#LocalNews
Published-15 Mar 2022

လူမှုကွန်ရက်ပေါ်တွင် ပြန့်နှံခဲ့တဲ့မိုင်းကိုင်မြို့နယ် တအာင်းပါတီ (TNP) ဥက္ကဌ မိုင်းနုမ်ဟန်အား သျှမ်းပြည်ပြန်လည်ထူထောင်ရေးကောင်စီ / သျှမ်းပြည်တပ်မတော် RCSS/SSA မှ ဖမ်းဆီးသတ်ဖြတ်သည် ဆိုသည့်သတင်းမှာ အရင်းအမြစ်မရှိသည့် ကောလဟလ သတင်းများသာဖြစ်ပြီး RCSS/SSAက ထုတ်ပြန်လိုက်ပါတယ်။

ထုတ်ပြန်ရာတွင်အဆိုပါကိစ္စနှင့်ပတ်သတ်၍ နမ့်ဆန်မြို့ရှိ တအောင်း(ပလောင်)အမျိုးသားပါတီ ဥက္ကဌ ဦးခွန်ရီသည် ၂၀၂၂ ခုနှစ် ဇန်နဝါရီလ (၂၄) ရက်နေ့ ရက်စွဲဖြင့် သျှမ်းပြည်ပြန်လည်ထူထောင်ရေးကောင်စီထံသို့ စာရေးပြီး အကူအညီတောင်းခံလာသဖြင့်RCSS ဗဟိုဌာနချုပ်သည် မိုင်းနုမ်ဟန်မိသားစု ဖမ်းဆီးခြင်းကိစ္စကို စီစစ်ပြီး တွေ့ရှိချက်အရ လူမှုကွန်ယက်ပေါ် ကောလာဟလ သတင်းများနှင့် ဥက္ကဌ ဦးခွန်ရီ၏ စာတွင် ဖေါ်ပြထားသည့်အတိုင်း မဟုတ်ပါကြောင်း ၂၀၂၂ ခုနှစ် ဇန်နဝါရီလ ၂၉ ရက်နေ့တွင် RCSS ၏ အတွင်းရေးမှုး(၁) ဗိုလ်မှူးကြီး စိုင်းငင်းမှ စာရေးပြီး အကြောင်းပြန်ကြားရှင်းလင်းပြခဲ့ပြီးဖြစ်တယ်လို့ ဆိုပါတယ်။

မိုင်းကိုင်မြို့နယ် တအာင်းပါတီ (TNP) ဥက္ကဌ မိုင်းနုမ်ဟန်နှင့် မိသားစုအား ဖမ်းဆီးသတ်ဖြတ်ခြင်းနှင့် ပတ်သက်၍ ရွှေဖီမြေသတင်းဌာနမှ လူမှုကွန်ရက်ပေါ် တင်ပြသည့် သတင်းများသည် အရင်းအမြစ်မရှိပဲ RCSS/SSAတပ်ဖွဲ့အပေါ် တမင်တကာ စွပ်စွဲခြင်းသာဖြစ်ပြီးရွှေဖီမြေသတင်းဌာနတွင် ဖေါ်ပြထားသည့် တအောင်းနိုင်ငံရေးအတိုင်ပင်ခံကော်မတီ၏ ဝမ်းနည်းကြောင်း သဝဏ်လွှာတွင် မိုင်းနုမ်ဟန်၊ သူ၏ဇနီးနှင့် (၇) လအရွယ်သမီးအပါ မိသားစုလုံးတွင် ၂၀၂၂ ခုနှစ် ဇန်နဝါရီလ ၁၀ ရက်နေ့တွင် မိုင်းကိုင်မြို့နယ် တုံလောကျေးရွာအုပ်စု မန်လော့ကျေးရွာအနီးတဝိုက်တွင် ပျောက်ဆုံးခဲ့ခြင်းဖြစ်သည်ဟု ရေးသားဖော်ပြထားသော်လည်း မန်လော့ဆိုသည့်ကျေးရွာသည် တုံလောကျေးရွာအုပ်စုတွင်း တည်ရှိခြင်းမရှိကြောင်းထုတ်ပြန်ချက်တွင်ရေးသားဖော်ပြထားပါတယ်။

