#LocalNews
Published - 1 May 2022

ရန်ကုန်ပြည်သူ့ဆေးရုံကြီး၌ လက်ကောက်ဝတ်အထက်မှ ပြတ်တောက်သွားသော လက်အား ပြန်လည်ဆက်ပေးသည့် ခွဲစိတ်ကုသမှုအောင်မြင်စွာဆောင်ရွက်ပေးနိုင်ခဲ့တယ်လို့ဆေးရုံကြီးရဲ့ ထုတ်ပြန်ချက်အရသိရသည်။

ဧပြီလ ၁၄ ရက်နေ့ မွန်းလွဲပိုင်းက ရန်ကုန်တိုင်းဒေသကြီး၊ ကြည့်မြင်တိုင်မြို့နယ်တွင် နေထိုင်သည့် ငါဖမ်းလုပ်ငန်းလုပ်ကိုင်သူတစ်ဦးသည် ဓားဖြင့် ခုတ်ခံရခြင်းကြောင့် ဘယ်ဘက်လက်၏ လက်ကောက်ဝတ်အထက်မှ ပြတ်တောက်သွားသည့် ဒဏ်ရာ (Amputated Left Forearm)ဖြင့် ရန်ကုန်ပြည်သူ့ဆေးရုံကြီးသို့ အဆိုပါနေ့ရက် ညနေ (၅း၅၅)နာရီအချိန်တွင် ပြတ်တောက်သွားသောလက်နှင့်အတူ ရောက်ရှိလာခဲ့တာဖြစ်ပါတယ်။

ထိုသို့ ရန်ကုန်ပြည်သူ့ဆေးရုံကြီးသို့ ရောက်ရှိလာသည်နှင့်တစ်ပြိုင်နက် သက်ဆိုင်ရာ ဆရာဝန်များ၊ သူနာပြုများနှင့် ကျန်းမာရေးဝန်ထမ်းများမှ လိုအပ်သော အရေးပေါ်ပြုစုကုသမှုများ ပြုလုပ်ပေးခြင်း၊ သက်ဆိုင်ရာ လက်ပိုင်းဆိုင်ရာခွဲစိတ်ကုသမှု အထူးကုဆရာဝန် ကြီးများထံ အချိန်နှင့်တစ်ပြေးညီ ဆက်သွယ်ပြီး ပြတ်တောက်သွားသောလက်အား ပြန်လည်ဆက်နိုင်ရေးအတွက် လိုအပ်သော စမ်းသပ်စစ်ဆေးမှုများပြုလုပ်ခြင်းတို့ကို ပြုလုပ်၍ အရေးပေါ်ခွဲစိတ်ခန်းဝင်ရန် ပြင်ဆင်ခဲ့ပြီး ရန်ကုန်ပြည်သူ့ဆေးရုံကြီးမှ လက်ပိုင်းဆိုင်ရာခွဲစိတ်ကုသမှုပါရဂူဘွဲ့သင်တန်းသား ဒေါက်တာ ဖြိုးမောင်မောင်ဦးဆောင်တဲ့အဖွဲ့က လက်အား ပြန်ဆက်ပေးသော ခွဲစိတ်ကုသမှုကို ဧပြီလ ၁၄ရက် ည(၇း၅၀)နာရီ အချိန်မှ စတင်ဆောင်ရွက်ခဲ့ရာ ၁၅ရက်နေ့၊ နံနက်(၁း၃၀)နာရီအချိန်တွင် ခွဲစိတ်ကုသမှုပြီးဆုံးခဲ့တယ်လို့ သိရပါတယ်။

အဆိုပါလူနာ၏ လက်မှာ ခွဲစိတ်ပြီးချိန်မှစတင်၍ သွေးကြောများ ဖြည်းဖြည်းချင်း ပြန်လည် လှည့်ပတ်စီးဆင်းလာပြီး ဧပြီလ ၂၉ရက်နေ့မှာ ဆေးရုံကဆင်းခွင့်ရရှိခဲ့တယ်လို့သိရပါတယ်။

