#Local-News
Published_1 Jun 2022

ကိုဗစ်ကာကွယ်ဆေး အကြိမ်ပြည့်ထိုးပြီးသူများအနေဖြင့် ပြည်တွင်းလေယာဉ်စီးလျှင် ထပ်မံဆေးစစ်ရန်မလိုတော့ကြောင်း ကျန်းမာရေးဝန်ကြီးဌာနက သိရသည်။

"ပြည်တွင်းလေကြောင်း ခရီးစဉ်တွင် လိုက်ပါမည့်သူများ ကာကွယ်ဆေးအကြိမ်ပြည့်ထိုးထားပါက RDT စစ်စရာမလိုတော့ပါ"ဟု ကျန်းမာရေးဌာနမှ ဒေါက်တာခင်ခင်ကြီးက သူ၏လူမှုကွန်ယက် ဖေ့စ်ဘုတ်စာမျက်နှာတွင် ရေးသားထားသည်။

ပြည်တွင်းလေယာဉ်စီးခရီးသည်များအနေဖြင့် ကိုဗစ်ကာကွယ်ဆေး အကြိမ်ပြည့်ထိုးပြီးသူဖြစ်သော်လည်း ကိုဗစ်ကင်းရှင်းကြောင်း ထောက်ခံချက်ကို ယူဆောင်သွားရခြင်းဖြစ်သောကြောင့် လေယာဉ်စီးခရီးသည်များနှင့် ကိုဗစ်စစ်ဆေးပေးသည့် လုပ်ငန်းစဉ်နှစ်ခုကြားတွင် မရိုးမသားကိစ္စများ ဖြစ်ပေါ်မှုရှိနေကြောင်းလည်း ရခိုင်ပြည်နယ်သို့ လေယာဉ်ခရီးစဉ်ဖြင့် အမြဲသွားရောက်နေသူတစ်ဦးကပြောသည်။

"ကျွန်မက တစ်လကို အသွားအပြန် လေးခေါက်လောက် လေယာဉ်စီးနေရသူပါ။ ကိုဗစ်ကာကွယ်ဆေးက အားလုံးထိုးပြီးသား။ ဒါပေမယ့် လေယာဉ်စီးဖို့ နှာခေါင်းထိုးရတာ သွားသမျှ အကြိမ်ကြိမ် ဆိုတော့ လူက နှာခေါင်းကို အထိုးမခံချင်တော့ဘူးလေ။ ဒါကြောင့် ထောက်ခံစာရဖို့ အကြံအဖန်တွေကို လုပ်ရတယ်။ ဒါက ပွင့်ပွင့်လင်းလင်းပြောတာ။ ဒီလိုဆိုတော့ မရိုးမသားတွေ ဖြစ်ရတယ်။ နောက်ပြီး ငွေကြေးကုန်ကျမှုတွေ ရှိတယ်။ ကာကွယ်ဆေးအပြည့်ထိုးပြီးသူတွေ အခု လေယာဉ်စီးမယ်ဆိုရင် ကိုဗစ်စစ်ဆေးတာကို မလိုတော့ဘူးဆိုတော့ ကြိုဆိုပါတယ်။ ဒါမျိုးက ဖြစ်သင့်တာကြာပါပြီ"ဟု အဆိုပါ ခရီးသည်တစ်ဦးက YMG ကို ပြောသည်။

ymg/mt
#Yangon_Media_Group

#LocalNews
Published -1 june 2022

လေဆိပ်များနှင့်နယ်စပ်ဝင်ထွက်ပေါက်များမှ ဝင်ရောက်လာသူများတွင် မျောက်ကျောက်ရောဂါ
Monkeypox လက္ခဏာရှိမရှိ သတင်းပေးပို့ပြီးစစ်ဆေးဆောင်ရွက်သွားမည်ဖြစ်ကြောင်း ကျန်းမာ ရေးဝန်ကြီးဌာနက သိရသည်၊၊

