#Local_News
Published_4 July 2022

မြန်မာအလုပ်သမားအသစ် ၁၃၆ ဦး တောင်ကိုရီးယားသို့ ထပ်မံသွားရောက်ခွင့်ရမည်ဖြစ်ကြောင်း ပြည်ပအလုပ်အကိုင်အေဂျင်စီ၏ ထုတ်ပြန်သည့် စာရင်းများအရ သိရသည်။

အဆိုပါ အလုပ်သမားများအနေဖြင့် ဒဂုံမြို့သစ်(မြောက်ပိုင်း)ရှိ ပင်လုံခန်းမသို့ ဇူလိုင်လ ၁၃ရက်တွင် အာမခံကြေး၊ ဝန်ဆောင်ခစရိတ်၊ လေယာဉ်လက်မှတ်ပေးသွင်းခြင်းနှင့် အကြိုသင်တန်းတက်ရောက်ကြရန်သွားရောက်ကြရမည်ဟု အဆိုပါ စာရင်းများတွင် ဖော်ပြထားသည်။

ယင်းအလုပ်သမားများမှာ ကိုရီးယားနိုင်ငံသို့သွားရောက်မည့် အလုပ်သမားအသစ်များဖြစ်ကြောင်း၊ ဇူလိုင်လ မကုန်မီသွားရောက်ကြရမည့်သူများဖြစ်ကြောင်းလည်း သိရသည်။

လက်ရှိတွင် တောင်ကိုရီးယားနိုင်ငံ၌ မြန်မာလုပ်သား ၄၀၀၀၀ ကျော် တရားဝင် သွားရောက်လုပ်ကိုင်နေကြောင်း အလုပ်သမားဝန်ကြီးဌာနက သိရသည်။

ymg/mt
#Yangon_Media_Group

#Local_News
Published - 4 July 2022

ပြင်ပမှ လိုင်စင်ရဘဏ်များသို့ ဝင်လာသည့် နိုင်ငံခြားသုံးငွေများကို တစ်ရက်အတွင်း မြန်မာကျပ်ငွေဖြင့် လဲလှယ်ရမည်ဆိုသော ညွန်ကြားချက်တွင် အကျုံးမဝင်သည့် မြန်မာ့နိုင်ငံခြားကုန်သွယ်မှုဘဏ်များနှင့် အထူးစီးပွားရေးဇုန်စီမံခန့်ခွဲမှုကော်မတီများကို ဗဟိုဘဏ်မှ ထုတ်ပြန်ကြေညာထားသည်။

နိုင်ငံခြားသုံးငွေကြီးကြပ်မှု ကော်မတီအစည်းအဝေး အမှတ်စဉ် ၂၆/၂၀၂၂ နှင့် ၂၇/၂၀၂၂ ဆွေးနွေးဆုံးဖြတ်ချက်အရ Woori Bank Representative Office ၏ မြန်မာ့နိုင်ငံခြား ကုန်သွယ်မှုဘဏ်တွင် ဖွင့်လှစ်ထားရှိသည့် နိုင်ငံခြားငွေစာရင်းရှိ နိုင်ငံခြားငွေများ၊ အထူးစီးပွားရေးဇုန် စီမံခန့်ခွဲမှုကော်မတီများနှင့် ၎င်းအောက်ရှိ ကုမ္ပဏီများဖြစ်သည့် သီလဝါအထူးစီးပွားရေးဇုန် စီမံခန့်ခွဲမှုကော်မတီ ကုမ္ပဏီလီမိတက်၊ ကျောက်ဖြူ သီလဝါ အထူးစီးပွားရေးဇုန် ရေနက်ဆိပ်ကမ်း ကုမ္ပဏီလီမိတက်နှင့် ထားဝယ် အထူးစီးပွားရေးဇုန်စီမံခန့်ခွဲမှုကော်မတီ ကုမ္ပဏီလီမိတက်တို၏ သက်ဆိုင်ရာနိုင်ငံခြားငွေစာရင်းမှနိုင်ငံခြားငွေများ၊ အိန္ဒိယနိုင်ငံပိုကုန်သွင်းကုန်ဘဏ်၊ China National Oil Corporation – CNUOC ( Myanmar Branch) နှင့် Panjab National Bank Yangon Representative Office တို အကျုံးဝင်ခြင်း မရှိကြောင်း ဖော်ပြထားသည်။

