#LocalNews
Published - 18 June 2022

ပြည်တွင်းမှာရှိတဲ့ ဘဏ်လုပ်ငန်းတွေရဲ့ဝန်ဆောင်မှုလုပ်ငန်းဟာ ပုံမှန်လည်ပတ်နေပြီလို ဗဟိုဘဏ်ကနေ သိရပါတယ်။

#Yangon_Media_Group

#Local_News
Published - 18 June 2022

သွေးလွန်တုပ်ကွေးမဖြစ်အောင် ကလေးငယ်တွေကိုနေအိမ်တွေမှာသာမက မူကြိုတွေ၊ စာသင်ကျောင်းတွေမှာပါ ခြင်မကိုက်အောင်ထားဖို့လိုတယ်လို့ ကလေးအထူးကုဆရာဝန်ကြီးဒေါက်တာခင်ခင်ထားက ပြောပါတယ်၊၊

#Yangon_Media_Group

#LocalNews
Published - 18 June 2022

မဲခေါင်-လန်ချမ်းအထူးရန်ပုံငွေကျပ်(၆၇၄.၃၁၉) သန်းဖြင့် တည်ဆောက်မည့်ရှမ်းပြည်နယ်တိုင်းရင်းသားရေးရာနှင့် သက်မွေးသင်တန်းစင်တာအတွက် တင်ဒါခေါ်ယူလိုက်ကြောင်းသိရသည်၊၊

ဇွန်လ(၁၈)ရက်တွင် တိုင်းရင်းသားလူမျိုးများရေးရာ ဝန်ကြီးဌာနက နိုင်ငံပိုင်သတင်းစာမှ တစ်ဆင့် တင်ဒါခေါ်ယူခြင်းဖြစ်သည်၊၊

ရှမ်းပြည်နယ်တိုင်းရင်းသားရေးရာနှင့် သက်မွေးသင်တန်းစင်တာအဆောက်အဦ သံကူကွန်ကရစ် နှစ်ထပ်၊ ရေမီးမိလ္လာသွယ်တန်းခြင်း အပါအဝင် ရှမ်းပြည်နယ်၊ တောင်ကြီးမြို့နယ်၊ အေးသာယာမြို့၊ အမှတ်(၂)ရပ်ကွက်၊ အကွက်အမှတ်(၂၂)၊ ခပေါင်းရေကြည်ရပ်၌ ဆောက်လုပ်ရန် တင်ဒါခေါ်ယူခြင်းဖြစ်ကြောင်း ဖော်ပြပါရှိသည်၊၊

တင်ဒါလျှောက်လွှာပုံစံကို ဇွန်လ(၂၀)ရက်ကစပြီး ရောင်းချပေးမှာဖြစ်ပြီး ဇွန်လ(၂၀)ရက်မှဇူလိုင်(၂၀) ရက်အထိနေပြည်တော် ရုံးအမှတ်(၁၄)၊ တိုင်းရင်းသား အခွင့်အရေးများကာကွယ်စောင့်ရှောက်ရေးဦးစီးဌာနတွင် လျှောက်ထားနိုင်ကြောင်းနှင့် ဖုန်း ၀၆၇-၄၀၉၅၄၈ ကိုဆက်သွယ်မေးမြန်းနိုင်ကြောင်းသိရသည်၊၊

ymg/tthl
#Yangon_Media_Group

Published 18 June 2022

အိန္ဒိယစစ်တပ်ရဲ့ တပ်သားခန့်ထားမှုအစီအစဉ်အပေါ် လူစုလူဝေးနှင့် အကြမ်းဖက် ကန့်ကွက်ဆန္ဒပြတာတွေကို ရပ်တန့်သွားစေဖို့အတွက် အိန္ဒိယနိုင်ငံ အရှေ့ပိုင်း ဘီဟာပြည်နယ်ရဲ့ နေရာတော်တော်များများမှာ အင်တာနက်တွေဖြတ်တောက်ပိတ်ပင် လိုက်တယ်လို့ ရဲအရာရှိတွေက စနေနေ့က ပြောပါတယ်။

