#Local_News
Published_ 27 February 2023

ရက်ချိန်းရယူရန်အသစ်လျှောက်ထားလိုသူများအတွက် စနစ်ပြန်လည်မွမ်းမံမှုများ ပြုလုပ်နေဆဲဖြစ်တဲ့အတွက် ဝန်ဆောင်မှု ပြန်လည်စတင်ဖွင့်လှစ်မည့်အချိန်ကို ကြေညာပေးသွားမည်ဖြစ်ကြောင်း မြန်မာနိုင်ငံကူးလက်မှတ်ထုတ်ပေးရုံး webside စာမျက်နှာတွင် ထုတ်ပြန်ထားသည်။

တစ်ဦးထပ်ပိုသည့် ပူးတွဲလျှောက်ထားသူများအနေဖြင့် အဖွဲ့တွင်ပါဝင်သောလျှောက်ထားသူအားလုံးအတွက် ငွေပေးချေမှု မပြုလုပ်ရသေးတာကြောင့် ရက်ချိန်းမရှိသေးကြောင်း အဆိုပါ လျှောက်ထားသူများအနေဖြင့် အချက်အလက်သေချာစစ်ဆေးပြီး ငွေပေးချေရန်ကျန်ရှိကြောင်း အသိပေးစာတွေ့ရှိပါက ငွေပေးချေရမှာဖြစ်ကြောင်း သတင်းထုတ်ပြန်ထားသည်။

ဖေဖော်ဝါရီလ ၂၄ ရက်နေ့မှာ ရန်ကုန်မြန်မာနိုင်ငံကူးလက်မှတ်ထုတ်ပေးရေးရုံး၏ Online Appointment System ရက်ချိန်းရယူခြင်းစနစ်တွင် ကိုယ်ရေးအချက်အလက်ဖြည့်သွင်း၍ ငွေသွင်းပြီးသော်လည်း ရက်ချိန်းမရရှိခဲ့သူများအနေဖြင့် စနစ်တွင်ပြန်လည်စစ်ဆေးနိုင်ကြောင်းမြန်မာနိုင်ငံကူးလက်မှတ်ထုတ်ပေးရေးရုံးက ထုတ်ပြန်ထားသည်။

#ynzw/ynzw #ပတ်စ်ပို့ #ရက်ချိန်ရယူသူများ #စနစ်ပြန်လည်
#YMG #Passport #Yangon_Media_Group

#Local_News
Published-27 February 2023

မန္တလေးတိုင်းဒေသကြီး မြစ်သားမြို့နယ် ကျီတိုင်ကျေးရွာအနီးရှိ မြေဧရိယာ ၁၃၂ ဒသမ ၃၅ ဧကပေါ်တွင် တည်ဆောက်နေသော ကင်းတားနေရောင်ခြည်စွမ်းအင်သုံး လျှပ်စစ်ဓာတ်အားပေးစက်ရုံစီမံကိန်းမှာ ၉၀ ဒသမ ၈ ရာခိုင်နှုန်း ပြီးစီးနေပြီဖြစ်ကြောင်း လျှပ်စစ်စွမ်းအားဝန်ကြီးဌာနက သိရသည်။

ယင်း၏ စက်တပ်ဆင်အင်အားမှာ ၃၀ မဂ္ဂါဝပ်ဖြစ်ကာ လက်ရှိအချိန်တွင် ၁၉ မဂ္ဂါဝပ်ခန့် စမ်းသပ်ထုတ်လုပ်ဖြန့်ဖြူးပေးလျက်ရှိပြီး စီမံကိန်းတစ်ခုလုံးပြီးစီးပါက ထွက်ရှိလာမည့် ဓာတ်အားများကို ၁၃၂ ကေဗွီ ကင်းတား-အင်းကုန်း ဓာတ်အားလိုင်းဖြင့် ကင်းတား ရေအားလျှပ်စစ်ဓာတ်အားပေးစက်ရုံမှတစ်ဆင့် နိုင်ငံတော်ဓာတ်အားစနစ်သို့ ချိတ်ဆက်ပို့လွှတ် ဖြန့်ဖြူးသွားမည်ဖြစ်ကြောင်း သိရသည်။

