Published 6 April 2022
တာဝန်ပြီးဆုံးလို့ပြန်လည်ထွက်ခွာမယ့် မြန်မာနိုင်ငံဆိုင်ရာ ဩစတြေးလျနိုင်ငံ သံအမတ်ကြီး H.E. Ms. Andrea Marie Faulkner ဟာ ယနေ့ ဧပြီ(၆)ရက် မွန်းလွဲပိုင်းက နေပြည်တော်ရှိ နစကဥက္ကဋ္ဌရုံးမှာ နစက ဥက္ကဋ္ဌ ဗိုလ်ချူပ်မှူးကြီး မင်းအောင်လှိုင်ထံ လာရောက်တွေ့ဆုံ နှုတ်ဆက်ခဲ့တယ်လို့ နစကရဲ့သတင်းထုတ်ပြန်ချက်အရသိရပါတယ်။
အဲသလိုတွေ့ဆုံရာတွင် နှစ်နိုင်ငံအကြား ရှိရင်းစွဲ ဆက်ဆံရေးကောင်းများကို ဆက်လက်ထိန်းသိမ်းဆောင်ရွက်နိုင်မည့် အခြေအနေများနှင့် နှစ်နိုင်ငံ အစိုးရနှင့် ပြည်သူတို့အကြား ပူးပေါင်းဆောင်ရွက်မှုများကို ကဏ္ဍပေါင်းစုံ၌ ဆက်လက်တိုးမြှင့် ဆောင်ရွက်နိုင်မည့် အခြေအနေများ၊ မြန်မာနိုင်ငံ၏ နိုင်ငံရေးဖြစ်ပေါ်ပြောင်းလဲမှု အခြေအနေများ၊ အကြမ်းဖက်အဖွဲ့မျာနှင့် အကြမ်းဖက်သမားများက နိုင်ငံတော်အစိုးရ၏ အုပ်ချုပ်မှု ယန္တရားပျက်စီးစေရန် အပြစ်မဲ့ပြည်သူများနှင့် ပညာရေး၊ ကျန်းမာရေးနှင့် အခြားနိုင်ငံ့ဝန်ထမ်းများ အပေါ် အကြမ်းဖက်လုပ်ရပ်များ ကျူးလွန်လျက်ရှိသည့် အခြေအနေများ၊ အဆိုပါ အကြမ်းဖက် ကိစ္စရပ်များတွင် ပါဝင်ပတ်သက်သူများ၊ အားပေးအားမြှောက်ပြုလုပ်သူများကို ဥပဒေ နှင့်အညီသာ အရေးယူဆောင်ရွက်သွားမည့် အခြေအနေများ၊ မြန်မာနိုင်ငံအနေဖြင့် စစ်မှန်စည်းကမ်းပြည့်ဝသည့် ပါတီစုံဒီမိုကရေစီစနစ် ခိုင်မာစေရေး၊ ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စု တည်ဆောက်ရေးကို ဦးတည် ဆောင်ရွက်လျက်ရှိသည့် အခြေအနေများကို ဆွေးနွေးခဲ့ကြတယ်လို့သိရပါတယ်။
အဲဒီအပြင် မြန်မာနိုင်ငံသို့ အာဆီယံအလှည့်ကျ ဥက္ကဋ္ဌ ၏ မြန်မာနိုင်ငံဆိုင်ရာ အထူးကိုယ်စားလှယ် ကမ္ဘောဒီးယားနိုင်ငံ ဒုတိယဝန်ကြီးချုပ် လာရောက်ခဲ့မှုကို ဩစတြေးလျနိုင်ငံအနေဖြင့် ဝမ်းမြောက်ကြိုဆိုပြီး မြန်မာနိုင်ငံနှင့် ပတ်သက်၍ အပြုသဘောဆောင်သည့်ကိစ္စရပ်များကို ဆက်လက်ဆောင်ရွက်နိုင်မည် ဟု ယုံကြည်သည့်အခြေအနေများ၊ မြန်မာနိုင်ငံအနေဖြင့် အာဆီယံ ဘုံသဘောတူညီ ချက်(၅)ရပ်အပေါ် ဆောင်ရွက်နိုင်သည်မှန်သမျှကို အကောင်အထည်ဖော် ဆောင်ရွက် လျက်ရှိပြီး အကြမ်းဖက်မှုများနှင့်ပတ်သက်၍ နိုင်ငံတကာစံနှုန်းများအတိုင်းသာ ဆောင်ရွက်လျက်ရှိသည့် အခြေအနေများ၊ တွေ့ဆုံဆွေးနွေးမှုများဆောင်ရွက်နိုင်ရေး အတွက်လည်း ဆောင်ရွက်ပေး၍ရနိုင်သည်မှန်သမျှကို တွေ့ဆုံဆွေးနွေးနိုင်ရေးစီစဉ် ဆောင်ရွက်ပေးလျက်ရှိသည့် အခြေအနေများ၊ မြန်မာနိုင်ငံရှိ ပြည်သူများအတွက် အာဆီယံအသင်း၏ လူသားချင်းစာနာမှုဆိုင်ရာ အကူအညီပေးရေးဌာန AHA Centre မှတစ်ဆင့် အကူအညီများပေးနိုင်ရေး ဆောင်ရွက်လျက်ရှိရာတွင်လည်း မြန်မာနိုင်ငံ တွင် ကိုဗစ်-၁၉ ရောဂါကြောင့် ထိခိုက်ခဲ့ရသူများနှင့် ပဋိပက္ခကြောင့် ထိခိုက်ခဲ့ရသူ များရှိပြီး အစိုးရကိုကူညီမှုနှင့် ပြည်သူကိုကူညီမှုကို ကွဲပြားစွာ သိမြင်စေလိုသည့် အခြေအနေများနှင့် ပတ်သက်၍ အမြင်ချင်း ဖလှယ်ဆွေးနွေးခဲ့ကြတယ်လို့ နစက,က သတင်းထုတ်ပြန်ပါတယ်။