ပြတ်တောက်သွားသောလက်ကို ပြန်လည်ဆက်ပေးသည့် ခွဲစိတ်ကုသမှုဆောင်ရွက်နိုင်ရန် အတွက် ပထမဦးစွာ ပြတ်တောက်သွားသည့်လက်ကို Normal Saline (သို့မဟုတ်) ရေကျက်အေးနှင့် ဆေးကြောရကာ ထိုသို့ဆေးကြောသန့်စင်ပြီးပါက သန့်ရှင်းသည့် ပလတ်စတစ်အိတ်ဖြင့် ထုပ်ပိုးရပါမည်။ (ဖြစ်နိုင်ပါက ပလတ်စတစ်အိတ်ထဲတွင် Normal Saline စိမ်ထားသော ပိုးသတ်ထားသည့် ပတ်တီးစအကြီးဖြင့်စည်း၍ ထည့်ပေးပါ)။ ထို့နောက် ရေခဲပုံးထဲသို့ထည့်၍ ဆေးရုံသို့သယ်ဆောင်လာရပါမည်။ လက် စတင်ပြတ်တောက်သည့် အချိန်မှ (၄)နာရီ သို့မဟုတ် (၆)နာရီအတွင်း လက်ပိုင်းဆိုင်ရာခွဲစိတ်ကုသမှုအထူးကုဆရာဝန်ကြီးများရှိရာ ဆေးရုံကြီးများသို့ ရောက်ရှိပါက အကောင်းဆုံးဖြစ်တယ်လို့ ထုတ်ပြန်ရာမှာ အသိပေးထားပါတယ်။

ygm/hm
#Yangon_Media_Group

#Local_News
Published_ 1 May 2022

မြန်မာနိုင်ငံနှင့် တရုတ်နိုင်ငံတို့အကြား ဒေသတွင်းဘက်စုံစီးပွားရေး ပူးပေါင်းဆောင်ရွက်မှု သဘောတူစာချုပ် မေ ၁ ရက်တွင် စတင်အသက်ဝင်ပြီဖြစ်ကြောင်း နစက ရင်းနှီးမြုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနက ထုတ်ပြန်လိုက်ပါတယ်။

ဒေသတွင်း ဘက်စုံစီးပွားရေး ပူးပေါင်းဆောင်ရွက်မှု သဘောတူစာချုပ် (RCEP) သည် စာချုပ်အပိုဒ် (၂၀.၆) စာချုပ်အသက်ဝင်ခြင်းအရ မြန်မာနိုင်ငံနှင့် တရုတ်နိုင်ငံတို့ အကြား မေလ ၁ ရက်မှာ စတင်မှာ ဖြစ်ပါတယ်။

အဆိုပါ သဘောတူစာချုပ်အား ၂၀၂၀ ပြည့်နှစ် နိုဝင်ဘာလ ၁၅ ရက်နေ့တွင် ကျင်းပခဲ့တဲ့ (၄) ကြိမ်မြောက် ဒေသတွင်းဘက်စုံစီးပွားရေး ပူးပေါင်းဆောင်ရွက်မှု ထိပ်သီးအစည်းအဝေးတွင် လက်မှတ်ရေးထိုးခဲ့တာ ဖြစ်ပါတယ်။

RCEP တွင် လက်ရှိပါဝင်တဲ့ နိုင်ငံ (၁၅) နိုင်ငံသည် လူဦးရေအားဖြင့် ၂.၂ ဘီလီယံ ရှိသဖြင့် ကမ္ဘာ့လူဦးရေ၏ ၃၀% ကို ကိုယ်စားပြုပြီး ထုတ်လုပ်မှုတန်ဖိုး အမေရိကန်ဒေါ်လာ ၂၆.၂ ထရီလီယံ ရှိသဖြင့်လည်း ကမ္ဘာ့ထုတ်လုပ်မှုတန်ဖိုး၏ ၃၀% ခန့်ရှိပါတယ်။

COVID – 19 အလွန်ကာလတွင် မြန်မာနိုင်ငံ၏စီးပွားရေးကို ပြန်လည်ဦးမော့လာအောင် ကြိုးပမ်းဆောင်ရွက်ရာတွင် မြန်မာ့ပို့ကုန်များအတွက် ပိုမိုကျယ်ပြန့်သည့် ဈေးကွက်ကို ရရှိစေမည်ဖြစ်သဖြင့် ကုန်သွယ်မှုနှင့် ရင်းနှီးမြှုပ်နှံမှုတို့အတွက် အခွင့်အလမ်းကောင်းများကို ရရှိစေမှာဖြစ်တယ်လို့ ဆိုပါတယ်။

မြန်မာ-တရုတ် နှစ်နိုင်ငံကုန်သွယ်မှုတွင် မြန်မာ့စီးပွားရေးလုပ်ငန်းများအနေဖြင့် အဆိုပါစာချုပ်ကပေးအပ်တဲ့ အကောက်ခွန်အထူးအခွင့်အရေးကိုအသုံးပြု၍ အကျိုးကျေးဇူးများရရှိနိုင်မှာဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

ymg-mnn
#Yangon_Media_Group.

