#Local_News
Published _13 September 2022

ရန်ကုန်သို့လိုက်ပါမည့် ဘင်္ဂါလီတစ်ဦးအား ခေါ်ဆောင်လာသူတစ်ဦးနှင့်အတူ စစ်တွေလေဆိပ်၌ စက်တင်ဘာလ ၁၂ ရက်ကတွင် ဖမ်းမိခဲ့ကြောင်း သိရသည်။

အပြည်ပြည်ဆိုင်ရာ မြန်မာ့လေကြောင်းလိုင်းဖြင့် ရန်ကုန်မြို့သို့လိုက်ပါရန်လေယာဉ်ကွင်း၌ လေဆိပ်တာဝန်ရှိသူများက မှတ်ပုံတင်များစစ်ဆေးစဉ် ဖမ်းဆီးရမိခဲ့ခြင်းဖြစ်ကြောင်း ရခိုင်ပြည်နယ် အစိုးရက ထုတ်ပြန်ထားသည်။

မှတ်တင်ပုံတင်များစစ်ဆေးစဉ် ရန်ကုန်တိုင်းဒေသကြီး ဒဂုံမြို့သစ်(ဆိပ်ကမ်း)မြို့နယ်နေသူ အသက် ၅၁ နှစ်အရွယ် ဒေါ်သန်းနုချေ နှင့် ၇ခိုင်ပြည်နယ်၊ စစ်တွေမြို့နယ်၊ အမြင့်ကျွန်းကျေးရွာနေသူအသက် ၂၄ နှစ်အရွယ် မသီတာတို့ ၂ ဦး ကိုင်ဆောင်လာသည့် မှတ်ပုံတင်များမှာ အခြားသူတစ်ဦး၏ ကတ်ပြားများကို ငှားရမ်းကိုင်ဆောင်လာကြောင်း သံသယရှိသဖြင့် ဆက်လက်စစ်ဆေးခဲ့ရာ အထက်ပါအတိုင်း အမှုပေါ်ပေါက်ခဲ့ခြင်း ဖြစ်ကြောင်း သိရသည်။

ဒေါ်သန်းနုချေမှာ ပေါက်တောမြို့နယ်၊ နန်းရောင်ကျေးရွာရှိ သားဖြစ်သူ ညီညီစိုးအား ခေါ်ယူရန် ရန်ကုန်မှ စစ်တွေသို့ စက်တင်ဘာလ ၂ ရက်တွင် ရောက်ရှိခဲ့ပြီး စစ်တွေမြို့၊ စက်ရုံစုရပ်ကွက်ရှိ တူမတော်စပ်သူ၏ နေအိမ်၌ တည်းခိုနေထိုင်ခဲ့ကြောင်း၊ စစ်တွေမြို့၌ တည်းခိုနေထိုင်စဉ် ယခင်ကသိကျွမ်းခဲ့သည့် မူဟာမတ်ရော်ဖီး အုန်းတောကြီး(တောင်) ကျေးရွာနေထိုင်သူမှ ၎င်း၏တူမဖြစ်သူ မအယ်စမာဘီဘီအား ဆေးကုသနိုင်ရေး ရန်ကုန်မြို့သို့ ခေါ်ဆောင်ပေးပါက လေယာဉ်လက်မှတ် ကုန်ကျစရိတ်နှင့် ပို့ဆောင်ခအဖြစ် စရံငွေ ၅ သိန်းကျပ် ပေးမည်ဖြစ်ပြီး ဆေးကုသပြီးနောက် စစ်တွေမြို့သို့ ပြန်လည်ရောက်ရှိပါက ငွေ ၅ သိန်းကျပ် ထပ်မံပေးမည်ပြောဆိုသဖြင့် ဒေါ်သန်းနုချေက ရန်ကုန်တွင် ၎င်းနှင့်အတူ နေထိုင်သည့်သားဖြစ်သူ ဘိုမင်းစိုး၏ ဇနီး မသီတာ မှတ်ပုံတင်ဖြင့် ဘူးသီးတောင်မြို့နယ်၊ ဖုံညိုလိပ်ရွာနေသူ အသက် ၁၄ နှစ် အရွယ် မအယ်စမာဘီဘီ အား ရန်ကုန်သို့ ခေါ်ဆောင်ခြင်းဖြစ်ကြောင်း သိရသည်။