တွေ့ဆုံရာတွင် နစကဥက္ကဋ္ဌနှင့်အတူ ကောင်စီတွဲဖက်အတွင်းရေးမှူး ဒုတိယဗိုလ်ချုပ်ကြီး ရဲဝင်းဦး၊ နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဦးဝဏ္ဏမောင်လွင် တို့တက်ရောက်ကြပြီး ဩစတြေးလျနိုင်ငံသံအမတ်ကြီးနှင့်အတူ မြန်မာနိုင်ငံဆိုင်ရာ ဩစတြေးလျနိုင်ငံစစ်သံမှူး Colonel Anthony Egan နှင့် သံရုံး ဒုတိယအတွင်းဝန် Mr. Bryan Bong တို့တက်ရောက်ခဲ့ကြတယ်လို့သိရပါတယ်။
Published 6 April 2022
ပြည်ထောင်စုသမ္မတမြန်မာနိုင်ငံတော်ဆိုင်ရာ အိန္ဒိယသံအမတ်ကြီးအသစ် မစ္စတာ ဗီနေးကူးမား H.E. Mr. Vinay Kumar ဟာ ဒီကနေ့ ဧပြီလ(၆)ရက် မနက်က နေပြည်တော်ရှိ နစက ဥက္ကဋ္ဌရုံး၊သံတမန်ဆောင်မှာ ယင်းရဲ့သံအမတ်ခန့်အပ်လွှာကို နစက ဥက္ကဋ္ဌ ဗိုလ်ချူပ်မှူးကြီး မင်းအောင်လှိုင်ထံ ပေးအပ်ခဲ့ကြောင်း သတင်းထုတ်ပြန်ချက်အရသိရပါတယ်။
နစက ဥက္ကဋ္ဌနှင့်အတူ နစက တွဲဖက်အတွင်းရေးမှူး ဒုတိယဗိုလ်ချုပ်ကြီး ရဲဝင်းဦး၊ နိုင်ငံခြားရေးဝန်ကြီး ဦးဝဏ္ဏမောင်လွင်နှင့် သံတမန်ရေးရာဦးစီးဌာန ညွှန်ကြားရေးမှူးချုပ် ဦးဝဏ္ဏဟန်တို့တက်ရောက်ကြပြီး အိန္ဒိယသံအမတ်ကြီးနှင့် အိန္ဒိယနိုင်ငံသံအမတ်ကြီးနှင့်အတူ ဒုတိယ သံရုံးအကြီးအကဲ သံမှူးကြီး Ms. Nabanita Chakrabarti နှင့် စစ်သံမှူး Colonel Ketan Arun Mohite တို့ တက်ရောက်ခဲ့ကြပါတယ်။
အဲဒီနောက် နှစ်နိုင်ငံသံတမန်ဆက်ဆံမှုတွင် ကောင်းမွန်သည့် သမိုင်းကြောင်းရှိခဲ့ သည့်အခြေအနေများနှင့် ချစ်ကြည်ရင်းနှီးမှု တိုးမြှင့်ဆောင်ရွက်ရေးဆိုင်ရာကိစ္စရပ် များ၊ နယ်စပ်ဒေသတည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးဆိုင်ရာကိစ္စရပ်များ၊ ကုန်သွယ်မှုတိုးမြှင့်ရေးဆိုင်ရာကိစ္စရပ်များ၊ နှစ်နိုင်ငံကဏ္ဍပေါင်းစုံတွင် ဆက်လက် ပူးပေါင်းဆောင်ရွက်သွားမည့် အခြေအနေများနှင့် မြန်မာနိုင်ငံ၏ နိုင်ငံရေးဖြစ်ပေါ် ပြောင်းလဲမှု အခြေအနေများကို ရင်းရင်းနှီးနှီးဆွေးနွေးခဲ့ကြတယ်လို့ နစက,က သတင်းထုတ်ပြန်ပါတယ်။