ပြည်တွင်း၌ နေထိုင်သူများသည် ပြည်ပမှ နိုင်ငံခြားသုံးငွေဖြင့် ဝင်လာသည့် ဝင်ငွေများကို တစ်ရက်အတွင်း မြန်မာကျပ်ငွေဖြင့် လဲလှယ်ရမည်ဖြစ်ပြီး ပြည်ပမှ ဝင်လာသည့် နိုင်ငံခြားသုံးငွေများကို အမေရိကန် တစ်ဒေါ်လာလျှင် ကျပ် ၁၈၅၀ ဖြင့် လဲလှယ်ရမည်ဟု ဗဟိုဘဏ်မှ ထုတ်ပြန်ကြေညာထားသည်။

ပြင်ပမှ လိုင်စင်ရဘဏ်များသို့ ဝင်လာသည့် နိုင်ငံခြားသုံးငွေများကို တစ်ရက်အတွင်း မြန်မာကျပ်ငွေဖြင့် လဲလှယ်ရမည်ဆိုသော ညွန်ကြားချက်တွင် အကျုံးမဝင်သည့် လုပ်ငန်းများ ၊ အဖွဲ့အစည်းများ၊ ဖွံ့ဖြိုးရေး အေဂျင်စီများကို ဗဟိုဘဏ်မှ ဧပြီလ ၂၀ ရက် ရက်စွဲဖြင့် တစ်ကြိမ်ထုတ်ပြန်ခဲ့ပြီးဖြစ်ကြောင်း သိရသည်။

ymg/sth
#Yangon_Media_Group

#Local_News
Published_4 July 2022

ရန်ကုန်တိုင်းဒေသကြီး၊ ရွှေပြည်သာမြို့နယ်၊ (၅)ရပ်ကွက်၊ ပတ္တမြားလမ်းတွင် ယနေ့ နံနက် ၁၀ နာရီ ၁၀ မိနစ်ခန့်က ဖြစ်ပွားခဲ့သော ဆောက်လက်စတိုက်ပြိုကျမှုကြောင့်၇ ဦးဒဏ်ရာရသည့်အနက် နှစ်ဦးမှာ စိုးရိမ်ရကြောင်း မြန်မာနိုင်ငံမီးသတ်တပ်ဖွဲ့က သိရသည်။

"မြန်မာနိုင်ငံမီးသတ်တပ်ဖွဲ့ဌာနချုပ်အနေနဲ့ ရှာဖွေကယ်ဆယ်ရေးယာဉ်တွေနဲ့ ရှာဖွေကယ်ဆယ်ရေး(အထူး)တပ်ဖွဲ့ဝင်တွေက လုပ်ဆောင်ခဲ့ပါတယ်။ ရွှေပြည်သာမြို့နယ် မီးသတ်စခန်းကလည်း ရှာဖွေကယ်ဆယ်ရေးတပ်ဖွဲ့ဝင်တွေ သွားရောက်ခဲ့ကြပါတယ်။ ရပ်ကွက်ဒေသခံတွေ နဲ့ We Love Care လူမှုကူညီရေးအသင်းကလည်း ကူညီမှုတွေ လုပ်ခဲ့ပါတယ်"ဟု မြန်မာနိုင်ငံမီးသတ်တပ်ဖွဲ့တာဝန်ရှိသူကပြောသည်။

