#Local_News
Published 18 July 2026

■ ဧရာဝတီတိုင်းဒေသကြီး ပုသိမ်စက်မှုဇုန်မှာအိန္ဒိယကပဲပုတ်ဆီကြိတ်စက်ရုံကို တည်ဆောက်ပြီး ထွက်ရှိလာသည့် ပဲပုတ်ဆီများကိုပြည်တွင်း၌ဖြန့်ဖြူးသွားမည်ဖြစ်ကြောင်း ဧရာဝတီတိုင်းဒေသကြီးအစိုးရအဖွဲ့မှ သိရသည်။

■ ဧရာဝတီတိုင်းဒေသကြီးမှ မြန်မာ - အိန္ဒိယ နှစ်နိုင်ငံအကြား ကုန်သွယ်မှုမြှင့်တင်ရေးကိစ္စ နှင့်စပ်လျဉ်းပြီးဆောင်ရွက်မည့်အစီအစဉ်များအား ရှင်းလင်းတင်ပြခြင်းအစည်းအဝေးကို ဇူလိုင်၁၃ ရက်နေ့နံနက်ပိုင်းက တိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ(၁)တွင် ကျင်းပခဲ့ရာ တိုင်းဒေသကြီးဝန်ကြီးချုပ် ဦးအေးကျော်၊ တိုင်းဒေသကြီးအစိုးရအဖွဲ့ဝင်ဝန်ကြီးများ၊ မြန်မာ - အိန္ဒိယ ချစ်ကြည်ရေးအသင်း ဥက္ကဋ္ဌနှင့်တာဝန်ရှိသူများ၊ ဌာနဆိုင်ရာများနှင့် ကုမ္ပဏီမှတာဝန်ရှိ သူများ တက်ရောက်ကြရာကုမ္ပဏီမှတာဝန်ရှိသူများက ဧရာဝတီတိုင်းဒေသကြီးမှ မြန်မာ-အိန္ဒိယ နှစ်နိုင်ငံ အကြား ကုန်သွယ်ရေးဆောင်ရွက်မည့် အစီအစဉ်များ၊ မြန်မာနိုင်ငံရှိ Green Rise Company Limited နှင့် အိန္ဒိယနိုင်ငံရှိ Super Power Trading Company Private Limited တို့ပူးပေါင်း၍ ဧရာဝတီတိုင်းဒေသကြီးမှထွက်ရှိသော မတ်မဲ(Raw) များကို ဝယ်ယူကြိတ်ခွဲသန့်စင်(Gravity Cleaned) ပြုလုပ်ပြီး ထွက်ရှိသော Black Matpe(SQ, FAQ)များကို အိန္ဒိယနိုင်ငံသို့ တင်ပို့ရောင်းချခြင်းနှင့် ငါးအစာကုန်ကြမ်းဖြစ်သော ပဲပုတ်ဖက်(Soybean Meal) များကို တင်သွင်းပြီး ငါးအစာတောင့်များ ထုတ်လုပ်ကာ ဧရာဝတီတိုင်းဒေသကြီးအတွင်းရှိ ငါးမွေးမြူရေးကန်များသို့ ဖြန့်ဖြူးမည့်အစီအစဉ်များ၊ မတ်ပဲ တစ်လလျှင် တန်ချိန် ၂၀,၀၀၀ ခန့်၊ တစ်နှစ်လျှင် တန်ချိန် ၂ သိန်းခန့်နှင့် အခြားဒေသထွက်ကုန်ပစ္စည်းများကို ပုသိမ်ဆိပ်ကမ်းမှ အိန္ဒိယနိုင်ငံ ချန်နိုင်းဆိပ်ကမ်းသို့ တင်ပို့သွားမည့်အခြေအနေများ၊ စီမံကိန်းမတည်ရင်းနှီးငွေ၊ လုပ်ငန်းစတင်မည့် ကာလ၊ ပို့ကုန်ရငွေ၏ ၅၀ % တန်ဖိုးရှိ ပြည်တွင်းလိုအပ်ချက်ရှိသော အိန္ဒိယ နိုင်ငံထွက်ကုန်များကို ပြန်လည်တင်သွင်းမည့်အခြေအနေများ၊ ကုန်သွယ်မှုဆောင်ရွက်ရန် မြန်မာ-အိန္ဒိယ ကုမ္ပဏီများ Joint Venture Partnership အဖြစ် အကျိုးတူပူးပေါင်းကာ မြန်မာနိုင်ငံ ကုန်သည် များနှင့်စက်မှုလက်မှုလုပ်ငန်းရှင်များအသင်းချုပ်(UMFCCI)နှင့် အိန္ဒိယ-မြန်မာကုန်သည်လုပ်ငန်းရှင်များအသင်း(IMCC)တို့နှင့် ပူးပေါင်းဆောင်ရွက်မည့်အစီအစဉ်များ၊ ကုန်သွယ်ရေးအောင်မြင်စွာဆောင်ရွက်နိုင်ရန် သွင်းကုန်နှင့်ပို့ကုန်ရငွေ ပေးချေမှုကို အိန္ဒိယငွေကြေး ရူပီး(INR)ဖြင့် တိုက်ရိုက်ပေးချေခြင်းစနစ်အသုံးပြုပြီး မြန်မာနိုင်ငံတော် ဗဟိုဘဏ်၊ နိုင်ငံတော်ပိုင်ဘဏ်များ၊ ပုဂ္ဂလိကပိုင်ဘဏ်များနှင့် ပူးပေါင်းဆောင်ရွက်မည့်အခြေအနေများ၊ ပုသိမ်စက်မှုဇုန် တွင် SOYBEAN MEAL & SOYBEAN OIL EXTRACTION AND REFINERY ပဲပုတ်ဆီကြိတ်စက်ရုံ တည်ဆောက်မည့် အစီအစဉ်များ၊ စားသုံးရန်အသင့် ပဲပုပ်ဆီများထုတ်လုပ်ပြီး ပြည်တွင်းတွင်ဖြန့်ဖြူးခြင်းနှင့် ပဲပုတ်ဖတ်များအား တိရစ္ဆာန်အစာအတွက် အသုံးပြုနိုင်မည့် အခြေအနေများကိုလည်းကောင်း၊ တိုင်းဒေသကြီးအစိုးရအဖွဲ့ဝင်ဝန်ကြီးများနှင့် ဌာနဆိုင်ရာများက သက်ဆိုင်ရာကဏ္ဍများအလိုက် အထွေထွေဆွေးနွေးတင်ပြခဲ့ကြပါသည်။

