22 March 2024
မြန်မာနိုင်ငံမှာ သဘာဝဘေးအန္တရာယ်အနေဖြင့် မုန်တိုင်းဘေးအန္တရာယ်ကို ဧပြီလကုန်နှင့်မေလဆန်းတို့တွင် ကြုံတွေ့ရလေ့ရှိတဲ့အတွက် ပြည်သူ လူထု ကျန်းမာရေးအတွက် လိုအပ်သည်များကိုကြိုတင်စုဆောင်းပြင်ဆင်ထားရန်လိုအပ်ကြောင်း သိရသည်။
ယင်းကဲ့သို့ကြိုတင်ပြင်ဆင်ထားရန်လိုအပ်ကြောင်း ကို ကျန်းမာရေးဝန်ကြီးဌာန၊ဒုတိယဝန်ကြီးက ကျန်းမာရေးစောင့်ရှောက်မှုဆိုင်ရာစီမံခန့်ခွဲမှု လုပ်ငန်းကော်မတီ အစည်းအဝေးမှာ အခုလိုထည့်သွင်းပြောကြားပြီးမှာကြားခဲ့သည်။
ဒုတိယဝန်ကြီးက "'လွန်ခဲ့သောနှစ်များအတွင်း မုန်တိုင်းဖြစ်ပေါ်ခဲ့မှုများကို ပြန်လည်သုံးသပ်ရာတွင် မုန်တိုင်း ဘေးအန္တရာယ်ကို ဧပြီလကုန်နှင့် မေလဆန်းတို့တွင်လည်းကောင်း၊ အောက်တိုဘာလနှင့် နိုဝင်ဘာလများတွင်လည်းကောင်း ကြုံတွေ့ရလေ့ရှိကြောင်း၊
ထိုသို့ဆောင်ရွက်နိုင်ခဲ့မှုများကြောင့် မုန်တိုင်းဘေးအန္တရာယ်၏ နောက်ဆက်တွဲ ကူးစက်ရောဂါများ ကြီးမားသည့်ကပ်အသွင်ဖြစ်ပွားမှုများ မရှိခဲ့ပါကြောင်း၊
ယမန်နှစ်က ဖြစ်ပွားခဲ့သော မိုခါမုန်တိုင်း ဘေးအန္တရာယ်ဖြစ်စဉ်တွင် ကျန်းမာရေးကဏ္ဍအနေဖြင့် မိုးလေဝသနှင့်ဇလဗေဒညွှန်ကြားမှုဦးစီးဌာနမှ ထုတ်ပြန်သည့် သတိပေးချက်များအား စဉ်ဆက် မပြတ်စောင့်ကြပ်ကြည့်ရှုကာ ကျန်းမာရေးစောင့်ရှောက်မှုဆိုင်ရာစီမံခန့်ခွဲမှုလုပ်ငန်း ကော်မတီ အတွင်းတွင်လည်းကောင်း၊ အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီ၏ လုပ်ငန်းကော်မတီများအချင်းချင်းလည်းကောင်း ချိတ်ဆက်ညှိနှိုင်းမှုများနှင့် ပူးပေါင်း ဆောင်ရွက်မှုများ လုပ်ဆောင်ခဲ့ပါကြောင်း၊
သဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီအနေဖြင့် သဘာဝဘေးအန္တရာယ်ဆိုင်ရာ စီမံခန့်ခွဲမှုဗဟိုဌာန (Disaster Management Centre - DMC) ကို ဖွင့်လှစ်ခဲ့ပြီး ကျန်းမာရေး ဝန်ကြီးဌာနအနေဖြင့်လည်း (၇-၅-၂၀၂၃) ရက်နေ့မှစတင်၍ ကျန်းမာရေးဝန်ကြီးဌာန၊ ဝန်ကြီးရုံး၌ Public Health Emergency Operations Center ကို ဖွင့်လှစ်ဆောင်ရွက်ခဲ့ကြောင်း၊
မုန်တိုင်းမကျရောက်မီအချိန်မှာ အရေးပေါ်ကျန်းမာရေးအဖွဲ့များ ကြိုတင်စုဖွဲ့ခြင်း၊ ဆေးဝါးနှင့် ပစ္စည်းကိရိယာများ မပျက်စီးစေရေးဆောင်ရွက်ခြင်း၊ လိုအပ်မည့် ဆေးဝါးနှင့် ပစ္စည်းကိရိယာများ ကြိုတင်ပေးပို့ခြင်း၊ ကျန်းမာရေးဌာနအဆောက်အဦများ ထိခိုက်ပျက်စီးမှု နည်းပါးစေရေး ဆောင်ရွက်ခြင်း၊ ကျန်းမာရေးဝန်ထမ်းများအတွက် သောက်သုံးရေသန့်များနှင့် စားနပ်ရိက္ခာများ ကြိုတင်စုဆောင်းခြင်း၊ ဆေးရုံများနှင့်ကျန်းမာရေးဌာနများတွင် အသုံးပြုရန် စက်သုံးဆီများ ကြိုတင်စုဆောင်းခြင်းစသည်တို့ကို လုပ်ဆောင်ခဲ့ကြောင်း၊
