#Local_News
Published - 15 September 2022

ရွှေတုံး၊ ရွှေခဲတွေများကို အရောင်းအဝယ် ပြုလုပ်သည့်အခါတွင် ဘဏ်စနစ်ဖြင့်သာ ပေးချေဆောင်ရွက်နိုင်ရေးအတွက်စီစဉ်နေကြောင်း နစကပြန်ကြားရေးသတင်းထုတ်ပြန်ချက်အရ သိရသည်။

ရွှေနှင့်ငွေကြေးဈေးကွက် ခိုင်မာစေရေးအတွက် မြန်မာနိုင်ငံတော်ဗဟိုဘဏ်ဥက္ကဌနှင့် ရွှေနှင့်ငွေကြေးဈေးကွက်စောင့်ကြည့်၊ ထိန်းသိမ်း ၊ ကြပ်မတ်ရေးလုပ်ငန်းကော်မတီတို့မှ နေပြည်တော်တွင်တွေ့ဆုံဆွေးနွေးခဲ့ခြင်းဖြစ်သည်။

စက်တင်ဘာလ ၁၄ ရက်နေ့တွင် ပြုလုပ်ခဲ့သည့် ရွှေနှင့် ငွေကြေးဈေးကွက်တည်ငြိမ်ခိုင်မာစေရေးအတွက် တာဝန်ရှိသူများ၏ တွေ့ဆုံဆွေးနွေးမှုအတွင်း အထက်ပါအတိုင်း ထည့်သွင်းပြောကြားခဲ့ခြင်းဖြစ်ပြီး ဘဏ်များ၏ ပံ့ပိုးပေးမည့် အစီအမံတွေကိုလည်း ဆွေးနွေးခဲ့ကြကြောင်း သိရသည်။

ယင်းအပြင် သက်ဆိုင်ရာ ဝန်ကြီးဌာနများနှင့် ဗဟိုဘဏ်တို့မှ ရွှေနှင့် ငွေကြေးဈေးကွက် တည်ငြိမ်စေရန် ဆက်လက်ပံ့ပိုးပေးမည်ဖြစ်ပြီး ရွှေလုပ်ငန်းရှင်များက ပူးပေါင်းဆောင်ရွက်ရမည့် လုပ်ငန်းများကို လည်းပြောကြားခဲ့ကြောင်း သိရသည်။

ပြည်တွင်းရွှေဈေးနှုန်းမှာ ကျပ်သိန်း ၃၀ အောက်ကျဆင်းနေပြီး YGEA အသင်းမှ ယနေ့ကြမ်းခင်းဈေးအဖြစ် အခေါက်ရွှေတစ်ကျပ်သားကို ကျပ် ၁,၉၈၅,၀၀၀ သတ်မှတ်ထုတ်ပြန်ထားသည်။

#Ymg/STH
#Yangon_Media_Group

#Local_News
Published - 15 Setember 2022

နောက်ဆုံးပေါ် ကိုဗစ်ရောဂါကုသဆေး PACLOVID (Nirmatrelvir 150mg; Ritonavir 100mg) (သောက်ဆေး) ကိုဆေးတစ်ဘူး (၁၀လုံးကဒ် ၃ကဒ်) ကို ကျပ် ၂၅၀,၀၀၀ ဖြင့် ရောင်းချမည်ဖြစ်ကြောင်း Pacific Medical Industries ကုမ္ပဏီလီမိတက်မှ ကြေညာထားသည်။

နောက်ဆုံးပေါ် ကိုဗစ်ရောဂါကုသဆေး (သောက်ဆေး) အဖြစ် ကမ္ဘာ့ကျန်းမာရေး အဖွဲ့အစည်း (WHO) အပါအဝင် US FDA၊ UK MHRA၊ Korea FDA၊ Singapore FDA အစရှိသည့် ကမ္ဘာ့ ဖွံ့ဖြိုးပြီးနိုင်ငံများ၏ ကျန်းမာရေး အဖွဲ့အစည်းများမှ ထောက်ခံထားသော PAXLOVID (Nirmatrelvir 150mg; Ritonavir 100mg) သောက်ဆေးအား နိုင်ငံတကာအဆင့်မီ အနောက်တိုင်းဆေးဝါးစက်ရုံ Pacific Medical Industries Ltd မှ branded generic “PACLOVID ” အမည်ဖြင့်ထုတ်လုပ် အောင်မြင်ခဲ့ပြီး Myanmar FDA မှ ထောက်ခံစာအမှတ် (2308ND012) ဖြင့် ခွင့်ပြုချက်ရရှိပြီးဖြစ်ကြောင်း ကြေညာချက်တွင်ပါရှိသည်။

