#Local_News
Published_31 October2022

ရန်ကုန်တိုင်းဒေသကြီး၊ လှိုင်မြို့နယ်၊ အမှတ်(၁၂)ရပ်ကွက်၊ အောင်ဓမ္မရိပ်သာလမ်း၊ အိမ်အမှတ် (၄/၂၈-က) နေ အငြိမ်းစားဗိုလ်ချုပ် ဦးအုန်းသွင်နှင့် ၎င်း၏သားမက်ဖြစ်သူ ကိုရဲတေဇတို့အပါအဝင် အခြားသူများအား လုပ်ကြံခဲ့ကြသူများကို ဖမ်းဆီးမိကြောင်း နစက က ထုတ်ပြန်လိုက်သည်။

အငြိမ်းစားဗိုလ်ချုပ် ဦးအုန်းသွင်နှင့် ၎င်း၏သားမက်ဖြစ်သူ ကိုရဲတေဇတို့နှစ်ဦးမှာ စက်တင်ဘာလ ၂၄ ရက်၊ နေ့လယ်ပိုင်းကမြို့တွင်းမှ နေအိမ်သို့ မော်တော်ယာဉ်ဖြင့် ပြန်လာစဉ်နေအိမ်ရှေ့သို့အရောက်တွင် ပစ္စတိုဖြင့်လုပ်ကြံသတ်ဖြတ်ခြင်းကိုခံခဲ့ရခြင်းဖြစ်သည်။

အဆိုပါဖြစ်စဉ်နှင့်ပတ်သက်၍ အကြမ်းဖက်မှုကို မလိုလားသော ပြည်သူများ၏ သတင်းပေးမှု များကြောင့် တရားခံ ကျော်ကောင်းထက် (ခ)ကောင်းထက်(ခ)အောင်နိုင်မိုး ကို အောက်တိုဘာလ ၁ ရက်က ဗဟန်းမြို့နယ်၊ တက္ကသိုလ်ရိပ်သာလမ်း၊ ဖူဆန်တရုတ်ဘုံကျောင်းအနီး၌ ဖမ်းဆီးရမိခဲ့‌ကြောင်း ထုတ်ပြန်ချက်တွင်ဖော်ပြထားသည်။

ဖမ်းဆီးရမိသော ကျော်ကောင်းထက်(ခ)ကောင်းထက်(ခ)အောင်နိုင်မိုး၏ ထွက်ဆိုချက်အရ ရန်ကုန်တိုင်းဒေသကြီးအတွင်း အပြစ်မဲ့ပြည်သူများအား လုပ်ကြံ သတ်ဖြတ်မှုများတွင်ပါဝင်ခဲ့သည့် ဆက်စပ်တရားခံများဖြစ်ကြသည့် ဥက္ကာဖြိုး(ခ)ဖရန့်(ခ) အုပ်ကြီး၊ ဇင်မေလတ်(ခ)ရတီ(ခ)ဧပရယ်၊ သန်းထက်ဇင်(ခ)မိုးစက်၊ ညီညီချစ်ထူး(ခ)မိုင်း၊ ရွှန်းလဲ့ဝေ(ခ)ဟာနာ(ခ)နောဝိုင် တို့ကို ကမာရွတ်မြို့နယ်၊ ရန်ကုန်တက္ကသိုလ်ဝင်းအတွင်းရှိ တက္ကသိုလ်ရေကူးကန်၌လည်းကောင်း၊ နေရှိုင်း(ခ)ရှိုင်းထက်အား ဒဂုံမြို့သစ်(အရှေ့ပိုင်း)မြို့နယ်၊ စက်မှုလယ်ယာ(၃)လမ်း၊ အိမ်အမှတ်(၁၃၁၄)၌ အောက်တိုဘာလ ၂ ရက် နံနက်ပိုင်းကလည်းကောင်း၊ သန်းထွဋ်ပိုက်(ခ)ကိုစိုင်း(ခ)ဂျိုးမိုက်နှင့် ပန်းအိအိကျော်(ခ)အိန္ဒြာ တို့ကို ကမာရွတ်မြို့နယ်၊ အမှတ်(၂)ရပ်ကွက်၊ ပြည်လမ်းရှိ သုခကမ္ဘာဆေးရုံအနီး၌ အောက်တိုဘာလ ၃ ရက်တွင် လည်းကောင်း၊ ဇေယျာလင်းထက်(ခ) ဟန်လင်းထက်ကို သာကေတမြို့နယ်၊ အမှတ်(၂)တောင်ရပ်ကွက်၊ ဇောတာရုံလမ်း၌ အောက်တိုဘာလ ၆ ရက်တွင်လည်းကောင်း အသီးသီးဖမ်းဆီးရမိခဲ့ကြခြင်း ဖြစ်သည်။

