#Local_News
Published_ 3 November 2022

ကိုယ်ပိုင်အုပ်ချုပ်ခွင်ရဒေသ(၆)ခု(နာဂ၊ ဓနု၊ ပအိုဝ်း၊ ပလောင်၊ ကိုးကန့်၊ ဝ)တို့မှ၂၀၂၂-ခုနှစ်တက္ကသိုလ်ဝင် စာမေးပွဲအောင်မြင်သူများအနေဖြင့်ဆေးတက္ကသိုလ်များသို့ နိုဝင်ဘာလ(၂၅)ရက်နောက်ဆုံးထား၍ လျှောက်ထားနိုင်ကြောင်း ကျန်းမာရေးဝန်ကြီးဌာနမှသိရသည်၊၊

ယင်းကဲ့သို့လျှောက်ထားရာတွင် ကျန်းမာရေးဝန်ကြီးဌာန၏ သတ်မှတ်အရည်အချင်းနှင့်ပြည့်စုံသူများ လျှောက်ထားနိုင်မည်ဖြစ်သည်၊၊

ကျန်းမာရေးဝန်ကြီးဌာန၊ ကျန်းမာရေးလူ့စွမ်းအားအရင်းအမြစ်ဦးစီးဌာန၊ ဆေးတက္ကသိုလ်များသို့ လျှောက်ထားလိုသူများအနေဖြင့် နိုင်ငံတော်မှထုတ်ပြန်ထားသော ဒေသစရိတ်ခံစားခွင့်ရှိသည့် သွားလာရေးနှင့် လူမှုရေးခက်ခဲသော ဒေသများ နှင့် ကိုယ်ပိုင်အုပ်ချုပ်ခွင်ရဒေသ(၆)ခု (နာဂ၊ ဓနု၊ ပအိုဝ်း၊ ပလောင်၊ ကိုးကန့်၊ ဝ)တွင် အမြဲနေထိုင်သူဖြစ်ရမည်ဖြစ်ပြီး (၈)တန်းမှ(၁၀)တန်းအထိ အဆိုပါဒေသများတွင် ပညာသင်ကြားခဲ့ကာ ယင်းဒေသများ၏ စာစစ်ဌာနများတွင်စာမေးပွဲအောင်မြင်ခဲ့သူများဖြစ်ရမည် ဖြစ်ကြောင်းဖော်ပြထားသည်၊၊

သိပ္ပံဘာသာတွဲဖြင့်စာမေးပွဲအောင်မြင်ပြီး (၆)ဘာသာရမှတ်စုစုပေါင်း(၄၂၀)ရရှိရမည်ဖြစ်ကာ အင်္ဂလိပ်စာ၊ ဓာတု၊ ဇီဝ(၃)ဘာသာရမှတ်အနည်းအများအပေါ် မူတည်၍ပမာဏရွေးချယ်ပြီး လူတွေ့နှုတ်မေးစာမေးပွဲသို့ ဝင်ရောက်ဖြေဆိုခွင့်ရရှိမည်ဖြစ်ကြောင်းသိရသည်၊၊

ဘွဲ့ရပြီးပါက မိမိဒေသတွင် နိုင်ငံဝန်ထမ်းအဖြစ်၊အနည်းဆုံး(၅)နှစ် ၊ဘွဲ့လွန်သင်တန်းတက်ရောက် အောင်မြင်ပြီးပါက နိုင်ငံဝန်ထမ်းအဖြစ် အနည်းဆုံး (၅)နှစ် မပျက်မကွက် တာဝန်ထမ်းဆောင်ရန်ဝန်ခံကတိပြုရမည်ဖြစ်ကြောင်း ထုတ်ပြန်ချက်တွင် ဖော်ပြထားသည်၊၊

#ymg/tthl
#Yangon_Media_Group

#Local_News
Published-3 November 2022

ရန်ကုန်တန်ဆောင်တိုင်မီးထွန်းပွဲတော် ရောင်စုံဓာတ်ပုံပြိုင်ပွဲကို ကျင်းပမည်ဖြစ်ကြောင်း ရန်ကုန်တန်ဆောင်တိုင်ဓာတ်ပုံပြိုင်ပွဲကျင်းပရေး ကော်မတီက သိရသည်။