သံအမတ်ကြီး မစ္စတာဗီးကူးမားကို ၁၉၆၉ ခုနှစ်၊ သြဂုတ်လ ၂၃ ရက်တွင် မွေးဖွားခဲ့ပြီး၊ အိန္ဒိယ နည်းပညာ တက္ကသိုလ်မှ နည်းပညာ(ဂုဏ်ထူး) ဘွဲ့ကိုရရှိခဲ့ပါတယ်။ ၁၉၉၂ ခုနှစ်တွင် အိန္ဒိယ ပြည်ပရေးရာ - ဝန်ကြီးဌာနသို့ စတင်ဝင်ရောက်တာဝန်ထမ်းဆောင်ခဲ့ပြီး၊ ဥဇဘတ် ကစ္စတန်နိုင်ငံ၊ ကာဂျစ်စတန်နိုင်ငံ၊ ကနေဒါနိုင်ငံ၊ ပိုလန်နိုင်ငံ၊ အီရန်နိုင်ငံ၊ အမေရိကန်ပြည်ထောင်စု၊ နီပေါနိုင်ငံနှင့် အာဖဂန် နစ္စတန်နိုင်ငံတို့ရှိ အိန္ဒိယသံရုံးနှင့် အမြဲတမ်းကိုယ်စားလှယ်အဖွဲ့ ရုံးများတွင် အသီးသီးတာဝန်ထမ်းဆောင်ခဲ့ပါတယ်။ အိန္ဒိယပြည်ပ ရေးရာဝန်ကြီးဌာနတွင် ၂၀၁၃ ခုနှစ်မှ ၂၀၁၅ ခုနှစ်အထိ အရှေ့နှင့်တောင်အာရှဌာနတွင် တွဲဖက်အတွင်းဝန်အဖြစ် လည်းကောင်း၊ ၂၀၁၇ ခုနှစ်မှ ၂၀၁၈ ခုနှစ်အထိ တောင်နှင့် နာလန္ဒာရှေးဟောင်း ယဉ်ကျေးမှုနယ်မြေဆိုင်ရာဌာနခွဲတွင် တွဲဖက် အတွင်းဝန်အဖြစ် လည်းကောင်း၊ ၂၀၂၀ ပြည့်နှစ်မှ သံအမတ်အဖြစ်မခန့်အပ်ခင်အထိ အိန္ဒိယပြည်ပရေးရာ ဝန်ကြီးဌာနတွင် လက်ထောက်အတွင်းဝန်အဖြစ်လည်းကောင်း တာဝန်ထမ်းဆောင်ခဲ့ပြီး သူဟာ အိမ်ထောင်ရှင် တစ်ဦး ဖြစ်တယ်လို့ သိရှိရပါတယ်။
Published 4 April 2022
တရုတ်နိုင်ငံရဲ့ ကုန်းလမ်း-ရေလမ်း လမ်းကြောင်းသစ်တစ်ခုအဖြစ် ရန်ကုန်ကို ခရီးဆုံးထားရှိကာ အိန္ဒိယသမုဒ္ဒရာကို တိုက်ရိုက်ရောက်အောင် ကုန်စည်ပို့ဆောင်တဲ့ တရုတ်-မြန်မာ အိန္ဒိယသမုဒ္ဒရာ အပြည်ပြည်ဆိုင်ရာ ပူးတွဲပို့ဆောင်ရေးရထား (ချုံချင့်-ရန်ကုန်- အိန္ဒိယသမုဒ္ဒရာ)ဟာ ဧပြီ ၂ရက်နေ့ စနေနေ့က ချုံချင့် မီးရထား ကွန်တိန်တာ စင်တာကနေ ထွက်ခွာ ခုတ်မောင်းခဲ့ပါတယ်။
ချုံချင့်ကထုတ်လုပ်တဲ့ မော်တော်ဆိုင်ကယ် အစိတ်အပိုင်းတွေ သယ်ဆောင်လာတဲ့ အဲဒီ အပြည်ပြည်ဆိုင်ရာပူးတွဲသယ်ယူပို့ဆောင်ရေးရထားဟာ ယူနန်ပြည်နယ် မိုဟန်မှတစ်ဆင့် လာအိုနိုင်ငံတွင်းသို့ ဝင်ရောက်ပြီးနောက် ဗီယင်ကျန်းမှာ ကုန်းလမ်းပို့ဆောင်ရေးအဖြစ် ပြောင်းလဲကာ ထိုင်းနိုင်ငံကို အဝေးပြေးလမ်မကြီးမှ တစ်ဆင့် ဖြတ်သန်းပြီး နောက်ဆုံးတွင် မြန်မာနိုင်ငံ ရန်ကုန်မြို့သို့ ရောက်ရှိမှာဖြစ်ပါတယ်။
ယခုသယ်ယူပို့ဆောင်မှုအသစ်အရ ရန်ကုန်ကိုရောက်ရှိဖို့ ရက်ပေါင်း ၁၀ရက်မှ ၁၄ရက်အထိ ကြာမြင့်မှာဖြစ်ပါတယ်။ တကယ်လို့ ယန်စီမြစ်ကနေတစ်ဆင့် အရှေ့ပိုင်းကမ်းခြေမြို့အထိသွားကာ အဲဒီကမှတစ်ဆင့် ပင်လယ်ထဲထွက်တဲ့ သမားရိုးကျ လမ်းကြောင်းအရဆိုရင် ရက်ပေါင်း ၂၀ကျော် ကြာမြင့်တာပါ။ ယခုလမ်းကြောင်းသစ်အရ သယ်ယူပို့ဆောင်ရာမှာ ကြာမြင့်ချိန်ကို ဖြတ်တောက်ပေးနိုင်မှာဖြစ်ပါတယ်။
ဒီနှစ်အကုန်မှာ အဲဒီလမ်းကြောင်းကနေ ကမ္ဘာအနှံ့ နိုင်ငံပေါင်း၁၀၇နိုင်ငံက ဆိပ်ကမ်းပေါင်း ၃၁၅ ခုအထိ ရောက်ရှိနိုင်မယ်လို့ သိရပါတယ်။
၂၀၂၁ခုနှစ်မှာ ချုံချင့်ကနေသွားတဲ့ ရထား-ပင်လယ်ကုန်သယ်ယူမှု၊ နယ်စပ်ဖြတ်ကျော်ပြီး လွန်းပျံ ဘတ်စ်ကားများနှင့်ပို့ဆောင်မှုနှင့် နိုင်ငံတကာရထားလမ်းကြောင်းအသုံးပြုမှုတို့ဟာ စုစုပေါင်းကုန်စည်တွေရဲ့ ၆၀ရာခိုင်နှုန်း၊၁၇ရာခိုင်နှုန်းနှင့် ၃၀ရာခိုင်နှုန်းအသီးသီးရှိခဲ့ပါတယ်။
