#Local_News
Published-11 May2023
ဆိုင်ကလုန်း မိုခါဝင်ရောက်လျှင် အရေးပေါ်တုံ့ပြန်ကူညီမှုလုပ်ငန်းများဆောလျင်စွာဆောင်ရွက်နိုင်ရန် ပြင်ဆင်ထားကြောင်း UNHCRက အသိပေးထုတ်ပြန်ထားသည်။
ယင်းထုတ်ပြန်ချက်တွင်ဆိုင်ကလုံး မိုခါသည် ရခိုင်သို့ လာမည့် စနေ၊ တနင်္ဂနွေတွင် ဝင်ရောက် မည်ဟု ခန့်မှန်းထားပြီး UNHCR နှင့် မိတ်ဘက်အဖွဲ့များသည် လူထုအုပ်စုများ ဘေးကင်းလုံခြုံစေရေး အလေးပေးပြင်ဆင်ဆောင်ရွက်ချက် များကို မြေပြင်တွင် ဦးစားပေးဆောင်ရွက်လျက် ရှိကြောင်းပါရှိသည်။
အကယ်၍ လိုအပ်ချက် များမြင့်မားလာခဲ့ပါက အရေးပေါ်တုံ့ပြန်ကူညီမှုများကို ဆောလျင်စွာဆောင်ရွက်နိုင်ရန် အရန်အစီအစဉ်ကိုလည်း လျာထားလျက်ရှိသည်ဟုပါရှိသည်။
လက်ရှိတွင်ဒေသနေလူထုများထံ အသိပေးချက်ဖြန့်ဝေနိုင်ရန်နှင့် လိုအပ်သော ကြိုတင်ဆောင်ရွက်ချက် များ စီစဉ်ထားနိုင်ရန် ကယ်ဆယ်ရေးစခန်းများ၊ တိုက်ပွဲရှောင်စခန်းများနှင့် ကျေးရွာများ၌ ဆိုင်ကလုန်းနှင့် ရေကြီးရေလျှံမှုသတိပေးချက် များကို ဖြန့်ဝေပေးလျက်ရှိပြီး ကယ်ဆယ်ရေးစခန်းတစ်ခုစီ၊ တိုက်ပွဲရှောင်စခန်းတစ်ခုစီ၌ ပြင်ဆင်ထားရှိမှုအစီအစဉ်များကို ကယ်ဆယ်ရေးစခန်းစီမံခန့်ခွဲရေးအဖွဲ့များ၊ တိုက်ပွဲရှောင်စခန်းတာဝန်ခံအဖွဲ့များနှင့် ဆွေးနွေးညှိနှိုင်းဆောင်ရွက်နေကြောင်းလည်း သိရသည်။
ထိခိုက်နိုင်ခြေအမြင့်ဆုံးနေရာများကို အလေးပေးဦးတည်လျက် စောင့်ကြည့်ဆန်းစစ်ရေးအစီအစဉ် တစ်ခုကို ပြင်ဆင်ထားရှိကြောင်း၊ယင်းသို့ပြင်ဆင်ထားခြင်းအားဖြင့် လူထုအုပ်စုများနှင့် နီးကပ်စွာ ချိတ်ဆက်နိုင်မည်ဖြစ်ပြီး အရေးပေါ်အခြေအနေရှိလာလျှင် ဆောလျင်စွာတုံ့ပြန်ဆောင်ရွက်နိုင်မည် ဖြစ်ကြောင်းလည်းပါရှိသည်။
အရေးပေါ်ကူညီကယ်ဆယ်ရေး ပစ္စည်းများကို အရံသင့်ထားရှိထားပြီး အချိန်တိုအတွင်း ဖြန့်ဝေပေးနိုင်ရန် ဆိုင်ရာဂိုဒေါင်များတွင် လုံခြုံစွာသိမ်းဆည်းထားရှိကြောင်း၊ရေယာဉ်များ၊ ကားများကို လိုအပ်လျှင် လည်ပတ်အသုံးပြုနိုင်အောင် အရံသင့်ထားရှိထားရှိကြောင်းလည်းထုတ်ပြန်ချက်တွင်ပါရှိသည်။
#ymg/pl #Local_News #ဆိုင်ကလုန်းမိုခါဝင်ရောက် #UNHCR
#YMG #Yangon-Media-Group
#Local_News
Published_ 12 May 2023
အားကောင်းသောဆိုက်ကလုန်းမုန်တိုင်းမိုခါသည်အားအလွန်ကောင်းလာပြီးနောက်နာရီ(၆၀)အတွင်း ဘင်္ဂလားဒေ့ရှ်နိုင်ငံ၊ ကော့ဘဇား မြို့(Cox’s Bazar)နှင့်ကျောက်ဖြူမြို့တို့ကြား စစ်တွေမြို့အနီးမှဖြတ်ကျော်ဝင်ရောက်တော့မည်ဖြစ်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာနမှသိရသည်၊၊
