#Local_News
Published _1 March 2023

ပုလဲ၊ ကျောက်မျက်နှင့်ကျောက်စိမ်းအတွဲများကို နေပြည်တော်ရှိ မဏိရတနာကျောက်စိမ်းခန်းမတွင် မတ်လ ၁၇ ရက်မှ မတ်လ ၂၃ ရက်ထိ ရောင်းချသွားမည်ဖြစ်ကြောင်း သိရသည်။

ယင်းမှာ(၅၈) ကြိမ်မြောက် မြန်မာ့ကျောက်မျက် ရတနာပြပွဲဖြစ်ပြီး မြန်မာ့ကျောက်မျက်ရတနာဥပဒေနှင့်အညီခွင့်ပြုမိန့်ရယူကာ ကျောက်မျက်ရတနာများ တူးဖော်ထုတ်လုပ်ခြင်းလုပ်ငန်းများဆောင်ရွက်လျက်ရှိသော နိုင်ငံသားကျောက်မျက်ရတနာလုပ်ငန်းရှင်များ၊ လိုင်စင်ရယူ၍ ကျောက်မျက်ရတနာရောင်းဝယ်ခြင်းလုပ်ငန်းများဆောင်ရွက်လျက်ရှိသော နိုင်ငံသားကျောက်မျက်ရတနာလုပ်ငန်းရှင်များအား သတ်မှတ်ချက်များနှင့်အညီ တက်ရောက်ဝယ်ယူခွင့်ပြုမည် ဖြစ်ကြောင်း သိရသည်။

ပြီးခဲ့သည့် ၂၀၂၂ ခုနှစ် (၅၇) ကြိမ်မြောက် မြန်မာ့ကျောက်မျက် ရတနာပြပွဲကို ဧပြီလ ၂၂ ရက်မှ ၂၈ ရက်ထိကျင်းပပြုလုပ်ခဲ့ရာ တရုတ်၊ အိန္ဒိယ၊ ကိုရီးယား၊ ဩစတြေးလျ နိုင်ငံတို့မှ ပြည်ပရတနာကုန်သည် ၁၂၂ ဦး၊ ပြည်တွင်းရတနာကုန်သည် ၁၄၂၄ ဦးစုစုပေါင်းရတနာကုန်သည် ၁၅၄၆ဦးထိတက်ရောက်ခဲ့ကြပြီး ပုလဲအတွဲ ၃၃၀တွဲ ၊ ကျောက်အတွဲ ၅၄တွဲ ၊ ကျောက်စိမ်းအတွဲ ၁၃၃၅ တွဲရောင်းချနိုင်ခဲ့ကြောင်း မြန်မာ့ကျောက်မျက်ရတနာလုပ်ငန်း၏ စာရင်းများအရ သိရသည်။

#ymg/mt #Local_News #ပုလဲ #ကျောက်မျက် #ကျောက်စိမ်း
#YMG #Yangon_Media_Group

#Local_News
Published_ 1 March 2023

ကျောက်ဖြူရေနက်ဆိပ်ကမ်းကို ပြည်ပကုန်သွယ်မှုလုပ်ငန်းများ ပိုမိုတိုးတက်စေရန် ရည်ရွယ်ဆောင်ရွက်ခဲ့ခြင်းဖြစ်ကြောင်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က ရခိုင်ပြည်နယ်ကျောက်ဖြူခရိုင်အတွင်းရှိ ခရိုင်၊ မြို့နယ်အဆင့် ဌာနဆိုင်ရာတာဝန်ရှိသူများ၊ မြို့မိမြို့ဖများနှင့် ဖေဖော်ဝါရီလ ၂၈ ရက်တွင် တွေ့ဆုံစဉ် ပြောသည်။

ယင်းအပြင် ကျောက်ဖြူစက်မှုဇုန်နှင့် ပတ်သက်၍လည်း စီမံဆောင်ရွက်လျက်ရှိကြောင်း၊ စီမံကိန်းများ အကောင်အထည်ဖော် ဆောင်ရွက်ရာတွင် ဒေသတစ်ခုချင်းစီအလိုက် ၎င်းဒေသနှင့် ကိုက်ညီနိုင်မည့် စီးပွားရေးလုပ်ငန်းများကို ရေတိုရေရှည်တွက်ချက် ဘက်ပေါင်းစုံက တွက်ချက်စဉ်းစား ဆောင်ရွက်သည့်အတိုင်း ကျောက်ဖြူ အထူးစီးပွားရေးဇုန်စီမံကိန်းကို လည်း အဘက်ဘက်မှ စဉ်းစားကာ အောင်မြင်အောင် ဆောင်ရွက်ရမည်ဖြစ်ကြောင်း ပြောကြားခဲ့သေးသည်။