ဝန်ကြီးချုပ် နာရင်ဒါမိုဒီက တပ်သားတွေကို အချိန်တိုခန့်ထားမယ့် မူဝါဒအသစ်ကို ဆန့်ကျင်တဲ့ ဆန္ဒပြပွဲတွေ ဒေသအချို့မှာ ဆက်တိုက်ဖြစ်ပေါ်ခဲ့ပြီးနောက် လူတစ်ဦးသေဆုံးပြီး ဒါဇင်ကျော် ဒဏ်ရာရရှိခဲ့ကြပါတယ်။

အိန္ဒိယရဲ့ ၁.၃၈သန်း အင်အားရှိတဲ့ အင်အားကြီးမားတဲ့ စစ်တပ်ကြီးကို လူများများဝင်ရောက်နိုင်ဖို့ နှင့် ဝန်ပိနေတဲ့ ပင်စင်စရိတ်တွေလျှော့ချနိုင်ဖို့  အစိုးရက ပျှမ်းမျှအသက်ကိုနှိမ့်ချလိုက်ပြီး လေးနှစ်ကန်ထရိုက်နှင့် ခန့်အပ်မယ့် အက်ဂနီပတ်သ် သို့မဟုတ် မီးလျှံလမ်းကြောင်းဆိုတဲ့ အစီအစဉ်ကို ကန့်ကွက်နေကြတာဖြစ်ပါတယ်။

ကန့်ကွက်သူတွေဟာ များသောအားဖြင့် ငယ်ရွယ်တဲ့ ယောကျ်ားလေးတွေဖြစ်ကြပြီး ဒီအစီအစဉ်ဟာ ပုံမှန်လစာ၊ပင်စင်နှင့်အခြားခံစားခွင့်တွေအာမခံတဲ့ အိန္ဒိယစစ်တပ်ထဲမှာ အမြဲတမ်းအလုပ်တစ်ခုရနိုင်မယ့် အခွင့်အရေးကို ကန့်သတ်တာဖြစ်တယ်လို့ပြောကြပါတယ်။

လူတော်တော်များများဟာ ဘီဟာ၊တယ်လင်ဂနာနှင့် ဥတာပရာဒေ့ရှ်နှင့် အနောက်ဘင်္ဂလားပြည်နယတွေမှာ ဒီအစဉ်အစဉ်ကို ကန့်ကွက်သူတွေဟာ လမ်းတွေပေါ်ထွက်လာကြပါတယ်။

ဆိုရှယ်မီဒီယာပလက်ဖောင်းတွေဖြစ်တဲ့ ဖေ့စ်ဘုတ်ခ်၊တွစ်တာနှင့် ဝပ်အက်စ်တို့ကို ဘီဟာရဲ့ ခရိုင်၁၅ခုကနေ ၁၈ခုမှာ ပိတ်ထားကြောင်း ပြည်နယ်အကြီးတန်းရဲအရာရှိ ဆန်ဂျေးဆင်းက ပြောပါတယ်။ အဲဒီပြည်နယ်မှာ ဆန္ဒပြသူတွေဟာ ခရီးသည်တင်ရထားတွေနှင့်ဘတ်စ်ကားတွေကိုဒေါသတကြီး မီးရှို့ခဲ့ကြပါတယ်။

အိန္ဒိယရဲ့ လူဦးရေအထူထပ်ဆုံး ဥတာပရာဒေ့ရှ်ပြည်နယ်မှာ ကြိုတင်ကာကွယ်တဲ့အနေနှင့် အနည်းဆုံး ၂၅၀ဦးကို ဖမ်းဆီးထိန်းသိမ်းထားပါတယ်။ အချို့ဆန္ဒပြသူတွေက ရဲတွေဟာ အင်အားအလွန်အကျွံသုံးခဲ့တယ်လို့ စွပ်စွဲခဲ့ကြပါတယ်။

လူငယ်တွေအနေနှင့် အစီအစဉ်သစ်ကိုလိုက်နာကြဖို့ အိန္ဒိယကာကွယ်ရေးဝန်ကြီး ရာနက်ဆင်းက လူငယ်တွေကို မေတ္တာရပ်ခံထားပါတယ်။ ရေတပ်ဦးစီးချုပ်က သောကြာနေ့ ဆန္ဒပြပွဲတွေဟာ ထင်မှတ်ထားတာတွေမဟုတ်ကြောင်းနှင့် စနစ်သစ်နှင့်ပတ်သက်လို့ အချက်အလက်မှားတွေကြောင့်လို့ပြောပါတယ်။