အိမ်နီးချင်းထိုင်းနိုင်ငံတွင် မေလ(၃၀)ရက်က သုဝဏ္ဍဘူမိလေဆိပ်၌ဩစတျေးလျသို့ သွားရောက်မည့် Transit ခရီးသည်တစ်ဦးထံမှ မျောက်ကျောက်ရောဂါကို အတည်ပြုတွေ့ရှိခဲ့ပြီးနောက်မြန်မာနိုင်ငံမှာလည်း လေဆိပ်များနှင့်နယ်စပ်ဝင်ထွက်ပေါက်များတွင် မျောက်ကျောက်ရောဂါနှင့်ပတ်သက်၍ ကာကွယ်ရေး များဆောင်ရွက်သွားမည့်အကြောင်း ထုတ်ပြန်ခြင်း ဖြစ်ပါသည်၊၊

(၂၀၂၂) ခုနှစ်၊ မေလ (၃၁) ရက်ကနေပြည်တော်တွင် ပြုလုပ်ခဲ့သည့် Monkeypox ရောဂါ ကာကွယ်ထိန်းချုပ်ကုသရေးဆိုင်ရာလုပ်ငန်းညှိနှိုင်းအစည်းအဝေးတွင် ကျန်းမာရေးဝန်ကြီးဌာန ဒုတိယဝန်ကြီးပါမောက္ခဒေါက်တာအေးထွန်းနှင့် တာဝန်ရှိသူများ ညှိနှိုင်းဆွေးနွေးရာတွင် ယင်းကဲ့သို့ သတင်းပေးပို့စစ်ဆေးဆောင်ရွက်ရန် ထည့်သွင်းဆွေးနွေးခဲ့ ခြင်းဖြစ်သည်၊၊

အစည်းအဝေးတွင် အပြည်ပြည်ဆိုင်ရာ လေဆိပ်များနှင့် နယ်စပ်ဝင်ထွက်ပေါက်များတွင် Monkeypox ရောဂါ လက္ခဏာများရှိပါက သတင်းပေးပို့နိုင်ရေးအတွက် Health Declaration Card များတွင် Monkeypox ရောဂါ သံသယရောဂါလက္ခဏာများကို ထည့်သွင်းထားရှိရေး၊ ဝင်ထွက်ပေါက်များတွင် ကိုယ်အပူချိန်တိုင်းတာရေး၊ ရောဂါလက္ခဏာများကို စမ်းသပ်ကြည့်ရှုရေး စသည့် ရောဂါကြိုတင်ကာကွယ်ရေးလုပ်ငန်းများ၊ ဖျားခြင်း၊ အနီစက်/အရည်ကြည်ဖုထွက် ခြင်း (Fever with vesicular rash) ရောဂါလက္ခဏာစောင့်ကြပ်ကြည်ရှုခြင်းလုပ်ငန်းလမ်းညွှန်ကို ပြည်နယ်/ တိုင်းဒေသကြီး ပြည်သူ့ကျန်းမာရေးနှင့်ကုသရေးဦးစီးဌာနများသို့ ဖြန့်ဝေခြင်းလုပ်ငန်းများ၊ မြန်မာနိုင်ငံအတွင်း Monkeypox ရောဂါ လူနာကို ပထမဦးဆုံးအနေဖြင့် တွေ့ရှိခြင်းဖြစ်စဉ် ဖြစ်ပွားလာပါက ပြင်ဆင်ဆောင်ရွက်ထားရှိမည့်လုပ်ငန်းများနှင့် အခြားသူများသို့ ဆက်လက် ကူးစက်မှုမရှိစေရေး သီးခြားခွဲခြားထားရှိခြင်း၊ အနီးကပ်ထိတွေ့သူများကို စောင့်ကြည်ခြင်း စသည့် ရောဂါထိန်းချုပ်ရေးလုပ်ငန်းစဉ်များ၊ Monkeypox ရောဂါကို အတည်ပြုပေးနိုင်ရေး ဓာတ်ခွဲစမ်းသပ် စစ်ဆေးပေးနိုင်ရေးနှင့် လူနာကို စနစ်တကျ ကုသပေးနိုင်ရေးအတွက် ကူးစက်မြန်ရောဂါများဆိုင်ရာ ဆေးကုသမှုစီမံခန့်ခွဲရေးကော်မတီ (Emerging and re-emerging infectious diseases clinical management committee) များအား လိုအပ်သလို ပြန်လည်ဖွဲ့စည်းခြင်းလုပ်ငန်းများ စသည့်လုပ်ငန်းရပ်များကို အချိန်နှင့် တစ်ပြေးညီ အကောင်အထည်ဖော်နိုင်ရေးကိစ္စရပ်များကို ညှိနှိုင်းဆွေးနွေးခဲ့ကြကြောင်း ကျန်းမာရေးဝန်ကြီးဌာနမှသိရသည်၊၊