ရန်ကုန်မြို့ တန်ဆောင်တိုင်မီးထွန်းပွဲတော်နှင့် တန်ဆောင်တိုင်ဈေးရောင်းပွဲတော်ကို ရန်ကုန်မြို့ ပြည်သူ့ရင်ပြင်၌ နိုဝင်ဘာလ ၅ ရက်မှ ၇ ရက် ထိ နေ့စဉ် နံနက်(၇)နာရီမှ ည(၁၀)နာရီအချိန်သတ်မှတ်၍ အလှဆင်မီးများ၊ မီးရှူးမီးပန်းပေါင်းများလည်း ပစ်ဖောက်သွားမည်လည်းဖြစ်သည်။

တန်ဆောင်တိုင်ဈေးပွဲတော်ကိုလည်း ထည့်သွင်းမည်ဖြစ်သည့်အပြင် လာရောက်သည့်ပရိသတ်များအတွက် နိုင်ငံကျော်တေးသံရှင်များကလည်း တေးသီချင်းများ DJ များဖြင့်လည်း အပြိုင်အဆိုင် ဖျော်ဖြေကြမည်လည်းဖြစ်ကြောင်းလည်း သိရသည်။

"အခု ကျင်းပမယ့် ပြည်သူ့ရင်ပြင်ရဲ့ တန်ဆောင်တိုင်ပွဲတော်မှာ ရိုက်တဲ့ ပုံတွေအပါအဝင် ရန်ကုန်မြို့ရဲ့ တန်ဆောင်တိုင်အလှ ပေါ်လွင်တဲ့နေရာတွေမှာ တန်ဆောင်တိုင်မီးထွန်းပွဲ‌ကျင်းပနေတာတွေကို ဖော်ညွှန်း ရိုက်ကူးထားတဲ့ ဓာတ်ပုံတွေနဲ့ ဝင်ပြိုင်နိုင်မှာ ဖြစ်ပါတယ်၊ ဘယ်သူမဆိုရောင်စုံဓာတ်ပုံပြိုင်ပွဲ ဝင်ပြိုင်နိုင်မှာပါ၊ ပြိုင်ပွဲခေါင်းစဉ်ကိုတော့“သာယာလှပ ရန်ကုန်တန်ဆောင်တိုင်လပြည့်ည" ဆိုပြီးတော့နာမည်ပေးထားတယ်"ဟု ရန်ကုန်တန်ဆောင်တိုင်ဓာတ်ပုံပြိုင်ပွဲ ကျင်းပရေးကော်မတီတာဝန်ရှိသူက ပြောသည်။

အဆိုပါ ပြိုင်ပွဲဝင်ဓာတ်ပုံများကို မည်သည့်ကင်မရာအမျိုးအစားကိုမဆို အသုံးပြုနိုင်ကြောင်း၊ ပြိုင်ပွဲဝင်ဓာတ်ပုံအရွယ်အစားမှာ ၁၀ လက်မ ၁၅ လက်မ အရွယ်အစားတစ်မျိုးတည်းသာ ပါဝင်ယှဉ်ပြိုင်ရန်နှင့် ပုံအရေအတွက် အကန့်အသတ်မရှိကြောင်း၊ Hard Copy နှင့် Soft Copy (CD)ကို တစ်ပါတည်း ပူးတွဲပေးပို့ရမည်ဖြစ်ကြောင်းလည်း သိရသည်။

ပြိုင်ပွဲဝင်ဓာတ်ပုံများကို အများပြည်သူအကျိုးငှာပြပွဲများ၊ စာအုပ်စာစောင်များ၊ Website များ၊ လက်ကမ်းစာစောင်များ၊ သင်ခန်းစာပို့ချမှုများနှင့် ဗီဒီယိုများ၌ အသုံးပြုခြင်းကို သဘောတူခွင့်ပြုရမည်ဖြစ်ပြီး ပြိုင်ပွဲဝင်သူ အမည်၊ မှတ်ပုံတင်အမှတ်၊ နေရပ်လိပ်စာ၊ ဓာတ်ပုံ၏ အကြောင်းအရာ၊ ရိုက်ကူးသည့် နေရာဒေသတို့ကိုပါ ဓာတ်ပုံများ၏ နောက်ကျော၌ သီးခြားစက္ကူဖြင့်ရေးကပ်၍ ပူးတွဲပေးပို့ရမည်ဖြစ်ကြောင်း၊ ဓာတ်ပုံများကို နိုဝင်ဘာလ ၂၀ ရက် ညနေ ၄ နာရီ နောက်ဆုံးထား၍ SBS Express 09765427090 နှင့် 09765427228 သို့ ပေးပို့ရမည်ဖြစ်ကြောင်း ထိုက်တန်သော ဂုဏ်ပြုငွေများကို ပေးအပ်သွားမည်ဖြစ်ကြောင်း သိရသည်။

