#LocalNews
Published - 26 March 2022

ရန်ကုန်တိုင်း၏ မြို့နယ်အချို့တွင် အိမ်ကျော်နင်းဖောက်ထွင်းမှုဖြစ်စဥ်များ ပိုမိုများပြားလာနေတယ်လို့ ရန်ကုန်မြိုနေပြည်သူများထံမှ သိရပါတယ်။

တောင်ဒဂုံ၊ မြောက်ဒဂုံနှင့် ဒဂုံဆိပ်ကမ်းမြို့နယ် အစရှိသည့် ဆင်ခြေဖုံးမြို့နယ်များတွင် အိမ် ဖောက်ထွင်းခံရမှုဖြစ်စဥ်များကို ပိုမိုကြုံတွေ့နေရပြီး လုယက်မှုဖြစ်စဥ်အချို့လည်းရှိနေကြောင်း အဆိုပါမြို့နယ်များတွင် နေထိုင်သူများကပြောပါတယ်။

ပြီးခဲ့တဲ့ ရက်ပိုင်းအတွင်းက တောင်ဒဂုံမြို့နယ်အတွင်းမှာ အိမ်ဖောက်ထွင်းခံရမှုတစ်မှုဖြစ်ပွားခဲ့ပြီး ဖောက်ထွင်းခံခဲ့ရသည့်အိမ်ပိုင်ရှင်၏ မိသားစုဝင်တစ်ဦးက ၄င်းတို့နေအိမ်ဖောက်ထွင်းခံရမှုဖြစ်စဥ်အပေါ် ယခုလို ပြောပြပေးခဲ့ပါတယ်။

"ညအိပ်နေတဲ့အချိန်မှာ ဖြစ်တာပါ။ သူက ခြံကိုကျော်ပြီးဝင်လာတယ်။ ခြံထဲကနေတစ်ဆင့် ညီမအခန်း ပြတင်းတံခါးကနေ တစ်ဆင့် အိမ်ထဲဝင်လာတယ်။ ညီမဘေးမှာထားတဲ့ ဖုန်းကိုလုတယ်။ ညီမလည်း သူ့ဆီက ဖုန်းကို အတင်းပြန်လုတယ်။ ရုန်းကန်ဆန်ခတ်တွေ ဖြစ်ကုန်တာပေါ့။ ညီမတို့က သူခိုး သူခိုးလို့အော်မှ သူက ပြန်ပြေးထွက်သွားတယ် အိမ်ထဲကနေ ညီမဖုန်းတော့ သူ့ဆီပါသွားတယ်။လူကို အန္တရာယ်မပြုသွားတာပဲ တော်သေးတာပေါ့လို့ ဖြေတွေးလိုက်ရတယ်။ ဒါ တောင် ညီမတို့ အိမ်က ခြံတံခါးအိမ်တံခါးတွေ အထပ်ထပ်ရှိပါတယ်။ သူက အဲ့ဒါတွေကို ဖျက်ပြီး ဝင်လာတာပါ။ လူကို ဘာမှလုပ်မသွားတာပဲ ကံကောင်းတယ်လို့ ပြောရပါမယ်။" လို့ သူမက ပြောပြခဲ့ပါတယ်။

ဒါ့အပြင် ဆင်ခြေဖုံး မြို့နယ်/ ရပ်ကွက်တွေမှာလည်း ဆွဲကြိုးဖြတ်ပြေးတာတွေ ပိုက်ဆံအိတ်လု ပြေးမှုတွေနဲ့ ဆိုင်ကယ်ဖြင့် လုယက်မှုတွေလည်း ယခုကာလများတွင် ပိုမိုများပြားလာခဲ့ပြီး ပြည်သူတွေက အဆိုပါဖြစ်စဥ်တွေကို နေ့စဥ်လိုလို ကြုံတွေ့ခံစားနေရတာဖြစ်တယ်လို့ ဆိုပါတယ်။