မေလ(၁၁)ရက်နေ့လည်ပိုင်းကနေစပြီးနောက် နာရီ(၆၀)အတွင်းမေလ(၁၄)ရက်တွင် အားအလွန်ကောင်း သောဆိုက်ကလုန်းမုန်တိုင်းမိုခါ ဝင်ရောက်ဖြတ်ကျော်မည်ဖြစ်သည်၊၊
အားကောင်းသောဆိုင်ကလုန်းမုန်တိုင်း (Severe Cyclonic Storm) “မိုခါ (MOCHA)” ၏အရှိန်ကြောင့် နောက် (၂၄)နာရီအတွင်း မကွေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီးနှင့် ရခိုင်ပြည်နယ်တို့တွင် အမြင့်ဆုံးလေတိုက်နှုန်းမှာ တစ်နာရီလျှင် မိုင်(၄၀)မှ (၄၅)မိုင်ခန့်အထိ တိုက်ခတ်မည်၊၊
အားကောင်းသောဆိုင်ကလုန်းမုန်တိုင်း(Severe Cyclonic Storm) “မိုခါ (MOCHA)”၏ အရှိန်ကြောင့် လေပြင်းတိုက်ခတ်ခြင်း၊ မိုးကြီးခြင်း၊ ရုတ်တရက် ရေကြီး ခြင်းနှင့်အတူ မြေပြိုခြင်းများ ဖြစ်ပေါ်နိုင်ပါသဖြင့် ကုန်းမြင့်ဒေသအနီးတွင် နေထိုင် ကြသူများအနေဖြင့် မြေပြိုမှုအန္တရာယ်ကိုလည်းကောင်း၊ မြန်မာ့ကမ်းရိုးတန်း တစ်လျှောက်နှင့် မြစ်ငယ်၊ ချောင်းငယ်များအနီးတွင် နေထိုင်ကြသူများအနေဖြင့် ရေကြီး၊ ရေလျှံမှုများ ဖြစ်ပေါ်နိုင်သောကြောင့် ကြိုတင်သတိပြုနေထိုင်ကြပါရန်နှင့် ပြည်တွင်း လေကြောင်းပျံသန်းရေးနှင့် မြန်မာ့ကမ်းရိုးတန်းတစ်လျှောက်နှင့် ကမ်းလွန်ပင်လယ် ပြင်တို့ရှိ ကမ်းနီး၊ ကမ်းဝေးငါးဖမ်းရေယာဉ်များ၊ သင်္ဘောများအနေဖြင့်လည်း ကြိုတင်သတိပြုရှောင်ရှားနိုင်ပါရန်နှင့် ပြည်သူလူထုအနေဖြင့် မိုးလေဝသနှင့် ဇလဗေဒညွှန်ကြားမှုဦးစီးဌာန၏ အချိန်နှင့် တပြေးညီထုတ်ပြန်ချက်များကို စောင့်ကြည့်၍ လိုအပ်သည့် ကြိုတင်ပြင်ဆင်မှုများကို ဆောင်ရွက်သွားနိုင်ပါရန် အကြံပြုထားကြောင်းသိရသည်၊၊
#ymg/tthl #Local_News #ဆိုက်ကလုန်းမုန်တိုင်းမိုခါ #စစ်တွေနှင့်ကျောက်ဖြူ
#YMG #Yangon_Media_Group
#Local_News
Published-11 May 2023
ချင်းပြည်နယ် မတူပီမြို့အနီး အင်အားရစ်(ခ်)တာစကေး (၄ ဒသမ ၆) အဆင့်ရှိ မြေငလျင်တစ်ခု လှုပ်ရှားသွား ခဲ့ကြောင်း မိုးလေဝသနှင့် ဇလဗေဒညွှန်ကြားမှု ဦးစီးဌာနက ထုတ်ပြန်လိုက်သည်။
ယနေ့မေလ ၁၂ ရက် နံနက် ၃ နာရီ ၁၄ မိနစ် ၅၅ စက္ကန့် အချိန်ကဟားခါးမြေငလျင်စခန်းမှ အနောက်တောင်ဘက် (၇၃) မိုင်ခန့်အကွာ၊ မြန်မာနိုင်ငံ ပြည်တွင်း (မတူပီမြို့၏ အနောက်-အနောက်မြောက်ဘက် (၂၁) မိုင်ခန့်အကွာ) မြောက်လတ္တီ တွဒ် (၂၁.၆၇) ဒီဂရီ၊ အရှေ့လောင်ဂျီတွဒ် (၉၃.၁၂)ဒီဂရီ၊ အနက် (၇၁) ကီလိုမီတာကို ဗဟိုပြု၍ လှုပ်ရှားခဲ့ခြင်းဖြစ်ကြောင်း ယင်းထုတ်ပြန်ချက်အရ သိရသည်။