#ymg/mt
#Yangon_Media_Group

#Local_News
Published-3 November 2022

ပြည်တွင်းစက်သုံးဆီ 92 ၊ 95 နှင့် 97 ဈေးနှုန်းများမှာ ယနေ့ နိုဝင်ဘာလ ၃ ရက်တွင် ဆက်လက်မြင့်တက်လာနေပြန်ကြောင်း စက်သုံးဆီအရောင်းဆိုင်များ၏ ဈေးနှုန်းများအရ သိရသည်။

နိုဝင်ဘာလ ၂ ရက် စက်သုံးဆီဈေးနှုန်းမှာ 92 တစ်လီတာလျှင် ၁၉၆၅ ကျပ်၊ 95 တစ်လီတာလျှင် ၂၀၅၅ ကျပ်၊ ဒီဇယ်တစ်လီတာလျှင် ၂၆၅၀ ကျပ်နှင့် ပရီမီယံဒီဇယ်တစ်လီတာလျှင် ၂၇၂၅ ကျပ်ဖြစ်ပြီး ယနေ့တွင် 92 တစ်လီတာလျှင် ၂၀၀၅ ကျပ်၊ 95 တစ်လီတာလျှင် ၂၀၉၅ ကျပ် ၊ ဒီဇယ်တစ်လီတာလျှင် ၂၅၆၀ ကျပ်နှင့် ပရီမီယံဒီဇယ်တစ်လီတာလျှင် ၂၆၃၅ ကျပ်ဖြစ်ကြောင်းသိရသည်။

ပြည်တွင်း၌ စက်သုံးဆီပြတ်လပ်မှုမရှိစေရန်အတွက် ရန်ကုန်တိုင်းဒေသကြီး၊ သီလဝါဆိပ်ကမ်းရှိ Terminal များတွင် စက်သုံးဆီဂါလန် ၆ သန်းကျော်ဆိပ်ကမ်းချထားပြီး ၉ သန်းကျော်ကို ဆီချခြင်းလုပ်ငန်း ဆက်လက်ဆောင်ရွက်နေကြောင်း၊ရန်ကုန်သီလဝါ ဆီလှောင်ကန်လက်ကျန်များ၊ စက်သုံးဆီအရောင်းဆိုင်များနှင့် ဖြန့်ဖြူးမှု လက်ကျန်အခြေအနေများအရ စက်သုံးဆီဖူလုံမှုရှိကြောင်း စက်သုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်မှုကော်မတီက အသိပေးထုတ်ပြန်ထားသည်။

စက်သုံးဆီဈေးနှုန်းများအနေဖြင့် ယခုရက်သတ္တပတ်တွင် အစိုးရရုံးပိတ်ရက်များ၌ ပြည်တွင်းခရီးသွားလာမှုများပြားနေသောကြောင့် ဈေးနှုန်းအနည်းငယ် မြင့်တက်ခဲ့ခြင်းဖြစ်ကြောင်း သိရသည်။

ရန်ကုန်၊ မန္တလေးအပါအဝင် နေပြည်တော်၊ တိုင်းဒေသကြီးနှင့်ပြည်နယ်များတွင်မူ ရည်ညွှန်းလက်လီဈေးနှုန်းနှင့် ရောင်းချပေးနေကြောင်း စက်သုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်မှုကော်မတီမှ သိရသည်။

