#Local_News
Published_ 10 december 2022

မန္တလေးမြို့၊ မဟာအောင်မြေမြို့နယ်၊ (၄၁)လမ်း၌ ယနေ့ ဒီဇင်ဘာ ၁၀ ရက် နံနက် ၁၁ နာရီ ၂၄ မိနစ်တွင် ရွေ့လျားဆီအရောင်းကား မီးလောင်မှုဖြစ်ပွားခဲ့ကြောင်း မြန်မာနိုင်ငံမီးသတ်ဦးစီးဌာန၏ ထုတ်ပြန်ချက်အရ သိရသည်။

ဖြစ်စဉ်မှာ မဟာအောင်မြေမြို့နယ်၊ အနောက်ကမ်းနားလမ်း၊ စိန်ပန်းရပ်မြို့ပတ်လမ်း၊ အကွက်အမှတ် (၃၄၈) အနီးတွင် ဖြစ်ပွားခဲ့ခြင်းဖြစ်ကြောင်း သိရှိရသည်။

မီးလောင်ရာနေရာသို့ Level 1 အဆင့် ယာဉ်အုပ်စုများဖြင့် ထွက်ခွာငြှိမ်းသတ်ခဲ့ပြီး ယနေ့ နံနက် ၁၁ နာရီ ၃၂ မိနစ်တွင် မီးငြိမ်းခဲ့ကြောင်း မြန်မာနိုင်ငံ မီးသတ်ဦးစီးဌာန၏ ထုတ်ပြန်ချက်အရ သိရသည်။

မီးလောင်ရသည့်အကြောင်းအရင်းနှင့် ပျက်ဆီးဆုံးရှုံးမှုတန်ဖိုးအား စိစစ်ဆဲဖြစ်ကြောင်း မီးသတ်ဦးစီးဌာနမှ သိရသည်။

#ymg/NN
#Yangon _Media _Group

#Local_News
Published_ 10 December 2022

မြောက်ဦးဒေသကမ္ဘာ့အမွေအနှစ်စာရင်းဝင်မဝင် ပုံမှန်အားဖြင့်လာမည့်ဇွန်၊ ဇူလိုင်လလောက်တွင် သိရမည်ဖြစ်သော်လည်း လတ်တလောအချိန်အထိယူနက်စကိုကစစ်ဆေးရေးအဖွဲ့များမလာရောက်သေးဘူးဟုသာသနာရေးနှင့်ယဉ်ကျေးမှုဝန်ကြီးဌာန၊ ကမ္ဘာ့အမွေအနှစ်များဌာနခွဲမှသိရသည်၊၊

မြန်မာနိုင်ငံအနေဖြင့်မြောက်ဦးဒေသကို ယူနက်စကို၏ကမ္ဘာ့အမွေအနှစ်စာရင်းတွင် အဆိုပြုလွှာတင်သွင်းထားခြင်းဖြစ်သည်၊၊

မြောက်ဦးဒေသ ကမ္ဘာ့အမွေအနှစ်တင်သွင်းထားသည့်အခြေအနေနှင့်လက်ရှိအခြေအနေများကို သာသနာရေးနှင့်ယဉ်ကျေးမှုဝန်ကြီးဌာန၊ ကမ္ဘာ့အမွေအနှစ်များဌာနခွဲ ညွှန်ကြားရေးမှူးဦးသန်းဇော်ဦးက"ဆရာတို့က မြောက်ဦးဒေသကို ကမ္ဘာ့အမွေအနှစ်စာရင်းသွင်းဖို့ အဆိုပြုလွှာတွေ အားလုံးတင်သွင်းပြီးဖြစ်ပါတယ်၊၊ ၂၀၂၂ခုနှစ်ဇွန်၊ ဇူလိုင်လတုန်းက ယူနက်စကိုက ကမ္ဘာအမွေအနှစ်ဒေသဆိုင်ရာအစည်းအဝေးနဲ့ဆုံးဖြတ်ချက်တွေ မကျင်းပနိုင်ခဲ့တဲ့အတွက်အခု၂၀၂၃ခုနှစ်ဇွန်၊ ဇူလိုင်လမှာ ကျင်းပမယ့်အစည်းအဝေးဆုံးဖြတ်ချက်တွေအရသိရမှာဖြစ်ပါတယ်၊၊
ဒါပေမယ့် အခုချိန်အထိယူနက်စကိုက အကြောင်းကြားတာ၊ စစ်ဆေးရေးအဖွဲ့တွေစေလွှတ်တာတွေမရှိသေးပါဘူး"ဟု YMGကိုပြောသည်၊၊