■ ထို့သို့ ဆွေးနွေးတင်ပြမှုများအပေါ် တိုင်းဒေသကြီးဝန်ကြီးချုပ်က“ မြန်မာ - အိန္ဒိယ နှစ်နိုင်ငံအကြား ကုန်သွယ်မှုလုပ်ငန်းများကို ပိုမိုဖွံ့ဖြိုးတိုးတက်အောင် ကြိုးပမ်းဆောင်ရွက် ကြရမှာဖြစ်ပါကြောင်း၊ ကုန်သွယ်မှုလုပ်ငန်းများ ဖွံ့ဖြိုးတိုးတက်လာသည်နှင့်အမျှ နှစ်နိုင်ငံအကြား စီးပွားရေးလုပ်ငန်းများ ပူးပေါင်းဆောင်ရွက်မှုနှင့် ရင်းနှီးမြုပ်နှံမှုများတိုးမြင့်လာမှာ ဖြစ်ပါကြောင်း၊ တိုင်းဒေသကြီးမှထွက်ရှိသည့် ဆန်၊ ပဲ၊ ပြောင်း စသည့်ထွက်ကုန်များကို ပြည်ပနိုင်ငံများသို့ အဓိကထားတင်ပို့လျက်ရှိပါကြောင်းနှင့် အခြားကုန်စည်များ တင်ပို့နိုင်ရေးကိုလည်း ကြိုးပမ်းဆောင်ရွက်လျက်ရှိပါကြောင်း၊ ကုန်စည်များတိုးချဲ့တင်ပို့နိုင်ပါက တိုင်းဒေသကြီး၏ GDP လည်းတိုးတက်လာမည်ဖြစ်ပါကြောင်း၊ တိုင်းဒေသကြီး၏ ပြည်ပပို့ကုန်များကို ကုန်းလမ်းသာမက ရေလမ်းခရီးကို အဓိကထားတင်ပို့နိုင်ရေးဆောင်ရွက်လျက်ရှိပါကြောင်း၊ ပုသိမ်ဆိပ်ကမ်းမှ တိုက်ရိုက်တင်ပို့နိုင်ပါက တောင်သူများနှင့် exporter လုပ်ငန်းရှင်များအတွက် ထုတ်လုပ်မှုနှင့် ဝန်ဆောင်မှုစရိတ်များသက်သာမည်ဖြစ်၍ များစွာအကျိုးရှိပါကြောင်း၊ ထို့အပြင် တောင်သူများအတွက်လိုအပ်သည့် သွင်းအားစုများအား အိန္ဒိယမှ မြန်မာနိုင်ငံသို့ ပြန်လည်တင်သွင်းမည်ဖြစ်၍ များစွာအကျိုးရှိပါကြောင်း၊ ပဲပုတ်ဆီကြိတ်စက်ရုံကိုလည်း တည်ထောင်၍ ပဲပုပ်ဆီများ ထုတ်လုပ်ပြီး ပြည်တွင်းတွင် ဖြန့်ဖြူးမည်ဖြစ်၍ စားသုံးဆီဖူလုံရေးနှင့် တိရိစ္ဆာန်အစာထုတ်လုပ်မှုများအတွက်လည်း များစွာအထောက်အကူပြုမည်ဖြစ်ပြီး ပြည်ပသွင်းကုန်များကို လျော့ချနိုင်မည်ဖြစ်၍နိုင်ငံခြားငွေသုံးစွဲမှုကိုလည်း လျော့ချနိုင်မည် ဖြစ်ပါကြောင်း၊ ကုမ္ပဏီများအနေဖြင့်လည်း စီမံကိန်းလုပ်ငန်းများကိုလည်း အမြန်ဆုံးအကောင် အထည်ဖော်ဆောင်ရွက်ကြစေလိုကြောင်းနှင့် တိုင်းဒေသကြီးအစိုးရအဖွဲ့အနေဖြင့် လိုအပ်သည်များကို လုပ်ထုံး၊ လုပ်နည်းများနှင့်အညီ ပံ့ပိုးကူညီပေးသွားမည်ဖြစ်ပါကြောင်း” ပြောကြားခဲ့ ကြောင်းသိရသည်။

