မြန်မာနိုင်ငံရဲ့ ဂျီဒီပီမှာမြန်မာနိုင်ငံ၏ရေမြေသဘာဝနှင့်တူညီသည့် ဒေသတွင်းနိုင်ငံများ၏ ဂျီဒီပီနှင့်နှိုင်းယှဉ်ပါကများစွာကွာခြားလျက်ရှိနေသေးတယ်လို့ နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ဇူလိုင် ၁၅ ရက်က ကျင်းပတဲ့ ကုန်ထုတ်လုပ်မှုမြှင့်တင်ရေးအစည်းအဝေးတစ်ခုတွင် ပြောကြားပါတယ်။
နေပြည်တော်မှာ ဇူလိုင် ၁၅ရက်က ကျင်းပတဲ့ နိုင်ငံကုန်ထုတ်လုပ်မှုမြှင့်တင်ရေး အစည်းအဝေးတွင် နစကဥက္ကဋ္ဌ နိုင်ငံတော်ဝန်ကြီးချုပ်ဗိုလ်ချုပ်မှူးကြီး မင်းအောင်လှိုင်က ပြောကြားခဲ့တာဖြစ်တယ်လို့ နစကရဲ့ သတင်းထုတ်ပြန်ချက်အရ သိရပါတယ်။
အဲဒီအတွက် ဂျီဒီပီတိုးတက်ရေးအတွက် လုပ်ငန်းဆောင်ရွက်နေသူများအားလုံး လုပ်ငန်းများအလိုက် အောင်မြင်အောင် ဆောင်ရွက်လိုစိတ်ရှိဖို့လိုတယ်လို့လည်း ဗိုလ်ချူပ်မှူးကြီးကပြောပါတယ်။
ပြည်သူအများစုနေ့စဉ် သုံးစွဲစားသုံးနေရတဲ့ စိုက်ပျိုး၊ မွေးမြူရေးထုတ်ကုန်များကို ပြည်တွင်းဖူလုံမှုကို ဦးစားပေး၍ဆောင်ရွက်ရမှာဖြစ်ပြီး အများစုသုံးစွဲခြင်းမဟုတ်ဘဲ ပြည်ပပို့ကုန်အဖြစ်တင်ပို့နိုင်သည့် ထုတ်ကုန်များကိုမူ ပို့ကုန်အဖြစ်ပိုမိုတင်ပို့နိုင်ရေး ဆောင်ရွက်နိုင်တယ်လို့ ဗိုလ်ချူပ်မှူးကြီးက ဆက်လက်ပြောဆိုပါတယ်။
ယင်းအပြင် ဗိုလ်ချုပ်မှူးကြီးက မွေးမြူရေးနှင့်ပတ်သက်၍ မြန်မာနိုင်ငံတွင် လူဦးရေ ၅၅ သန်းခန့်ရှိပြီး အသား၊ ငါး၊ဥ၊ နို့များနှင့် စားသောက်ကုန်များ နေ့စဉ်လိုအပ်ချက်များရှိကြောင်း၊ ပြည်နယ်နှင့်တိုင်းဒေသကြီးများအလိုက် ဒေသတွင်းဖူလုံနေရုံဖြင့် ကျေနပ်နေခြင်းမရှိဘဲ တစ်နိုင်ငံလုံးဖူလုံမှုရှိရေးအတွက် စဉ်းစားဆောင်ရွက်ရန်လိုအပ်နေတယ်လို့ ပြောဆိုခဲ့ပါတယ်။