လတ်တလောအခြေအနေအထိ မြောက်ဦးဒေသနှင့်ပတ်သက်၍ယူနက်စကိုက အကြောင်းကြားခြင်း၊စစ်ဆေးရေးအဖွဲ့များစေလွှတ်ခြင်း၊ပြန်လည်ပြင်ဆင်ခိုင်းခြင်းမျိုးမရှိသေးဘူးဟု ဆိုသည်၊၊

ယခု ၂၀၂၃ ခုနှစ်တွင် ယူနက်စကိုက ကမ္ဘာအမွေအနှစ်ဒေသဆိုင်ရာ အစည်းအဝေး မကျင်းပဖြစ်ပါက ၂၀၂၄ခုနှစ်ဇွန်၊ ဇူလိုင်လရောက်မှ မြောက်ဦးဒေသကမ္ဘာ့အမွေ အနှစ်စာရင်းဝင်မဝင် သိရှိနိုင်မည်ဖြစ်ကြောင်း သိရသည်၊၊

#ymg/tthl
#Yangon_Media_Group

#Local_News
Published-10 December 2022

ယခုလအတွင်း မကြာခင်ကျရောက်မည့် ကရင်နှစ်သစ်ကူးနှင့် ခရစ္စမတ် ပိတ်ရက်တွေအတွက် ပုဂံ-ညောင်ဦး ဟိုတယ်များ ကြိုတင်ဘွတ်ကင်မှာယူသူတွေများပြားနေကြောင်း ပုဂံဒေသရှိ ဟိုတယ်ဇုန်များမှ သိရသည်။

ပြည်တွင်းခရီးသွားများလာရောက်လည်ပတ်ကြမည်ဖြစ်သည့်အတွက် E-Bike အငှားလုပ်ငန်းများ ပိုမိုတွင်ကျယ်လာမည့်အပြင်၊ ခရီးသွားတွေကို အမှီပြုလည်ပတ်ရသည့် ဒေသခံတွေ၏ အရောင်းအဝယ်လုပ်ငန်းများ၊ ဈေးရောင်းဈေးဝယ်လုပ်ငန်းများ အခွင့်အလမ်း ပြန်ရလာမည်ဖြစ်ကြောင်းသိရသည်။

ယခုနှစ်ခရီးသွားရာသီအစတွင် ပြည်ပခရီးသွားဧည့်သည်များ အဝင်နည်းနေသော်လည်း ပြည်တွင်းခရီးသွားများ လည်ပတ်မှုများပြားနေကြောင်း၊ ပြီးခဲ့သည့် သီတင်းကျွတ်နှင့် တန်ဆောင်တိုင်ရုံးပိတ်ရက်များတွင် ကမ်းခြေနှင့် ပုဂံဒေသသို့ သွားရောက်လည်ပတ်မှု အများဆုံးဖြစ်ခဲ့ကြောင်း သိရသည်။

လက်ရှိတွင် ပြည်တွင်းမှ ပြည်ပကိုသွားသည့် ခရီးသွားဧည့်သည်များ ပိုများနေကြောင်း မြန်မာနိုင်ငံခရီးသွားလုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်၏ ပြောပြချက်အရ သိရသည်။ ယင်းအပြင် ပြည်တွင်းခရီးသွားလုပ်ငန်းများသည် ယခင်ထက် ၅၀ ရာခိုင်နှုန်းပြန်လည်ပတ်နေပြီဖြစ်ကြောင်း သိရသည်။