ကျောက်ဖြူဒေသတွင် စိုက်ပျိုးရေးလုပ်ငန်းနှင့် မွေးမြူရေးလုပ်ငန်း များကို အောင်မြင်အောင်ဆောင် ရွက်ကြစေလိုပြီး ဒေသဖွံ့ဖြိုးရေးကို အထောက်အကူဖြစ်စေလိုကြောင်း၊ နိုင်ငံတော်အနေဖြင့် MSME လုပ်ငန်းများအတွက် လိုအပ်သည့် ရင်းနှီးမတည်ငွေများကို ထုတ်ပေးလျက်ရှိကြောင်းလည်း နစက ဥက္ကဌက ပြောခဲ့ကြောင်း သိရသည်။

ကျောက်ဖြူခရိုင်အတွင်းရှိ ခရိုင်၊ မြို့နယ်အဆင့် ဌာနဆိုင်ရာတာဝန်ရှိသူများ၊ မြို့မိမြို့ဖများက ဒေသဖွံ့ဖြိုးတိုးတက်ရေး၊ ဒေသခံများ၏ လူမှုစီးပွားဘဝ ဖွံ့ဖြိုးတိုးတက်ရေး တို့အတွက် လိုအပ်သည်များ ကူညီပံ့ပိုးဆောင်ရွက်ပေးစေလိုမှုကိုတင်ပြကြသည့်အပြင် ကျောက်ဖြူမြို့ရှိ သာသနာ့ဗိမာန်အဆောက်အဦမှာ နှစ်ပေါင်းကြာရှည်ပြီဖြစ်ပြီး ပျက်စီးယိုယွင်းလျက်ရှိသဖြင့် ပြင်ဆင်ဆောင်ရွက်ပေးရန်လိုအပ်လျက်ရှိနေကြောင်းလည်း တင်ပြခဲ့ကြောင်း သိရသည်။

#ymg/mt #Local_News #ပြည်ပကုန်သွယ်မှု #ကျောက်ဖြူ #ရေနက်ဆိပ်ကမ်း #YMG #Yangon_Media_Group

#Local_News
Published-1 March 2023

ရန်ကုန်တိုင်းဒေသကြီး၊တောင်ဥက္ကလာပမြို့နယ်၊ စာတိုက်မှတ်တိုင် မီးပွိုင့်အနီးတွင် ဖေဖော်ဝါရီလ ၂၈ရက် ညပိုင်းက အငှားယာဉ်တစ်စီး မီးလောင်မှုဖြစ်ခဲ့ပြီး ယာဉ်မောင်းသေဆုံးခဲ့သည့်အပြင် ထိခိုက်ဒဏ်ရာရရှိသူတစ်ဦးရှိခဲ့ကြောင်း ရွှေရောင်တွဲလက်ပရဟိတအသင်းက သိရသည်။

တောင်ဥက္ကလာမြို့နယ်၊ အမှတ်၇ ရပ်ကွက်၊ သစ္စာလမ်း၊ စာတိုက်မှတ် တိုင်မီးပွိုင့်အနီးတွင် အငှားယာဉ်တစ်ဦး အရှိန်လွန်၍ ခြံစည်းရိုးကိုဝင်တိုက်မိကာ ဂတ်စ်အိုးပေါက်ကွဲ၍ မီးလောင်ခဲ့ခြင်းဖြစ်ကြောင်း သိရသည်။

"Taxi က အရှိန်မထိန်းနိုင်ဘဲ ခြံစည်းရိုးကိုဝင်တိုက်မိတာ။ အဲဒီမှာ CNG အိုး ပေါက်ကွဲပြီး မီးလောင်တာ။ မီးလောင်တာ မိနစ်ပိုင်းအတွင်းပါပဲ"ဟု ပရဟိတအသင်းဝင်တစ်ဦးက ဆိုသည်။

မီးလောင်မှုဖြစ်ရာနေရာသို့ မီးသတ်တပ်ဖွဲ့မှ တာဝန်ရှိသူများ၊ ရွှေရောင်တွဲလက်ပရဟိတအသင်းနှင့် အခြားလူမှုကူညီရေးအသင်းဝင်များ သွားရောက်မီးငြိမ်းသတ်ခဲ့ကြောင်း သိရသည်။

