#World_Health
Published 16 March 2026

လူသားတွေနဲ့ သူတို့ရဲ့အိမ်မွေးခွေးတွေကြား သံယောဇဉ်မေတ္တာက အတော်လေး နက်ရှိုင်းတာကို အထောက်အထား တွေ့ရှိထားပါတယ်။

ခွေးတွေရဲ့ ခန္ဓာကိုယ်မှာ သယ်ဆောင်လာတဲ့ အနုဇီဝပိုးမွှားတွေက လူတွေရဲ့ဦးနှောက်မှာ စာနာရင်းနှီးမှု ပိုဖြစ်စေတယ်လို့ တွေ့ရှိထားပါတယ်။

လတ်တလော လေ့လာချက်များအရ မတူကွဲပြားတဲ့ ဘက်တီးရီးယားများပါဝင်တဲ့ ခွေးတွေကို အိမ်ထဲထားတဲ့အခါ လူသားတွေရဲ့ ပိုးမွှားစနစ်ကို သက်ရောက်နိုင်ပါတယ်။

ခွေးတွေဟာ သဘာဝအတိုင်း စူးစမ်းသွားလာလိုစိတ် ရှိတာကြောင့် ကွဲပြားတဲ့ ပိုးမွှားတွေ ထိတွေ့ကြပါတယ်။

ဒီပိုးမွှားတွေ လူသားထဲ ဝင်ရောက်လာတဲ့အခါ ပျော်ရွှင်မှုဟော်မုန်း အောက်ဆီတိုစင် ထုတ်လုပ်ခြင်းကို လှုံ့ဆော်ပေးပါတယ်။

ဒီလိုကနေ ခွေးတွေနဲ့ ပိုမိုရင်းနှီးစေရုံမက လူမှုရေးစိတ်နဲ့ စာနာစိတ်တို့ မြင့်တင်ပေးနိုင်ပါတယ်။

ကြောင်တွေကတော့ ခွေးတွေနဲ့မတူဘဲ ခွေးတွေလို အနုဇီဝပိုးမွှား အကျိုးကျေးဇူး မပေးနိုင်ပေမယ့် စိတ်ပိုင်းဆိုင်ရာ ကျန်းမာရေးအကျိုးကျေးဇူးတော့ ပေးနိုင်ပါသေးတယ်။

မြို့ပြမှာပဲ ကျင်လည်နေသူတွေအတွက် ခွေးတွေက အပြင်လောကနဲ့ ဆက်စပ်ပေးနိုင်ကာ စိုးရိမ်ပူပန်စိတ် လျော့ကျစေခြင်း၊ လူမှုဆက်ဆံရေး ကောင်းမွန်ခြင်းတို့ ရရှိစေနိုင်ပါတယ်။

ခွေးတစ်ကောင်နဲ့ ခဏတာ ထိတွေ့ခြင်းက အောက်ဆီတိုစင် ယာယီတိုးတက်နိုင်ကာ အတူနေထိုင်ရင်တော့ လူတွေရဲ့ အရေပြားနဲ့ အူလမ်းကြောင်းတို့မှာ နေထိုင်တဲ့ ဘက်တီးရီးယား အစုအဖွဲ့တွေ ကြာရှည်ပြောင်းလဲလာနိုင်မှာ ဖြစ်ပါတယ်။

Source: India Today

နေပြည်တော်၊ မတ် ၁၅-နိုင်ငံတော်မှ သက်သာသောဈေးနှုန်းဖြင့် ရောင်းချပေးနေသည့် သဘာဝဓာတ်ငွေ့ (CNG) ကို အသုံးပြုပြီး ဓာတ်ဆီ၊ ဒီဇယ် ဈေးနှုန်းကြီးမြှင့်မှုကို အခွင့်အရေးယူ၍ အများပြည်သူထံမှ ယာဉ်စီးခပိုမိုတောင်းခံ နေသည့် Taxi ယာဉ်များကို CNG သုံးစွဲခွင့်စာရင်းမှ ပယ်ဖျက်သွားမည်ဖြစ်ကြောင်း စွမ်းအင်ဝန်ကြီးဌာန ပြည်ထောင်စုဝန်ကြီး ဦးကိုကိုလွင်က ယနေ့ ကျင်းပသည့် လုပ်ငန်းညှိနှိုင်းအစည်းအဝေးတွင် ပြောကြားလိုက်သည်။

စက်သုံးဆီဈေးနှုန်း ကြီးမြင့်မှုကို အကြောင်းပြကာ CNG သုံး Taxi များက ခရီးသည်များထံမှ ယာဉ်ခတိုးမြှင့်တောင်းခံကြောင်း တိုင်ကြားမှုများ ရှိနေသည့်အတွက် ယခုကဲ့သို့ အရေးယူရန် ဆုံးဖြတ်ခြင်းဖြစ်သည်။ သတ်မှတ်စည်းကမ်းဖောက်ဖျက်သည့် ယာဉ်များကို စာရင်းမှပယ်ဖျက်၍ အမှန်တကယ် စည်းကမ်းလိုက်နာမည့် အခြားယာဉ်များကို အစားထိုးခွင့်ပြုပေးသွားမည်ဟု ဝန်ကြီးက ဆိုသည်။

ထို့အပြင် ရှေ့ပြေးစီမံကိန်းအနေဖြင့် CNG သုံးယာဉ်များတွင် Metering စနစ် တပ်ဆင်ခြင်း။ နည်းပညာ အသုံးပြု၍ ဓာတ်ငွေ့ဖြန့်ဖြူးမှုကို ထိန်းချုပ်ခြင်းနှင့် YBS ယာဉ်များအနေဖြင့် သတ်မှတ် လမ်းကြောင်း အတိုင်းသာ မောင်းနှင်ရန် ကြပ်မတ်ခြင်းတို့ဆောင်ရွက်မည်ဟုလည်းသိရသည်။