ဒေသတွင်းနိုင်ငံတွေက လိုအပ်ချက် ရှိသည့် သီးနှံထွက်ကုန်တွေကို စိုက်ပျိုးရေး သုတေသန၊ ဈေးကွက်သုတေသနများ ပြုလုပ်ပြီး စိုက်ပျိုးပြီးတင်ပို့ဆောင်ရွက်ရန်လိုကြောင်းနှင့် ပြည်တွင်း၌ အဓိကလိုအပ် သည့်သီးနှံများ၊ ပြည်ပတင်ပို့မှုအတွက် အဓိကလိုအပ်သည့် သီးနှံများကို အောင်မြင်ဖြစ်ထွန်းအောင်ဆောင်ရွက်ကြရန် နစက ဥက္ကဋ္ဌက ပြောဆိုခဲ့ကြောင်း သတင်း ထုတ်ပြန်ချက်မှာဖော်ပြထားပါတယ်။
အစည်းအဝေးတွင် ကောင်စီဝင် ဒုတိယဗိုလ်ချုပ်ကြီး မိုးမြင့်ထွန်း နှင့် ပြည်ထောင်စုဝန်ကြီးများ၊နေပြည်တော်ကောင်စီဥက္ကဋ္ဌ၊ စစ်ကိုင်းတိုင်းဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသကြီး၊ မန္တလေးတိုင်းဒေသကြီး၊ ရန်ကုန်တိုင်းဒေသကြီး၊ရှမ်းပြည်နယ်နှင့် ဧရာဝတီတိုင်းဒေသကြီး အစိုးရအဖွဲ့ ဝန်ကြီးချုပ်တို့က စိုက်ပျိုးရေးနှင့်မွေးမြူရေးဆောင်ရွက်နေမှုဆိုင်ရာ ကုန်ထုတ်လုပ်မှုအခြေအနေတွေကို ရှင်းလင်းတင်ပြခဲ့ကြတယ်လို့ သတင်းရရှိပါတယ်။
#ymg/knl
#Seniorgeneralminaunghlaing
#SAC
#myanmareconomy
အာဆီယံ နိုင်ငံခြားရေးဝန်ကြီးများအစည်းအဝေး၏ ပူးတွဲကြေညာချက်တွင်ပါဝင်သည့် မြန်မာနိုင်ငံကိစ္စနှင့်ပတ်သက်သည့် အချို့ အချက်များကို မြန်မာနိုင်ငံက ပြတ်သားစွာပယ်ချလိုက်တယ်လို့ နစက နိုင်ငံခြားရေးဝန်ကြီးဌာနက သတင်းထုတ်ပြန်ပါတယ်။
“အာဆီယံ နိုင်ငံခြားရေးဝန်ကြီးများအစည်းအဝေး၏ ပူးတွဲကြေညာချက်တွင်ပါဝင်သည့် မြန်မာနိုင်ငံကိစ္စနှင့်ပတ်သက်သည့် အချို့ အချက်များအပေါ် စိတ်ပျက်မိပြီး ယင်းဖော်ပြချက်များအားပြတ်သားစွာ ပယ်ချလျက် ပါဝင်ပတ်သက်မှုမရှိကြောင်း” ဖြင့် ယနေ့ ဇူလိုင် ၁၄ ရက် နေ့စွဲဖြင့်ထုတ်ပြန်တဲ့ ကြေညာချက်မှာဖော်ပြထားပါတယ်။
မြန်မာနိုင်ငံကိစ္စနှင့်ပတ်သက်၍ တစ်ဖက်သတ်မမျှမတဖော်ပြထားသည့်အချက်အလက်အချို့ အတွက် စိတ်ပျက်မိတယ်လို့လည်း သတင်းထုတ်ပြန်ချက်ကဆိုပါတယ်။