တရုတ်-မြန်မာ-အိန္ဒိယသမုဒ္ဒရာ အပြည်ပြည်ဆိုင်ရာပူးတွဲသယ်ယူပို့ဆောင်ရေးရထား အောင်မြင်စွာ စတင်ထွက်ခွာနိုင်တဲ့အတွက် ကုန်းလမ်း-ရေကြောင်းလမ်းကြောင်းသစ်တစ်ခုအဖြစ် တရုတ်နိုင်ငံမှ မြန်မာနိုင်ငံနှင့် အိန္ဒိယသမုဒ္ဒရာသို့ ရောက်ရှိသော အပြည်ပြည်ဆိုင်ရာ ထောက်ပံ့ပို့ဆောင်ရေးလမ်းကြောင်းသစ်ကို ဖွင့်လှစ်ပေးနိုင်ခဲ့ပြီး အဲဒါဟာ ကုန်းလမ်း-ရေကြောင်းလမ်းကြောင်းသစ် အောင်မြင်မှုတစ်ခုဖြစ်တယ်လို့ ရန်ကုန်အခြေစိုက် တရုတ်ပြည်သူ့သမ္မတနိုင်ငံသံရုံးရဲ့ သတင်းထုတ်ပြန်ချက်မှာဖော်ပြထားပါတယ်။
Source CMG
#WorldPolitics
Published - 04 April 2022
ရုရှားနိုင်ငံမှ သဘာဝဓာတ်ငွေ့ဝယ်ယူခြင်းအတွက် ရုရှားငွေရူဘယ်လ်ဖြင့်ပေးချေဖို့ ရုရှားသမ္မတ'ဗလာဒီမီယာပူတင်'သတ်မှတ်ခဲ့ခြင်းဟာ ရှေ့ပြေးပုံစံတစ်ခုဖြစ်ပြီး အခြားအဓိကတင်ပို့ကုန်များကိုလည်း ရူဘယ်လ်ဖြင့်ပေးချေခိုင်းဖို့ ဆောင်ရွက်သွားမှာဖြစ်ကြောင်း ရုရှားတို့ကသတိပေးလိုက်ပါတယ်။
အနောက်နိုင်ငံက အမေရိကန်ဒေါ်လာတန်ဖိုးကျဆင်းလာခြင်းကို ထိန်းချုပ်နိုင်ဖို့ အတွက် ရုရှားပိုင်စီးပွားရေးအစိတ်အပိုင်းများကို ရပ်ဆိုင်းလိုက်ပါတယ်။
ဖေဖော်ဝါရီ ၂၄ ရက်နေ့က ယူကရိန်းကိုကျူးကျော်ခဲ့တာကြောင့် ရုရှားကို အမေရိကန်နဲ့မဟာမိတ်နိုင်ငံများက စီးပွားရေးဒဏ်ခတ်ပိတ်ဆို့ မှုများ ပြင်းပြင်းထန်ထန်ချမှတ်ခဲ့တာကြောင့် ၁၉၉၁ ခုနှစ် ဆိုဗီယက်ပြည်ထောင်စုပြိုကွဲပြီးနောက်ပိုင်း ရုရှားစီးပွားရေးအဆိုးရွားဆုံးအခြေအနေ ရောက်ရှိနေတာဖြစ်ပါတယ်။
ကျဆင်းလာတဲ့စီးပွားရေးအဖတ်ဆယ်ဖို့ အတွက် 'ပူတင်'က ရုရှားမှဓာတ်ငွေ့များဝယ်ယူမှုအတွက် ရုရှားငွေရူဘယ်လ်ဖြင့်ပေးချေရမယ်လို့ မတ်လ ၂၃ ရက်နေ့က အမိန့်ချလိုက်ပါတယ်။
ဒါပေမဲ့လည်း ဝယ်ယူသူတွေက စာချုပ်ပါငွေကြေးအချက်အလက်အတိုင်း ဆက်လက်ဝယ်ယူနိုင်ပြီး ပေးချေလာတဲ့ငွေတွေကို ရုရှားပိုင် Gazprom ကုမ္ပဏီက ရူဘယ်လ်အဖြစ်ပြောင်းလဲပေးလိုက်တာဖြစ်ပါတယ်။
ဓာတ်ငွေ့ဝယ်ယူခြင်းအတွက် ရူဘယ်လ်နဲ့ပေးချေခိုင်းတာက ငွေပေးချေမှုကဏ္ဍရဲ့ရှေ့ပြေးပုံစံဖြစ်ကြောင်း၊ အခြားကုန်ပစ္စည်းတင်ပို့မှုတွေမှာလည်း ဒီပုံစံကိုဆက်လက်ကျင့်သုံးသွားမှာဖြစ်ကြောင်း ရုရှားအစိုးရအဖွဲ့မှပြောရေးဆိုခွင့်ရှိသူ'ဒီမစ်ထရီပက်စ်ကော့ဗ်'က ရုရှားရုပ်သံလိုင်းချန်နယ်ဝမ်းကနေ ပြောကြားလိုက်ပါတယ်။
ရုရှားဗဟိုဘဏ်မှအရန်ငွေကြေး ဒေါ်လာ ၃၀၀ ဘီလီယံကို အနောက်နိုင်ငံကရပ်ဆိုင်းပစ်လိုက်တာဟာ အဓမ္မသိမ်းပိုက်လိုက်တာဖြစ်ပြီး ဒီလိုကိစ္စကြောင့် အမေရိကန်ဒေါ်လာနဲ့ ယူရိုငွေတို့ ကို ကမ္ဘာ့အရန်ငွေကြေးအဖြစ် ဆက်လက်မှီခိုခြင်းမပြုလုပ်ဖို့ အကြောင်းဖန်လာခဲ့ပါတယ်။