လက်ရှိတွင် စွမ်းအင်ဝန်ကြီးဌာနသည် အများပြည်သူသယ်ယူပို့ဆောင်ရေးအတွက် CNG ၁ ကီလို ဂရမ်လျှင် ၂၇၃ ကျပ် ၂၅ ပြား နှုန်းဖြင့် ၂၀၀၇ ခုနှစ်မှစ၍ ဈေးနှုန်းပြောင်းလဲခြင်းမရှိဘဲ ရောင်းချ ပေးနေခြင်းဖြစ်သည်။

"ဒီဈေးနှုန်းဟာ နိုင်ငံတကာဈေးနဲ့ နှိုင်းယှဉ်ရင် ထက်ဝက်နီးပါး သက်သာနေသလို၊ ဓာတ်ဆီ၊ ဒီဇယ်တို့နဲ့ နှိုင်းယှဉ်ရင်လည်း လောင်စာဆီကုန်ကျစရိတ် သုံးပုံတစ်ပုံလောက်ပဲ ရှိပါတယ်" ဟု ပြည်ထောင်စု ဝန်ကြီးက ရှင်းလင်းပြောကြားသည်။ လက်ရှိဖြစ်ပေါ်နေသည့် စက်သုံးဆီအကျပ်အတည်းကို ဖြေရှင်းရန်အတွက် နိုင်ငံတော်အနေဖြင့် အရန်စက်သုံးဆီ သိုလှောင်ခြင်းနှင့် အရန်လမ်းကြောင်းများ ရှာဖွေခြင်းတို့ကို ဆောင်ရွက်နေသည်။

ရန်ကုန်တိုင်းဒေသကြီး အစိုးရအဖွဲ့အနေဖြင့်လည်း CNG သုံးယာဉ်များ ထိရောက်စွာ ဝန်ဆောင်မှု ပေးစေရေးအတွက် သက်ဆိုင်ရာအဖွဲ့အစည်းများနှင့် ပူးပေါင်းကာ တင်းကျပ်စွာ ကြပ်မတ်သွားမည်ဟု သိရသည်။ အများပြည်သူအနေဖြင့် CNG သုံးယာဉ်များနှင့် စပ်လျဉ်း၍ ကျေနပ်မှုမရှိပါက သို့မဟုတ် မတရားယာဉ်ခတောင်းခံရပါက ညွှန်ကြားရေးမှူး (CNG) - ၀၉ ၇၉၄၁၁၅၄၁၀ ၊ ၀၉ ၂၆၂၄၆၇၀၇၇သို့ တိုင်ကြားနိုင်ကြောင်းသတင်းထုတ်ပြန်ထားသည်။

#ymg/knl

ပြောင်းလုပ်ငန်းကဏ္ဍအတွင်း ဒစ်ဂျစ်တယ်ငွေပေးချေမှုနည်းလမ်းများ တိုးမြှင့်အသုံးပြုနိုင်ဖို့နဲ့ရေရှည်တည်တံ့သော ဖွံဖြိုးတိုးတက်မှုကို ပူးပေါင်းတည်ဆောက်နိုင်ဖို့ သက်ဆိုင်ရာတာဝန်ရှိသူတွေကို မြန်မာနိုင်ငံပြောင်းလုပ်ငန်းအသင်းကနေဖိတ်ခေါ်ထားတယ်လို့ သိရပါတယ်။

#Local_News
Published 14 March 2026
#ပြောင်း #ဒစ်ဂျစ်တယ်ငွေပေးချေ
#YMG/SW #Yangon_Times

#World_Health
Published 15 March 2026

■ လူအချို့ လေ့ကျင့်ခန်းပြုလုပ်နေတာတောင် ကိုယ်အလေးချိန်တက်နေကြပါတယ်။

■ ခန္ဓာကိုယ် ဖိစီးမှုတုံ့ပြန်ခြင်းက အဆီတွေ ဘယ်လိုသိုလှောင်သလဲ၊ ဆာလောင်စိတ် ဘယ်လိုထိန်းချုပ်လဲ၊ ဇီဝလုပ်ဆောင်ချက်တွေ ဘယ်လိုလဲဆိုရာမှာ အရေးပါနေပါတယ်။

■ အလုပ်ဖိအား၊ အိပ်ရေးပျက်ခြင်း၊ ငွေရေးကြေးရေး ပူပန်မှုတွေကြောင့် ရေရှည်ဖိစီးမှု ဖြစ်ရာကနေ ဟော်မုန်းမညီမမျှ ဖြစ်လာပါတယ်။

■ ဖိစီးမှုဖြစ်တဲ့အခါ ကော်တီဆောဟော်မုန်း ထွက်စေပြီး ပမာဏများတဲ့အခါ ပုံမှန်ဇီဝကမ္မဖြစ်စဉ်ကို နှောင့်ယှက်စေပါတယ်။

■ ဝမ်းဗိုက်တဝိုက် အဆီတွေပိုစုလာစေတဲ့အပြင် ဆီးချို၊ သွေးတိုး၊ နှလုံးရောဂါတို့လည်း ဖြစ်နိုင်ခြေများစေတယ်လို့ ဒေလီ CK Birla ဆေးရုံမှ ဒေါက်တာ မာနီရှာအာရိုရာက ပြောပါတယ်။

■ ဖိစီးမှုကြောင့် ကယ်လိုရီများတဲ့ စားစရာတွေ စားချင်လာပြီး ဆာလောင်မှုထိန်းချုပ် ဟော်မုန်းတွေ နှောင့်ယှက်ခံရကာ အစာစားခြင်းကို ထိန်းချုပ်ဖို့ ခက်ခဲလာပါတယ်။