အာဆီယံနိုင်ငံခြားရေးဝန်ကြီးများ၏ ပူးတွဲကြေညာချက်အပါအဝင် မည်သည့်ထုတ်ပြန်ချက် တွင်မဆို နိုင်ငံတစ်နိုင်ငံအားသီးခြားပစ်မှတ်ထား၍ ယင်း၏ ပြည်တွင်ရေးကိစ္စအား ဖော်ပြမှုသည် အာဆီယံပဋိညာဉ်စာတမ်းတွင် ပြဋ္ဌာန်းထားသည့် “ဝင်ရောက်မစွက်ဖက်ရေးမူ”နှင့် သွေဖည်နေသည့်အတွက် မြန်မာနိုင်ငံအနေဖြင့် မည်သည့်အခါကမျှလက်ခံခြင်းမရှိကြောင်းလည်း သတင်းထုတ်ပြန်ချက်တွင် ဆက်လက်ဖော်ပြထားပါတယ်။
အာဆီယံနိုင်ငံခြားရေးဝန်ကြီးများ၏ ပူးတွဲကြေညာချက်(မူကြမ်း)အား ညှိနှိုင်းစဉ်ကမြန်မာနိုင်ငံသည် အာဆီယံအဖွဲ့ဝင်နိုင်ငံတစ်နိုင်ငံအဖြစ် တာဝန်သိစွာဖြင့် ပါဝင်ဆွေးနွေးညှိနှိုင်းခဲ့ပေမယ့် ပူးတွဲကြေညာချက်အား အပြီးသတ်ထုတ်ပြန်ကြေညာရာတွင်မြန်မာနိုင်ငံမှ အဆိုပြု ပြင်ဆင်ဖြည့်စွက်ထည့်သွင်းလိုသည့်အချက်များ၊ မြန်မာနိုင်ငံ၏သဘောထားနှင့် စိုးရိမ်ပူပန်မှုများကို လျစ်လျူရှုခဲ့တယ်လို့လည်း နိုင်ငံခြားရေးဝန်ကြီးဌာနက ထုတ်ဖော်ပြောဆိုပါတယ်။
အင်ဒိုနီးရှားနိုင်ငံ၊ ဂျကာတာမြို့တွင် ၁၁-၇-၂၀၂၃ရက်တွင်ပြုလုပ်ခဲ့ သည့် (၅၆)ကြိမ်မြောက် အာဆီယံနိုင်ငံခြားရေးဝန်ကြီးများ အစည်းအဝေးတွင် အဆိုပါပူးတွဲကြေညာချက်ကို ထုတ်ပြန်ကြေညာခဲ့ခြင်းဖြစ်ပါတယ်။
မကြာမီကျင်းပမယ့် ကမ္ဘောဒီးယားနိုင်ငံ အထွေထွေရွေးကောက်ပွဲတွင် မြန်မာနိုင်ငံမှ ရွေးကောက်ပွဲလေ့လာစောင့်ကြည့်သူ (၂)ဦးလာရောက်မှာ ဖြစ်တယ်လို့ သိရပါတယ်။
ကမ္ဘောဒီးယားရွေးကောက်ပွဲကော်မရှင် ဒုတိယအတွင်းရေးမှူးချုပ် ဆွမ်ဆိုရိန်ဒါရဲ့ ပြောကြားချက်ကို ကိုးကားပြီး ဖနွမ်းပင် အခြေစိုက် ခမာတိုင်း သတင်းစာပါ သတင်းတစ်ပုဒ်အရ မြန်မာနိုင်ငံမှ ရွေးကောက်ပွဲလေ့လာသူနှစ်ဦးဟာ အခြားသော အာဆီယံနိုင်ငံ (၅)နိုင်ငံမှ လေ့လာသူများနှင့်အတူ သွားရောက်ပြီး လေ့လာစောင့်ကြည့်ကြမှာဖြစ်ပါတယ်။
အဲဒီအထဲမှာ အရှေ့တီမောမှ ၂ ဦး၊စင်္ကာပူမှ ၁ ဦး ၊ဗီယက်နမ်မှ ၅ ဦးနှင့်အင်ဒိုနီးရှားမှတစ်ဦးနှင့် အခြားအာဆီယံနိုင်ငံတွေက ၄ ဦး စုစုပေါင်း ၁၅ ဦးတို့ပါဝင်ကြတယ်လို့ သူကပြောပါတယ်။