ဒီလိုဆန္ဒပြတာတွေကို ကြိုမတွေးမိဘူးလို့ ရေတပ်ဗိုလ်ချူပ်ကြီး အာရ်ဟာရီကူမာက ရိုက်တာသတင်းဌာနကိုပြောပါတယ်။ အိန္ဒိယစစ်တပ်မှာ ဒါဟာ အကြီးမားဆုံး လူသားအရင်းအမြစ်စီမံခန့်ခွဲပြောင်းလဲမှုတစ်ခုဖြစ်တယ်လို့ သူကပြောပါတယ်။

Source: Reuters

#LocalNews
Published - 18 June 2022

ပြည်တွင်း၌ ဓာတ်ဆီဈေးနှုန်းမြင့်တက်နေမှုကြောင့် တစ်ပိုင်တစ်နိုင် ဖိနပ်လုပ်ငန်းလုပ်ကိုင်နေကြသည့် အလုပ်သမားများ အလုပ်လက်မဲ့ဖြစ်နေကြောင်း အဆိုပါ ဖိနပ်လုပ်ငန်းများက သိရသည်။

"ဓာတ်ဆီဈေးတွေတက်လို့ ဖိနပ်ကမလုပ်ရဘူး။ ဒီချိန်ဆိုရင် အရင်က မနားရဘူး တောက်လျှောက်လုပ်ရတယ်။ အခုကျတော့ ဖိနပ်ကမလုပ်ရတော့တာ နှစ်လကျော်သွားပြီ။ ဘာလုပ်စားလို့ လုပ်ရမှန်းတောင်မသိတော့ဘူး။ အလုပ်လက်မဲ့ဖြစ်သွားတာပေါ့။ စားဝတ်နေရေးအတွက်ကို တော်တော်လေးရုန်းရတယ်"ဟု ဖိနပ်လုပ်ငန်းလုပ်ကိုင်သည့် မသိမ့်က ပြောသည်။

ယင်းတို့အနေဖြင့် ကတ္တီပါဖိနပ်မျိုးစုံကိုလုပ်၍ ဈေးများတွင်လက်လီလက်ကားရောင်းချသည့် ဆိုင်များသို့ ပုံမှန်ပို့သည့်လုပ်ငန်းမှာ လက်ရှိတွင် ဓာတ်ဆီဈေးနှုန်းဆက်တိုက်မြင့်တက်နေသည့်အပြင် အခြေခံစားသောက်ကုန်ဈေးနှုန်းမှာလည်း ဆက်တိုက်မြင့်တက်နေသည့်အတွက် အခက်အခဲများစွာရှိနေခြင်း ဖြစ်ကြောင်း သိရသည်။

ဇွန်လ ၁၇ ရက် ထုတ်ပြန်ကြေညာထားသည့် စက်သုံးဆီဈေးနှုန်းမှာ ၉၅ တစ်လီတာ ၂၃၄ဝ ကျပ်၊ ၉၂ တစ်လီတာ ၂၂၅၀ ကျပ်၊ ပရီမီယံဒီဇယ်တစ်လီတာ ၂၇၂၀ ကျပ်၊ ရိုးရိုးဒီဇယ်တစ်လီတာ ၂၆၉၀ ကျပ်ဖြစ်ကြောင်း သိရသည်။

ymg/sth
#Yangon_Media_Group

#LocalNews
Published - 18 June 2022

အသေးစားငွေရေးကြေးရေး ကုမ္ပဏီတစ်ခုဖြစ်သော ငွေသရဖူအသေးစား ငွေရေးကြေးရေးကုမ္ပဏီ (Silver Crown) အနေဖြင့် ကုမ္ပဏီကို အပြီးဖျက်သိမ်းကြောင်း ဇန်နဝါရီလ ၁၈ ရက်တွင်တရားဝင်ကြေညာခဲ့သည်။

ကုမ္ပဏီအနေဖြင့် ဆက်လက်လုပ်ကိုင်ရန် အခက်အခဲများရှိသဖြင့် မေ ၂၀၂၂ မှ စတင်၍ အပြီး ဖျက်သိမ်းထားခြင်းဖြစ်ကြောင်း ယင်းကြေညာစာတွင် ဖော်ပြထားသည်။