ထို့အပြင်RCSS/SSA တပ်ဖွဲ့သည် တိုင်းရင်းသားစည်းလုံးညီညွတ်ရေးပေါ်လစီကို အမှတ်စဥ်(၁) အဖြစ် ချမှတ်ထားခြင်းဖြစ်ပြီး အကောင်အထည်ဖော်ဆောင်ရာတွင်လည်း သျှမ်းပြည်တိုင်းရင်းသား စည်းလုံးညီညွတ်ရေးကို ထိခိုက်စေမည့် ဆောင်ရွက်ချက်မျိုး လုံးဝမပြုလုပ်ရန် တင်းကျပ်စွာ တားမြစ်ထားသည့် တပ်ဖွဲ့ဖြစ်ကြောင်းဖော်ပြပါရှိပါတယ်။

ymg/hm
#Yangon_Media_Group

#LocalNews
Published - 15 March 2022
ယခုနှစ် ၂၀၂၂ ခုနှစ်အတွင်း ယူနန် ချင်းရွှေဟော်နယ်စပ်အဝင်အထွက်စစ်ဆေးရေးဂိတ်သို့ မြန်မာဘက်မှ ကြံသယ်ယူပို့ဆောင်ရေးယာဉ် ၃၈၃၁ စီး ဝင်ရောက်ခဲ့ပြီး ကြံတန်ချိန် ၃၇၄၀၀ အဆင်ပြေစွာ တင်ပို့နိုင်ခဲ့ တယ်လို့ သိရပါတယ်။

ကိုဗစ်-၁၉ ကပ်ရောဂါ၏အကျိုးသက်ရောက်မှု ခံနေရချိန်တွင် ကြံတင်သွင်းတင်ပို့မှုကိစ္စကို ဖြေရှင်းရန်အတွက် တရုတ်နိုင်ငံ၊ ယူနန်ပြည်နယ် လင်ချန်းရှိ ချင်းရွှေဟော်နယ်စပ်အဝင်အထွက်စစ်ဆေးရေးဂိတ်သည် ညှိနှိုင်းဆွေးနွေးမှု တွေကို ပြုလုပ်ပြီးနောက်
လူနှင့် ကုန်စည် ခွဲထုတ်ခြင်း၊ အပိုင်းလိုက် သယ်ယူပို့ဆောင်ခြင်း၊ လမ်းပိတ်၍ စီမံခန့်ခွဲခြင်း စသည့်လုပ်ငန်းအစီအစဉ်များကို အတည်ပြုခဲ့ပြီး နယ်စပ်ဂိတ်၌ ကြံသယ်ယူပို့ဆောင်ရေးယာဉ်များအတွက် “အစိမ်းရောင်လမ်းကြောင်း”ကို ဖွင့်လှစ် ပေးခဲ့တာဖြစ်တယ်လို့မြန်မာနိုင်ငံဆိုင်ရာ တရုတ်သံရုံးက ဆိုပါတယ်။

ထိုအပြင် မြန်မာနိုင်ငံမှ ကြံများ အဆင်ပြေချောမွေ့ စွာ၊ မြန်ဆန်စွာ ဂိတ်ဖြတ်သန်းဝင်ရောက်နိုင်ရေးအတွက် ဝန်ဆောင်မှုပေးခဲ့တယ်လို့လည်း ၎င်းတို့က ပြောပါတယ်။

တရုတ်-မြန်မာနယ်စပ်ကုန်သွယ်ရေး အရ နှစ်စဉ် နိုဝင်ဘာလမှ ဧပြီလအထိသည် မြန်မာနိုင်ငံ၏ ကြံရိတ်သိမ်းရာသီလည်း ဖြစ်ပါတယ်။

