အနိမ့်ပျံသန်းမှုစီးပွားရေးနဲ့ လေကြောင်းကဏ္ဍတို့မှာ တိုးတက်ရန် လုပ်ဆောင်နေတဲ့ တရုတ်နိုင်ငံမှာ ဒရုန်းတွေကို နည်းလမ်းအမျိုးမျိုးဖြင့် အသုံးပြုနေကြပြီး ပိုမိုထိရောက်မှုရှိစေရန် ကြိုးပမ်းလာပါတယ်။
ဝန်ကြီးဌာန ၄ ခုမှထုတ်ပြန်တဲ့ ၂၀၂၄ -၂၀၃၀ လေကြောင်းကိရိယာပစ္စည်း ဆန်းသစ်တီထွင်ခြင်းနဲ့ အသုံးချခြင်းအတွက် အစီအစဥ်မှာ လေကြောင်းစက်မှုလုပ်ငန်း ဂေဟစနစ်ကို ထိရောက်မှုရှိစေရန် ရည်ရွယ်ကာ အနိမ့်ပျံသန်းခြင်း စီးပွားရေးမှာ တွန်းအားပေးသွားမှာ ဖြစ်ပါတယ်။
#Asia_Development
#Published_ 03 April 2024
#YMG_News #Yangon_Times #Yangon_Media_Group

Published_ 03 April 2024

ယခုရက်ပိုင်းတွင် နေ့အပူချိန်များတိုးနေပြီး ချောက်မြို့တွင် ၄၅ ဒီဂရီဆဲလ်စီးယပ်၊ ညောင်ဦး မြို့တွင် ၄၄ ဒီဂရီဆဲလ်စီးယပ်၊ မြင်းခြံမြို့၊ မင်းဘူးမြို့နှင့် ဆင်ဖြူကျွန်းမြို့တို့တွင် ၄၃ ဒီဂရီဆဲလ်စီးယပ်စီတို့ ရှိခဲ့ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာနမှသိရသည်။

နောက်(၂)ရက် ဧပြီ(၄)ရက်(၅)ရက်အတွက်ခန့်မှန်းချက်အဖြစ်နေပြည်တော်၊ စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ ရှမ်းပြည်နယ်၊ ကယားပြည်နယ်နှင့် ကရင်ပြည်နယ်တို့တွင် နေ့အပူချိန်များ အနည်းငယ် တိုးနေမည်ဖြစ်သည် ဟုဆိုသည်။

လွန်ခဲ့သော(၂၄)နာရီအတွင်းက ကချင်ပြည်နယ်တွင် နေရာကျဲကျဲနှင့် စစ်ကိုင်းတိုင်းဒေသကြီးအထက်ပိုင်းနှင့် ချင်းပြည်နယ်တို့တွင် နေရာကွက်ကျား မိုးထစ်ချုန်းရွာခဲ့သည်။ ပဲခူးတိုင်းဒေသကြီးနှင့် ဧရာဝတီတိုင်း ဒေသကြီးတို့တွင် အများအားဖြင့် သာယာခဲ့ပြီး၊ ကျန်တိုင်းဒေသကြီးနှင့် ပြည်နယ်တို့တွင် တိမ်အသင့်အတင့် ဖြစ်ထွန်းခဲ့သည်။ 

နေ့အပူချိန်များမှာ နေပြည်တော်၊ စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊ မကွေးတိုင်းဒေသကြီးနှင့် ရှမ်းပြည်နယ်(မြောက်ပိုင်းနှင့် အရှေ့ပိုင်း)တို့တွင် ဧပြီ လ၏ ပျမ်းမျှအပူချိန်တို့ထက် ၃ ဒီဂရီဆဲလ်စီးယပ်မှ ၄ ဒီဂရီဆဲလ်စီးယပ်အထိနှင့် ပဲခူးတိုင်းဒေသကြီး၊ တနင်္သာရီတိုင်းဒေသကြီး၊ ရှမ်းပြည်နယ် (တောင်ပိုင်း)၊ ကယားပြည်နယ်နှင့် ကရင်ပြည်နယ်တို့တွင် ဧပြီလ၏ ပျမ်းမျှအပူချိန်တို့ထက် ၂ ဒီဂရီဆဲလ်စီးယပ်ပိုခဲ့ပြီး၊ ကျန်တိုင်းဒေသကြီးနှင့် ပြည်နယ်တို့တွင် ဧပြီလ၏ ပျမ်းမျှအပူချိန်ခန့်သာ ရှိခဲ့ကြောင်းသိရသည်။