■ ကော်တီဆော ကြာရှည်မြင့်မားတဲ့အခါ အင်ဆူလင်ယဉ်ပါးခြင်း၊ သွေးတွင်းသကြားဓာတ် မြင့်မားခြင်း၊ နာတာရှည်ရောဂါများ ဖြစ်နိုင်ခြေများခြင်းတို့ ဖြစ်လာနိုင်ပါတယ်။

■ ဖိစီးမှုကြောင့် အိပ်ရေးပျက်တဲ့အခါ ဇီဝဖြစ်စဉ်နှေးသွားပြီး ဆာလောင်စိတ်များလာသလို ကျန်းမာရေးလမ်းစဉ်တွေ ထိခိုက်ကာ ကိုယ်အလေးချိန် တိုးလာစေပါတယ်။

■ ဖိစီးမှုကို တုံ့ပြန်ပုံက တစ်ယောက်နဲ့တစ်ယောက် မတူဘဲ အချို့က စားချင်စိတ် လျော့နည်းတတ်ပါတယ်။

■ ဒါပေမဲ့ ရေရှည်ဖိစီးမှုကတော့ ဇီဝဖြစ်စဉ်ရောဂါတွေ ဖြစ်နိုင်ခြေများစေပါတယ်။

■ လေ့ကျင့်ခန်းပုံမှန်လုပ်ခြင်း၊ ပုံမှန်အိပ်စက်ခြင်း၊ ဂရုတစိုက်စားခြင်း၊ စိတ်ပြေလျော့အောင် ကျင့်ကြံခြင်းတို့ဖြင့် ကိုယ်အလေးချိန် ထိန်းသိမ်းနိုင်မှာ ဖြစ်ပါတယ်။

Source: India Today.

#World_Science
Published 15 March 2026

■ မြွေလိုမျိုးသတ္တဝါတွေက အစာမစားဘဲနဲ့ ရက်သတ္တပတ်တွေ လတွေကြာအောင် နေနိုင်ကြကာ မျိုးဗီဇပြောင်းလဲမှုများကြောင့် ဖြစ်နိုင်တယ်လို့ တွေ့ရှိထားပါတယ်။

■ အချို့သော မြွေတွေနဲ့ တွားသွားသတ္တဝါတွေမှာ ဂရီလင်လို့ခေါ်တဲ့ ဆာလောင်မှုဟော်မုန်း မရှိကြတာကြောင့် အစာမစားဘဲ အချိန်ကြာမြင့်စွာ နေနိုင်ကြတာ ဖြစ်ပါတယ်။

■ သုတေသီတွေက မြွေ၊ မိကျောင်း၊ ပုတ်သင်အပါအဝင် တွားသွားမျိုးစိတ် ၁၁၂ မျိုးရဲ့ မျိုးဗီဇပစ္စည်းများကို နှိုင်းယှဉ်ကြည့်ရာမှာ ဂရီလင်နဲ့ လှုံ့ဆော်ပေးတဲ့ အင်ဇိုင်းတို့ဟာ မြွေမျိုးစိတ် ၃၂ မျိုးမှာ မရှိတာကို တွေ့ရပါတယ်။

■ ပုတ်သင်နဲ့ အိမ်မြှောင်မျိုးစိတ်အချို့မှာလည်း အလားတူပုံစံတွေ့ရပြီး မိကျောင်းတွေကတော့ အစာမစားဘဲ ၁ နှစ်လောက် နေနိုင်ပေမယ့် မျိုးဗီဇနှစ်ခုစလုံး ရှိနေပါတယ်။

■ ဒါပေမဲ့ ကြွက်တွေကို စမ်းသပ်ရာမှာတော့ ဂရီလင်မရှိခြင်းက အစာအစားချင်စိတ်ကို မပြောင်းလဲစေပါဘူး။

■ ဒါကြောင့် မြွေတွေမှာ ဂရီလင်မရှိခြင်းက ဆာလောင်စိတ်ဆိုတာထက် ဇီဝဖြစ်စဉ်နဲ့ ပိုပြီးပတ်သက်နေနိုင်ပါတယ်။

■ မြွေတွေရဲ့ ဇီဝကမ္မဖြစ်စဉ်က အခြားနို့တိုက်သတ္တဝါတွေနဲ့ ကွဲပြားတာကြောင့်လည်း ဖြစ်နိုင်ပါတယ်။

■ ဇီဝဖြစ်စဉ်အတွက် ဂရီလင်ရဲ့ အရေးကြီးပုံကို အလွန်အကျွံ ဖော်ပြနေခြင်းကို အချို့သောပညာရှင်တွေ သတိပေးနေပါတယ်။

■ ဂရီလင်ရဲ့ ကဏ္ဍကို နောက်ထပ်လေ့လာခြင်းဖြင့် လူတွေမှာ ဆီးချို၊ အဝလွန်ခြင်းတို့လို ဇီဝကမ္မရောဂါတွေအကြောင်း ပိုမိုသိရှိလာနိုင်ပါတယ်။

Source: ScienceNews

တရုတ်က အာကာသထဲ နက်နက်နဲနဲ စူးစမ်းလေ့လာသွားမယ့် အစီအစဉ်တွေ ဆက်တိုက်ပြုလုပ်နေပြီး လပေါ်မှာ ရေရှာဖွေခြင်းကစလို့ မားစ်ဂြိုဟ်ပေါ်မှ နမူနာများယူဆောင်လာခြင်းအထိပြုလုပ်နေကာ စကြဝဠာအပြင်ဘက်အထိ ရောက်ရှိရန်ရည်မှန်းနေပါတယ်။

#Asia_Science
Published 14 March 2026
#တရုတ် #အာကာသ
#YMG #Yangon_Times #Yangon_Media_Group