"ကျွန်မတို့ အိမ် ၅ လွှာအထိ သူခိုးတက်တယ်။ အဲ့ဒါကို အံ့သြနေတာ ဒီအပေါ် ၅ လွှာအထိ ဘယ်လိုတက်လာလဲမသိဘူး။ အခု ညပိုင်းတွေဆို အတော်သတိထားနေရတယ်။ ပြတင်းပေါက်တံခါးတွေလည်း ဖွင့်မအိပ်ရဲတော့ဘူး။"လို့ ဒဂုံဆိပ်ကမ်းမြို့နယ်၊ ယုဇနဥယျာဥ်မြို့တော်မှာ
နေထိုင်သူတစ်ဦးက ပြောပါတယ်။

ဒါ့အပြင် ယခုကာလများတွင် ရန်ကုန်မြို့တွင်း ကားမှတ်တိုင်အချို့မှာ လုယက်မှုကျုးလွန်သူများကလည်း ကားမှတ်တိုင်များကိုအခြေပြုကာ မှတ်တိုင်များမှ ခရီးသွားပြည်သူများ၊ ယာဥ်ပေါ်အတက်အဆင်းပြုလုပ်ချိန်များတွင် လုယက်မှုများပြုလုပ်လာကြတယ်လို့ သိရပါတယ်။

လုယက်မှုကျူးလွန်သူများမှာ အဓိကအားဖြင့် လက်ကိုင်ဖုန်းများကို အာရုံစိုက်ကြည့်ရှုသူများကို
ပစ်မှတ်ထားကာ လက်ကိုင်ဖုန်းများကို အုပ်စုဖွဲ့လုယက်ယူဆောင်ခြင်းဖြစ်တယ်လို့ လုယက်မှုကို ကိုယ်တိုင်ကြုံတွေ့ခဲ့ရသူတစ်ဦးက YMG ကို အခုလိုပြောပြခဲ့ပါတယ်။

"ဗန္ဓုလတံတား အဆင်းက ကားမှတ်တိုင်မှာပါ။ ကျွန်မက ကားမှတ်တိုင်မှာကားစောင့်နေတာ အဲ့အချိန်မှာ ခါးပိုက်နှိက်က ကျမအိတ်ကိုဇစ်ဖွင့်ပြီး နှိုက်တာပေါ့။ ကျွန်မ သတိထားမိပြီး အိတ်ကို အ ရှေ့ပြန်ဆွဲပြီး ဘာလုပ်တာလဲလို့ သူ့ကိုလှမ်းအော်ပြီး ကြုံတဲ့လိုင်းကားပေါ်ကိုပဲ အမြန်တက်ခဲ့ရတယ်။ သတိထားတာမြန်လို့ ဘာမှတော့မပါသွားခဲ့ဘူး။ သူ့အသက်အရွယ်က အသက် ၄၀ လောက်တော့ရှိမယ်ထင်ပါတယ်။" လို့ ကုမ္ပဏီဝန်ထမ်းတစ်ဦးက သူမကြုံတွေ့ခဲ့ရတဲ့ဖြစ်စဥ်ကို ပြန်လည်ပြောပြခဲ့ပါတယ်။

ထို့အပြင် သခင်မြပန်းခြံကိုအခြေပြုကာ မြို့တွင်းပတ်ပြေးဆွဲနေသည့် ယာဥ်လိုင်းများပေါ်တွင် အုပ်စုဖွဲ့ကာ ခါးပိုက်နှိုက်ကျူးလွန်မှုများလည်း မကြာခဏဖြစ်ပွားနေပြီး အဓိကအနေဖြင့် ယာဥ်ပေါ်အတက်အဆင်းပြုလုပ်ရာတွင် အများဆုံးကျူးလွန်လေ့ရှိတယ်လို့ ဆိုပါတယ်။

ထိုသို့ လုယက်ခါးပိုက်နှိုက်ဖြစ်စဥ်တွေ များပြားလာသည့်အတွက် ရန်ကုန်မြို့နေပြည်သူများအ နေနဲ့ ပြင်ပသို့သွားလာရာမှာ အထူးဂရုပြုသွားလာနေကြတယ်လို့လည်း သိရပါတယ်။

ymg/kg
#Yangon_Media_Group

#LocalNews
Published_26 March 26

သရုပ်ဆောင်ရဲတိုက်ကို စွဲချက်လျှောက်လဲချက်တင်ပြီးတဲ့နောက် မတ်လ ၃၀ ရက်နေ့မှာ ရုံးချိန်း ထပ်မံချိန်းဆိုထားပါတယ်။