ယင်းအပြင် ဆေးစတင်ရရှိပြီဖြစ်သည့်အတွက် ယနေ့မှ စတင်၍ ဝယ်ယူနိုင်ပြီဖြစ်ကြောင်းလည်း အသိပေးကြေညာထားသည်။

PACLOVID ကိုဗစ်ကုသဆေးအား ကိုဗစ်ကုသရေးဆရာဝန်များ၊ ဆေးရုံဆေးခန်းများနှင့်ဆေးဆိုင်ကြီးများအနေဖြင့် ဆရာဝန်ဆေးညွှန်းစာ ၊ ဆေးအမှာစာ request letter များဖြင့် ယနေ့ စတင်၍ဝယ်ယူနိုင်ပြီဖြစ်ကြောင်း သိရသည်။

PACLOVID ( Nirmatrelvir 150mg; Ritonavir 100mg) ဆေးသည် Covid-19 ရောဂါကြောင့် ဆေးရုံတက်ရသည့်နှုန်းလျော့နည်းစေခြင်း ၊ သေဆုံးမှုနှုန်းအား ၉၀% ထိလျော့ချပေးနိုင်ခြင်း ၊delta နှင့် omicron မျိုးစိတ်များအား (ဓါတ်ခွဲစမ်းသပ်ချက်အရ) အောင်မြင်စွာ ကုသနိုင်ခြင်း၊ အသက် ၁၂ နှစ် အထက် ကိုယ်အလေးချိန် 40kg အထက်ကလေးများအား ကုသမှုပေးနိုင်ခြင်း စသည့်ကောင်းကျိုးများရှိသည့် နောက်ဆုံးပေါ်ကိုဗစ်ကုသဆေး (သောက်ဆေး) ဖြစ်ကြောင်း သိရသည်။

#Ymg/STH
#Yangon_Media_Group

#Local_News
Published_ 15 September 2022

ရန်ကုန်တိုင်းဒေသကြီးတွင် ယခုစက်တင်ဘာလ (၁၄)ရက်တာအတွင်းကိုဗစ်ပိုးတွေ့လူနာ(၁၃၆၆)ဦးတွေ့ရှိခဲ့ရကြောင်း ကျန်းမာရေးဝန်ကြီးဌာန၏ ထုတ်ပြန်ချက်များအရ သိရသည်၊၊

စက်တင်ဘာလ(၁)ရက်မှ (၁၄)ရက်အထိ ကျန်းမာရေးဝန်ကြီးဌာန၏ ထုတ်ပြန်ချက်များအရ တစ်နိုင်ငံလုံး အတိုင်းအတာအနေဖြင့် ကိုဗစ်ပိုးတွေ့လူနာ(၂၂၃၈)ဦး အနက် ရန်ကုန်တိုင်းဒေသကြီးက ကိုဗစ်ပိုးတွေ့လူနာ (၁၃၆၆)ဦးဖြင့် အများဆုံးတွေ့ရှိနေရခြင်းဖြစ်သည်၊၊

ရန်ကုန်တိုင်းဒေသကြီးတွင် ပိုးတွေ့မှုအများဆုံးမြို့နယ်များကတော့ လှိုင်သာယာ၊ မင်္ဂလာဒုံ၊ မြောက်ဥက္ကလာ၊ မရမ်းကုန်း၊ အင်းစိန်၊ ရွှေပြည်သာမြို့နယ်များတွင် တွေ့ရှိမှုအများဆုံးဖြစ်နေပြီး လှည်းကူး၊ ဒလ၊ ဒဂုံမြို့သစ်တောင်ပိုင်း၊ ဒဂုံမြို့သစ်မြောက်ပိုင်းတွင်လည်း ပိုးတွေ့လူနာတွေ့ရှိမှုများနေကြောင်း ကျန်းမာရေးဝန်ကြီးဌာန၏ ထုတ်ပြန်ချက်အရသိရသည်၊၊