၂၀၂၃ ဇူလိုင် ၂၃ရက်မှာကျင်းပမယ့် (၇)ကြိမ်မြောက်ကမ္ဘောဒီးယားအထွေထွေရွေးကောက်ပွဲကို နိုင်ငံတကာ အဖွဲ့အစည်း ၁၂၁ ခုမှ လေ့လာ စောင့်ကြည့်သူပေါင်း ၈၈,၀၀၀ ဦးကျော် လာရောက်ကြမယ်လို့ သူကပြောတဲ့အကြောင်း သတင်းမှာဖော်ပြထားပါတယ်။ လေ့လာစောင့်ကြည့်သူတွေအပြင် အထူးဧည့်သည်တွေကိုပါဖိတ်ကြားထား တယ်လို့သိရပါတယ်။
မြန်မာအပါအဝင် အာဆီယံနိုင်ငံတွေက ရွေးကောက်ပွဲစောင့်ကြည့်လေ့လာသူတွေဟာ မည်သည့်အဖွဲ့အစည်းတွေ ကဆိုတာကိုတော့ သတင်းမှာ အသေးစိတ်ရေးသားထားခြင်းမရှိပါဘူး။
#knl/ymg
#Myanmar_observers_in_Cambodia_election
ဇူလိုင် ၁၃-၂၀၂၃
ထိုင်းနိုင်ငံရဲ့ ဝန်ကြီးချုပ်အသစ်ဖြစ်လာဖို့ ပါလီမန်က လုံလောက်တဲ့ထောက်ခံမဲမရရှိတဲ့အတွက် ပီတာလင်ဂျာရိုရတ်ဟာ ပထမအကျော့အဖြစ် ယနေ့ ဇူလိုင်၁၃ရက်က ဝန်ကြီးချုပ်နေရာ မဲပေးရွေးချယ်ရာ မှာ ရှုံးနိမ့်သွားခဲ့ပါတယ်။
ယနေ့ပူးတွဲပါလီမန်အစည်းအဝေးတက်ရောက်လာတဲ့ လွှတ်တော်နှစ်ရပ်ကအမတ် ၇၀၅ ဦးထဲမှာ သူ့ကိုထောက်ခံမဲပေးသူ ၃၂၄ ဦး၊ ကန့်ကွက်သူ ၁၈၂ ဦးနှင့် မဲမပေးဘဲနေသူ ၁၉၉ ဦးတို့ရှိခဲ့ပါတယ်။ The Move Forward Party (MFP) ရှေ့သို့ပါတီခေါင်းဆောင် ပီတာဟာ ဝန်ကြီးချုပ်ဖြစ်ဖို့ အနည်းဆုံးထောက်ခံမဲ ၃၇၅မဲရရှိဖို့လိုအပ်တာဖြစ်ပါတယ်၊
သူဟာ အောက်လွှတ်တော်အမတ် ၃၁၁ ဦးရဲ့ထောက်ခံမဲရရှိပြီး ၁၄၈ ဦးက သူ့ကိုကန့်ကွက်ခဲ့ကာ ၃၉ ဦးက မဲမပေးဘဲ နေခဲ့ကြပါတယ်။ အထက်လွှတ်တော်ဆီးနိတ်က သူ့ကိုထောက်ခံမဲ ၁၃ မဲ၊ကန့်ကွက်မဲ ၃၄မဲနှင့်မဲမပေးဘဲနေသူ ၁၅၉ ဦးရှိခဲ့တာဖြစ်ပါတယ်။
အစောပိုင်းမှာတော့ ပါလီမန်ဥက္ကဋ္ဌ ဝန်မိုဟာမက်နိုမာသာက ဒုတိယအကျော့နှင့်တတိယအကျော့ မဲပေးမှုကို ဇူလိုင် ၁၉ ရက်နှင့် ၂၀ရက်တွေမှာ ထပ်မံကျင်းပမယ်လို့ကြေညာထားပါတယ်။ အဲဒီအကျော့တစ်ခုခု ဒါမှမဟုတ်နှစ်ခုစလုံးမှာ သူ့ကိုပဲ ပြန်ပြီး ဝန်ကြီးချုပ်လောင်းအဖြစ် ပြန်အဆိုပြုဦးမှာလားဆိုတာတော့ သိပ်မရှင်းလင်းလှပါဘူး။