၁၉၄၄ ခုနှစ်က အနောက်နိုင်ငံကနေ Bretton Woods ငွေကြေးစနစ်ကို အခြေချသတ်မှတ်ခဲ့ပါတယ်။ အဆိုပါ Bretton Woods ငွေကြေးစနစ်မှာ အမေရိကန်ဒေါ်လာကို တစ်ကမ္ဘာလုံးရှိ စံညွှန်းငွေကြေးအတိုင်းအတာအဖြစ်သတ်မှတ်ထားတာဖြစ်ပါတယ်။
ရုရှားတို့က ဒေါ်လာကိုအခြေခံထားတဲ့ဒီငွေကြေးစနစ်ကို အစားထိုးပြောင်းလဲချင်နေခဲ့တာဖြစ်ကြောင်း 'ပက်စ်ကော့ဗ်'ကဆိုပါတယ်။
ရုရှားနိုင်ငံအပေါ် စီးပွားရေးဒဏ်ခတ်ပိတ်ဆို့ခြင်းများက ရုရှားတို့အနေနဲ့ ဒေါ်လာနဲ့ယူရိုငွေတို့ကို ယုံကြည်မှုမရှိတော့ပါဘူး။
ယူကရိန်းကို အထူးစစ်ဆင်ရေးပြုလုပ်ရတဲ့ရည်ရွယ်ချက်က အမေရိကန်တို့က ယူကရိန်းကိုအသုံးချပြီး ရုရှားကိုခြိမ်းခြောက်ဖို့ ကြံရွယ်နေကြောင်း၊ ရုရှားဘာသာစကားပြောဆိုတဲ့သူတွေကို ယူကရိန်းတို့က ညှင်းပန်းနှိပ်စက်နေတာကြောင့် ရုရှားတို့ ကကာကွယ်ပေးရမှာဖြစ်ကြောင်း 'ပူတင်'က အကြောင်းပြလိုက်ပါတယ်။
ယူကရိန်းဘက်ကတော့ ညှင်းပန်းနှိပ်စက်နေတယ်ဆိုတဲ့အချက်ကို ငြင်းဆိုထားပြီး ရုရှားတို့ကအကြောင်းမဲ့တိုက်ခိုက်တာဖြစ်တယ်လို့ တုန့်ပြန်ပြောကြားလိုက်ပါတယ်။
ကမ္ဘာပေါ်မှာ သဘာဝစွမ်းအင်အရင်းအမြစ်အများဆုံးထုတ်လုပ်နေတဲ့ ရုရှားနိုင်ငံကြီးကို အနောက်နိုင်ငံကကျဉ်ဖယ်ဖို့ ပြုလုပ်နေခြင်းဟာ အကျိုးကြောင်းသင့်လျော်ခြင်းမရှိတဲ့အပြင် ဝယ်ယူသုံးစွဲသူတွေအတွက် ဈေးနှုန်းများမြင့်တက်လာနိုင်ပြီး ဥရောပနဲ့အမေရိကန်တို့ ဟာလည်း စီးပွားရေးဆုတ်ယုတ်လာမှာဖြစ်ကြောင်း ရုရှားအရာရှိများက အကြိမ်ကြိမ်သတိပေးထားပါတယ်။
ရုရှားတို့က အမေရိကန်ဒေါ်လာနဲ့ ပတ်သက်ခြင်းမရှိဖို့ အချိန်ကြာမြင့်စွာကြိုးပမ်းနေခဲ့ပေမယ့် ကမ္ဘာ့ဈေးကွက်မှာ ဓာတ်ငွေ့၊ လောင်စာဆီ၊ သတ္တုပစ္စည်းများကို ဒေါ်လာနဲ့သာအရောင်းအဝယ်ပြုလုပ်နေခဲ့ရပါတယ်။
တစ်ကမ္ဘာလုံးကုန်သွယ်ရေးအတိုင်းအတာမှာ ဒေါ်လာက အသုံးအများဆုံးငွေဖြစ်ပြီး သူ့နောက်မှာတော့ ယူရို၊ ယန်း၊ စတာလင်ပေါင်တို့ က အစဉ်လိုက်အသုံးအများဆုံးဖြစ်နေပါတယ်။
Source: Reuters
Published 3 April 2022
ကာဇက်စတန်သမ္မတနှင့် အဆင့်မြင့်အရာရှိကြီးတွေကို တိုက်ခိုက်ဖို့ ကြံစည်နေတဲ့ နိုင်ငံခြားသူလျှိုတစ်ဦးကို ယင်းရဲ့ လုံခြုံရေးတပ်ဖွဲ့တွေက ဖမ်းဆီးရမိခဲ့တယ်လို့ ဧပြီ၃ ရက် တနင်္ဂနွေနေ့ကပြောပါတယ်။
“နိုင်ငံခြားသူလျှိုတစ်ဦးဖြစ်တဲ့ ကာဇက်နိုင်ငံသားတစ်ဦးကို နူလ်ဆူလ်တန်မြို့တော်မှာ တန်ပြန်ထောက်လှမ်းရေးအဖွဲ့က မတ်၂၅ရက်က ဖမ်းဆီးရမိခဲ့ပါတယ်” လို့ အမျိုးသားလုံခြုံရေးကောင်စီက သတင်းထုတ်ပြန်ပါတယ်။
အဲဒီသူဟာ ကာဇက်စတန်သမ္မတနှင့် အဆင့်မြင့်အရာရှိတော်တော်များများနှင့်အတူ အထူးတပ်ဖွဲ့နှင့် လုံခြုံရေးတပ်ဖွဲ့တွေကို တိုက်ခိုက်ဖို့ ကြံစည်ခဲ့တယ်လို့ သတင်းထုတ်ပြန်ချက်မှာဖော်ပြထားပါတယ်။