#Yangon_Media_Group

#DailyNews
Published - 25 Mar 2022

၁။ လက်နက်ကိုင်ခေါင်းဆောင်များထိပ်သီးအစည်းအဝေးကျင်းပမည်

၂။ ထိုင်းတော်ဝင် ရဲတပ်ဖွဲ့မှ အဆင့်မြင့်အရာရှိကြီးတစ်ဦး၏ ကားအတွင်း တရားမဝင်တင်ဆောင်လာသော မြန်မာနိုင်ငံသား ဖမ်းဆီးရမိ

၃။ မိုးလေဝသ သတင်း

၄။ ရုရှားမှတင်သွင်းသည့်မြေဩဇာများ အဆမတန်ဈေးတက်လာမှုကြောင့် ထိုင်းနိုင်ငံ၏ ကုန်ဈေးနှုန်းများမြင့်တက်လာ......အစရှိတဲ့သတင်းတွေကို တင်ဆက်ပေးသွားမှာပဲဖြစ်ပါတယ်။

#Yangon_Media_Group

#LocalNews
Published - 26 March 2022

လန်ချန်း-မဲခေါင် အထူးရန်ပုံငွေဖြင့် ဒေသခံများအတွက် နည်းပညာသင်တန်းပေးမှုများအား ဆင့်ပွားဆောင်ရွက်သွားမှာဖြစ်တယ်လို့ သိရပါတယ်။

အဆိုပါ ဆင့်ပွားသင်တန်းပေးမှုကို ရန်ကုန်တိုင်းဒေသကြီး၊ လှည်းကူးမြို့နယ်ရှိ စံပြဥယျာဉ်ခြံအတွင်းတည်ဆောက်ထားသည့် မြန်မာနိုင်ငံ ဟင်းသီးဟင်းရွက်နှင့် သစ်သီးဝလံ သုတေသနနှင့် ဖွံ့ ဖြိုးရေးစင်တာ၌ ပြုလုပ်သွားမည်ဖြစ်ပြီး စီမံကိန်းကနေ ဒေသခံများအတွက် နည်းပညာသင်တန်းပေးမှုများကို ဆောင်ရွက်သွားမှာဖြစ်တယ်လို့ ဆိုပါတယ်။

ထို့အပြင် လန်ချန်း- မဲခေါင်နိုင်ငံအသီးသီးနှင့်အတူ နည်းပညာဖလှယ်ခြင်း၊ အတွေ့အကြုံမျှဝေပေးခြင်းတို့ကိုလည်း ဆောင်ရွက်မည်ဖြစ်ပြီး ဥယျာဉ်ခြံစိုက်ပျိုးရေးလုပ်ငန်း အရည်အသွေးမြင့်မားလုပ်ငန်းတွင်ကျယ်ရေးကို လုပ်ဆောင်သွားမယ်လို့ သိရပါတယ်။

အဆိုပါ လန်ချန်း-မဲခေါင် ပူးပေါင်းဆောင်ရွက်မှုအထူးရန်ပုံငွေ၏ ထောက်ပံ့မှုဖြင့် “သရက်၊ ကျွဲကော၊ ပိန္နဲ၊ မာလကာမျိုးကောင်းမျိုးသန့် ပျိုးပင်များထုတ်လုပ်ရန် ခေတ်မီစံပြပျိုးခင်းနှင့် ပျိုးရုံတည်ထောင်ခြင်း” စီမံကိန်းကို ၂၀၁၉ ခုနှစ်၊ အောက်တိုဘာလတွင် စတင်ဖော်ဆောင်ခဲ့ခြင်းဖြစ်တယ်လို့လည်း မြန်မာနိုင်ငံဆိုင်ရာ တရုတ်သံရုံးက သတင်းထုတ်ပြန်ထားပါတယ်။

