#Daily_News

Published 16 June 2025

၁။ ‌‎ယခုဘဏ္ဍာနှစ်‌စောပိုင်းတွင်ပြည်ပသို့ဆန်၊ ဆန်ကွဲ တန်ချိန် ၄သိန်းကျော် တင်ပို့ထား

၂။ ‌‎‎‎‎နှစ်လအတွင်း နေလှန်းဆားပိဿာချိန်တစ်သိန်းကျော်တင်ပို့ရောင်းချ

၃။ ‎‎လေးရက်အတွင်း တိုင်းနှင့်ပြည်နယ်အနှံ့၌ မိုးသည်းထန်စွာရွာသွန်းနိုင်

၄။ ‎အိန္ဒိယလေယာဉ်ပျက်ကျရသည့် ဖြစ်နိုင်ဖွယ်အကြောင်းအရင်းအား တရုတ်လေယာဉ်ပညာရှင်သုံးသပ်... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

ဟောင်ကောင်မှ နယူးဒေလီပျံသန်းသည့် အဲအိန္ဒိယ ဘိုအင်း787-8 နောက်ထပ် လေယာဉ်တစ်စင်း နည်းပညာပြဿနာကြောင့် ဟောင်ကောင်တွင် ပြန်ဆင်းသက်ခဲ့ရ

၁၆ ဇွန် ၂၀၂၅

နယူးဒေလီ- ဟောင်ကောင်မှ နယူးဒေလီသို့ ဇွန် ၁၆ ရက် တနင်္လာနေ့က ပျံသန်းသည့် အိန္ဒိယ   လေကြောင်း(အဲအိန္ဒိယ) ဘိုအင်း 787-8 လေယာဉ်သည် လေဆိပ်မှပျံတက်ပြီးသိပ်မကြာ  နည်းပညာ ပြဿနာတစ်ခုရှိသည်ဟု သံသယရှိသဖြင့် လေယာဉ်မှူးက ဟောင်ကောင်သို့ ပြန်လှည့်ခဲ့ရကြောင်း သိရပါတယ်။

ပြီးခဲ့တြ့ အပတ်က လန်ဒန်သို့ပျံသန်းရန် လေဆိပ်မှအတက်ပျက်ကျခဲ့သည့်  အဲအိန္ဒိယ  လေယာဉ်  သည်လည်း အဆိုပါ အမျိုးအစား ဘိုအင်း လေယာဉ်ကို အသုံးပြုခဲ့တာဖြစ်ပါတယ်။ ထိုစဉ်က လေယာဉ် ပျက်ကျမှုကြောင့် ခရီးသည် ၂၄၂ ဦးအနက် ၂၄၁ ဦးသေဆုံးခဲ့ရပါတယ်။

တနင်္လာနေ့က လေကြောင်းလိုင်းမှ  သတင်းထုတ်ပြန်ရာတွင် အဲအိန္ဒိယလေကြောင်းခရီးစဉ်အမှတ် AI 315 သည် နည်းပညာပိုင်းပြဿနာတစ်ခုကြောင့် ဟောင်ကောင်သို့ ပြန်လှည့်ခဲ့ရကြောင်း ဖော်ပြခဲ့ပါ တယ်။ ဒါပေမယ့် ဘယ်လိုပြဿနာဆိုတာကိုတော့ ဖော်ပြမထားပါဘူး။

ပြန်လှည့်ခဲ့တဲ့ လေယာဉ်ဟာ ဟောင်ကောင်တွင် ဘေးအန္တရာယ်ကင်းရှင်းစွာ ဆင်းသက်ခဲ့ပြီး  စစ်ဆေးမှု တွေပြုလုပ်ခဲ့ပါတယ်။

လေကြောင်းထိန်းချုပ်ရေးများကို စောင့်ကြည့်နေတဲ့ LiveATC.net ဝက်ဘ်ဆိုက်မှာ လေယာဉ်မှူးနှင့် သတင်းပို့သံကို ဖော်ပြခဲ့ပါတယ်။ လေယာဉ်ပျံတက်ပြီး ၁၅ မိနစ်ခန့်အကြာမှာလေကြောင်းထိန်း မျှော်စင်ကို  ဆက်သွယ်ပြောဆိုခဲ့တဲ့ လေယာဉ်မှူးက “ နည်းပညာအခြေအနေကြောင့် ကျွန်တော်တို့ ဟောင်ကောင်နှင့်နီးနီးမှာပဲ နေပါမယ်။ ဘာပြဿနာဆိုတာ သိရတာနှင့် ကျွန်တော်တို့ လေယာဉ်ကို ပြန်လှည့်ပြီး ဟောင်ကောင်လေဆိပ်မှာ ပြန်လည်ဆင်းသက်ပါမယ်” လို့ အကြောင်းကြားခဲ့တာ ဖြစ်ပါတယ်။