ယခုအခါ ၎င်းတို့ ၂ ဦးကို စစ်တွေမြို့မရဲစခန်းတွင် ဖမ်းဆီးချုပ်နှောင်ထားပြီး ဥပဒေနှင့်အညီ အမှုဖွင့်အရေးယူရန် ဆောင်ရွက်လျက်ရှိကြောင်း သိရသည်။

#ymg/mt
#Yangon_Media_Group

#Local_News
Published - 13 September 2022

ပြီးခဲ့သည့် ၈ လအတွင်း ကုမ္ပဏီမှတ်ပုံတင်စာရင်းမှ ပယ်ဖျက်ခံရသည့် ကုမ္ပဏီ ၃၃၀၀ ရှိကြောင်း ရင်းနှီးမြှုပ်နှံမှုနှင့်ကုမ္ပဏီများ ညွှန်ကြားမှုဦးစီးဌာန (DICA) မှ သိရသည်။

ဇန်နဝါရီလ၊ ဖေဖော်ဝါရီလနှင့် မတ်လတွင် ကုမ္ပဏီပေါင်း ၄၀၀၊ ဧပြီလတွင် ကုမ္ပဏီ ၃၀၀၊ မေလတွင် ၅၀၀၊ ဇွန်နှင့် ဇူလိုင်လတွင် ၄၀၀ ရှိပြီးဩဂုတ်လတွင် ကုမ္ပဏီ ၅၀၀ ဝန်းကျင် ပယ်ဖျက်ခံရခြင်းဖြစ်ကြောင်း သိရသည်။

အဆိုပါ ကုမ္ပဏီများသည် နှစ်စဉ်အစီရင်ခံစာ တင်ပြရန် ပျက်ကွက်သည့်အတွက် မြန်မာနိုင်ငံကုမ္ပဏီများ ဥပဒေ ပုဒ်မ ၄၃၀ (စ) အရ မှတ်ပုံတင်စာရင်းမှ ပယ်ဖျက်ခြင်းဖြစ်ကြောင်း DICA မှ ထုတ်ပြန်ထားသည်။

ရင်းနှီးမြှုပ်နှံမှုနဲ့ ကုမ္ပဏီများ ညွှန်ကြားမှုဦးစီးဌာန၏ စာရင်းဇယား တွေအရ နှစ်စဉ် အစီရင်ခံစာ တင်ပြရန် ပျက်ကွက်သည့်အတွက် မှတ်ပုံတင်စာရင်းကနေ ပယ်ဖျက်ခံရသည့် ကုမ္ပဏီအရေအတွက် လစဉ် ၄၀၀ ကနေ ၆၀၀ အကြားရှိနေကြောင်း၊ ယင်းအပြင်မှတ်ပုံတင်စာရင်းကနေ ပယ်ဖျက်ခံရသည့် ကုမ္ပဏီများတွင် ဆောက်လုပ်ရေးကုမ္ပဏီ၊ ဟိုတယ်နှင့် ခရီးသွားလုပ်ငန်း လုပ်ကိုင်သည့်ကုမ္ပဏီများ၊ကျောက်မျက်ရတနာကုမ္ပဏီများ ပါဝင်ကြောင်း သိရသည်။

#ymg/sth
#Yangon_Media_Group

#Local_News
Published _13 September 2022

ဒေသတွင်း မတည်ငြိမ်မှုများနှင့် ပဋိပက္ခများအပြီးသတ်နိုင်ရန် အချိန်ကာလခန့်မှန်းရန်ခက်နေသေးကြောင်း နစက ဥက္ကဌ ဗိုလ်ချုပ်မှူးကြီး မင်းအောင်လှိုင်က ရုရှားခရီးစဉ်အတွင်း ပြောကြားခဲ့သည်။

