#Local_News
Published _ 27 July 2022

ပြည်တွင်းဆီစက်များ၏ ဝယ်လိုအားများနှင့် ပြည်ပတင်ပို့ခွင့် ပြန်လည်ခွင့်ပြုလိုက်တာကြောင့် မြေပဲဆံဈေးများ ဆက်တိုက်မြင့်တက်လျက်ရှိပြီး ပျမ်းမျှ တစ်ပိဿာလျင် ကျပ် ၅၃၀၀ အထိ မြင့်တက်နေလျက်ရှိ ကြောင်း ကုန်စည်ဒိုင်အချို့မှ သိရသည်။

မြေပဲဆံတွေကို နယ်စပ်မှ ပြည်ပတင်ပို့ရာ၌ အမေရိကန်ဒေါ်လာဖြင့်သာ တင်ပို့ခွင့်ပြုထားသော်လည်း ဈေးကွက်အနေအထားတစ်ရပ်ရှိနေသည့်အတွက် ယခုလိုစျေးတွေဆက်တိုက်မြင့်တက်လာပြီး ယခု ဇူလိုင်လဆန်းပိုင်းထက် မြေပဲဆံတစ်ပိဿာလျင် ကျပ် ၈၀၀ ခန့်ပိုတက်လာကြောင်း ယင်းမှသိရသည်။

နယ်စပ်ကုန်သွယ်ရေး၌ ပြီးခဲ့သည့် ဇူလိုင်လ ၁ရက်က စပြီး ပဲ၊ ပြောင်းနှင့် ဆီထွက်သီးနှံများကို တင်ပို့သည့်အခါ အမေရိကန် ဒေါ်လာဈေးနှုန်းဖြင့်သာ ရောင်းဝယ်မှုလုပ်ကြရန် ကုန်သွယ်ရေးဦးစီးဌာနက မူဝါဒ သတ်မှတ်ထားရှိပြီး ဗဟိုဘဏ်က သတ်မှတ်ထားသည့် ဒေါ်လာဈေးနှုန်းနှင့် ငွေလဲကောင်တာများတွင် ဝယ်ရသည့် ဈေးနှုန်းကွာဟချက်ကြောင့် ပို့ကုန်လုပ်ငန်း လုပ်ကိုင်သူများ အနေဖြင့် အရှုံးပေါ်နေသည့် အခြေအနေများဖြင့် ရင်ဆိုင်နေရကြောင်း သိရှိရသည်၊၊

ymg/NN
#Yangon_Media_Group

#DailyNews
Published - 27 July 2022

၁။ ပုဂ္ဂလိကကျောင်းများ ရက်အကန့်အသတ်မရှိ ပိတ်မည်ဆိုသည်မှာ သတင်းမှားသာဖြစ်

၂။ ဈေးကွက်တွင် လက်ကျန်ကုန်ပစ္စည်းနည်းပါမှုကြောင့် ကြက်သွန်နီနှင့် ငြုတ်သီး အမြင့်ဈေးတွင်ရှိနေ

၃။ နေ့စဉ်မိုးလေဝသသတင်း။

၄။ သီရိလင်္ကာတွင် အစစအရာရာရှားပါးလာပြီး ကျန်းမာရေးစောင့်ရှောက်မှုစနစ် ပျက်သုဉ်းလုနီးပါးဖြစ်လာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published - 27 July 2022

ပုဂံဒေသတွင်အမွေအနှစ်ကို မထိခိုက်စေဘဲ ဟိုတယ်နှင့်ခရီးသွားလုပ်ငန်းများလည်ပတ်နိုင်ရန် 'ဟိုတယ်မဟာဗျူဟာ'ရေးဆွဲနိုင်ရေးဆောင်ရွက်နေကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာနမှသိရသည်၊၊