မနက်ဖြန်ဧပြီ(၄)ရက်နံနက်အထိခန့်မှန်းချက်အနေဖြင့် စစ်ကိုင်းတိုင်းဒေသကြီးအထက်ပိုင်း၊ ကချင်ပြည်နယ်၊ ရှမ်းပြည်နယ်(မြောက်ပိုင်း)နှင့် ချင်းပြည်နယ်တို့တွင် နေရာ ကွက်ကျား မိုးထစ်ချုန်းရွာနိုင်သည်ဟု ခန့်မှန်းထားကြောင်း သိရသည်။
Yangon_Times/tthl
#Local_News
#Published_ 03 April 2024
#YMG_News #Yangon_Times #Yangon_Media_Group

ယခုနှစ်မှာ ပွင့်ဖြူနဲ့ စလင်းတို့ဘက်က လာရောက်ရောင်းချမှု ပိုများတယ် စင်တာတစ်ခုမှာ တစ်ရက်ကို တင်းပေါင်း ၂၀၀၀ကျော် ၃၀၀၀လာရောင်းတယ်၊ ဒါပေမယ့် ဘာအခက်ခဲဖြစ်နေလဲဆိုတော့ ပဲအိတ်ကို ထမ်းချဖို့ ချင်တွယ်တာတို့ လုပ်ပေးတဲ့ အလုပ်သမားရှာမရဘူး လုပ်အားခပိုပေးလဲ ကျွမ်းကျင်တဲ့ လုပ်သားမဟုတ်တော့ အလုပ်က ခရီးမရောက်ဖူး အဲ့တော့ ကုလားစုပေါင်းရောင်းချပွဲမှာ ကုန်ကို တိုးပြီး ဝယ်ချင်ပေမယ့် အလုပ်သမား အခက်ခဲကြောင့် စင်တာတစ်ခုမှာ တစ်ရက်ကို တင်း၂၀၀၀လောက်ပဲ ဝယ်နိုင်သလို ဖြစ်နေတယ်။
Yangon_Times/LW
#Local_News
#Published_ 03 April 2024
#YMG_News #Yangon_Times #Yangon_Media_Group

မှတ်ပုံမတင်ရင်‌ မေလထဲမှာပုဂ္ဂလိက ကျောင်းတွေ ယာယီပိတ်သိမ်းခံရမှာဖြစ်လို့ အခုရက်ပိုင်းထဲမှာ မှတ်ပုံလာတင်တဲ့ ပုဂ္ဂလိကကျောင်းတွေ‌ရော KMD လို အသက်မွေးဝမ်းကျောင်း သင်တန်းကျောင်းတွေပါ ရာချီပြီးတော့ မှတ်ပုံလာတင်ကြတယ်။
Yangon_Times/tthl
#Local_News
#Published_ 03 April 2024
#YMG_News #Yangon_Times #Yangon_Media_Group

ကချင်ပြည်နယ် ပူတာအိုမှာရှိတဲ့ ရေခဲတောင်ခရီးစဉ်ကို နယ်မြေအခြေနေနဲ့ လမ်းပန်းဆက်သွယ်ရေး အခက်ခဲတွေ ကြောင့် ယခုဧပြီလမှာ ရေခဲတောင်တတ်တဲ့ ခရီးစဉ် ယာယီရပ်နားထားတယ်လို့ ရေခဲတောင် ခရီးသွားပိုဆောင်ရေး လုပ်ငန်း လုပ်ကိုင်သူတွေထံက သိရပါတယ်
Yangon_Times/LW
#Local_News
#Published_ 03 April 2024
#YMG_News #Yangon_Times #Yangon_Media_Group

ယခု ၂၀၂၃-၂၀၂၄ ဘဏ္ဍာနှစ်အတွင်း ပြည်ပနိုင်ငံများသို့ ရော်ဘာတန်ချိန် နှစ်သိန်းနီးပါးတင်ပို့ ထားတယ်လို့ မြန်မာနိုင်ငံရော်ဘာစိုက်ပျိုးထုတ်လုပ်တင်ပို့ ရောင်းချသူများအသင်းမှ သိရပါတယ်။
Yangon_Times/NN
#Local_News
#Published_ 03 April 2024
#YMG_News #Yangon_Times #Yangon_Media_Group