ဒါ့အပြင် တစ်ပတ်ကျော်ကြာ ပိတ်ထားသော “ကျင်စန်းကျော့” နယ်စပ်ဂိတ်ကို ယခု မတ်လ ၁၂ ရက်နေ့ မြန်မာစံတော်ချိန် မွန်းလွဲပိုင်းတွင် ပြန်လည်ဖွင့်လှစ်ခဲ့တယ်လို့ မြန်မာနိုင်ငံဆိုင်ရာ တရုတ်သံရုံး၏ သတင်းထုတ်ပြန်ချက်မှာ ဖော်ပြခဲ့ပါတယ်။

ဓါတ်ပုံ - မြန်မာနိုင်ငံဆိုင်ရာ တရုတ်သံရုံး။

ymg/kg
#Yangon_Media_Group

#LocalNews
Published_15 March 2022

ကိုလိုနီခေတ်က မျိုးချစ်၊ဒီးဒုတ်ဂျာနယ် တို့တွင် သတင်းထောက် လုပ်ခဲ့သူလည်းဖြစ်၊ရုပ်ရှင်မင်းသားလည်း ဖြစ်၊ အသုဘ အလောင်းပြင်သူလည်း ဖြစ်သော သရုပ်ဆောင် ဦးဝင်းမြင့် မတ်လ ၁၄ ရက်က သူ့နေအိမ်၌ ကွယ်လွန်ခဲ့ပြီး ယင်း၏ရုပ်အလောင်း ကို မတ်လ ၁၆ ရက် တွင် သဂြိုဟ်မည် ဖြစ်ကြောင်း သိရသည်။

"ရန်ကင်းသူ ရန်ကင်းသားတွေက သူ့ကို သိကြတယ်။ နာရေးဆို သိသိ မသိသိ သူရောက်လာတယ်၊သူ့ထမင်းသူစားပြီး လိုအပ်တာ ကူညီတယ်။ကျွန်တော်ကျောင်းသားဘဝက ရန်ကင်းက သူငယ်ချင်း အဖွားဆုံးတော့ သူရောက်လာတယ်၊ အိမ်သားတွေ ဘာလုပ်လို့ ဘာကိုင်ရမှန်းမသိခင် သူက ဦးဆောင်တယ်၊ ရပ်ကွက်ကလူတွေ သူခိုင်းစရာရှိတာခိုင်းခဲ့ပြီး ကားတစ်စင်းနဲ့ ပထမဆုံး ကြံတောသင်္ချိုင်းရှေ့က သူ့ဘော်ဒါ အခေါင်းနဲ့ နိဗ္ဗာန်ယာဉ် နေရာကို အရင်မောင်းခိုင်းတယ်၊ သူက မီးလွတ်စားတော့ ဟိုက ငှက်ပျောသီးတွေ ချကျွေးတယ်၊ စားဆိုပြီး သူက ယူစားပေမယ့် ကျွန်တော်တို့က မစားရဲ၊ နောက် ကြည့်မြင်တိုင် ကမ်းနားလမ်းက မြို့မခင် ယပ်တောင်ဆိုင်၊ နောက်တရုတ်တန်း နေကြာ ကွာစိ ဆေးလိပ် ဖဲထုပ်တောင်ပါသေး၊ နာရေးအိမ် ရန်ကင်းပြန်ရောက်တော့ မဏ္ဍာပ်ထိုး ခုံခင်းပြီး အဆင်သင့်၊ ထင်ရှားတဲ့ ရုပ်ရှင်မင်းသားကြီး ဦးဝင်းမြင့် အသက်၉၃နှစ်မှာ ကွယ်လွန်ရှာပီ"ဟု ရန်ကင်းမြို့နယ်အတွင်း နေထိုင်သူ တစ်ဦးက လူမှုကွန်ရက်တွင် ရေးသားထားသည်။

ရုပ်ရှင်မင်းသား ဦးဝင်းမြင့်သည် မှုန်ရွှေရည်၊ချစ်ကိုချစ်တယ်၊ဖြေနိုင်ပေါင်၊အားနွဲ့ သူပါရှင်၊မိုးတည ချစ်သူ စသည့် ရှေးခေတ် ဇတ်ကားကောင်းများတွင် ပီပြင်သော သရုပ်ဆောင်မှုကြောင့် လူသိများထင်ရှားခဲ့သူ ဖြစ်သည်။