ymg/tthl
#Yangon_Media_Group

#Local_News
Published_ 1 June 2022

၂၀၂၂ ခုနှစ် ဇွန် ၁ ရက်မှစ၍ မြန်မာ့ပင်လယ်ပြင်မှာ ကမ်းဝေးငါးဖမ်းရေယာဉ် ၃၀ ရာခိုင်နှုန်းကို ပြန်လည်ဖမ်းခွင့်ပြုမှာဖြစ်တယ်လို့ ငါးလုပ်ငန်းဦးစီးဌာက ထုတ်ပြန်ထားပါတယ်။

ဒီနှစ်မှာ ငါးမဖမ်းရရာသီကို ဧပြီ၊ မေနဲ့ ဇွန် သုံးလကိုသတ်မှတ်ထားပြီး ပင်လယ်ငါးဖမ်းလုပ်ငန်းရှင်တွေဟာ အခက်အခဲတွေကို တင်ပြခဲ့တာကြောင့် ဇွန် ၁ ရက်က စတင်ပြီး ကမ်းဝေးငါးဖမ်းရေယာဉ် ၃၀ ရာခိုင်နှုန်းကို ပြန်လည်လုပ်ကိုင်ခိုင်းမှာဖြစ်ကာ ကျန်ရှိနေတဲ့ ရေယာဉ်တွေကို ဇွန်လကုန်မှသာ ငါးဖမ်းခွင့်ပေးမှာဖြစ်တယ်လို့ သိရပါတယ်။

ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ရခိုင်ပြည်နယ်နဲ့ မွန်ပြည်နယ်တို့ရှိ ကမ်းဝေးငါးဖမ်းရယာဉ်ပေါင်း ၃၀၀၀ ကျော် အနက် ၃၀ ရာခိုင်နှုန်းကို ခွင့်ပြုမှာဖြစ်တယ်လို့ သိရပါတယ်။

ထို့ပြင် ရာသီအလိုက်လုပ်ကိုင်ရတဲ့ အင်္ဂလန်ကျားဖောင်ဝိုင်းချုပ်၊ ကင်းမွန်ငါးဖမ်း ရေယာဉ်တွေကို နှစ်လပိတ်သိမ်းပြီး တရွတ်ဆွဲသုံးချောင်းကျောက်ပို၊ ကျောက်ပိုက်၊ စိန်ပိုက်၊ ငါးဖမ်းပိုက်နဲ့ မြှုံးတို့ကို အသုံးပြုကာ ငါးဖမ်းတာတွေကို ပိတ်ထားတာဖြစ်တယ်လို့ သိရပါတယ်။

ymg-mnn
#Yangon_Media_Group

#LocalNews
Published -1 June 2022

တာဝန်မှကင်းကွာနေသည့် ဆရာ၊ ဆရာမများ တာဝန်ပြန်လည်ထမ်းဆောင်ရန် သတင်းပေးပို့သည့် ဆရာ၊ ဆရာမဦးရေ ၂၄၈၂ ဦးအထိရှိပြီဖြစ်ကြောင်း နိုင်ငံတော်စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့မှ သိရသည်။