#Daily_News
Published 14 March 2026

၁။‌ ‎နိုင်ငံတကာသင်္ဘောလိုင်းများတွင် မြန်မာအမျိုးသမီးသင်္ဘောသား
လေးထောင်ခန့်ဝင်ရောက်လုပ်ကိုင်နေ

‌‎၂။ ‌‌‌‌‌‌‌‌‌‌‌ဆန်နှင့်ဆန်ကွဲတန်ချိန်နှစ်သိန်းခွဲကျော်တင်ပို့ထားပြီး ယခင်နှစ်ထက်ပိုမိုတင်ပို့နိုင်

‎၃။‌‌‎ ‌‌‌‌‌‌‌‌‌ထိုင်းသို့ Hass ထောပတ်သီးတန်ချိန် ၁၀,၀၀၀ ခန့် တင်ပို့ထား

‎၄။‎ ‌‌‌‌‌‌‌‌‌အာကာသနက်ရှိင်းနေရာများအပြင်စကြဝဠာအပြင်ဘက်အထိစူးစမ်းလေ့လာမည့် တရုတ်အစီအစဉ်များအရှိန်အဟုန်ဖြင့်တိုးတက်... အစရှိတဲ့ သတင်းတွေကိုတင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

ယခုနှစ် ထောပတ်သီးရာသီမှာ ထိုင်းနိုင်ငံကို Hassအမျိုးအစား ထောပတ်သီးတန်ချိန် ၁၀,၀၀၀ ခန့် တင်ပို့ထားနိုင်ခဲ့တယ်လို့
မြန်မာနိုင်ငံထောပတ်သီးစိုက်ပျိုးထုတ်လုပ်တင်ပို့ရောင်းချသူများအသင်းမှ သိရပါတယ်။

#Local_News
Published 14 March 2026
#ထောပတ်သီး #Hass
#YMG/SW #Yangon_Times

အခု ၂၀၂၅-၂၀၂၆ဘဏ္ဍာနှစ်အတွင်းဆန်နဲ့ဆန်ကွဲတန်ချိန်နှစ်သိန်းခွဲကျော်တင်ပို့ထားပြီး အရင်ဘဏ္ဍာနှစ်၊ ကာလတူထက် ပိုမိုတင်ပို့ထားနိုင်တယ်လို့ မြန်မာနိုင်ငံဆန်စပါးအသင်းချုပ်ကနေ သိရပါတယ် ။

#Local_News
Published 14 March 2026
#ဆန် #ဆန်ကွဲ
#YMG/NN #Yangon_Times

နိုင်ငံတကာသင်္ဘောလိုင်းတွေမှာ ဝင်ရောက်လုပ်ကိုင်နေတဲ့ မြန်မာအမျိုးသမီးသင်္ဘောသား လေးထောင်ခန့်ရှိတယ်လို့ မြန်မာနိုင်ငံပင်လယ်ကူးသင်္ဘောသားအလုပ်သမားများအဖွဲ့ချုပ်မှ သိရပါတယ်။

#Local_News
Published 14 March 2026
#နိုင်ငံတကာသင်္ဘောလိုင်း #မြန်မာအမျိုးသမီးသင်္ဘောသား
#YMG/SW #Yangon_Times

#Local_News
Published 14 March 2026

■ နေပြည်တော်၌ မြန်မာ့မျက်နှာစာသစ် ဖိုရမ် ဒုတိယနေ့ ကို ယနေ့တွင် ဆက်လက် ကျင်းပနေကြောင်းသိရသည်။

■ အဆိုပါ “မြန်မာ့မျက်နှာစာသစ်ဖိုရမ်” (ယုံကြည်မှု၊ တည်ငြိမ်အေးချမ်းမှုနှင့် ဖွံ့ဖြိုးတိုးတက်မှု) “Forum on The Dawn of A New State”(Trust, Stability & Development) ပထမနေ့ကို ယမာန်နေ့က ပထမနေ့အဖြစ် နေပြည်တော်ရှိ မြန်မာအပြည်ပြည်ဆိုင်ရာကွန်ဗင်းရှင်းဗဟိုဌာန (၁) (MICC I) ၌ ကျင်းပခဲ့ခြင်းဖြစ်သည်။

■ ထိုသို့ကျင်းပရာတွင်ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးမောင်မောင်အုန်းက ကြိုဆိုနှုတ်ခွန်းဆက်စကားပြောကြားရာတွင် ကိုယ်စားလှယ်ကြီးများအနေဖြင့် ယနေ့ဖိုရမ်မှ ရင်းနှီးမြှုပ်နှံမှုဆိုင်ရာအခွင့်အလမ်းများ၊ စားနပ်ရိက္ခာဖူလုံရေးနှင့် ရေရှည်ပူးပေါင်းမှု၊ အသေးစား၊ အလတ်စား စက်မှုလုပ်ငန်းများဖွံ့ဖြိုးမှုနှင့် နိုင်ငံတကာစီးပွားရေးပူးပေါင်းဆောင်ရွက်မှုများကို မည်သို့ဖော်ဆောင်ကြမည်ဆိုသည့် အတွေးအမြင်သစ်များ ရရှိကြမည်ဖြစ်ပါကြောင်း၊ ထို့ပြင် လယ်ယာစီးပွားမှ စက်မှုစီးပွားရေးဆီကူးပြောင်းမှု၊ အခြေခံအဆောက်အုံနှင့် စွမ်းအင်ကဏ္ဍ၊ ဒစ်ဂျစ်တယ် စီးပွားရေးနှင့်ဆန်းသစ်တီထွင်မှု၊ လူ့စွမ်းအားအရင်းအမြစ် ပြုပြင်ပြောင်းလဲရေးစသည့် ဆွေးနွေးချက်များကိုလည်း ရရှိကြမည်ဖြစ်ပါကြောင်း။