အောက်လွှတ်တော်နှင့် အထက်လွှတ်တော်ပူးတွဲ အစည်းအဝေးမှာ မစ္စတာပီတာနှင့်ပတ်သက်လို့ သူ့ရဲ့ လွှတ်တော် ကိုယ်စားလှယ်အရည်အချင်းကိစ္စကို ခြောက်နာရီကြာ ငြင်းခုန်ကြပြီးနောက် ဝန်ကြီးချုပ်နေရာအတွက် မဲပေးခဲ့ ကြတာဖြစ်ပါတယ်။
Source Bangkok Post
#Thailand_Politics
#Pita+Limjaroenrat
#The_Move_Forward_Party
ဇူလိုင်-၁၂၊၂၀၂၃
ဒေါ်အောင်ဆန်းစုကြည်နှင့်သူ မြန်မာနိုင်ငံမှာ တွေ့ဆုံခဲ့တယ်လို့ ထိုင်းနိုင်ငံခြားရေးဝန်ကြီး ဒွန်ပရာမွတ်ဝီနိုင်းက အာဆီယံနိုင်ငံခြားရေးဝန်ကြီးတွေကို အင်ဒိုနီးရှားနိုင်ငံ ဂျာကာတာမှာပြောကြားခဲ့တယ်လို့ တိုကျိုသတင်းဌာနက သတင်းရေးသားပါတယ်။
အကျပ်အတည်းအဆုံးသတ်ဖို့ ဒေါ်အောင်ဆန်းစုကြည်က တွေ့ဆုံဆွေးနွေးမှုတွေပြန်လည်စတင်ဖို့ တောင်းဆိုခဲ့တယ်လို့ ဒွန်ကပြောကြောင်း ချယ်နယ်နယူးအေးရှားရဲ့ သတင်းတစ်ပုဒ်မှာဖော်ပြထားပါတယ်။
“ သူမဟာ တွေ့ဆုံဆွေးနွေးမှုကိုတိုက်တွန်းအားပေးခဲ့တယ်” လို့ ဒွန်ကပြောပါတယ်။
“ တွေ့ဆုံမှုဟာ ကောင်းမွန်တဲ့တွေ့ဆုံမှုတစ်ခုဖြစ်ခဲ့တယ်” လို့လည်း ဒွန်ကပြောတယ်လို့ ချယ်နယ်နယူးအေးရှားက သတင်းဖော်ပြပါတယ်။
နေပြည်တော်က အာဏာပိုင်တွေနှင့် စေ့စပ်ညှိနှိုင်းမှုတွေလုပ်ဖို့အတွက် သူက အကြံပေးခဲ့တယ်လို့လည်း ဒွန်က ပြောတဲ့အကြောင်း ချယ်နယ်နယူးအေးရှားသတင်းမှာ ဆက်လက်ဖော်ပြထားပါတယ်။
ဒေါ်အောင်ဆန်းစုကြည်ရာ ရုပ်ပိုင်းအရရော စိတ်ပိုင်းအရပါ ကျန်းမာရေးကောင်းမွန်နေတယ်လို့ ထိုင်းနိုင်ငံခြားရေးဝန်ကြီးဒွန် က ပြောတဲ့အကြောင်း အာဆီယံ သံတမန် သတင်းအရင်းအမြစ်ကို ကိုးကားပြီး တိုကျိုသတင်းဌာနက သတင်းဖော်ပြထားပါတယ်။
ဒါဟာ ၂၀၂၁ခုနှစ် ဖေဖော်ဝါရီနောက်ပိုင်းမှာ ဒေါ်အောင်ဆန်းစုကြည်နှင့် အဆင့်မြင့်နိုင်ငံခြားရေးအရာရှိကြီးတစ်ဦးတို့ ပထမဆုံးတွေ့ဆုံတာဖြစ်တယ်လို့လည်း သတင်းကဆိုပါတယ်။