ခြိမ်းခြောက်ခံရမှုကြောင့်လည်းကောင်း၊ ငြိမ်းချမ်းစွာဆန္ဒပြမှုများတွင် ပါဝင်ခဲ့မိသောကြောင့်လည်းကောင်း၊ သွားလာမှုခက်ခဲခြင်းကြောင့်လည်းကောင်း စိုးရိမ်ကြောင့်ကြမှုများကြောင့် တာဝန်မှ ကင်းကွာခဲ့သော ပညာရေးဝန်ထမ်းဆရာ ဆရာမများ၊ ဝန်ထမ်းစည်းကမ်းဖြင့် အရေးယူခံထားရသည့် ဆရာ ဆရာမများအနေဖြင့် နိုင်ငံသားမျိုးဆက်သစ်လူငယ်များအတွက် စေတနာ၊ ဝါသနာ၊ အနစ်နာဟူသော နာသုံးနာကိုရှေးရှူ၍ သင်ကြားရေးတာဝန်ကို ပြန်လည်ထမ်းဆောင်နိုင်ရန်အတွက် မိမိတို့၏သဘောဆန္ဒအလျောက် မိမိတို့နောက်ဆုံး တာဝန်ထမ်းဆောင်ခဲ့ရာ ကျောင်းတည်ရှိသည့် မြို့နယ်ပညာရေးမှူးရုံးသို့ဖြစ်စေ၊ မိမိတို့လက်ရှိနေထိုင်ရာ ပညာရေးမှူးရုံးသို့ဖြစ်စေ၊ မိမိတို့လက်ရှိနေထိုင်ရာဒေသရှိ နီးစပ်ရာမြို့နယ်ပညာရေးမှူးရုံးသို့ဖြစ်စေ၊ မေလ ၃၁ ရက်နောက်ဆုံးထား သတင်းပေးပို့ရန် နိုင်ငံတော်စီမံအုပ်ချုပ်ရေးကောင်စီ၊ သတင်းထုတ်ပြန်ရေးအဖွဲ့မှ သတင်းထုတ်ပြန်ဖိတ်ခေါ်ခဲ့ပြီး လက်ရှိအချိန်ထိ ဆရာ ဆရာမဦးရေ ၂၄၈၂ ဦး ဆက်သွယ်သတင်းပေးပို့ခဲ့ကြောင်း သိရသည်။

ယင်းအပြင် ဆက်သွယ်ပေးပို့ရန် ဆန္ဒရှိသော်လည်း လမ်းပန်းဆက်သွယ်ရေးနှင့်အခြားသောအခက်အခဲများကြောင့် သတ်မှတ်ရက်အတွင်း သတင်းပို့နိုင်ခြင်းမရှိသော ဆရာ ဆရာမများအတွက် သတင်းပေးပို့ရန် ဆက်သွယ်ရမည့်ရက်ကို ဇွန်လ ၇ ရက်အထိ တိုးမြှင့်သတ်မှတ်ပေးထားကြောင်း သိရသည်။

ymg/sth
#Yangon_Media_Group

#Local_News
Published_ 1 June 2022

ရှမ်းပြည်နယ်(အရှေ့ပိုင်း)၊ မိုင်းပျဉ်းမြို့တွင် ငွေကျပ် ၁ ဒသမ ၂၇၅ ဘီလီယံတန်ဖိုးရှိ စိတ်ပြောင်းဆေးဝါးကက်တမင်း (Ketamine) ၁၅၀ ကီလို ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် မေ ၂၉ ရက် ည ၉ နာရီအချိန် ရှမ်းပြည်နယ်(အရှေ့ပိုင်း)၊ မိုင်းပျဉ်းမြို့၊ အလယ်ပိုင်းရပ်ကွက်၊ နမ့်ပိန်းချောင်းအနီးတွင် လှိုင်မင်းထွန်း မောင်းနှင်ပြီး စိုင်းဆမ်လိုက်ပါလာသည့် PAJERO မော်တော်ယာဉ်အား သတင်းအရရှာဖွေခဲ့ပါတယ်။

ထိုသို့ရှာဖွေခဲ့ရာ ယာဉ်ပေါ်မှ ဒေသကာလတန်ဖိုးငွေကျပ် ၁ ဒသမ ၂၇၅ ဘီလီယံ တန်ဖိုးရှိ စိတ်ပြောင်းဆေးဝါး ကက်တမင်း ၁၅၀ ကီလို သိမ်းဆည်းရမိခဲ့တာ ဖြစ်ပါတယ်။