ရန်ကုန်တိုင်းတွင် ပိုးတွေ့လူနာများနေသောကြောင့် ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ (YRTC) ၏ Mask Campaign များ ဆောင်ရွက်နေသည်ဟု ထုတ်ပြန်ထားသည်၊၊

ကျန်းမာရေးဝန်ကြီးဌာနအနေဖြင့်လည်း ရန်ကုန်တိုင်းဒေသကြီးတွင် ကိုဗစ်နှင့် ပတ်သက်၍ အရေးပေါ်တုန့်ပြန်ရေးအဖွဲ့များ ဖွဲ့စည်းထားရှိခြင်း၊ ဖုန်းဖြင့် ကျန်းမာရေးဝန်ဆောင်မှုပေးသောအဖွဲ့များ ဖွဲ့စည်းပေးခြင်း ၊Home isolationထားပြီး ကုသပေးခြင်း၊ လိုအပ်ပါက ဆေးရုံနှင့်ကိုဗစ်ကုသရေးစင်တာများတွင် ကုသနိုင်အောင်ဆောင်ရွက်ပေးခြင်းများ ဆောင်ရွက်ထားကြောင်း ကျန်းမာရေးဝန်ကြီးဌာန၊ပြောရေးဆိုခွင့်ရှိသူ ဒေါက်တာသန်းနိုင်စိုး၏ ပြောပြချက်အရ သိရသည်၊၊

#ymg/tthl
#Yangon_Media_Group

#Local_News
Published_ 15 September 2022

ရှမ်းပြည်နယ်(အရှေ့ပိုင်း) တာချီလိတ်မြို့နယ်တွင် ငွေကျပ်သိန်း ၄ဝဝဝ တန်ဖိုးရှိ အိုက်စ် (မက်သ်အဖက်တမင်း) ၅ဝ ကီလို ဖမ်းဆီးရမိကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များနှင့် ပူးပေါင်းအဖွဲ့သည် စက်တင်ဘာလ ၁၂ ရက် ညနေပိုင်းတွင် တာချီလိတ်မြို့နယ်၊ မယ်ဟုတ်(ရွာသစ်)ကျေးရွာ အနီးတွင် မယ်ယန်းကျေးရွာမှ မယ်ဟုတ်(ရွာသစ်)ဘက်သို့ စိုင်းဆိုင်လူ မောင်းနှင်လာသည့် Mark-II မော်တော်ယာဉ်ကို သတင်းအရ စစ်ဆေးရန်ရပ်တန့်ခိုင်းစဉ် မောင်းနှင်ထွက်ပြေးပြီး လမ်းဘေးခြံစည်းရိုး အုတ်တံတိုင်းအား တိုက်မိ၍ ရပ်တန့်သွားခဲ့ပါတယ်။

ထို့နောက် ထိန်းသိမ်းစစ်ဆေးရှာဖွေခဲ့ရာ ယာဉ်ပေါ်မှ ဒေသကာလတန်ဖိုးငွေ ကျပ် သိန်း ၄၀၀၀ တန်ဖိုးရှိ အိုက်စ်(မက်သ်အဖက်တမင်း) ၅၀ ကီလို သိမ်းဆည်းရမိခဲ့ပါတယ်။

စိုင်းဆိုင်လူအား ဥပဒေအရ အရေးယူထားပြီး ကွင်းဆက် ပြစ်မှုကျူးလွန်သူများအား ဆက်လက်စစ်ဆေးဖော်ထုတ်လျက်ရှိကြောင်း မြန်မာနိုင်ငံရဲတပ်ဖွဲရဲ့သတင်းထုတ်ပြန်ချက်အရ သိရပါတယ်။