#ymg/sth
#Yangon_Media_Group

#Local_News
Published-10 December 2022

ထိုင်းနိုင်ငံတွင် အကြောင်းအမျိုးမျိုးကြောင့် ပြစ်ဒဏ်ကျခံပြီးဖြစ်သည့် မြန်မာရွှေ့ပြောင်းလုပ်သား ၁၈၇ ဦး ဒီဇင်ဘာလ ၉ ရက် တွင် ရနောင်းမြို့ကနေတစ်ဆင့် ကော့သောင်းမြို့ကို ပြန်လည်ဝင်ရောက်ခဲ့ကြပြီ ဖြစ်ကြောင်း မြန်မာအလုပ်သမား သံအရာရှိရုံးက သိရသည်။

ပြည်တော်ပြန်ခဲ့ကြသည့် အရေအတွက်မှာ အမျိုးသမီး ၅၁ ဦးနှင့် အမျိုးသား ၁၃၆ ဦး ပါဝင်ကြောင်း၊ ယင်းတို့ကို ရနောင်းမြို့ကနေ စက်လှေဖြင့် ကော့သောင်းမြို့သို့ ထိုင်းနိုင်ငံဆိုင်ရာ တာဝန်ရှိသူများက ပြန်ပို့ခဲ့ခြင်း ဖြစ်ပြီးကော့သောင်းမြို့ကိုရောက်လာချိန်တွင် ကိုဗစ်-၁၉ စစ်ဆေးခြင်း၊ ကိုယ်ရေးအချက်အလက်စစ်ဆေးခြင်းနှင့် အသိပညာပေးခြင်းများ ပြုလုပ်ကာ သတ်မှတ်အသွားအလာစောင့်ကြည့်ရေးစင်တာများတွင် ထားရှိဦးမည်ဖြစ်ကြောင်း သိရသည်။

ထိုင်းနိုင်ငံ ရနောင်းမြို့အလုပ်သမားသံအရာရှိက နောက်တစ်ကြိမ် ထိုင်းနိုင်ငံသို့ ဝင်ရောက်ပါက တရားဝင်နည်းလမ်းဖြင့်သာ ဝင်ရောက်ကြရန် ပြောကြားခဲ့ကြောင်း မြန်မာရွှေ့ပြောင်းအလုပ်သမားအရေးဆောင်ရွက်နေသူ တစ်ဦးက YMG ကို ပြောသည်။

"ပြီးခဲ့တဲ့ နှစ်ကစပြီး ထိုင်းကို တရားမဝင်သွားတဲ့သူတွေ ပိုများလာခဲ့တာ၊ သွားရင်အဖမ်းခံရမယ်ဆိုတာ သိသိနဲ့စွန့်စားကြတယ်။ ဒါပေမဲ့ ဒီစွန့်စားမှုက အဆင်မပြေဘူးလေ၊ ကျွန်တော်တို့လည်း အတတ်နိုင်ဆုံးပြောပြပါတယ်။ ဒါပေမဲ့ လိုက်နာမှု အားနည်းပါတယ်။ ပြဿနာ ဖြစ်ရင်တော့ ကိုယ့်နိုင်ငံသားတွေဆိုတဲ့ စိတ်နဲ့ကူညီရတာပဲလေ"ဟု အဆိုပါ မြန်မာရွှေ့ပြောင်းအလုပ်သမားအရေးဆောင်ရွက်နေသူက ပြောသည်။

#ymg/mt
#Yangon_Media_Group

#Local_News
Published _ 10 december 2022

ရှမ်းပြည်နယ်၊ နောင်ချိုမြို့နယ်ရှိ မန္တလေး - လားရှိုးသွား ပြည်ထောင်စုလမ်းမကြီးပေါ်တွင် ဒီဇင်ဘာလ ၁၀ ရက် နံနက်အစောပိုင်းက တွဲကားနှင့် ဒိုင်နာကားမျက်နှာချင်းဆိုင်တိုက်မိ၍ ဒိုင်နာကားမောင်းနှင်သူ ထိခိုက်ဒဏ်ရာရရှိမှု ဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲဌာနချုပ်နှင့် လူမှုကူညီရေးအသင်းများထံမှ သိရသည်။