ymg/kg
#Yangon_Media_Group

#LocalNews
Published - 26 March 2022

ခရီးလမ်းပန်းလုံခြုံစိတ်ချရမှုတွေ အားနည်းနေသေးသည့်အတွက် ကချင်ဒေသသို့ ခရီးသွားဝင် ရောက်မှုတွေက ပြီးခဲ့သည့်နှစ်များမှစလို့ ယခုအချိန်ကာလအထိ လျော့နည်းကျဆင်းလျက်ရှိတယ်လို့ အဆိုပါဒေသရှိခရီးသွားလုပ်ငန်းလုပ်ကိုင်သူများထံမှ သိရပါတယ်။

"ခရီးသွားတွေက ဝင်တာနည်းတယ်လေ၊ မရှိသလောက်ပါပဲ၊ အရင်လိုမဟုတ်ဘူး။ အခုက မဖြစ်မ နေ အလုပ်ကိစ္စလောက်ပဲလာကြတဲ့သူတွေရှိတယ်။ အရင်လို Express ကားကြီးတွေ ဘုရားဖူးကားတွေ ဒီနှစ်ပိုင်းတွေမှာလာတာ အလွန်နည်းသွားပြီ။ ခရီးသွားတွေကျတာက ကိုဗစ်ဖြစ်ထဲက ကျတာပေါ့ ။ အခုကျတော့ ဘယ်လိုဖြစ်လဲဆိုတော့ လမ်းပန်းဆက်သွယ်ရေးခက်ခဲတယ်၊ ခရီးလမ်းပန်းလုံခြုံစိတ်ချရမှု အားနည်းတယ်၊ အဲ့အတွက် ဒီဘက်ကိုလာကြတဲ့ ပြည်တွင်း၊ပြည်ပ ခရီးသွားတွေ အတော်လေးနည်းသွားတယ်။ ဘာလို့လဲဆို သူက စစ်ကိုင်းတိုင်းထဲကနေ ဖြတ်ပြီး တော့လာရတာ စစ်ကိုင်းတိုင်းထဲဖြတ်ပြီးမှ ဒီဘက်ရောက်တာကိုး အဲ့တော့ လမ်းခရီးလာရတဲ့အပိုင်းမှာ အခက်အခဲလေးတွေရှိတယ်။ အခုကတော့ ဒီဘက်ကိုလာမယ်ဆိုရင် လေကြောင်းလမ်းတစ်ခုပဲရှိတာပေါ့။ ပြောရရင် ခရီးသွားလုပ်ငန်းတွေက အခုကာလမှာ တုန့်ဆိုင်းနေတဲ့သဘောပါပဲ။"လို့ မြစ်ကြီးနားမြို့အခြေစိုက် ခရီးသွားလုပ်ငန်းလုပ်ကိုင်သူတစ်ဦးက YMG ကို ယခုလိုပြောပြခဲ့ပါတယ်။

ပြည်တွင်း၊ပြည်ပခရီးသွားတွေ စိတ်ဝင်တစားနဲ့ အများဆုံးလာရောက်လည်ပတ်ကြတဲ့ ကချင်ပြည်နယ်ရဲ့ အထင်ကရ ပွဲတော်တစ်ခုဖြစ်တဲ့ မနောပွဲတော်ကိုလည်း ကိုဗစ်အခြေအနေ တွေကြောင့် မကျင်းပနိုင်တဲ့ အနေအထားမှာရှိနေတာကြောင့် ခရီးသွားဝင်ရောက်မှုတွေ ကျဆင်းခဲ့တာဖြစ်တယ်လို့ ခရီးသွားလုပ်ငန်းလုပ်ကိုင်သူများက ဆိုပါတယ်။