#YMG/NN #Yangon_Times

#World_Health
Published 18 July 2026

■ ဂီတတူရိယာတစ်ခုခု လေ့ကျင့်သင်ယူခြင်းက ဘဝနောက်ပိုင်းမှာ ဦးနှောက်အတွက် အကောင်းဆုံးလက်ဆောင် ဖြစ်လာနိုင်ပါတယ်။

■ ကျိုတိုတက္ကသိုလ်မှ သုတေသီများ လေ့လာချက်ပြုလုပ်ရာမှာ ဂီတတူရိယာတစ်မျိုးမျိုးကို ၃ နှစ်ကျော် လေ့ကျင့်နေတဲ့ သက်ကြီးရွယ်အိုတွေဟာ မှတ်ဉာဏ်စွမ်းရည် ထိန်းသိမ်းစေနိုင်ပြီး ဆက်မလေ့ကျင့်တော့တဲ့သူတွေထက်စာရင် အသက်အရွယ်ကြောင့် ဦးနှောက်ကျုံ့ခြင်း နည်းပါးတာ တွေ့ရပါတယ်။

■ သင်ကြားပေးပြီး ၄ လအကြာမှာ လူတဝက်ခန့်က ၃ နှစ်ကျော်ကြာအောင် ဆက်လက်လေ့ကျင့်ခဲ့ကြပြီး ကျန်တဲ့သူတွေကတော့ ဆက်မလေ့ကျင့်တော့ပါဘူး။

■ နောက် ၄ နှစ်အကြာမှာ MRI စကင်များ၊ မှတ်ဉာဏ်စမ်းသပ်မှုများ ပြုလုပ်ခဲ့ရာမှာ ရလဒ်များ ကွဲပြားခဲ့ပါတယ်။

■ ဆက်မလေ့ကျင့်တော့တဲ့သူတွေမှာ စကားပြောဆိုမှတ်ဉာဏ်စွမ်းရည် ကျဆင်းသွားတာ တွေ့ရပါတယ်။

■ အသက်အရွယ်အရ မှတ်ဉာဏ်နဲ့ သင်ယူမှု ယိုယွင်းလာတတ်တဲ့ ဦးနှောက်အပိုင်းမှာလည်း ကျုံ့သွားတာ တွေ့ရပါတယ်။

■ ဂီတတူရိယာ ဆက်လက်လေ့ကျင့်သူတွေကတော့ မှတ်ဉာဏ်စွမ်းဆောင်ရည် ထိန်းသိမ်းထားနိုင်ပြီး ဦးနှောက်အပိုင်း သိသိသာသာ ကျဆင်းခြင်း မတွေ့ရပါဘူး။

■ အသက်ကြီးသူတွေမှာ တူရိယာတစ်ခုခု စတင်လေ့ကျင့်ခြင်းက ဦးနှောက်လှုပ်ရှားမှုကို မြှင့်တင်ပေးကာ ဦးနှောက်စွမ်းရည်ကျဆင်းခြင်းကို ကာကွယ်ပေးတဲ့သဘော ဖြစ်ပါတယ်။

