#Local_News
Published _30 January 2023
ထိုင်းနိုင်ငံ ရနောင်းမြို့လူဝင်မှုကြီးကြပ်ရေးနှင့် ထိန်းသိမ်းရေးစခန်း (IDC) တွင် ထိန်းသိမ်းထားသော မြန်မာရွှေ့ပြောင်းအလုပ်သမားများ ဆန္ဒပြပြီးနောက် ရက်ပိုင်းအတွင်း ပြန်ပို့မည်ဟု ထိုင်းနိုင်ငံ ဘန်ကောက်မြို့ရှိ မြန်မာနိုင်ငံဆိုင်ရာ သံရုံးက ယနေ့ ဇန်နဝါရီလ ၃၀ ရက်တွင် ထုတ်ပြန်လိုက်သည်။
၎င်းတို့က ဇန်နဝါရီလ ၂၈ ရက်တွင် နေရပ်ပြန်လိုကြောင်း ထိန်းသိမ်းရေးစခန်းအတွင်း၌ ဆန္ဒပြခဲ့ကြသည့်အတွက် ဇန်နဝါရီလ ၂၉ ရက်တွင် မြန်မာသံရုံးမှ အလုပ်သမားသံအရာရှိ ဦးတင်အောင်က IDC မှ တာဝန်ရှိသူများ၊ ထိန်းသိမ်းခံထားရသည့် မြန်မာရွှေ့ပြောင်းလုပ်သားခေါင်းဆောင်များနှင့် သွားရောက်တွေ့ဆုံကာ ညှိနှိုင်းဖြေရှင်းခဲ့ကြောင်း ယင်း ထုတ်ပြန်ချက်တွင် ဖော်ပြထားသည်။
ယင်းကြောင့် ထိန်းသိမ်းထားသူ ၆၀၀ ဦးအနက် ဖေဖော်ဝါရီလ ၂ ရက်တွင် လူ ၂၂၀ ဦးကို ပြန်ပို့ပေးမည် ဖြစ်ပြီး ကျန်သူများအား ဖေဖော်ဝါရီလ ၈ ရက် နှင့် ၁၅ ရက်တို့တွင် ပြန်ပို့မည် ဖြစ်ကြောင်း ၊ ကော့သောင်းမြို့၊ မြို့နယ်အုပ်ချုပ်ရေးမှူးနှင့် ညှိနှိုင်းဆောင်ရွက်ခဲ့ပြီးဖြစ်ကြောင်း သိရသည်။
#ymg/mt
#Yangon_Media_Group