မြန်မာ့ရုပ်ရှင်နှစ်၁၀၀ ပြည့်သည့်အချိန်တွင် မြန်မာ့ရုပ်ရှင်လောကကို စတင်ဖြစ်ပေါ်လာအောင်ကြိုးစားဆောင်ရွက်ခဲ့သူများအလွန်ရှားပါးခဲ့ရာ ယင်းအထဲမှ အသက်၉၃နှစ်ရှိနေပြီဖြစ်သည့် ရုပ်ရှင်သရုပ်ဆောင်၊သတင်းစာဆရာ၊ စာရေးဆရာ၊ တစ်ကိုယ်တော်ပရဟိတနာရေးကူညီရေးသမားကြီးမင်းသားကြီးဝင်းမြင့်(ဦး) အနေဖြင့် ရုပ်ရှင်လောက၌ ကျင်လည်ကျက်စားခဲ့ရသည့်အတွေ့အကြုံများနှင့် ရုပ်ရှင်နှစ်၁၀၀ပြည့်တွင် ရုပ်ရှင်လောကသားများအတွက်အသိပေးမှာကြားချက်များ၊ သတင်းသမားဘဝ၊ စာရေးဆရာဘဝတွင် တွေ့ကြုံခဲ့ရသည့် တန်ဖိုးမဖြတ်နိုင်သည့် စိတ်ဝင်စားမှတ်သားဖွယ်ရာအကြောင်းများနှင့် တစ်ကိုယ်တော်ပရဟိတနာရေးကူညီရေးသမားတစ်ဦးအဖြစ်နှစ်ပေါင်း၄၀ခန့် လုပ်ဆောင်ရာတွင် တွေ့ကြုံခဲ့ရသည့်စိတ်ဝင်စားဖွယ်ရာ ထိတ်လန့်တုန်လှုပ်ဖွယ်ရာဖြစ်စဉ်များနှင့်လူတိုင်းလိုက်နာကျင့်ကြံသင့်သည့်စိတ်ဓာတ်ခွန်အားဖြစ်ဖွယ်ရာအကြောင်းများကို “ကျွန်တော် ဆုံတွေ့ခဲ့ဖူးသော ထင်ပေါ်ကျော်ကြား အနုပညာကြယ်ပွင့်များ” အမည်ဖြင့် စာရေးသူ သာဉာဏ်(ရန်ကင်း) က မေးမြန်းခဲ့ရာတွင် "အိုပယ်ကြီးတွေဆီမှာ ရှိနေတဲ့အသိတွေကို ဒီခေတ်လူတွေ ယူရမယ်။ တန်ဖိုးဆိုတာ အဲဒါပဲ"ဟု ဦးဝင်းမြင့်က ပြောခဲ့ဖူးသေးသည်။

ymg/mt
Yangon_Media_Group

#LocalNews

Published- 15 Mar 2022
မြန်မာ-ထိုင်းနယ်စပ်ကိုပို့ဆောင်မယ့် ငွေကျပ် ၅၂ ဒသမ ၈ ဘီလီယံကျော်တန်ဖိုးရှိ မူးယစ်ဆေးဝါးတွေကိုကျိုက်ထိုမြို့ နယ်မှာဖမ်းဆီးရမိခဲ့တယ်လို့ မူးယစ်ဆေးဝါးတားဆီးနှိမ်နှင်းရေးရဲတပ်ဖွဲ့ ကသိရပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် မတ်လ ၁၁ ရက်နေ့ နံနက် ၈ နာရီအချိန် မွန်ပြည်နယ်၊ ကျိုက်ထိုမြို့နယ်၊ ရန်ကုန်- မော်လမြိုင်သွားကားလမ်း၊ မရမ်းချောင်ပူးပေါင်းစစ်ဆေးရေး စခန်းတွင် ပဲခူးမှ မော်လမြိုင်ဘက်သို့ ဘိုဘို(၃၇)နှစ် မောင်းနှင်လာသည့် ISUZU ၆ ဘီး ကွန်တိန်နာဘောက်ယာဉ် အား သတင်းအရရှာဖွေရာ ယာဉ်ပေါ်မှ ဒေသကာလတန်ဖိုးငွေကျပ် ၅၂ ဒသမ ၈ ဘီလီယံကျော်တန်ဖိုးရှိ စိတ်ပြောင်း ဆေးဝါးများဖြစ်ကြသည့် အိုက်စ်(မက်သ်အဖက်တမင်း) ၉၉၇ ကီလိုနှင့် ကတ်တမင်း ၇၉၈ ကီလို သိမ်းဆည်းရမိခဲ့တယ်လို့ သိရပါတယ်။

