆောင်ရွက်ရေး ဆွေးနွေးရာတွင် မြန်မာအလုပ်သမားများအနေဖြင့် နှစ်နိုင်ငံနယ်စပ် ဝင်/ထွက်ပေါက်များမှတစ်ဆင့် တရားဝင်နေထိုင်အလုပ်လုပ်ကိုင်ရေး၊ တရုတ်နိုင်ငံအလုပ်ရှင်များအပေါ် ကြပ်မတ်ဆောင်ရွက်ရမည့်ကိစ္စများ၊ ရာဇဝတ်မှုဆိုင်ရာကိစ္စရပ်များနှင့် အခြားမလိုလားအပ်သည့် အခြေအနေများမဖြစ်ပေါ်စေရေး MoU စနစ်ဖြင့် မြန်မာအလုပ်သမားစေလွှတ်နိုင်ရန် တရုတ်နိုင်ငံနှင့် ဆက်လက်ပူးပေါင်းဆောင်ရွက်မည့်ကိစ္စများအပြင် တဲဟုန်ပြည်နယ်ခွဲ အစိုးရအဖွဲ့အနေဖြင့် MoU စနစ်ဖြင့် တရားဝင်အလုပ်လုပ်ကိုင်သည့် မြန်မာအလုပ်သမားများနှင့် တရားမဝင်ရောက်ရှိ လုပ်ကိုင်နေသော မြန်မာအလုပ်သမားများအတွက် အလုပ်သမားအခွင့်အရေးပြည့်ဝစွာရရှိနိုင်ရေး ကူညီကာကွယ်စောင့်ရှောက်ပေးနိုင်ရန်နှင့် နှစ်နိုင်ငံနယ်စပ်ဖြတ်ကျော် အလုပ်သမားပူးပေါင်းဆောင်ရွက်မှုများ ချစ်ကြည်ရင်းနှီးစွာဆောင်ရွက်နိုင်ရန် ဆက်လက်ပူးပေါင်းဆောင်ရွက်မည့်ကိစ္စများကိုလည်းဆွေးနွေးခဲ့ကြ‌ကြောင်း သိရသည်။

▪️ မြန်မာအလုပ်သမားများကို MoU စနစ်ဖြင့် တရားဝင်စေလွှတ်နိုင်‌ေရး မြန်မာအစိုးရနှင့် တဲဟုန်ပြည်နယ်ခွဲအစိုးရတို့ အလုပ်သမားရေးရာပူးပေါင်းဆောင်ရွက်မည့် နားလည်မှုစာချွန်လွှာ(MoU)ကို ယခုနှစ်ဇန်နဝါရီ ၁၂ ရက်က တရုတ်နိုင်ငံ၊ မန်စီမြို့တွင် လက်မှတ်ရေးထိုးခဲ့ခြင်းဖြစ်‌ကြောင်း သိရသည်။

#YMG/SW #Yangon_Times

လာမယ့်၂၀၂၅ ခုနှစ် ဇန်နဝါရီလမှ စတင်ကာ ကလေးငယ်တွေကို ကျောင်းတွင်း အဟာရကျွေးမွေးခြင်းအစီအစဥ်စတင်သွားမယ်လို့ သိရပါတယ်။
#Local_News
Published 27 December 2024
#အာဟာရတိုက်ကျွေး #ကျောင်းတွင်း
#YMG/SW #Yangon_Times

#Local_News
Published 27 December 2024

▪️ Yangon Pet Fashion Show 2025 ကို ပုံစံနှစ်မျိုးဖြင့် နှစ်ရက် ကျင်းပသွားမည်ဖြစ်ကြောင်း သိရသည်။

▪️ အဆိုပါ Yangon Pet Fashion Show 2025 ကို ဇန်နဝါရီလ ၂၅နှင့်၂၆ရက်များတွင် ကျင်းပမည့် Yangon Pet Expo တွင် အထူးအစီအစဉ်အဖြစ် ထည့်သွင်းကျင်းပမည်ဖြစ်ကြောင်း သိရသည်။