အဆိုပါမီးလောင်ပေါက်ကွဲမှုဖြစ်စဉ်ကြောင့် Taxi ယာဉ်မောင်းမှာ အခင်းဖြစ်ရာနေရာ၌ပင်သေဆုံးခဲ့ပြီး ယာဉ်ပေါ်ပါအခြားအမျိုးသားတစ်ဦးမှာလည်း စိုးရိမ်ရသည့်အခြေအနေရှိပြီး စံပြဆေးရုံသိုပိုဆောင်ခဲ့ကြောင်း သိရသည်။

#ymg/mt #Local_News #Taxi #အရှိန်မထိန်းနိုင်ဘဲ #ခြံစည်းရိုးကိုဝင်တိုက် #ယာဉ်မောင်သေဆုံး #YMG #Yangon-Media-Group

#Local_News
Published _1 March 2023

ပုဇွန်တောင် CB ဘဏ်ကိုဝင်၍ သေနတ်အတုနှင့်ဓားပြကာဝင်လာသည့် ဆယ်ကျော်သက် ကလေးနှစ်ဦးအား ဖမ်းမိထားကြောင်း သက်ဆိုင်ရာကသိရသည်။

ယနေ့ မတ်လ ၁ ရက် နံနက် ၁၀ နာရီခွဲခန့်က ဖြစ်ပွားခဲ့သော ယင်းဖြစ်စ‌ဉ်တွင် ငွေကြေးများ ဆုံးရှုံးမှုမရှိခဲ့ကြောင်းလည်းသိရသည်။

ပုဇွန်တောင် မြို့နယ် အမှတ် ၇ ရပ်ကွက် ၊ အိမ်အမှတ် (၁၅) ဦးဝဇ္ဇာလမ်းနေ အသက် ၁၅ နှစ် အရွယ်သုထူးအောင်နှင့် အမှတ် (၈)ရပ်ကွက်
အိမ်အမှတ်(၃၉) ဇီဇဝါလမ်း‌နေ အသက် ၁၄ နှစ်အရွယ်သန့်စင်အောင် တို့ဖြစ်ကြောင်း သိရသည်။

“ဘဏ်ထဲကို လူငယ်နှစ်ယောက်က ဝင်လာပြီးတော့ ဘယ်သူမှ မလှုပ်နဲ့ လို့ပြောပြီး ပစ္စတိုသေနတ်နဲ့ ဓားမြှောင်ကို ထုတ်ပြခြိမ်းခြောက်တယ်။ သေနတ်ကအတု ဓားကနှစ်လက် အားလုံးကဝိုင်းဖမ်းတာမိသွားရော"ဟု သက်ဆိုင်ရာတာဝန်ရှိသူက ပြောသည်။

#ymg/mt
#Yangon _Media_Group

#Local_News
Published_ 1 March 2023

ဇွဲကပင်တောင်ပေါ်သို့ ဘုရားဖူးရန်တက်ရောက်စဉ် အမျိုးသားတစ်ဦး အမောဖောက် သေဆုံးမှု ဖေဖော်ဝါရီလ ၂၇ ရက်က ဖြစ်ပွားခဲ့ကြောင်း ဘားအံမြို့ မြန်မာနိုင်ငံလူမှုကယ်ဆယ်ရေးအဖွဲ့က သိရသည်။

"အဲဒီလူက အသက် ၅၆ နှစ် လောက် ရှိပါတယ်။နှလုံးရောဂါလည်း ရှိတယ်လို့ သိရတယ်။ မနက် ၁၁ နာရီ လောက်က လုမ္မနီဥယျာဉ်ဘက်ခြမ်း က ဇွဲကပင်တောင်တက်လမ်း ကနေ တက်တာ။ တောင်ကို တက်ရင်းနဲ့ အထက်ရေတံခွန်အကျော် ကရင်မောင်နှမ နတ်နန်းနားမှာ ဖြစ်သွားတာ"ဟု ဘားအံမြို့ မြန်မာနိုင်ငံလူမှုကယ်ဆယ်ရေးအဖွဲ့ တာဝန်ရှိသူက ဆိုသည်။

