#World_Health
Published 26 July 2026

■ တက်တူးထိုးခြင်းကြောင့် အရေပြားအတွင်း ပိတ်မိနေတဲ့ တက်တူးမင်အမှုန်များကို သွေးဖြူဥဆဲလ်များက ဖယ်ရှားရန် ကြိုးပမ်းပေမယ့် မအောင်မြင်ဘဲ တသက်တာလုံး ကိုယ်ခံအားတုံ့ပြန်မှုဖြစ်စဉ် ဖြစ်ပေါ်စေပါတယ်။

■ အချိန်ကြာလာတာနဲ့အမျှ အဏုကြည့်မှန်ပြောင်းဖြင့်သာ မြင်ရတဲ့ တက်တူးမင်အမှုန်တွေဟာ ကွာကျလာပြီး ခန္ဓာကိုယ်အတွင်းသို့ ပျံ့နှံ့ကာ လင့်ဂလင်းများအတွင်းသို့ တိုက်ရိုက်စုပြုံလာကြပါတယ်။

■ တက်တူးအလွန်အကျွံ ထိုးခြင်းက ဖျားနာမှုပြင်းပြင်းထန်ထန် ဖြစ်စေနိုင်ပြီး ရက်ပါ MGK ဆိုရင် ကိုယ်လုံးတစ်ခုလုံးမှာ တက်တူးတွေ အပြင်းအထန် ထိုးခဲ့စဉ်က အသားဝါလာခြင်းလိုမျိုး ဖြစ်ရပ် ဖြစ်ပေါ်စေနိုင်ပါတယ်။

■ တက်တူးမင်တွေမှာ စက်မှုလုပ်ငန်းသုံး ရောင်ခြယ်ပစ္စည်းများ၊ သတ္တုထည်များ၊ အိတ်ဇောငွေ့နဲ့ ဆင်တူတဲ့ ဟိုက်ဒရိုကာဗွန်များ အများအပြား ပါဝင်တတ်ကြပါတယ်။

■ အရောင်ပါတဲ့မင်တွေ အထူးသဖြင့် အနီရောင်ဟာ ဓာတ်မတည့်မှု ပြင်းထန်စွာ ဖြစ်နိုင်ပြီး နာတာရှည် အတွင်းပိုင်းရောင်ရမ်းမှုများကို အများဆုံးဖြစ်စေနိုင်ပါတယ်။

■ နေရောင်ခြည်ထိတွေ့ခြင်း၊ လေဆာဖြင့် ဖယ်ရှားခြင်းတို့ကြောင့် မင်ရောင်ခြယ်ပစ္စည်းများဟာ မျိုးဗီဇထိခိုက်ပျက်စီးမှုနဲ့ ဆက်စပ်တဲ့ ဓာတုပစ္စည်းများအဖြစ် ပြိုကွဲသွားနိုင်ကာ ကင်ဆာဖြစ်ပွားနိုင်ခြေ စိုးရိမ်မှုများ မြင့်တက်စေပါတယ်။

■ ကျန်းမာရေးကျွမ်းကျင်သူများက တက်တူးမင်ပါဝင်ပစ္စည်းများကို သုတေသနပြု စစ်ဆေးကြရန် တိုက်တွန်းထားကြပြီး ကိုယ်ခံအားစနစ် အားနည်းသူများအနေဖြင့် တက်တူးမထိုးမီ ဆရာဝန်နဲ့ ဦးစွာ တိုင်ပင်ဆွေးနွေးရန် အကြံပြုထားပါတယ်။

Source: NDTV

ဗောက်စ်ဝက်ဂန်ကုမ္ပဏီက ပြိုင်ဘက်များနဲ့ ကုန်ကျစရိတ် ကွာဟချက်လျှော့ချရန်အတွက် ကမ္ဘာတဝှမ်းမှ အလုပ်အကိုင်နေရာပေါင်း ၅ သောင်းကျော် လျှော့ချရန်လိုအပ်နိုင်ကြောင်း ကုမ္ပဏီစီအီးအို အိုလီဗာဘလူးမ်က ပြောကြားခဲ့တယ်လို့ ကုမ္ပဏီမှတ်တမ်းတစ်ခုအရ သိရပါတယ်။

#World_Industry
Published 25 July 2026
#ဗောက်စ်ဝက်ဂန်ကုမ္ပဏီ
#YMG #Yangon_Times #Yangon_Media_Group

#World_News
Published 25 July 2026

■ နိုင်ငံတကာ ရာဇဝတ်တရားရုံး (ICC) အဖွဲ့ဝင်နိုင်ငံများက ရှေ့နေ ကာရင်ခန်းကို ရာထူးမှ ဖယ်ရှားရန် မဲပေးဆုံးဖြတ်ခဲ့ကြပါတယ်။