ဂျာကာတာမြို့တော်မှာ အင်္ဂါနေ့က စတင်ကျင်းပတဲ့ အာဆီယံနိုင်ငံခြားရေးဝန်ကြီးများရဲ့ နှစ်ရက်တာအစည်းအဝေးတစ်ခု အတွင်း ထိုင်းနိုင်ငံခြားရေးဝန်ကြီးက ဒေါ်အောင်ဆန်းစုကြည်နှင့်တွေ့ဆုံခဲ့တာကို အကျဉ်းချုပ်တင်ပြခဲ့တာဖြစ်ပါတယ်။
သူတို့နှစ်ဦးတွေ့ဆုံတာ (၂)နာရီနီးပါးကြာမြင့်ခဲ့တယ်လို့ ဒွန်ကပြောပါတယ်။ သူဟာ ဒေါ်အောင်ဆန်းစုကြည်ကို နေပြည်တော်ရှိ အကျဉ်းထောင်တစ်ခုအတွင်းတွေ့ဆုံခဲ့ပုံရတယ်လို့ တိုကျိုက သတင်းရေးသားပါတယ်။
Source kyodonews/ChannelNewsAsia/AFP
ထိုင်းဝန်ကြီးချုပ် ပရာရွတ်ချန်အိုချာက သူသည် နိုင်ငံရေးမှအနားယူတော့မည်ဖြစ်ကြောင်း ဇူလိုင် ၁၁ ရက် အင်္ဂါနေ့တွင် ကြေညာခဲ့ပါတယ်။သူဟာ စစ်တပ်အာဏာသိမ်းပြီး အာဏာရယူခဲ့ပြီး ၉နှစ်အကြာမှာ ပြောကြားခဲ့တာဖြစ်ပါတယ်။ သူဟာ ယာယီအားဖြင့်တော့ အုပ်ချုပ်ပေးမယ်လို့လည်း ကတိပေးပြောကြားပါတယ်။
စစ်တပ်ကျောရိုးပြုထားတဲ့ ယူနိုက်တက်ထိုင်းနေရှင်းပါတီဟာ မေ ၁၄ ရက်ရွေးကောက်ပွဲမှာ အမတ်နေရာ ၅၀၀မှာ ၃၆ နေရာသာရရှိခဲ့ပြီးနောက် သူဒီလိုကြေညာမယ်လို့ တော်တော်များများက မျှော်လင့်ထားခဲ့တာဖြစ်ပါတယ်။ သူဟာ နောက် အစိုးရဖွဲ့ပြီးသည်အထိ အိမ်စောင့်အစိုးရ ဝန်ကြီးချုပ်အဖြစ်ဆက်ရှိနေဦးမှာပါ။
တပ်ဦးစီးချုပ်ဟောင်းတစ်ဦးဖြစ်ပြီး ဘုရင်စနစ်ကို အခိုင်အမာယုံကြည်ထားတဲ့သူဟာ ၂၀၁၉ရွေးကောက်ပွဲမှာပါလီမန်က သူ့ကိုဝန်ကြီးချုပ်အဖြစ် မရွေးခင်အထိ စစ်အစိုးရကို ဦးဆောင်ခဲ့ပါတယ်။
သူဟာ အောင်မြင်မှုများစွာရရှိခဲ့တယ်ဆိုတဲ့အချက်အပေါ် အသက် ၆၉နှစ်အရွယ် ပရာရွတ်က ငြင်းဆိုခဲ့ပါတယ်။
“ ကျွန်တော်ဟာ ဝန်ကြီးချုပ်အဖြစ်နှင့် ချစ်မြတ်နိုးရဲ့ ပြည်သူတွေရဲ့ အကျိုးအတွက် နိုင်ငံတော်၊ဘာသာနှင့် ဘုရင်စနစ်ကို ကာကွယ်ပေးခဲ့ပါတယ်။ ရလာဒ်ဟာ လက်ရှိမှာ ပြည်သူတွေအတွက် အသီးအပွင့်ဖြစ်ထွန်းနေပါပြီ” လို့ သူက ပြောပါတယ်။
“ကျွန်တော်ဟာ နိုင်ငံရဲ့ ဒေသအားလုံး တည်ငြိမ်ရေးနှင့်ငြိမ်းချမ်းရေးကိုတိုးမြှင့်ဖို့ကြိုးစားဆောင်ရွက်ခဲ့ပြီး ပြည်တွင်းနှင့် နို်ငံတကာ အတားအဆီးတော်တော်များများကိုလည်း ကျော်ဖြတ်ခဲ့ပါတယ်” လို့ သူကဆက်ပြောပါတယ်။
