Published 25 December 2022

၁၂၄ကြိမ်မြောက်မဲခေါင်မြစ် ပူးတွဲကင်းလှည့်မှုကို တရုတ်၊လာအို၊မြန်မာနှင့် ထိုင်းနိုင်ငံတို့က ပူးပေါင်းဆောင်ရွက်ခဲ့ကြပြီးနောက်  သောကြာနေ့က ပြီးဆုံးခဲ့ပါတယ်။ အဲဒီပူးတွဲကင်းလှည့်ရာမှာ ပါဝင်ခဲ့တဲ့ တရုတ်ရေယာဉ် လေးစီးဟာ အနောက်တောင်ယူနန်ပြည်နယ်က ကွမ်လေးဆိပ်ကမ်းကို ပြန်လည်ဆိုက်ကပ်ရောက်ရှိခဲ့ပါတယ်။

အဆိုပါ (၄)ရက်ကြာ ပူးတွဲကင်းလှည့်လည်ရာမှာ နိုင်ငံပေါင်းလေးနိုင်ငံမှ ရေယာဉ်(၆)စီးဖြင့် ကွမ်လေဆိပ်ကမ်းမှ ရွှေတြိဂံအနီးရေပြင်အထိ ၅၂၀ကီလိုမီတာကို ခုတ်မောင်းခဲ့ကြတာဖြစ်ပါတယ်။ အဲဒီနေရာတစ်ဝိုက်ဟာ မူးယစ်ဆေးဝါးထုတ်လုပ်ကုန်ကူးမှု နာမည်ဆိုးဖြင့်ကျော်ကြားနေတဲ့နေရာတွေပါ။

ကင်းလှည့်ခရီးအတွင်း အဆိုပါနိုင်ငံလေးနိုင်ငံမှ အဖွဲ့တွေဟာ "Watch-2022" လေ့ကျင့်ခန်းတွေကိုပါပူးတွဲဆောင်ရွက် ခဲ့ပါတယ်။ လေ့ကျင့်ခန်းတွေမှာ ပူးတွဲစစ်ဆင်ရေးကို ကျယ်ပြန့်စွာ စစ်ဆေးခြင်း၊တိုးမြှင့်ဆောင်ရွက်ခြင်း၊ အရေးပေါ် တုန့်ပြန်ခြင်းနှင့် တိုက်ပွဲအသင့် စွမ်းရည်တွေပူးပေါင်းဆောင်ရွက်ခြင်းတို့ပါဝင်ခဲ့ပါတယ်။

မဲခေါင်မြစ်ဟာ တရုတ်တို့က လန်ချန်းလို့ခေါ်တဲ့မြစ်ဖြစ်ပြီး နယ်စပ်ဖြတ်ကျော် ရေကြောင်းသွားလားမှုအတွက် အရေးပါတဲ့ ရေပြင်တစ်ခုဖြစ်ပါတယ်။

၂၀၁၁ခုနှစ် ဒီဇင်ဘာလကတည်းက အဆိုပါနိုင်ငံလေးနိုင်ငံဟာ ပူးတွဲကင်းလှည့်မှုတွေကို ဆောင်ရွက်ခဲ့ကြပါတယ်။

ပြီးခဲ့တဲ့ ဆယ်စုနှစ်ကျော်ကျော်  မဲခေါင် လေးနိုင်ငံ ဥပဒေစိုးမိုးရေးဌာနတွေရဲ့ ပူးတွဲကင်းလှည့်မှုတွေကြောင့် အမှားကင်းစင်ပြီး ထိခိုက်မှု၊ပြီးတော့ မြစ်ကြောင်းထဲအပိုင်စီးမှုတွေ တစ်ခုမှမဖြစ်ခဲ့တဲ့အတွက် နိုင်ငံတကာ ဥပဒေစိုးမိုးရေး ပူးပေါင်းဆောင်ရွက်မှုမှာ အောင်မြင်တဲ့ ပုံစံတစ်ခုဖြစ်လာခဲ့ရပါတယ်။

Source: CCTV+

#The_124th_joint_Mekong_River_patrol

#Joint_patrol_Myanmar_Mekong

#Myanmar_Politics

Published 25 December 2022

ဘင်္ဂလားဒေ့ရှ်ဝန်ကြီးချုပ် ရှိတ်ဟာဆီနာဟာ အာဝါမီအဖွဲ့ချုပ် ပါတီရဲ့ ဥက္ကဋ္ဌအဖြစ် စနေနေ့က သက်တမ်း (၁၀)ကြိမ် ဆက်တိုက် ရွေးချယ်ခံခဲ့ရပါတယ်။ အဲဒါကြောင့် ဟာဆီနာဟာ အာဝါမီအဖွဲ့ချုပ်မှာ ၁၉၈၁ ခုနှစ်ကတည်းက ဥက္ကဋ္ဌ အဖြစ် တာဝန်ယူခဲ့တဲ့ သက်တမ်းအရှည်ဆုံး ပါတီဥက္ကဋ္ဌဖြစ်လာခဲ့ပါတယ်။

၂၀၂၄ ခုနှစ်စောစောပိုင်းမှာ အာဝါမီအဖွဲ့ချုပ်ဟာ အထွေထွေရွေးကောက်ပွဲကျင်းပပေးဖို့ ပြင်ဆင်နေတဲ့အလျောက် ပါတီဟာ အိုဘိုင်ဒူလ်ကေဒါကို ၂၂ကြိမ်မြောက်အမျိုးသားကောင်စီ အထွေထွေအတွင်းရေးမှူးအဖြစ် တံခါးပိတ်အစည်းအဝေးကနေ ရွေးချယ်ပေးခဲ့ပါတယ်။

ဒါကာမြို့တော်အလယ်က ဇာတ်ရုံကြီးတစ်ခုမှာ ကျင်းပတဲ့ အမျိုးသားကောင်စီကို ဘင်္ဂလားဒေ့ရှ်နိုင်ငံတစ်လွှားက ကောင်စီဝင် ခုနှစ်ထောင်ခန့် တက်ရောက်ခဲ့ကြတယ်လို့ ပြည်တွင်းသတင်းဌာနတွေက သတင်းထုတ်ပြန်ပါတယ်။ အစည်းအဝေးအပြီးမှာ ဇာတ်ရုံနှင့်ကပ်လျက် ဆာဟရာဝါဒီယူဒိုင်ယန်ကွင်းထဲမှာ လူထုချီတက်ပွဲတစ်ခု ကျင်းပခဲ့ပါတယ်။