■ ကိုယ်ကာယလှုပ်ရှားဖို့ အခက်အခဲရှိတဲ့ သက်ကြီးရွယ်အိုတွေအတွက် တေးဂီတက ထိရောက်တဲ့နည်းလမ်းတစ်ခု ဖြစ်နိုင်ပါတယ်။

Source: India Today

#World_Cup
Published 18 July 2026

■ တနင်္ဂနွေနေ့မှာ အာဂျင်တီးနားနဲ့ စပိန်တို့ ဗိုလ်လုပွဲကန်ရမှာဖြစ်ကာ ဖီဖာကမ္ဘာ့ဖလားဘောလုံးပြိုင်ပွဲ သမိုင်းတလျှောက် ကိုပါအမေရိကားချန်ပီယံနဲ့ ဥရောပချန်ပီယံတို့ ပထမဆုံးအဖြစ် တွေ့ဆုံရမှာ ဖြစ်ပါတယ်။

■ အာဂျင်တီးနားအတွက် အကောင်းဆုံးခြေစွမ်း ပြနေတဲ့ အသင်းခေါင်းဆောင် လီယွန်နယ်မက်ဆီအနေနဲ့ စပိန်ကလပ်မှာ ကြာမြင့်စွာ ကစားခဲ့ပေမယ့် ကမ္ဘာ့ဖလားပြိုင်ပွဲမှာ စပိန်အသင်းနဲ့ ပထမဆုံး ရင်ဆိုင်ရမှာဖြစ်ပါတယ်။

■ မက်ဆီက စပိန်ကိုချီးကျူးခဲ့ပြီး ယင်းတို့ရဲ့ကာလကြာရှည် လက်ကိုင်ထားတဲ့ ဘောလုံးဒဿနကိုလည်း အသိအမှတ်ပြုလိုက်ပါတယ်။

■ "စပိန်ဟာ ထူးချွန်တဲ့ကစားသမားတွေရှိပြီး အလွန်ထူးခြားတဲ့ကစားဟန်ရှိပါတယ်။

■ နှစ်ပေါင်းများစွာ စွဲစွဲမြဲမြဲကျင့်သုံးလာတဲ့ ဘောလုံးဒဿနာတစ်ခုရှိပြီး ကျွန်တော်ကိုယ်တိုင် ကောင်းစွာသိကျွမ်းတဲ့အသင်းလည်းဖြစ်ပါတယ်" လို့ ပြောပါတယ်။

■ စပိန်က ဆီမီးဖိုင်နယ်မှာ ပြင်သစ်ကို ၂-၀ ဂိုးဖြင့် အနိုင်ရပြီးနောက် ၁၆ နှစ်အတွင်း ကမ္ဘာ့ဖလားဗိုလ်လုပွဲသို့ ပထမဆုံး တက်ရောက်ခဲ့ကာ ပြိုင်ပွဲတလျှောက် ပေးဂိုးတစ်ဂိုးသာ ရှိခဲ့ပါတယ်။

■ မက်ဆီအတွက်ကတော့ ဒီပွဲဟာ အလွန်အဓိပ္ပာယ်ရှိနေပြီး စပိန်ဘောလုံးလောက၊ ဘာစီလိုနာအသင်းတို့နဲ့ အတော်လေး ဆက်နွယ်နေခဲ့တာကြောင့် ဖြစ်ပါတယ်။

■ ယခုပြိုင်ပွဲအတွင်း မက်ဆီဟာ သွင်းဂိုး ၈ ဂိုး၊ ဂိုးဖန်တီးမှု ၄ ကြိမ်ဖြင့် ရွှေဘောလုံးဆုအတွက် ရေပန်းအစားဆုံး ဖြစ်နေကာ အာဂျင်တီးနားကလည်း ၂၀၁၉ နောက်ပိုင်း အဓိကပြိုင်ပွဲကြီးတွေမှာ ဗိုလ်လုပွဲ ၅ ကြိမ်အထိ ရောက်ခဲ့ပါတယ်။

■ အသက် ၃၉ နှစ်ရှိပြီဖြစ်တဲ့ မက်ဆီဟာ ပြိုင်ပွဲမှာ ရုပ်ပိုင်းဆိုင်ရာအခြေအနေ အကောင်းဆုံးရှိနေစေရန် အပြင်းအထန်ပြင်ဆင်ခဲ့တယ်လို့လည်း ဖွင့်ဟခဲ့ပါတယ်။

Source: WION

#World_Health
Published 18 July 2026

■ ကိုလက်စထရောများခြင်းက နှလုံးသွေးကြောရောဂါ အဓိကဖြစ်စေတဲ့ အကြောင်းအရင်းတွေထဲက တစ်ခုဖြစ်ပြီး ပြဿနာက လက္ခဏာသိသိသာသာ မပြတတ်ပါဘူး။