စစ်ဆေးဖော်ထုတ်ချက်အရ သိမ်းဆည်းရမိမူးယစ်ဆေးဝါးများအား ရှမ်းပြည်(မြောက်ပိုင်း)မှ တနင်္သာရီတိုင်း ဒေသကြီး၊ ထားဝယ်မှတစ်ဆင့် မြန်မာ-ထိုင်းနယ်စပ်သို့ သယ်ဆောင်ခြင်းဖြစ်ကြောင်းသိရှိရသဖြင့် ဥပဒေအရ အရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေးဖော်ထုတ်လျက်ရှိတယ်လို့သိရပါတယ်။

ymg/hm
#Yangon_Media_Group

Published 15 March 2022

၂၀၂၂ ခုနှစ်၊ သာသနာတော်ဆိုင်ရာ ဘွဲ့တံဆိပ်တော် ဆက်ကပ်ခံယူမည့် ဆရာတော်ကြီးများကို နေ့ဆွမ်းဆက်ကပ်လှုဒါန်းပွဲ မတ်၁၄ရက် နံနက်က နေပြည်တော်၊ ဥပ္ပါတသန္တိစေတီတော် မြတ်ကြီး ပရိဝုဏ်အတွင်းရှိ သာသနာ့ မဟာဗိမာန်  တော်ကြီးမှာ ကျင်းပခဲ့ပါတယ်။

အဲဒီအခမ်းအနားကို နိုင်ငံတော်သံဃမဟာနာယကအဖွဲ့ဥက္ကဋ္ဌ၊ မန္တလေးမြို့ ဗန်းမော်ကျောင်းတိုက် ပဓာနနာယက ဆရာတော်၊ အဘိဓဇမဟာရဋ္ဌဂုရု၊ အဘိဓဇအဂ္ဂမဟာ သဒ္ဓမ္မ ဇောတိက ဒေါက်တာဘဒ္ဒန္တ ကုမာရာဘိဝံသနှင့် နိုင်ငံတော်သံဃမဟာနာယကအဖွဲ့ အကျိုးတော်ဆောင်၊ သန်လျင်မြို့ မင်းကျောင်းပထမပြန် စာသင်တိုက် ပဓာနနာယက ဆရာတော်၊ အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မ ဇောတိကဓဇ ဒေါက်တာဘဒ္ဒန္တစန္ဒိမာ ဘိဝံသနှင့် ၂၀၂၂ ခုနှစ်၊ သာသနာတော်ဆိုင်ရာ ဘွဲ့တံဆိပ်တော် ဆက်ကပ်ကော်ရော်အပူဇော်ခံတော်မူကြမည့် ဆရာတော်၊ သံဃာတော်များ ကြွရောက်ချီးမြှင့်တော်မူခဲ့ကြတယ်လို့  MOI ရဲ့ သတင်းထုတ်ပြန်ချက်အရ သိရပါတယ်။

အဲဒီအခမ်းအနားမှာ နစကဥက္ကဋ္ဌနှင့်ဇနီး၊ဒုတိယဥက္ကဋ္ဌနှင့်ဇနီး၊နစကအဖွဲ့ဝင်တွေနှင့် နစကအစိုးရအဖွဲ့ဝင်တွေ တက်ရောက်ခဲ့ကြပြီး ဆရာတော်ကြီးများနှင့် ဘွဲ့တံဆိပ်တော်ဆက်ကပ်အပူဇော်ခံကြမယ့် ဆရာတော်၊သံဃာတော်များနှင့် သီလရှင်ဆရာကြီးတွေကို  လှူဖွယ်ပစ္စည်းတွေနှင့် နေ့ဆွမ်းဆက်ကပ်လှူဒါန်းခဲ့ကြပါတယ်။