အဆိုပါ ကုမ္ပဏီကိုအသေးစားငွေရေးကြေးရေးလုပ်ငန်း ကြီးကြပ်မှုကော်မတီမှ လုပ်ငန်းလုပ်ကိုင်ခွင့်ယာယီလိုင်စင်ကို ၂၀၁၉ ခုနှစ် ဇူလိုင်လတွင် ထုတ်ပေးခဲ့ခြင်းလည်း ဖြစ်သည်။

ယင်းကုမ္ပဏီမှာ၂၀၂၁ ခုနှစ်ဖေဖော်ဝါရီ ၁ ရက် နောက်ပိုင်း လုပ်ငန်းဖျက်သိမ်းသည့် ပထမဆုံး အသေးစားငွေရေးကြေးရေးကုမ္ပဏီလည်းဖြစ်သည်။

လက်ရှိတွင် LOLC၊ AEON၊ BNF အစရှိသည့် အသေးစားငွေရေးကြေးရေးကုမ္ပဏီများသည်လည်း အဆင်မပြေမှုများရှိနေကြောင်း သိရသည်။

ymg/sth
#Yangon_Media_Group

#LocalNews
Published_18 June 2022

ထိုင်းနိုင်ငံသို့ MOU အလုပ်သမား ၂၉၈ ဦးကို ဇွန်လ ၁၇ ရက်တွင် မြဝတီ-မဲဆောက် ချစ်ကြည်ရေးအမှတ် (၂)တံတားမှတစ်ဆင့် ထပ်မံစေလွှတ်ခဲ့ကြောင်း သိရသည်။

ယင်းမှာ ပြည်ပအလုပ်အကိုင်အကျိုးဆောင် TOP 1 အေဂျင်စီနှင့်၊‌ ရွှေဝတ်မှုခ အေဂျင်စီတို့မှဖြစ်ပြီး TOP 1 အေဂျင်စီမှ တာဝန်ယူ ပို့ဆောင်ပေးသည့် လုပ်သား ၉၉ ဦးမှာ ထိုင်းနိုင်ငံ၊ ပထုံဌာနီမြို့ရှိ ကြက်သားစက်ရုံတွင်လည်းကောင်း၊ ရွှေဝတ်မှုခအေဂျင်စီမှ စေလွှတ်သည့် လုပ်သား ၁၉၉ ဦးမှာလည်း ပထုံဌာနီမြို့ရှိ ကြက်သား စက်ရုံတွင်လည်းကောင်း အလုပ်လုပ်ကိုင်ကြရမည် ဖြစ်ကြောင်း သိရသည်။

ပြည်တွင်း အလုပ်အကိုင်အကျိုးဆောင် အေဂျင်စီ ကုမ္ပဏီများမှ ထိုင်းနိုင်ငံသို့ MOU စနစ်ဖြင့် ပြီးခဲ့သည့် မေလ ဒုတိယအပတ်မှစတင်စေလွှတ်ပေးခဲ့ရာ ယခုအခါ အလုပ်သမားပေါင်း ၃၀၀၀ ကျော် ရှိပြီဖြစ်ကြောင်း သိရသည်။

ymg/mt
#Yangon_Media_Group

#DailyNews
Published - 18 June 2022

၁။ သွေးလွန်တုပ်ကွေးမဖြစ်အောင် ကလေးငယ်များကိုနေအိမ်တွင်သာမက မူကြိုများ၊စာသင်ကျောင်းများ ၌ပါခြင်မကိုက်အောင်ထားရန်လို

၂။ ဘဏ်လုပ်ငန်းများ ပုံမှန်အတိုင်းလည်ပတ်နေသည်ဟု ဗဟိုဘဏ်ပြော

၃။ နေ့စဉ်မိုးလေဝသသတင်း။

၄။ စင်ကာပူတွင် ဆယ်စုနှစ်အတွင်းငွေကြေးဖောင်းပွမှု အမြင့်ဆုံးအခြေအနေရောက်ရှိ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published _ 18 June 2022

စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ဝန်ဆောင်မှုကုန်သွယ်ရေးနှင့်ရင်းနှီးမြှုပ်နှံမှုဆိုင်ရာ အချက်အလက်များဘဏ္ဍာတိုက် ဝက်ဘ်ဆိုက်အား စတင်လွှင့်တင်ခဲ့သည်ဟု တိုကျိုမြို့ရှိ မြန်မာသံရုံးမှ ဇွန်လ ၁၇ရက်က ထုတ်ပြန်ကြေညာခဲ့သည်။

ယင်းဘဏ္ဍာတိုက်အား မြန်မာနိုင်ငံတွင် ဝန်ဆောင်မှုလုပ်ငန်းများ လာရောက်ရင်းနှီးမြှုပ်နှံမှုပြုလုပ်ရာ၌ ထုတ်ပြန်ထားသည့် ပြည်တွင်းဥပဒေ၊ နည်းဥပဒေစည်းမျဉ်းစည်းကမ်းများနှင့် ၎င်းတို၏ ပြဌာန်းချက်အစီအမံများအား တစ်နေရာတည်းတွင် လွယ်ကူစွာ စုစည်းရှာဖွေလေ့လာ သိရှိနိုင်ရန် ရည်ရွယ်၍ လွှင့်တင်ခဲ့ခြင်းဖြစ်သည်။

မြန်မာနိုင်ငံ၏ ပို့ကုန်ကဏ္ဍများအား အထောက်အကူပြုနိုင်ရန်နှင့် နိုင်ငံ၏ယှဉ်ပြိုင်နိုင်မှုအား မြင့်မားစေရန်တို့အတွက်ရည်ရွယ်၍ လွှင့်တင်ခဲ့ခြင်းဖြစ်ကြောင်း သိရသည်။

ထို့ကြောင့် အသေးစိတ်သိရှိလိုသည်များအား https://www.servicetrade.gov.mm ၌ဝင်ရောက်ကြည့်ရှုနိုင်ကြောင်းလည်း ထုတ်ပြန်ချက်၌ ပါရှိသည်။

ymg/NN
#Yangon_Media_Group

#LocalNews
Published _ 18 June 2022

သွင်းအားစုစျေးမြင့်တက်နေသော်လည်း ၂၀၂၂ ခုနှစ် မိုးစပါးစိုက်ရာသီတွင် ဧရာဝတီတိုင်းဒေသကြီး၌ မိုးစပါးစိုက်ဧက ၃၇သိန်းကျော် စိုက်ပျိုးသွားမည်ဖြစ်ကြောင်း ဧရာဝတီတိုင်း စိုက်ပျိုးရေးဦးစီးဌာမှ သိရသည်။

တောင်သူများကို ဓာတ်မြေဩဇာများအား သင့်တင့်မျှတသည့် စျေးနှုန်းများဖြင့် ရောင်းချပေးနိုင်ရန် နိုင်ငံခြားမှ တင်သွင်းရောင်းချပေးမည်ဖြစ်ကြောင်း ဧရာဝတီတိုင်း စိုက်ပျိုးရေးဦးစီးဌာ၊ တိုင်းဦးစီးမှူး ဦးစိန်မောင်မြင့်က ပြောသည်။