ပြိုကျခဲ့သည်မှာ ဆောက်လုပ်ဆဲ (၂၀x၆၀) ပေ Steel Structure (၂) ထပ် အဆောက်အဦ၏ အနောက်ဘက်အခြမ်း ပေ(၂၀)ခန့်ဖြစ်ပြီး ယင်းကြောင့် ဆောက်လုပ်ရေးလုပ်ငန်းလုပ်ကိုင်နေသော ကျား(၆)ဦး၊ မ(၁)ဦး စုစုပေါင်း(၇)ဦး ထိခိုက်ဒဏ်ရာရရှိခဲ့ကြောင်း၊ အဆိုပါ ထိခိုက်ဒဏ်ရာရှိသူ (၇)ဦးအား ပတ်ဝန်းကျင်နေ ပြည်သူများမှ ကူညီကယ်ဆယ်ခဲ့ပြီး ကျား(၁)ဦး၊ မ(၁)ဦး (စိုးရိမ်ရ) အား အင်းစိန်ပြည်သူ့ဆေးရုံသို့လည်းကောင်း၊ ကျန် ကျား(၅)ဦး (မစိုးရိမ်ရ)အား ရန်ကုန်ပြည်သူ့ဆေးရုံကြီးသို့လည်းကောင်း We Love Care လူမှုကူညီရေးအသင်းမှ သူနာတင်ယာဉ်ဖြင့် ပို့ဆောင်ပေးခဲ့ကြောင်း သိရသည်။

ymg/mt
#Yangon_Media_Group

#Local_News
Published _ 4 July 2022

စက်သုံးဆီ အမျိုးမျိုးကို ပြည်တွင်း၌ ပိုမိုထုတ်လုပ်နိုင်ရေးအား အလေးထားလုပ် ဆောင်ကြရန် အမှတ် (၁) ရေနံချက် စက်ရုံ(သန်လျင်)မှ တာဝန်ရှိသူများကို လျှပ်စစ်စွမ်းအားဝန်ကြီးဌာနနှင့် စွမ်းအင်ဝန်ကြီးဌာန ပြည်ထောင်စုဝန်ကြီးက မှာကြားခဲ့သည်။

ဇူလိုင်လ ၃ရက်က ယင်းစက်ရုံသို့ သွားရောက်ကြည့်ရှုစဉ် ယခုလို ပြောကြားခဲ့ခြင်းဖြစ်သည်။

"စက်သုံးဆီ အမျိုးမျိုးကို ပြည်တွင်း၌ ပိုမိုတိုးတက်ထုတ်လုပ်နိုင်ရေး ဆောင်ရွက်သွားရန် လိုအပ်ပါတယ်။ ရင်းနှီးမြှုပ်နှံသူတွေကိုလည်း ထပ်မံဖိတ်ခေါ်သွားဖို့ လိုပါတယ်" ဟု ဝန်ကြီးဦးသောင်းဟန်က ပြောသည်။

ယင်းပြင် သန်လျင်ရေနံချက်စက်ရုံ ဆိပ်ကမ်းတွင် ရေနံစိမ်းသင်္ဘောများ ဆိုက်ကပ်နိုင်မည့် အခြေအနေကိုလည်း သက်ဆိုင်ရာဝန်ကြီးဌာနများနှင့် ပူးပေါင်းလေ့လာ၍ တင် ပြသွားရန် ဖြစ်ကြောင်းမှာကြားခဲ့သည်။

Mono-grade အဆင့်မှ Multi-grade အ ဆင့်ရှိသော စက်ဆီ၊ ချောဆီများ ထုတ်လုပ်ဖြန့်ဖြူးပေးနိုင်ရေး ဆောင်ရွက်သွားရမည်ဖြစ်ပြီး စီးပွားရေးတွက်ချေကိုက်မှုရှိစေရေးအတွက် ပုဂ္ဂလိကလုပ်ငန်းရှင်များအနေဖြင့် ပြည်ပမှကုန်ကြမ်းတင်သွင်းကာ ဝန်ဆောင်ခ ပေးချေသောစနစ်ဖြင့် စက်ဆီ၊ ချောဆီရော စပ်ထုတ်လုပ်ဖြန့်ဖြူးခြင်းကိုလည်း ဖိတ်ခေါ်ဆောင်ရွက်သွားမည်ဟု ယင်းမှသိရသည်။

ymg/NN
#Yangon_Media_Group

#Local_News
Published - 4 July 2022

စက်သုံးဆီဈေးကြောင့် အဝေးပြေးခရီးသည်တင်ယာဉ်လိုင်းများတွင်ယာဉ်စီးခတိုးမြှင့်ထားသော်လည်း ပုံမှန်အတိုင်းပြေးဆွဲပေးနေကြောင်း YRTC မှ သိရသည်။