■ အများစုက နှလုံးရောဂါဖြစ်ခြင်း၊ လေဖြတ်ခြင်းတို့ ဖြစ်မှသာ ကိုလက်စထရောများမှန်း သိကြရပါတယ်။

■ အချို့လူတွေမှာတော့ ခြေကျင်းဝတ်အနောက်ဘက် အာခီးလိစ်အရွတ်နေရာမှာ လက္ခဏာပြတတ်တယ်လို့ ကျွမ်းကျင်သူတွေ ဆိုပါတယ်။

■ သွေးထဲမှာ ကိုလက်စထရောပမာဏ များပြားလာတဲ့အခါ အရွတ်တွေထဲမှာ ကိုလက်စထရောအနည်များ ဖြစ်ပေါ်လာပါတယ်။

■ ထိုအနည်စုပြုံမှုတွေက အရေပြားအောက်မှာ အဖုအကျိတ်ငယ်လေးတွေလို ဖြစ်ပေါ်စေပါတယ်။

■ အာခီးလိစ်အရွတ် ထူထဲလာခြင်းက ကိုလက်စထရောများခြင်းရဲ့ သတိပေးလက္ခဏာ ဖြစ်ဖွယ်ရှိတယ်လို့ သုတေသီတွေ ဖော်ပြထားပါတယ်။

■ အသက် ၁၈ နှစ်မှ ၇၅ နှစ်အတွင်း လူပေါင်း ၂၀၅ ဦးကို အဖွဲ့ ၃ ဖွဲ့ခွဲကာ ကိုလက်စထရောပမာဏ ပုံမှန်ရှိတဲ့အဖွဲ့၊ LDL ပမာဏ ပုံမှန်ထက်ကျော်ခါနီးအဖွဲ့၊ ကိုလက်စထရောများသူများအဖွဲ့ ဆိုပြီး ခွဲလိုက်ပါတယ်။

■ ထိုအခါမှာ ကိုလက်စထရော အများဆုံးလူတွေက အာခီးလိစ်အရွတ် အထူဆုံးသူတွေ ဖြစ်နေပါတယ်။

■ LDL ကိုလက်စထရော များပြားပါက သွေးကြောနံရံတွေမှာ စုပြုံလာပြီး အဆီပိတ်ဆို့မှု ဖြစ်ပေါ်စေကာ သွေးကြောကျဉ်းခြင်း၊ နှလုံးရောဂါ၊ လေဖြတ်ခြင်းတို့ ဖြစ်နိုင်ခြေများစေပါတယ်။

■ အသက် ၄၀ ကျော်သူတွေ၊ အဝလွန်သူတွေ၊ သွေးတိုး ဆီးချိုခံစားရသူတွေ၊ ကိုလက်စထရောများခြင်းနဲ့ နှလုံးရောဂါ မျိုးရိုးရှိသူတွေအနေနဲ့ ကိုလက်စထရော စစ်ဆေးသင့်ပါတယ်။

■ ကိုလက်စထရောများခြင်းအတွက် နေထိုင်စားသောက်မှုပုံစံ အရင်ဆုံးပြောင်းလဲရမှာဖြစ်ပြီး ဟင်းရွက်၊ အသီးအနှံ၊ ပဲအမျိုးမျိုး၊ အခွံမာသီးနဲ့ အစေ့အဆန်၊ ဂျုံပြောင်းဆန်တို့ ပိုစားပေးသင့်ပါတယ်။

Source: The Jerusalem Post

အရှေ့အလယ်ပိုင်း ပဋိပက္ခတွေနဲ့ ဟော်မုဇ်ရေလက်ကြား ပိတ်ဆိုမှုတွေကြောင့် ကမ္ဘာ့စီးပွားရေး ရေရှည်သက်ရောက်မှုဖြစ်လာလိမ့်မယ်လို့ ယူကေ စီးပွားရေးနဲ့လူမှုသုတေသနဌာနမှ စီးပွားရေးခန့်မှန်းသုံးသပ်ရေး လက်ထောက်ညွှန်ကြားရေးမှူး စတီဖင်မီလတ်ကပြောပါတယ်။

#World_News
Published 17 July 2026
#ဟော်မုဇ်ရေလက်ကြား
#YMG #Yangon_Times #Yangon_Media_Group

ရန်ကုန်မြို့ရဲ့ သမိုင်းဝင်အထင်ကရနေရာတစ်ခုဖြစ်တဲ့ ဗိုလ်ချုပ်အောင်ဆန်းဈေးကြီးရဲ့ နှစ်(၁၀၀)ပြည့်အထိမ်းအမှတ်ပွဲတော်ကြီးကို အောက်တိုဘာလ(၇)ရက်နေ့ကနေ(၁၁)ရက်နေ့အထိ  ဆိုင်ခန်းပေါင်း ၁၁၁ ခန်း နဲ့စည်ကားသိုက်မြိုက်စွာကျင်းပသွားမယ်လို့ ပွဲကျင်းပရေးကော်မတီ ကသိရပါတယ်။