စစ်ဆေးချက်အရ ည ၁၀ နာရီအချိန် မိုင်းပျဉ်းမြို့တွင် စိတ်ပြောင်းဆေးဝါး ကက်တမင်းများသယ် ဆောင်ရာ၌ ပူးပေါင်းပါဝင်သူများဖြစ်သည့် စိုင်းယီ၊ နန်းဟုန်၊ စိုင်းငိုနှင့် စိုင်းလင်းတို့ ၄ ဦးအား မော်တော်ဆိုင်ကယ် ၄ စီးနှင့်အတူ ဆက်လက်ဖမ်းဆီးရမိ ခဲ့တာဖြစ်ပါတယ်။

စစ်ဆေးဖော်ထုတ်ချက်အရ ကျိုင်းတုံမြို့၊ (၄) ရပ်ကွက်နေ စိုင်းလုံကျောက်က သိမ်းဆည်းရမိ စိတ်ပြောင်းဆေးဝါးများအား မိုင်းပျဉ်းမှကျိုင်းတုံသို့ သယ်ဆောင်ခိုင်းခြင်းဖြစ်ပြီး ၎င်းမှာထွက်ပြေးတိမ်းရှောင်လျက်ရှိသဖြင့် ဥပဒေအရအရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေးဖော်ထုတ်လျက်ရှိကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။

ymg-mnn
#Yangon_Media_Group

#Local_News
Published_ 1 June 2022

နိုင်ငံတော်၏ ငြိမ်းချမ်းရေးဆွေးနွေးရေးအဖွဲ့နှင့် “ဝ” ပြည်သွေးစည်းညီညွတ်ရေးပါတီ (UWSP) ဒုတိယဥက္ကဋ္ဌ ဦးဆောင်သော ကိုယ်စားလှယ်အဖွဲ့တို့ မေ ၃၁ ရက် နံနက်ပိုင်းတွင် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ဗဟိုဌာန၌ တွေ့ဆုံဆွေးနွေးခဲ့ပါတယ်။

အဆိုပါ တွေ့ဆုံဆွေးနွေးပွဲသို့ အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီဥက္ကဋ္ဌ၊ ငြိမ်းချမ်းရေးဆွေးနွေးရေး အဖွဲ့ခေါင်းဆောင် ဒုတိယဗိုလ်ချုပ်ကြီးရာပြည့်နှင့် အဖွဲ့ဝင်များ၊ “ဝ” ပြည် သွေးစည်းညီညွတ်ရေးပါတီ ဒုတိယဥက္ကဋ္ဌနှင့် အဖွဲ့ဝင်များ တက်ရောက်ခဲ့ကြပါတယ်။

ဆွေးနွေးပွဲတွင် ငြိမ်းချမ်းရေးဆွေးနွေးရေး အဖွဲ့ခေါင်းဆောင် ဒုတိယဗိုလ်ချုပ်ကြီး ရာပြည့်နှင့် “ဝ” ပြည်သွေးစည်းညီညွတ်ရေးပါတီ(UWSP) ဒုတိယဥက္ကဋ္ဌ ဦးလော့ယာကုတို့က နှုတ်ခွန်းဆက်အမှာစကားပြောကြားကြပြီး တက်ရောက်လာကြသူများက ငြိမ်းချမ်းရေးနှင့် ဖွံ့ဖြိုးရေးဆိုင်ရာကိစ္စရပ်များကို အပြန်အလှန်ဆွေးနွေးကြပြီး ဒုတိယနေ့ ဆွေးနွေးပွဲကို ဇွန် ၁ ရက်တွင် ဆက်လက် ကျင်းပသွားမှာဖြစ်ကြောင်း သိရှိရပါတယ်။

“ဝ” ပြည် သွေးစည်းညီညွတ်ရေးပါတီ UWSP အနေဖြင့် ပါတီစုံဒီမိုကရေစီစနစ် ကျင့်သုံးရေး၊ ဒီမိုကရေစီနှင့်ဖက်ဒရယ်ကို အခြေခံသည့် ပြည်ထောင်စုစနစ် တည်ဆောက်ရေးနှင့် ပတ်သက်၍ “ဝ” ပြည်သွေးစည်းညီညွတ်ရေးပါတီ UWSP မှ သဘောတူကြောင်း နစကဥက္ကဌနှင့် မေ ၃၀ ရက်ကတွေ့ဆုံမှုမှာ ပြောကြားထားပါတယ်။

ymg-mnn
#Yangon_Media_Group