#ygm_mnn
#Yangon_Media_Group

#Local_News
Published _15 September 2022

ရွေးကောက်ပွဲနှင့်ပတ်သက်၍ အချိန်ကာလအခြေအနေ ကြည့်ရှုဆုံးဖြတ်မည်ဟု နစက ဥက္ကဌ က ရုရှားဖက်ဒရေးရှင်းနိုင်ငံ၊ Rossiya Segodnya သတင်းအေဂျင်စီ၊ RIA သတင်းဌာနမှ အထူးသတင်းထောက် က မေးမြန်းစဉ် ပြောကြားခဲ့သည်။

"ဖြစ်ပေါ်တိုးတက်နေတဲ့ အခြေအနေနဲ့ သုံးသပ်ဆွေးနွေးသွားတဲ့ အချက်တွေပေါ်မှာ စဉ်းစားသုံးသပ်ကြည့်တဲ့ အခါမှာ လာမယ့် ကာလတိုကာလအတွင်းမှာ ရွေးကောက်ပွဲ ကျင်းပနိုင်ခြင်းမရှိနိုင်ဟု သုံးသပ်မိပါတယ်။ အချိန်ကာလတစ်ခုအထိ ရွှေ့ဆိုင်းဖို့ရှိပါသလား"ဟု ရုရှားသတင်းထောက်က မေးမြန်းသည့်အပေါ် ယင်းက အထက်ပါအတိုင်း ပြောကြားလိုက်ခြင်းလည်း ဖြစ်သည်။

"ကျွန်တော်တို့ အခုချိန်မှာပြောဖို့ စောသေးတယ်။ နောက်ထပ်အချိန် လေးငါးလ လောက်ကျန်သေးတယ်။ ဒီအပေါ်မှာ အခြေအနေ ကြည့်ပြီးတော့မှပဲ ဆုံးဖြတ်မှာဖြစ်ပါတယ်။ နိုင်ငံရေးဆိုတာ ချက်ချင်းကောက်ပြီးတော့ ကြိုပြီးဆုံးဖြတ်လို့ မရပါဘူး။ အခြေအနေကို ကျွန်တော်တို့ကြည့်ရမှာ ဖြစ်ပါတယ်"ဟု ၎င်းကပြောသည်။

အင်တာဗျူးပြုလုပ်သည့် အစပိုင်းတွင် "လက်ရှိမြန်မာနိုင်ငံရဲ့ စီးပွားရေးအခြေအနေအတွင်းမှာ ရွေးကောက်ပွဲ ပြန်လည်ကျင်းပဖို့ ဖြစ်နိုင်မလား၊ သင့်တော်မလား"ဟု မေးမြန်းစဉ်ကလည်း အတတ်နိုင်ဆုံးကျွန်တော်ကြိုးစားဆောင်ရွက်နေကြောင်းနှင့် ရွေးကောက်ပွဲဖြစ်ရေး၊ မဖြစ်ရေးကိစ္စမှာ ငြိမ်းချမ်းရေးနှင့် စီးပွားရေး အားကောင်းလာရန်၊ နိုင်ငံရေးတည်ငြိမ်အေးချမ်းရန် ဟူသည့်အပေါ် မူတည်ကြောင်း၊ သို့သော်လည်း အတတ်နိုင်ဆုံး ပြောထားသည့်အတိုင်း ရွေးကောက်ပွဲဖြစ်အောင် ကြိုးစားဆောင်ရွက်နေကြောင်း ပြောကြားထားသည်။

