#World_Health
Published 29 October 2025

■ တရုတ်ခွဲစိတ်ဆရာဝန်တွေက မျိုးဗီဇပြုပြင်ထားတဲ့ဝက်ရဲ့အသည်းကို လူသားတစ်ဦးထံ အောင်မြင်စွာ အစားထိုးခွဲစိတ်နိုင်ခဲ့ပြီး အင်္ဂါအစားထိုးကဏ္ဍမှာ အောင်မြင်မှုကြီးတစ်ခု ဖြစ်လာပါတယ်။

■ ၂၀၂၄ မေလ ၁၇ ရက်နေ့က အသက် ၇၁ နှစ်အရွယ်လူနာကို အန်ဟွေ့ဆေးတက္ကသိုလ်ဆေးရုံမှာ ခွဲစိတ်ခဲ့ပြီးနောက် ၁၇၁ ရက်ကြာအောင် အသက်ရှင်သန်နိုင်ခဲ့ပါတယ်။

■ ဝက်အသည်းက လူနာရဲ့ကိုယ်ပိုင်အသည်းကို ထောက်ပံ့တဲ့သဘောဖြင့် အစားထိုးခဲ့တာ ဖြစ်ပါတယ်။

■ လူနာက အသည်းညာဘက်ခြမ်းမှာ အကျိတ်ဖြစ်နေပြီး ပုံမှန်လုပ်ဆောင်နိုင်ခြင်း မရှိခဲ့ပါဘူး။

■ ခွဲစိတ်ပြီးနောက် ပထမဆုံး ၃၁ ရက်အတွင်း ဝက်အသည်းက ထိရောက်စွာ လည်ပတ်နိုင်ခဲ့ပြီး သည်းခြေရည်နဲ့ သွေးခဲပစ္စည်းများ ထုတ်လုပ်နိုင်ခဲ့ကာ အင်္ဂါလက်မခံတာမျိုး မရှိခဲ့ပါဘူး။

■ ဒါပေမဲ့ ၃၈ ရက်မြောက်နေ့မှာ အစားထိုးထားတဲ့အသည်းရဲ့ သွေးကြောငယ်လေးတွေထဲမှာ သွေးခဲများ ဖြစ်ပေါ်လာပြီး ဖယ်ရှားရဖို့ ဖြစ်လာပါတယ်။

■ ဒီနောက် အစာအိမ်အူတို့ကနေ သွေးပြန်ယိုလာပြီး ၁၇၁ ရက်မြောက်နေ့မှာ ကွယ်လွန်ခဲ့ပါတယ်။

■ ဒါပေမဲ့လည်း မျိုးဗီဇပြုပြင်ထားတဲ့ဝက်ရဲ့ အသည်းက အချိန်ကာလတစ်ခုအထိ လူသားခန္ဓာကိုယ်ထဲမှာ လုပ်ဆောင်နိုင်တဲ့ သက်သေဖြစ်တယ်လို့ ဆရာဝန်တွေ ဂုဏ်ယူနေကြပါတယ်။

■ အဆိုပါဝက်ကို ယူနန်စိုက်ပျိုးရေးတက္ကသိုလ်မှ သုတေသီတွေက မျိုးဗီဇပြုပြင်ခြင်းဖြစ်စဉ် ၁၀ ခုဖြင့် ပြုလုပ်ခဲ့ကြတာ ဖြစ်ပါတယ်။

■ အသည်းအစားထိုးကုသလိုတဲ့ လူနာများအတွက် ဒီအောင်မြင်မှုက မျှော်လင့်ချက် ဖြစ်လာနိုင်တယ်လို့ ကျွမ်းကျင်သူများ ဆိုထားပါတယ်။

■ ကိုယ်ခံအားတုံ့ပြန်မှုနဲ့ သွေးခဲခြင်းတို့က ပြဿနာဖြစ်နေပေမယ့် ကမ္ဘာတဝှမ်း လူသားအင်္ဂါရှားပါးနေတဲ့ ပြဿနာကို ဖြေရှင်းနိုင်ဖို့ မှတ်ကျောက်တစ်ခု ဖြစ်လာပါတယ်။