အဆိုပါ ယာဉ်စီးခဈေးနှုန်းကို နှစ်ဆ၊ သုံးဆမြင့်တက်သွားခြင်းမျိုးမဟုတ်ပဲ ယခင်ကောက်ခံသည့်နှုန်းထားထက် ၅၀၀ ကျပ်မှ ၂၀၀၀ ကျပ်အထိသာ တိုးမြှင့်ကောက်ခံခြင်းဖြစ်ကြောင်း သိရသည်။

ယင်းအပြင် စက်သုံးဆီစျေးမြင့်တက်နေမှုကြောင့် အဝေးပြေးခရီးသည်တင်ယာဥ်လိုင်းပြေးဆွဲမှုကိုရပ်နားထားခြင်းမရှိသော်လည်း ခရီးသည်အခြေအနေပေါ်မူတည်၍ ပြေးဆွဲပေးနေကြောင်း သိရသည်။

အောင်မင်္ဂလာအဝေးပြေးကားဝင်းတွင် ရန်ကုန်အခြေပြုယာဥ်လိုင်းပေါင်း ၁၁၉ လိုင်းရှိပြီး ယာဥ်အစီးရေ ၃၄၄ စီးနှင့် နေ့စဥ်ခရီးသည်ဦးရေ ၆၀၀၀ ကျော် ပို့ဆောင်ပေးနေကြောင်း၊ ဒဂုံဧရာအဝေးပြေးယာဥ်ရပ်နားစခန်းတွင် ရန်ကုန်အခြေပြုယာဥ်လိုင်းပေါင်း ၇၅ လိုင်းရှိပြီး ယာဥ်အစီးရေ ၁၅၅ စီးဖြင့် နေ့စဥ်ခရီးသည် ၂၀၀၀ ကျော်ကို ပို့ဆောင်ပေးနေကြောင်း သိရသည်။

အဝေးပြေးခရီးသည်တင်ယာဥ်လိုင်းများ အနေဖြင့် စက်သုံးဆီစျေးမြင့်တက်ခြင်းနှင့် ခရီးသည်နည်းပါးမှုတို့ကြောင့် အဆင်မပြေမှုများရှိနေကြောင်းလည်း သိရသည်။

ymg/sth
#Yangon_Media_Group

#Local_News
Published_4 July 2022

မြန်မာနိုင်ငံက နိုင်ငံရေးပြန်လည်သင့်မြတ်ရေး စဉ်ဆက်မပြတ် တွန်းအားပေးဖော်ဆောင်ရန်အတွက် တရုတ်နှင့် အာဆီယံ ပူးတွဲလုပ်ဆောင်ရန် မျှော်လင့်ကြောင်း တရုတ်နိုင်ငံ နိုင်ငံတော်ကောင်စီဝင်နှင့် နိုင်ငံခြားရေးဝန်ကြီး Mr. Wang Yi ကပုဂံမြို့၌ ကျင်းပနေသည့် လန်ချန်း-မဲခေါင် အစည်းအဝေးအတွင်း ဆွေးနွေးခဲ့ကြောင်း မြန်မာနိုင်ငံဆိုင်ရာ တရုတ်သံရုံးက ထုတ်ပြန်ထားသည်။

ယင်းဆွေးနွေးပွဲတွင် တရုတ်နိုင်ငံ၏ မြန်မာနိုင်ငံအပေါ်ထားရှိသည့် မျှော်လင့်ချက်သုံးချက်ရှိပြီး ယင်းကိုထည့်သွင်းဆွေးနွေးစဉ် အထက်ပါအတိုင်း ဆွေးနွေးခဲ့ခြင်း ဖြစ်သည်။