သူ့အိမ်ကိုရှာဖွေစဉ် နိုင်ငံခြားတိုင်းပြည်လုပ်သေနတ်၊မူးယစ်ဆေးဝါးတွေနှင့် ငွေစက္ကူအများအပြား တွေ့ရှိသိမ်းဆည်းရမိခဲ့ ပါတယ်။ သူ့ကို ဖမ်းဆီးမိပြီးနောက် အကြမ်းဖက်မှုစုံစမ်းစစ်ဆေးမှုစတင်စဉ်မှာ သူက ဝန်ခံခဲ့တယ်လို့ သတင်းထုတ်ပြန်ချက်က ဆိုပါတယ်။
ကာဇက်စတန်ဟာ ဆိုဗီယက်သမ္မတနိုင်ငံဟောင်းတစ်ခုဖြစ်ပြီး အလယ်အာရှမှာ အချမ်းသာဆုံးနိုင်ငံဖြစ်ပါတယ်။ ဇန်နဝါရီ လဆန်းပိုင်းက လောင်စာဆီဈေးတက်မှုကြောင့် ငြိမ်းချမ်းစွာဆန္ဒပြနေတုန်း အကြမ်းဖက်မှုတွေဖြစ်ပြီး သွေးထွက်သံယိုမှု နှင့် လုယက်မှုတွေဖြစ်ခဲ့ရပါတယ်။
အဲဒီအကြမ်းဖက်မှုကို အကြမ်းဖက်အုပ်စုတွေရဲ့လက်ချက်လို့ ကာဇက်စတန်ကပြောပြီး နိုင်ငံခြားမီဒီယာတွေရဲ့ သတင်းဖော်ပြချက်တွေကို ဝေဖန်ခဲ့ပါတယ်။
Source AFP
Published 2 April 2022
တရုတ်နှင့်မြန်မာတို့ဟာ အပြန်အလှန်နိုင်ငံရေးယုံကြည်မှု ရှေ့သို့တက်လှမ်းရေး၊အပြန်အလှန်အကျိုးအမြတ်နှင့် နှစ်ဖက်လုံး အောင်မြင်မှုရလာဒ်ရရှိရေး၊ ပြည်သူအချင်းချင်းအတုံအလှယ်ပြုမှုဖန်တီးရေး၊ယဉ်ကျေးမှုလှုပ်ရှားဆောင်ရွက်မှုများတွင် အပြန်အလှန်သင်ယူမှုတိုးမြှင့်ရေးတို့အတွက် အပြန်အလှန်ဖလှယ်မှုနှင့်ပူးပေါင်းဆောင်ရွက်မှုတို့ကို နက်ရှိုင်းစွာ ဆောင်ရွက်ကြဖို့ သဘောတူခဲ့ကြတယ်လို့ CCTV ကသတင်းထုတ်ပြန်ပါတယ်။
တရုတ်နိုင်ငံအရှေ့ပိုင်း အန်ဟွေးပြည်နယ်မှာ တရုတ်နိုင်ငံတော်ကောင်စီဝင်နှင့် နိုင်ငံခြားရေးဝန်ကြီး မစ္စတာ ဝမ်ယီဟာ မြန်မာနိုင်ငံခြားရေးဝန်ကြီး ဦးဝဏ္ဏမောင်လွင်နှင့် သောကြာနေ့က တွေ့ဆုံဆွေးနွေးစဉ်မှာ အဲဒီသဘောတူညီချက်ရရှိခဲ့ကြတာဖြစ်ပါတယ်။
တရုတ်နိုင်ငံအနေနှင့် အိမ်နီးချင်းသံတမန်ခင်းအရ မြန်မာနိုင်ငံကို အရေးကြီးတဲ့ နေရာမှာ အမြဲထားရှိတယ်လို့ တရုတ်နိုင်ငံခြားရေးဝန်ကြီး ဝမ်ကပြောပါတယ်။ အခြေအနေတွေ ဘယ်လိုပဲပြောင်းပြောင်း မြန်မာနိုင်ငံက ယင်းရဲ့အချုပ်အခြာအဏာ၊လွတ်လပ်ရေးနှင့် နယ်မြေတည်တံ့ခိုင်မြဲမှုတို့ စောင့်ရှောက်ထိန်းသိမ်းမှု၊ပြီးတော့ နိုင်ငံရဲ့ အနေအထားနှင့် လိုက်ဖက်တဲ့ ဖွံ့ဖြိုးတိုးတက်ရေးလမ်းကြောင်းတစ်ခုဖော်ဆောင်မှု အပေါ် တရုတ်နိုင်ငံဟာ အမြဲ ထောက်ခံအားပေးတယ်လို့ သူကဆက်ပြောပါတယ်။
အတူမျှဝေခံစားတဲ့ အနာဂတ်နှင့်အတူ တရုတ်-မြန်မာ အသိုက်အဝန်းတည်ထောင်ရေး ရည်မှန်းချက်ရရှိဖို့အတွက် မြန်မာနှင့် အပြန်အလှန်ပူးပေါင်းဖလှယ်မှုနက်ရှိုင်းစွာဆောင်ရွက်ရေး တရုတ်က အသင့်ရှိနေတယ်လို့ ဝမ်ကပြောပါတယ်။
အဲဒီအပြင် တရုတ်-မြန်မာ စီးပွားရေ စင်္ကြံ တည်ဆောက်မှုကို နှစ်ဖက်လုံးက အရှိန်မြှင့်တင်ဆောင်ရွက်ဖို့ ဝမ်က တိုက်တွန်း နှိုးဆော်လိုက်ပါတယ်။ အဲဒီအတွက် အထင်ကရ အဓိကကျတဲ့ စီမံကိန်းတွေ ကိုပိုမိုလုပ်ဆောင်ဖို့နှင့် ကိုဗစ်-၁၉ ကပ်ရောဂါကို ညီညွတ်နက်ရှိုင်းစွာ တွန်းလှန်ကြဖို့လည်း သူက တိုက်တွန်းလိုက်ပါတယ်။