ဝန်ကြီးချုပ်ဟာ ဆူဟရာဝါဒီယူဒိုင်ယန်ကွင်းထဲကို မနက်၁၀နာရီ၂၀မိနစ်မှာရောက်ရှိလာပြီး နိုင်ငံတော်အလံလွှင့် တင်ခြင်း၊ချိုးဖြူများနှင့်ဘောလုံးများလွှတ်တင်ခြင်းဖြင့် ကောင်စီကိုဖွင့်လှစ်ခဲ့ပါတယ်လို့ ဒေလီစတားသတင်းစာက ရေးသားပါတယ်။

အာဝါမီအဖွဲ့ချုပ်ရဲ့အကြီးတန်းခေါင်းဆောင်တစ်ဦးဖြစ်တဲ့ အာမီယာဟိုစိန်အာမူက ဟာဆီနာကို ပါတီဥက္ကဋ္ဌအဖြစ် အဆိုတင်သွင်းခဲ့တာဖြစ်ပြီး အစည်းအဝေးတက်သူအားလုံးက ကန့်ကွက်သူမရှိ အတည်ပြုပေးခဲ့တာလို့ ပီတီအိုင် သတင်းအေဂျင်စီကပြောပါတယ်။

အချို့ပါတီခေါင်းဆောင်းတွေက ဒီ ကွန်ဖရင့်ကြီးကနေအားကောင်းတဲ့ခေါင်းဆောင်မှုကို သူတို့မျှော်လင့်တယ်လို့ သတင်းဌာနကိုပြောပါတယ်။

လာမယ့်ရွေးကောက်ပွဲမတိုင်ခင် ပါတီကို အားကောင်းကောင်းနှင့် ဦးဆောင်နိုင်မယ့်သူတစ်ဦးလိုတယ်လို့လည်း သူတို့ကပြောပါတယ်။

ပါတီစည်းမျဉ်းအရ အသက် ၇၅နှစ်အရွယ်ရှိပြီဖြစ်တဲ့ ဟာဆီနာဟာ ပါတီဥက္ကဋ္ဌအဖြစ် နောက်ထပ် ၃နှစ်  တာဝန်ထမ်းဆောင်ရမှာဖြစ်ပါတယ်။သူဟာ ၁၉၇၅ခုနှစ်ဩဂုတ်လကတည်းက အိန္ဒိယမှာ အဝေးရောက်ပြည်ပြေးတစ်ဦး အဖြစ်နေထိုင်ခဲ့ရပြီး ဘင်္ဂလားဒေ့ရှ်ပြန်ရောက်ပြီး ၁၉၈၁ခုနှစ်ကတည်းက ပါတီကို ဦးဆောင်ခဲ့တာဖြစ်ပါတယ်?

Source: WION

#Sheikh_Hasina

# Chief_of_Awami_League

#Bangladesh_Politics

Published 23 Dec 2022

ခရစ်ယာန်ဘာသာဂိုဏ်းပေါင်းစုံအသီးသီးမှဆရာတော်ကြီးများနှင့် ဘာသာပေါင်းစုံ အကြီးအကဲများ မြန်မာနိုင်ငံငြိမ်းချမ်းရေးရရှိနိုင်ရေး တစ်နိုင်သမျှပါဝင်ဆောင်ရွက်ပေးကြဖို့ နစက ဥက္ကဋ္ဌ ဗိုလ်ချူပ်မှူးကြီး မင်းအောင်လှိုင်က ပြောကြားပါတယ်။

ယနေ့ ဒီဇင်ဘာ ၂၃ ရက်ညနေက ရန်ကုန်မြို့ Holy Cathedral Churchမှာ ကျင်းပတဲ့ ခရစ်တော်မွေးနေ့(ခရစ္စမတ်) ကျေးဇူးတော်ချီးမွမ်းခြင်းအခမ်းအနားကို တက်ရောက်လာတဲ့ နစက ဥက္ကဋ္ဌက ယခုလိုထည့်သွင်းပြောကြားခဲ့တာ ဖြစ်တယ်လို့ နစကရဲ့သတင်းထုတ်ပြန်ချက်အရသိရပါတယ်။

“ ပြည်ထောင်စုသမ္မတမြန်မာနိုင်ငံတော်ကြီး ထာဝရငြိမ်းချမ်းရေးရရှိနိုင်ရေးအတွက် မိမိတို့တက်နိုင်တဲ့ဘက်က တတ်နိုင်သမျှနည်းလမ်းတွေနှင့် အုတ်တစ်ချပ်သဲတစ်ပွင်အဖြစ် ပါဝင်ဆောင်ရွက်ပေးကြဖို့ပြောကြားလိုပါတယ်” လို့ ဗိုလ်ချူပ်မှူးကြီးက အခမ်းအနား တက်ရောက်လာကြသူတွေကိုပြောကြားခဲ့ပါတယ်။

နစကအနှေင့် ငြိမ်းချမ်းရေးတံခါးတွေအမြဲဖွ်လှစ်ထားပြီး တပ်မတော်အနေနှင့်လည်း ငြိမ်းချမ်းရေးအတွက် အမြဲအသင့်ရှိနေတယ်လို့ နစက ဥက္ကဋ္ဌ၊တပ်မတော်ကာကွယ်ရေးဦးစီးချုပ်ကထပ်လောင်း အတည်ပြုပြောကြားခဲ့ပါတယ်။

 အဲဒီအပြင်  ဘာသာရေးကိုအလွဲသုံးစားပြုပြီး နိုင်ငံသားများအကြား စည်းလု့းညီညွတ်မှုပျက်ပြားအောင်၊ပြိုကွဲအောင် လုပ်ဆောင်နေတာတွေကိုလည်း အစဉ်သတိပြုကာကွယ်ဖို့လိုအပ်တယ်လို့ သူကဆက်လက်ပြောဆိုပါတယ်။