ဒေသတွင်း မတည်ငြိမ်မှုများကို အပြီးသတ်ဖြေရှင်းနိုင်ရန်အတွက် အချိန်ကာလ မည်မျှလိုအပ်မည်ကို ရုရှားဖက်ဒရေးရှင်းနိုင်ငံ၊ Rossiya Segodnya သတင်းအေဂျင်စီ၊ RIA သတင်းဌာနမှ အထူးသတင်းထောက်က မေးမြန်းစဉ် ယင်းကအထက်ပါအတိုင်း ပြောကြားခဲ့ခြင်းလည်း ဖြစ်သည်။

"အချိန်ကိုတော့ ခန့်မှန်းဖိုတော့ နည်းနည်းတော့ခက်တယ်။ ကျွန်တော်တို့အစိုးရကနေ သတ်မှတ်ထားတဲ့ လက်နက်ကိုင်သောင်းကျန်းသူ အဖွဲ့အစည်းရှိပါတယ်။ EAOs လို ကျွန်တော်တို့ခေါ်ကြပါတယ်။ ဒီအဖွဲ့တွေနဲ့ ကျွန်တော်တို့က ငြိမ်းချမ်းရေးဆွေးနွေးမှုတွေ ဖိတ်ခေါ်ပြီးတော့ လုပ်နေပါတယ်။ သူတို့နဲ့ ကျွန်တော် အခုတွေ့ဆုံတာ ဒုတိယအကြိမ်တွေ့ဆုံ ဆွေးနွေးမှုတွေရနေပါပြီ။ အဲဒီကနေပြီးတော့ သူတို့ ဘာကိုဖြစ်ချင်တာလဲ။ တိုင်းပြည်ဘာဖြစ်သင့်သလဲ။ ဒီလိုမျိုး ညှိနှိုင်းပြီးတော့ဖြစ်နိုင်တာ ဘာရှိမလဲဆိုတာကို ကျွန်တော်တို့ အဖြေရှာမှာ ဖြစ်ပါတယ်။ အဲဒီအဖြေရှာပြီးတဲ့အချိန်မှာတော့ ဒီခုနပြောတဲ့ တိုင်းရင်းသားလက်နက်ကိုင် အဖွဲ့အစည်းထဲကနေ နယ်မြေတွေကနေ လမ်းကြောင်းတွေကနေ ထောက်ပံ့ပေးနေတဲ့ဟာတွေဟာ ရပ်တန့်သွားလိမ့်မယ်လို့ ကျွန်တော်ယုံကြည်ပါတယ်"ဟု ယင်းက ပြောသည်။

ဆူပူအကြမ်းဖက်မှုတွင် တိုင်းရင်းသားများ၏ အခွင့်အရေးကို တောင်းဆိုသော အရင်လက်နက်ကိုင် အဖွဲ့အစည်းများနှင့် ၂၀၁၁ ခုနှစ်ကတည်းက ငြိမ်းချမ်းရေးဆွေးနွေးပွဲလုပ်ခဲ့ပြီး တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူညီစာချုပ် NCA ကို လက်မှတ်ရေးထိုးထားသော အဖွဲ့ ၁၀ ဖွဲ့ ဟူ၍ ရှိကြောင်း၊ယင်းတွင် NCA လက်မှတ်မထိုးရသေးသည့် အဖွဲ့ ၆ ဖွဲ့ ကျန်နေသေးသဖြင့် ယခုအခါ ဆွေးနွေးရန် ပြင်ဆင်နေကြောင်းလည်း နစက ဥက္ကဌက ပြောသည်။