▪️ ဖက်ရှင်ရှိုးပထမနေ့ ဇန်နဝါရီလ၂၅ရက်တွင် Designers' Day အမည်ဖြင့် ကျင်းပမည်ဖြစ်ပြီး အိမ်မွေးကြောင်များနှင့် ခွေးများအတွက် ကိုယ်တိုင်ချုပ်ထားသည့် pet clothes များကို ဝတ်ဆင်ပေး၍ ယှဉ်ပြိုင်ရမည်ဖြစ်ကြောင်း၊ ဒုတိယနေ့ဇန်နဝါရီလ ၂၆ရက်တွင် Woof and Meow Day ဖြင့်ကျင်းပမည်ဖြစ်ပြီး အိမ်မွေးကြောင်များနှင့် ခွေးများစိတ်ကြိုက်ဆင်ပေးပြီး ဝင်ရောက်ယှဉ်ပြိုင်နိုင်ကြောင်း သိရသည်။

▪️ ပြိုင်ပွဲ ကျင်းပစဉ် social media မှတဆင့် တိုက်ရိုက်ထုတ်လွှင့်ပြသမည်ဖြစ်ပြီး ပြိုင်ပွဲတွင်ဝင်ရောက်ယှဉ်ပြိုင်လိုပါက ကြိုတင်စာရင်းပေးနိုင်ကြောင်း သိရသည်။

#YMG/SW #Yangon_Times

#World_News
Published 27 December 2024

▪️ ကြာသပတေးနေ့က ယီမင်နိုင်ငံ ဆာနားအပြည်ပြည်ဆိုင်ရာလေဆိပ်မှာ ဖြစ်ပွားခဲ့တဲ့ လေကြောင်းဗုံးကျဲတိုက်ခိုက်မှုတစ်ခုကနေ WHO ညွှန်ကြားရေးမှူးချုပ် တက်ဒရိုစ်အက်ဒါနွမ်ဂေဘရီယေဆပ်စ် သီသီလေး လွတ်မြောက်ခဲ့ကာ အနည်းဆုံး လူ ၂ ဦးသေဆုံးခဲ့ပါတယ်။

▪️ တိုက်ခိုက်မှုဖြစ်တဲ့အချိန်မှာ တက်ဒရိုစ်နဲ့အတူ ကုလသမဂ္ဂ(UN)နဲ့ WHOမှ အပေါင်းအပါများ လေယာဉ်ပေါ်သို့ တက်ရောက်တော့မှာဖြစ်ပြီး လေယာဉ်ဝန်ထမ်းတစ်ဦး ဒဏ်ရာရရှိခဲ့ပါတယ်။

▪️ WHOအကြီးအကဲ ဂေဘရီယေဆပ်စ်က X ဆိုရှယ်မီဒီယာမှာ ဖော်ပြထားရာမှာ "ဖမ်းဆီးခံ UNဝန်ထမ်းများ လွှတ်ပေးရေး ညှိနှိုင်းရန်နဲ့ ယီမင်မှာ ကျန်းမာရေးနဲ့ လူသားချင်းစာနာမှု အခြေအနေသုံးသပ်ရန် အလုပ်တာဝန်များ ပြီးဆုံးခဲ့ပါတယ်။ ဖမ်းဆီးထိန်းသိမ်းခံများ ချက်ချင်းလွှတ်ပေးရန် ဆက်ပြီးတောင်းဆိုပါတယ်။

▪️ ကျွန်ုပ်တို့ ဆာနားကနေ လေယာဉ်စီးတော့မယ့်အချိန်မှာ လေဆိပ်ကို လေကြောင်းတိုက်ခိုက်မှု ပြုလုပ်ခဲ့ပါတယ်။ လေဆိပ်မှ အနည်းဆုံးလူ ၂ ဦးသေဆုံးခဲ့ပြီး ကျွန်ုပ်တို့ရဲ့ လေယာဉ်ဝန်ထမ်းတစ်ဦး ဒဏ်ရာရခဲ့ပါတယ်။