ဖမ်းဆီးရမိသူများ၏ ထွက်ဆိုချက်အရ ယင်းတို့အနေဖြင့် အကြမ်းဖက်ဖောက်ခွဲရေးသင်တန်းများကိုရန်ကုန်တိုင်းဒေသကြီး၊လှိုင်မြို့နယ်၊ မာလာမြိုင်(၄)လမ်း၊ အိမ်အမှတ်(၉၆) တွင်လည်းကောင်း၊ စစ်ကိုင်းတိုင်းဒေသကြီး၊ မင်းကင်းမြို့နယ်၊ လောင်းပြည့်ရွာအနီး၌ မင်းကင်း PDF အဖွဲ့ထံတွင် လည်းကောင်း တက်ရောက်ခဲ့ကြကြောင်း၊ ဖမ်းဆီးရန်ကျန်နေသေးသည့် ကိုပိုင်(ခ)စစ်နိုင် ခေါင်းဆောင်၍ ဥက္ကာဖြိုး(ခ)ဖရန့်(ခ)အုပ်ကြီး၊ သန်းထက်ဇင်(ခ)မိုးစက်၊ ကျော်ကောင်းထက်(ခ)ကောင်းထက်(ခ)အောင်နိုင်မိုး၊ သန်းထွဋ်ပိုက်(ခ)ကိုစိုင်း(ခ) ဂျိုးမိုက်၊နေရှိုင်း(ခ)ရှိုင်းထက်၊ ဇေယျာလင်းထက်(ခ)ဟန်လင်းထက်၊ ညီညီချစ်ထူး (ခ)မိုင်း၊ရွှန်းလဲ့ဝေ(ခ)ဟာနာ(ခ)နောဝိုင်၊ဇင်မေလတ်(ခ)ရတီ(ခ)ဧပရယ်၊ ပန်းအိအိကျော် (ခ)အိန္ဒြာ ၊ သီဟ(ခ)ကူးပါး၊ ကိုထက်(ခ) ကိုဗန်၊ ကိုလင်း တို့ပါဝင်သော အဖွဲ့ဝင် ၁၄ ဦးဖြင့် ၂၀၂၁ ခုနှစ်၊ ဇူလိုင်လက ရန်ကုန်တိုင်းဒေသကြီးအတွင်း Inya Urban Force-IUF အဖွဲ့ကို ဖွဲ့စည်းခဲ့ကြောင်း ဖော်ထုတ်သိရှိရသည်ဟု နစက သတင်းထုတ်ပြန်ချက်တွင် ဖော်ပြထားသည်။

IUF အဖွဲ့အနေဖြင့် အများပြည်သူနှင့် သက်ဆိုင်သောနေရာများတွင် ဖောက်ခွဲမှု ၂ ကြိမ်ပြုလုပ်ခဲ့သည့်အပြင် ရန်ကင်းမြို့နယ်၊ ကန်ပတ်လမ်းနှင့် ရန်ကင်းလမ်းထောင့်ရှိ ယာဉ်ထိန်းရုံးကိုလက်လုပ်မိုင်း ၁ လုံးဖြင့် ပစ်ခတ်ခြင်း၊ ပန်းဘဲတန်း မြို့နယ်၊ ရွှေဘုံသာလမ်းနှင့် အနော်ရထာလမ်းထောင့်ရှိ ယာဉ်ထိန်းရုံးကို လက်လုပ်မိုင်း ၁ လုံးဖြင့် ပစ်ခတ်ဖောက်ခွဲခြင်းများပြုလုပ်ခဲ့ကြောင်းနှင့် လုပ်ကြံသတ်ဖြတ်မှု ၆ ကြိမ် ကျူးလွန်ခဲ့ကြောင်းလည်း ယင်းတွင် ဖော်ပြထားသည်။