ဒီနှစ်သင်္ကြန်မှာတော့ ရာသီဥတုပူပြင်းတဲ့အတွက် ရေတံခွန်‌တွေရှိတဲ့ ပြင်ဦးလွင် ဓာတ်တော်ချိုင့်ရေတံခွန်၊ ပွဲ‌ကောက်ရေတံခွန်(ခေါ်)BE‌ ရေတံခွန်၊ ပိတ်ချင်းမြောင်ရေတံခွန်အစရှိတဲ့ ရေတံခွန်တွေကို လာလည်သူအများဆုံးဖြစ်လာနိုင်တယ်။
Yangon_Times/tthl
#Local_News
#Published_ 03 April 2024
#YMG_News #Yangon_Times #Yangon_Media_Group

Published- 03 April 2024

သီတဂူစက္ခုဒါနဆေးရုံ (ရန်ကုန်)တွင် ငါးရက်တိုင်တိုင်မျက်စိဝေဒနာရှင်များအားယခုလဆန်းပိုင်း၌  အခမဲ့ခွဲစိတ်ကုသပေးနေကြောင်းယင်းဆေးရုံမှ သိရသည်။

အဆိုပါရန်ကုန်တိုင်းဒေသကြီး၊ ဒဂုံမြို့သစ်(မြောက်ပိုင်း) မြို့နယ်၊ ပင်လုံလမ်းရှိ သီတဂူဗုဒ္ဓတက္ကသိုလ် (ရန်ကုန်)
ရှစ်ထပ်ကျောင်းဆောင် သီတဂူစက္ခုဒါန အဆင့်မြင့်ဆေးရုံကြီးတွင် ဧပြီ၁ရက်မှ ၅ရက်အထိဒေသခံပြည်သူများနှင့်
အနယ်နယ်အရပ်ရပ်မှလာရောက်ပြသသည့် မျက်စိဝေဒနာရှင်များအားအခမဲ့ခွဲစိတ်ကုသပေးနေခြင်းဖြစ်သည်။

သီတဂူ စက္ခုဒါနဆေးရုံ (ရန်ကုန်)တွင် မျက်စိဝေဒနာရှင်များအား ပဉ္စမအကြိမ်အဖြစ် ဧပြီ ၁ ရက်မှ  ၅ ရက် အထိ စမ်းသပ်ခြင်း၊ ခွဲစိတ်ကုသခြင်းများ ဆောင်ရွက်ပေးမည်ဖြစ်ရာ စတုတ္ထအကြိမ်ကကျန်ရှိခဲ့သည့် မျက်စိဝေဒနာရှင်   ၃၅၀ ဦးကိုလည်း စမ်းသပ်ခွဲစိတ်ကုသပေးမည်ဖြစ်ကြောင်းသိရသည်။
YMG/NN
Yangon-Times
YMG/ NN
#Local_News
#Published_ 03 April 2024
#YMG_News #Yangon_Times #Yangon_Media_Group

Published 03 April 2024

ရန်ကုန်အပြည်ပြည်ဆိုင်ရာဆိပ်ကမ်းသို့ ဧပြီလအတွင်း နိုင်ငံတကာကုန်သွယ်သင်္ဘောကြီး (၅၀)စီး ဆိုက်ကပ်ကုန်သွယ်မည် ဖြစ်ကြောင်းမြန်မာ့ဆိပ်ကမ်း အာဏာပိုင်အဖွဲ့မှသိရသည်။
 