▪️ လေကြောင်း ထိန်းချုပ်ရေးမျှော်စင်၊ ကျွန်ုပ်တို့နဲ့ မီတာအနည်းငယ်သာ ကွာဝေးတဲ့ ထွက်ခွာခရီးသည်ဧည့်ခန်း၊ ပြေးလမ်းတို့ ထိခိုက်ပျက်စီးခဲ့ပါတယ်။ မထွက်ခွာခင်မှာ ပျက်စီးသွားတာတွေကို ပြန်လည်ပြုပြင်ရန် စောင့်ဆိုင်းရပါမယ်။ ကျွန်ုပ်တို့ရဲ့ UN နဲ့ WHO အပေါင်းအပါများ ဘေးကင်းပါတယ်။ မိသားစုဝင်များဆုံးရှုံးခဲ့ရသူတွေ အတွက်တော့ ဝမ်းနည်းပူဆွေးမိပါတယ်"လို့ တွေ့ရပါတယ်။

▪️ ကုလသမဂ္ဂ အထွေထွေအတွင်းရေးမှူး အန်တိုနီယိုဂူတာရက်စ်က တိုက်ခိုက်မှုကို ရှုတ်ချလိုက်ကာ နိုင်ငံတကာ စည်းမျဉ်းဥပဒေများကို လေးစားကြရန် တောင်းဆိုလိုက်ပြီး အရပ်ဖက်နဲ့ လူသားချင်းစာနာမှု လုပ်သားများကို ဘယ်တော့မှ ပစ်မှတ်ထားခြင်းမပြုရန် အလေးပေးပြောသွားပါတယ်။

▪️ ဂူတာရက်စ်က ယီမင်နဲ့ အစ္စရေးလ်တို့ကြား လတ်တလော စစ်ရေးတင်းမာမှုတွေကို စိတ်မကောင်းဖြစ်မိကာ ဆာနားလေဆိပ်၊ ပင်လယ်နီဆိပ်ကမ်းများနဲ့ ယီမင်ရှိ ဓာတ်အားစခန်းများမှာ လေကြောင်းတိုက်ခိုက်မှုတွေ ဖြစ်ပွားတာတွေက အချက်ပေးသံဖြစ်တယ်လို့ X မှာ ဖော်ပြထားပါတယ်။

▪️ ယီမင်အတွင်းပိုင်းနဲ့ အနောက်ကမ်းရိုးတန်းတို့မှ ဟူသီအဖွဲ့များ ပိုင်ဆိုင်တဲ့ စစ်ရေးပစ်မှတ်များကို အစ္စရေးလ်လေတပ်က တိုက်ခိုက်မှုများ ပြုလုပ်ခဲ့တယ်လို့ အစ္စရေးလ်ကာကွယ်ရေးတပ် (IDF)က ဆိုပါတယ်။

▪️ ဟူသီတို့ စစ်ရေးလှုပ်ရှားမှုများအတွက် အသုံးပြုနေတဲ့ အခြေခံအဆောက်အအုံတွေကို တိုက်ခိုက်ခဲ့ကာ ဆာနားအပြည်ပြည်ဆိုင်ရာ လေဆိပ်နဲ့ ဟက်ဇ်ယက်ဇ်နဲ့ ရက်စ်ကာနာတစ်ဓာတ်အားစခန်းတို့ အပါအဝင် အနောက်ကမ်းရိုးတန်းမှ ဆိပ်ကမ်းများလည်း ပစ်မှတ်ခဲ့ပါတယ်။

#Source: ANI News

#Local_News
Published 27 December 2024

▪️ ၂၀၁၅ ခုနှစ် ဖြစ်ပွားမှုနှုန်း၏ ၅၀ ရာခိုင်နှုန်းနှင့် တီဘီ‌ရောဂါကြောင့် သေဆုံးမှုနှုန်းကို ၇၅ ရာခိုင်နှုန်းအထိ လျှော့ချကြရမည်ဖြစ်ကြောင်းကျန်းမာရေးဝန်ကြီးဌာန ပြည်ထောင်စုဝန်ကြီး ပါမောက္ခဒေါက်တာသက်ခိုင်ဝင်းက ပြောသည်။

▪️ နေပြည်တော်ကျန်းမာရေးဝန်ကြီးဌာန အစည်းအဝေးခန်းမ၌ ယမန်နေ့ မနက် ၉ နာရီတွင် ကျင်းပသည့် National Annual TB Evaluation Meeting (2023) ၌ကျန်းမာရေးဝန်ကြီးဌာန ပြည်ထောင်စုဝန်ကြီး ပါမောက္ခဒေါက်တာသက်ခိုင်ဝင်းက ထည့်သွင်းပြောကြားခဲ့ခြင်းဖြစ်သည်။