■ ယခုကဲ့သို့ စိန်ခေါ်မှုများပြားသည့် ကမ္ဘာ့အခြေအနေတွင် မိမိတို့၏ အားသာချက်၊ အားနည်းချက်များကို သေချာဆန်းစစ်ပြီး ရေရှည်တည်တံ့မည့် လမ်းပြမြေပုံများ ရေးဆွဲကြရမည်ဖြစ်ပါကြောင်း၊ ပညာရှင်များ၏ အကြံပြုချက်များသည် လက်တွေ့အသုံးချ၍ ရသည့်ဗဟုသုတများဖြစ်သည့်အတွက် အလေးထားမှတ်သားဆောင်ရွက်ကြရမည် ဖြစ်ပါကြောင်း၊မိမိတို့အနေဖြင့် လယ်ယာကဏ္ဍမှ စက်မှုကဏ္ဍကို ကူးပြောင်းသည့်အခါ နည်းပညာနှင့် ဆန်းသစ်တီထွင် မှုကို မဖြစ်မနေအသုံးချရမည်ဖြစ်ပါကြောင်း၊ ယနေ့ခေတ်တွင် ဒစ်ဂျစ်တယ်စီးပွားရေးသည် ကမ္ဘာ့စံနှုန်း ဖြစ်လာသကဲ့သို့ မိမိတို့နိုင်ငံ၏ ကုန်ထုတ်လုပ်မှုကွင်းဆက်ကိုလည်း ပိုမိုမြန်ဆန်သွက်လက်စေမည် ဖြစ်ပါကြောင်း၊ စွမ်းအင်နှင့်အခြေခံအဆောက်အအုံဖွံ့ဖြိုးရေးသည် စက်မှုကဏ္ဍအတွက် အသက်သွေးကြော ဖြစ်ပါကြောင်း၊ နှစ်ရက်တာကျင်းပမည့် မြန်မာ့မျက်နှာစာသစ်ဖိုရမ်မှ မြန်မာနိုင်ငံဖွံ့ဖြိုးရေးအတွက် သဘောတရားရေးသာမက လက်တွေ့ကျသည့် သဘောထားအမြင်များ၊ အကြံပြုချက်များ၊ ထောက်ပြချက်များရရှိလာမည်ဟု မျှော်လင့်ပါကြောင်း၊ ပညာရှင်များ၏ အကြံပြုချက်များ၊ ဆွေးနွေးချက်များကိုလည်း အလေးထားဆောင်ရွက်သွားမည်ဖြစ်ပါကြောင်း ပြောကြားသည်။

■ ထို့နောက် ပြည်ထောင်စုဝန်ကြီးက အမျိုးသားလွှတ်တော်ကိုယ်စားလှယ် ၁၅၇ ဦး၊ ပြည်သူ့လွှတ်တော်ကိုယ်စားလှယ် ၂၆၃ ဦး၊ တပ်မတော်သားလွှတ်တော်ကိုယ်စားလှယ် ၁၆၆ ဦးအတွက် MRTV DTH အစုံ ၃၀၀ ၊ MRTV DVB T2 Set Top Box ၂၈၆ လုံး၊ Cannal+ DTH အစုံ ၃၀၀ နှင့် Cannal + T2 Set Top Box ၂၈၆ လုံးတို့ကို ပေးအပ်ရာ လွှတ်တော်ကိုယ်စားလှယ်များကိုယ်စား ကိုယ်စားလှယ်တစ်ဦးစီက လက်ခံရယူသည်။

■ ဆွေးနွေးပွဲ(ပထမပိုင်း)အဖြစ် မြန်မာနိုင်ငံ၏ စီးပွားရေးဖွံ့ဖြိုးတိုးတက်ရေးအတွက် နိုင်ငံတကာ အခွင့်အလမ်းများခေါင်းစဉ်ဖြင့် ဆွေးနွေးရာ မြန်မာ့ပုံရိပ်ဖော်ညွှန်းရေးအဖွဲ့မှ ဒေါက်တာဇော်ဦးက သဘာပတိအဖြစ် ဆောင်ရွက်ပြီး နိုင်ငံတကာ ပညာရှင်များဖြစ်သည့် Yunnan Academy of Social Sciences မှ Professor Mr. Lei Zhuning ၊ Jawaharlal Nehru University မှ Senior Professor Mr. Mahendra P. Lama ၊ Chiang Mai University မှ Distinguished Economist and Academic Leader Dr. Nisit Panthamit နှင့် Representative of Dale Carnegie & Associates Mr. Luc De Waegh တို့က ပါဝင် ဆွေးနွေးကြသည်။

■ သဘာပတိ ဒေါက်တာဇော်ဦးက နိုင်ငံတစ်နိုင်ငံအတွက် စီးပွားရေးဆိုင်ရာ ချိတ်ဆက်မှုအခွင့်အလမ်းများ၊ သမားရိုးကျမဟုတ်သည့် စီးပွားရေးဆိုင်ရာအခြေအနေများကို ကိုင်တွယ်ဆောင်ရွက်မှုများ၊ တရားမဝင်လုပ်ကိုင်ဆောင်ရွက်နေသည့် စီးပွားရေးလုပ်ငန်းများကို မူဝါဒများချမှတ်၍ တရားဝင်လမ်းကြောင်းပေါ်သို့ ပြောင်းလဲလုပ်ကိုင်စေခြင်း၊ ရွှေ့ပြောင်းလုပ်သားများကို Brain Gain အဖြစ် နိုင်ငံ အပေါ် အကျိုးပြုနိုင်ရန် စီမံဆောင်ရွက်ခြင်း၊ ရွှေ့ပြောင်းလုပ်သားများ၏ လုပ်အားခများကို တရားဝင် ငွေလွှဲလမ်းကြောင်းဖြင့် စီးဝင်စေခြင်း၊ လုံခြုံသောစွမ်းအင်ကဏ္ဍရရှိအောင်စီမံခန့်ခွဲခြင်းနှင့် စီးပွားရေးကဏ္ဍတွင် ဒစ်ဂျစ်တယ်နည်းပညာ အသုံးပြု ခြင်းနှင့်စပ်လျဉ်း၍ ဆွေးနွေးခဲ့ ကြောင်းသိရသည်။