လေယာဉ်ပြန်မလှည့်ခင် လေယာဉ်မှူးက “ ကျွန်တော်တို့ ရှေ့ဆက်ပြီး မပျံချင်တော့ဘူး” လို့ ပြောခဲ့ပါတယ်။

အဆိုပါလေယာဉ်ဟာ မွန်းလွဲ၁နာရီ ၁၅ မိနစ်ခန့်မှာ ဟောင်ကောင် နိုင်ငံတကာလေဆိပ်ကို ချောမောစွာ ဆင်းသက်နိုင်ခဲ့ပါတယ် လို့ ဟောင်ကောင်လေဆိပ်မှ ပြောရေးဆိုခွင့်ရသူတစ်ဦးက ရိုက်တာ သတင်းဌာနကို ပြောပါတယ်။

ယင်းလေယာဉ်ဟာ ဟောင်ကောင်လေဆိပ်မှ မွန်းလွဲ ၁၂ နာရီ ၂၀ မိနစ်မှာ ပျံတက်ခဲ့ပြီး အမြင့်ပေး ၂၂၀၀၀ ခန့်အရောက်မှာ လေယာဉ်နိမ့်ဆင်းလာတာတွေ့ရတယ်လို့ လေယာဉ်တွေပျံသန်းမှု ခြေရာခံ လိုက်နေတဲ့ AirNav Radar ဝက်ဘ်ဆိုက်ကပြောပါတယ်။ အဲဒီလေယာဉ်ဟာ ၇ နှစ်သက်တမ်းရှိပြီ ဖြစ်ပါတယ်။

Source Reuters

#World_Science
Published 16 June 2025

▪️ အာကာသထဲကနေ ၄၄ မိနစ်တိုင်းမှာ ၂ မိနစ်ကြာအောင် ရေဒီယိုလှိုင်းတွေ၊ အိတ်စ်ရေးလှိုင်းတွေ ထုတ်လွှတ်တဲ့ အာကာသအရာဝတ္ထု ရှိနေတာကို အာကာသပညာရှင်များ စိတ်ဝင်စားနေကြပါတယ်။

▪️ ထိုအရာကို ASKAP J1832- 0911 လို့အမည်ပေးထားပြီး Australian Square Kilometre Array Pathfinder (ASKAP) နဲ့ နာဆာရဲ့ Chandra X-ray နက္ခတ်တာရာကြည့်မျှော်စင်တို့ကနေ တွေ့ရှိတာဖြစ်ပါတယ်။

▪️ ဒီလိုအချက်ပြရောင်ခြည် တွေ့ရှိတာဟာ အထူးအဆန်းဖြစ်နေပြီး ဒီနောက်ကွယ်ကနေ ယခင်ကမတွေ့ဖူးတာတွေ ပေါ်ပေါက်လာနိုင်တယ်လို့ ယူဆနေကြပါတယ်။

▪️ သိသမျှကတော့ ASKAP J1832- 0911 ဟာ ကြာမြင့်စွာဖြစ်ပေါ်တဲ့ ယာယီအလင်းတန်း (LPT)ဖြစ်ပြီး ရှားပါးတဲ့ နက္ခတ်ရူပဖြစ်စဉ်တစ်ခု ဖြစ်ကာ အာကာသမီးပြတိုက်လိုမျိုး ရေဒီယိုလှိုင်းတွေ ထွက်ပါတယ်။

▪️ ၂၀၂၂ တုန်းက ပထမဆုံးတွေ့ရှိခဲ့ပြီး LPT ၁၀ ခုသာ မှတ်တမ်းတင်တွေ့ရှိထားပါတယ်။

▪️ ဒီအရာကို ဖြေရှင်းဖို့အတွက် သုတေသီတွေက အာကာသပစ္စည်းအမျိုးအစားနှစ်ခုနဲ့ နှိုင်းယှဉ်ဖို့ ကြိုးစားလာပါတယ်။

▪️ တစ်ခုက အင်အားပြင်း သံလိုက်စက်ကွင်းရှိတဲ့ ကြယ်ကြွေဗဟိုချက်ဖြစ်ပြီး နောက်တစ်မျိုးက ကြယ်စင်နှစ်ခုအတွဲ ဖြစ်ပါတယ်။

