Published 21 September 2023

ကိုရိုနာဗိုင်းရပ်စ် မျိုးဗီဇကွဲအသစ် ပေါ်ပေါက်နေတယ်လို့ အမေရိကန် ရောဂါထိန်းချုပ်ကာကွယ်ရေးစင်တာမှ လတ်တလော သတိပေးထားပေမယ့် ကိုဗစ်ကူးစက်မှုတွေက အရင်ကလောက် မများပြားတော့ဘူးလို့ NYC ထိပ်သီးဆရာဝန်တစ်ဦးက ဆိုပါတယ်။

ရောဂါလက္ခဏာတွေက သာမန်လောက်သာ ဖြစ်ကြပြီး အအေးမိဖျားနာတာမျိုး ဓာတ်မတည့်တာမျိုးနဲ့ ခွဲခြားရခက်လာပါတယ်။

ကိုဗစ်ရောဂါဖြစ်နေကြောင်း သိရှိဖို့က စမ်းသပ်စစ်ဆေးမှသာ တွေ့ရှိတော့တာဖြစ်ပြီး လတ်တလော ရောဂါလက္ခဏာတွေကတော့ ဝမ်းခေါင်းဆို့ခြင်း၊ နှာချေခြင်း၊ လည်ချောင်းနာခြင်းတို့ ဖြစ်တတ်ပါတယ်။

ဗြိတိန်အခြေစိုက် ကိုဗစ်လက္ခဏာ လေ့လာရေးအရ ၂၀၂၁ က အိုမီခရွန် မျိုးဗီဇကွဲနောက်ပိုင်း လည်ချောင်းနာခြင်း အဖြစ်များလာတယ်လို့ သိရပါတယ်။

ကပ်ရောဂါအစပိုင်းက အနံ့အရသာ ပျောက်ဆုံးခြင်းလက္ခဏာက ၆၀ - ၇၀ ရာခိုင်နှုန်းလောက် ရှိခဲ့ပေမယ့် အခုဆိုရင် ၁၀ - ၂၀ ရာခိုင်နှုန်းသာ ရှိပါတော့တယ်။

လက်ရှိမှာ ပူလောင်တဲ့ ခံစားမှုမျိုးကို လူနာတွေ ခံနိုင်ရည်ရှိလာပါပြီ။

မနှစ်ကထက်စာရင် အထူးကြပ်မတ်ကုသရတဲ့ လူနာတွေ နည်းပါးလာသလို ပက်စ်လိုဗစ်နဲ့ အခြားဗိုင်းရပ်စ်သတ်ဆေးများဖြင့် ကုသမှုများကြောင့်လည်း အလျင်အမြန် သက်သာလာကြပါတယ်။

ဇူလိုင်လနောက်ပိုင်း ငယ်ရွယ်သူတွေမှာ ချောင်းဆိုးခြင်း၊ နှာရည်ယိုခြင်း၊ လည်ချောင်းနာခြင်း၊ ဖျားနာကိုက်ခဲခြင်းတို့ အဖြစ်များလာကြောင်း ကယ်လီဖိုးနီးယား စိန့်ဟိုဆပ်ဆေးဘက်ဆိုင်ရာစင်တာမှ အရေးပေါ်ဆရာဝန် မိုက်ကယ်ဒိတ်ဂ်နော့က ပြောပြသွားပါတယ်။

ကိုဗစ်ကူးစက်မှု လျော့ကျသွားရခြင်းက လူတွေရဲ့ ကိုယ်ခံအားစနစ်တွေနဲ့ ကာကွယ်ဆေးတွေရဲ့ ထိရောက်မှုတို့ကြောင့် ဖြစ်တယ်လို့ ဘော့စ်တွန်မှ ဗိုင်းရပ်စ်ပညာရှင် ဒေါက်တာ ဒန်ဘာရော့ချ်က ဆိုပါတယ်။  

ခြုံကြည့်လိုက်ရင် ကိုဗစ်ပြင်းထန်မှုက အရင်နှစ်တွေကထက် လျော့နည်းလာပြီဖြစ်ပြီး ဒါဟာ ဗိုင်းရပ်စ်မျိုးဗီဇကွဲတွေ အားနည်းလာတာမဟုတ်ဘဲ ကိုယ်ခံအားတုန့်ပြန်မှုတွေ အားကောင်းလာတာကြောင့် ဖြစ်တယ်လို့ ပြောပြခဲ့ပါတယ်။
Source: New York Post
#World_Health
#YMG #Yangon_Times #Yangon_Media_Group