ယင်းအပြင် ကြည့်မြင်တိုင်မြို့နယ်၊ မကျည်းတန်း(မြောက်)အရှေ့ရပ်ကွက်၊ ပန်းပင်ကြီးလမ်းနှင့် ဦးသီဟလမ်းထောင့်၌ ရာအိမ်မှူး ဒေါ်နှင်းနှင်းလှိုင် ၊စမ်းချောင်း မြို့နယ်၊ သီရိခေမာရပ်ကွက်၊ သီရိလမ်း၊ အိမ်အမှတ်(၇၇)ရှေ့ လမ်းမပေါ်၌ ရာအိမ်မှူး ဒေါ်ခင်သူဇာအောင်(ခ)ဒေါ်မေသူအောင်၊ ဒဂုံမြို့သစ်(မြောက်ပိုင်း)မြို့နယ်၊ အမှတ်(၃၁)ရပ်ကွက်၌ အပြစ်မဲ့ ပြည်သူ ဦးတင်မောင်အေး ၊လမ်းမတော်မြို့နယ်၊ မော်တင် ယာယီဈေးရပ်ကွက်၊ ကမ်းနားလမ်း၊ အောင်ကောင်းစံ စားသောက် ဆိုင်၌ ဗိုလ်မှူး ကုဋေဖြိုးအောင်နှင့် စိုင်းအောင်အောင်ဇော် ၊ ဗိုလ်တထောင်မြို့နယ်၊ အမှတ်(၇)ရပ်ကွက်၊ ဘိုကလေးဈေးအနီး၌ အမှတ်(၇) ရပ်ကွက်၊ ရပ်ကွက် အုပ်ချုပ်ရေးမှူး ဦးသန်းဝင်း(ခ)ဘော်ဘီ တို့ကိုလည်း လုပ်ကြံခဲ့ကြောင်း ဖမ်းဆီးရမိသူများ၏ ထွက်ဆိုချက်ကို ကိုးကား၍ သတင်းထုတ်ပြန်ထားခြင်း ဖြစ်သည်။

#ymg/mt
#Yangon_Media_Group

#World_News
Published 31 October 2022

ကုလသမဂ္ဂ၊ တူရကီနဲ့ ယူကရိန်းတို့ဟာ ယူကရိန်းစိုက်ပျိုးရေးထွက်ကုန်များအား ကမ္ဘာ့ဈေးကွက်သို့ တင်ပို့ခွင့်ရရှိမယ့် ပင်လယ်နက်ပိုင်းဂျုံတင်ပို့ရေးသဘောတူညီချက်ကို အကောင်အထည်ဖော်ဖို့ ရှေ့ဆက်လုပ်ဆောင်ခဲ့ကြပြီး သင်္ဘော ၁၆ စင်း ဖြတ်သန်းသွားလာရန် တနင်္လာနေ့မှာ သဘောတူညီခဲ့ကြပေမယ့် ရုရှားတို့ကတော့ အဆိုပါသဘောတူညီချက်ကနေ နှုတ်ထွက်သွားခဲ့ပါတယ်။

ဖေဖော်ဝါရီ ၂၄ ရက်နေ့က ယူကရိန်းကိုကျူးကျော်ခဲ့တဲ့ရုရှားဟာ ပင်လယ်နက်သဘောတူညီချက်ကနေ အကန့်အသတ်မဲ့ရပ်ဆိုင်းလိုက်ကာ ရုရှားရဲ့ပင်လယ်နက်သင်္ဘောကြီးတိုက်ခိုက်ခံရပြီးနောက် အဆိုပါသဘောတူညီချက်အရ ဖြတ်သန်းသွားလာနေတဲ့ အရပ်သားသင်္ဘောတွေရဲ့ လုံခြုံရေးအတွက် အာမမခံနိုင်ကြောင်း ဆိုလိုက်ပါတယ်။
ရုရှားရဲ့နှုတ်ထွက်မှုကြောင့် ယူကရိန်း၊ နေတိုး(NATO)၊ ကုလသမဂ္ဂနဲ့ အမေရိကန်တို့က ဝေဖန်လာကြပါတယ်။