အဲဒီနောက် ဂိုဏ်းချုပ်ဆရာတော်ကြီး ကာဒီနယ်ချားလ်စ်ဘိုက “ မြန်မပြည်သူပြည်သားအားလုံး စစ်မှန်တဲ့ငြိမ်းချမ်းရေးရရှိပြီး ခန္ဓာစိတ်ဝမ်း ငြိမ်းချမ်းကြပါစေကြောင်း၊ဘာသာရေး၊စီးပွားရေး၊လူမှုရေးမှအစအလုံးစုံ အဆင်ပြေချောမွေ့ကြပါစေကြောင်းနှင့် ငြိမ်းချမ်းသာယာဝပြောပြီးဝမ်းမြောက်ခြင်းတွေနှင့် ပြည့်ဝနိုင်ကြပါစေကြောင်း ခရစ္စမတ်ဆုမွန်စကားပြောကြားခဲ့ပါတယ်။

အဲဒီနောက် ဂိုဏ်းချုပ်ဆရာတော်ကြီး ကာဒီနယ်ချားလ်စ်ဘို၊သာသနာပိုင်ချုပ်ကြီး စတီဗင်သန်းမြင့်ဦးနှင့် သိက္ခာတော်ရ ဆရာ ဒေါက်တာအေးမင်းတို့က ခရစ္စမတ်အမှတ်တရလက်ဆောင်ပန်းချီကားကို နစက ဥက္ကဋ္ဌနှင့်ဇနီးဖြစ်သူထံ အမှတ်တရ ပေးအပ်ခဲ့ပြီး နစက ဥက္ကဋ္ဌနှင့်ဇနီးကလည်း ခရစ္စမတ်လက်ဆောင်နှင့် အလှူငွေတွေပြန်လည်ပေးအပ်ခဲ့ တယ်လို့ သတင်းထုတ်ပြန်ချက်မှာ ဖော်ပြထားပါတယ်။

ယနေ့ပွဲကို ဘမြန်မာနိုင်ငံခရစ်ယာန်အသင်းတော်များကောင်စီ၊ ပြည်ထောင်စုသမ္မတမြန်မာနိုင်ငံတော် ကတ်သလစ် ဆရာတော်ကြီးများ၊မြန်မာနိုင်ငံ ဧဝံဂေလိခရစ်ယာန်မဟာမိတ်အဖွဲ့ချုပ်၊မြန်မာနိုင်ငံ ခရစ်တော်သာသနာပြန့်ပွားမှု ပူးပေါင်းဆောင်ရွက်ရေအဖွဲ့တွေက စုပေါင်းကျင်းပခဲ့တာဖြစ်ပြီး အခမ်းအနားအပြီးမှာ ဗိုလ်ချုပ်မှူးကြီးနှင့်အဖွဲ့ဟာ တက်ရောက်လာသူများနှင့်အတူ မိတ်သဟာယညစာစားပွဲ အတူသုံးဆောင်ခဲ့ကြတယ်လို့ သိရှိရပါတယ်။

-ymg/knl

#Yangon_Media_Group

Published 23 December 2022

စပိန်ရဲတပ်ဖွဲ့ဟာ အက်ဖ်ဘီအိုင်ရဲ့ အလိုအရှိဆုံးဝရမ်းပြေး ၁၀ဦးထဲက တစ်ဦးဖြစ်တဲ့ နယူးဇီလန်သာတစ်ဦးကို ဒီဇင်ဘာ ၂၁ ရက်က မက်ဒရစ်မြို့မှာ ဖမ်းဆီးခဲ့တယ်လို့ သတင်းထုတ်ပြန်ပါတယ်။

သူဟာ လိင်ကုန်ကူးမှုနှင့် ကလေးသူငယ်လိင်မဖွယ်မရာပြုမှုတို့ဖြင့် အမေရိကန်ပြည်ထောင်စုက တစ်သက်တစ်ကျွန်း ထောင်ဒဏ်ချမှတ်ခံထားရသူဖြစ်ပါတယ်။

Source AFP

#FBI's_10 most_wanted_fugitives

#Spanish_Polish_arrest_fugitive

#FBI

22 December 2022

နစကရဲ့ နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဦးဝဏ္ဏမောင်လွင်၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာကံဇော်နှင့် အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီးဌာန ပြည်ထောင်စုဝန်ကြီး ဦးကိုကိုလှိုင် တို့ပါဝင်သည့် မြန်မာကိုယ်စားလှယ်အဖွဲ့သည် ထိုင်းနိုင်ငံဒုတိယဝန်ကြီးချုပ်နှင့် နိုင်ငံခြား ရေးဝန်ကြီး မစ္စတာဒွန်ပရာမွန်းဝီနိုင်း၏ ဖိတ်ကြားချက်အရ  ဒီဇင်ဘာ ၂၂ ရက်တွင် ထိုင်းနိုင်ငံ၌ ပြုလုပ်သည့် အလွတ်သဘောဆွေးနွေးပွဲသို့ တက်ရောက်ခဲ့ကြတယ်လို့ သတင်းထုတ်ပြန်ချက်အရသိရပါတယ်။

အဆိုပါအလွတ်သဘောဆွေးနွေးပွဲသို့ ကမ္ဘောဒီးယားနိုင်ငံမှ ဒုတိယဝန်ကြီးချုပ်နှင့် နိုင်ငံခြားရေးဝန်ကြီး မစ္စတာပရပ်ဆုတ်ခွန်း၊ လာအိုနိုင်ငံ နိုင်ငံခြားရေးဝန်ကြီး မစ္စတာ ဆလုံးဆေးကိုမာဆစ်နှင့် ဗီယက်နမ်နိုင်ငံ နိုင်ငံခြားရေးဝန်ကြီးဌာန ဒုတိယဝန်ကြီးမစ္စတာ ဒိုဟုန်ဗီယက်တို့ ခေါင်းဆောင်သည့် ကိုယ်စားလှယ်များ တက်ရောက်ခဲ့ကြတာဖြစ်ပါတယ်။