ဦးဝဏ္ဏမောင်လွင်ကလည်း တရုတ်ရဲ့ ပဓာနကျတဲ့ အကျိုးစီးပွားနှင့်သက်ဆိုင်တဲ့ကိစ္စတွေအပေါ် တရုတ်ရပ်တည်ချက်ကို မြန်မာက အပြည့်အဝထောက်ခံကြောင်းနှင့် မြန်မာနိုင်ငံဖွံ့ဖြိုးတိုးတက်ရေးနှင့်ကပ်ဘေးတွန်းလှန်ရေးတို့မှာ တရုတ်ရဲ့ ကြီးမားတဲ့ အားပေးထောက်ခံမှုအတွက် တရုတ်နိုင်ငံကိုကျေးဇူးတင်တယ်လို့ပြောကြားခဲ့ပါတယ်။
မြန်မာနိုင်ငံအနေနှင့် စီးပွားရေးနှင့်ကုန်သွယ်ရေးပူးပေါင်းဆောင်ရွက်မှုတွေကို တိုးချဲ့ဆောင်ရွက်ဖို့ ဆန္ဒရှိကြောင်းနှင့် တရုတ်-မြန်မာ စီးပွားရေးစင်္ကြံတည်ဆော်ကရေးအရှိန်မြှင့်လိုကြောင်းပြန်လည်ပြောကြားခဲပါတယ်။ အဲဒီအပြင် ရပ်ဝန်းတစ်ခု လမ်းကြောင်းတစ်သွယ်မူဘောင်အတွင်းကနေ မြင်တွေ့လို့ရတဲ့ ရလာဒ်တွေပိုမိုရရှိဖို့ တွန်းအားပေးဆောင်ရွက်မယ်လို့လည်း သူကဆက်ပြောပါတယ်။
နှစ်ဦးစလုံးက တောင်တရုတ်ပင်လယ်နှင့် ယူကရိန်းကိစ္စတို့ကိုလည်း အမြင်ချင်းဖလှယ်ခဲ့ကြပါတယ်။
နိုင်ငံခြားရေးဝန်ကြီးနှစ်ဦးဟာ စီးပွားရေး၊နည်းပညာနှင့်စိုက်ပျိုးရေး နှစ်နိုင်ငံပူးပေါင်းဆောင်ရွက်မှုဆိုင်ရာ သဘောတူညီချက်တွေကို လက်မှတ်ရေးထိုးရာမှာ သက်သေအဖြစ်ပါဝင်ခဲ့ကြပြီး ချုံချင်းမြို့မှာ မြန်မာကောင်စစ်ဝန်ရုံးသစ် ဖွင့်လှစ်ပွဲသို့တက်ရောက်ခဲ့ကြပါတယ်။
Source CMG
#WorldMilitary
Published - 02 April 2022
အမေရိကန်အစိုးရအဖွဲ့နဲ့ မဟာမိတ်အဖွဲ့များပူးပေါင်းကာ ယူကရိန်းအရှေ့ပိုင်းဒွန်ဘက်စ်ဒေသသို့ ဆိုဗီယက်ထုတ်တင့်ကားများပေးပို့ကူညီသွားမှာဖြစ်ကြောင်း အမေရိကန်အရာရှိတစ်ဦးက သောကြာနေ့မှာပြောကြားလိုက်ပါတယ်။
ယူကရိန်းသမ္မတ'ဗိုလိုဒီမီယာဇယ်လန်စကီ'က စစ်ရေးအကူအညီတောင်းဆိုခဲ့ရာမှာ ယူကရိန်းတပ်ဖွဲ့များမောင်းနှင်နိုင်တဲ့ ဆိုဗီယက်ထုတ်တင့်ကားများကို အမေရိကန်တို့က ပို့ဆောင်ကူညီသွားမယ်လို့ အကြောင်းပြန်ခဲ့တာဖြစ်ပြီး ဒါဟာ ယခုစစ်ပွဲအတွင်း အမေရိကန်တို့ကတင့်ကားများဖြင့် ပထမဆုံးအကြိမ်ကူညီထောက်ပံ့တာဖြစ်ပါတယ်။
တင့်ကားများကို မကြာခင်လွှဲပြောင်းပေးသွားမှာဖြစ်ပြီး ပို့ဆောင်မယ့်တင့်ကားအရေအတွက်နဲ့ ပေးပို့မယ့်နိုင်ငံတွေကိုတော့ မဖော်ပြထားပါဘူး။
အဆိုပါလက်နက်တင့်ကားများဖြင့် ဒွန်ဘက်စ်ဒေသမှာရှိတဲ့ရုရှားတပ်ဖွဲ့တွေကို အဝေးကနေပစ်ခတ်သွားနိုင်မှာဖြစ်ပါတယ်။
စစ်ပွဲဖြစ်ပွားတာ အချိန် ၅ ပတ်မျှကြာမြင့်နေပြီဖြစ်ပြီး အခုလိုတင့်ကားများရောက်ရှိလာတော့မယ့်အခြေအနေက စစ်ပွဲပြင်းထန်မှုတိုးများလာဖွယ်ရှိနေပါတယ်။
ရုရှားတို့က မြေပြင်နဲ့လေကြောင်းတွေကနေ ယူကရိန်းမြို့တွေကို တိုက်ခိုက်နေဆဲဖြစ်ပါတယ်။