မုန်တိုင်းကျရောက်ပြီးချိန်တွင် ကျန်းမာရေးစောင့်ရှောက်မှုလုပ်ငန်းများ ပြတ်တောက်သွားခြင်း မရှိစေရန်အတွက် အရေးပေါ်ကျန်းမာရေးစောင့်ရှောက်မှု လုပ်ငန်းများဆောင်ရွက်ခြင်း၊ ဆေးရုံများတွင် ခွဲစိတ်ကုသမှုများအပါအဝင် ပုံမှန်ကျန်းမာရေး စောင့်ရှောက်မှုလုပ်ငန်းများကို အမြန်ဆုံးပြန်လည် စတင်ဆောင်ရွက်ခြင်း၊ ဘေးအန္တရာယ်၏ နောက်ဆက်တွဲအနေဖြင့် ကူးစက် ရောဂါများ ကပ်အသွင်ဖြစ်ပွားမှုများ မရှိစေရေးစောင့်ကြပ်ကြည့်ရှုခြင်း၊ ရောဂါကာကွယ်ရေး လုပ်ငန်းများ အရှိန်အဟုန်ဖြင့်ဆောင်ရွက်ခြင်း၊ ကူးစက်ရောဂါ ဖြစ်ပွားမှုများကို အချိန်နှင့် တစ်ပြေးညီ တုံ့ပြန်ဆောင်ရွက်ခြင်းစသည့် လုပ်ငန်းများအား ဌာနဆိုင်ရာများ၊ မိတ်ဖက် အဖွဲ့ အစည်းများနှင့် ပူးပေါင်းဆောင်ရွက်ခဲ့ကြောင်း၊
ဘေးအန္တရာယ်ဖြစ်စဉ်များအတွက် ကြိုတင်ပြင်ဆင်မှုနှင့် တုံ့ပြန်ဆောင်ရွက်မှုအစီအစဉ်များ အားကောင်းစွာဆောင်ရွက်နိုင်ခြင်းဖြင့် ပြည်သူများ၏ အသက်အန္တရာယ်နှင့် ကျန်းမာရေး ထိခိုက်မှုများအား ကာကွယ်နိုင်မည် ဖြစ်ကြောင်း ပြောခဲ့သည်။
ထို့အပြင်တိုင်းဒေသကြီး/ ပြည်နယ်အချို့တွင် ဖြစ်ပွားခဲ့သည် ရေကြီးမှုဖြစ်စဉ်များအားလည်း ကြိုတင်ပြင်ဆင်မှုနှင့် တုံ့ပြန်ဆောင်ရွက်မှု အစီအစဉ်များကို ပူးပေါင်းဆောင်ရွက်မှု အားကောင်းစွာဖြင့် ဆောင်ရွက်နိုင်ခဲ့ကာ ဘေးအန္တရာယ်၏ နောက်ဆက်တွဲ ကျန်းမာရေး ပြဿနာများဖြစ်ပွားမှုကို ကာကွယ်နိုင်ခဲ့ကြောင်း ယခုနှစ်တွင်လည်း သဘာဝဘေးအန္တရာယ်များကို ယင်းကဲ့သို့ ကာကွယ်ဆောင်ရွက်ရန်မှာကြားခဲ့ကြောင်း သိရသည်။
Yangon Times/tthl
#Local_News
#Published_ 22 March 2024
#YMG_News #Yangon_Times #Yangon_Media_Group
Published 22 March 2024
မန္တလေးတိုင်းဒေသကြီး၊ အမရပူရမြို့နယ်၊ ဆောက်တောဝကျေးရွာအပိုင်၊ မန်ကျည်းချိုကွေ့၊ မြစ်ငယ်- ထုံးဘိုဖြတ်လမ်းတွင် ၁၂ ဘီးတွဲကား အဖြူရောင်ယာဉ်သည် အရှိန်မထိန်းနိုင်ဘဲ လမ်းညာဘက်ဘေးရှိ ရေမြောင်းအတွင်းသို့ ထိုးကျမှုဖြစ်ပွားကြောင်း မီးသတ်တပ်ဖွဲ့နှင့်လူမှုကူညီရေးအသင်းများထံကသိရသည်။