ဆွေးနွေးပွဲတွင် မြန်မာကိုယ်စားလှယ်အဖွဲ့သည် အာဆီယံ၏တူညီဆန္ဒ(၅)ချက်နှင့် ပတ်သက်၍ ပူးပေါင်းဆောင်ရွက်နေသည့်ကိစ္စ အပါအဝင် မြန်မာနိုင်ငံတွင် လက်ရှိဖြစ်ပေါ်နေသည့် အခြေအနေမှန်များကို ရှင်းလင်းပြောကြားပြီး မကြာမီကထုတ်ပြန်ခဲ့သည့် တူညီဆန္ဒ(၅)ချက် အကောင်အထည်ဖော်ခြင်းနှင့်ပတ်သက်သည့် အာဆီယံခေါင်းဆောင်များ၏ သုံးသပ်ချက်နှင့် ဆုံးဖြတ်ချက်အပေါ် မြန်မာနိုင်ငံ၏ ရပ်တည်ချက်တို့ကို တက်ရောက်လာသည့် ကိုယ်စားလှယ်များအား ရင်းနှီးပွင့်လင်းစွာ ရှင်းလင်းပြောကြားခဲ့တယ်လို့ သတင်းထုတ်ပြန်ချက်မှာဖော်ပြထားပါတယ်။

အာဆီယံ၏ တူညီဆန္ဒ(၅)ချက်အကောင်အထည်ဖော်လျက်ရှိရာတွင် မြန်မာအစိုးရက တစ်ဖက်သတ် အပစ်အခတ်ရပ်စဲရေး ကြေညာကာ တိုင်းရင်းသားလက်နက်ကိုင် အဖွဲ့အစည်း များနှင့် ငြိမ်းချမ်းရေးဆွေးနွေးပွဲများ ပြုလုပ်နေသည့်ကိစ္စ၊ ကိုဗစ်-၁၉ ရောဂါကာကွယ်ထိန်း ချုပ်ရေးနှင့် စီးပွားရေးပြန်လည်ဦးမော့လာစေရေး ဆောင်ရွက်နေသည့်ကိစ္စ၊ နိုင်ငံရေးပါတီ များနှင့် တွေ့ဆုံဆွေးနွေးလျက်ရှိသည့်ကိစ္စနှင့် ပြည်ထောင်စုရွေးကောက်ပွဲကော်မရှင်က လွတ်လပ်၍ တရားမျှတသည့် အထွေထွေရွေးကောက်ပွဲကျင်းပရန် ကြိုးပမ်းနေသည့်ကိစ္စတို့ကို ပြောကြားခဲ့တယ်လို့ ဆိုပါတယ်။

ထို့ပြင် တူညီဆန္ဒ(၅)ချက် မူဘောင်အောက်မှ AHA Center နှင့် ပူးပေါင်းဆောင်ရွက် နေသည့် လူသားချင်းစာနာထောက်ထားမှုအကူအညီများကို လိုအပ်သူအားလုံးထံရောက်ရှိရေးနှင့် ခွဲခြားမှုမရှိဘဲ တန်းတူညီမျှပေးအပ်သည့်ကိစ္စများတွင်လည်း မြန်မာနိုင်ငံလုပ်ငန်းအဖွဲ့မှ သက်ဆိုင်ရာ တာဝန်ရှိဌာနများနှင့် ပူးပေါင်းကာ ပံ့ပိုးပေးလျက်ရှိကြောင်းကိုလည်း မြန်မာကိုယ်စားလှယ်အဖွဲ့က ရှင်းလင်းပြောကြားခဲ့ပါတယ်။

မြန်မာအစိုးရ၏ နိုင်ငံတည်ငြိမ်အေးချမ်းရေးနှင့် ဒီမိုကရေစီ ပြန်လည်ဖော်ဆောင်ရေး အတွက် ကြိုးပမ်းနေမှုများကို မတရားသင်းနှင့် အကြမ်းဖက်အဖွဲ့အစည်းများဖြစ်သည့် CRPH၊ NUG၊ PDF များက ပျက်စီးစေလိုသည့်ဆန္ဒဖြင့် အကြမ်းဖက်လုပ်ရပ်များကို ကျူးလွန်နေပြီး၊ ယင်းတို့၏ လုပ်ရပ်ကြောင့် အပြစ်မဲ့ပြည်သူများ၊ ရဟန်းသံဃာများနှင့် သီလရှင်များ၊ ဝန်ထမ်းများ သေကြေခဲ့ပြီး စာသင်ကျောင်း၊ ဆေးရုံ၊ ဘဏ်၊ ဈေးများ အပါအဝင်နိုင်ငံပိုင်နှင့် ပြည်သူပိုင် အဆောက်အဦများ၊ လမ်း၊ တံတား၊ ပို့ဆောင်ဆက် သွယ်ရေးယာဉ်များ၊ လျှပ်စစ်တာဝါတိုင်များ ဖောက်ခွဲမီးရှို့ဖျက်ဆီးခြင်းခံနေရကြောင်း၊ ယင်းအကြမ်းဖက်အဖွဲ့အစည်းများ၏ လုပ်ရပ်များသည် နိုင်ငံတကာဥပဒေနှင့် ဂျီနီဗာကွန်ဗင်းရှင်းကို ဖောက်ဖျက်နေသည့်အတွက် ဆက်သွယ်ဆောင်ရွက်ရန် မသင့်ကြောင်း၊ ထိုသို့အကြမ်းဖက်လုပ်ရပ်များ ကျူးလွန်နေသူများကို အာဆီယံအဖွဲ့ဝင်နိုင်ငံများအနေဖြင့် အားပေးထောက်ခံခြင်း မပြုသင့်ကြောင်းကို မြန်မာကိုယ်စားလှယ်အဖွဲ့က ပြောကြားခဲ့တယ်လို့ နိုင်ငံပိုင်မြန်မာ့သတင်းစဉ်ရဲ့ သတင်းထုတ်ပြန်ချက်မှာဖော်ပြထားပါတယ်။