"မြို့နယ်တစ်ခုမှာ ရွေးကောက်ပွဲလုပ်တိုင်း လုပ်နိုင်တဲ့အရေအတွက်ကကျသွားတယ်ဆိုရင် အဲဒီနေရာမှာရှိတဲ့ ပြည်သူတွေရဲ့ ဒီမိုကရေစီအခွင့်အရေး ဆုံးရှုံးတာကို ဖော်ပြတာဖြစ်တယ်။ တကယ်တော့ ရွေးကောက်ပွဲမှာ ပြည်သူတွေအားလုံး ဒီမိုကရေစီ အခွင့်အရေးကို ရပိုင်ခွင့်ရှိပါတယ်။ ကျွန်တော့်ရဲ့ ရည်ရွယ်ချက်ကတော့ တစ်နိုင်ငံလုံး အကြားအလပ်မရှိ ရွေးကောက်ပွဲပြုလုပ်နိုင်ရေး ဖြစ်ပါတယ်။ ဒါကြောင့် စောစောက ခင်ဗျားမေးခဲ့တဲ့မေးခွန်းထဲက ငြိမ်းချမ်းရေးနဲ့ ပတ်သက်တဲ့ မေးခွန်းတစ်ခုပါတယ်။ ဒါတွေက ရွေးကောက်ပွဲနဲ့ ဆက်စပ်နေပါတယ်။ ဒါကြောင့် ကျွန်တော်ငြိမ်းချမ်းရေးရအောင် လုပ်ပြီးတော့မှ အဲဒီနယ်မြေတွေမှာရှိတဲ့ ပြည်သူတွေ ရွေးကောက်ပွဲကို ဝင်နိုင်အောင် ကြိုးစားနေတာဖြစ်ပါတယ်။ ဒါကြောင့် အတတ်နိုင်ဆုံးတော့ ကျွန်တော်ကြိုးစား ဆောင်ရွက်နေပါတယ်။ ရွေးကောက်ပွဲဖြစ်ရေး၊ မဖြစ်ရေးဆိုတာကတော့ ငြိမ်းချမ်းရေးနဲ့ စီးပွားရေး အားကောင်းလာဖို့ နိုင်ငံရေးတည်ငြိမ်အေးချမ်းဖို့ ဒီအပေါ်မှာ အများကြီးတည်ပါတယ်။ တတ်နိုင်သလောက် ကျွန်တော်တို့ ပြောထားတဲ့အတိုင်း ရွေးကောက်ပွဲဖြစ်အောင် ကြိုးစားဆောင်ရွက်နေတယ်ဆိုတာ ပြောလိုပါတယ်။ ဒီမှာလည်းတစ်ချက်ရှိတာပေါ့၊ ရွေးကောက်ပွဲဆိုတာ လွတ်လပ်ပြီး တရားမျှတတဲ့ ရွေးကောက်ပွဲ ဖြစ်ဖို့ပဲ။ နောက်ပြီးတော့ အပြင်ကနေ ဖိအားတွေပေးပြီးတော့မှ မဲထည့်စေတဲ့ဖြစ်ရပ်မျိုး မဖြစ်ဖို့လိုပါတယ်။ ပြည်သူတွေ လွတ်လွတ်လပ်လပ် မဲပေးပိုင်ခွင့်ရှိဖို့ သိပ်အရေးကြီးပါတယ်၊ ဒါမှသာ သူတို့ရဲ့ ခံစားချက်ကို သူတို့ဆန္ဒဖော်ထုတ်ခွင့်ရမှာ ဖြစ်ပါတယ်။ ဒါက ဒီဟာကိုရအောင် ကျွန်တော်တို့ကြိုးစားနေတာ ဖြစ်ပါတယ်"ဟု နစက ဥက္ကဌက ဆိုသည်။

မြန်မာနိုင်ငံတွင်၂၀၁၀ ပြည့်နှစ်က ပထမအကြိမ်၊ ၂၀၁၅ ခုနှစ်က ဒုတိယအကြိမ်၊ ၂၀၂၀ ပြည့်နှစ်ကတတိယအကြိမ် ရွေးကောက်ပွဲများ ပြုလုပ်ခဲ့ကြောင်း၊ ပထမအကြိမ်က ရွေးကောက်ပွဲကို မြို့နယ်ပေါင်း ၃၃၀ အနက် ၃၂၅ မြို့နယ် ပြုလုပ်နိုင်ခဲ့ကာ ဒုတိယအကြိမ်တွင် မြို့နယ်ပေါင်း ၃၃၀ အနက် ၃၂၃ မြို့နယ် ပြုလုပ်နိုင်ခဲ့ကြောင်း၊ တတိယအကြိမ်ပြုလုပ်စဉ်က မြို့နယ်ပေါင်း ၃၃၀ အနက် ၃၁၅ မြို့နယ်သာပြုလုပ်နိုင်ခဲ့ကြောင်းလည်း ၎င်းက ထည့်သွင်းပြောကြားသွားသည်။