Published 1 May 2022

မြန်မာနိုင်ငံရဲ့ နေပြည်တော်၊တိုင်းဒေသကြီးနှင့်ပြည်နယ်တွေမှာ ခရိုင်အသစ်(၄၆)ခရိုင်ထပ်မံတိုးချဲ့ဖွဲ့စည်းလိုက်တယ်လို့ နစက ပြည်ထဲရေးဝန်ကြီးဌာနက ၂၀၂၂ခုနှစ် ဧပြီ(၃၀)ရက်က အမိန့်ကြေညာစာတွေထုတ်ပြန်ပါတယ်။

အဲသလိုအသစ်ဖွဲ့စည်းမှုကြောင့် ယခင် တစ်နိုင်ငံလုံးမှာ (၇၅)ခရိုင်ရှိခဲ့ရာက ယခုအခါ (၁၂၁) ခရိုင်ရှိပြီဖြစ်ပါတယ်။

ဒေသဖွံ့ဖြိုးတိုးတက်ရေးနှင့်အုပ်ချုပ်ရေးဆိုင်ရာလုပ်ငန်းတွေ ယခုထက်ပိုမိုအဆင်ပြေ ချောမွေ့စွာ ဆောင်ရွက်နိုင်ဖို့ ဖွဲ့စည်းရတာဖြစ်တယ်လို့ နစကရဲ့သတင်းထုတ်ပြန်ချက်ထဲမှာ ဖော်ပြထားပါတယ်။

အသစ်ထပ်မံတိုးချဲ့တဲ့ခရိုင်အသစ်တွေက နေပြည်တော်မှာ ခရိုင်(၂)ခု၊ကချင်မှာ ခရိုင်(၂)ခု၊ ကယားမှာ ခရိုင်(၂)ခု၊ ကရင်မှာ ခရိုင်(၂)ခု၊ ချင်းမှာ ခရိုင်(၂)ခု၊ စစ်ကိုင်းမှာ ခရိုင်(၂)ခု၊ တနင်္သာရီမှာ ခရိုင်(၁)ခု၊ပဲခူးမှာ ခရိုင်(၂)ခု၊ မကွေးမှာ ခရိုင်(၂)ခု၊ မန္တလေးမှာ ခရိုင်(၄)ခု၊ မွန်မှာ ခရိုင်(၂)ခု၊  ရခိုင်မှာ ခရိုင်(၂)ခု၊ ရန်ကုန်မှာ ခရိုင်(၁၀)ခု၊ ရှမ်းမှာ ခရိုင်(၉)ခု၊ ဧရာဝတီမှာ ခရိုင်(၂)ခု စုစုပေါင်း ခရိုင်အသစ်(၄၆)ခုဖြစ်ပါတယ်။

ရန်ကုန်တိုင်းဒေသကြီးနှင့် ရှမ်းပြည်နယ်တို့မှာ ခရိုင်အသစ်တိုးချဲ့ဖွဲ့စည်းမှုအများဆုံးဖြစ်ပါတယ်။

ရန်ကုန်မှာ ဗိုလ်တထောင်ခရိင်၊ဒဂုံမြို့သစ်ခရိုင်၊ တွံတေးခရိုင်၊ကျောက်တံတားခရိုင်၊မရမ်းကုန်းခရိုင်၊ ကမာရွတ်ခရိုင်၊တိုက်ကြီးခရိုင်၊ လှည်းကူးခရိုင်၊ မှော်ဘီခရိုင်နှင့် မင်္ဂလာဒုံခရိုင်ဟူ၍ ခရိုင်အသစ်(၁၀)ခုတိုးချဲ့ခဲ့တာဖြစ်ပါတယ်။

#LocalNews
Published_30 April 2022

မြောက်ဦးဘုရားများ ဗုဒ္ဓပူဇနိယပွဲတော်အတွင်း ရိုးရာပြိုင်လောင်းပွဲနှင့် ကျင်ကိုင်ပွဲများကျင်းပမည်ဖြစ်ကြောင်း ပွဲတော်ကျင်းပရေးဂေါပကအဖွဲ့က သိရသည်။