ဆွေးနွေးပွဲနှင့်ဆက်စပ်လျက် မြန်မာ-ထိုင်းနှစ်နိုင်ငံဆိုင်ရာ နိုင်ငံရေး၊ စီးပွားရေးနှင့် လူမှု-ယဉ်ကျေးမှု ပူးပေါင်းဆောင်ရွက်နေသည့် ကိစ္စရပ်များနှင့် ရှေ့ဆက်ဆောင်ရွက်မည့် လုပ်ငန်းစဉ်များနှင့်ပတ်သက်၍ သက်ဆိုင်ရာဌာနအသီးသီးမှ တာဝန်ရှိသူများနှင့် လည်းကောင်း၊ ပုဂ္ဂလိကကဏ္ဍမှ ကိုယ်စားလှယ်များနှင့်လည်းကောင်း သီးခြားအစီအစဉ်ဖြင့် ချစ်ကြည်ရင်းနှီးစွာ တွေ့ဆုံဆွေးနွေးခဲ့ကြောင်း သိရပါတယ်။

Published 22 December 2022

မြန်မာနိုင်ငံတွင် အကြမ်းဖက်မှုတွေရပ်တန့်ပြီး ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသားတွေအားလုံး လွှတ်ပေးဖို့ ကုလသမဂ္ဂလုံခြုံရေးကောင်စီက ဗုဒ္ဓဟူးနေ့က ထုတ်ပြန်တဲ့ မြန်မာနိုင်ငံနှင့်ပတ်သက်တဲ့ ပထမဆုံးသော ဆုံးဖြတ်ချက်ထဲမှာ တောင်းဆိုထားပါတယ်။

“လုံခြုံရေးကောင်စီက  မြန်မာနိုင်ငံတစ်လွှားမှာ အကြမ်းဖက်မှုပုံစံတွေအားလုံး ချက်ခြင်းရပ်တန့်ဖို့နှင့်  တင်းမာမှုတွေကို ချုပ်တည်းပြီး အရှိန် လျှော့ချကြဖို့ တောင်းဆိုပါတယ်။ အဲဒီအပြင် မြန်မာစစ်တပ်အနေနှင့် သမ္မတဦးဝင်းမြင့်၊နိုင်ငံတော် အတိုင်ပင်ခံ ဒေါ်အောင်ဆန်းစုကြည်အပါအဝင် တစ်ဖက်သတ်ထိန်းသိမ်းထားတဲ့ အကျဉ်းသားတွေကို ချက်ခြင်းလွှတ်ပေး ဖို့လည်းတောင်းဆိုပါတယ်” လို့ ကုလသမဂ္ဂ လုံခြုံရေးကောင်စီရဲ့ သတင်းထုတ်ပြန်ချက်မှာ ဖော်ပြထားပါတယ်။

မြန်မာပြည်သူများ၏ဆန္ဒနှင့် အကျိုးစီးပွားနှင့်အညီ  ဒီမိုကရေစီ အလေ့အထမျာနှင့်လုပ်ငန်းစဉ်များကိုထိန်းသိမ်းဖို့၊ အပြုသဘောဆောင်သော ဆွေးနွေးမှုများနှင့် အမျိုးသားပြန်လည်သင့်မြတ်ရေးများကို လိုက်ပါဆောင်ရွက်ဖို့ကိုလည်း ကောင်စီက ထပ်မံတောင်းဆိုထားပါတယ်။

အဖွဲ့တွေအားလုံးဟာ လူ့အခွင့်အရေးတွေ၊လွတ်လပ်မှုအခြေခံသဘောတရားတွေ နှင့် တရားဥပဒေစိုးမိုးရေးတွေကို လေးစားလိုက်နာရမယ်လို့လည်း လုံခြုံရေးကောင်စီက တိုက်တွန်းထားပါတယ်။

“ အကျပ်အတည်းကို ငြိမ်းချမ်းတဲ့အဖြေရှာရာမှာ အချက်အခြာကျတဲ့ အာဆီယံအဖွဲ့ကြီးရဲ့ ကဏ္ဍကို အသိအမှတ်ပြုရင်း အာဆီယံဦးဆောင်တဲ့ ယန္တရားနှင့် လုပ်ငန်းစဉ်တွေကို နိုင်ငံတကာအသိုက်အဝန်းက ထောက်ခံအားပေးဖို့ကိုလည်း လုံခြုံရေးကောင်စီက တိုက်တွန်းထားပါတယ်။

အကြမ်းဖက်မှုတွေချက်ခြင်းရပ်တန့်ပြီး အဖွဲ့တွေအားလုံးအကြား အပြုသဘောဆောင်တဲ့ ဆွေးနွေးမှုတွေလုပ်ဆောင်ဖို့ တောင်းဆိုထားတဲ့ အာဆီယံရဲ့ ဘုံသဘောတူညီချက်(၅)ချက်ကို ထိထိရောက်ရောက်ရောက်နှင့် အပြည့်အဝ ချက်ခြင်း အကောင်အထည်ဖော်ဖို့ကိုလည်း တောင်းဆိုထားပါတယ်။

ယခုဆုံးဖြတ်ချက်နှင့်ပတ်သက်လို့ ကုလသမဂ္ဂအထွေထွေအတွင်းရေးမှူးချုပ် သို့မဟုတ် မြန်မာနိုင်ငံဆိုင်ရာ အထူးသံတမန်ဟာ လုံခြုံရေးကောင်စီသို့ ၂၀၂၃ခုနှစ် မတ်၁၅ ရက်နောက်ဆုံးထားပြီး နှုတ်ဖြင့်အစီရင်ခံဖို့ကိုလည်း လုံခြုံရေးကောင်စီက မေတ္တာရပ်ခံထားပါတယ်။

အပြည့်အဝပါဝင်တဲ့ ဆွေးနွေးမှုတွေတိုးမြှင့်ရေးအပေ် အာရုံစိုက်မှုနှင့်အတူ မြန်မာနိုင်ငံမှာရှိတဲ့ သက်ဆိုင်တဲ့အဖွဲ့တွေ  အားလုံးနှင့် ကျယ်ပြန့်စွာ စေ့စပ်ဆောင်ရွက်ဖို့  အာဆီယံအထူးသံတမန်ရဲ့ ကြိုးစားအားထုတ်မှုတွေကို  ထောက်ခံတယ်လို့လုံခြုံရေးကောင်စီကထပ်လောင်းပြောကြားပါတယ်။