ဖေဖော်ဝါရီလ ၂၆ ရက်က လျှပ်စစ်စွမ်းအားဝန်ကြီးဌာန ပြည်ထောင်စုဝန်ကြီး ဦးသောင်းဟန်နှင့် မန္တလေးတိုင်းဒေသကြီး သယံဇာတရေးရာဝန်ကြီး ဦးရွှေဇင်တို့ အဆိုပါ ကင်းတား ၃၀ မဂ္ဂါဝပ် နေရောင်ခြည်စွမ်းအင်သုံး လျှပ်စစ်ဓာတ်အား ပေးစက်ရုံစီမံကိန်း၊ ကင်းတားရေအားလျှပ်စစ်ဓာတ်အားပေးစက်ရုံနှင့် ရန်ကုန်-မန္တလေး အမြန်လမ်းမကြီးမိုင်တိုင်အမှတ်(၂၉၃) အနီး လျှပ်စစ်ဓာတ်အား ပို့လွှတ်ရေးနှင့် ကွပ်ကဲရေးဦးစီးဌာနက အကောင်အထည်ဖော် ဆောင်ရွက်လျက်ရှိသည့် ၅၀၀ ကေဗွီအေ ကံကောင်းဓာတ်အားခွဲရုံ စီမံကိန်းလုပ်ငန်းတို့ကို သွားရောက်ခဲ့ကြကြောင်း သိရသည်။

ကင်းတားရေအားလျှပ်စစ် ဓာတ်အားပေးစက်ရုံသည် မန္တလေးတိုင်းဒေသကြီး မြစ်သားမြို့နယ် ပန်းလောင်မြစ်ပေါ်တွင်တည်ရှိပြီး ကျောက်ဖြည့် ရေလှောင်တမံအမျိုးအစားတမံဖြစ်ကာ စက်တပ်ဆင်အင်အားမှာ ၂၈ မဂ္ဂါဝပ်ရှိ သည့် ဓာတ်အားပေးစက် နှစ်လုံးဖြစ်၍ စုစုပေါင်း ၅၆ မဂ္ဂါဝပ်ထွက်ရှိကြောင်း၊ ဒီဇိုင်းအရ တစ်နှစ်ထုတ်လုပ်နိုင်မှုမှာ ၁၆၅ ကီလိုဝပ် နာရီသန်းပေါင်းဖြစ်ပြီး ထွက်ရှိလာမည့် ဓာတ်အားများကို ၁၃၂ ကေဗွီ ကင်းတား-သာစည် ဓာတ်အားလိုင်းနှင့် ၁၃၂ ကေဗွီ ကင်းတား-အင်းကုန်း ဓာတ်အားလိုင်းတို့ဖြင့် နိုင်ငံတော်ဓာတ်အားစနစ်သို့ ချိတ်ဆက် ပို့လွှတ်ဖြန့်ဖြူးပေးလျက်ရှိကြောင်း သိရသည်။

ရန်ကုန်-မန္တလေး အမြန်လမ်းမကြီး မိုင်တိုင်အမှတ် (၂၉၃) အနီး လျှပ်စစ်ဓာတ်အားပို့လွှတ်ရေးနှင့် ကွပ်ကဲရေးဦးစီးဌာနမှ အကောင်အထည်ဖော်ဆောင်ရွက် လျက်ရှိသည့် ၅၀၀ ကေဗွီအေ ကံကောင်းဓာတ်အားခွဲ ရုံ စီမံကိန်းလုပ်ငန်းမှာ မြန်မာနိုင်ငံတွင် ပထမဆုံးအကောင်အထည်ဖော်ဆောင်ရွက်လျက် ရှိသည့် ၅၀၀ ကေဗွီအေ ဓာတ်အားခွဲရုံစီမံကိန်းဖြစ်ပြီး စီမံကိန်းတစ်ခုလုံးအနေဖြင့် လက်ရှိတွင် ၇၃ ဒသမ ၁၉ ရာခိုင်နှုန်း ပြီးစီးနေပြီဖြစ်ကြောင်းလည်း သိရသည်။

#ymg/mt #Local_News #ကင်းတား #နေရောင်ခြည်စွမ်းအင်သုံး
#လျှပ်စစ်ဓာတ်အားပေးစက်ရုံ #စီမံကိန်း #YMG#Yangon_Media_Group