#Local_News
Published 17 July 2026
#ဗိုလ်ချုပ်အောင်ဆန်း
#YMG/NN #Yangon_Times

အသေးစား၊ အငယ်စားနှင့် အလတ်စားစီးပွားရေးလုပ်ငန်းများ ဖွံ့ဖြိုးတိုးတက်ရေး (MSME) ရန်ပုံငွေမှတဆင့် ဝါလုပ်ငန်းများ ဖွံဖြိုးတိုးတက်ရေးအတွက် ချေးငွေများထုတ်ချေးပေးသွားမှာဖြစ်တာကြောင့် စိတ်ဝင်စားသူများအနေဖြင့် ချေးငွေအဆိုပြုလွှာများ ပေးပို့လျှောက်ထားနိုင်တယ်လို့ စက်မှုနှင့် အသေးစား၊ အငယ်စား၊ အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေးဝန်ကြီးဌာနလက်အောက်ရှိ စက်မှုကြီးကြပ်ရေးနှင့်စစ်ဆေးရေးဦးစီးဌာနက နိုင်ငံပိုင်သတင်းစာများမှတဆင့်ယနေ့အသိပေးထုတ်ပြန်လိုက်ပါတယ်။

#Local_News
Published 17 July 2026
#ဝါ #ချေးငွေ
#YMG/SW #Yangon_Times

ရွှေတိဂုံစေတီတော်မြတ်ကြီးသို့ အခု၂၀၂၆ခုနှစ် ဇန်နဝါရီလကနေ ဇွန်လကုန်အထိ ခြောက်လတာအတွင်း ပြည်တွင်းပြည်ပဘုရားဖူးဧည့်သည် ၃ ဒသမ ၈ သန်းကျော်လာရောက်ဖူးမြော်ခဲ့ရာ အရင်နှစ်ကာလတူထက်လာ ရောက်ဖူးမျှော်သူ ပိုမိုများပြားလာတယ်လို့ စေတီတော်ကြီးဘဏ္ဍာတော်ထိန်းဂေါပကအဖွဲ့က သိရပါတယ်။

#Local_News
Published 17 July 2026
#ရွှေတိဂုံစေတီတော်မြတ်ကြီး
#YMG/NN #Yangon_Times

မြန်မာနိုင်ငံတစ်ဝန်းလုံးတွင် ဆိုလာစနစ်အသုံးပြုမှုများ တိုးပွားလာသည်နှင့်အမျှ ဆိုလာစနစ်ဆိုင်ရာ မီးဘေးလုံခြုံရေးအသိပညာနှင့်လက်တွေ့ဆောင်ရွက်နိုင်မှုများ မြှင့်တင်နိုင်ရေးအတွက် မီးသတ်ဦးစီးဌာနက တပ်ဖွဲ့ဝင်များအား ဆိုလာစနစ်မီးဘေးလုံခြုံရေးဆိုင်ရာသင်တန်းကို ဖွင့်လှစ်သင်ကြားပေးလျက်ရှိတယ်လို့ မြန်မာနိုင်ငံမီးသတ်ဦးစီးဌာနရဲ့ သတင်းထုတ်ပြန်ချက်အရသိရပါတယ်။

#Local_News
Published 17 July 2026
#ဆိုလာစနစ် #
#YMG/SW #Yangon_Times

#Daily_News
Published 17 July 2026

၁။‌ ဝါလုပ်ငန်းများ ဖွံဖြိုးတိုးတက်ရေးအတွက် ချေးငွေများထုတ်ချေးပေးသွားမည်

‌‎၂။ ‌ရွှေတိဂုံစေတီတော်သို့ ဘုရားဖူး ၃ ဒဿမ ၈သန်းကျော်လာရောက်ဖူးမြော်ပြီး ယခင်နှစ်ကာလတူထက်ပိုမိုများပြား

၃။‌‌‎ ဆိုလာစနစ်မီးဘေးလုံခြုံရေးသင်တန်းကို မီးသတ်ဦးစီးဌာနဖွင့်လှစ်သင်ကြား

၄။‎ ‌‌‌‌‌‌‌‌‌အရှေ့အလယ်ပိုင်းပဋိပက္ခများနှင့်ဟော်မုဇ်ရေလက်ကြားအခြေအနေတို့ကြောင့် ကမ္ဘာ့စီးပွားရေးရေရှည်သက်ရောက်နိုင်မည်... အစရှိတဲ့ သတင်းတွေကိုတင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#Local_News
Published 17 July 2026
       