ယင်းအပြင် ၂၀၂၀ ပြည့်နှစ် ရွေးကောက်ပွဲရလဒ်ပေါ်မူတည်၍ ဖြစ်ပေါ်လာသော ဆူပူအကြမ်းဖက်သည့်အဖွဲ့အစည်းများ ရှိနေပြီး ယင်းတို့နှင့် ဆွေးနွေးရန် အကြောင်းမရှိ ၊ ဥပဒေအရ လုပ်ဆောင်မည် ဖြစ်ကြောင်းလည်း ပြောကြားခဲ့သည်။

"လက်နက်ကိုင်အဖွဲ့အစည်းထဲမှာ လက်မှတ်ရေးထိုးပြီးသား အဖွဲ့အစည်း ၁၀ ဖွဲ့နဲ့ ဆွေးနွေးနေတာ ရှိတယ်။ ဒါပေမဲ့ လက်မှတ်ရေးထိုးမထားတဲ့ အဖွဲ့အစည်းနဲ့ ဆွေးနွေးဖို့ ကျန်သေးတဲ့ အဖွဲ့တွေရှိတယ်။ သူတို့ကို ကျွန်တော် ဖိတ်ခေါ်ထားတယ်။ အဲဒီလိုဖိတ်ခေါ်ချက်တွေဟာ သူတို့နိုင်ငံရေးမျှော်မှန်းချက်ပေါ်မှာ လာရောက်ဆွေးနွေးမယ်ဆိုရင်တော့ ကျွန်တော်တို့ ဒါကတော့ အောင်မြင်မှုရမယ်လို ယုံကြည်ပါတယ်။ ကျွန်တော့်မှာ နိုင်ငံရေးရည်မှန်းချက် နှစ်ချက်ပေးထားပါတယ်။ တစ်ခုကတော့ ပါတီစုံဒီမိုကရေစီ လမ်းကြောင်းပေါ်မှာ ကျွန်တော့်နိုင်ငံကမလွဲမသွေ လျှောက်လှမ်းရမယ်။ ဒုတိယကတော့ ဒီမိုကရေစီနဲ့ ဖက်ဒရယ်စနစ်ကိုအခြေခံတဲ့ ပြည်ထောင်စုကို တည်ဆောက်မယ်ဆိုတာ ကျွန်တော်တို့ပေးထားတယ်။ ဒါကလူတိုင်းလိုချင်တဲ့ သဘောအယူအဆ တောင်းဆိုချက်ဖြစ်ပါတယ်။ ဒါကို ကျွန်တော်တို့ ညှိနှိုင်းဆောင်ရွက်နေတာ ဖြစ်ပါတယ်။ ဒီအပေါ်မှာ မူတည်ပြီးတော့ ကျွန်တော်တို့က လက်နက်ကိုင် ပဋိပက္ခချုပ်ငြိမ်းရေးသည် ပပျောက်လိမ့်မယ်လို့ ပြောခြင်းဖြစ်ပါတယ်"ဟု ယင်းကဆိုသည်။

သို့သော်လည်း လက်ရှိ မြန်မာနိုင်ငံပြည်တွင်း နိုင်ငံရေးအခြေအနေ တည်ငြိမ်မှုအခြေအနေမှာ ထိန်းချုပ်နိုင်သည့် အခြေအနေတော့ရှိပြီဟု အကြမ်းဖျင်းအားဖြင့် ပြောနိုင်ကြောင်း နစက ဥက္ကဌက ဆိုသည်။