Source: India Today

#World_Health
Published 29 October 2025

■ အသီးအရွက်များများစားရတဲ့ မက်ဒီတာရေးနီးယန်း စားသောက်ပုံစံက သွားဖုံးကျန်းမာစေပြီး ရောင်ရမ်းမှုလျော့နည်းစေနိုင်ပါတယ်။

■ အသားကြီးငါးကြီး မကြာခဏစားသုံးသူတွေဟာ သွားဖုံးကျန်းမာရေး ပိုမိုဆိုးရွားကြပြီး အသီးအနှံ၊ ဟင်းရွက်၊ သံလွင်ဆီတို့ စားသုံးသူတွေက သွားဖုံးကျန်းမာရေး ကောင်းမွန်ကြတာကို သုတေသီများ တွေ့ရှိခဲ့ကြပါတယ်။

■ ကင်းစ်ကောလိပ်လန်ဒန် သုတေသနအရဆိုရင် မက်ဒီတာရေးနီးယန်း စားသောက်ပုံစံနဲ့ အနီးစပ်ဆုံး စားသုံးသူတွေက သွားဖုံးပိုမိုကျန်းမာစေပြီး မကြာခဏ သားကြီးငါးကြီး စားသူတွေကတော့ သွားဖုံးပြဿနာများ ခံစားရလေ့ရှိပါတယ်။

■ ဟင်းရွက်များ၊ ပဲအမျိုးမျိုး၊ အသီးအနှံများ၊ သံလွင်ဆီတို့ ပိုမိုစားသုံးသူတွေမှာ ရောင်ရမ်းပစ္စည်းတွေ နည်းပါးတာကိုလည်း တွေ့ရပါတယ်။

■ ကင်းစ်ကောလိပ်လန်ဒန်၊ ခံတွင်းနဲ့ သွားဇီဝဘဏ်မှ လူနာ ၂၀၀ ကို သွားစစ်ဆေးမှုများ ပြုလုပ်ပြီး သွေးနမူနာများ ရယူကာ စားသောက်ပုံစံနဲ့ ပတ်သက်ပြီး မေးမြန်းခဲ့ကြပါတယ်။

■ မက်ဒီတာရေးနီးယန်း စားသောက်ပုံစံဟာ ရောဂါကြီးများ ဖြစ်နိုင်ခြေနည်းခြင်း၊ နှလုံးရောဂါ၊ အာရုံကြောချို့ယွင်းရောဂါများ၊ ကင်ဆာဖြစ်နိုင်ခြေနည်းခြင်းတို့နဲ့ ဆက်စပ်နေပါတယ်။

■ သုတေသီနဲ့ စာတမ်းပြုစုသူ ဒေါက်တာ ဂူဆက်ပီမိုင်နက်စ်က သူတို့ရဲ့တွေ့ရှိချက်များအရ မက်ဒီတာရေးနီးယန်း စားသောက်ပုံစံလိုမျိုး မျှတတဲ့စားစရာတွေ စားခြင်းဖြင့် သွားဖုံးရောဂါနဲ့ ရောင်ရမ်းခြင်းလက္ခဏာများ လျော့ကျနိုင်ကြောင်း ယူဆရပါတယ်။

■ ဒါကြောင့် သွားဖုံးရောဂါအခြေအနေနဲ့ အစားအသောက်တို့ကြား ဆက်စပ်မှုရှိနိုင်တယ်ဆိုတာကို လေ့လာခဲ့ကြတာ ဖြစ်ပါတယ်။

Source: SciTechDaily.