ယနေ့ နံနက်အစောပိုင်း ၅ နာရီ ၂၀ မိနစ်ခန့်က နောင်ချိုမြို့နယ်ရှိ မန္တလေး-လားရှိုးသွား ပြည်ထောင်စုလမ်းမကြီး၏ မိုင်တိုင်အမှတ် (၇၇/၃) နှင့် (၇၇/၄)ကြားတွင် ဖြစ်ပွားခဲ့ခြင်းဖြစ်သည်။

မန္တလေးဘက်မှ လားရှိုးဘက်သို့ ကြက်ခြင်းများတင်ဆောင်မောင်းနှင်လာသည့် ဒိုင်နာကားနှင့် လားရှိးဘက်မှမန္တလေးဘက်သို့ မောင်းနှင်လာသည့် တွဲကားတို အခင်းဖြစ်ရာနေရာ၌ မျက်နှာချင်းဆိုင်ဝင်တိုက်မိ၍ ဒိုင်နာကားမောင်းသူဟာ ကားခေါင်းခန်းအတွင်းညပ်သွားခဲ့ကြောင်း သိရသည်။

ယင်းနောက် နောင်ချိုမြို့နယ်မီးသတ်စခန်းမှတပ်ဖွဲ့ဝင်များနှင့် လူမှုကူညီရေးအသင်းဝင်များ ကယ်ဆယ်ခဲ့ကြသဖြင့် ကားခေါင်းခန်းအတွင်းညပ်နေသည့် ဒိုင်နာကားမောင်းသူအား အသက်ရှင်လျက် ကယ်ထုတ်နိုင်ခဲ့ကြသည်။

ထိခိုက်ဒဏ်ရာရရှိခဲ့သည့် ဒိုင်နာကားမောင်းသူအား ဖြူစင်မေတ္တာလူမှုကူညီရေးအသင်းမှ နောင်ချိုပြည်သူ့ဆေးရုံသို့ ပို့ဆောင်ပေးခဲ့ကြကြောင်းလည်း သိရှိရသည်။

#ymg/NN
#Yangom_Media _Group

#Local_News
Published_ 10 December 2022

ဘင်္ဂလားဒေ့ရှ်နိုင်ငံ၊ ဘင်္ဂါလီဒုက္ခသည်စခန်းမှ ထွက်ခွာလာသူ ၁၅၄ ဦးအား ကယ်ဆယ်ခဲ့ပြီး လုပ်ထုံးလုပ်နည်းများအတိုင်း ဆက်လက်လုပ်ဆောင်မည်ဟု နစကမှ သတင်းထုတ်ပြန် ထားပါတယ်။

မြန်မာ့ရေနံနှင့်သဘာဝဓာတ်ငွေ့လုပ်ငန်း၏ ရေနံရှာဖွေတူးဖော်ရေးလုပ်ငန်း များတွင် အကျိုးတူပူးပေါင်းဆောင်ရွက်လျက်ရှိသော PTTEP International Limited မှ HAI DUONG 29 နှင့် HAI DUONG 38 ရေယာဉ်တို့သည် ဇောတိကစီမံကိန်း ကမ်းလွန်လုပ်ကွက်၌လုပ်ငန်းများဆောင်ရွက်ရန် မြန်မာနိုင်ငံရေပြင်အတွင်း ဖြတ်သန်းလာစဉ် ဒီဇင်ဘာ ၇ ရက် နံနက်ပိုင်းတွင် မြိတ်မြို့၏အနောက်တောင်ဘက် ၁၅၅ မိုင်ခန့်အကွာသို့အရောက်၌ ဘင်္ဂါလီလူမျိုးများ တင်ဆောင်လာသည့် လှေ ၁ စီးသည် ရေဝင်၍ နစ်မြုပ်လုနီးပါးဖြစ်နေသည်ကို တွေ့ရှိရသဖြင့် ကယ်ဆယ်ထားကြောင်း တပ်မတော်(ရေ) မှ လုံခြုံရေး စစ်ရေယာဉ်များသို့ သတင်းပေးပို့ခဲ့တယ်လို့ ဆိုပါတယ်။