ကုလအထွေထွေအတွင်းရေးမှူးချုပ် 'အန်တိုနီယိုဂူတာရက်စ်'က ရုရှားရဲ့နှုတ်ထွက်မှုကို စိုးရိမ်မိပြီး တစ်ကမ္ဘာလုံးဆိုင်ရာ စားနပ်ရိက္ခာအကြပ်အတည်းကို ဖြေရှင်းနိုင်ရန် နိုင်ငံခြားသင်္ဘောသွားလာမှုတွေကို အချိန်ဆွဲထားကာ သဘောတူညီချက် ပြန်လည်အထမြောက်လာစေရန် ဆောင်ရွက်ခဲ့ကြောင်း ပြောရေးဆိုခွင့်ရပုဂ္ဂိုလ်တစ်ဦးက ပြောပြခဲ့ပါတယ်။

ရုရှားနဲ့ယူကရိန်းတို့ဟာ ကမ္ဘာပေါ်မှာ ဂျုံတင်ပို့ရာအဓိကနိုင်ငံကြီးတွေဖြစ်တဲ့အလျောက် ရုရှားနှုတ်ထွက်မှုကြောင့် နောက်ကာလအပိုင်းအခြားအတွင်း ချီကာဂိုဂျုံဈေးနှုန်းက ၅ ရာခိုင်နှုန်းကျော်မြင့်တက်လာပါတယ်။

ဇူလိုင်လကတည်းက ပြောင်း၊ ဂျုံ၊ နေကြာထွက်ကုန်များ၊ မုယောစပါး၊ မုဒုံ၊ ပဲပိစပ် စတဲ့ ကုန်ပစ္စည်းပေါင်း တန်ချိန် ၉.၅ သန်းကျော်ကို တင်ပို့ထားပြီးဖြစ်ပါတယ်။

ကုလသမဂ္ဂ၊ တူရကီ၊ ရုရှား၊ ယူကရိန်းအရာရှိများ သဘောတူထားတဲ့ ပူးပေါင်းလုပ်ဆောင်ရေးစင်တာ(JCC)အရ သင်္ဘောများစစ်ဆေးခြင်းနဲ့ သွားလာခွင့်တို့ကို သဘောတူညီထားပါတယ်။

ပင်လယ်ရေကြောင်းဆိုင်ရာ လူသားချင်းစာနာမှုအစီအစဉ်အောက်မှာ တနင်္ဂနွေနေ့က ဘယ်သင်္ဘောမှ သွားလာခြင်းမရှိခဲ့ပါဘူး။

ဒါပေမဲ့ ကုလရဲ့ထုတ်ပြန်ချက်အရ တနင်္လာနေ့မှာ သင်္ဘောအထွက် ၁၂ စင်း၊ အဝင် ၄ စင်သွားလာခွင့်အတွက် ယူကရိန်းနဲ့တူရကီတို့ သဘောတူညီခဲ့ကြပါတယ်။

JCC မှ ရုရှားအရာရှိများရဲ့ထုတ်ပြန်ချက်မှာတော့ သင်္ဘောများ ဘေးကင်းစွာသွားလာရေးအတွက် သက်ဆိုင်ရာစစ်တပ်များ၊ အာဏာပိုင်များနဲ့ ပူးပေါင်းဆောင်ရွက်သင့်ကြောင်း ဖော်ပြထားပါတယ်။

တနင်္လာနေ့ ဖြတ်သန်းသွားလာမယ့်အစီအစဉ်ကိုတော့ ရုရှားတို့ဘက်က တုံ့ပြန်ခြင်းမရှိသေးပါဘူး။

တူရကီကာကွယ်ရေးဝန်ကြီး'ဟူလူစီအေကာ'က ရုရှားနဲ့ယူကရိန်းကာကွယ်ရေးဝန်ကြီးတို့နဲ့ ဆက်သွယ်ကာ သဘောတူညီချက်ကို ကြိုးစားထိန်းသိမ်းပေးဖို့နဲ့ ရန်စခြင်းမပြုကြဖို့ တိုက်တွန်းလိုက်ပါတယ်။

နေတိုးနဲ့ ဥရောပသမဂ္ဂတို့က ရုရှားအနေနဲ့ ဆုံးဖြတ်ချက်ကို ပြန်လည်စဉ်းစားဖို့ တိုက်တွန်းလိုက်ပြီး အမေရိကန်တို့ကတော့ ရုရှားဟာ စားနပ်ရိက္ခာကို လက်နက်နဲ့အနိုင်ကျင့်နေတယ်လို့ စွပ်စွဲလိုက်ပါတယ်။