အဲဒီအပြင် အာဆီယံသံတမန်ရဲ့ ကုလသမဂ္ဂအထူးသံတမန်နှင့် အနီးကပ်ပူးဆောင်ဆောင်ရွက်မှုကို အားပေးပြိး  မြန်မာနိုင်ငံက အဖွဲ့တွေအားလုံးဟာ နိုင်ငံရဲ့ပြည်သူများရဲ့ အကျိုးစီးပွားအတွက် ငြိမ်းချမ်းတဲ့အဖြေရှာဖို့ ဆွေးနွေးပွဲစတင်နိုင်ရန် အဆိုပါသံတမန်တွေနှင့် အပြုသဘော အလုပ်လုပ်ကြဖို့ကိုလည်း တောင်းဆိုထားပါတယ်။

လူသားချင်းညှာတာထောက်ထားမှုဆိုင်ရာ အကူအညီတွေကို အပြည့်အဝနှင့် အဟန့်အတားမဲ့ပေးပို့နိုင်ရေး လိုအပ်ပြီး မြန်မာနိုင်ငံက ပြည်သူအားလုံးသို့ လူသားချင်းညှာတာထောက်ထားမှုဆိုင်ရာ အကူအညီတွေတိုးမြှင့်ပေးအပ်ဖို့ လိုအပ်မှုအပေါ် ကောင်စီက အလေးပေးတယ်လို့ သတင်းထုတ်ပြန်ထားထားပါတယ်။

လူသားချင်းအကူအညီပေးရေးနှင့် ဆေးဝါးဆိုင်ရာ လူပုဂ္ဂိုလ်တွေရဲ့ လုံခြုံဘေးအန္တရာယ်ကင်းရေး ကို အပြည့်အဝကာကွယ်ဖို့ အသေအချာလုပ်ဆောင်ဖို့လည်းတိုက်တွန်းထားပါတယ်။

ရခိုင်ပြည်နယ်ရဲ့ အကျပ်အတည်း အကြောင်းရင်းဇာစ်မြစ်ကို ကိုင်တွယ်ဖို့လိုအပ်ပြီး ရိုဟင်ဂျာ(ဘင်္ဂလီ) ဒုက္ခသည်တွေ နှင့် ပြည်တွင်း ရွှေ့ပြောင်းဒုက္ခသည်တွေ မိမိဆန္ဒအရ အန္တရာယ်ကင်းစွာ ပြန်လာနိုင်ရေးအတွက် လိုအပ်တဲ့ အခြေအနေတွေ ဖန်တီးပေးဖို့ကိုလည်း ကောင်စီက မီးမောင်းထိုးပြပါတယ်လို့ သတင်းထုတ်ပြန်ချက်မှာဖော်ပြထားပါတယ်။သက်ဆိုင်တဲ့ အဖွဲ့တွေအကြား  ရိုဟင်ဂျာ (ဘင်္ဂလီ) တွေရင်ဆိုင်နေရတဲ့ ပြဿနာတွေကူညီဖြေရှင်းဖို့ သံတမန် ရေးရာကြိုးပမ်းအားထုတ်မှုတွေကို ကောင်စီက အားပေးတယ်လို့လည်း ဖော်ပြထားပါတယ်။

လုံခြုံရေးကောင်စီရဲ့ မြန်မာနိုင်ငံအပေါ် ဆုံးဖြတ်ချက်မူကြမ်းကို အဖွဲ့ဝင် (၁၅)နိုင်ငံအနက် (၁၂)နိုင်ငံက ထောက်ခံမဲပေးခဲ့ကြပြီး ကျန်(၃)နိုင်ငံဖြစ်တဲ့ တရုတ်၊ရုရှားနှင့် အိန္ဒိယတို့က မဲမပေးဘဲနေခဲ့ကြပါတယ်။

ယခုဆုံးဖြတ်ချက်အတွက် စက်တင်ဘာလကတည်းက အဖွဲ့ဝင်နိုင်ငံတွေအကြား စေ့စပ်ညှိနှိုင်းခဲ့ကြပါတယ်။ မူရင်း မူကြမ်းထဲမှာ“မြန်မာနိုင်ငံသို့ လက်နက်များလွှဲပြောင်းပေးမှုရပ်တန့်ဖို့နှင့် ပိတ်ဆို့အရေးယူမှုတွေနှင့်ခြိမ်းခြောက်ထားတဲ့” စာသားတွေကို ဖယ်ထုတ်ပေးခဲ့ရတယ်လို့ ရိုက်တာက သတင်းရေးသားပါတယ်။

“ဒီကနေ့ ကျွန်မတို့က စစ်တပ်ကို ခိုင်မာတဲ့ သတင်းစကားပေးပို့ခဲ့တာဖြစ်တယ်။ဒါဟာ သံသယဖြစ်စရာကိုမရှိဘူး။ ဒီဆုံးဖြတ်ချက်ကို အပြည့်အဝေအကောင်အထည်ဖော်လိမ့်မယ်လို့ ကျွန်မတို့မျှော်လင့်တယ်။ မြန်မာပြည်သူတွေကိုလည်း သူတို့ရဲ့အခွင့်အရေးတွေ၊ဆန္ဒတွေနှင့် အကျိုးစီးပွားတွေနှင့်ကိုက်ညီတဲ့ တိုးတက်မှုကို ကျွန်မတို့ ရှာဖွေကြိုးပမ်းနေတယ်ဆိုတာကိုလည်း ရှင်းလင်းတဲ့ သတင်းစကားပါးလိုက်တာဖြစ်တယ်” လို့ ကုလသမဂ္ဂဆိုင်ရာ ဗြိတိန်သံအမတ် ဘာဘရာဝုဒ်လန်းက ပြောပါတယ်။

ယခုဆုံးဖြတ်ချက်ကိုကြိုဆိုလိုက်ပေမယ့် ဆုံးဖြတ်ချက်ဟာ  လုံလောက်မှုမရှိဘူးလို့ ကုလသမဂ္ဂဆိုင်ရာ အမေရိကန်သံအမတ်ကြီး ရောဘတ် အေ ဝုဒ်က ဝေဖန်ပြောဆိုပါတယ်။ လုံခြုံရေး ကောင်စီအနေနှင့် အာဆီယံရဲ့ ဘုံသဘောတူညီချက်(၅)ချက် အကောင်အထည်ဖော်ရာမှာ နောက်ထပ်နည်းလမ်းတွေ ရှာဖွေဖို့ အခွင့်အရေးတစ်ခုအဖြစ် ဒါကို အသုံးပြုရမယ်လို့လည်း သူကပြောပါတယ်။