■ ထို့နောက် Yunnan Academy of Social Sciences မှ Professor Mr. Lei Zhuning က မြန်မာ-တရုတ် စီးပွားရေးစင်္ကြံ အကောင်အထည်ဖော်ဆောင်ရွက်မှု၊ နှစ်နိုင်ငံပူးပေါင်းဆောင်ရွက်မှုမှ ထွက်ပေါ်လာနိုင် သည့် အခွင့်အလမ်းသစ်များ၊ Greater Mekong Sub-Region (GMS) မှတစ်ဆင့် စီးပွားရေးအခွင့်အလမ်းများ ဖော်ဆောင်မှု၊ မြန်မာနိုင်ငံ၏ ပထဝီစီးပွားရေးဆိုင်ရာ အခွင့်အလမ်းများ၊ စီးပွားရေးစင်္ကြံများမှမြန်မာနိုင်ငံအနေဖြင့် ရရှိနိုင်သည့် အခွင့်အလမ်းများနှင့် စီးပွားရေးအကျိုးရလဒ်များ ဖော်ဆောင်နိုင်မည့် အခြေအနေ၊ တရုတ်နိုင်ငံအနေဖြင့် အာရှဒေသတွင်းမှ စိုက်ပျိုးရေးဆိုင်ရာထုတ်ကုန်များကို ပိုမိုတင်သွင်းခွင့်ပြုမည့် မူဝါဒ၊ မြန်မာ-တရုတ်နှစ်နိုင်ငံကုန်သွယ်မှုတွင် မြန်မာနိုင်ငံဘက်မှ စိုက်ပျိုး ရေးဆိုင်ရာ ထုတ်ကုန်များ၊ တန်ဖိုးမြှင့်ထုတ်ကုန်များထုတ်လုပ်၍ တရုတ်နိုင်ငံသို့ ပိုမိုတင်ပို့နိုင်ရေးနှင့် စပ်လျဉ်း၍ ဆွေးနွေးသည်။

■ ယင်းနောက် Jawaharlal Nehru University မှ Senior Professor Mr. Mahendra P. Lama က ကျေးလက်ဒေသ ဖွံ့ဖြိုးတိုးတက်မှုအခွင့်အလမ်းများ ဖော်ဆောင်ရာတွင် မဖြစ်မနေထည့်သွင်းစဉ်းစားရမည့် အစားအစာလုံခြုံရေး၊ တန်ဖိုးမြှင့်ထုတ်ကုန်များ တိုးတက်ထုတ်လုပ်ရေး၊ အိန္ဒိယနိုင်ငံသည် ပဲစားသုံးမှု မြင့်မားသည့်အတွက် မြန်မာနိုင်ငံမှ ပဲတင်ပို့နိုင်သည့် ဈေးကွက်အဖြစ်တည်ရှိမှု၊ ပဲတင်ပို့မှုတိုးမြှင့်နိုင်ရေးအတွက် အထွက်နှုန်းမြှင့်တင်‌ရေးအစီအမံများ၊ အော်ဂဲနစ်သီးနှံများအဖြစ် တိုးတက်ထုတ်လုပ်နိုင်ရေး၊ အာရှဒေသအတွင်း ပဲဈေးကွက်မြှင့်တင်တင်ပို့နိုင်မည့် အစီအမံများ၊ မြန်မာနိုင်ငံအတွက် အခွင့်အလမ်းများ ဖော်ဆောင်နိုင်ရန်အစိုးရ၊ လွှတ်တော်၊ ပြည်သူအားလုံး နိုင်ငံရေးဆန္ဒရှိရန်လိုအပ်မှု၊ စွမ်းအင်ဆိုင်ရာ မူဝါဒများခိုင်မာရေး၊ မြန်မာနိုင်ငံအနေဖြင့် စွမ်းအင်ရရှိရေး စီမံဆောင်ရွက်ရာတွင် ရေအားလျှပ်စစ်ကဲ့သို့ သန့်ရှင်းသည့် စွမ်းအင်စီမံကိန်းများ၊ ရေရှည်တည်တံ့သည့် စွမ်းအင်ကဏ္ဍဖြစ်ပေါ်ရေး ဆောင်ရွက်သင့်သည့် နည်းလမ်းများနှင့် စပ်လျဉ်း၍ ဆွေးနွေးသည်။