Published_ 21 September 2023

မနက်ခင်း လုပ်ရိုးလုပ်စဥ်များက လူတစ်ယောက်ရဲ့ တစ်နေ့တာလုပ်ဆောင်ချက်အပေါ် သက်ရောက်နေပါတယ်။

မနက်အိပ်ရာနိုးတာနဲ့ ဖုန်းကိုင်တဲ့ အလေ့အကျင့်မျိုးတွေဟာ လူတွေ အသက်တိုရတဲ့ အကြောင်းအရင်း ဖြစ်နေနိုင်တယ်လို့ ပညာရှင်တစ်ဦးက ဆိုပါတယ်။

သက်ရှည်ကျန်းမာတဲ့ ဘဝပိုင်ဆိုင်နိုင်ရန်အတွက် မနက်ခင်းမှာ ပြုလုပ်သင့်တဲ့ လုပ်ရိုးလုပ်စဥ် နည်းလမ်း ၄ မျိုးကို အားကစားဆေးဘက်ဆိုင်ရာ ဆရာဝန် ဒေါက်တာရူဘင်ချန်က အကြံပြုသွားပါတယ်။
 
အရင်ဆုံး စိတ်နဲ့ကိုယ်ကပ်အောင် ပြုလုပ်ပါ - အိပ်ရာနိုးပြီးနောက် ၁၀ - ၁၅ မိနစ်ခန့် တရားမှတ်ခြင်းဖြင့် စိတ်ကိုတည်ငြိမ်စေမှာပါ။

ဒီနောက် မိမိအရည်အသွေး တိုးတက်စေမယ့်အရာမျိုးကို လေ့လာဆောင်ရွက်သင့်ပြီး အနည်းဆုံး မိနစ် ၃၀ ခန့် လေ့ကျင့်ခန်းပြုလုပ်ကာ အကြောလျှော့ပေးရမှာ ဖြစ်ပါတယ်။
 
မနက်စာမစားဘဲ မနေပါနှင့် - တစ်နေ့တာ လိုအပ်တဲ့အားအင်အတွက် အာဟာရရှိတဲ့ မနက်စာ စားသင့်ပါတယ်။

ကြက်ဥ၊ ထောပတ်သီး၊ ပေါင်မုန့်မီးကင်နဲ့ မြေပဲထောပတ်တို့က လိုအပ်တဲ့ အာဟာရ ပေးစွမ်းနိုင်မှာဖြစ်ပြီး သကြားနဲ့ ကာဗိုဟိုက်ဒရိတ်တို့ကိုတော့ ရှောင်ရှားရမှာ ဖြစ်ပါတယ်။
 
ကော်ဖီမသောက်ခင် ရေဓာတ်အရင်ဖြည့်တင်းပါ - မနက်ခင်းမှာ ရေသောက်ပြီး ရေဓာတ်ဖြည့်ပေးဖို့က အလွန်အရေးကြီးပါတယ်။

တစ်နေ့တာလုံးမှာလည်း ရေဓာတ်ပြည့်ဝနေစေရန် သောက်သုံးသင့်ပြီး အရည်ရွှမ်းတဲ့အသီးအနှံတွေလည်း စားသုံးနိုင်ပါတယ်။
 
အထက်ပါလုပ်ရိုးလုပ်စဥ်များကို နေ့စဥ်ပုံမှန်ပြုလုပ်ပါ - မနက်ခင်း ထိုကဲ့သို့ လုပ်ရိုးလုပ်စဥ်များကို စွဲစွဲမြဲမြဲ ပြုလုပ်ရမှာ ဖြစ်ပါတယ်။

ထိုအခါ ဖိစီးမှုတွေ လျော့ကျပြီး ကောင်းမွန်စွာ စွမ်းဆောင်နိုင်မှာဖြစ်ပါတယ်။

လူအတော်များများက အခက်အခဲကိစ္စတွေနဲ့ နိုးထလာတတ်ကြတာကြောင့် မနက်ခင်းမှာ အချိန်အနည်းငယ်ပေးမယ်ဆိုရင် အဆင်ပြေစေမှာ ဖြစ်ပါတယ်။
Source: India Today
#World_Health
#YMG #Yangon_Times #Yangon_Media_Group

#Daily_News
Published_ 20 September 2023

၁။ Asian Game ပြိုင်ပွဲတွင် မြန်မာမှ ဘင်္ဂလားဒေ့ရှ်ကို(၁)ဂိုး(၀)ဖြင့် အနိုင်ရပြီး ပွဲဦးထွက်လှခဲ့၊အိမ်ရှင်တရုတ်နှင့် ဆက်ပြိုင်မည်