▪️ ထိုသို့ပြောကြားရာတွင် ၂၀၂၃ ခုနှစ်တွင် ကမ္ဘာပေါ်၌ လူဦးရေ ၁၀ ဒသမ ၈ သန်းခန့်သည် တီဘီရောဂါဖြစ်ပွားခဲ့ပြီး တီဘီရောဂါကြောင့် သေဆုံးသူပေါင်း ၁ ဒသမ ၂၅ သန်းခန့်ရှိသည်ဟု ခန့်မှန်းသိရှိရကြောင်း၊ WHO End TB Strategy အရ ၂၀၂၅ ခုနှစ်တွင် တီဘီရောဂါဖြစ်ပွားမှုနှုန်းကို ၂၀၁၅ ခုနှစ်ဖြစ်ပွားမှုနှုန်း၏ ၅၀ ရာခိုင်နှုန်းနှင့် တီဘီ‌ရောဂါကြောင့် သေဆုံးမှုနှုန်းကို ၇၅ ရာခိုင်နှုန်းအထိ လျှော့ချကြရမည်ဖြစ်ကြောင်း ပြောကြားခဲ့သည်။

▪️ ထို့အပြင်  တီဘီရောဂါကာကွယ်ကုသရေးလုပ်ငန်းများကို ပြည်တွင်း / ပြည်ပ မိတ်ဖက်အဖွဲ့အစည်းများနှင့် ပူးပေါင်းပြီး အမျိုးသားမဟာဗျူဟာစီမံကိန်း (National Strategic Plan) ၂၀၂၁-၂၀၂၅ နှင့်အညီ ဆောင်ရွက်လျက်ရှိကြောင်း၊ တီဘီရောဂါမဖြစ် အောင် ကာကွယ်ကုသခြင်း (TB preventive Therapy, TPT) ကို လက်ရှိအခြေအနေထက် ပိုမိုထိရောက်အောင်ဆောင်ရွက်သွားကြရန် အရေးကြီးကြောင်း၊ ပုဂ္ဂလိက ဆေးရုံ / ဆေးခန်းများကိုလည်း တီဘီရောဂါကာကွယ်ကုသမှုများတွင် ယခုထက်ပိုမို ပူးပေါင်းပါဝင်လာအောင် ကြိုးပမ်းကြရမည်ဖြစ်ကြောင်း ပြောကြားခဲ့သည်။

▪️ ၎င်းအပြင် လူတိုင်းလက်လှမ်းမီရရှိနိုင်သော အခြေခံကျန်းမာရေး စောင့်ရှောက်မှုများရရှိစေရန်နှင့် တီဘီရောဂါတိုက်ဖျက်ရေးရည်မှန်းချက်များ ပြည့်မီစေရန်အတွက် ကျန်းမာရေးဝန်ကြီးဌာန၊ နှီးနွှယ်ဝန်ကြီးဌာနများနှင့် မိတ်ဖက်အဖွဲ့အစည်းများပူးပေါင်း၍ အရှိန်အဟုန်မြှင့်ဆောင်ရွက်သွားကြရန် တိုက်တွန်းပြောကြားခဲ့‌ကြောင်း သိရသည်။

#YMG/NN #Yangon_Times

#World_Health
Published 27 December 2024

▪️ လမ်းကြောင်းနေရာများ စဉ်းစားသုံးသပ်ပြီး အလုပ်လုပ်ရတဲ့ တက္ကစီယာဉ်မောင်းတွေနဲ့ လူနာတင်ကားယာဉ်မောင်းတွေဟာ အယ်လ်ဇိုင်းမားရောဂါကြောင့် ဆုံးပါးမှုနှုန်းမှာ အနည်းဆုံးအနေအထား ရှိနေကြတယ်လို့ အမေရိကန်မှ သေဆုံးမှုအချက်အလက် ဆန်းစစ်ချက်အရ သိရပါတယ်။