ပုဂံဒေသအတွက်'ဟိုတယ်မဟာဗျူဟာ'ရေးဆွဲပြီး ကမ္ဘာ့အမွေ အနှစ်ကော်မတီကိုတင်ပြရမည်ဖြစ်၍ မြန်မာနိုင်ငံကဟိုတယ်ဆိုင်ရာကျွမ်းကျင်ပညာရှင် သြစတြေးလျနိုင်ငံသား Dr.Richard Mackay ကို ငှားရမ်းရေးဆွဲစေခဲ့သည်၊၊

Dr.Richard Mackayကို' ဟိုတယ်မဟာဗျူဟာ' ရေးဆွဲနေစဉ် Dr. Richard Mackay ၏ 'ဟိုတယ်မဟာဗျူဟာ'ပါ အချက်များနှင့် ကိုက်ညီမှု မရှိဖြစ်နိုင်ပါသဖြင့် 'ဟိုတယ်မဟာဗျူဟာ'ရေးဆွဲ မပြီးမီ ပုဂံတွင် ဟိုတယ်များအား ပြုပြင်ခြင်း၊ ထိန်းသိမ်းခြင်း၊ အသစ်တည်ဆောက်ခြင်း လုပ်ငန်းများကို ခေတ္တရပ်နားထားရန် ရှေးဟောင်းသုတေသနနှင့် အမျိုးသားပြတိုက်ဦးစီးဌာန ညွှန်ကြားရေးမှူးချုပ်က'ဟိုတယ်မဟာဗျူဟာ'ရေးဆွဲနိုင်ရေး အလုပ်ရုံဆွေးနွေးပွဲ၌ ထည့်သွင်းပြောကြားခဲ့သည်၊၊

ဇူလိုင်လ(၂၆)ရက်တွင် ပုဂံဒေသဆိုင်ရာ ဟိုတယ်မဟာဗျူဟာ ရေးဆွဲနိုင်ရေးအတွက် ဆက်လက် ဆောင်ရွက်ရမည့် လုပ်ငန်းစဉ်များရေးဆွဲသတ်မှတ်နိုင်ရေး အလုပ်ရုံဆွေးနွေးပွဲကို ပုဂံရှေးဟောင်း သုတေသနပြတိုက်၊ အစည်းအဝေးခန်းမ၌ကျင်းပပြုလုပ်ခဲ့သည်၊၊