တရုတ်တောင်ပိုင်းမှ တံတား-ဥမင်လိုဏ်ခေါင်းစီမံကိန်းကြီးဖြစ်တဲ့ အနောက်ဘက်လူလုပ်ကျွန်း ရှင်ကျင်-ကျုံရှန် ဆက်သွယ်လမ်းကြောင်းကို အခုဆိုရင် အများပြည်သူခရီးစဉ်အတွက် ခွင့်ပြုလိုက်ပြီဖြစ်ပြီး အဆင့်မြင့်လှတဲ့ အင်ဂျင်နီယာရှုခင်းတွေနဲ့ လှပတဲ့ကမ်းရိုးတန်းရှုခင်းတွေ ကြည့်ရှုနိုင်ပြီ ဖြစ်ပါတယ်။

#Asia_Development
Published 28 October 2025
#တရုတ်နိုင်ငံ #တံတား_ဥမင်လိုဏ်ခေါင်း
#YMG #Yangon_Times #Yangon_Media_Group

#World_News
Published 28 October 2025

■ အမေရိကန်သမ္မတ ဒေါ်နယ်ထရမ့်က အင်္ဂါနေ့က တိုကျိုမှာ ဂျပန်ဝန်ကြီးချုပ်သစ် ဖြစ်လာတဲ့ ဆာနဲတာကိုင်ချီနဲ့ တွေ့ဆုံခဲ့ပြီး ကုန်သွယ်ရေးနဲ့ လုံခြုံရေးအကြောင်း ဆွေးနွေးခဲ့ကြပါတယ်။

■ ဂျပန်ရဲ့ ပထမဆုံး အမျိုးသမီးခေါင်းဆောင် ဖြစ်လာခြင်းနဲ့ စစ်ရေးမြှင့်တင်ဖို့ ကတိပြုခဲ့တဲ့အပေါ် ထရမ့်က ချီးကျူးလိုက်ပါတယ်။

■ တာကိုင်ချီက ယခုနှစ်အတွင်း ဒေါ်လာ ၅၅၀ ဘီလီယံသ‌ဘောတူညီချက်ဖြစ်တဲ့ အမေရိကန် ရင်းနှီးမြှုပ်နှံမှုကြီးကို ကမ်းလှမ်းသွားဖို့ ရှိပါတယ်။

■ ဒါ့အပြင် အမေရိကန် ပဲပိစပ်များ၊ သဘာဝဓာတ်ငွေ့နဲ့ ပစ်ကပ်ကုန်တင်ကားများ တိုးမြှင့်ဝယ်ယူသွားဖို့ရှိကြောင်း သတင်းရင်းမြစ်တစ်ခုက ဆိုပါတယ်။

■ ထရမ့်ကို နိုဘယ်ငြိမ်းချမ်းရေးဆုအတွက် ထောက်ခံပေးဖို့ ပြင်ဆင်နေကြောင်းကိုလည်း အသိပေးဖို့ရှိပါတယ်။

■ တရုတ်ရန်ကြီးထွားလာခြင်းကို ကာကွယ်ဖို့ ထရမ့်က ဂျပန်ကို စစ်ရေးစရိတ်တိုးမြှင့်စေလိုပြီး တာကိုင်ချီက တိုင်းပြည်ဂျီဒီပီရဲ့ ၂ ရာခိုင်နှုန်းကို ကာကွယ်ရေးစရိတ် ထားရှိဖို့ကတိပြုထားပါတယ်။

■ ဝန်ကြီးချုပ်ဟောင်းရှင်ဇိုအာဘေနဲ့ ပြောဆိုထားသမျှအရဆိုရင် တာကိုင်ချီဟာ ဝန်ကြီးချုပ်ကောင်းတစ်ယောက် ဖြစ်လာနိုင်ကြောင်း၊ ဂျပန်ရဲ့ ပထမဆုံး အမျိုးသမီးဝန်ကြီးချုပ် ဖြစ်လာခြင်းကို ဂုဏ်ပြုလိုကြောင်း ထရမ့်က တာကိုင်ချီကို ပြောပြပါတယ်။