#ymg/sth
#Yangon_Media_Group

#Local_News
Published _3 November 2022

မီးပုံးပျံအကြီးအသေး တစ်ထောင်ကျော်လွှတ်တင်မည့်ပဲခူးတန်ဆောင်တိုင်ပွဲတော်ကို ယနေ့စတင်ပြီဖြစ်ကြောင်း ပဲခူးတိုင်းဒေသကြီးအစိုးရအဖွဲ့က သိရသည်။

အဆိုပါ ပွဲတော်အတွင်း ကထိန်သင်္ကန်းဆပ်ကပ်လှူဒါန်းခြင်း၊မသိုးသင်္ကန်းဆပ်ကပ်လှူဒါန်းခြင်း၊ စတုဒီသာကျေးမွေးလှူဒါန်းခြင်း၊မီးပုံးပျံများလွှတ်တင်ပူဇော်ခြင်း၊ ပဲခူးတိုင်းဒေသကြီးအတွင်း ခရိုင်(၆)ခရိုင်ရှိ မြို့နယ်ဒေသများမှ ထွက်ရှိသည့် ထွက်ကုန်များကို ပြသရောင်းချခြင်းနှင့်နိုင်ငံကျော်အဆိုတော်များ၏ တေးဂီတဖျော်ဖြေရေးအစီအစဉ်များလည်း ပါဝင်မည်ဖြစ်ကြောင်း သိရသည်။

မီးပုံးပျံလွှတ်တင်ခြင်းကို ရွှေမော်ဓောဘုရားကြီး၏ အနောက်ဖက်မုခ်ရှိ ယာဉ်ရပ်နားဝင်းတွင်ကျင်းပပြုလုပ်မည်ဖြစ်ရာ မီးပုံးပျံအကြီး(၁၃)လုံးနှင့်မီးပုံးပျံအသေး(၁၀၀၀)ကျော်လွှတ်တင်မည်ဖြစ်ကြောင်း၊ လာရောက်သူများအားစတုဒီတာကျွေးမွေးမည်ဖြစ်ပြီး လူဦးရေ (၁၀၀၀၀)စာ စီမံဆောင်ရွက်ထားကြောင်း သိရသည်။

ပွဲတော်ကို ယနေ့ နိုဝင်ဘာလ ၃ ရက် မှ နိုဝင်ဘာလ(၇)ရက်တန်ဆောင်မုန်းလပြည့်နေ့ထိပြုလုပ်မည်ဖြစ်ပြီး လပြည့်နေ့လာရောက်ကြမည့် ဘုရားဖူးလာပြည်သူများအား ရွှေမော်ဓောစေတီတော်အနောက်ဖက်မုခ်တွင်တပ်ဆင်ပြီးစီးနေသည့် ရွှေ့လျားစက်လှေကားနှစ်စီးကိုလည်း အသုံးပြုမည့်အပြင် ဗုဒ္ဓအသံသာသနာ့ဗိမာန်တွင် သက်တော်ကြီးဆရာတော်ကြီးများတက်ရောက်နိုင်ရန် ဆောက်လုပ်တပ်ဆင်ထားသည့် ဓါတ်လှေကားကိုလည်း ဖွင့်ပွဲပြုလုပ်မည်ဖြစ်ကြောင်း သိရသည်။

#ymg/mt
#Yangon_Media_Group

#Local_News
Published_ 3 November 2022

နစက ရဲ့ ၂၀၂၂ ခုနှစ် ကထိန်သင်္ကန်းဆက်ကပ်လှူဒါန်းပွဲ အခမ်းအနားကို နိုဝင်ဘာ ၂ ရက် နံနက်ပိုင်းတွင် နေပြည်တော်ရှိ ဥပ္ပါတသန္တိစေတီတော်၊ သာသနာ့မဟာဗိမာန် တော်၌ ကျင်းပပြုလုပ်ရာ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် နှင့်ဇနီး ဒေါ်ကြူကြူလှတို့ တက်ရောက်၍ ကထိန်လျာသင်္ကန်းနှင့် လှူဖွယ်ပစ္စည်းများ ဆက်ကပ်လှူဒါန်းခဲ့ပါတယ်။