ယခုကျင်းပမည့် ပွဲတော်မှာ ၉၄ ကြိမ်မြောက်မြောက်ဦးဘုရားများဗုဒ္ဓပူဇနိယပွဲတော်ဖြစ်ပြီး မြောက်ဦးမြို့ သျှစ်သောင်း၊ ထုက္ကန်၊ အံတော်သိမ်ဘုရားများ၏ ဗုဒ္ဓပူဇနိယပွဲတော်ဖြစ်ကြောင်း၊ မေလ ၁၃ ရက်မှမေလ ၁၆ ရက်ထိ (၄) ရက်တိုင်တိုင် ကျင်းပပြုလုပ်သွားမည်ဟု ဘုရားဂေါပတာဝန်ရှိသူက ပြောသည်။

ပြိုင်လောင်း (လှေ)ပြိုင်ပွဲတွင် လက်တောင်အရှည် ၁၂ လံ အရှည်လှေ၊ ၈ လံ အရှည်လှေနှင့် ၆ လံ အရှည်လှေများဖြင့် အတန်း(၃) တန်းသတ်မှတ်ကာ ပြိုင်သွားမည်ဖြစ်ပြီး ရိုးရာကျင်ပွဲတွင်လည်း ရခိုင်တစ်ပြည်နယ်လုံးမှ ကျင်သန်ကြီးများကို ဖိတ်ကြားထားကြောင်းလည်း သိရသည်။

ရိုးရာပြိုင်လောင်းပွဲတွင် ၁၂ လံ လှေပြိုင်ပွဲ ပထမဆု ကျပ် ၂၅ သိန်း၊ ဒုတိယဆု ၂၃ သိန်း၊ ၈ လံအရှည် လှေပြိုင်ပွဲတွင် ပထမဆု ၂၂ သိန်း၊ ဒုတိယဆု ၂၀ သိန်း၊၆ လံအရှည်ပြိုင်ပွဲတွင် ပထမဆု ၂၀ သိန်း၊ဒုတိယဆု ၁၈ သိန်း ချီးမြှင့်သွားမည်ဖြစ်ပြီး ရခိုင်ရိုးရာကျင်ပွဲတွင် အကြီးတန်း ပထမဆု ကျပ် ၁၄ သိန်း၊ ဒုတိယဆု ၁၀ သိန်း၊ တတိယ ဆု ၆ သိန်း ၊ စတုတ္ထဆု ၄ သိန်းစီ လည်းကောင်း၊ကျင်ပွဲအလတ်တန်းတွင် ပထမဆု ကျပ် ၁၀ သိန်း၊ ဒုတိယဆု ၈ သိန်း၊ တတိယ ဆု ၅ သိန်း ၊ စတုတ္ထဆု ၃ စီချီးမြှင့်မည်ဖြစ်ပြီး တတိယတန်းတွင် ပထမဆု ကျပ် ၈ သိန်း၊ ဒုတိယဆု ၆ သိန်း၊ တတိယ ဆု ၄ သိန်းနှင့် စတုတ္ထဆု ၃ သိန်းစီသတ်မှတ်၍ လည်းကောင်း အသီးသီး ချီးမြှင့်ပေးသွားမည်ဖြစ်ကြောင်း သိရသည်။

ပွဲတော်အတွင်းတွင် ပဋ္ဌာန်းရွတ်ဖတ်ပူဇော်ပွဲနှင့် ကဆုန်ညောင်ရေသွန်းလောင်းပွဲ ၊ပျော်ပွဲရွှင်ပွဲများတို့ကိုလည်း ထည့်သွင်းကျင်းပသွားမည်ဖြစ်သော်လည်း ယခင်နှစ်များက ပြုလုပ်သည့် ဘောလုံးပွဲကို ထည့်သွင်းကျင်းပမည်မဟုတ်ကြောင်း သိရသည်။

ymg/mt
#Yangon_Media_Group

#LocalNews
Published - 30 April 2022

ကလေးမြို့တွင် ချင်းစစ်ဘေးရှောင်ပြည်သူ ၂၀၀ ခန့် ခိုလှုံနေကြရပြီး လက်ရှိမှာ ၄င်းတို့အတွက်စားနပ်ရိက္ခာများ လိုအပ်မှုရှိနေတယ်လို့ သိရပါတယ်။

#Yangon_Media_Group

#LocalNews
Published-30 April 2022

အခုရက်ပိုင်းအတွင်း နေကြတ်ခြင်း၊လကြတ်ခြင်းတွေ ဖြစ်ပေါ်လာနိုင်တယ်လို့ သဘာဝနက္ခတ်ဗေဒ ပညာသင်တန်းကျောင်း၊ကျောင်းအုပ်ဆရာမကြီး နက္ခတ်ပညာရှင် ဒေါ်ကြည်ကြည်စိန်ကပြောပါတယ်၊၊

#Yangon_Media_Group