၂၀၁၄ ခုနှစ်ကတည်းက ရုရှားကျောထောက်နောက်ခံပြုခွဲထွက်ရေးသမားတွေနဲ့ ယူကရိန်းတပ်ဖွဲတွေ စဉ်ဆက်မပြတ်တိုက်ခိုက်နေခဲ့တဲ့ ယူကရိန်းအရှေ့ဘက်ခြမ်းကို ရုရှားတိုအာရုံပြန်စိုက်လာပြီဖြစ်ကြောင်း ရုရှားအရာရှိများပြောကြားခဲ့ပါတယ်။
သမ္မတ'ဇယ်လန်စကီ'က နေတိုး(NATO)အဖွဲ့ထံမှ တင့်ကားများနဲ့လေယာဉ်များပေးပို့ဖို့ တောင်းဆိုထားတဲ့အပြင် တင့်ကားဖျက်လက်နက်များနဲ့ ဝေဟင်ပစ်လက်နက်များကိုပါ ပေးပို့ဖို့တောင်းဆိုခဲ့ပါတယ်။
အမေရိကန်သမ္မတ'ဂျိုးဘိုင်ဒန်'နဲ့ ယူကရိန်းထိပ်သီးအရာရှိများ ပိုလန်မှာတွေ့ဆုံဆွေးနွေးကြပြီးနောက်တစ်နေ့မှာ 'ဇယ်လန်စကီ'က တင့်ကားထောက်ပံ့ပေးဖို့ အထူးတလည်တောင်းဆိုခဲ့ပြီး လက်နက်ထောက်ပံ့လွှဲပြောင်းခြင်းအချိန်ကြာနေတယ်လို့ ယူဆနေပါတယ်။
"လက်နက်ထောက်ပံ့ဖို့ကို တစ်ယောက်နဲ့တစ်ယောက်လွှဲချနေကြပါတယ်။ တိုက်လေယာဉ်နဲ့တင့်ကားလွှဲပေးဖို့ကို ၃၁ ရက်လောက်အချိန်ယူပြီး စဉ်းစားနေကြပါတယ်" လို့ 'ဇယ်လန်စကီ'က အနောက်နိုင်ငံကိုဒေါသတကြီးဝေဖန်ခဲ့ပါတယ်။
အရင်ကလည်း ယူကရိန်းကာကွယ်ရေးအတွက် လက်နက်များထောက်ပံ့ဖို့တောင်းဆိုရာမှာ လက်နက်ငယ်လေးတွေပေးပို့ဖို့ ကိုသာ အာရုံစိုက်နေကြတာကြောင့် အမေရိကန်အစိုးရအဖွဲ့ကို ဝေဖန်ခဲ့ကြပါသေးတယ်။
ဒါပေမဲ့စစ်ပွဲပိုမိုပြင်းထန်လာတဲ့အချိန်မှာ ကာကွယ်ရေးအပိုင်းမှာလည်း လက်နက်အင်အားပိုမိုလိုအပ်လာခဲ့ပါတယ်။ ယူကရိန်းက စစ်မြေပြင်အတွင်း ရုရှားတို့ ထံကနေ အနည်းဆုံးတင့်ကား ၁၆၁ စီးရရှိခဲ့ပြီး ရုရှားတို့ကလည်း ယူကရိန်းတင့်ကားအချို့ကို ဖျက်ဆီးနိုင်ခဲ့တယ်လို့ စစ်ရေးသုံးသပ်မှုတွေမှာဖော်ပြထားပါတယ်။
ရုရှားတို့တိုက်ခိုက်လာမှုကို ယူကရိန်းစစ်တပ်မှဆက်လက်ကာကွယ်တွန်းလှန်နေတဲ့အချိန်မှာပဲ တင့်ကားတွေရောက်ရှိလာတော့မှာဖြစ်ပါတယ်။
ရုရှားတပ်ဖွဲ့များက ယူကရိန်းနိုင်ငံအလယ်ပိုင်းကနေ ဆက်လက်မကျူးကျော်နိုင်ဘဲရှိနေတဲ့အပြင် မြို့တော်ကိဗ်ကိုလည်း သိမ်းပိုက်ဖို့ အခြေအနေမဟန်တာကြောင့် ဒွန်ဘက်စ်ဒေသမှာ ရုရှားတို့အခြေချလာနိုင်ကြောင်း ပန်တဂွန်မှအရာရှိများက အလျင်အမြန်ရိပ်မိခဲ့ကြပါတယ်။
ဗုဒ္ဓဟူးနေ့က သမ္မတ'ဂျိုးဘိုင်ဒန်'ပြောကြားရာမှာ အမေရိကန်ထောက်လှမ်းရေးသတင်းများအရ ယူကရိန်းမှာရှိတဲ့ ရုရှားတပ်ဖွဲ့ကိစ္စအခြေအနေနဲ့ပတ်သက်ပြီး ရုရှားသမ္မတ'ပူတင်'ကို သူ့ရဲ့အကြံပေးပုဂ္ဂိုလ်များ မှားယွင်းစွာသတင်းတင်ပြခဲ့ကြပြီး သမ္မတ'ပူတင်'နဲ့ ကာကွယ်ရေးဝန်ကြီးတို့ ကြား မကျေနပ်ချက်များရှိလာကြောင်း သိရှိရပါတယ်။
ရုရှားဘက်ကအရာရှိများကတော့ ဒီကိစ္စမှာ အခြေအနေနားလည်မှုလွဲမှားခဲ့သာဖြစ်ကြောင်း တုန့်ပြန်ပြောကြားသွားပါတယ်။
#Yangon_Media_Group
Page 175 of 202