▪️ ဒါပေမဲ့ ဒီလိုသီအိုရီတွေနဲ့ပင် ဘာဖြစ်လဲဆိုတာကို မရှင်းပြနိုင်ဘဲ ဒီတွေ့ရှိချက်ဟာ ကြယ်စင်စုဆင့်ကဲပြောင်းလဲမှု ပုံစံအသစ်တွေ ဒါမှမဟုတ် ရူပဗေဒအမျိုးအစားသစ်တစ်မျိုး ဖြစ်နိုင်တဲ့သဘော ဖြစ်ပါတယ်။

▪️ ဒီလိုအရာမျိုးက စက္ကန့်ပိုင်းမျှသာ အလင်းထုတ်ပေးတဲ့ ကြယ်မှုန်တွေ ဖြစ်နိုင်ပေမယ့် LPT တွေကတော့ မိနစ်နာရီကြာတဲ့အထိ ထုတ်လွှတ်ကြပါတယ်။

▪️ အာကာသထဲမှာ ဒီလိုဟာမျိုးရှိတယ်ဆိုရင် နောက်ထပ်အရာတွေအများကြီး ရှိနိုင်ဦးမယ်လို့ စပိန်ကတ္တလန်အာကာသအဖွဲ့အစည်းမှ နက္ခတ်ရူပပညာရှင် နန်ဒရီယာက ပြောသွားပါတယ်။

#Source: WION

#World_News
Published 16 June 2025

▪️ အမေရိကန်သမ္မတ ဒေါ်နယ်ထရမ့်အစိုးရအဖွဲ့က ခရီးသွားလာခွင့်ကန့်သတ်ချက်များ တိုးချဲ့ရန် စီစဉ်နေပြီး နောက်ထပ် ၃၆ နိုင်ငံမှ နိုင်ငံသားများကို အမေရိကန်သို့ ဝင်ရောက်ခွင့်ပိတ်ပင်သွားနိုင်တယ်လို့ နိုင်ငံခြားရေးဝန်ကြီးဌာနရဲ့ အတွင်းပိုင်းကြေးနန်းစာမှာ ဖော်ပြထားပါတယ်။

▪️ ယခုလအစောပိုင်းက ထရမ့်ဟာ နိုင်ငံ ၁၂ ခုမှ နိုင်ငံသားများကို ဝင်ရောက်ခွင့်ပိတ်ပင်တဲ့ ကြေညာချက်တစ်ခုမှာလည်း လက်မှတ်ရေးထိုးခဲ့ပြီး ဒါဟာ နိုင်ငံရပ်ခြား အကြမ်းဖက်သမားများနဲ့ နိုင်ငံ့လုံခြုံရေး ခြိမ်းခြောက်မှုရန်တွေမှ အမေရိကန်ကို ကာကွယ်ဖို့အတွက် ဖြစ်တယ်လို့ ပြောခဲ့ပါတယ်။

▪️ ထရမ့်ဟာ ဒုတိယအကြိမ် သမ္မတဖြစ်လာပြီးနောက် လူဝင်မှုကိစ္စတွေမှာ နှိမ်နင်းလျက်ရှိရာ ဂိုဏ်းအဖွဲ့ဝင်တွေလို့ သံသယရှိတဲ့ ဗင်နီဇွဲလားနိုင်ငံသား ရာနဲ့ချီကို အယ်ဆာဗေဒိုသို့ နှင်ထုတ်ခြင်း၊ နိုင်ငံရပ်ခြားကျောင်းသားအချို့ကို အမေရိကန်တက္ကသိုလ်များထံ တက်ရောက်ခွင့်ပိတ်ပင်ခြင်း၊ အချို့ကို နေရပ်ပြန်ပို့ခြင်းများ ပြုလုပ်ထားပါတယ်။

▪️ ကြေးနန်းစာထဲမှာ "စိုးရိမ်စရာ အနေအထားရှိတဲ့ နိုင်ငံ ၃၆ ခုကို တွေ့ရှိထားပြီး ထိုနိုင်ငံတွေဟာ ရက်ပေါင်း ၆၀ အတွင်း သတ်မှတ်ထားတဲ့ စံသတ်မှတ်ချက်တွေ လိုအပ်ချက်တွေ မပြည့်မီပါက တစ်စိတ်တစ်ပိုင်း ဒါမှမဟုတ် အပြည့်အဝ ဝင်ရောက်ခွင့်ပိတ်ပင်သွားနိုင်ပါတယ်"လို့ ဖော်ပြထားပါတယ်။