" ပြီးခဲ့တဲ့ ၂၀၂၁ ခုနှစ်ကတော့ အကြမ်းဖက်ဆူပူမှုတွေ ပြင်းထန်ခဲ့ရတာတော့ ရှိပါတယ်။ အကြမ်းဖက်ဆူပူမှုတွေ ပြင်းထန်ခဲ့သလို ဖျက်ဆီးမှုတွေ၊ သတ်ဖြတ်မှုတွေလည်း တော်တော်များများ ရှိခဲ့တာကိုလည်း ကျွန်တော်တို့ရှိခဲ့ပါတယ်။ သို့သော်လည်းပဲ ပြီးခဲ့တဲ့ ဧပြီလကစပြီးတော့ နောက်ပိုင်းမှာတော့ ဖြစ်ပွားမှုတွေက တော်တော်ကျဆင်းလာတာကို ကျွန်တော်တို့ တွေ့ပါတယ်။ ထိန်းသိမ်းနိုင်တဲ့ အခြေအနေရောက်ပြီလို့ ပြောရပါမယ်။ သို့သော်လည်း အားလုံးကင်းစင်သွားပြီလား ဒီလိုတော့ မဟုတ်သေးပါဘူး။ တချို့ပြည်နယ်နဲ့တိုင်း တချို့တွေမှာတော့ ကျန်နေပါသေးတယ်။ ဒါလည်း ကျွန်တော် ဒီထက်ပိုပြီး တည်ငြိမ်အေးချမ်းအောင် ဆောင်ရွက်နေတယ်ဆိုတာလေးကို ပြောချင်ပါတယ်"ဟု ယင်းက ဆိုသည်။

ဒေသတွင်းတည်ငြိမ်အေးချမ်းမှု ပျက်ပြားစေရန် အနောက်နိုင်ငံအချို့ကလက်နက်များ ထောက်ပံ့တယ်သည်ဆိုသော အချက်နှင့်ပတ်သက်၍ မေးမြန်းစဉ် ပြီးခဲ့သည့် သြဂုတ်လကုန်ထိ ပစ္စတို၊ မောင်းပြန်ရိုင်ဖယ် စသည့်ဖြင့် လက်နက်ပေါင်းသုံးထောင်ခန့် ၊ ကျည်ဆန်သုံးသိန်းကျော်ခန့် ဖမ်းဆီးရမိခဲ့ကြောင်းနှင့် ယင်းပမာဏမှာ အလွန် ကြောက်မက်ဖွယ်ကောင်းသော လက်နက်ခဲယမ်းမီးကျောက်များ ဖြစ်ကြောင်း၊ ယင်းကြောင့် ပို့ဆောင်ရေး လမ်းကြောင်းများကို ဖော်ထုတ်ဖမ်းဆီးနေကြောင်းလည်း ပြောကြားခဲ့သည်။

#ymg/mt
#Yangon_Media_Group

#Local_News
Published _13 September 2022

ဩစတြီးယားနိုင်ငံ၊ ဗီယင်နာမြို့ရှိ Vienna International Centre တွင် စက်တင်ဘာလ ၁၂ ရက်က စတင်ကျင်းပနေသော အပြည်ပြည်ဆိုင်ရာ အဏုမြူစွမ်းအင်အေဂျင်စီ (International Atomic Energy Agency-IAEA) ၏ အုပ်ချုပ်မှုအဖွဲ (Board of Governors) အစည်းအဝေးသို့ ဗီယင်နာမြို့အခြေစိုက် ကုလသမဂ္ဂနှင့် နိုင်ငံတကာအဖွဲ့အစည်းများဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးမင်းသိမ်းက Non-Board Member အဖြစ် တက်ရောက်လျက် ရှိကြောင်း သိရသည်။