Source: Reuters
#Yangon_Media_Group

#Local_News
Published_ 31 october 2022

မန္တလေးတိုင်း၊ ပျော်ဘွယ်မြို့၊ မင်းလမ်းကျေးရွာအုပ်စုရှိ တောင်ကြီး-ပျော်ဘွယ်သွားကားလမ်းမကြီးပေါ်တွင် အောက်တို ဘာလ ၃၀ ရက်၊ ညပိုင်းက လမ်းဘေး၌ ရပ်ထားသည့် ၁၀ဘီးကားအား လိုက်ထရပ်ကားမှ ဝင်တိုက်သည့် ဖြစ်စဉ် ဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့ဌာနချုပ်မှ သိရသည်။

ယမန်နေ့ ည ၇ နာရီ ၅၄ မိနစ်ခန့်တွင် တောင်ကြီး- ပျော်ဘွယ်သွားကားလမ်းမကြီးပေါ်၌ TOYOACE လိုက်ထရပ်(အဖြူရောင်) ကားသည် အခင်းဖြစ်နေရာအရောက် အရှိန်မထိန်းနိုင်ဘဲ လမ်းဘေးတွင် စက်ပျက်၍ရပ်ထားသည့် NISSAN DIESEL (အဖြူရောင်) ၁၀ ဘီးကားအား အနောက်က ဝင်တိုက်မိခဲ့သည်။

ယင်းကဲ့သို့ တိုက်မိမှုကြောင့် လိုက်ထရပ် ကားခေါင်းခန်းအတွင်း လူညပ်နေကြောင်းသတင်းအရ ပျော်ဘွယ်မြို့နယ်မီးသတ်စခန်းတပ်ဖွဲ့ဝင်များနှင့် လူမှုကူညီရေးအသင်းများမှ ကယ်ဆယ်ရေးလုပ်ငန်းများပြုလုပ်ခဲ့ကြသည်။

ကားခေါင်းခန်းအတွင်းညပ်နေသူအား ကယ်ထုတ်နိုင်ခဲ့ပြီး ထိခိုက်ဒဏ်ရာများရရှိနေသောကြောင့် အလင်းရောင်လူမှုကူညီရေးအသင်းကားဖြင့် ပျော်ဘွယ်မြို့နယ်ပြည်သူ့ဆေးရုံကြီးသို့ ပို့ဆောင်ပေးခဲ့ကြကြောင်း သိရှိရသည်။

#ymg/NN
#Yangon_Media _Group

#Local_News
Published_ 31 October 2022

တရုတ်နိုင်ငံ ကျေးလက်ဖွံ့ဖြိုးတိုးတက်ရေးဖောင်ဒေးရှင်း (CFRD) မြန်မာနိုင်ငံရုံးခန်းဖွင့်လှစ်ခြင်း ၇ နှစ်ပြည့် ခြုံငုံသုံးသပ်ကူးလူးဖလှယ်ပွဲကို အောက်တိုဘာလ ၂၈ ရက်နေ့တွင် ရန်ကုန်မြို့၌ကျင်းပခဲ့ပြီး အပြည်​ြပည်ဆိုင်ရာ ပူးပေါင်းဆောင်ရွက်ရေး ဝန်ကြီး ဦးကိုကိုလှိုင်၊ တရုတ်သံရုံး သံမှူးကြီး Ms. Cao Jing နှင့် တာဝန်ရှိသူများ တက်ရောက်ခဲ့ပါတယ်။