#Local_News
Published_ 27 February 2023

အခုရက်ပိုင်းအတွင်း Sun Outage ဖြစ်စဉ်ကြောင့် ရုပ်သံနှင့်ရေဒီယိုထုတ်လွှင့်မှုများ အချိန်(၁)မိနစ်မှ(၁၈) မိနစ်အထိ ယာယီပြတ်တောက်နိုင်ကြောင်း သိရသည်၊၊

Sun Outage ဖြစ်စဉ်ကြောင့် Thaicom-6 ဂြိုဟ်တုကို အသုံးပြုပြီး မြန်မာ့ အသံနှင့်ရုပ်မြင်သံကြားက ထုတ်လွှင့်နေသည့်TV Channel များနှင့် ရေဒီယို အစီအစဉ်များသည်မတ်လ (၆)ရက်မှ (၁၇)ရက်အထိနေ့စဉ် တစ်မိနစ်ကနေ (၁၈)မိနစ်လောက်အထိ Signal ပြတ်တောက်မှုဖြစ်ပေါ်နိုင်သည်ဟု နိုင်ငံပိုင်သတင်းစာ၌ ထုတ်ပြန်ထားသည်၊၊

နေ၊ ဂြိုဟ်တုနှင့် TVRO(စလောင်း)တို့ တစ်တန်းတည်း ကျရောက်ချိန်တွင် Sun Outage ဖြစ်ပေါ်ပြီး ဂြိုဟ်တုက ပေးပို့ထုတ်လွှင့်နေသည့်အရုပ်/အသံ အချက်အလက်များ ခေတ္တ ယာယီပြတ်တောက်မှုများဖြစ်ပေါ်ခြင်းဖြစ်သည်၊၊

Sun Outage ဖြစ်စဉ်သည် နှစ်စဉ်ကြုံတွေ့ ရလေ့ရှိသည့် သဘာဝဖြစ်စဉ်တစ်ခုဖြစ်ပြီး နှစ်စဉ် မတ်လမှာ တစ်ကြိမ်၊ စက်တင်ဘာလကုန်နှင့် အောက်တိုဘာလဆန်းတို့တွင် တစ်ကြိမ် ကြုံတွေ့ရကြောင်းဖော်ပြထားသည်၊၊

ယင်းဖြစ်စဉ်သည် ထုတ်လွှင့်သည့်ဂြိုဟ်တု၊ ဖမ်းယူတဲ့TVRO (စလောင်း) အရွယ်အစားနှင့် တည်နေရာတို့အပေါ် မူတည်ပြီး Sun Outage ဖြစ်သည့်အချိန်နှင့် Signal ပြတ်တောက်မှုကြာချိန်တို့ ကွာခြားမှုရှိကြောင်းသိရသည်၊၊

#ymg/tthl #ရုပ်သံနှင့်ရေဒီယို # ထုတ်လွှင့်သည့်ဂြိုဟ်တု #Signal #အချိန်ပိုင်းပြတ်တောက်နိုင် #Sun Outage #YMG #Yangon_Media_Group

#Local_News
Published_ 27 February 2023

မြန်မာအမျိုးသမီး စီးပွားရေးလုပ်ငန်းရှင်များ၏ အခန်းကဏ္ဍတိုးတက်စေဖို့ မြန်မာအမျိုးသမီးစွမ်းဆောင်ရှင်များအသင်းနှင့် မြန်မာနိုင်ငံကုန်သည်စက်မှုအသင်းချုပ်မှ စီးပွားအသင်းအဖွဲ့တချို့တို့ ဖေဖော်ဝါရီလ ၂၆ ရက်နေ့က နားလည်မှုစာချွန်လွှာ လက်မှတ်ရေးထိုးခဲ့ကြောင်း သိရသည်။

သက်ဆိုင်ရာ စီးပွားရေးနယ်ပယ်အလိုက် ဝန်ဆောင်မှုများပေးနိုင်ရေးတို့အပြင် မြန်မာအမျိုးသမီး စီးပွားရေးစွမ်းဆောင်ရှင်များအသင်းနှင့် အကောင်းဆုံးသော ဝန်ဆောင်မှုများ ပေးနိုင်ဖို့လက်တွဲပူးပေါင်းဆောင်ရွက်သွားမည်ဖြစ်ကြောင်း ကုန်သည်စက်မှုအသင်းချုပ်ဥက္ကဌ ဦးအေးဝင်က ပြောသည်။