အလုပ်ရုံဆွေးနွေးပွဲ၌ ရှေးဟောင်းသုတေသနနှင့် အမျိုးသားပြတိုက်ဦးစီးဌာန ညွှန်ကြားရေးမှူးချုပ်က အဖွင့်အမှာစကား ပြောကြားရာတွင်" ပုဂံဒေသအား ကမ္ဘာ့အမွေအနှစ် တင်သွင်းစဉ်က ဟိုတယ်နှင့် ပတ်သက်သည့် Bagan Hotel Strategy ရေးဆွဲဆောင်ရွက်ရန်၊ ဟိုတယ်နှင့် ပတ်သက်သည့် ကိစ္စရပ်များကို ရေတိုရေရှည်ချမှတ် ဆောင်ရွက်ရန်၊ ပုဂံဒေသအတွက် ယူနက်စကိုက ပေးပို့လာသော အကြံ ပြုချက် (၁၈) ချက်ထဲတွင်လည်း ပါရှိသည့်အတွက် အကြံပြုချက်ပါ ဟိုတယ်နှင့်ပတ်သက်သည်တို့ကို ဆောင်ရွက်ပြီး ၂၀၂၂ ခုနှစ်၊ ဒီဇင်ဘာလမှာ ကမ္ဘာ့အမွေအနှစ် ကော်မတီသို့ ပြန်လည်ပေးပို့ရမည်ဖြစ်သဖြင့် ဟိုတယ်မဟာဗျူဟာ စီမံကိန်းအတွက် အရှေ့တောင်အာရှတွင်နှင့် ကမ္ဘာတစ်ဝှမ်းလုံးတွင် Toursim Master Plan ရေးဆွဲနေသည့် မြန်မာနိုင်ငံ၏ အခြေအနေကို နားလည်သော ဟိုတယ်လုပ်ငန်းပိုင်းဆိုင်ရာကျွမ်းကျင် ပညာရှင် ဩစတြေးလျ နိုင်ငံသား Dr.Richard Mackay ကို ငှားရမ်းရေးဆွဲစေခဲ့ပါကြောင်း၊ (၂၀၂၂)ခုနှစ်၊ စက်တင်ဘာလ၊ အောက်တိုဘာလတွင် Dr. Richard Mackay ထံသို့ ပြန်လည်ပေးပို့ပေးရန်နှင့် လာမည့် (၄၆) ကြိမ်မြောက် ကမ္ဘာ့အမွေအနှစ် ညီလာခံတွင် တင်ပြသင့်ကြောင်းကို ပညာရှင်က အကြံပြုထားသဖြင့် ယနေ့အလုပ်ရုံဆွေးနွေးပွဲကို ကျင်းပရခြင်း ဖြစ်ပါကြောင်း၊ယခုဆွေးနွေးပွဲမှ ထွက်ပေါ်လာမည့် စည်းမျဉ်း/ စည်းကမ်းများကို BAGANCOM နှင့် မန္တလေးတိုင်းဒေသကြီး ယဉ်ကျေးမှုအမွေအနှစ်များ ကာကွယ်ထိန်းသိမ်းရေးကော်မတီ၊ ဥက္ကဋ္ဌတိုထံတင်ပြပြီး မိမိဌာနမှ စုစည်းထားသည့် ဟိုတယ်ဆိုင်ရာ အချက်အလက်များနှင့်အတူ Dr. Richard Mackay ထံသို့ အချိန်မီ ပြန်လည်ပေးပို့သွားမည်ဖြစ်ပါကြောင်း၊ ၎င်းကာလအတွင်း Dr. Richard Mackay ၏ Bagan Hotel Strategy ပါ အချက်များနှင့် ကိုက်ညီမှု မရှိဖြစ်နိုင်ပါသဖြင့် Bagan Hotel Strategy ရေးဆွဲမပြီးမီ ပုဂံတွင် ဟိုတယ်များအား ပြုပြင်ခြင်း၊ ထိန်းသိမ်းခြင်း၊ အသစ်တည်ဆောက်ခြင်း လုပ်ငန်းများကို ခေတ္တရပ်နားထားရန်ကိုလည်း ဆက်စပ်ဌာနများသို့ အကျိုးအကြောင်း ရေးသားပေးပိုထားပြီးဖြစ်ကြောင်း၊ Bagan Hotel Strategy (complete) အမြန်ဆုံး အပြီးသတ်ရေးဆွဲနိုင်ရန်အတွက် ဆက်စပ်ဌာနများ၏ ပူးပေါင်းဆောင်ရွက်မှုနှင့် ဝိုင်းဝန်းအကြံပြု ဆွေးနွေးချက်များ လိုအပ်ပါသဖြင့် အကြံပြုဆွေးနွေးပေးစေလိုပါကြောင်း " ပြောကြားခဲ့ပါသည်၊၊

ပုဂံဒေသဆိုင်ရာ ဟိုတယ်မဟာဗျူဟာ စီမံကိန်းအပြီးသတ် ရေးဆွဲနိုင်ရေး ဆက်လက်ဆောင်ရွက်ရမည့် လုပ်ငန်းစဉ်တစ်ခုဖြစ်သည့် ဟိုတယ် တည်ဆောက်မှုများအတွက် အဆောက်အအုံ၏ အမြင့်၊ ဒီဇိုင်းနှင့် ကြားခံဒေသအတွင်းရှိ ဟိုတယ်များနှင့် စပ်လျဉ်းသည့် စည်းမျဉ်း၊ စည်းကမ်း သတ်မှတ်ချက်များအား ချမှတ်၍ ပုဂံဒေသဆိုင်ရာ ဟိုတယ်မဟာဗျူဟာစီမံကိန်း အပြီးသတ်ရေးဆွဲနိုင်ရေး အလုပ်ရုံဆွေးနွေးပွဲဆုံးဖြတ်ချက်များအား အတည်ပြုခဲ့ကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာန၏ ထုတ်ပြန်ချက်အရ သိရသည်၊၊