ထိုသို့နိုင်ငံတကာ သင်္ဘောလိုင်းများဆိုက်ကပ်ရာတွင်MAERSK LINEမှ(၇)စီး ၊S, I, T, Cသင်္ဘောလိုင်းမှ(၎)စီး ၊ EVER GREEN LINE  သင်္ဘောလိုင်းမှ(၃)စီး၊I.A.L LINE သင်္ဘောလိုင်မှ(၁)စီး၊ BLPL သင်္ဘောလိုင်းမှ(၃)စီး၊R.C.L LINE သင်္ဘောလိုင်းမှ(၃)စီးLAND AND SEA သင်္ဘောလိုင်းမှ(၁)စီး၊ CMA CGM LINEမှ(၎)စီး ၊(COSCO)သင်္ဘောလိုင်းမှ(၅)စီး၊ONE  သင်္ဘောလိုင်းမှ(၂)စီး၊ T12သင်္ဘောလိုင်းမှ(၎)စီး၊BAY  သင်္ဘောလိုင်းမှ(၁)စီး ၊SAMUDERA SHIPPING LINEမှ(၆)စီး ၊MSCမှ(၎)စီးနှင့်P.I.Lမှ(၂)စီးစသည့်စုစုပေါင်းသင်္ဘောစီးရေ (၅၀)စီးဝင်ရောက်ကုန်သွယ်မည်ဖြစ်သည်။

ပြီးခဲ့သည့်ဇန်နဝါရီလတွင်လည်း ရန်ကုန်အပြည်ပြည်ဆိုင်ရာဆိပ်ကမ်းသို့ နိုင်ငံတကာကုန်သွယ်သင်္ဘောကြီး(၄၉)စီး၊​ဖေ​ဖော်ဝါရီလတွင်(၅၃)စီးနှင့်မတ်လတွင်(၅၅)စီးဆိုက်ကပ်ကုန်သွယ်ခဲ့ပြီးဖြစ်ကြောင်းသိရသည်။
 
နိုင်ငံတကာနှင့်ကုန်သွယ်မှုများကို ရန်ကုန်အပြည်ပြည်ဆိုင်ရာဆိပ်ကမ်းမှ အလျား မီတာ ၂၀ဝ၊ တန်ချိန် ၃၀ဝ၀ ရှိသည့် အပြည်ပြည်ဆိုင်ရာ ကုန်တင်သင်္ဘော ဆိုက်ကပ်နိုင်သော ဆိပ်ခံတံတား ၂၇ စင်းဖြင့် ဆောင်ရွက်ခဲ့ခြင်းဖြစ်သည့်
အပြင် သီလဝါအပြည်ပြည်ဆိုင်ရာ ဆိပ်ကမ်းများမှလည်း အလျားမီတာ ၂၅၀၊ တန်ချိန် ၃၅၀ဝ ရှိသည့် အပြည်ပြည်ဆိုင်ရာကုန်တင်သင်္ဘော ဆိုက်ကပ်နိုင်သော ဆိပ်ခံတံတား ၁၉ စင်းတို့ဖြင့် ဝန်ဆောင်မှုပေးနေခြင်းဖြစ်ကြောင်း သိရသည်။
YMG/ NN
#Local_News
#Published_ 03 April 2024
#YMG_News #Yangon_Times #Yangon_Media_Group

Published_ 03 April 2024

ထိုင်ဝမ်ငလျင် နောက်ဆက်တွဲအဖြစ် ဆူနာမီဖြစ်နိုင်၍ ဂျပန်ရောက်မြန်မာများကို တိုကျိုမြို့ရှိ မြန််မာသံရုံးမှသတိပေးချက်ထုတ်ပြန်လိုက်ကြောင်း သိရသည်။

ထုတ်ပြန်ချက်တွင် မဂ္ဂနီကျူ ၇.၅ ရှိသော အင်းအားကြီး ငလျင်တစ်ခုသည် ထိုင်ဝမ်ဒေသကို ဗဟိုပြု၍ ယနေ့ ၃.၄.၂၀၂၄ ရက်နေ့ နံနက် ၉.၀၄ နာရီတွင် လှုပ်ခတ်ခဲ့ကြောင်း နောက်ဆက်တွဲအနေဖြင့် Okinawa ကျွန်း ကမ်းရိုးတန်းတစ်လျှောက်အား ဆူနာမီ သတိပေးချက်များ ထုတ်ပြန်ထားရှိကြောင်း

အဆိုပါဒေသတွင် နေထိုင်ကြသည့် မြန်မာနိုင်ငံသားများအနေဖြင့် ဒေသအာဏာပိုင်များ၏ အချိန်နှင့်တစ်ပြေးညီ ထုတ်ပြန်ချက်များကို အထူးအလေးထားစောင့်ကြည့်ရန် လိုအပ်‌ကြောင်း