■ ဆက်လက်၍ Chiang Mai University Distinguished Economist and Academic Leader Dr. Nisit Panthamit က စီးပွားရေးအခွင့်အလမ်းများဖော်ဆောင်ရန် အခြေခံအုတ်မြစ်များ ခိုင်မာစွာတည်ရှိရေး၊ နိုင်ငံ့စီးပွားရေးအတွက် MSME လုပ်ငန်းများက အထောက်အပံ့ပြုနေမှု၊ တစ်ခါတရံစီးပွားရေးအခွင့် အလမ်းသစ်များအတွက် Back to Basic နည်းလမ်းကို အသုံးပြုရေး၊ အထူးပြု စီးပွားရေးကဏ္ဍများ ဖော်ဆောင်ရန်လိုအပ်မှု၊ အိမ်နီးချင်းနိုင်ငံများနှင့် ကုန်သွယ်မှုပြုရာတွင် အပြန်အလှန် အထောက်အကူ ပြုစေနိုင်သည့် ငွေကြေးစနစ်ဖော်ဆောင်ရေး၊ ငွေလဲနှုန်းတည်ငြိမ်ရေး၊ စီးပွားရေးအခွင့်အလမ်းများ ဖော်ဆောင်ရာတွင် အတားအဆီးဖြစ်စေမည့်ကန့်သတ်ချက်များ နည်းနိုင်သမျှနည်းအောင် စီမံဆောင်ရွက်ရေး၊ စီးပွားရေးကဏ္ဍအတွက် စဉ်းစားဆောင်ရွက်ရမည့် ဆိုက်ဘာလုံခြုံရေးဆိုင်ရာ ကိစ္စရပ်များ၊ မြန်မာ-ထိုင်း နှစ်နိုင်ငံ ကုန်သွယ်မှုအခြေအနေ၊ ထိုင်းနိုင်ငံရှိ စီးပွားရေးလုပ်ငန်းများတွင် ပါဝင်နေသည့် မြန်မာလုပ်သားများ၏ အခန်းကဏ္ဍတို့နှင့် စပ်လျဉ်း၍ ဆွေးနွေးပြောကြားသည်။

■ ထို့နောက် Representative of Dale Carnegie & Associates Mr. Luc De Waegh က အလားအလာ များစွာရှိသည့် နိုင်ငံတစ်ခုအဖြစ် မြန်မာနိုင်ငံကို နိုင်ငံတကာက ပြောင်းလဲရှုမြင်လာမှု၊ မြန်မာနိုင်ငံအနေဖြင့် တိုးတက်မှုရရှိလာသည့် စီးပွားရေးအခြေအနေ၊ မြန်မာနိုင်ငံသို့ နိုင်ငံခြားရင်းနှီးမြှုပ်နှံမှု ဝင်ရောက်မှုအခြေအနေ၊ ခေတ်စနစ်နှင့်အညီ ပြောင်းလဲဖော်ဆောင်လာသည့် မြန်မာနိုင်ငံ၏ Tele Communication အခန်းကဏ္ဍ၊ အိပ်မက်စိတ်ကူးရှိသလောက် မြန်မာနိုင်ငံအနေဖြင့် တိုးချဲ့ဖော်ဆောင်နိုင်မည့် စီးပွားရေးအခွင့်အလမ်းများ၊ Multi National Company များ ဖော်ဆောင်ခြင်းဖြင့် စီးပွားရေးဖွံ့ဖြိုး တိုးတက်မှုရရှိနိုင်မည့် အခြေအနေကို ဆွေးနွေးပြောကြားသည်။

■ ထိုသို့ ဆွေးနွေးမှုများအပေါ် နိုင်ငံရေးပါတီများမှ ပုဂ္ဂိုလ်များ၊ လွှတ်တော်ကိုယ်စားလှယ်များ၊ ပြည်တွင်းမှ နိုင်ငံရေးသုတေသီများ၊ မြန်မာနိုင်ငံအရေးစိတ်ဝင်စားကြသူများ၊ တက်ရောက်လာကြသူများက သိရှိလိုသည်များ မေးမြန်းဆွေးနွေးကြရာ နိုင်ငံတကာပညာရှင်များက အသေးစိတ်ရှင်းလင်း ဖြေကြားပေးကြသည်။

■ ယင်းနောက် ဆွေးနွေးပွဲ(ဒုတိယပိုင်း)အဖြစ် မြန်မာနိုင်ငံ၏ ဖွံ့ဖြိုးတိုးတက်ရေးနှင့် တည်ငြိမ်အေးချမ်းရေးဆိုင်ရာအခွင့်အလမ်းများနှင့် စိန်ခေါ်မှုများ(၁) ခေါင်းစဉ်ဖြင့် ဆွေးနွေးရာ မြန်မာ့ပုံရိပ် ဖော်ညွှန်းရေးအဖွဲ့မှ ဒေါက်တာခင်မောင်လွင်က သဘာပတိအဖြစ် ဆောင်ရွက်ပြီး မြန်မာ့ပုံရိပ်ဖော်ညွှန်းရေးအဖွဲ့မှ ဒေါက်တာဇော်ဦး၊ ပြည်ထောင်စုဝန်ကြီး (ငြိမ်း) ဦးတင်နိုင်သိန်း၊ Green Economy Green Group မှ Executive Director ဦးတင်ဝင်းအောင်တို့က ပါဝင်ဆွေးနွေးကြသည်။

■ သဘာပတိ မြန်မာ့ပုံရိပ်ဖော်ညွှန်းရေးအဖွဲ့မှ ဒေါက်တာခင်မောင်လွင်က စီးပွားရေးဖွံ့ဖြိုးမှု ဖော်ဆောင်ရာတွင် အားလုံးပါဝင်လွှမ်းခြုံနိုင်သည့် ဖွံ့ဖြိုးတိုးတက်မှုဖြစ်စေရေးနှင့်စပ်လျဉ်း၍ ဆွေးနွေးသည်။