ymg/tthl
#Yangon_Media_Group

#Local_News
Published_27 July 2022

မန္တလေးမြို့၊ အမရပူရမြို့နယ်အတွင်း ကားလုယူ၊လူသတ်ကာ အလောင်းကို လမ်းဘေး၌ စွန့်ပစ်ထားမှု ဖြစ်ပွားခဲ့ကြောင်း သိရသည်။

မန္တလေးမြို့ကူညီကယ်ဆယ်ရေး ရွှေမဉ္ဇူ ပရဟိတအသင်းဝင်တစ်ဦးပြောပြချက်အရ ဇူလိုင်လ ၂၆ ရက် မွန်းလွဲပိုင်းက အမျိုးသားတစ်ဦးတွင် မျက်ကွင်းများညိုမဲကာ နှာခေါင်းထဲမှ သွေးထွက်နေပြီး မှောက်လျက်အနေထားဖြင့် သေဆုံးနေသည်ကို ပြည်ကြီးတံခွန်မြို့နယ် (၁၃၈)လမ်းနှင့် (၁၃၉)လမ်းကြား၊ (၇၇)လမ်း နှင့် (၇၈)လမ်းကြား လမ်းဘေး၌ တွေ့ရှိသည့်အတွက် မိသားစုများ သိရှိစေရန် လူမှုကွန်ရက်တွင် သတင်းတင်ခဲ့ရကြောင်း သိရသည်။

"ဆေးရုံကြီး ရေခဲတိုက်ကိုပို့ပေးခဲ့ပါတယ်၊ အလောင်းပိုင်ရှင်တွေနဲ့လည်းအဆက်သွယ်ရပါပြီဗျ။ သတ်ခံထားရတာပါ"ဟု အဆိုပါ ပရဟိတ လုပ်ငန်းလုပ်နေသူက ပြောသည်။

အဆိုပါ အသတ်ခံရထားရသူမှာ အသက် ၃၀ ခန့်အရွယ် ကိုရဲကိုထက် ဖြစ်ပြီး အမရပူရမြို့နယ်၊ မြစ်လောင်းရွာမှာတွင် နေထိုင်သူဖြစ်ကာ ဇူလိုင်လ ၂၆ ရက် နံနက် ၉ နာရီခန့်အချိန်က ပြည်ကြီးတံခွန်မြို့နယ်၊ စွယ်တော်စက်မှုဘက်သို နေအိမ်မှ ထွက်သွားစဉ် ကားကို အလုခံရကာ လူကိုသတ်ထားခဲ့ခြင်း ဖြစ်ကြောင်း သိရသည်။

လက်ရှိတွင် ကျူးလွန်သူများအား ဖမ်းဆီးရမိရေး အမှုဖွင့်ဆောင်ရွက်နေကြောင်း အုပ်ချုပ်ရေး သတင်းရင်းမြစ်များက ပြောသည်။

ymg/mt
#Yangon_Media_Group

#Local_News
Published_27 July 2022

ဧရာဝတီတိုင်းဒေသကြီး ငပုတောမြို့နယ်တိုင်းဒေသကြီးလွှတ်တော်ကိုယ်စားလှယ် ပြန်ဝင်လာ၍ လက်ခံထားကြောင်း သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက နေပြည်တော် သတင်းစာရှင်းလင်းပွဲအတွင်း ပြောကြားလိုက်သည်။