▪️ ယင်းတို့စိုးရိမ်တဲ့ထဲမှာ အချို့နိုင်ငံတွေက စိတ်ချရတဲ့ အထောက်အထား သက်သေခံချက်တွေ ပေးအပ်ဖို့ရာ ပူးပေါင်းဆောင်ရွက်ခြင်းမရှိတာမျိုး ပါဝင်နေပြီး နောက်တစ်ချက်က ထိုနိုင်ငံတွေရဲ့ နိုင်ငံကူးလက်မှတ်တွေနဲ့ ပတ်သက်ပြီး မေးခွန်းထုတ်စရာ အခြေအနေတွေ ဖြစ်ပါတယ်။

▪️ တခြားစိုးရိမ်စရာတွေက အမေရိကန်အတွင်း အကြမ်းဖက်လုပ်ရပ်တွေ၊ ဂျူးမုန်းတီးရေး၊ အမေရိကန်ဆန့်ကျင်ရေးလှုပ်ရှားမှုတို့မှာ ပါဝင်တဲ့သူတွေရဲ့ နိုင်ငံတွေဖြစ်ပါတယ်။

▪️ ရက် ၆၀ အတွင်း မဖြေရှင်းနိုင်ပါက ပိတ်ပင်ခံရနိုင်တဲ့ နိုင်ငံတွေထဲမှာ အန်ဂိုလာ၊ ဘာကီနာဖာဆို၊ ကမ္ဘောဒီးယား၊ ကင်မရွန်း၊ အီသီယိုးပီးယား၊ အီဂျစ်၊ ဂမ်ဘီယာ၊ ဂါနာ၊ နိုင်ဂျီးရီးယား၊ ဆီနီဂေါ၊ ဆီးရီးယား၊ ယူဂန်ဒါ၊ ဇင်ဘာဘွေတို့လို နိုင်ငံတွေပါဝင်ပါတယ်။

▪️ ယခုလအစောပိုင်းက ပိတ်ပင်လိုက်တဲ့ နိုင်ငံတွေကတော့ အာဖဂန်နစ္စတန်၊ မြန်မာ၊ ချက်ဒ်၊ ကွန်ဂိုသမ္မတနိုင်ငံ၊ အီကွေတိုရီယယ်ဂီနီ၊ အဲရီထရီယာ၊ ဟေတီ၊ အီရန်၊ လစ်ဗျား၊ ဆိုမာလီယာ၊ ဆူဒန်၊ ယီမင်တို့ ဖြစ်ပါတယ်။

#Source: Reuters

#World_Science
Published 16 June 2025

▪️ သိပ္ပံပညာရှင် အဖွဲ့တစ်ဖွဲ့က သမုဒ္ဒရာအောက်မှာ ဖုံးကွယ်နေတဲ့မြို့တစ်မြို့ကို ရှာဖွေတွေ့ရှိခဲ့ပြီး ဆန်းပြားစွာပျောက်ဆုံးနေတဲ့ မြို့ကြီးရဲ့ ပထမဆုံးအထောက်အထား အခိုင်အမာကို ပြသလိုက်တာ ဖြစ်ပါတယ်။

▪️ အင်ဒိုနီးရှားအနီး မက်ဒူရာရေလက်ကြားမှာ နှစ်ပေါင်း ၁၄၀,၀၀၀ ခန့်သက်တမ်းရှိတယ်လို့ ယူဆရတဲ့ Homo erectus ဦးခေါင်းခွံအပြင် ဖွတ်နဲ့ ဆင်တွေလိုမျိုး မျိုးစိတ် ၃၆ ခုမှ ရုပ်ကြွင်းပေါင်း ၆ ထောင်ကျော်တွေ့ရှိခဲ့ပါတယ်။

▪️ ဒီအကြွင်းအကျန်တွေကို ဧရာမကုန်းတံတားကြီး Sundaland ရဲ့ တစ်စိတ်တစ်ပိုင်းဖြစ်ခဲ့တဲ့ နေရာအောက်မှာ တွေ့တာဖြစ်ပြီး အချို့သတ္တဝါအရိုးတွေဆိုရင် အစောပိုင်းခေတ်က လူသားတွေ အမဲလိုက်ကြတဲ့ အလေ့အထတွေကို မြင်သာစေပါတယ်။

▪️ ၂၀၁၁ ခုနှစ်က သဲတူးဖော်သူတွေက ရုပ်ကြွင်းတွေအပေါ် ရောက်ခဲ့ပေမယ့် အခုနောက်ပိုင်းမှ သိပ္ပံပညာရှင်တွေဟာ ယင်းတို့ရဲ့ သက်တမ်းကို လေ့လာခဲ့ကြတာ ဖြစ်ပါတယ်။