မြန်မာနိုင်ငံ အမျိုးသမီးစီးပွားရေးစွမ်းဆောင်ရှင်များအသင်း ဥက္ကဋ္ဌ ဒေါ်ခင်လေးက အမျိုးသမီး စီးပွားရေးကဏ္ဍ ဖွံ့ဖြိုးတိုးတက်ရန်အတွက် မိတ်ဖက်အဖွဲ့အစည်းများနှင့် လက်မှတ်ရေးထိုးခြင်းဖြစ်ပါကြောင်း၊ အာဆီယံ စီးပွားရေးစွမ်းဆောင်ရှင်များကွန်ယက်တွင်လည်း နိုင်ငံကိုယ်စားပြုပါဝင်နိုင်ခဲ့ကြောင်း၊ ရှေ့ဆက်ပြီး မိတ်ဖက် အဖွဲ့အစည်းများနှင့် အပြန်အလှန် ပူးပေါင်းဆောင်ရွက်သွားကြမည်ဖြစ်ကြောင်း ပြောကြားခဲ့သည်။

မြန်မာအမျိုးသမီးစွမ်းဆောင်ရှင်များအသင်းနှင့် မြန်မာနိုင်ငံ ကွန်ပျူတာအသင်းချုပ်၊ မြန်မာစီးပွားစီမံ အမှုဆောင်အသင်း၊ မြန်မာနိုင်ငံလူငယ်စွန့်ဦး တီထွင်လုပ်ငန်းရှင်များ အသင်း စသည့်အသင်းများနှင့် လက်မှတ်ရေးထိုးခဲ့ကြောင်း သိရသည်။

မြန်မာ့အမျိုးသမီး စီးပွားရေးစွမ်းဆောင်ရှင်များအသင်းကို ၁၉၉၅ ခုနှစ်တွင် စတင်ဖွဲ့စည်းတည်ထောင်ခဲ့ပြီး အမျိုးသမီးစီးပွားရေးလုပ်ငန်းရှင်များ၊ အစပျိုး အမျိုးသမီး လူငယ်လုပ်ငန်းရှင်များပါဝင်ကာ အသင်းဝင်အင်အား ၃၀၀၀ ကျော်ဖြင့် ရပ်တည်နေကြောင်း သိရသည်။

#ymg/ynzw #Local_News #မြန်မာအမျိုးသမီး #စွမ်းဆောင်ရှင်များအသင်း #ကုန်သည်စက်မှု #YMG #Yangon_Media_Group

#Local_News
Published_ 27 February 2023

ရခိုင်ပြည်နယ် သံတွဲခရိုင် သံတွဲမြို့၏ အရှေ့မြောက်ဘက် ၁၂ မိုင်ခန့်အကွာ သူဌေးချောင်းပေါ်တွင် တည်ဆောက်နေသည့် သူဌေးရေအားလျှပ်စစ် စီမံကိန်းဟာ ယခုအခါ စီမံကိန်းတစ်ခုလုံး၏ ၇၅ ဒသမ ၆၄ ရာခိုင်နှုန်းခန့်ပြီးစီးနေပြီဖြစ်ပြီး ၂၀၂၂ - ၂၀၂၃ ဘဏ္ဍာ နှစ်ကုန်တွင် ၇၆ ရာခိုင်နှုန်းပြီးစီးမည်ဖြစ်ကြောင်း လျှပ်စစ်စွမ်းအားဝန်ကြီးဌာနမှသိရသည်။