"စိုက်ပျိုးရေး သွင်းအားစုစျေးက နိုင်ငံတကာစျေးနှုန်းတွေနဲ့ ချိတ်ဆက်နေတာကြောင့် စျေးတက်နေတဲ့အပေါ် မထိန်းချုပ်နိုင်ပေမယ့် ကျွန်တော်တို့အပါအဝင် သမနဲ့ကျေးလတ်ဝန်ကြီးဌာန၊ တိုင်းဒေသကြီးအစိုးရအဖွဲ့ ပြည်ထောင်စုအစိုးရ အဖွဲ့တို့ပူးပေါင်းပြီး နိုင်ငံခြားက မြေဩဇာတွေကို တင်သွင်းပြီး စပါးစိုက်တောင်သူတွေကို သင့်တော်တဲ့စျေးနဲ့ ရောင်းချပေးဖို့ စီစဥ်ဆောင်ရွက်နေပါတယ်။ လက်ရှိကာလမှာ ဓာတ်မြေဩဇာစက်ရုံအချို့က ဂတ်စ်ရရှိမှုတွေ မလုံလောက်တာကြောင့် အပြည့်အဝရရှိမယ်ဆိုရင် စက်ရုံတွေ အရင်လို ပြန်လည်ပတ်ပြီး တစ်အိတ်ကို ၃သောင်းစျေးနဲ့ ဖြန့်ဝေပေးသွားနိုင်မှာ ဖြစ်ပါတယ်။ နှစ်စဥ်နှစ်တိုင်းအပြည့်အဝ စိုက်ပျိုးနေတာဖြစ်လို့ အခုနှစ်လဲ စိုက်ပျိုးနိုင်ဖို့ မျှော်မှန်းထားပါတယ်။ နွေစပါးကတော့ ဧက ၁၄ သိန်းကျော်လောက် ပုံမှန်စိုက်ပျိုးပါတယ်။ မနှစ်ကတော့ သွင်းအားစု စျေးမတည်ငြိမ်တာကြောင့် နွေစပါးဧက ၅သောင်းကျော်လောက်လျော့ကျသွားပါတယ်။ ဆောင်းသီးနှံကတော့ ပဲမျိုးစုံစိုက်ပျိုးပြီး စုစုပေါင်း ဧက ၁၆ သိန်းကျော်လောက် ရှိနေပါတယ်" ဟု ယင်းကပြောသည်။

လက်ရှိတွင် ဧရာဝတီတိုင်းဒေသကြီး၌ မိုးစပါးဧက ၃၇၅,၇၁၉၉ သိန်းရှိပြီး နွေစပါးဧက ၁၄၂,၆၄၂၃ ဧက ရှိနေကာ စပါးအပါအဝင် အခြားသီးနှံများဖြစ်သည့် ပဲမျိုးစုံ၊ ငရုတ်၊ ပြောင်း အစရှိသဖြင့် စိုက်ဧကပေါင်း ၈၁ သိန်းကျော်ရှိကြောင်း စိုက်ပျိုးရေးဦးစီးဌာမှ သိရသည်။

ymg/NN
#Yangon_Media_Group

#LocalNews
Published _18 June 2022

မြန်မာ့လယ်ယာဖွံ့ဖြိုးရေးဘဏ်မှ အသေးစားနှင့် အလတ်စား စိုက်ပျိုးရေးလုပ်ငန်းများအတွက် စိုက်ပျိုးရေးချေးငွေ အမြင့်ဆုံး ကျပ်သိန်း ၇၀၀ အထိ ထုတ်ချေးပေးမည်ဖြစ်ကြောင်း သိရသည်။

SME စိုက်ပျိုးရေး လုပ်ငန်းများအတွက် စိုက်ပျိုးရေးချေးငွေများ ထုတ်ချေးပေးရာတွင် လယ်ယာကုန်ထုတ်လုပ်ငန်းများနှင့် စိုက်ပျိုးရေး သွင်းအားစုများ ထုတ်လုပ်နေသည့်လုပ်ငန်းများ အကျုံးဝင်မည်ဖြစ်ပြီး SME မှတ်ပုံတင်ထားသည့် လုပ်ငန်းများဖြစ်ရန် လိုအပ်ကြောင်းလည်း ရန်ကုန်မြို့တော်စည်ပင်သာယာရေး ကော်မတီမှ သိရသည်။

ယခင်က တောင်သူတစ်ဦးလျှင် အမြင့်ဆုံးချေးငွေ ကျပ်သိန်း ၅၀၀ အထိ ထုတ်ချေးပေးထားပြီး၊ ယခုနှစ်မှစတင်၍ ကျပ်သိန်း ၇၀၀ အထိ ထုတ်ချေးပေးသွားမည်ဖြစ်ကာ တောင်သူအစုအဖွဲ့ အနည်းဆုံး သုံးဦးကို ယခုနှစ်တွင် အမြင့်ဆုံး ချေးငွေ ကျပ်သိန်း ၅၀၀၀ အထိ ထုတ်ချေးပေးသွားမည်ဖြစ်ကြောင်း သိရသည်။