■ မန္တလေးတိုင်းဒေသကြီးရှိ  ကျောက်ဆည်ဘူတာသစ်တည်ဆောက်နေမှုအပါအဝင် ဘူတာများ၊ လမ်း၊ တံတားများ ကိုပို့ဆောင်ရေးဝန်ကြီးဌာန ဒုတိယဝန်ကြီးဦးအောင်မြိုင်သည် တာဝန်ရှိသူများလိုက်ပါလျှက် ယမန်နေ့က လိုက်လံကြည့်ရှုစစ်ဆေးခဲ့ကြောင်း သိရသည်။

■ ပို့ဆောင်ရေးဝန်ကြီးဌာန ဒုတိယဝန်ကြီး ဦးအောင်မြိုင်သည် ယမန်နေ့က မန္တလေးဘူတာကြီး၌ တိုင်းတာဝန်ခံအရာရှိများနှင့် တွေ့ဆုံပြီး ရထားလမ်းများ၊ တံတားများ၊ ရထားစက်ခေါင်းနှင့်တွဲများ ကောင်းမွန်စေရေးနှင့် ဘူတာများ သန့်ရှင်းသပ်ရပ်မှုရှိစေရေး၊ ကျူးကျော်နေအိမ်များ ရှင်းလင်းရေးတို့ကို ဆွေးနွေးမှာကြားကာ မန္တလေးမှရန်ကုန်သို့ ထွက်ခွာမည့် အမှတ် (၁၀) အစုန် DEMU ရထားအား ကြည့်ရှုစစ်ဆေးသည်။
 
■ ယင်းနောက် ကျောက်ဆည်ဘူတာနှင့် ဘဲလင်းဘူတာကြားရှိ တံတားအမှတ် (၇၇၁) အသစ်ပြန်လည်တည်ဆောက်နေမှု၊ ကျောက်ဆည်ဘူတာသစ် တည်ဆောက်နေမှု၊ ကျောက်ဆည်ဘူတာနှင့် မင်းစုဘူတာကြားရှိ တံတားအမှတ် (၇၃၉) အသစ်ပြန်လည်တည်ဆောက်နေမှု၊ စမုံဘူတာနှင့် သပြေတောင်းဘူတာကြားရှိ တံတားအမှတ် (၆၉၁) ၌ စက်ယန္တရားကြီးများဖြင့် Foundation လုပ်ငန်း၊ မြေထိန်းနံရံဆောင်ရွက်မှုတို့ကို ကြည့်ရှုစစ်ဆေးသည်။
 
■ ထို့အပြင် ဇူလိုင်၁၅ ရက် နေ့ကလည်း မန္တလေး-လားရှိုးရထားလမ်းပိုင်းရှိ နောင်ချိုဘူတာ၊ ဝက်ဝံဘူတာနှင့် ဇီးပင်ကြီးဘူတာတို့ကိုကြည့်ရှုစစ်ဆေးခဲ့ကြောင်း သိရသည်။
 
#YMG/NN #Yangon_Times

#Local_News
Published 17 July 2026

■ လေဆိပ်ဓာတ်အားလိုင်း ပြန်လည်ချိတ်ဆက်ခြင်းလုပ်ငန်းနှင့် ဓာတ်အားလိုင်းအဆင့်မြှင့်တင်ရေးလုပ်ငန်းများ ဆောင်ရွက်သွားမည်ဖြစ်သဖြင့် ပြည်ထောင်စုနယ်မြေ နေပြည်တော်နှင့် မကွေးတိုင်းဒေသကြီးရှိ မြို့နှင့်ကျေးရွာအချို့တွင် သတ်မှတ်ထားသည့်အချိန်များအတွင်း ယာယီဓာတ်အားပြတ်တောက်မည်ဖြစ်ကြောင်း လျှပ်စစ်နှင့်စွမ်းအင်ဝန်ကြီးဌာနက ထုတ်ပြန်ထားသည်။

■ ပြည်ထောင်စုနယ်မြေ နေပြည်တော်ရှိ လေဆိပ်ဓာတ်အားခွဲရုံသို့ ဓာတ်အားဖြန့်ဖြူးပေးနေသည့် ၃၃ ကေဗွီ ပျဉ်းမနား-နေပြည်တော်လေဆိပ် ဓာတ်အားလိုင်းတွင် ဖြစ်ပွားခဲ့သည့် ချို့ယွင်းချက်ကို ပြုပြင်တည်ဆောက်ပြီးဖြစ်သဖြင့် ဓာတ်အားလိုင်း ပြန်လည်ချိတ်ဆက်ခြင်းလုပ်ငန်းကို ဆောင်ရွက်သွားမည်ဖြစ်ကြောင်း သိရသည်။