■ ဒါ့အပြင် စစ်ရေးမြှင့်တင်မှုများ ပြုလုပ်ပြီး အမေရိကန်လက်နက်များ ပိုမိုဝယ်ယူဖို့ ကြိုးပမ်းလာခြင်းကိုလည်း ထရမ့်က သဘောကျနေပါတယ်။

■ ကမ္ဘောဒီးယားနဲ့ ထိုင်း၊ အစ္စရေးလ်နဲ့ ပါလက်စတိုင်းတို့ကြား အပစ်အခတ်ရပ်စဲရေးတို့မှာ ထရမ့်ရဲ့ အရေးပါပုံတွေကို တာကိုင်ချီက အသိအမှတ်ပြုလိုက်ပါတယ်။

Source: Reuter

#World_Health
Published 28 October 2025

■ အဆင့်ဆင့်ထုတ်လုပ်ထုပ်ပိုးထားတဲ့ အစားအစာတွေ(UPF)က ကျန်းမာရေးအတွက် ဆိုးကျိုးဖြစ်စေတယ်လို့ သုတေသနမှာ တွေ့ရှိထားပါတယ်။

■ ဒိန်းမတ် ကိုပင်ဟေဂင်မှ သုတေသီအဖွဲ့က ဒီလိုအဆင့်ဆင့်ထုတ်လုပ်စားစရာတွေဟာ လူတွေအပေါ် ဘယ်လိုသက်ရောက်စေလဲဆိုတာကို လေ့လာခဲ့ကြပါတယ်။

■ UPF အစားအစာတွေဆိုတာက ထုပ်ပိုးထားတဲ့ စားစရာတွေ၊ သောက်စရာတွေ၊ အသင့်စားသုံးပစ္စည်းတွေဖြစ်ပြီး အရောင်အနံ့၊ ကြာရှည်ခံဆေးများနဲ့ ဆိုးဆေးများ ပါဝင်ကာ သကြား၊ ပြည့်ဝဆီ၊ ဆားများ မြင့်မားစွာပါဝင်ပြီး ဗိုက်တာမင်နဲ့ အမျှင်ဓာတ်တော့ မပါဝင်ပါဘူး။

■ UPF တွေရဲ့ ပါဝင်ပစ္စည်းတွေက ထုတ်လုပ်ထားတဲ့အရာတွေဖြစ်ပြီး ဘေးအန္တရာယ်ဖြစ်စေနိုင်ပါတယ်။

■ UPF ကြောင့် နှလုံးသွေးကြောရောဂါ၊ ကင်ဆာ၊ ဇီဝဖြစ်စဉ်ရောဂါ၊ အဝလွန်ခြင်း၊ အသည်းအဆီဖုံးရောဂါ၊ ဆီးချို၊ စိတ်ဓာတ်ကျဝေဒနာ၊ ဒီမန်ရှာနဲ့ အရွယ်မတိုင်ခင် သေဆုံးခြင်းအထိပင် ဖြစ်စေနိုင်ပါတယ်။

■ ဒီအစားအစာတွေကြောင့် ခန္ဓာကိုယ်လုပ်ဆောင်ချက်တွေ ပျက်ယွင်းပုံတွေကို အံ့အားသင့်ဖွယ်တွေ့ရှိထားပြီး ရေရှည်သက်ရောက်မှုတွေက သတိထားစရာဖြစ်လာကာ နာတာရှည်ရောဂါများ မဖြစ်စေရန် လမ်းညွှန်ဖို့တွေ လိုလာတယ်လို့ ကိုပင်ဟေဂင်တက္ကသိုလ်မှ မော်လီကျူးဇီဝပညာရှင် ရိုမန်ဘာရက်စ်က ပြောပါတယ်။

■ UPF တွေက အမျိုးသားတွေမှာ တက်စတိုစတီရုန်းပမာဏနဲ့ သုတ်ပိုးထုတ်လုပ်မှု ကျဆင်းတာနဲ့လည်း ဆက်စပ်နေပါတယ်။