▪️ အလုပ်အကိုင် အခြေအနေကြောင့် အသက်ဆုံးပါးခဲ့ရတဲ့ လူပေါင်း ၉ သန်းနီးပါးမှာ အယ်လ်ဇိုင်းမားကြောင့် သေဆုံးသူ ၃.၈၈ ရာခိုင်နှုန်းရှိပြီး အဆိုပါယာဉ်မောင်းတွေမှာတော့ အယ်လ်ဇိုင်းမားကြောင့် သေဆုံးမှုနှုန်းက တက္ကစီယာဉ်မောင်းတွေက ၁.၀၃ ရာခိုင်နှုန်း၊ လူနာတင်ကား ယာဉ်မောင်းတွေက ၀.၇၄ ရာခိုင်နှုန်းရှိနေတယ်လို့ ဘော့စ်တွန် ဟားဗတ်ဆေးတက္ကသိုလ်နဲ့ မာဆာချူဆက်စ်အထွေထွေဆေးရုံမှ ဆရာဝန် အန်နျူပမ်ဂျီနာဦးဆောင်တဲ့ သုတေသနမှာ တွေ့ရပါတယ်။

▪️ အသက်အရွယ်နဲ့ အခြားအခြေအနေများ ထည့်သွင်းစဉ်းစားပြီးနောက် အလုပ်အကိုင်ပေါင်း ၄၄၃ မျိုးထဲမှာမှ အဆိုပါယာဉ်မောင်းတွေဟာ အယ်လ်ဇိုင်းမားကြောင့် ဆုံးပါးမှုအနည်းဆုံးသူတွေ ဖြစ်နေပါတယ်။

▪️ အခြားဒီမန်ရှာလက္ခဏာတွေက အယ်လ်ဇိုင်းမားနဲ့ သိပ်ပြီးမဆက်စပ်သလို လမ်းကြောင်းနေရာ သိပ်ပြီးမစဉ်းစားရတဲ့ အခြားပို့ဆောင်ရေး အလုပ်တွေက တက္ကစီနဲ့ လူနာတင်ကား ယာဉ်မောင်းတွေနဲ့လည်း သိပ်ပြီး မဆက်စပ်ပါဘူး။

▪️ ဟစ်ပိုကမ်ပက်စ်ဆိုတဲ့ ဦးနှောက်ထဲက နေရာတစ်ခုက လမ်းကြောင်းအကွာအဝေးတွေနဲ့ ဆက်စပ်တဲ့ နေရာဖြစ်ပြီး အယ်လ်ဇိုင်းမားရောဂါဟာ ဟစ်ပိုကမ်ပက်စ် ကျုံ့သွားတာနဲ့ သက်ဆိုင်နေပါတယ်။

▪️ အလုပ်အကိုင် အမျိုးအစားတွေက အယ်လ်ဇိုင်းမားကြောင့် သေဆုံးနိုင်ခြေကို သက်ရောက်နေနိုင်ပြီး ဦးနှောက်လှုပ်ရှားမှုများဖြင့် ကာကွယ်နိုင်မလားဆိုတာကို လေ့လာဖို့ အရေးကြီးကြောင်း ဂျီနာက ပြောပါတယ်။

▪️ တက္ကစီယာဉ်မောင်းများ ကွယ်လွန်တဲ့ ပျမ်းမျှအသက်က ၆၈ နှစ်နဲ့ လူနာတင်ကားယာဉ်မောင်းတွေက ၆၄ နှစ်ရှိကာ ၇၀ ရာခိုင်နှုန်းလောက်က ပညာရေးမှာ အထက်တန်းကျောင်းနဲ့ ဒီထက်နိမ့်တဲ့ အနေအထား ရှိကြပါတယ်။

▪️ အဆိုပါ ယာဉ်မောင်းတွေဟာ အယ်လ်ဇိုင်းမားရောဂါ ဖြစ်နိုင်ခြေ မများပေမယ့် အလုပ်နားပြီးနောက်မှာတော့ ရောဂါလက္ခဏာတွေ ဖြစ်မလာနိုင်တဲ့အနေအထားတော့ မဟုတ်ဘူးလို့ ပြောသွားပါတယ်။