■ အဆိုပါလုပ်ငန်းကို လျှပ်စစ်အန္တရာယ်ကင်းရှင်းစေရေးအတွက် ၂၀၂၆ ခုနှစ် ဇူလိုင် ၁၈ ရက် နံနက် ၈ နာရီမှ မွန်းတည့် ၁၂ နာရီအထိ ဆောင်ရွက်မည်ဖြစ်ပြီး လုပ်ငန်းခွင်နှင့် လွတ်ကင်းမှုမရှိသည့် ၃၃ ကေဗွီ အေလာ-သာဝတ္ထိ ဓာတ်အားလိုင်းအား ယာယီဓာတ်အားပိတ်ထားမည်ဖြစ်သည်။ ယင်းကြောင့် သာဝတ္ထိမြို့ပေါ်ရှိ ရပ်ကွက်များ၊ ကျေးရွာများနှင့် ရုံးဌာနများတွင် ယာယီဓာတ်အားပြတ်တောက်မည်ဖြစ်ကာ သက်ဆိုင်ရာရုံးဌာနများနှင့် အများပြည်သူဆိုင်ရာနေရာများကို ကြိုတင်အသိပေးထားပြီးဖြစ်ကြောင်း သိရသည်။

■ ထို့ပြင် မကွေးတိုင်းဒေသကြီးအတွင်းရှိ တည်ဆောက်ပြီးနှင့် တည်ဆောက်ဆဲ ဓာတ်အားပေးစက်ရုံစီမံကိန်းများမှ ထုတ်လုပ်သည့် ဓာတ်အားများကို နိုင်ငံတော်ဓာတ်အားစနစ်ကွန်ရက်သို့ ပိုမိုသယ်ဆောင်နိုင်ရန်၊ ဓာတ်အားစနစ်တည်ငြိမ်စေရန်နှင့် ဗို့အားအရည်အသွေး ပိုမိုကောင်းမွန်စေရန် ရည်ရွယ်၍ ၁၃၂ ကေဗွီ မကွေး-တောင်တွင်းကြီး ဓာတ်အားလိုင်းရှိ လက်ရှိ ACSR ဓာတ်အားလိုင်းကြိုးများကို ဝန်အားနှစ်ဆကျော်အထိ သယ်ဆောင်နိုင်သည့် နည်းပညာမြင့် ဖိုင်ဘာအူတိုင် အလူမီနီယံဓာတ်အားလိုင်းကြိုးများဖြင့် အစားထိုးလဲလှယ်သွားမည်ဖြစ်ကြောင်း ဖော်ပြထားသည်။

■ အဆိုပါလုပ်ငန်းများကို တိုင်အမှတ် (၁၁၄) နှင့် (၁၁၅) ကြား၊ တိုင်အမှတ် (၁၁၈) နှင့် (၁၁၉) ကြားတို့တွင် ဆောင်ရွက်မည်ဖြစ်ပြီး လုပ်ငန်းဆောင်ရွက်နေစဉ် ၆၆ ကေဗွီ တောင်တွင်းကြီး-သစ်ရာကောက် ဓာတ်အားလိုင်းကို ဇူလိုင် ၁၇ ရက်မှ ၁၉ ရက်အထိ နေ့စဉ် နံနက် ၆ နာရီမှ ညနေ ၆ နာရီအထိ ဓာတ်အားပိတ်ထားမည်ဖြစ်ကြောင်း သိရသည်။

■ ယင်းကြောင့် မြင်ကွန်းမြို့၊ မိကျောင်းရဲမြို့နှင့် သစ်ရာကောက်မြို့တို့ရှိ ရပ်ကွက်များနှင့် ကျေးရွာများတွင် ယာယီဓာတ်အားပြတ်တောက်မှုများ ဖြစ်ပေါ်မည်ဖြစ်ပြီး ဓာတ်အားပြတ်တောက်မည့် ဧရိယာများရှိ ဓာတ်အားသုံးစွဲသူများအား သက်ဆိုင်ရာ မြို့နယ်လျှပ်စစ်အင်ဂျင်နီယာရုံးများမှတစ်ဆင့် ကြိုတင်အသိပေးထားပြီးဖြစ်ကြောင်း လျှပ်စစ်နှင့်စွမ်းအင်ဝန်ကြီးဌာန၏ သတင်းထုတ်ပြန်ချက်အရ သိရသည်။

#YMG/SW #Yangon_Times