"မနောပွဲတော်ကိုလည်း မကျင်းပနိုင်တာကြာခဲ့ပြီ။ ကိုဗစ်ဖြစ်ထဲကပေါ့၊ အားလုံးသိတဲ့အတိုင်း မ နောပွဲတော်ဆိုတာကလည်း တအားစည်တဲ့ပွဲတော်တစ်ခုဖြစ်တယ်။ ကချင်ပြည်နယ်ရဲ့အထင်ကရပွဲတော်တစ်ခုဖြစ်တယ်။ ပွဲတော်ရက်ဆို ပြည်တွင်း၊ပြည်ပ ခရီးသွားတွေနဲ့ တအားစည်တယ်။ အခုနောက်ပိုင်းကာလတွေမှာ ဒီလိုပွဲတော်တွေကို ပြန်ပြီးတော့ ကျင်းပလာနိုင်မယ်ဆိုရင် ခရီးသွား တွေက ပြန်တက်လာမှာပေါ့။

ဒါပေမယ့် ခရီးသွားလုပ်ငန်းတွေ ပြန်လည်ဖွံ့ဖြိုးလာဖို့ကတော့ ကျွန်တော်ထင်ပါတယ်၊ အချိန်ကာလတစ်ခုအထိ စောင့်ရမှာပါ။"လို့ ၄င်းက ဆက်လက်ပြောပြခဲ့ပါတယ်။

ကချင်ဒေသဟာ အထင်ကရ လည်ပတ်အပန်းဖြေစရာနေရာတွေ များပြားသည့်ဒေသတစ်ခုဖြစ်ပြီး ပြည်တွင်း၊ပြည်ပ ခရီးသွားတွေ အများအပြားလာရောက်လည်ပတ်ကြတဲ့ ဒေသတစ်ခုလည်း ဖြစ်ပါတယ်။

"ဒီဘက်ကတော့ လည်ပတ်စရာတွေက မြစ်ဆုံရှိမယ်၊ အင်းတော်ကြီးဒေသရှိမယ် ကျန်တဲ့လည်ပတ်စရာတွေ အပန်းဖြေစခန်းတွေလည်း အများကြီးပေါ့နော်။တချို့ခရီးသွားတွေကျတော့လည်း ပူတာအိုဒေသ ရေခဲတောင်တန်းတွေအထိ သွားရောက်လည်ပတ်ကြတာတွေရှိတယ်။" လို့ သူက ထပ်လောင်းပြောပြခဲ့ပါတယ်။

လက်ရှိ ကချင်ဒေသသို့ ခရီးသွားဝင်ရောက်မှုက ၁၀၀ မှာ ၃၀ ရာခိုင်နှုန်းသာရှိနေပြီး ခရီးသွားလုပ်ငန်းတွေ ပြန်လည်ဖွံ့ဖြိုးလာဖို့ကိုလည်း ဒေသခံခရီးသွားလုပ်ငန်းလုပ်ကိုင်သူတွေက မျှော်လင့်လျက်ရှိနေကြပါတယ်။

ymg/kg
#Yangon_Media_Group

#Local_News
Published_ 26 March 2022

လှော်ကား ရေလှောင်ကန်သို့နေ့စဥ် ရေဂါလံ သန်း (၆၀) ဖြည့်ပေးနိုင်မည့် လှိုင်မြစ်-လှော်ကား ရေအားဖြည့်စီမံကိန်းဖွင့်ပွဲကို ယမန်နေ့နံနက်ပိုင်းတွင် မှော်ဘီမြို့နယ်ရှိ အဆိုပါ စီမံကိန်းနေရာ၌ ပြုလုပ်ခဲ့ကြောင်း သိရပါတယ်။

ရန်ကုန်မြို့တော်သို့ သောက်သုံးရေ လုံလောက်စွာပေးဝေနိုင်ရေးအတွက် လှိုင်မြစ်မှ ရေအား လှော်ကားရေလှောင်ကန်သို့ နေ့စဥ် ရေဂါလံ သန်း (၆၀) အား ဖြည့်ပေးနိုင်ရန် ရန်ကုန်မြို့တော်စည်ပင်သာယာရေးကော်မတီ ဆည်မြောင်းနှင့် ရေအသုံးချမှုစီမံခန့်ခွဲရေး ဦးစီးဌာနနှင့် ရန်ကုန်လျှပ်စစ်ဓာတ်အားပေးရေး ကော်ပိုရေးရှင်းဌာန (၃) ခုတို့ပူးပေါင်း၍ လှိုင်မြစ်- လှော်ကား ရေအားဖြည့်စီမံကိန်းအား ဆောင်ရွက်ခဲ့တာဖြစ်ပါတယ်။