■ အဆိုပါ ဆုံးဖြတ်ချက်ကို ၂၀၂၆ ဇူလိုင် ၂၄ ရက်နေ့က ကုလသမဂ္ဂဌာနချုပ်မှာ ကျင်းပခဲ့တဲ့ အထူးအစည်းအဝေးအတွင်း ပြုလုပ်ခဲ့ခြင်းဖြစ်ပါတယ်။

■ အဖွဲ့ဝင် ၁၂၅ နိုင်ငံအနက် ၈၂ နိုင်ငံက ဗြိတိန်နိုင်ငံသားရှေ့နေကို ရာထူးမှ ဖယ်ရှားရန် ထောက်ခံမဲပေးခဲ့ကြပါတယ်။

■ ယခု မဲပေးမှုဟာ ICC သမိုင်းတလျှောက် တာဝန်ထမ်းဆောင်ဆဲ ရှေ့နေတစ်ဦးကို ပထမဆုံးအကြိမ် ရာထူးမှ ဖယ်ရှားလိုက်တာ ဖြစ်ပါတယ်။

■ လိင်ပိုင်းဆိုင်ရာ မတော်မတရားပြုကျင့်မှု စွပ်စွဲချက်များနဲ့ ပတ်သက်ပြီး တရားရုံး စုံစမ်းစစ်ဆေးရေးအဖွဲ့က စုံစမ်းစစ်ဆေးခဲ့ပြီးနောက် ယခုကဲ့သို့ ရာထူးမှ ဖယ်ရှားခဲ့ခြင်းဖြစ်ပါတယ်။

■ ကာရင်ခန်းရဲ့ လက်အောက်မှာ လုပ်ကိုင်ခဲ့တဲ့ အမျိုးသမီး ဝန်ထမ်းတစ်ဦးက အဓမ္မပြုကျင့်မှုနဲ့ အလိုမတူဘဲ ပြုမူနေထိုင်မှုများရှိကြောင်း ခန်းကို စွပ်စွဲခဲ့ပါတယ်။

■ ကာရင်ခန်းကတော့ ထိုစွပ်စွဲချက်များကို ဆက်တိုက်ငြင်းဆိုခဲ့ပြီး ဝန်ထမ်းရေးရာ စည်းကမ်းထိန်းသိမ်းရေး လုပ်ငန်းစဉ်ဟာ လုပ်ထုံးလုပ်နည်းအရ တရားမျှတမှု မရှိကြောင်း ပြောကြားထားပါတယ်။

Source: WION

#World_Health
Published 25 July 2026

■ ဗြိတိန်မှ လူပေါင်း ၉ သောင်းကျော်ကို လေ့လာဆန်းစစ်ခဲ့ရာမှာ မိနစ် ၃၀ ထက်ပိုပြီး ထိုင်ခြင်း၊ လဲလျောင်းနေခြင်းတို့က ကင်ဆာရောဂါဖြင့် သေဆုံးနိုင်ခြေကို မြင့်တက်စေကြောင်း တွေ့ရှိထားပါတယ်။

■ နေ့စဉ် ဆက်တိုက်ငြိမ်ငြိမ်လေး ထိုင်နေတဲ့အချိန် တစ်နာရီတိုးလာတိုင်း ကင်ဆာကြောင့် သေဆုံးနိုင်ခြေ ၁၀ ရာခိုင်နှုန်း ပိုမိုမြင့်မားလာတယ်လို့ ဆိုပါတယ်။

■ ကြာရှည်စွာ ထိုင်နေတဲ့ အလေ့အကျင့်တွေကို ပေါ့ပေါ့ပါးပါး ခန္ဓာကိုယ်လှုပ်ရှားမှုများဖြင့် ကြားဖြတ်ပြုလုပ်ပေးပါက အဆိုပါ ကျန်းမာရေးအန္တရာယ်များကို လျှော့ချပေးနိုင်ကြောင်း သုတေသီများ အကြံပြုထားပါတယ်။

■ တစ်နာရီ ထိုင်နေမယ့်အစား မီးပူတိုက်ခြင်း၊ ပန်းကန်ဆေးခြင်းတို့လိုမျိုး အိမ်မှုကိစ္စများဖြင့် အစားထိုးခြင်းက ကင်ဆာကြောင့် သေဆုံးနိုင်ခြေကို ၁၂ ရာခိုင်နှုန်းအထိ လျှော့ချပေးပါတယ်။

■ မိနစ် ၃၀ ထိုင်နေမယ့်အစား လှုပ်ရှားမှုအသင့်အတင့်ဖြင့် အစားထိုးပေးပါက ထိုအန္တရာယ်ကို ၈ ရာခိုင်နှုန်း လျှော့ချပေးပါတယ်။

■ ငြိမ်သက်စွာနေတဲ့အချိန် ၅ မိနစ်အစား ပြင်းထန်တဲ့ လေ့ကျင့်ခန်းဖြင့် အစားထိုးပါက အသက်ဆုံးပါးနိုင်ခြေ ၂၂ ရာခိုင်နှုန်းအထိ လျော့နည်းသွားနိုင်ပါတယ်။