ကိုးနှစ်တာကာလအတွင်း သူဟာ တရာရုံးအမှု၊အောက်လွှတ်တော်အယုံအကြည်မရှိအဆိုမဲခွဲမှုတွေနှင့် အတိုက်အခံတွေရဲ့ လမ်းပေါ်ဆန္ဒပြပွဲတွေများစွာမှာ ဆက်လက်ရပ်တည်နိုင်ခဲ့ပါတယ်။
ကြာသပတေးနေ့မှာ ပါလီမန်အသစ်က မသေချာမရေရာတဲ့ ရလာဒ်ထွက်နိုင်တဲ့ ဝန်ကြီးးချုပ်အသစ်ရွေးချယ်ဖို့ စီစဉ်နေစဉ်မှာ သူအနားယူမယ်ဆိုတဲ့ ကြေညာချက် ထွက်ပေါ်လာတာဖြစ်ပါတယ်။
Source Reuters
#Thailand_Politics
#Prayuth Chan-ocha
ဇူလိုင်၁၀-၂၀၂၃
ဆောက်လုပ်ရေးပစ္စည်းများနှင့်အသုံးအဆောင်ပစ္စည်းများကို ဈေးတင်ရောင်းသူတွေကို ထိထိရောက်ရောက် အရေးယူကြဖို့ ဗိုလ်ချုပ်မှူးကြီးမင်းအောင်လှိုင်က ဇူလိုင် ၁၀ရက်နေ့တွင် ရခိုင်ပြည်နယ် စစ်တွေမြို့တွင်ကျင်းပတဲ့ မိုခါမုန်တိုင်းဒဏ်သင့် ရခိုင်ဒေသများ ပြန်လည်ထူထောင်ရေးလုပ်ငန်းများဆိုင်ရာ အစည်းအဝေးတစ်ခုတွင် တာဝန်ရှိသူတွေကိုမှာကြားခဲ့ပါတယ်။
“သဘာဝဘေးအန္တရာယ် ကြုံတွေ့ရသည့်အချိန်တွင် ဖြစ်လေ့ဖြစ်ထရှိသည့်ဆောက်လုပ်ရေးပစ္စည်းများ၊ အသုံးအဆောင်ပစ္စည်းများကို ဈေးနှုန်းမြှင့်တင်ရောင်းချနေသူများကိုလည်း ထိထိရောက်ရောက် အရေးယူဆောင်ရွက်ရန်လိုအပ်ပါတယ်။ ဥပဒေအရထိရောက်သည့် ပြစ်ဒဏ်များကို ပေးရမှာ ဖြစ်ပြီး မိမိတို့တစ်ဦးတစ်ယောက်၏ ကိုယ်ကျိုးစီးပွားအတွက် … ဒေသခံအချင်းချင်းအပေါ် အမြတ်ထုတ်ဆောင်ရွက်ခြင်းမှာ မဖြစ်သင့်တဲ့အတွက် တာဝန်ရှိသူများအနေဖြင့် စနစ်တကျ ကြပ်မတ်ဆောင်ရွက်သွားရန်လိုအပ်ပါတယ်” လို့ နစက ဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်က ပြောကြားခဲ့တာဖြစ်ကြောင်း နစကရဲ့ သတင်းထုတ်ပြန်ချက်မှာဖော်ပြထားပါတယ်။
ဘေးဒဏ်ကျရောက်ခဲ့ပြီး နှစ်လခန့်အတွင်း ပြန်လည်ထူထောင်ရေးလုပ်ငန်းများကိုအတိုင်းအတာတစ်ခုအထိ တိုးတက်မှုရှိအောင်ဆောင်ရွက်နိုင်ခဲ့သည်ကို ယခု ထပ်မံရောက်ရှိချိန်တွင် တွေ့ရှိရတယ်လို့ နစက ဥက္ကဋ္ဌက သုံးသပ်ပြောဆိုပါတယ်။