#Source: MedPage Today

#World_Health
Published 27 December 2024

▪️ အမျိုးသမီးတွေမှာ ဆံပင်ကျွတ်ခြင်းပြဿနာ အဖြစ်များပြီး အလွန်အကျံ ဆံပင်ကျွတ်တာကတော့ ကျန်းမာရေး နောက်ခံကိစ္စတွေ ရှိနေတဲ့သဘော ဖြစ်ပါတယ်။

▪️ ဆံပင်ကျွတ်ရတဲ့ အကြောင်းအရင်း များစွာရှိနေကာ စောစီးစွာ သိရှိပါမှ ဆံပင်ပါးခြင်းမှ ကာကွယ်နိုင်ကာ ဆံကေသာ ကျန်းမာသန်စွမ်းစေမှာ ဖြစ်ပါတယ်။

(၁) ဟော်မုန်းမညီမျှခြင်း
▪️ အမျိုးသမီးမှာ ဆံပင်ကျွတ်ရခြင်း အဓိကအကြောင်းအရင်းတစ်ခုက ဟော်မုန်းအတက်အကျတွေ ဖြစ်ပြီး ဟော်မုန်းတွေက ဆံကေသာ ကြီးထွားမှုစက်ဝန်းကို ထိန်းညှိရာမှာ အရေးပါပါတယ်။

▪️ ဟော်မုန်းကြောင့် ဆံပင်ကျွတ်ခြင်းကို သင့်လျော်တဲ့ ကုသမှုဖြင့် ထိန်းချုပ်နိုင်ပါတယ်။

▪️ ဦးရေပြားမှာ ဆံပင်ကျဲလာပြီး မလိုလားတဲ့နေရာတွေမှာ အမွှေးထွက်လာစေတဲ့ အန်ဒရိုဂျင်ဟော်မုန်းတွေ များလာတဲ့ PCOSရောဂါ၊ ကလေးမွေးပြီးနောက် အီစထရိုဂျင်ဟော်မုန်း ကျဆင်းသွားတဲ့ အခြေအနေ၊ ဟော်မုန်းအပြောင်းအလဲ ဖြစ်ပြီး ဆံပင်ကြီးထွားမှုကို ထိခိုက်စေတဲ့ သိုင်းရွိုက်ရောဂါများ၊ ဆံပင်မွေးညင်းပေါက်များ အားနည်းလာတဲ့ မီးယပ်သွေးဆုံးချိန်တို့မှာ အဖြစ်များပါတယ်။

(၂) အာဟာရဓာတ်ချို့တဲ့ခြင်း
▪️ မရှိမဖြစ် အာဟာရဓာတ်များ ချို့တဲ့ပါက ဆံပင်မွေးညင်းပေါက်များ အားနည်းစေပြီး ဆံပင်ကျွတ်စေပါတယ်။

▪️ အဓိကအားဖြင့် သံဓာတ်၊ ပရိုတိန်း၊ ဗိုက်တာမင်-ဒီ၊ ဇင့်နဲ့ ဘိုင်အိုတင်ဓာတ်များ ချို့တဲ့ခြင်းကြောင့် ဆံပင်ကျွတ်ခြင်း၊ ကြီးထွားမှုနှောင့်နှေးခြင်း၊ ဆံပင်ပါးခြင်း၊ ဆံပင်ကျိုးပဲ့ခြင်းတို့ ဖြစ်နိုင်ပါတယ်။

(၃) ဖိစီးမှုနဲ့ နေထိုင်စားသောက်မှုပုံစံများ
▪️ ရုပ်ပိုင်းဆိုင်ရာဖြစ်ဖြစ် စိတ်ပိုင်းဆိုင်ရာဖြစ်ဖြစ် ဖိစီးမှုဖြစ်တဲ့အခါ ဆံပင်ဖွံ့ဖြိုးမှုစက်ဝန်းကို ထိခိုက်စေပြီး ဆံကေသာ ကျွတ်စေပါတယ်။

▪️ ကော်တီဆောလ် မြင့်မားလာခြင်းကြောင့် စိတ်ဖိစီးမှု၊ အိပ်ရေးပျက်ခြင်း၊ ကိုယ်လက်လှုပ်ရှားမှု နည်းပါးသဖြင့် သွေးလည်ပတ်မှု အားနည်းခြင်းတို့က ဆံကေသာ ကျန်းမာရေးကိုပါ ထိခိုက်စေပါတယ်။