သဘာဝဘေးအန္တရာယ်နှင့်ပတ်သက်၍ အကူအညီ လိုအပ်ပါက သံရုံး၏ Hot Line ဖုန်းနံပါတ် 070-4413-7383 သို့ဆက်သွယ်အကူအညီ တောင်းခံနိုင်ကြောင်း အသိပေးထုတ်ပြန်ထား ကြောင်းသိရသည်။
Yangon_Times/tthl
#Local_News
#Published_ 03 April 2024
#YMG_News #Yangon_Times #Yangon_Media_Group

Published 3 April 2024

ပဲခူးတိုင်းဒေသကြီး၊ ညောင်လေးပင်ခရိုင်၊ ကျောက်တံခါးမြို့နယ်၊ ပဲနွယ်ကုန်းမြို့ ပြည်တော်သာရပ်ကွက်ရှိ ပဲနွယ်ကုန်းစည်ပင်သာယာစျေး ကြီး မီးလောင်မှုဖြစ်ပွားခဲ့ကာ ဆိုင်ခန်း များအပြင် အနီးနားရှိ နေအိမ် များပါ မီးလောင်ဆုံးရှုံးခဲ့ကြောင်း ပရဟိတအသင်းများနှင့်ဒေသခံများ ထံ က သိရသည်။

ဧပြီ ၂ရက် ညနေ ၆နာရီခွဲ ခန့် က လောင်ကျွမ်း ခဲ့ ပြီး ဈေးကြီး အတွင်းရှိ ဆိုင်ခန်း ၄၀၀ကျော် မီးလောင် ဆုံးရှုံး ခဲ့သည့် အပြင် အနီးနားရှိ နေအိမ် အချို့လဲ မီးလောင်ကျွမ်းခဲ့ကြောင်း သိရသည်။

""ဈေးထဲ မှာ က ဆိုင် ခန်း ၄၉၀ကျော်ရှိတယ် အခု မီးထဲ ကို ၄၃၀ကျော်လောက် ပါသွားတယ်ဈေးအနီး လူနေအိမ် ၉လုံးလောက်ပါသွားတယ် စာရင်း အတိအကျ ကိုတော့ တာဝန်ရှိသူတွေ စစ်ဆေးနေဆဲပါ""ဟု ပဲနွယ်ကုန်းမြို့နယ်ရှိ ဒေသခံ တစ်ဦးကပြောသည်။

အဆိုပါ ပဲနွယ်ကုန်းဈေးကြီး မီးလောင်မှု မှာ မီးများသောကြောင့် ပဲခူးတိုင်းအရှေ့ခြမ်း ရှိ မီးသတ်ကားများ ပရဟိတ ကားများ မီးငြိမ်းသတ်ခဲ့ရာ ည ၁၂ နာရီလောက်အထိ မီးငြိမ်းသတ်ခဲ့ရကြောင်း သိရသည်။

"" မီးက တအား များတယ် ပဲခူးတိုင်း ကမီးသတ်ကားတွေ ပရဟိတ ကားတွေ အကုန် ဆင်းလာတာ ဒါပေမယ့် ရေအရင်းမြစ်က လိုအပ်သလောက် မြန်မြန် မရ ဘူး ဖြစ်သွားတယ် ည၁၂နာရီ လောက်မှာတော့ မီးငြိမ်းတယ် ဒါပေမယ့် ဒီနေ့ မနက်အထိ တော့ မီးကျွင်း မီးကျန်တွေ ကို ငြှိမ်းသတ်နေရတုန်းပဲ ""ဟု တောင်ငူအခြေစိုက်ပရဟတိအသင်းမှ တာဝန်ရှိသူတစ်ဦးက ပြောသည်။

မီးလောင်မှုကြောင့် ဈေးသူ ဈေးသားများ နှင်​့ ဒေသခံ ပြည်သူ များ ထိခိုက်ဒဏ်ရာ ရရှိ မှု မရှိခဲ့ကြောင်း မီးများပြီး မီးလောင်ချိန် ကြာမြင့်သောကြောင့် မီးသတ်သမား အချို့ ထိခိုက်ဒဏ်ရာ အနည်းငယ်ရရှိခဲ့ကြောင်း သိရသည်။
Yangon_Times/LW
#Local_News
#Published_ 03 April 2024
#YMG_News #Yangon_Times #Yangon_Media_Group