■ ဒီလိုဆက်စပ်မှု အကြောင်းအရင်းတွေ တိုက်ရိုက်လားဆိုတာ အတည်ပြုရန်အတွက်တော့ သုတေသီများအနေနဲ့ နောက်ထပ်လေ့လာရန် လိုအပ်နေပေမယ့် မိနစ် ၃၀ ကြာတိုင်း မတ်တပ်ရပ်ပေးပြီး ခဏတာ လမ်းလျှောက်ပေးရန် ကျွမ်းကျင်သူများ အကြံပြုထားကြပါတယ်။

Source: The Guardian

#World_Health
Published 25 July 2026

■ အမေရိကန် ဇီဝနည်းပညာကုမ္ပဏီတစ်ခုက စတမ်ဆဲလ်များမှတဆင့် ကမ္ဘာ့ပထမဆုံး အစောပိုင်းအဆင့် လူသားမမျိုးဥဆဲလ်များကို အောင်မြင်စွာ ဖန်တီးနိုင်ခဲ့ကြောင်း ပြောပါတယ်။

■ ဒီဖန်တီးမှုကနေ တစ်နေ့နေ့မှာ သန်းပေါင်းများစွာသော လူများအတွက် သားသမီးရရှိရေး ကုသမှုများကို အကြီးအကျယ် ပြောင်းလဲပေးနိုင်မှာ ဖြစ်ပါတယ်။

■ ကယ်လီဖိုးနီးယားအခြေစိုက် နည်းပညာကုမ္ပဏီတစ်ခုဖြစ်တဲ့ Conception က သွေးဆဲလ်များကို စတမ်ဆဲလ်များအဖြစ် ပြောင်းလဲပြီးနောက် ထိုဆဲလ်များကို မမျိုးဥသတ္တိဝင်ဆဲလ်များ ပါဝင်တဲ့ သေးငယ်တဲ့ လူသားမမျိုးဥအိမ်ပုံစံများအဖြစ် ဖြစ်ပေါ်လာစေကာ ပထမအဆင့် မမျိုးဥဆဲလ်များ ဖန်တီးထုတ်လုပ်နိုင်ခဲ့ကြောင်း ကြေညာခဲ့ပါတယ်။

■ ဒါပေမဲ့ ယခုအချိန်အထိ စမ်းသပ်အဆင့်သာ ရှိသေးပြီး နောက်ထပ်အတည်ပြု ဆန်းစစ်မှုများ လိုအပ်နေပါသေးတယ်။

■ ဒီလုပ်ငန်းစဉ်က သွေးဆဲလ်များကို စတမ်ဆဲလ်များအဖြစ် ပြန်လည်ပြောင်းလဲခြင်း ပါဝင်ပြီး ထိုမှတဆင့် မမျိုးဥအိမ်တစ်ရှူးများ ဖြစ်လာစေရန် လမ်းကြောင်းပေးခြင်း ဖြစ်ပါတယ်။

■ ဖွံ့ဖြိုးပြီး မမျိုးဥများကို အောင်မြင်စွာ ဖန်တီးနိုင်ခြင်းက မျိုးပွားခြင်းဆိုင်ရာ ရွေးချယ်စရာများ တိုးချဲ့ပေးနိုင်မှာ ဖြစ်ပြီး လက်ရှိ ဖန်ပြွန်သန္ဓေသား IVF ကုသမှုလုပ်ငန်းစဉ်များကိုလည်း လျှော့ချပေးနိုင်မှာ ဖြစ်ပါတယ်။

■ ကုသမှုဆိုင်ရာ လက်တွေ့အသုံးချမှုများ မစတင်မီ ကျင့်ဝတ်နဲ့ စည်းမျဉ်းထိန်းသိမ်းရေးဆိုင်ရာ စိုးရိမ်ပူပန်မှုများကို အရင်ဖြေရှင်း ဆောင်ရွက်ရမှာ ဖြစ်ပါတယ်။

Source: Indian Express

တရုတ်စက်မှုလုပ်ငန်းသုံး စက်ရုပ်ထုတ်လုပ်သူများဟာ ပြောင်းလွယ်ပြင်လွယ်ရှိပြီး အနည်းငယ်စီ ခွဲထုတ်လုပ်နိုင်တဲ့ စမတ်စက်ရုပ်များ ဝယ်လိုအားဖြည့်ဆည်းနိုင်ရန် ရုပ်ပိုင်းဆိုင်ရာ အသိဉာဏ်အခြေပြု စက်ရုပ်နည်းပညာ (Embodied AI)စနစ် တိုးမြှင့်တီထွင်လာကြပါတယ်။

#Asia_Industry
Published 24 July 2026
#Embodied_AI
#YMG #Yangon_Times #Yangon_Media_Group