(၄) ဆံပင်အလှပြင်ခြင်းနဲ့ ဓာတုဆေးများ
▪️ ဆံကေသာ ပြုပြင်အလှဆင်ခြင်းတို့ကြောင့် ဆံပင်ပျက်စီးဆုံးရှုံးကြရပါတယ်။

▪️ ဆံပင်ကို အပူဓာတ်နဲ့ ထိတွေ့ခြင်း၊ ဓာတုပစ္စည်းများ အသုံးပြုခြင်း၊ ဆံပင်စည်းသဖြင့် တင်းကြပ်ခြင်းတို့ကြောင့် ဆံပင်ဆုံးရှုံးစေပါတယ်။

(၅) ရောဂါပြဿနာများ
▪️ အချို့သော ရောဂါလက္ခဏာများနဲ့ ဆေးဝါးများက ဆံပင်ဆုံးရှုံးစေပါတယ်။
ကိုယ်ခံအားစနစ်က ဆံပင်မွေးညင်းပေါက်များကို တိုက်ခိုက်ကာ ဆံပင်အကွက်လိုက် ဆုံးရှုံးစေတဲ့ Alopecia areata ၊ မှိုရောဂါကူးစက်မှုကြောင့် ဦးရေပြားထိခိုက်စေတဲ့ ရောဂါများ၊ ကင်ဆာ သွေးတိုးနဲ့ စိတ်ကျရောဂါတို့အတွက် ဆေးဝါးတွေဟာ ဘေးထွက်ဆိုးကျိုး ဖြစ်ပေါ်စေနိုင်ပါတယ်။

(၆) အမျိုးသမီးတွေမှာ အသက်ကြီးလာတာနဲ့အမျှ ဆံပင်ပါးလာတဲ့ မျိုးဗီဇအခြေအနေ

(၇) ရုတ်တရက် ကိုယ်အလေးချိန်ကျခြင်းနဲ့ ကျန်းမာရေးမညီညွတ်တဲ့ အစားအသောက်တွေကြောင့် အာဟာရဓာတ်များ ချို့တဲ့လာပြီး ဆံပင်ဖွံ့ဖြိုးမှုချို့ယွင်းစေပါတယ်။

(၈) ပတ်ဝန်းကျင် အနေအထားတွေဖြစ်တဲ့ လေထုညစ်ညမ်းခြင်း၊ ခရမ်းလွန်ရောင်ခြည် ထိတွေ့ခြင်း၊ သတ္တုဓာတ်များတဲ့ရေနဲ့ ထိတွေ့ခြင်းတို့ကြောင့် ဦးရေပြား ထိခိုက်စေပါတယ်။

▪️ အမျိုးသမီးတွေမှာ ဆံပင်ကျွတ်ရတဲ့ အကြောင်းအရင်းတွေကို သိရှိအောင်လုပ်ပြီး ဆံပင်ကျွတ်ခြင်းမှ ထိရောက်စွာ ကာကွယ်နိုင်ပါတယ်။

#Source: DoctorNDTV

တရုတ်နိုင်အနောက်တောင်ပိုင်း စီချွမ်ပြည်နယ် ရှီချွမ်မြို့ရှိ ဓာတ်အားလိုင်းများမှ ရေခဲများကို ဖယ်ရှားရန် စက်ရုပ်များကို ပထမဆုံးအကြိမ် ဖြန့်ကျက်အသုံးပြုခဲ့ပြီး ရေခဲရှင်းထုတ်ခြင်းလုပ်ငန်းတွေမှာ ဘေးကင်းမှုနဲ့ ထိရောက်မှုတို သိသိသာသာ တိုးတက်လာစေပါတယ်။
#Asia_Technology
Published 26 December 2024
#ရေခဲရှင်းထုတ်ခြင်းလုပ်ငန်း #စက်ရုပ်များနဲ့ဖယ်ရှား
#YMG #Yangon_Times #Yangon_Media_Group

#Daily_News
Published 26 December 2024

၁။ လာမည့်နှစ်တွင် ဝါဂွမ်းများကို ဗီယက်နမ်နှင့်ဘင်္ဂလားဒေ့ရှ်နိုင်ငံဈေးကွက်များသို့ တိုးမြှင့်တင်ပို့မည်