အဆိုပါ အခမ်းအနားသို့ နိုင်ငံတော်သံဃမဟာနာယကအဖွဲ့ ဥက္ကဋ္ဌ ၊ မန္တလေးမြို့၊ ဗန်းမော်ကျောင်းတိုက် ပဓာနနာယက အဘိဓဇမဟာရဋ္ဌဂုရု၊ အဘိဓဇအဂ္ဂမဟာ သဒ္ဓမ္မဇောတိက ဒေါက်တာ ဘဒ္ဒန္တကုမာရာဘိဝံသနှင့် ပင့်ဖိတ်ထားသော ဆရာတော်ကြီး ၂၇ ပါး ကြွရောက်ချီးမြှင့်တော်မူကြပါတယ်။

နစကဥက္ကဋ္ဌ နိုင်ငံတော်ဝန်ကြီးချုပ်နှင့် အခမ်းအနား တက်ရောက်လာကြသည့် ဧည့်ပရိသတ်အပေါင်းတို့က ဗန်းမော်ဆရာတော် ကြီးထံမှ ငါးပါးသီလခံယူဆောက်တည်၍ သံဃာတော်အရှင်သူမြတ်များ ရွတ်ပွားသရဇ္ဈာယ်တော်မူသော မေတ္တသုတ် ပရိတ်တရား တော်များကိုနာယူကြပါတယ်။

ထို့နောက် နစကဥက္ကဋ္ဌ နိုင်ငံတော်ဝန်ကြီးချုပ်နှင့် ဇနီးတို့သည် ဗန်းမော် ဆရာတော်ကြီးထံ ကထိန်သင်္ကန်းနှင့် လှူဖွယ်ပစ္စည်းများ ကို လည်းကောင်း၊ ကထိန် အလှူခံကျောင်း မစိုးရိမ်တိုက်သစ် ဆရာတော် အဂ္ဂမဟာ ဂန္ထဝါစက ပဏ္ဍိတ ဘဒ္ဒန္တ အဂ္ဂဓမ္မ ထံ ကထိန်လျာသင်္ကန်းနှင့် လှူဖွယ်ပစ္စည်းများ ကိုလည်းကောင်း ဆက်ကပ်လှူဒါန်းကြပြီး တက်ရောက်လာသူများက ဆရာတော်၊ သံဃာတော်များထံ ကထိန်သင်္ကန်းနှင့် လှူဖွယ် ပစ္စည်းများကို အသီးသီး ဆက်ကပ်လှူဒါန်းကြပါတယ်။

ထို့နောက် သန်လျင် မင်းကျောင်း ဆရာတော်ကြီးထံမှ အနုမောဒနာတရားနာ ကြား၍ လှူဒါန်းမှူအစုစုအတွက် ရေစက်သွန်းလောင်း အမျှပေးဝေကြပြီး ဗန်းမော် ဆရာတော်ကြီးအမှူးပြုသည့် ဆရာတော်၊ သံဃာတော်များအား နေ့ဆွမ်းဆက်ကပ် လှူဒါန်းခဲ့ ပါတယ်။
အဆိုပါ ကထိန်သင်္ကန်းဆက်ကပ်လှူဒါန်းပွဲ အခမ်းအနားတွင် ပဒေသာပင် ၄၄ ခုနှင့် လှူဒါန်းငွေ ၇၃၆၄၃၂၅၀ ကျပ်ဖြစ်သဖြင့် စုစုပေါင်း လှူဒါန်းမှုမှာ တန်ဖိုးငွေကျပ် ၁၁၂၉၆၅၈၅၀ ဖြစ်ကြောင်း သတင်းရရှိပါတယ်။

ygm_mnn
#Yangon_Media_Group

#Local_News
Published – 2 November 2022

ပြီးခဲ့တဲ့ အောက်တိုဘာလအတွင်းမှာ ပြည်ပကို ဆန်နဲ့ ဆန်ကွဲတင်ပို့မှု့ဟာ မက်ထရစ်တန်ချိန် ၁၆၀၀၀၀ ကျော်တင်ပို့ခဲ့ပြီး စက်တင်ဘာလထက် တင်ပို့မှုဟာပိုခဲ့တယ်လို့ မြန်မာနိုင်ငံဆန်စပါးအဖွဲ့ချုပ်ကနေ သိရပါတယ်။

 
#Yangon_Media_Group