၂။ မြန်မာတစ်နိုင်ငံလုံးရှိ သဘင်သက်ကြီးဘိုးဘွား ဦးရေတစ်ထောင်ကျော်ကို ပူဇော်ကန်တော့သွားမည်

၃။ ပြည်တွင်းထွက် ဆီမီးခွက်များ လာမည့် သီတင်းကျွတ်ကာလအတွက် ဝယ်ယူမှု ယခင်နှစ်ထက် သုံးဆကျော်မြင့်တတ်

၄။ တရုတ်ပြည် ကျင်မေတောင်ရှိ လက်ဖက်တောဟောင်း နေရာဒေသကြီးအား ယူနက်စ်ကိုကမ္ဘာ့ယဥ်ကျေးမှုအမွေအနှစ်စာရင်းထဲ ထည့်သွင်း .... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG

Yangon Times HEALTH TIPS

ဝိတ်ချတာကို ကူညီပေးတဲ့မနက်စာ

ဝိတ်ကျဖို့ကြိုးစားနေတဲ့အခခါ မနက်စာဟာ အရေးကြီးလာပါတယ်။ ကိုယ်စားတဲ့မနက်စာဟာ ဝိတ်ချနေတဲ့ အစီအစဉ်ကို အထောက်အကူပြုရပါမယ်။ မနက်စာဘာတွေစားသင့်သလဲ။

Published_ 20 September 2023

အချိုအငန်အရသာတွေကို လူတွေ ကြိုက်နှစ်သက်တတ်တာ သဘာဝဖြစ်ပေမယ့် ဆားနဲ့ သကြား အလွန်အကျွံစားသုံးခြင်းကြောင့် နှလုံးကျန်းမာရေးအပေါ် ဘေးအန္တရာယ်ရှိနိုင်ပုံတွေကို လေ့လာချက်အများအပြား တွေ့ရှိထားပါတယ်။

အငန်နဲ့ အချိုအများအပြားပါဝင်တဲ့ အစားအစာတွေ စားသုံးခြင်းဖြင့် နှလုံးသွေးကြောဆိုင်ရာ ရောဂါအမျိုးမျိုး ဖြစ်နိုင်ချေများစေတဲ့အပြင် ဆီးချိုရောဂါ၊ အဝလွန်ခြင်းတို့လည်း ဖြစ်စေနိုင်ပါတယ်။

ဖော်တစ်အက်စ်ကော့ဆေးရုံမှ နှလုံးအထူးကုအကြံပေး ဒေါက်တာမိုဟစ်တန်ဒန်က ဆားနဲ့သကြားဟာ ခန္ဓာကိုယ်ထဲ ဘယ်လိုများပြားစေတယ်ဆိုတာနဲ့ နှလုံးအပေါ် ဘယ်လိုသက်ရောက်စေလဲဆိုတာကို ပြောပြသွားပါတယ်။

နှလုံးအပေါ် သကြားဓာတ်ရဲ့ သက်ရောက်မှုတွေကတော့..
 
အသည်းဇီဝဖြစ်စဥ် - အသည်းမှာ သကြားအလွန်အကျွံ များပြားလာပါက  အဆီအဖြစ်သို့ ပြောင်းလဲပေးကာ အသည်းအဆီဖုံးခြင်း အဝလွန်ခြင်းတို့ ဖြစ်စေနိုင်ပြီး နှလုံးရောဂါဖြစ်နိုင်ချေကို များစေပါတယ်။
 
ကိုယ်အလေးချိန်တက်ခြင်း - အချိုဓာတ်များတဲ့ စားစရာတွေဟာ အလျင်အမြန် အစာကြေသွားတာကြောင့် တင်းတိမ်မှုမရှိဘဲ အလွန်အကျွံ စားမိသဖြင့် ကိုယ်အလေးချိန် များနိုင်ကာ နှလုံးရောဂါ ဖြစ်လာနိုင်ပါတယ်။
 
ရောင်ရမ်းခြင်းနှင့် သွေးပေါင်ချိန် - သကြားအများအပြား စားသုံးတဲ့အခါ နာတာရှည်ရောင်ရမ်းခြင်းနဲ့ သွေးပေါင်ချိန်တက်ခြင်းတို့ ဖြစ်စေနိုင်ပါတယ်။
 
ကိတ်မုန့်တွေနဲ့ မုန့်ချိုတွေမှာ ပါဝင်တဲ့ ပြည့်ဝဆီတွေမှာ မကောင်းတဲ့ ကိုလက်စ်ထရောလ်တွေ ဖြစ်ပါတယ်။