လျှပ်စစ်စွမ်းအားဝန်ကြီးဌာန ဒုတိယဝန်ကြီးဦးအေးကျော်က ယခု စီမံကိန်းပြီးပါက ဒေသခံများ အလုပ်အကိုင်အခွင့်အလမ်းများစွာရရှိမည့်အပြင် ထွက်ရှိလာသော လျှပ်စစ်ဓာတ်အားဖြင့် ဒေသအခြေခံခရီးသွားလုပ်ငန်းများကို တိုးချဲ့ဆောင်ရွက်နိုင်မည်ဖြစ်သဖြင့် သတ်မှတ်ကာလအတွင်း အရည်အသွေးပြည့်မီစွာ ပြီးစီးအောင်ကြိုးပမ်းဆောင်ရွက်ကြရန်နှင့် ပင်မတမံရေဝပ် ဧရိယာအတွင်းကျရောက်သဖြင့် ရွှေ့ပြောင်းပြန်လည်နေရာချထားရသည့် ကျေးရွာများမှ မိသားစုများ လျှပ်စစ်မီးရရှိရေး၊ လမ်းပန်းဆက်သွယ်ရေး၊ ရေရရှိရေးနှင့် အခြားလိုအပ်ချက်များကိုလည်း ဖြည့်ဆည်းဆောင်ရွက်ပေးရန်ဖေဖော်ဝါရီလ၂၆ရက်နေ့က ပြောကြားခဲ့ကြောင်းသိရသည်။

အဆိုပါစီမံကိန်းသည် ပင်မရေလှောင်တမံမှာ ဇုန်အမျိုးအစား (ကျောက်ဖြည့်တမံ)ဖြစ်ကာ ကန်ရေပြည့်ရေသိုလှောင် ပမာဏ ၆ ဒသမ ၉၆ သိန်း ဧကပေ သိုလှောင်နိုင်ကြောင်း၊ ၃၇ မဂ္ဂါဝပ် ဓာတ်အားပေးစက်သုံးလုံးဖြင့် စုစုပေါင်းစက်တပ်ဆင်အင်အား ၁၁၁ မဂ္ဂါဝပ်ရှိကြောင်းသိရသည်။

#ymg/ynzw #Local_News #ရေအားလျှပ်စစ် #နာရီသန်းပေါင်း၃၈၆
#YMG #Yangon_Media_Group

Published 26 Feb 2023

ကမ္ဘာ့နိုင်ငံများနည်းတူ မြန်မာနိုင်ငံတွင်လည်း ကုန်ဈေးနှုန်းကြီးမြင့်မှုကိုတွေ့ကြုံနေကြရတယ်လို့ နစက ဥက္ကဋ္ဌ၊တပ်မတော်ကာကွယ်ရေးဦးစီးချုပ် ဗိုလ်ချူပ်မှူးကြီးမင်းအောင်လှိုင်ကပြောကြားပါတယ်။

ဖေဖော်ဝါရီ ၂၆ရက်က ရခိုင်ပြည်နယ် စစ်တွေမြို့ကိုရောက်ရှိနေတဲ့ ဗိုလ်ချူပ်မှူးကြီးမင်းအောင်လှိုင်ဟာ အနောက်ပိုင်းတိုင်းစစ်ဌာနချုပ်၊ စစ်တွေတပ်နယ်ရှိ အရာရှိ၊ စစ်သည်၊ မိသားစုများအား နယ်မြေခံတပ်နယ်ခန်းမ၌ သွားရောက်တွေ့ဆုံပြီး  နိုင်ငံရဲ့အခြေအနေကို ပြောကြားရာမှာ ထည့်သွင်းပြောကြားခဲ့တာဖြစ်တယ်လို့ နစကပြန်ကြားရေးရဲ့သတင်းထုတ်ပြန်ချက်အရသိရပါတယ်။

မိမိတို့နိုင်ငံတွင် စိုက်ပျိုးမွေးမြူရေးလုပ်ငန်းများဆောင်ရွက်ရန်အတွက် ရေနှင့်မြေများ၊သဘာဝသယံဇာတများနှင့် လူသားအရင်းအမြစ်များရှိပေမယ့် စဉ်ဆက်မပြတ်ကြိုးစားလိုစိတ်နှင့် အလုပ်လုပ်ကိုင်လိုမှုအားနည်းခြင်းကြောင့်  တိုးတက်မှုများနောက်ကျလျက်ရှိသည်ကို တွေ့ရကြောင်း၊ ထို့ကြောင့် ပြည်တွင်း ကုန်ထုတ်လုပ်မှုလုပ်ငန်းများ တိုးတက်အောင် ဆောင်ရွက်၍ နိုင်ငံစီးပွား ဖွံ့ဖြိုးတိုးတက်အောင်ကြိုးပမ်းဆောင်ရွက်လျက်ရှိတယ်လို့ ဗိုလ်ချူပ်မှူးကြီးက ရှင်းလင်းပြောဆိုခဲ့ပါတယ်။