အဆိုပါ အခင်း ဖြစ်ပွားရာနေရာသို့ ဘားအံမြို့နယ် ဖြစ်စဉ်နေရာသို့ မြန်မာနိုင်ငံမီးသတ်တပ်ဖွဲ့ ၊ မြန်မာနိုင်ငံလူမှုကယ်ဆယ်ရေးအဖွဲ့ နှင့် အခြား လူမှုကယ်ဆယ်ရေးအဖွဲ့များမှ အဖွဲ့ဝင် စုစုပေါင်း အင်အား ၄၀ ကျော် က သွားရောက်၍ ကယ်ဆယ်ရေးလုပ်ငန်းများ သွားရောက် လုပ်ကိုင်ခဲ့ကြကြောင်းလည်း သိရသည်။

အဆိုပါ သေဆုံးသူကို ကယ်ဆယ်ရေးအဖွဲ့များမှ ဇွဲကပင်တောင်ခြေသို့ သယ်ဆောင်ခဲ့ပြီး ယင်း၏နေရပ်မြိုင်ကလေးသို့ ကူညီပို့ဆောင်ပေးခဲ့ကြောင်း သိရသည်။

ဇွဲကပင်တောင်သည် ကရင်ပြည်နယ် ဘားအံမြို့၏ တောင်ဘက် ၇ မိုင်ခန့်အကွာ ခလောက်နို့ကျေးရွာအနီးတွင်တည်ရှိကာ ရင်ပြည်နယ်၏ အမှတ်အသားတစ်ခုဖြစ်ပြီး ပင်လယ်ရေမျက်နှာပြင်အထက် ၂၃၇၂ ပေ အမြင့်တွင် တည်ရှိသည်။

#ymg/mt #Local_News #ဇွဲကပင်တောင် #ဘုရားဖူးရန်တက်ရောက်စဉ် #အမျိုးသားတစ်ဦး #အမောဖောက်သေဆုံး
#Yangon_Media_Group

#Local_News
Published_ 1 March 2023

ရန်ကုန်တိုင်းဒေသကြီး၊ မင်္ဂလာဒုံမြို့နယ်၊ ရန်ကုန်အပြည်ပြည်ဆိုင်ရာလေဆိပ်သို့ ဖောက်ခွဲမှု ပြုလုပ်ရန် လာသူနှစ်ဦးကို ဖေဖော်ဝါရီလ ၂၇ ရက် ညနေ ၆ နာရီကျော်အချိန်က ဖမ်းမိခဲ့ကြောင်း မြန်မာနိုင်ငံ ရဲတပ်ဖွဲ့က သိရသည်။

လေဆိပ်အဝင်လမ်း၊ ဆယ်မိုင်ကုန်း သံပန်းစစ်ဆေးရေးဂိတ်တွင် Hijet ကားဖြင့်လိုက်ပါလာသည့် အမျိုးသား ၂ ဦးကို လုံခြုံရေးတပ်ဖွဲက မသင်္ကာသဖြင့် စစ်ဆေးရန် ယာဉ်ပေါ်မှဆင်းခိုင်းရာ အဆိုပါအမျိုးသား ၂ ဦးက အပြာရောင်ကျောပိုးအိတ်ကိုပစ်ချပြီး ကားပေါ်မှခုန်ဆင်းထွက်ပြေးသည့်အတွက် လုံခြုံရေးတပ်ဖွဲ့ကလိုက်လံဖမ်းဆီးစဉ် အထင်ပါအတိုင်း ဖမ်းမိခဲ့ခြင်း ဖြစ်ကြောင်း သိရသည်။

ပစ်ချခဲ့သောအိတ်ကို စစ်ဆေးရာ PVC ပိုက်ဖြင့် ပြုလုပ်ထားသော လက်လုပ်မိုင်းတစ်လုံး၊ သံပိုက်ဖြင့်ပြုလုပ်ထားသော လက်လုပ်မိုင်းသုံးလုံးနှင့် ကော်ဘူးဖြင့်ပြုလုပ်ထားသော လက်လုပ်မိုင်းတစ်လုံး စုစုပေါင်းငါးလုံးကို သိမ်းဆည်းရမိခဲ့ကြောင်း မြန်မာနိုင်ငံ ရဲတပ်ဖွဲ့က သိရသည်။

#ymg/mt #Local_News #Yangon_air_port #ရန်ကုန် #အပြည်ပြည်ဆိုင်ရာလေဆိပ် #မင်္ဂလာဒုံမြို့နယ် #ဖောက်ခွဲမှု #YMG #Yangon_Media_Group