သံမှူးကြီး Ms. Cao Jing က ဖောင်ဒေးရှင်းသည် မြန်မာနိုင်ငံတွင် အရည်အသွေးမြင့် ပညာရေး၊ စားနပ်ရိက္ခာဖူလုံရေး၊ ရေအရင်းအမြစ်သန့်ရှင်းရေးစသည့် ပြည်သူ့အကျိုးပြုနယ်ပယ်တွင် စီမံကိန်းများစွာ ဖော်ဆောင်ခဲ့ခြင်းကို ချီးကျူးလိုက်ပြီး ဖောင်ဒေးရှင်းလုပ်ဆောင်သည့်လုပ်ငန်းများသည် တရုတ်နိုင်ငံနယ်ပယ်အသီးသီးက မြန်မာနိုင်ငံ ပြည်သူလူနေမှုဘဝအကျိုးပြုမှုအား ဂရုပြုထောက်ခံအားပေးမှု၏ ပုံရိပ်ငယ်ဖြစ်ကြောင်း၊ ကြာရှည်သည့်ကာလအတွင်း၌ တရုတ်နိုင်ငံသည် မြန်မာနိုင်ငံ၌ ဆေးရုံ၊ စာသင်ကျောင်း၊ အားကစားရုံများကို ကူညီတည်ဆောက်ပေးခဲ့ပြီး တရုတ်-မြန်မာချစ်ကြည်ရေး ပညာသင်ထောက်ပံ့ဆုများချီးမြှင့်ကာ ဖွံ့ဖြိုးတိုးတက်မှုနှင့် ဆင်းရဲနွမ်းပါးမှုပပျောက်ရေးစီမံကိန်းများဖော်ဆောင်ခဲ့ကြောင်း၊ ကိုဗစ်-၁၉ ကပ်ရောဂါဖြစ်ပွားပြီးနောက် တရုတ်နိုင်ငံက မြန်မာနိုင်ငံ ကပ်ရောဂါတိုက်ဖျက်ရေးအတွက် ကူညီမှုများ တက်တက်ကြွကြွပေးခဲ့ပြီး မြန်မာပြည်သူများအတွက် အသက်ကျန်းမာရေး ကာကွယ်ရေးလိုင်း တည်ဆောက်ပေးလိုက်ကြောင်း၊ မကြာသေးမီက အောင်မြင်စွာ ကျင်းပပြီးစီးသွားသည့် တရုတ်ကွန်မြူနစ်ပါတီ (၂၀) ကြိမ်မြောက် နိုင်ငံလုံးဆိုင်ရာပါတီညီလာခံတွင် အထွေထွေအတွင်းရေးမှူးချုပ် Xi Jinping က ပြည်သူကိုဗဟိုပြုသည့် ဖွံ့ဖြိုးတိုးတက်မှုအတွေးအခေါ်ကို စွဲမြဲစွာကိုင်စွဲ၍ ခေတ်မီတည်ဆောက်မှုရလဒ်ကို ပြည်သူတစ်ရပ်လုံးထံ ပိုမိုတရားမျှတစွာ အကျိုးပြုစေပြီး တစ်ချိန်တည်းတွင် နိုင်ငံအသီးသီးပြည်သူများ၏ ယေဘုယျဂရုပြုမှုကိုလည်း တုံ့ပြန်ကာ လူသားတို့ရင်ဆိုင်ရမည့် ဘုံပြဿနာများဖြေရှင်းရေးအတွက် အကျိုးထမ်းဆောင်ပေးရမည်ဟု အကြိမ်များစွာ အလေးထားပြောကြားခဲ့ပါတယ်။

ထို့ပြင် မြန်မာနိုင်ငံ၏ ဆွေမျိုးပေါက်ဖော်ညီအစ်ကိုနှင့် ချစ်ကြည်ရင်းနှီးသည့် အိမ်နီးချင်းနိုင်ငံအနေဖြင့် တရုတ်နိုင်ငံက မြန်မာပြည်သူတစ်ရပ်လုံးအပေါ် ချစ်ကြည်ရင်းနှီးသည့် မူဝါဒကို အမြဲတစေကိုင်စွဲထားပြီး မြန်မာပြည်သူများနှင့်အတူ ဖွံ့ဖြိုးတိုးတက်မှုရလဒ်များ အတူမျှဝေကြောင်း၊ မိမိတို့သည် မြန်မာနိုင်ငံနှင့်အတူ သမ္မတကြီး Xi Jinping ၏ မြန်မာနိုင်ငံခရီးစဉ်သဘောတူညီချက်များကို ဆက်လက်တက်တက်ကြွကြွ အကောင်အထည်ဖော်ကာ တရုတ်ပုံစံခေတ်မီမှုနှင့် ဖွံ့ဖြိုးတိုးတက်မှုအသစ်ဖြင့် မြန်မာနိုင်ငံအပါအဝင် ကမ္ဘာ့နိုင်ငံအသီးသီးအတွက် အခွင့်အလမ်းအသစ်များ ထောက်ပံ့ပေးကာ “Belt and Road” နှင့် တရုတ်-မြန်မာစီးပွားရေးစင်္ကြံ အတူတည်ဆောက်မှုကို အဓိကထားခြင်းဖြင့် နယ်ပယ်အသီးသီးလက်တွေ့ကျ ပူးပေါင်းဆောင်ရွက်မှုကိုနက်ရှိုင်းစေကာ တရုတ်-မြန်မာချစ်ကြည်ရင်းနှီးစွာ ပူးပေါင်းဆောင်ရွက်မှုရလဒ်ကို နှစ်နိုင်ငံပြည်သူများအတွက် ပိုမိုကောင်းမွန်စွာ အကျိုးပြုစေမည်ဖြစ်ကြောင်း ပြောကြားခဲ့ပါတယ်။

အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာန ဝန်ကြီး ဦးကိုကိုလှိုင်က မြန်မာ-တရုတ် သံတမန်ဆက်ဆံရေး ထူထောင်သည့် နှစ် ၇၀ ကျော်အတွင်း၌ နှစ်နိုင်ငံသည် အပြန်အလှန်လေးစားကာ အပြန်အလှန်ထောက်ခံအားပေးပြီး ဆွေမျိုးပေါက်ဖော်သံယောဇဉ် နက်ရှိုင်းလှကြောင်း၊ တရုတ်နိုင်ငံသည် မြန်မာနိုင်ငံအား ကူညီမှုအများအပြားပေးခဲ့ကြောင်း၊ CFRD ဖောင်ဒေးရှင်း၏ စီမံကိန်း ၁၄ ခုသည် မြန်မာပြည်သူပေါင်း ၄၉၀၀၀၀ ကျော်ကို အကျိုးခံစားရစေတယ်လို့ ဆိုပါတယ်။

အခမ်းအနားတွင် ပွဲတက်ဧည့်သည်တော်များက မြန်မာကျောင်းသား ကျောင်းသူများအတွက် Panda Pack များချီးမြှင့်ခဲ့ကြပါတယ်။

#ymg_mnn
#Yangon_Media_Group

#Local_News
Published_ 31 October 2022

ဧရာဝတီတိုင်းဒေသကြီး ပုသိမ်စက်မှုမြို့တော်ဆိပ်ကမ်းမှ ပထမဆုံးအကြိမ်အဖြစ် ဆန်တန်ချိန် ၂၆၅၀ ကို အောက်တိုဘာ ၂၈ ရက်က စ၍ MV MCL-7 ပင်လယ်ကူး သင်္ဘောဖြင့် တိုက်ရိုက်တင်ပို့ရန် ဆောင်ရွက်နေကြောင်း သိရပါတယ်။

စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနနှင့် ဘင်္ဂလားဒေ့ရှ်နိုင်ငံတို့ကြား ဆန်ရောင်းဝယ်မှုဆိုင်ရာ G to G သဘောတူစာချုပ်အရ ဆန်တန်ချိန် နှစ်သိန်းတင်ပို့ နေတာ ဖြစ်ပါတယ်။

မြန်မာနိုင်ငံနှင့်ဘ င်္ဂလားဒေ့ရှ်နိုင်ငံတို့အကြား ဆန်တန်ချိန် နှစ်သိန်းတင်ပို့ရန် G to G သဘောတူစာချုပ် ချုပ်ဆိုထားပြီး ပုသိမ်စက်မှုမြို့တော် ဆိပ်ကမ်းမှ ဆန်တန်ချိန် သုံးသောင်းမှ ငါးသောင်းတင်ပို့ရန် လျာထားဆောင်ရွက်လျက်ရှိရာ အောက်တိုဘာ ၂၈ ရက်မှစ၍ ဧည့်မထဆန် (၅မတ်) 50kg ဆန် တန်ချိန် ၂၆၅၀ ကို စတင်၍ သင်္ဘောတင်နေခြင်းဖြစ်ပါတယ်။

ပုသိမ်စက်မှုမြို့တော်ဆိပ်ကမ်းမှ ဆန်တန်ချိန် ၂၆၅၀ ကို အောက်တိုဘာ ၃၁ ရက်နေ့အပြီး တင်ဆောင်ပြီးပါက ဘင်္ဂလားဒေ့ရှ်နိုင်ငံသို့ MV MCL-7 ကုန်တင်သင်္ဘော ထွက်ခွာမည်ဖြစ်ကာ သင်္ဘောများ တစ်စီးဝင် တစ်စီးထွက်စနစ်ဖြင့် ဆက်လက် တင်ပို့သွားမှာ ဖြစ်ကြောင်း သိရပါတယ်။