မြန်မာ့လယ်ယာဖွံ့ဖြိုးရေးဘဏ်သည် တောင်သူကြီးများနှင့် တောင်သူအစုအဖွဲ့များကို ဂျပန်အပြည်ပြည်ဆိုင်ရာ ပူးပေါင်းဆောင်ရွက်ရေးအရ JICA နှင့် ပူးပေါင်းကာ လယ်ယာစိုက်ပျိုးရေးချေးငွေများကို ၂၀၁၇ ခုနှစ်မှ စတင် ထုတ်ချေးပေးလျက်ရှိကြောင်း သိရသည်။

ymg/NN
#Yangon_Media_Group

#LocalNews
Published _ 18 June 2022

အခြေခံပညာအလယ်တန်းအဆင့် ရှစ်တန်းအောင်မြင်ပြီးသူများအနေဖြင့် ပထမဆုံး သမဝါယမ စာရင်းကိုင်ပညာ သင်တန်းကျောင်းများကို တက်ရောက်နိုင်တော့မည်ဖြစ်ကြောင်း သိရသည်။

သင်တန်းကာလကို ၂ နှစ် သတ်မှတ်ထားပြီး ပထမနှစ်တွင် Business Accounting ၊ Fundamentals of ICT၊ သမဝါယမပညာ၊ မြန်မာစာ၊ အင်္ဂလိပ်စာ၊ သင်္ချာ၊ ဘောဂဗေဒ ဘာသာရပ်များနှင့် ဒုတိယနှစ်တွင် Cost Accounting ၊ Financial Accounting Computerized Accounting၊ Business Organization and Management ၊ သမဝါယမ စာရင်းကိုင်ပညာနှင့် စာရင်းစစ် ဆေးခြင်း၊ အင်္ဂလိပ်စာ၊ သင်္ချာ၊ ဘောဂဗေဒ ဘာသာရပ်များအား သင်ကြားရမည် ဖြစ် သည်။

သင်တန်းသားများအနေဖြင့် သင်တန်းကာလအတွင်း အလုပ်သင်အဖြစ် လုပ်ကိုင်နိုင်မည်ဖြစ်ပြီး သင်တန်းပြီးဆုံးသည်နှင့် အလုပ်အကိုင်ပါတစ်ပါတည်း ရရှိစေရန် ပြုလုပ်ဆောင်ရွက်ပေးသွားမည်ဖြစ်ကြောင်း သိရသည်။

သင်တန်းပြီးဆုံး အောင်မြင်သူများကို သမဝါယမနှင့် ကျေးလက်ဖွံ့ဖြိုးရေးဝန်ကြီး ဌာန သမဝါယမဦးစီးဌာန၊ ပညာရေးနှင့် လေ့ကျင့်သင်ကြားရေးဆိုင်ရာ ညွှန်ကြားမှုအဖွဲ့မှ သင်တန်းဆင်းလက်မှတ် ပေးအပ်သွားမည်ဖြစ်ပြီး သင်တန်း၌ အောင်မြင်သူများအနက် သတ်မှတ်အရည်အချင်း ပြည့်မီသူများကို သမဝါယမကောလိပ်များနှင့် သမဝါယမနှင့် စီမံခန့်ခွဲမှုပညာ တက္ကသိုလ်များသို့ ပေါင်းကူး၍ ဆက်လက်သင်ကြားနိုင်မည့် အခွင့်အလမ်းများ ရရှိမည်ဖြစ်သည်။

တောင်ကြီး၊ မကွေး၊ ပုသိမ်၊ မော်လမြိုင်၊ မန္တလေးစသည့် ဒေသများတွင် သမဝါယမ စာရင်းကိုင်နှင့် သက်မွေးပညာသင်တန်းကျောင်းများထားရှိကာ သင်တန်းတက်ရောက်သူများကို နိုင်ငံတော်က စားသောက်စရိတ်အဖြစ် တစ်လလျှင် ငွေကျပ် ၃၀၀၀၀ နှင့် ဝတ်စုံစရိတ် တစ်နှစ်စာ ၂၅၀၀၀ ကျပ် ထောက်ပံ့မည့်အပြင်၊ နယ်မှလာရောက်သူများအတွက် နေထိုင်ရန် အဆောင်စီစဉ်ပေးသွားမည်ဖြစ်ကြောင်းလည်း ယင်းမှ သိရသည်။

ymg/NN
#Yangon_Media_Group