အဆိုပါ ကိုလက်စ်ထရောလ်တွေ မြင့်မားလာပါက သွေးကြောကျဥ်းရောဂါများ ဖြစ်လာစေနိုင်ပါတယ်။

သွေးကြောတွေကျဥ်းသွားပြီး နှလုံးဆီသို့ သွေးရောက်ရှိမှု နည်းသွားကာ နှလုံးရောဂါဖြစ်နိုင်ချေ များလာပါတယ်။

ဆားမှာပါဝင်တဲ့ ဆိုဒီယမ်က ခန္ဓာကိုယ်လုပ်ဆောင်ချက်တွေအတွက် အရေးပါပေမယ့် လိုအပ်တဲ့ပမာဏထက် များသွားရင်တော့ ဘေးဖြစ်တတ်ပါတယ်။

လူတစ်ဦးဟာ နေ့စဥ်ဆိုဒီယမ် ၁,၅၀၀ မီလီဂရမ်စားသုံးရန် လိုအပ်ပါတယ်။

အဆင့်ဆင့် ထုတ်ပိုးထားတဲ့ စားစရာတွေကြောင့် ဆိုဒီယမ်အများအပြား စားသုံးမိပြီး ခန္ဓာကိုယ်ထဲက ဆိုဒီယမ်ပါဝင်မှုကို လျှော့ချဖို့ အရည်အများအပြား ကျန်ရစ်နေပါတယ်။

ဒီအတွက် သွေးပမာဏများပြားလာပြီး နှလုံးကနေ အလုပ်ပိုမိုလုပ်ရကာ သွေးပေါင်ချိန်တက်လာပြီး  သွေးကြောတွေအပေါ် ဖိအားများစေပါတယ်။

အချိန်ကြာလာတာနဲ့အမျှ သွေးတိုးရောဂါဖြစ်လာကာ နှလုံးရောဂါ၊ လေဖြတ်ခြင်း၊ ကျောက်ကပ်ပျက်စီးခြင်းတို့ ဖြစ်စေနိုင်ပါတယ်။
Source: India Today.
#World_Health
#YMG #Yangon_Times #Yangon_Media_Group

Published 20 September 2023

 ရုရှားသမ္မတ ဗလာဒီမာပူတင်နဲ့ တရုတ်သမ္မတ ရှီကျင့်ဖင်တို့ဟာ အောက်တိုဘာလအတွင်း ပေကျင်းမှာ တွေ့ဆုံဆွေးနွေးသွားမှာ ဖြစ်ကြောင်း ရုရှားဘက်က စက်တင်ဘာ ၁၉ ရက်နေ့က ပြောကြားလိုက်ပါတယ်။

ဒါဟာ ယူကရိန်းမှ ကလေးများကို ပြည်နှင်ဒဏ်ပေးလိုက်တဲ့ ဖြစ်ရပ်ကြောင့် ပူတင်ကို ဖမ်းဝရမ်းထုတ်ပြီးနောက်ပိုင်း သူ့ရဲ့ပထမဆုံး နိုင်ငံရပ်ခြားခရီးစဥ် ဖြစ်လာမှာပါ။

ရုရှားနဲ့ တရုတ်ကို သီးခြားခွဲထုတ်ဖို့ ကြိုးပမ်းနေတဲ့ အနောက်နိုင်ငံနဲ့ ရင်ဆိုင်နေရတဲ့အတွက် ထိုနှစ်နိုင်ငံအနေဖြင့် ပိုမိုလေးနက်စွာ ပူးပေါင်းဆောင်ရွက်သင့်ကြောင်း ရုရှားလုံခြုံရေးကောင်စီ အတွင်းရေးမှူးနဲ့ ပူတင်ရဲ့ အနီးကပ်မိတ်ဖက်ဖြစ်သူ နီကိုလိုင်ပက်ထရူရှက်ဗ်က ပြောပြခဲ့ပါတယ်။

ပေကျင်းမှာ တွေ့ဆုံမယ့် ဆွေးနွေးပွဲမှာ စေ့စပ်သေချာစွာ ပြောဆိုသွားမှာဖြစ်ကြောင်း ပက်ထရူရှက်ဗ်က တရုတ်ထိပ်သီးသံတမန် ဝမ်ယိနဲ့ ရုရှားမှာ တွေ့ဆုံဆွေးနွေးစဥ် ပြောကြားခဲ့ကြောင်းကို အင်တာဖက်စ်နယူးသတင်းဌာနက ဖော်ပြခဲ့ပါတယ်။