#ygm_mnn
#Yangon_Media_Group

#Local_News
Published_ 31 October 2022

အောက်တိုဘာလတွင် ပဲခူးတိုင်းဒေသကြီးသို့ နိုင်ငံခြားရင်းနှီးမြှုပ်နှံမှု အမေရိကန် ဒေါ်လာ ၄၁ ဒသမ ၅၀၅ သန်း တိုးတက်ဝင်ရောက်ခဲ့ကြောင်း ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်းရဲ့ ပြောကြားချက်အရ သိရပါတယ်။

ပဲခူးတိုင်း၌ ၂၀၂၁ ခုနှစ် ဖေဖော်ဝါရီ (၁) ရက်မှ ယနေ့အထိ နိုင်ငံခြားရင်းနှီးမြှုပ်နှံမှု စုစုပေါင်း အမေရိကန်ဒေါ်လာ ၁၃၂ ဒသမ ၉၂၆ သန်းနှင့် ပြည်တွင်း မြန်မာနိုင်ငံသား ရင်းနှီးမြှုပ်နှံမှု စုစုပေါင်းငွေကျပ် ၆၄၉၀၈ ဒသမ ၂၁၅ သန်း ရှိပြီ ဖြစ်ပါတယ်။

ထပ်မံလာရောက် ရင်းနှီးမြှုပ်နှံလိုသူများအတွက် လူ့စွမ်းအားအရင်းအမြစ် ပေါကြွယ်မှုရှိခြင်း၊ အလုပ်ရှင် အလုပ်သမား ပြဿနာ ကင်းရှင်းခြင်း၊ မြေနေရာကျယ်ဝန်း ခြင်း၊ လမ်းပန်းဆက်သွယ်ရေး ကောင်းမွန်ခြင်း၊ ရင်းနှီးမြှုပ်နှံမှု လုပ်ငန်းများ တိုးချဲ့နိုင်ရေး အားပေးနေခြင်းနှင့် အေးချမ်းတည်ငြိမ်ခြင်း စတဲ့အခွင့်အလမ်းကောင်းများကို ရရှိနိုင်တယ် လို့ ဝန်ကြီးချုပ်က ဆိုပါတယ်။

အောက်တိုဘာ ၂၈ ရက်က ပဲခူးတိုင်းဒေသကြီး အစိုးရအဖွဲ့ရုံး၌ ကျင်းပသည့် တိုင်းဒေသကြီးရင်းနှီးမြှုပ်နှံမှုကော်မတီ လုပ်ငန်းညှိနှိုင်း အစည်းအဝေးတွင် တိုင်းဒေသကြီး ဝန်ကြီးချုပ်က ရင်းနှီးမြှုပ်နှံလိုသူများကို ဖိတ်ခေါ်ပြောကြားခဲ့တာ ဖြစ်ပါတယ်။

အဆိုပါအစည်းအဝေးတွင် ပဲခူးတိုင်းဒေသကြီးအတွင်း ရင်းနှီးမြှုပ်နှံမှု ထပ်မံတိုးချဲ့ခြင်းစက်ရုံ (၂) ရုံနှင့် ကုန်ပစ္စည်းထပ်မံမှာယူခြင်းစက်ရုံ (၁) ရုံ၊ တည်ဆောက်ရေးကာလ သက်တမ်းတိုး စက်ရုံ (၁) ရုံနှင့် စက်ရုံအဆောက်အဦ တိုးချဲ့ခြင်း စက်ရုံ (၁) ရုံတို့၏ အချက်အလက်များကို ရှင်းလင်းတင်ပြပြီး ဝန်ကြီးချုပ်က လိုအပ်သည်များကို ဥပဒေ၊ လုပ်ထုံးလုပ်နည်းများနှင့်အညီ ဆောင်ရွက်ပေးခဲ့ကြောင်း သိရပါတယ်။

၂၀၂၁ ခုနှစ် ဖေဖော်ဝါရီ (၁) ရက်မှ ယနေ့အထိ ပဲခူးတိုင်းဒေသကြီးအတွင်းရှိ ပြည်တွင်းပြည်ပ ရင်းနှီးမြှုပ်နှံမှု လုပ်ငန်းများတွင် လူဦးရေ ၇၅၁၈ ဦးကို အလုပ်အကိုင် အခွင့်အလမ်း ဖန်တီးပေးနိုင်ခဲ့ကြောင်း သတင်းရရှိပါတယ်။

#ygm_mnn
#Yangon_Media_Group