■ လေ့လာချက်ရလဒ်များအရ အဆင့်ဆင့်ထုတ်လုပ်စားစရာတွေဟာ မျိုးပွားကျန်းမာရေးနဲ့ ဇီဝဖြစ်စဉ်ကျန်းမာရေးတို့ကို အန္တရာယ်ဖြစ်စေနိုင်ပြီး အဆင့်ဆင့်ထုတ်လုပ်ရတဲ့ ဖြစ်စဉ်ကိုက ဘေးအန္တရာယ်ဖြစ်စေတယ်လို့ အာဟာရသိပ္ပံပညာရှင် ဂျက်စီကာပရက်စ်တန်က ပြောပါတယ်။

■ အမေရိကန်စားသောက်ကုန်ကွင်းဆက်မှာ ၇၃ ရာခိုင်နှုန်းက UFP စားစရာတွေ ဖြစ်တယ်လို့ ခန့်မှန်းရပါတယ်။

Source: New York Post

#World_Health
Published 28 October 2025

■ ဆံပင်အလှပြင်ဆိုင်တွေမှာ ခေါင်းသွားလျှော်ရင်း လေဖြတ်ခြင်း ခံစားခဲ့ရတဲ့သူ ဒါဇင်ခန့်ကို သုတေသီတွေ တွေ့ရှိခဲ့ကြပါတယ်။

■ ဆယ်စုနှစ် ၅ ခုအတွင်း အလှပြင်ဆိုင်လေဖြတ်ရောဂါ ဖြစ်ပွားမှုပေါင်း ၅၄ ခုကို လေ့လာချက် ၂၂ ခုဖြင့် စစ်ဆေးကာ ဖော်ပြခဲ့ကြပါတယ်။

■ ဒီရောဂါလက္ခဏာက လူတစ်ယောက်ဟာ ခေါင်းလျှော်ဘေစင်ထဲ ပက်လက်လှန်နေရင်း လည်ပင်းအဆန့်လွန်တဲ့အခါ ဖြစ်ပွားတာ ဖြစ်ပါတယ်။

■ လည်ပင်းထဲက ကျောရိုးမသွေးကြောတွေကို ဖိမိဖြဲမိသလိုဖြစ်ပြီး ဦးနှောက်ထဲသို့ သွေးလည်ပတ်မှု ပြတ်တောက်ကာ လေဖြတ်ခြင်းအထိ ဖြစ်နိုင်ပါတယ်။

■ လေဖြတ်ခြင်းအပြင် မူးဝေခြင်း၊ အမြင်ဝါးခြင်း၊ ဟန်ချက်မညီမျှခြင်း၊ ခေါင်းကိုက်ခြင်း၊ အော့အန်ခြင်း၊ အာလေးခြင်း၊ အကြောသေခြင်း၊ ခန္ဓာကိုယ်တစ်ဖက်ဖက် အားနည်းခြင်းတို့လည်း ဖြစ်နိုင်ပါတယ်။

■ အလှပြင်ဆိုင်သွားပြီးနောက် ရက်တွေအပတ်တွေကြာတဲ့အထိ ဒီလက္ခဏာတွေ ဖြစ်နိုင်ပါတယ်။

■ ဒီလိုဖြစ်ပွားသူတွေထဲက ၈၀ ရာခိုင်နှုန်းဟာ အမျိုးသမီးတွေဖြစ်ပြီး အသက်အရွယ်ကန့်သတ်ချက် မရှိပါဘူး။

■ အလှပြင်ဆိုင်လေဖြတ်ရောဂါက အလွန်ကို ရှားပါးပေမယ့် လက္ခဏာတစ်ခုခု ခံစားရတယ်ဆိုရင် ချက်ချင်းအသိပေးသင့်တယ်လို့ သုတေသီတွေ အလေးပေးပြောထားပါတယ်။

Source: Local12