စစ်သည်များအနေဖြင့်လည်း မိမိတို့၏အတန်းပညာများ မြင့်မားရေးအတွက် တပ်မတော်ပညာရေးကျောင်းများတွင် မှန်မှန်ကန်ကန် တက်ရောက်သင်ကြားသွားရန်လိုကြောင်း၊ တပ်မတော်သားများ၏ တစ်ဦးချင်း စွမ်းရည်တိုးတက်ပြီး စစ်လက်နက်ပစ္စည်းများ၏ စွမ်းအားနှင့် စွမ်းပကားမြင့်မားအောင်  ဆောင်ရွက်နိုင်မည်ဆိုပါက တပ်မတော်အင်အားရှိမည်ဖြစ်ကြောင်း၊တစ်ဦးချင်း စွမ်းရည်များကို အသုံးချ၍ တပ်မတော် တစ်ရပ်လုံးစွမ်းရည် ရှိအောင်ဆောင်ရွက်ရမည် ဖြစ်ကြောင်းလည်း နစက ဥက္ကဋ္ဌက ဆက်လက်ပြောကြားခဲ့ပါတယ်။

ထို့အပြင် ၂၀၂၀ ပြည့်နှစ် ပါတီစုံ ဒီမိုကရေစီ အထွေထွေရွေးကောက်ပွဲတွင် ဖြစ်ပေါ်ခဲ့သည့် မဲမသမာမှုဖြစ်စဉ်များကို သင်ခန်းစာယူပြီးလာမည့်ရွေးကောက်ပွဲတွင် မဲစာရင်းများမှန်ကန်မှုရှိစေရေးအတွက် မြေပြင်စာရင်းကောက်ယူခြင်းလုပ်ငန်းများအပါအဝင် လုပ်ငန်းစဉ်များအတိုင်း စနစ်တကျ စီမံဆောင်ရွက်လျက်ရှိတဲ့ အခြေအနေတွေကိုလည်း ဗိုလ်ချူပ်မှူးကြီးကရှင်းလင်းပြောဆိုခဲ့တယ်လို့ သတင်းထုတ်ပြန်ချက်မှာဖော်ပြထားပါတယ်။

အဆိုပါ တွေ့ဆုံပွဲသို့ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌတပ်မတော်ကာကွယ်ရေးဦးစီးချုပ်နှင့်အတူ ဇနီး ဒေါ်ကြူကြူလှ၊ ကာကွယ်ရေးဦးစီးချုပ် (ရေ) ဗိုလ်ချုပ်ကြီး မိုးအောင်နှင့် ဇနီး၊ ကာကွယ်ရေးဦးစီးချုပ် (လေ) ဗိုလ်ချုပ်ကြီးထွန်းအောင်နှင့် ဇနီး၊ ကာကွယ်ရေးဦးစီးချုပ်ရုံးမှ တပ်မတော်အရာရှိကြီးများနှင့် ဇနီးများ၊ အနောက်ပိုင်းတိုင်းစစ်ဌာနချုပ်တိုင်းမှူး ဗိုလ်ချုပ် ထင်လတ်ဦးနှင့် တာဝန်ရှိသူများ၊ အနောက်ပိုင်းတိုင်းစစ်ဌာနချုပ်၊ စစ်တွေတပ်နယ်မှ အရာရှိ၊ စစ်သည်၊ မိသားစုများ တက်ရောက်ခဲ့ကြပါတယ်။

နစက ဥက္ကဋ္ဌနှင့်အဖွဲ့ဟာ ခရီးစဉ်အတွင်း စစ်တွေမြို့ကျက်သရေဆောင် လောကာနန္ဒာ စေတီတော်မြတ်ကြီးသို့ သွားရောက်ဖူးမြော်ကြည်ညိုခဲ့ကြတယ်လို့ သတင်းထုတ်ပြန်ချက်အရသိရပါတယ်။

YMG/knl

#မြန်မာ

#ဗိုလ်ချူပ်မှူးကြီးမင်းအောင်လှိုင်

#နစကဥက္ကဋ္ဌ

#စစ်တွေခရီးစဉ်

#YangonMediaGroup

#Myanmar_News