မတ်လ ၂၁ရက် ည ၈နာရီ ၇မိနစ်ခန့်က ဖြစ်ပွားခဲ့ ကာ ယာဉ် တိုက်မှုကြောင့် ယာဉ်အတွင်း လူညှပ်နေသဖြင့်အမရပူရမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များဖြင့် ရှာဖွေကယ်ဆယ်ရေးလုပ်ငန်းများ ဆောင်ရွက်ခဲ့ရကြောင်း သိရသည်။
အဆိုပါ ယာဉ် တိမ်းမှောက် မှု ကြောင့် ယာဉ်မောင်းဖြစ်သူ အမျိုးသားတစ်ဦးေ-သဆုံးခဲ့ကာ
ဖြစ်စဥ်တွင် ဒဏ်ရာရရှိသူ ယာဥ်နောက်လိုက်အား လောကပါလလူမှုကူညီရေးအသင်း လူနာတင်ယာဥ်ဖြင့် လည်းကောင်း၊ သေဆုံးသူ ယာဥ်မောင်း၏ ရုပ်အလောင်းအား ထာဝရတွဲလက်များလူမှုကယ်ဆယ်ရေးအသင်း လူနာတင်ယာဥ်ဖြင့်လည်းကောင်း မန္တလေးပြည်သူ့ဆေးရုံကြီးသို့ ပို့ဆောင်ပေးခဲ့ကြောင်းသိရသည်။
Yangon_Times/LW
#Local_News
#Published_ 22 March 2024
#YMG_News #Yangon_Times #Yangon_Media_Group
#Daily_News
Published_ 21 March 2024
၁။ ဈေးပေါပေါနှင့် သင်္ကြန်ရက်ခရီးသွားရမည်ဆိုပြီး လိမ်နေသူများရှိ၍ သတိထားရန်လို၊ ကားကြိုငှား ထားသင့်ဟုဆို
၂။ မိုးစပါးကုန်ပြီး နွေဆန်များ ရန်ကုန်ဈေးကွက်သို့ စတင်ဝင်ရောက်
၃။ ငါးနှစ်အတွင်း အုန်းသီးဈေး အမြင့်ဆုံးသို့ ရောက်ရှိလာဟုဆို
၄။ တရုတ်နှင့်ဆက်ဆံရေး ဆက်လက်တိုးမြှင့် လုပ်ဆောင်သွားမည်ဟု ရုရှားသမ္မတရွေးကောက်ပွဲတွင် အပြတ်အသတ်အနိုင်ရခဲ့သည့် ပူတင်ပြော ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။
#Yangon_Times #Daily_News #YMG_News #Yangon_Media_Group
Published 21 March 2024
တာမွေမြို့နယ်၌ မွေးကင်းစကလေးစွန့်ပစ်မှု ယနေ့မတ်လ၂၁ရက်နေ့တွင် ဖြစ်ပွားပြီး ကလေးမှာ ချက်ပိုးဝင်နေကြောင်း မြန်မာမွတ်စလင်မ် ပရဟိတအဖွဲ့ မှသိရသည်။
ဖြစ်စဉ်မှာ တာမွေမြို့နယ် ကျားကွက်သစ်ရပ်ကွက် ကျိုက္ကဆံလမ်းပေါ် ညအိပ်ရပ်ထားသော Hijetအမျိုးအစား မော်တော်ပေါ်မွေးကင်စကလေး(မ) ၁ဦးအား စွန့်ပစ်ခဲ့ပါသဖြင့် သက်ဆိုင်ရာဌာနများ အကြောင်းကြား၍ ကလေးငယ်မှ ာချက်ကြိုးကပ်ဖြတ်ထားသောကြောင့် သွေးထွက်နေသဖြင့် သျှင်ပါရဂူဆေးရုံသို့ ဝင်ရောက်ပြသပေးပြီး(အရှေ့ပိုင်ခရိုင်လူ/ကယ်ပြန်ဌာန)မှ တာဝန်ရှိသူများခေါ်ဆောင်၍ ရန်ကုန်ကလေးဆေးရုံ အရေးပေါ်ဌာန(ဟယ်ပင်)သို့ ကူညီပို့ဆောင်ပေးခဲ့ကြောင်း၊ ကလေးမှာ ချက်မှပိုးဝင်နေသည်ဟု သိရသည်။
Yangon Times/NN
#Local_News
#Published_ 21 March 2024
#YMG_News #Yangon_Times #Yangon_Media_Group
Published_ 21 March 2024