▪️ လွန်ခဲ့တဲ့နှစ်ပေါင်း ၁၄,၀၀၀ မှ ၇,၀၀၀ အတွင်း ရေခဲပြင်များ အရည်ပျော်ကာ ပင်လယ်ရေမျက်နှာပြင် တက်လာသဖြင့် Sundaland ရဲ့ အောက်ခြေသောင်ပြင်တွေ နစ်မြုပ်ခဲ့ပါတယ်။

▪️ တောင်ကြားနဲ့ ရုပ်ကြွင်းတွေက လွန်ခဲ့တဲ့နှစ်ပေါင်း ၁၆၂,၀၀၀ နဲ့ ၁၁၉,၀၀၀ ကြားရှိမယ်လို့ သုတေသီများ ခန့်မှန်းနေကြပါတယ်။

▪️ ယနေ့ခေတ်ဆင်တွေနဲ့ ဆင်တူတဲ့ အရွက်စားသတ္တဝါကြီးရဲ့ ရုပ်ကြွင်းတွေကိုလည်း တွေ့ရှိခဲ့ပါတယ်။

▪️ သမင်ဒရယ်အမျိုးမျိုးကိုလည်း တွေ့ရပြီး အသက်ရှင်နေထိုင်ဖို့ လုံလောက်တဲ့ အစာရေစာတွေ ရှိတယ်လို့ ယူဆရပါတယ်။

#Source: The Express

၁၅ ဇွန် ၂၀၂၅

အိန္ဒိယနိုင်ငံ ဥတ္တရခန္ဓ ပြည်နယ်၏ အစွန်အဖျားအရပ်တစ်ခုတွင် ဇွန် ၁၅ ရက် မနက်စောစောပိုင်းက ရဟတ်ယာဉ်တစ်စီးပျက်ကျရာ လူအနည်းဆုံး (၇)ဦးသေဆုံးသွားခဲ့ရပါတယ်။

ရဟတ်ယာဉ်ပေါ်မှာ ရဟတ်ယာဉ်မောင်းနှင့် ဘုရားဖူးခရီးသည် (၆)ဦးခန့်တို့လိုက်ပါသွားကြတယ်လို့ ကနဦးသတင်းများအရသိရပါတယ်။ခရီးသည်ထဲမှာ နို့စို့အရွယ် ကလေးငယ်တစ်ဦးလည်းပါဝင်ပါတယ်။

အာရန်လေကြောင်းကုမ္ပဏီက ပိုင်ဆိုင်တဲ့ အဆိုပါ ရဟတ်ယာဉ်သည်  ဂေါရီခန် နှင့် တရီဂျူဂင်နာယာယန် အကြား မှာ ပျက်ကျခဲ့ပြီးနောက် မီးလောင်ကျွမ်းခဲ့တာဖြစ်ပါတယ်။

ရဟတ်ယာဉ်ဟာ ဂူပကာရှီမြို့သို့သွားရောက်ရန် ကီဒါနတ်မြို့မှ မနက် ၅နာရီခွဲမှ ပျံတက်ခဲ့ပြီး သိပ်မကြာ ခင်မှာ ပျက်ကျသွားခဲ့ရတယ်လို့ ပြည်နယ်လေကြောင်းအာဏာပိုင်ဌာနကပြောပါတယ်။

လေယာဉ်ဟာ ရာသီဥတုဆိုးရွားတဲ့အတွက် ပျက်ကျခဲ့တာဖြစ်တယ်လို့ ခရိုင်ဘးအန္တရာယ်စီမံခန့်ခွဲရေး အရာရှိ နန်ဒန်ဆင်းရပ်ချ်ဝါက မီဒီယာတွေကို ပြောပါတယ်။

ပျက်ကျတဲ့နေရာဟာ အစွန်အဖျားဒေသဖြစ်ပြီး ကယ်ဆယ်ရေးအဖွဲ့တွေက အဲဒီနေရာကို သွားရောက်နေကြတယ်လို့  စစ်ဆေးရေးမှူးချုပ် ရာဂျစ် ဆွာရုက ပြောပါတယ်။

“ရဟတ်ယာဉ်ပျက်ကျတဲ့သတင်းကြား၇လို့ အလွန်ပဲစိတ်ထိခိုက်ရပါတယ်” လို့ ပြည်နယ်ဝန်ကြီးချုပ် ပွတ်ရှ်ကာဆင်းဒါမီကပြောပါတယ်။

Source Time of India