ဒေသတွင်နေထိုင်ကြသူများအနေဖြင့်လည်း ပြန်လည်ထူထောင်ရေးလုပ်ငန်းတွေမှာ အတူတကွ ဝိုင်းဝန်းကြိုးပမ်းဆောင်ရွက်ကြမည်ဆိုပါက မူလအခြေအနေများထက်ပိုမိုကောင်းမွန်သည့် ဒေသများအဖြစ် ဆက်လက်ဖော်ဆောင်သွားနိုင်မှာဖြစ်တယ်လို့လည်း ဗိုလ်ချူပ်မှူးကြီးက ပြောဆိုပါတယ်။
ခေတ်မီမြို့ပြအဖြစ်ရောက်ရှိလာစေရေး မြို့တွင်းရှိ ဆက်သွယ်ရေးလမ်းကြောင်းများကိုလည်း အဆင့်မြှင့်တင်ခြင်းများ ဆောင်ရွက်သွားရမည်ဖြစ်သကဲ့သို့ အဆောက်အဦများကိုလည်း ခေတ်နှင့်လျော်ညီသည့် အဆောက်အဦများဖြစ်စေရေး စီမံဆောင်ရွက်သွားရန်လိုကြောင်း၊ ပြန်လည်ထူထောင်ရေးလုပ်ငန်းများဆောင်ရွက်ရာ၌ ဒေသ၏ ရေရှည်အကျိုးကိုကြည့်၍ စနစ်တကျ တွက်ချက်ဆောင်ရွက်သွားရန်လိုကြောင်းလည်း နစက ဥက္ကဋ္ဌကပြောဆိုခဲ့တယ်လို့ နစက သတင်းထုတ်ပြန်ချက် အရသိရပါတယ်။
ပြည်ထောင်စုဝန်ကြီးတွေ၊ဒုဝန်ကြီးတွေ၊ ရခိုင်ပြည်နယ်ဝန်ကြီးချုပ်နှင့်ပြည်နယ်အဆင့်တာဝန်ရှိသူတွေကလည်း မိမိတို့ တာဝန်ယူထားတဲ့ ကဏ္ဍများအလိုက် ဆောင်ရွက်ပြီးစီးမှုများနှင့် ဆက်လက်ဆောင်ရွက်မည့် ပြန်လည်ထူထောင်ရေး လုပ်ငန်းတွေကိုရှင်းလင်းတင်ပြခဲ့ကြပါတယ်။
စစ်တွေမြို့ View Point နှင့်ရှုခင်းသာလမ်းတစ်လျောက် ပြန်လည်ပြုပြင်ရေးလုပ်ငန်းများဆောင်ရွက်နေသည်များကို နစက ဥက္ကဋ္ဌနှင့်အဖွဲ့က သွားရောက်ကြည့်ရှုစစ်ဆေးခဲ့တဲ့အပြင် ဘက်စုံသုံးဆိပ်ကမ်း၌ MV ROYAL VENUS သင်္ဘောနှင့် Fortuneသင်္ဘောပေါ်မှ ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများတွင် အသုံးပြုမည့်ပစ္စည်းများကို လူအင်အား၊ စက်ယန္တရားအင်အားများ အသုံးပြု၍ သဘာဝဘေးဒဏ်သင့် ဒေသများသို့ ဖြန့်ခွဲပေးရန်ဆောင်ရွက်နေမှုတွေကိုလည်းကြည့်ရှုစစ်ဆေးခဲ့တယ်လို့ သတင်းထုတ်ပြန်ချက်အရသိရပါတယ်။
Knl/ymg
Page 72 of 193