ရန်ကုန်တိုင်းအတွင်းရှိ လှိုင်သာယာ၊ရွှေပြည်သာ၊ဗဟန်းအပါအဝင် မြို့နယ်အချို့တွင် ယနေ့ မတ်လ (၂၁)ရက် နေ့လယ်ပိုင်း၌ အချိန်အခါ မဟုတ်မိုးဖွဲဖွဲနှင့် မိုးထစ်ချုန်းရွာသွန်းကြောင်း သိရသည်။
ယင်းကဲ့သို့ ဒေသအချို့တွင် အချိန်အခါမဟုတ် မိုးထစ်ချုန်းရွာခြင်း၊မိုးသက်လေပြင်းတိုက်ခတ်ခြင်း၊ မိုးကြိုးပစ်ခြင်း၊မိုးသီးကြွေခြင်းများဖြစ်နိုင်ကြောင်းကိုလည်း မိုးလေဝသနှင့်ဇလဗေဒညွှန်ကြားမှုဦးစီးဌာနမှသတိပေးထားသည်။
အချိန်အခါမဟုတ်မိုးရွာရသည့်အကြောင်းကတော့ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့မှ ရွေ့လျားလာသော တိမ်တိုက်တွေကြောင့်လည်း ကောင်း၊ အရှေ့ဘက်မှ ရွေ့လျားလာသည့် လေပွေလှိုင်းများ၏အရှိန်ကြောင့်လည်းကောင်း၊ အပူပျံတက်တိမ်များဖြစ်ထွန်းမှု အားကောင်းခြင်းကြောင့် လည်းကောင်း၊ အနောက်ဘက်မှ ရွေ့လျားလာတဲ့ လေပွေလှိုင်းများ၏ အရှိန်ကြောင့် လည်းကောင်း ဒေသတော်တော်များများမှာ မိုးထစ်ချုန်းရွာသွန်းမည်ဖြစ်သည်ဟုဆိုသည်။
မတ်လ(၂၁)ရက်ညနေပိုင်းအချိန်ထိခန့်မှန်းချက် အနေဖြင့် စစ်ကိုင်းတိုင်းအထက်ပိုင်း၊ ကချင် ပြည်နယ်၊ ချင်းပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာကျဲကျဲနှင့် ကျန်တိုင်းဒေသကြီးနှင့် ပြည်နယ်တို့တွင် နေရာကွက်ကျား မိုးထစ်ချုန်းရွာမည်။
နောက်(၂)ရက် မတ်လ(၂၂)ရက်(၂၃)ရက်အတွက်ခန့်မှန်းချက်အနေဖြင့် တနင်္သာရီတိုင်းဒေသကြီး၊ ကချင်ပြည်နယ်နှင့် ရှမ်းပြည်နယ်တို့တွင် နေရာ စိပ်စိပ်နှင့် နေပြည်တော်၊ စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ပဲခူးတိုင်း ဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ ချင်းပြည်နယ်၊ ရခိုင်ပြည်နယ်၊ ကယားပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာကွက်ကျားမှ နေရာကျဲကျဲ မိုးထစ်ချုန်းရွာနိုင်ကြောင်း သိရသည်။
Yangon Times/tthl
#Local_News
#Published_ 21 March 2024
#YMG_News #Yangon_Times #Yangon_Media_Group
Published_ 21 March 2024
နိုင်ငံတကာပူးပေါင်းဆောင်ရွက်မှုနှင့် နိုင်ငံတကာစစ်ဘက်ပူးပေါင်းဆောင်ရွက်မှုများအတွက် ဂုဏ်ထူးဆောင်တံဆိပ်(၄)မျိုးပေးအပ်နိုင်ရန်ဥပဒေတွင်ဖြည့်စွက်ပြဌာန်းလိုက်ကြောင်းသိရသည်။
၂၀၀၉ ခုနှစ်၊ ဂုဏ်ထူးဆောင်ဘွဲ့များ၊ ဂုဏ်ထူး ဆောင် တံဆိပ်များဆိုင်ရာ ပြဋ္ဌာန်းချက်တွင် ပြင်ဆင်ဖြည့်စွက်ပြဋ္ဌာန်းလိုက်သည်ဟု နစကမှ အမိန့်ကြော်ငြာစာ ထုတ်ပြန်ထားသည်။