အဆိုပါ အစည်းအဝေးကို ပုံမှန်အားဖြင့် (၅)ရက်ခန့်ကြာ ကျင်းပလေ့ရှိကြောင်း၊ ယခု ကျင်းပနေသည့်အစည်းအဝေးတွင် ၂၀၂၀-၂၀၂၁ နှစ်အတွင်း လုပ်ငန်းအစီအစဉ်များ အကောင်အထည်ဖေါ်ဆောင်ရွက်နိုင်ခဲ့မှု၊ ၂၀၂၄-၂၀၂၉ ကာလလတ်အတွက် မဟာဗျူဟာ၊ နျူကလီးယားနှင့် ဓါတ်ရောင်ခြည်သင့်မှုအန္တရာယ်ကင်းရှင်းရေး(Nuclear and radiation safety)၊ နျူကလီးယား လုံခြုံရေး (Nuclear security)၊ နျူကလီယားသိပ္ပံ၊ နည်းပညာနှင့် အသုံးချမှုဆိုင်ရာ လုပ်ငန်းဆောင်ရွက်မှုများ ပိုမိုတိုးတက်ခိုင်မာရေးနှင့် နိုင်ငံများ၏ နျူကလီးယားဆိုင်ရာ ဆောင်ရွက်မှုများ လုံခြုံမှုရှိစေရေး (Nuclear verification and safeguard measures) တို့ကို ဆွေးနွေးမည်ဖြစ်ကြောင်း သိရသည်။

IAEA တွင် အဖွဲ့ဝင်နိုင်ငံပေါင်း (၁၇၅) နိုင်ငံ ပါဝင်ပြီး၊ အုပ်ချုပ်မှုအဖွဲ့ဝင် ( ၂ နှစ် သက်တမ်းအတွက်) နိုင်ငံပေါင်း (၃၅) နိုင်ငံကို ဒေသအုပ်စုအလိုက် နှစ်စဉ်ရွေးချယ်တင်မြှောက်လေ့ရှိကြောင်း၊ အေဂျင်စီ၏ အုပ်ချုပ်မှု အဖွဲ့အစည်းအဝေးများကို တစ်နှစ်လျှင် (၅)ကြိမ်ခန့် ကျင်းပလေ့ရှိကြောင်း၊အပြည်ပြည်ဆိုင်ရာ အဏုမြူစွမ်းအင်အေဂျင်စီ(IAEA) ကို လွန်ခဲ့သော ၁၉၅၇ ခုနှစ် ဇူလိုင်လ ၂၉ ရက်တွင်စတင်ထူထောင် ခဲ့ရာ မြန်မာနိုင်ငံအနေဖြင့် ၁၉၅၇ ခုနှစ် အောက်တိုဘာလ ၁၈ ရက်တွင် အဖွဲ့ဝင်အဖြစ် ဝင်ရောက်ခဲ့ကြောင်း နိုင်ငံခြားရေးဝန်ကြီးဌာန၏ ထုတ်ပြန်ချက်အရ သိရသည်။

#ymg/mt
#Yangon_Media_Group

#Local_News
Published _13 September 2022

ချက်နိုင်ငံတွင် ပြုလုပ်သည့် ရုပ်ရှင်ပွဲတော်၌ မြန်မာနိုင်ငံမှ “The Great Myanmar” ရုပ်ရှင်ဇတ်ကားကို ပါဝင်ပြသခဲ့ကြောင်း နိုင်ငံခြားရေးဝန်ကြီးဌာနက ထုတ်ပြန်လိုက်သည်။

ချက်နိုင်ငံတွင် ရုံးစိုက်သော အာဆီယံနိုင်ငံများဖြစ်သော မြန်မာ၊ အင်ဒိုနီးရှား၊ မလေးရှား၊ ဖိလစ်ပိုင်၊ ထိုင်း၊ ဗီယက်နမ် ၆ နိုင်ငံနှင့် တရုတ်၊ ဂျပန်၊ ကိုရီးယား သံရုံး ၊ ပရာ့ဂ်မြို့တော် စာကြည့်တိုက်တို့ပူးပေါင်းကျင်းပသော ASEAN+3 Film Festival 2022 တွင် အဆိုပါ “The Great Myanmar” ရုပ်ရှင်ဇတ်ကားကို စက်တင်ဘာလ ၉ ရက်တွင် ပါဝင်ပြသခဲ့ရာ ပရာ့ဂ်မြို့ရှိ သံတမန်အသိုင်းအဝိုင်း၊ နိုင်ငံခြားရေးဝန်ကြီးဌာနနှင့် ချက်ပြည်သူများ လာရောက်ကြည့်ရှုကြကြောင်း သိရသည်။