ရှီကျင့်ဖင်ရဲ့ ဖိတ်ကြားချက်ဖြင့် တတိယအကြိမ်မြောက် ရပ်ဝန်းတစ်ခု လမ်းကြောင်းတစ်သွယ်စီမံကိန်း ဖိုရမ်သို့ ပူတင်က တက်ရောက်ဦးမှာ ဖြစ်ပါတယ်။

ဒီမတိုင်ခင် ရက်ပိုင်းအလိုက ယူကရိန်းမှ ရာနဲ့ချီတဲ့ကလေးတွေကို တရားမဝင် ပြည်နှင်ဒဏ်ပေးတယ်ဆိုပြီး သံသယရှိတာကြောင့် ပူတင်ကို နိုင်ငံတကာရာဇဝတ်မှုတရားရုံး (ICC)က ဖမ်းဆီးမိန့် ထုတ်ပြန်ထားပါတယ်။

ရုရှားဘက်က အဆိုပါ စွပ်စွဲချက်များကို ငြင်းဆန်ကာ အနောက်နိုင်ငံက ICC ရှေ့နေနဲ့ တရားသူကြီးတွေထံမှာ ထိုရာဇဝတ်မှုဖွင့်ခဲ့တာဖြစ်ပြီး အဆိုပါဖမ်းဝရမ်းဟာ အနောက်တိုင်းက ပူတင်ကို ရန်လိုနေတဲ့ အထောက်အထား ဖြစ်တယ်လို့ ဆိုပါတယ်။

ပြီးခဲ့တဲ့နှစ် ဖေဖော်ဝါရီလ ယူကရိန်းကို ရုရှားတို့ အင်ပြည့်အားပြည့် တိုက်ခိုက်ခဲ့ရာမှာ ဒုတိယကမ္ဘာစစ်နောက်ပိုင်း ဥရောပမှာ အသေအပျောက်အများဆုံး စစ်ပွဲတွေထဲက တစ်ခုဖြစ်ခဲ့ပြီး ၁၉၆၂ ကျူးဘားဒုံးကျည်ကိစ္စနောက်ပိုင်း ရုရှားနဲ့ အနောက်နိုင်ငံတို့ကြား အကြီးမားဆုံး ထိပ်တိုက်ရင်ဆိုင်နေရတာ ဖြစ်ပါတယ်။

ပူတင်က ရှီကျင့်ဖင်ဘက်ကို အားကိုးလာကာ ရှီကျင့်ဖင်ကလည်း ပူတင်ဘေးကနေ ရပ်တည်နေပါတယ်။

တရုတ်-ရုရှား ကုန်သွယ်ရေးက ယူကရိန်းစစ်ပွဲဖြစ်ကတည်းက မြင့်တက်နေပြီး ဒဏ်ခတ်ပိတ်ဆို့မှုများကြောင့် အနောက်နိုင်ငံများသို့ ရေနံမရောင်းရတော့တဲ့ ရုရှားဟာ တရုတ်အပါအဝင် အာရှအင်အားကြီးနိုင်ငံများထံ ရေနံအမြောက်အများ ရောင်းချထားပါတယ်။

ယူကရိန်းစစ်မတိုင်ခင် ၂၀၂၂ ဖေဖော်ဝါရီလက ပူတင်ဟာ တရုတ်သို့ နောက်ဆုံးခရီးသွားရောက်ခဲ့ဖူးပြီး နှစ်နိုင်ငံကြား အကန့်အသတ်မရှိ မိတ်ဖက်ဆက်ဆံရေး ထူထောင်မယ်လို့ ကြေညာခဲ့ပေမယ့် စစ်ဘက်ဆိုင်ရာ မဟာမိတ်ဖွဲ့တာ မဟုတ်ဘူးလို့တော့ ဆိုခဲ့ပါတယ်။

ယူကရိန်းကိစ္စနှင့် ပတ်သက်ပြီး တရုတ်က ရှုတ်ချခြင်း မပြုလုပ်သလို ကျူးကျော်တယ်လို့လည်း မသုံးနှုံးထားပါဘူး။

CIA ညွှန်ကြားရေးမှူး ဝီလျံဘန်းစ်က ယခုနှစ်အစောပိုင်းက ပြောကြားရာမှာ ရုရှားက တရုတ်ကို ပိုပိုပြီးတော့ မှီခိုလာရကာ စီးပွားရေးဘက်မှာ ကိုလိုနီပြုခံလာရမယ့် အန္တရာယ်ရှိနေတယ်လို့ ဆိုခဲ့ပါတယ်။
Source: CNA.
#World_News
#YMG #Yangon_Times #Yangon_Media_Group