နိုင်ငံတော်ဖွံ့ဖြိုးတိုးတက်ရေးအတွက်ပြည်ပနိုင်ငံ များနှင့် ကဏ္ဍအသီးသီးပူးပေါင်းဆောင်ရွက်ရာ၌စွမ်းစွမ်းတမံ ဆောင်ရွက်ခဲ့ကြသည့် ပုဂ္ဂိုလ်များကိုဂုဏ်ပြုချီးမြှင့်နိုင်ရန်အတွက် ဥပဒေကို ဖြည့်စွက်ခြင်းများဆောင်ရွက်ခြင်းဖြစ်သည်ဟုဆိုသည်။
ဖြည့်စွက်ပြဋ္ဌာန်းလိုက်သည့် ဂုဏ်ထူးဆောင်တံဆိပ်လေးမျိုးမှာ နိုင်ငံတကာပူးပေါင်းဆောင်ရွက်မှု တံဆိပ်များ အဖြစ် သီရိဇေယျကျော်တံဆိပ်၊ သီရိသိင်္ခကျော်တံဆိပ်၊ နိုင်ငံတကာစစ်ဘက်ပူးပေါင်းဆောင်ရွက်မှု တံဆိပ်များ အဖြစ် သီရိသီဟကျော်တံဆိပ်၊ သီရိသူရကျော်တံဆိပ််များဖြစ်သည်ဟု ထုတ်ပြန်ချက်၌ ဖော်ပြထားသည်။
စွမ်းဆောင်မှုဆိုင်ရာဂုဏ်ထူးဆောင်တံဆိပ်တွေ ချီးမြှင့်အပ်နှံနိုင်ရေးအတွက် ချီးမြှင့်ခံထိုက်သည့် ပုဂ္ဂိုလ်များ၏ အရည်အချင်းသတ်မှတ်ချက်၊ သက်ဆိုင်ရာတံဆိပ်အသီးသီး၏ပုံသဏ္ဌာန်၊ အရွယ်အစား၊ အတိုင်းအထွာ၊ ဖဲကြိုး အရောင်အသွေး၊ တံဆိပ်ပါအမှတ်အသားများ၏ အဓိပ္ပာယ်ဖော်ဆောင်ချက်၊ အဆင့်ဆင့်ထောက်ခံတင်ပြရန် နည်းလမ်း၊ ဂုဏ်ပြုစာလွှာ စသည်များကို ဖြည့်စွက်ပြဋ္ဌာန်းလိုက်ကြောင်း ထုတ်ပြန်ချက်၌ဖော်ပြပါရှိသည်။
Yangon Times/tthl
#Local_News
#Published_ 21 March 2024
#YMG_News #Yangon_Times #Yangon_Media_Group
Published_ 21 March 2024
အလင်္ကာကျော်စွာ၊ အနုပညာထူးချွန် ပထမဆင့်ရ ဆိုင်းပညာရှင်ကြီး ရွာစား ဘဘဦးစိန်မြအောင် သည် မတ်လ(၂၁)ရက်၌ ကွယ်လွန်သွားကြောင်း မြန်မာနိုင်ငံသဘင်အစည်းအရုံး (ဗဟို)မှသိရသည်။
"နှမျောလိုက်တာ အဖေကြီးရယ် မြန်မာ့ဇာတ်သဘင်ရဲ့ အားအထားရဆုံး မြန်မာ့ဂီတမဏ္ဍိုင်ကြီး ကောင်းရာဘုံဋ္ဌာနသို့ရောက်ပါစေ"ဟု ဇာတ်သဘင် ပညာရှင် ကျားလေးစိန်ကဖော်ပြထားသည်။
ရွာစား ဘဘဦးစိန်မြအောင်သည်မြန်မာနိုင်ငံသဘင်အစည်းအရုံး(ဗဟို)၏ဒုဥက္ကဌ (၂)လည်းဖြစ်သည်။
တာဝန်ထမ်းဆောင်ချိန်တလျှောက် သဘင့်တာဝန်များကို အလွန်ကျေပွန်စွာဖြင့်သဘင့် သားသမီး မြေးမြစ်များအပေါ်အစစ စောင့်ရှောက်ခဲ့ပါသောဒုဥက္ကဌကြီး ကွယ်လွန်ခြင်းမှာသဘင်လောကအတွက်အစားထိုးမရသော ဆုံးရှုံးမှုအဖြစ် နှမြောတသ ဝမ်းနည်း ကြေကွဲရကြောင်း မြန်မာနိုင်ငံသဘင်အစည်းအရုံး (ဗဟို)မှ ထုတ်ပြန်ထား ကြောင်းသိရသည်။
Yangon Times/tthl
#Local_News
#Published_ 21 March 2024
#YMG_News #Yangon_Times #Yangon_Media_Group
Page 502 of 1977