ရန်ကုန်မြို့တော်စည်ပင်သာယာရေးကော်မတီမှ ဆောင်ရွက်သည့်လုပ်ငန်းများမှာ ရေစုကန် ၁ လုံး၊ အနည်စုဖွဲ့ကန် ၁ လုံး၊ အနည်ထိုင်ကန် ၁ လုံး၊ ဆေးခပ်စက်ရုံ ၁ လုံး၊ ရေကြည်စုကန် ၁ လုံး၊ ရေတွန်းစက်ရုံ ၁ လုံး၊ 500kw ၊ 20MGDရေတွန်းစက် - ၆ စုံ၊ တစ်ရက် ရေအားဖြည့်နိုင်မှု - ၆၀ ဂါလန်သန်း၊ 1600mmø HDPEပိုက်လိုင်း ၃.၂ မိုင်တို့ ဖြစ်ကြ ပါတယ်။

ဆည်မြောင်းနှင့် ရေအသုံးချမှုစီမံခန့်ခွဲရေး ဦးစီးဌာနမှဆောင်ရွက်သည့် လုပ်ငန်းများမှာ ရေပေးတူးမြောင်း ၅.၃၅ မိုင်၊ 30"ø MS မြစ်ရေတင်ပိုက်လိုင်း - ၆ လိုင်း၊ Barge. - ၃ စီး၊ 250 kwMotor &40 Cusec ရေတင်စက် ၆ စုံတို့ ဖြစ်ကြပါတယ်။ ရန်ကုန်လျှပ်စစ်ဓာတ်အားပေးရေး ကော်ပိုရေးရှင်းမှ ဆောင်ရွက်သည့်လုပ်ငန်းများမှာ ၃၃ ကေဗွီကောင်းကင်ဓာတ်အားလိုင်း ၂ လိုင်း ၉ မိုင်၊ ၃၃/ ၆.၆ ကေဗွီ ၊ ၄ အမ်ဗွီအေ Y. C. D. C ရေတွန်းစက်ဓာတ်အားခွဲရုံ ၁ ရုံ၊ ၃၃/ ၃.၃ ကေဗွီ ၂.၅ အမ်ဗွီအေ ကန်ကလေး လျှပ်စစ်မြစ်ရေတင်ဓာတ်အားခွဲရုံ ၁ ရုံ တို့ ဖြစ်ကြပါတယ်။

အကျိုးသက်ရောက်မှု နွေရာသီကာလလိုအပ်သည့် ရေပမာဏကို လှော်ကားရေလှောင်ကန်သို့အားဖြည့်ပေးနိုင်မှာ ဖြစ်ပါတယ်။ ယခုစီမံကိန်းကြီး ဆောင်ရွက်ခြင်းဖြင့် လှော်ကားရေလှောင်ကန်သို့ တစ်နေ့လျှင် ရေဂါလန် (၆၀) သန်း ဖြည့်တင်းပေးနိုင်သဖြင့် လှော်ကားရေလှောင်ကန်မှ ရေပေးဝေလျက်ရှိသော မြို့နယ်များအနေဖြင့် နေ့စဉ်ပုံမှန်ရေရရှိသည့် အကျိုးကျေးဇူးများကို ခံစားရမှာဖြစ်ပါတယ်။

ယခုစီမံကိန်းကို ၂၀၂၁ ခုနှစ် မေလ ၁၁ ရက်နေ့က စတင်ခဲ့ပြီးယနေ့ ယခုနှစ်မတ် ၂၅ တွင် ဖွင့်လှစ်နိုင်ခဲ့တဲ့အတွက် ဆောင်ရွက်ချိန် ၁၁ လခန့်ဖြင့် လုပ်ဆောင်ခဲ့ခြင်းဖြစ်ပါတယ်။

#ymg_mnn
#Yangon_Media_Group