ငလျင်၏ အင်အားမှာ ရစ်(ခ်)တာစကေး (၄.၆) အဆင့်ရှိသောကြောင့် အင်အားအနည်းငယ်ရှိမြေငလျင်တစ်ခုသာ ဖြစ်ကြောင်း မိုးလေဝသနှင့် ဇလဗေဒညွှန်ကြားမှု ဦးစီးဌာန ၏ ထုတ်ပြန်ချက်တွင် ဖော်ပြထားသည်။
#ymg/pl #Local_News #ချင်းပြည်နယ် #မြေငလျင်တစ်ခုလှုပ်ရှားသွား
#YMG #Yangon_Media_Group
#Local_News
Published_ 11 May 2023
ဗဟိုဘဏ်မှ နိုင်ငံခြားငွေလဲနှုန်းက အမေရိကန်တစ်ဒေါ်လာ ကျပ် ၂၁၀၀ သတ်မှတ်ထားပြီး ပြင်ပငွေကြေးဈေးကွက်အတွင်း အမေရိကန် တစ်ဒေါ်လာ ၂၈၇၀ ကျပ် ဝန်းကျင်ဖြင့် အရောင်းအဝယ်အေးနေကြောင်း သိရပါတယ်။
#Local_News #အမေရိကန်ဒေါ်လာ #အရောင်းအဝယ်အေးနေ
#YMG #Yangon_Media_Group
#Local_News
Published_ 11 May 2023
ဘင်္ဂလားပင်လယ်အော်မှာဖြစ်ပွားနေတဲ့မုန်တိုင်း အရှိန်ကြောင့် မေလ(၁၁)ရက်မှစပြီး နောက်(၂၄)နာရီအတွင်း မြစ်ဝကျွန်းပေါ်၊ မုတ္တမကွေ့၊ မွန်-တနင်္သာရီ ကမ်းရိုးတန်းတစ်လျှောက်နဲ့ ကမ်းလွန်ပင်လယ်ပြင်တို့မှာ မိုးသက်လေပြင်းများကျရောက်တာ၊ လှိုင်းကြီးတာတွေဖြစ်နိုင်တယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနမှ သိရပါတယ်၊၊
#Local_News #မွန်-တနင်္သာရီကမ်းရိုးတန်းဒေသ #သံဖြူဇရပ် #ကျိုက်က္ခမီ #စက်စဲ
#YMG #Yangon_Media_Group
#Local_News
Published_ 11 May 2023
အာဆီယံ-ကိုရီးယားရဲ့ "အာဆီယံကလေးသူငယ်များ စာဖတ်ခြင်းယဉ်ကျေးမှုဖွံ့ဖြိုးတိုးတက်ရေး"စီမံချက်နဲ့ မြန်မာနိုင်ငံက ကလေးငယ်တွေကိုစာဖတ်တဲ့ယဉ်ကျေးမှု ပိုမိုတိုးတက်အောင်ဆောင်ရွက်နေတယ်လို့ သမိုင်းသုတေသနနှင့်အမျိုးသားစာကြည့်တိုက်ဦးစီးဌာနမှ သိရပါတယ်၊၊
#Local_News #အာဆီယံ-ကိုရီးယား #မြန်မာကလေးငယ်များစာဖတ်ခြင်း
#YMG #Yangon_Media_Group
#Local_News
Published_ 11 May 2023
ကျန်းမာရေးဝန်ကြီးဌာနရဲ့ မေ ၁၀ ရက်နေ့ည၈နာရီထုတ်ပြန်ချက်အရ ပြည်တွင်းမှာ ဓာတ်ခွဲနမူနာ ၁၁၁၉၂ ဦးကိုဓာတ်ခွဲစစ်ဆေးခဲ့ရာ ကိုဗစ်(၁၉)လူနာသစ် ၂၅၄ ဦး ထပ်မံတွေ့ရှိခဲ့ကြောင်း ထုတ်ပြန်ချက်အရသိပါတယ်။ အဲ့ဒီလူနာများထဲမှ ၁ ဦးသေဆုံးခဲ့ကြောင်းလည်း သိရပါတယ်။
#Local_News #ကိုဗစ်လူနာသစ်၂၅၄ ဦးထပ်တိုး
#YMG #Yangon_Media_Group
Page 1047 of 1977