"သူတို့စွပ်စွဲနေသလို ပုဂ္ဂိုလ်ရေးအရဆောင်ရွက်ခဲ့တာ မဟုတ်ပါဘူး၊တရားဥပဒေနဲ့အညီပဲ ဆောင်ရွက်ခဲ့ခြင်းဖြစ်ပါတယ်။ ဥပဒေအရလုပ်ခဲ့တာဖြစ်ပါတယ်၊ သူတို့စွပ်စွဲနေတဲ့ ဒီမိုကရေစီအရေးလှုပ်ရှားသူတွေကိုလုပ်တယ်လို့ မဟုတ်မမှန်စွပ်စွဲပါတယ်။ အဲဒီလိုမဟုတ်ပါဘူး၊ ဘာမှလည်းမဆိုင်ပါဘူး၊ ဒီမိုကရေစီအရေးလှုပ်ရှားနေသူတွေကို အရေးယူတယ်ဆိုရင် ငပုတောအမတ် ပြန်ဝင်လာတယ်၊ ကျွန်တော်တို့လက်ခံတယ်၊ မြန်မာနိုင်ငံထဲမှာ လေးပုံသုံးပုံရွေးချယ်ခံထားရတဲ့ ကိုယ်စားလှယ်ဟောင်းတွေ ဒီအတိုင်းအေးအေးဆေးဆေးရှိနေပါတယ်၊ဒီမိုကရေစီအရေး၊ နိုင်ငံရေးလှုပ်ရှားမှုလုပ်လို့ အရေးယူတာမဟုတ်ဘူးလေ"ဟု သတင်းစာရှင်းလင်းပွဲတွင် ပြစ်ဒဏ်စီရင်မှုနှင့် ပတ်သက်၍ မီဒီယာများ မေးမြန်းမှုအပေါ် ပြန်လည်ပြောကြားရာ ၎င်းက ထည့်သွင်း ပြောကြားခဲ့ခြင်း ဖြစ်သည်။

ဧရာဝတီတိုင်းဒေသကြီး၊ ကျုံပျော်မြို့တွင် နစကထံ လက်နက်ချသွားသည်ဆိုသော PDF အဖွဲ့ဝင် ၅ ဦးအနက် ၂၀၂၀ ပြည့်နှစ်ရွေးကောက်ပွဲတွင် အမျိုးသားဒီမိုကရေစီ အဖွဲ့ချုပ် NLD ပါတီ၏ ငပုတောမြို့နယ်တိုင်းဒေသကြီးလွှတ်တော်ကိုယ်စားလှယ် (၂) က အရွေးချယ်ခံထားရသော ဦးသက်ပိုင်စိုး ပါဝင်ခဲ့ခြင်းဖြစ်ကြောင်း သိရသည်။

ယင်းတို့မှာ ပုဒ်မ-၅၀၅ (က) ဖြင့် ဝရမ်း ထုတ်ခံရသူများဖြစ်ပြီး တိမ်းရှောင်နေရာမှ ပြန်လာကြခြင်းဖြစ်ပြီး ဇူလိုင်လ ၂၁ ရက်က ခံဝန် လက်မှတ်ရေးထိုးထားကြကြောင်းလည်း သိရသည်။

ဧရာဝတီတိုင်းဒေသကြီးအတွင်း ၂၀၂၀ ပြည့် နှစ်၊ ရွေးကောက်ပွဲတွင် အရွေးချယ်ခံထားရသည့် လွှတ်တော်ကိုယ်စားလှယ်များအနက် မြောင်းမြမြို့နယ်မှ NLD ပါတီတိုင်းလွှတ်တော်ကိုယ်စားလှယ် ၂ ဦးလည်း နစကထံ ခံဝန်လက်မှတ်ရေးထိုးထားကြောင်း သတင်းရရှိသည်။

ymg/mt
#Yangon_Media_Group

#Local_News
Published _ 27 July 2022

ပြည်တွင်းဒေါ်လာဈေးကွက်၌ ဒေါ်လာဈေးမြင့်တက်နေမှုကို ထိန်းညှိနိုင်ရေးအတွက် လက်ရှိကမ္ဘာ့ပေါက်ဈေးများနှင့် ချိန်ညှိကာ လုပ်ဆောင်နေကြောင်း နစက ပြောရေး ဆိုခွင့်ရှိသူ ဗိုလ်ချုပ်ဇော်မင်းထွန်းက ပြောခဲ့သည်။