သတင်းရလျင်ရချင်း တပ်မတော်(ရေ)မှ လူသားချင်းစာနာထောက်ထားမှုဆိုင်ရာလုပ်ငန်းများ ဆောင်ရွက်နိုင်ရန်အတွက် စစ်ရေယာဉ်(အနော်ရထာ)ကို စေလွှတ်ခေါ်ဆောင်စေခဲ့ရာ ည ၁၀ နာရီခန့်တွင် မြိတ်မြို့၏ အနောက်တောင်ဘက် ၁၅၅ မိုင်ခန့်အကွာ၌ HAI DUONG 38 ရေယာဉ်နှင့်တွေ့ဆုံခဲ့ပြီး ဘင်္ဂါလီလူမျိုး လူကြီး ကျား ၈၃ ဦး၊ မ ၄၀ ဦး၊ ကလေး ကျား ၂၃ ဦး၊ မ ၈ ဦး၊ စုစုပေါင်း ၁၅၄ ဦးတိုအား စစ်ရေယာဉ်ပေါ်သို့ လွှဲပြောင်းတင်ဆောင်၍ လိုအပ်သောကျန်းမာရေးစောင့်ရှောက်မှုများဆောင်ရွက်ပြီး အစားအသောက်များ ထောက်ပံ့ကျွေးမွေး ခေါ်ဆောင်လာခဲ့ကြောင်း ဖော်ပြထားပါတယ်။

ဘင်္ဂါလီလူမျိုးများအား မြိတ်မြို့အနောက်မြောက်ဘက် ၈.၅ မိုင်ခန့်အကွာတွင် ကျောက်ချရပ်နား၍ မြိတ်မြို့နယ်၊ လူဝင်မှုကြီးကြပ်ရေးဦးစီးဌာန ပါဝင်သော အဖွဲ့စုံဖြင့် ရေယာဉ်ပေါ်၌စစ်ဆေးမှုများ ဆက်လက်ဆောင်ရွက်သွားမှာ ဖြစ်တယ်လို့ ဆိုပါတယ်။

ဘင်္ဂါလီလူမျိုးများသည် ဘင်္ဂါလီစကားတစ်မျိုးတည်းသာ ပြောဆိုတတ်ပြီး ကနဦးမေးမြန်းချက်အရ ၎င်းတို့သည် ဘင်္ဂလားဒေ့ရှ်နိုင်ငံ၊ ကော့ဘဇားခရိုင်၊ ဒေါ့ကာစီ ဒုက္ခသည်စခန်းများမှဖြစ်ကာ နိုဝင်ဘာ ၂၇ ရက်တွင် စက်လှေဖြင့် အင်ဒိုနီးရှားနိုင်ငံသို့ စတင်ထွက်ခွာလာခဲ့ခြင်းဖြစ်ပါတယ်။ ၎င်းတို့တွင် ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး (UNHCR)မှ ထုတ်ပေးထားတဲ့ ဒုက္ခသည်ကတ်များ ကိုင်ဆောင်ထားရှိ ကြောင်း၊ ဒီဇင်ဘာ ၇ ရက်တွင် လှေအတွင်းသို့ ရေများဝင်ရောက်၍ နစ်မြုပ်နေစဉ် HAI DUONG 38 ရေယာဉ်နှင့် တွေ့ဆုံခဲ့ခြင်းဖြစ်ကာ လှေပေါ်ပါသူအားလုံး အသက်ရှင်လျက်ရှိ ကြောင်း သိရှိရပါတယ်။

ယင်းတို့အား မြိတ်မြို့နယ်၊ လူဝင်မှုကြီးကြပ်ရေးဦးစီးဌာနပါဝင်သော အဖွဲ့စုံဖြင့် စစ်ဆေးမေးမြန်းမှုများဆောင်ရွက်ပြီးပါက စစ်တွေမြို့သို့ ဆက်လက်ပို့ဆောင်၍ ဥပဒေလုပ်ထုံးလုပ်နည်းများနှင့်အညီ ဆက်လက်ဆောင်ရွက်သွားမှာ ဖြစ်တယ်လို့ နစကမှ သတင်းထုတ်ပြန်ထားပါတယ်။

ygm_mnn
#Yangon_Media_Group