ယင်းရုပ်ရှင်ပွဲတော်ကို စက်တင်ဘာလ ၁ ရက်က ဖွင့်လှစ်ခဲ့ရာ မြန်မာသံရုံးယာယီ တာဝန်ခံ ဒေါက်တာဘုန်းလင်းကြိုင်၊ အာဆီယံသံရုံးများနှင့် ASEAN+3 နိုင်ငံများမှ သံရုံးအကြီးအကဲများ တက်ရောက်၍ အဖွင့်အမှာစကားပြောကြားခဲ့ကြကြောင်း၊ ASEAN+3 Film Festival 2022 သို့ ပရာ့ဂ်မြို့တွင် အခြေပြုသောသံအမတ်ကြီးများ၊ သံတမန်များနှင့် ချက်ပြည်သူများတက်ရောက်ခဲ့ကြပြီး ချက်နိုင်ငံခြားရေးဝန်ကြီးဌာနမှ ဒုတိယဝန်ကြီး မာတင်တလာပါက ဧည့်သည်တော်အဖြစ် တက်ရောက်ခဲ့ကြောင်းလည်း သိရသည်။

#ymg/mt
#Yangon_Media_Group

#Local_News
Published _13 September 2022

တောင်ကိုရီးယားသို့ ယခုစက်တင်ဘာလ၏ ဒုတိယအကြိမ် လုပ်သား ၁၁၀ ကျော်ကို ယနေ့(စက်တင်ဘာလ ၁၃ ရက်)က ထပ်မံစေလွှတ်ခဲ့ကြောင်း မြန်မာနိုင်ငံဆိုင်ရာ တောင်ကိုရီးယားသံရုံးသတင်းများအရ သိရသည်။

ယနေ့သွားရောက်သည့် အလုပ်သမားများမှာ စိုက်ပျိုးရေးနှင့် မွေးမြူရေးလုပ်သားအဖြစ် အသစ်ဝင်ရောက်လုပ်ကိုင်မည့် လုပ်သားသစ်(၁၂)ဦး၊ ကုန်ထုတ်လုပ်သားအဖြစ် အသစ်ဝင်ရောက် လုပ်ကိုင်မည့် လုပ်သားသစ်(၇၅)ဦး နှင့် ဆောက်လုပ်‌ရေးလုပ်သားအဖြစ် အသစ်ဝင်ရောက်လုပ်ကိုင်မည့်လုပ်သားသစ် (၂၄)ဦး စုစုပေါင်း (၁၁၁)ဦး ဖြစ်ကြောင်း သိရသည်။

အဆိုပါ အလုပ်သမားများသည် ရန်ကုန်မှ အင်ချွန်းအပြည်ပြည် ဆိုင်ရာလေဆိပ်သို့ ရောက်ရှိခဲ့ပြီးဖြစ်ရာ ဆိုးလ်မြို့ရှိ တောင်ကိုရီးယားနိုင်ငံဆိုင်ရာ မြန်မာသံရုံး၏ အလုပ်သမားသံအရာရှိက အလုပ်သမားများအားကူညီပံ့ပိုးမှုများ ပြုလုပ်ခဲ့ကြောင်းလည်း သိရသည်။

ပြီးခဲ့သည့် စက်တင်ဘာလ ၁ ရက်ကလည်း တောင်ကိုရီးယားနိုင်ငံသို့ Re-entry လုပ်သား(၉၂)ဦးနှင့် ကုန်ထုတ်လုပ်သားအဖြစ် အသစ်ဝင်ရောက် လုပ်ကိုင်မည့်လုပ်သားသစ်(၄၃)ဦး စုစုပေါင်း (၁၃၅)ဦး တို့သွားရောက်ခဲ့ကြသေးကြောင်း သိရသည်။

#Ymg/mt
#Yangon_Media_Group