ဇူလိုင်လ ၂၆ ရက်တွင် နေပြည်တော်၌ ကျင်းပသည့် ၁၈ ကြိမ်မြောက် နစက၏ သတင်းစာရှင်းလင်းပွဲတွင် ၎င်းက ယခုလို ပြောကြားခဲ့ခြင်းဖြစ်သည်။

"ဒေါ်လာဈေးနဲ့ ပတ်သက်ပြီးတော့ နိုင်ငံခြားငွေ သုံးစွဲရေး ကြီးကြပ်မှု ကော်မတီကနေ ဦးစီးပြီး ဆောင်ရွက်လျက်ရှိပါတယ်။ ကမ္ဘာ့ပေါက်ဈေးနဲ့ ချိန်နေတာ ရှိပါတယ်" ဟု ဗိုလ်ချုပ်ဇော်မင်းထွန်းက ပြောသည်။

ဇူလိုင်လ အစောပိုင်းအတွင်းမှာ ပြည်တွင်း ရင်းနှီးမြှုပ်နှံမှုကဏ္ဍတွေ ဆောင်ရွက်နေသည့် ကုမ္ပဏီများအပေါ် နိုင်ငံခြားငွေနှင့် ပတ်သက်၍ ဗဟိုဘဏ်ကကန့်သတ်မှုများ လုပ်ဆောင်ခဲ့သည့်အတွက် ပြည်တွင်း ဒေါ် လာဈေးကွက်တွင် ဈေးနှုန်းမြင့်တက်မှုများ ဖြစ်ပေါ်ခဲ့ခြင်းဖြစ်သည်။

ယင်းကဲ့သို့ ဒေါ်လာဈေး မငြိမ်သက်မှုများ ဖြစ်ပေါ်မှုကြောင့် ပြည်တွင်းစီးပွားရေးလုပ်ငန်းရှင်များအကြား စိုးရိမ်မှုများမြင့်တက်ခဲ့သလို ရွှေ၊ ဆန်၊ ဆီနှင့် ဆေးဝါးအပါအဝင် အခြေခံစားသောက်ကုန်ဈေးနှုန်းများလည်း သိသိသာသာမြင့်တက်မှုများ ဖြစ်ပေါ်ခဲ့သည်။

ဇူလိုင်လ ဒုတိယပတ်အတွင်း၌ ဗဟိုဘဏ်မှ နိုင်ငံခြားငွေ ကန့်သတ်ချက်များတွင် နိုင်ငံ ခြားသား ပိုင်ဆိုင်မှု ၃၅ ရာခိုင်နှုန်း ပါဝင်သည့် ရင်းနှီးမြှုပ်နှံမှုလုပ်ငန်းများနှင့် ယခင်က ကင်းလွတ်ခွင့်ပြုထားသည့် ရင်နှီးမြှုပ်နှံမှုကုမ္ပဏီများကို ၎င်းတို့ပိုင် ဒေါ်လာများအား ဗဟိုဘဏ်သတ်မှတ်ဈေးနှုန်း တစ်ဒေါ်လာလျင် ၁၈၅၀ ကျပ်ဖြင့် ကျပ်ငွေသို့ လဲလည်ရန် ညွှန်ကြားခဲ့ခြင်း ဖြစ်သည်။

ယင်းသို့ ညွှန်ကြားပြီးနောက်ပိုင်း ဈေးကွက်အတွင်း ဒေါ်လာဈေးနှုန်းမှာ မြင့်တက်လာခဲ့ရာ လက်ရှိတွင် ဈေးကွက်အတွင်း၌ အမေရိကန်(၁)ဒေါ်လာလျင် မြန်မာငွေ (၂၄၀၀) ဝန်းကျင် ပေါက်ဈေးရှိနေခြင်း ဖြစ်သည်။

ymg/NN
#Yangon_Media_Group