ပထမအချက်အနေဖြင့် ဖွဲ့စည်းပုံအခြေခံဥပဒေနှင့် ဥပဒေမူဘောင်များအောက်၌ မြန်မာနိုင်ငံက နိုင်ငံရေးပြန်လည်သင့်မြတ်ရေး စဉ်ဆက်မပြတ် တွန်းအားပေးဖော်ဆောင်ရန်အတွက် တရုတ်နှင့် အာဆီယံ ပူးတွဲလုပ်ဆောင်ရန် မျှော်လင့်ကြောင်း၊ မြန်မာနိုင်ငံရှိ အဖွဲ့အစည်းအသီးသီးက နိုင်ငံ၏အခင်းအကျင်းနှင့် ပြည်သူလူထု အကျိုးစီးပွားကို အလေးထားပြီး ဆင်ခြင်တုံတရားနှင့် လက်တွေ့ကျမှု၊ အပြန်အလှန် နားလည်သည်းခံမှုများဖြင့် ဘက်ပေါင်းစုံ၏ ကျိုးကြောင်းဆီလျော်သော တောင်းဆိုချက်များကို ထည့်သွင်းစဉ်းစားကာ တည်ငြိမ်အေးချမ်းရေးကို ဆောလျင်စွာ ဖော်ဆောင်ကြရန် အားပေးသည့်ကိစ္စဖြစ်ကြောင်း သိရသည်။

ဒုတိယအချက်မှာ မြန်မာနိုင်ငံ၏ ဒီမိုကရေစီအသွင်ကူးပြောင်းရေးလုပ်ငန်းစဉ် ပြန်လည်စတင်ပြီး တိုင်းပြည်အာဏာကို ပြည်သူများထံ ပြန်လည်အပ်နှင်းရေး မျှော်မှန်းချက် အကောင်အထည်ဖော်ရန်အတွက် တရုတ်နှင့် အာဆီယံ အတူတွန်းအားပေးကာ မြန်မာနိုင်ငံအခြေအနေနှင့် ကိုက်ညီသော၊ မြန်မာ့ဝိသေသလက္ခဏာဆောင်သော နိုင်ငံရေးဖွံ့ဖြိုးတိုးတက်မှုလမ်းကြောင်းကို ရှာဖွေနိုင်ရန် မျှော်လင့်သည့်အချက်ဖြစ်ကြောင်း သိရသည်။

တတိယအချက်အနေဖြင့် အာဆီယံက “အာဆီယံနည်းလမ်း” ကို လက်ကိုင်စွဲ၍ ပြည်တွင်းရေး ဝင်ရောက်စွက်ဖက်မှုမရှိရေး၊ ပေါင်းစပ်ညှိနှိုင်းရေးဟူသော အခြေခံမူနှင့် အစဉ်အလာများကို ခိုင်မြဲစေကာ တည်တည်ငြိမ်ငြိမ်နှင့် နှောင့်ယှက်မှုများကို ဖယ်ရှားပြီး စိတ်ရှည်လက်ရှည် ညှိနှိုင်းခြင်းဖြင့် အာဆီယံ၏ “တူညီဆန္ဒငါးရပ်”（five-point consensus）ကို အပြုသဘောဆောင်စွာ အကောင်အထည် ဖော်ရင်း အာဆီယံ၏ ပြီးပြည့်စုံသော စည်းလုံးညီညွတ်မှုနှင့် ဦးဆောင်မှုအခန်းကဏ္ဍကို ထိန်းသိမ်းရန် မျှော်လင့်ထားသည့်အကြောင်းကို Mr. Wang Yi က ဆွေးနွေးခဲ့ခြင်း ဖြစ်ကြောင်း ယင်းထုတ်ပြန်ချက်တွင် ဖော်ပြထားသည်။

မြန်မာနိုင်ငံက အိမ်ရှင်အဖြစ် လက်ခံကျင်းပသည့် (၇) ကြိမ်မြောက် လန်ချန်း - မဲခေါင် ပူးပေါင်းဆောင်ရွက်မှု အစည်းအဝေး (LMC) ကို ယူနက်စကိုဝင် ရှေးဟောင်းမြို့တော် ပုဂံမြို့၌ ဇူလိုင်လ ၂ ရက်မှ ၅ ရက်ထိ ကျင်းပနေခြင်းဖြစ်ကြောင်း သိရသည်။

ymg/mt
#Yangon_Media_Group