မဲမပေးဘဲနေခဲ့ကြတဲ့ တရုတ်၊ရုရှားနှင့် အိန္ဒိယနိုင်ငံတို့ရဲ့ ကုလသမဂ္ဂဆိုင်ရာ သံအမတ်ကြီးတွေကလည်း သူတို့ ဘာကြောင့် မဲမပေးခဲ့ကြတာနှင့်ပတ်သက်ပြီး ကောင်စီမှာ ပြောဆိုခဲ့ကြပါတယ်။

ကောင်စီ ဥက္ကဋ္ဌရဲ့ထုတ်ပြန်ကြေညာချက်တစ်ခုအဖြစ်သာ ဆောင်ရွက်ခြင်းက ပိုသင့်တော်လိမ့်မယ်လို့ ကုလသမဂ္ဂဆိုင်ရာ တရုတ်သ့အမတ်ကြီး ကျန်းဂျွန်က ပြောပါတယ်။ မူကြမ်းစာထဲမှာ မျှတမှု အားနည်းနေတယ်လို့လည်း သူက ဝေဖန်ပါတယ်။

အဲဒါကြောင့် တရုတ်ဟာ မဲမပေးဘဲနေခဲ့တာလို့ သူကပြောပါတယ်။
‘မြန်မာပြဿနာကို အမြန်ဖြေရှင်းလို့မရဘူး။ ပဋိပက္ခရဲ့အဖြေဟာ မြန်မာနိုင်ငံကိုယ်၌အပေါ်မှာပဲမှီတည်နေတယ်။ မြန်မာ အာဏာပိုင်တွေက အကျဉ်းသားတွေအများကြီးလွှတ်ပေးခဲ့တာကိုလည်း  အသိအမှတ်ပြုအားပေးသင့်တယ်” လို့ သူက ပြောပါတယ်။

မြန်မာနှင့်ဆက်စပ်တဲ့ ပြဿနာတွေကို ကိုင်တွယ်ဖြေရှင်းဖို့ အာဆီယံဟာ တမူထူးတဲ့ အားသာချက်ရှိတယ်လို့ သူက အသားပေးပြောပါတယ်။ အဲဒါကြောင့် နိုင်ငံတကာအသိုက်အဝန်းဟာ အာဆီယံရဲ့အမြင်ကိုနားထောင်သင့်တယ်၊ သူတို့ရဲ့ ခေါင်းဆောင်မှုကိုအားပေးသင့်တယ်။ အဖွဲ့ကြီးကိုအချိန်ပေးသင့်ပြီး ဘုံသဘောတူညီချက်တည်ဆောက်မယ့်နေရာလွတ် တစ်ခုပေးသင့်တယ်လို့လည်းသူကပြောပါတယ်။ သူက မြန်မာနိုင်ငံနှင့်ရင်းနှီးချစ်ကြည်တဲ့ တရုတ်မူဝါဒကို ထပ်လောင်း ပြောကြားပြီး အာဆီယံနှင့်ယင်းရဲ့ဘုံသဘောတူညီချက်တွေကိုထောက်ခံအားပေးတယ်လို့ပြောပါတယ်။

မြန်မာနိုင်ငံဟာနိုင်ငံတကာငြိမ်းချမ်းရေးနှင့်လုံခြုံရေးအပေါ် ခြိမ်းခြောက်မှုတစ်ခုအဖြစ် ကိုယ်စားမပြုတဲ့အတွက် မဲမပေးဘဲ နေခဲ့တာလို့ ကုလသမဂ္ဂဆိုင်ရာ ရုရှားသံအမတ်ကြီး ဗက်ဆီလီ အေ နီဘင်ဇီယာကပြောပါတယ်။ မူကြမ်းစာဟာ လူ့အခွင့်အရေးတွေကို အဓိက စူးစိုက်ထားတယ်။ အဲဒါကြောင့် တတိယကော်မတီ(လူမှုရေး၊လူသားချင်း ဆိုင်ရာနှင့်  ယဉ်ကျေးမှု)ဟာ ပိုပြီးဆွေးနွေး သင့်တဲ့ဖိုရမ်ဖြစ်သင့်တယ်လို့လည်းသူကပြောပါတယ်။

ဆုံးဖြတ်ချက်ကို မျှတမှုရှိအောင်ပြင်ဆင်ဖို့ သဘောတူညီမှုမရှိခဲ့ကြတဲ့ ဒီဆုံးဖြတ်ချက်မူကြမ်းကိုစတင်ပြီး ကမက ထပြုခဲ့ကြတဲ့ အဖွဲ့ဝင်တွေရဲ့လုပ်ရပ်တွေကို သူက မကျေနပ်ကြောင်းဖော်ပြ ပြောဆိုခဲ့ပါတယ်။ နိင်ငံတွေဟာ စစ်အစိုးရရဲ့ မူဝါဒတွေအပေါ် အမြင်မတူကြတာကို သူက အသိအမှတ်ပြုပေမယ့် ကောင်စီအဖွဲ့ဝင်နိုင်ငံတွေဟာ မြေပြင်က အခြေအနေတွေ မတည်မငြိမ်ဖြစ်စေအောင်နှင့် အာဆီယံရဲ့ကြိုးပမ်းအားထုတ်မှုကို ဟန့်သွားအောင်မလုပ်သင့်ဘူးလို့ ရုရှားသံအမတ်ကြီးကဆက်လက်ပြောဆိုပါတယ်။ မြန်မာနိုင်ငံက နိုင်ငံရေးအင်အားစုအားလုံး သည်းခံချုပ်တည်းကြဖို့ သူက တောင်းဆိုလိုက်ပါတယ် ၂၀၂၃မှာ ပါလီမန်ရွေးကောက်ပွဲကျင်းပဖို့အမြင်နှင့်  မြန်မာစစ်တပ်ကအခြေခံဥပဒေအရ  နိုင်ငံ့အရေးပေါ်အခြေအနေအတွက် ယာယီ အချိန်ဇယားတစ်ခုကို ကတိကဝတ်ပြုပြီးဖြစ်တယ်လို့ သူကထောက်ပြ ပြောဆိုပါတယ်။