သာသနာတော်ဆိုင်ရာ ဘွဲ့တံဆိပ်တော်များ ရရှိသည့် ပြည်တွင်း/ ပြည်ပမှ ရဟန်း ၂၈၄ ပါး၊ သီလရှင် ၄၁ ပါးနှင့် လူပုဂ္ဂိုလ် ၂၈ ဦးတို့အနက် အဘိဓဇမဟာရဋ္ဌဂုရုဘွဲ့တံဆိပ်တော်ရ ဆရာတော်ကြီး ၉ ပါး၊ အဘိဓဇအဂ္ဂမဟာသဒ္ဓမ္မဇောတိက ဘွဲ့တံဆိပ်တော်ရ ဆရာတော်ကြီး ၈ ပါး၊ အဂ္ဂမဟာ ပဏ္ဍိတဘွဲ့တံဆိပ်တော်ရ ဆရာတော်ကြီး ၁၈ ပါး၊ အဂ္ဂမဟာဂန္ထဝါစကပဏ္ဍိတဘွဲ့ တံဆိပ်တော်ရ ဆရာတော်ကြီး ၂၃ ပါး၊ အဂ္ဂမဟာဂန္ထဝါစကပဏ္ဍိတ ဘွဲ့တံဆိပ်‌တော်ရ သီလရှင်ဆရာကြီး ၃ ပါး၊ အဂ္ဂမဟာသဒ္ဓမ္မဇောတိကဓဇဘွဲ့တံဆိပ်တော်ရ ဆရာတော်ကြီး ၄၁ ပါး၊ အဂ္ဂမဟာ ကမ္မဋ္ဌာနာစရိယ ဘွဲ့တံဆိပ်တော်ရ ရဟန်း ၆ ပါး၊ အဂ္ဂမဟာသီရိသုဓမ္မမဏိဇောတဓရ ဘွဲ့တံဆိပ် ရလူပုဂ္ဂိုလ် ၁ ဦးနှင့် အဂ္ဂမဟာသီရိသုဓမ္မသိင်္ဂီဘွဲ့တံဆိပ်ရ လူပုဂ္ဂိုလ် ၂ ဦး၊ စုစုပေါင်း ၁၁၁ ပါး/ဦးတို့ အား သာသနာတော် ဆိုင်ရာ ဘွဲ့တံဆိပ်တော်များ ဆက်ကပ်လှူဒါန်းပွဲကို ၁၃၈၃ ခုနှစ်၊ တပေါင်းလပြည့်(၂၀၂၂ ခုနှစ်၊ မတ်လ ၁၆  ရက်) ဗုဒ္ဓဟူးနေ့၊ မွန်းလွဲ  ၁ နာရီတွင် နေပြည်တော်၊ ဥပ္ပါတသန္တိစေတီတော်ပရိဝုဏ်အတွင်းရှိ သာသနာ့မဟာဗိမာန်တော်ကြီး၌ ကျင်းပသွားမယ်လို့သတင်းရရှိပါတယ်။

#LocalNews

Published_14 March 2022

ထိုင်း-မြန်မာ နယ်စပ်ကုန်သွယ်မှု အဓိကလမ်းကြောင်းဖြစ်တဲ့ ကရင်ပြည်နယ်၊ မြဝတီ-ကော့ကရိတ် အာရှလမ်းပေါ်၊ တောနော် ရေတံခွန်အနီးမှာရှိတဲ့ တံတားကိုပြုပြင်ဖို့အတွက် ကုန်တင်ယာဉ်တွေ ဖြတ်သန်းသွားလာခွင့်ကို ၃ ရက်ပိတ်မယ်လို့ ဒေသခံလူမှုကယ် ဆယ်ရေးအသင်းတွေက သိရပါတယ်။

#Yangon_Media_Group