၂။ ရန်ကုန်တိရစ္ဆာန်ဥယျာဉ်၌ ခရစ္စမတ်နှင့်နှစ်သစ်ကူးပွဲတော်ကျင်းပနေ

၃။ ကျိုက်ထီးရိုးစေတီတော်သို့ ဘုရားဖူးသုံးသောင်းခန့်ဝင်ရောက်

၄။ ဓာတ်အားလိုင်းများပေါ်တွင်တင်နေသည့် ရေခဲများအား စက်ရုပ်များသုံးပြီး ပထမဆုံးဖယ်ရှား ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#Local_News
Published 26 December 2024

▪️ ပြည်တွင်း၌ နိုင်ငံခြားကုမ္ပဏီများမှ ထုတ်လုပ်သည့်ကုန်ပစ္စည်း ၈မျိုးကို ပြည်ပတင်ပို့ခွင့်ပြုမည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ ထုတ်ပြန်ချက်အရ သိရသည်။

▪️ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနအနေဖြင့် ပြည်တွင်းတွင်ထုတ်လုပ်သော ကုန်ပစ္စည်းအချို့ကို နိုင်ငံခြားကုမ္ပဏီများအား တင်ပို့ခွင့်ပြုရန်အတွက် အမိန်ကြော်ငြာစာအမှတ် ၉၃/၂၀၂၄ကို ထုတ်ပြန်လိုက်ရာ ပြည်တွင်းအရည်အသွေးမြင့် ထုတ်ကုန်များကို ပြည်ပဈေးကွက်သို့ ချဲ့ထွင်တင်ပို့ခြင်းဖြင့် ထုတ်လုပ်နိုင်စွမ်းကို မြှင့်တင်ရန်၊ ပြည်ပဈေးကွက် ပိုမိုရရှိစေရန်နှင့် ထုတ်လုပ်သူများ၏ ရောင်းဈေးပိုမိုရရှိစေရန် ရည်ရွယ်ကြောင်း သိရသည်။

▪️ ပြည်တွင်း၌ နိုင်ငံခြားကုမ္ပဏီများမှ ထုတ်လုပ်သည့်ကုန်ပစ္စည်းများကို တင်ပို့ခွင့်ပြုရာတွင် တစ်ဆင့်မြင့်ပြုပြင်ထုတ်လုပ်ထားသည့် အသား၊ ငါးနှင့် ရေထွက်ကုန်ပစ္စည်းများ၊ တစ်ဆင့်မြင့်ပြုပြင်ထုတ်လုပ်ထားသည့် ကောက်ပဲသီးနှံများ၊ ပျော့ဖတ်နှင့် စက္ကူအမျိုးမျိုး၊ မျိုးစေ့၊ သန့်စင်ထားသည့် သတ္တုရိုင်းများ၊သစ်သီးဝလံပန်းမန်ကုန်ကြမ်းတို့မှ အဆင့်မြင့်ထုတ်လုပ်ထားသော တစ်ဝက်တစ်ပျက်ကုန်ချော သို့မဟုတ် ကုန်ချောပစ္စည်းများ၊ သစ်အခြေခံပရိဘောဂပစ္စည်းများ၊သဘာဝပတ်ဝန်းကျင်အထောက်အကူပြု ကုန်စည်များကို တင်ပို့ခွင့်ပြုမည်ဖြစ်ကြောင်း သိရသည်။

▪️ အဆိုပါ ပို့ကုန်များတင်ပို့ရန်အတွက် သက်ဆိုင်ရာဌာနများမှ ပို့ကုန်လိုင်စင်လျောက်ထားရယူရမည်ဖြစ်ပြီး ဆန်နှင့် ဆန်ကွဲတင်ပို့ခြင်းအတွက် ပြည်ပမှပြည်တွင်းဘဏ်တစ်ခုခုသို့ကနဦးရင်းနှီးမြုပ်နှုံမှု ထည့်ဝင်ငွေအနည်းဆုံး ဒေါ်လာ သုံးသန်းလွှဲပြောင်းပြီးကြောင်း အထောက်အထားတင်ပြရန်လိုအပ်ကြောင်း သိရသည်။

#YMG/SW #Yangon_Times