ဒီဆုံးဖြတ်ချက်ဟာ အားလုံးသဘောတူညီတဲ့ဆုံးဖြတ်ချက်တစ်ခုမဟုတ်ကြောင်းထောက်ပြပြောဆိုပြီး အဲဒါကြောင့် ရုရှားအနေနှင့် ဆုံးဖြတ်ချက်ကို မပိတ်ဆို့ဖို့ ဆုံးဖြတ်ခဲ့တာြဖစ်ကြောင်းကိုလည်း ရုရှားသံအမတ်ကြီးက ပြောဆိုပါတယ်။ ကောင်စီရဲ့ အစီအစဉ်ထဲမှာ ရခိုင်ပြည်နယ်အခြေအနေတစ်ခုပဲပါဝင်သင့်တယ်လို့လည်း သူကဆက်လက်ဝေဖန်   ပြောဆိုပါတယ်။

အိန္ဒိယဟာ မြန်မာနှင့် ရှည်လျားတဲ့နယ်စပ်ရှိနေပြီး သူ့ပြည်သူတွေနှင့်လည်း ရှည်လျားတဲ့ သမိုင်းကြောင်းနှင့်ယဉ်ကျေးမှု ဆက်နွယ်မှုတွေရှိနေတာဖြစ်တယ်လို့ လုံခြုံရေးကောင်စီရဲ့ ဒီဇင်ဘာလ အလှည့်ကျဥက္ကဋ္ဌဖြစ်တဲ့ ကုလသမဂ္ဂဆိုင်ရာ အိန္ဒိယနိုင်ငံ သံအမတ်ကြီး ရူချီယာကမ်ဘော့ချ်က ပြောပါတယ်။

အဲဒါကြောင့် အဲဒီနိုင်ငံရဲ့ ဘယ်လိုမတည်ငြိမ်မှုမျိုးမဆို အိန္ဒိယကို တိုက်ရိုက်အကျိူးသက်ရောက်မှုရှိနေတယ်။ လက်ရှိ အကျပ်အတည်းကို ဖြေရှင်းတာဟာ အမျိုးသားလုံခြုံရေးကိစ္စဖြစ်တယ်။ မြန်မာပြည်သူတွေရဲ့ ကောင်းကျိုးချမ်းသာဟာ အိန္ဒိယရဲ့ ဦးစားပေးဖြစ်တယ်။ အဲဒါကြောင့် မြန်မာနိုင်ငံရဲ့ ရှုပ်ထွေးတဲ့အခြေအနေတွေက တိတ်တဆိတ်နှင့် စိတ်ရှည်တဲ့ သံခင်းတမန်ခင်းကို တောင်းဆိုနေတာဖြစ်တယ်လို့ သူမကပြောပါတယ်။

အခြားသောနည်းလမ်းတွေက မဖြေရှင်းနိုင်သေးတဲ့ ပြဿနာတွေကို ကူညီဖြေရှင်းပေးနိုင်မှာမဟုတ်ဘူးလို့  သံအမတ်  ကြီးက ပြောပါတယ်။ ကောင်စီရဲ့ဆုံးဖြတ်ချက်ဟာ အဖွဲ့တွေကို အားလုံးပါဝင်တဲ့ နိုင်ငံရေးဆွေးနွေဖို့လုပ်လာနိုင်စေဖို့  ထက် အလျော့မပေးကြတဲ့ ရပ်တည်ချက်တွေကို ပိုပြီးအမြစ်တွယ်သွားစေနိုင်တယ်လို့လည်း သူမကဝေဖန်ပါတယ်။

ပါဝင်ပတ်သက်တဲ့အဖွဲ့တွေအားလုံး ရန်လိုစိတ်တွေချက်ခြင်းရပ်တန့်ကြဖို့၊ အစွန်းရောက်နေတဲ့ရပ်တည်ချက်တွေကို စွန့်လွှတ်ကြဖို့နှင့် ဒီမိုကရေစီပြန်ရောက်အောင် အားလုံးပါဝင်တဲ့ နိုင်ငံရေးဆွေးနွေးပွဲတွေ ဦးစီးဦးရွက်ဆောင်ရွက်ကြဖို့  လုံခြုံရေးကောင်စီအလှည့်ကျဥက္ကဋ္ဌ အိန္ဒိယသံအမတ်ကြီးကပြောဆိုပါတယ်။

အဲဒါကြောင့်  နိုင်ငံရေးခေါင်းဆောင်တွေကိုလွှတ်ပေးသင့်ပြီး နိုင်ငံရေးလှုပ်ရှားမှုတွေပြန်လည်ခွင့်ပြုသင့်တယ်လို့ သံအမတ်ကြီးက အလေးပေးပြောဆိုပါတယ်။ ကောင်စီရဲ့အရေးယူဆောင်ရွက်မှုအပေါ်  ဂရုတစ်စိုက်နှင့် ချင့်ချိန်ဆောင်ရွက်ရေး အရေးကြီးတယ်လို့လည်း သူမကဖြည့်စွက်ပြောပါတယ်။

မြန်မာနိင်ငံရဲ့မတည်ငြိမ်မှုကို အများဆုံး အကျိုးဆက်ခံစားရမယ့် အိမ်နီးချင်းနိုင်ငံတွေရဲ့ အကျိုးစီးပွားကိုလည်း လုံခြုံရေးကောင်စီက ထည့်သွင်းစဉ်းစားဖို့ သူမက ကောင်စီကိုတောင်းဆိုလိုက်ပါတယ်။

ဒီစိုးရိမ်ပူပန်မှုတွေကြောင့် သူမရဲ့ကိုယ်စားလှယ်အဖွဲ့ဟာ မဲမပေးဖို့ ဆုံးဖြတ်ခဲ့ခြင်းဖြစ်တယ်လို့ သူမကပြောပါတယ်။

Source: UNSC ၏ သတင်းထုတ်ပြန်ချက်/Reuters

#UNSC_Myanmar_Resolution

#Myanmar_Politics

#Myanmar_Crisis