Published 03 April 2024

ဦးနှောက်ကို အပြင်းအထန် ထိခိုက်ဖူးသူတွေဟာ ထိခိုက်ဒဏ်ရာအပြင် စိတ်ဓာတ်ကျခြင်းနဲ့ အခြားသော စိတ်ပိုင်းဆိုင်ရာ ပြဿနာများ ခံစားရနိုင်ပါတယ်။

အမေရိကန်မှာ လေ့လာမှုအသေးစားတစ်ခု ပြုလုပ်ခဲ့ရာမှာ ဒဏ်ရာရရှိပြီးနောက် စိတ်ကျရောဂါပျောက်ဆေးများ အသုံးပြုရာ ဝေဒနာသက်သာကြကြောင်း တွေ့ရှိထားပါတယ်။

 အသက် ၂၄ နှစ်ရှိ ရှန်နွန်ဟာ ၂၀၂၀ ခုနှစ်က လန်ဒန်အရှေ့ဘက် ဆောက်လုပ်ရေး လုပ်ငန်းခွင်တစ်ခုမှာ အလုပ်လုပ်နေစဉ် မြေတူးစက်ဖြင့် ဦးခေါင်းဘေးကို ထိခိုက်ခဲ့ပါတယ်။

မျက်နှာအစိတ်အပိုင်းများကို ခွဲစိတ်မှုများ ပြုလုပ်ခဲ့ရပြီး မေးရိုးများကို ကြိုးများဖြင့် ချိတ်ဆက်ထားရပါတယ်။

စိတ်ကျန်းမာရေးကိုလည်း အလွန်သက်ရောက်ခဲ့ပြီး အလွန်စိတ်ဓာတ် ကျခဲ့ကြောင်း၊ အပြင်မသွားနိုင် ကိုယ့်ကိုယ်ကို မထိန်းသိမ်းနိုင်ဘဲ ကိုယ်အလေးချိန်တက်လာကြောင်း ရှန်နွန်က ပြောပြပါတယ်။

ရုပ်ပိုင်းဆိုင်ရာ ထိခိုက်မှုများကို ကုသကာ ပြန်လည်ထူထောင်ခြင်းများ ဦးတည်လုပ်ဆောင်ခဲ့ပေမယ့် စိတ်ဓာတ်ကျခြင်း အခြေအနေကလည်း များစွာသက်ရောက်နေပါတယ်။

သုတေသန လေ့လာချက်အရလည်း ဦးခေါင်းထိခိုက်မှုကြောင့် ဆေးရုံတက်ရသူ တဝက်လောက်မှာ စိတ်ကျခြင်းဝေဒနာ ခံစားရကြောင်း ဝန်ခံထားကာ ပုံမှန်လူတွေထက် ခံစားရနိုင်ခြေ ၁၀ ဆလောက် ပိုများနေပါတယ်။

အလုပ်အကိုင်၊ ပညာရေး၊ မေတ္တာရေးတို့မှာ ဆိုးဆိုးရွားရွား ကြုံတွေ့ပြီးနောက်မှာလည်း စိတ်ထိခိုက်မှု အတိုင်းအတာတစ်ခုအထိ ခံစားရနိုင်ပါတယ်။

ဦးနှောက်ကို ပြင်းပြင်းထန်ထန် ထိခိုက်မိပါက ဦးနှောက်ထဲက အာရုံကြောကွန်ရက်တွေ ထိခိုက်နိုင်ပါတယ်။

စိတ်ကျရောဂါပျောက်ဆေး SSRI တွေက စမ်းသပ်ချက်ထဲမှာ ဘယ်လိုအလုပ်လုပ်လဲဆိုတာ မသိရပါဘူး။

ထိုဆေးတွေက စိတ်ကျဝေဒနာ အလွန်ပြင်းထန်သူတွေမှာ ရေတိုအလုပ်ဖြစ်ပေမယ့် ဦးနှောက်ရောင်ရမ်းခြင်းနဲ့ ဆက်စပ်နေနိုင်ပါတယ်။

စိတ်ဓာတ်ကျတဲ့အခါ ကိုယ်တိုင်ခံစားရရုံမက မေတ္တာရေး၊ အလုပ်အကိုင်၊ ပညာရေးတို့မှာပါ သက်ရောက်လာနိုင်ပါတယ်။
Source: BBC News.
#World_Health
#Published_ 03 April 2024
#YMG_News #Yangon_Times #Yangon_Media_Group