"ဒီမိုကရေစီမှာ ရွေးကောက်ပွဲက သိပ်အရေးကြီးပါတယ်။ ရွေးကောက်ပွဲဖြစ်ပြီးမှသာ ရွေးကောက်ပွဲက တက်လာတဲ့ အမတ်တွေနဲ့ အုပ်ချုပ်ရေးအဖွဲ့တွေ ဖွဲ့စည်းပြီး တခြားနိုင်ငံတော် အဆင့်က ဖွဲ့စည်းပြီး တာဝန်ပေးတာတို့၊ ရွေးချယ်တာတို့ လုပ်ပါတယ်။ ဆိုလိုတာကတော့ ပြည်သူတွေက ဒီအခွင့်အရေးကို အားလုံးရဖို့ လိုတယ်"ဟု နစက ဥက္ကဌ ဗိုလ်ချုပ်မှူးကြီးမင်းအောင်လှိုင်က ပြောသည်။

 photo-moi

#ymg/mt
#Yangon_Media_Group

#Local_News
Published _ 15 September 2022

မြန်မာ့မီးရထားမှ ပြေးဆွဲနေသည့် ရထားခရီးစဉ်များထဲမှ ကြိုတင်လက်မှတ်များကို မှတ်ပုံတင်မူရင်းပြသပြီးမှ ဝယ်ယူရရှိမှာဖြစ်ကြောင်း ရန်ကုန်ဘူတာကြီး မှသိရသည်။

ကြိုတင်ရထားလက်မှတ်တွေကို ရန်ကုန်မြို့၊ ဗိုလ်ချုပ်လမ်းက ရန်ကုန်ဘူတာကြီး ကြိုတင်လက်မှတ်ရုံမှာ နေ့စဉ် မနက် ၈ နာရီမှ မွန်းတည့် ၁၂ နာရီအတွင်း ရောင်းချပေးနေပြီး ထိုခရီးစဉ်များထဲမှ ကြိုတင်လက် မှတ်များကို မှတ်ပုံတင်မူရင်းပြသပြီးမှသာ ဝယ်ယူနိုင်မည်ဟု ရန်ကုန်ဘူတာကြီးရဲ့ ရုံပိုင်ချုပ်ကြီး ဦးသောင်းထိုက်က YMG ကို ပြောကြားခဲ့သည်။

"ကြိုတင်ရထား လက်မှတ်ဝယ်ယူရင် အရင်ကလို မှတ်ပုံတင်မူရင်း ပြသပြီး ဝယ်ယူရမှာဖြစ်ပြီး ရပ်ကွက် ထောက်ခံစာ အိမ်ထောင်စုစာရင်းတွေနဲ့ ဝယ်ယူခွင့်ပြုမှာ မဟုတ်တော့ပါဘူး၊ ဒီဟာစနေတာကြာပါပြီ လူသိနည်းနေသေးတာပါ" ဟု ရုံပိုင်ချုပ်ကြီးက ဆိုသည်။

လက်ရှိမှာ ကြိုတင်လက်မှတ်တွေကို အမြန်ရထားခရီးစဉ်အားလုံးအတွက် ဝယ်ယူနိုင်ကြောင်းလည်း ၎င်းကဆက်ပြောသည်။

လတ်တလောတွင် ရန်ကုန်မြို့တွင်း မြို့ပတ်ရထား (၇) စင်းနှင့် နယ်ဝေး အမြန်ရထားတွေကို ပုံမှန်ပြေးဆွဲပေးနေပြီး နေ့စဉ်ခရီးသည်ထောင်ချီ စီးနင်းနေလျှက်ရှိကြောင်းလည်း ယင်းမှသိရသည်။

#ymg /NN
#Yangon_Media_Group