■ ဆက်လက်၍ မြန်မာ့ပုံရိပ်ဖော်ညွှန်းရေးအဖွဲ့မှ ဒေါက်တာဇော်ဦးက မက်ခရိုစီးပွားရေးအခြေအနေ၊ မြန်မာ့စီးပွားရေးဖွံ့ဖြိုးတိုးတက်မှုဆီ လှမ်းချီနိုင်ရေး အကြံပြုချက်များ၊ ကုန်ဈေးနှုန်း၊ ငွေလဲနှုန်း၊ ငွေကြေး ဈေးနှုန်း၊ စက်သုံးဆီဈေးနှုန်းတည်ငြိမ်ရေးအတွက် စီမံဆောင်ရွက်မှု၊ စက်သုံးဆီ ခြိုးခြံချွေတာရေး အစီအမံများ၊ ဘေးထွက်စရိတ်ကုန်ကျမှု လျှော့ချနိုင်မည့်အခြေအနေ၊ ကုန်ဈေးနှုန်းနှင့် ငွေကြေးဖောင်းပွမှုအကြောင်းရင်းများ၊ ငွေလဲနှုန်းနှင့်ကုန်သွယ်ရေး ကဏ္ဍဆက်စပ်နေမှု၊ မြန်မာနိုင်ငံ၏ GDP တိုးတက်နှုန်း၊ စိန်ခေါ်မှုများပြားလာသော ကမ္ဘာ့စီးပွားရေးစနစ်၊ အခြေခံလုပ်သားရှားပါးလာမှု၊ လုံခြုံစနစ်ကျသော ဒစ်ဂျစ်တယ်ငွေကြေးစနစ်ဖော်ဆောင်ရေး၊ နိုင်ငံခြားရင်းနှီးမြှုပ်နှံမှုစီးဝင်ရေး၊ တရားမဝင်ကုန်သွယ်ရေးနှင့် ပဋိပက္ခကြောင့် ဖြစ်ပေါ်လာနိုင်သည့် စီးပွားရေးသက်ရောက်မှုများ၊ မြန်မာ့နည်း၊ မြန်မာ့ဟန် စီးပွားရေးမဟာဗျူဟာများ ဖော်ဆောင်ရေးတို့နှင့် စပ်လျဉ်း၍ ဆွေးနွေးသည်။

■ ထို့နောက် ပြည်ထောင်စုဝန်ကြီး(ငြိမ်း) ဦးတင်နိုင်သိန်းက Nation Building နှင့် State Building ၊ လွတ်လပ်ရေးမရမီ မြန်မာ့နိုင်ငံရေးအခြေအနေ၊ နိုင်ငံရေးရာအယူဝါဒများနှင့် နိုင်ငံတည်ဆောက်ရေး အခန်းကဏ္ဍ၊ ယနေ့ခေတ် နိုင်ငံတည်ဆောက်ရေး Ideology များ၊ ပြည်သူ့ဆန္ဒ၊ ပြည်သူ့လိုလားချက်၊ ပြည်သူ့မျှော်မှန်းချက်များ၊ အမျိုးသားကာကွယ်ရေးနှင့် လုံခြုံရေးကောင်စီအစိုးရ၏ မျှော်မှန်းချက်များ၊ လွှတ်တော်တွင် နေရာအများဆုံးအနိုင်ရပါတီ၏ မျှော်မှန်းချက်များ၊ နိုင်ငံတော်၏ အခြေခံမူများ၊ အမျိုးသားရေး မျှော်မှန်းချက်နှင့် ပန်းတိုင်၊ အမျိုးသားရေးမျှော်မှန်းချက်နှင့်တာဝန်၊ ရည်မှန်းချက် တာဝန်များကို အကောင်အထည်ဖော်မြှင့်တင်မည့်သူများ၏ အခန်းကဏ္ဍ၊ နိုင်ငံတည်ဆောက်ရာတွင် အရေးကြီးသည့် မျှော်မှန်းချက်အမြင် တည့်မတ်မှန်ကန်မှုအပေါ် လေ့လာဆန်းစစ်ခြင်း၊ အမြင်သဘောထား မှန်ကန်တူညီရေး၊ ရည်မှန်းချက်တာဝန်များကို အကောင်အထည်ဖော်မြှင့်တင်ရာတွင် လိုအပ်သည့် အရင်းအနှီးစွမ်းအားများ၊ အမျိုးသားအကျိုးစီးပွားနှင့် ပြည်သူတို့၏ လူမှုစီးပွားလိုလားချက် ဖြည့်ဆည်းပေးနိုင်ရန်အတွက် အာဏာသုံးရပ်အပြန်အလှန်ထိန်းကျောင်းရေးတို့နှင့်စပ်လျဉ်း၍ အသေးစိတ် ရှင်းလင်းဆွေးနွေးသည်။

■ ယင်းနောက် Green Economy Green Group မှ Executive Director ဦးတင်ဝင်းအောင်က အစိမ်းရောင်စီးပွားရေးဖော်ဆောင်မှု ရည်ရွယ်ချက်၊ အစိမ်းရောင် စီးပွားရေး၏ အဓိကအကြောင်းအရာများ၊ အစိမ်းရောင်စီးပွားရေးဖော်ဆောင်မှုမှ လယ်ယာစိုက်ပျိုးရေးကဏ္ဍ၊ စိုက်ပျိုးရေးကဏ္ဍကို Innovative Idea များဖြင့် ပြောင်းလဲဖော်ဆောင်နိုင်ရေး၊ စားနပ်ရိက္ခာလုံခြုံမှုနှင့် ကျေးလက်ဒေသဖွံ့ဖြိုးရေးအစီအမံများ၊ မြန်မာနိုင်ငံ လူမှု-စီးပွားရေးဖွံ့ဖြိုးတိုးတက်မှုနှင့် အစိမ်းရောင်စီးပွားရေး၊ အစိုးရက ချမှတ်ဖော်ဆောင်သော မဟာဗျူဟာများတွင် ပုဂ္ဂလိကအခန်းကဏ္ဍအပါအဝင် ဘက်စုံ၊ ကဏ္ဍစုံက ပါဝင်ဖော်ဆောင်ရေးတို့နှင့် စပ်လျဉ်း၍ ဆွေးနွေးကြသည်။

■ ဆွေးနွေးမှုများအပေါ် နိုင်ငံရေးပါတီများမှပုဂ္ဂိုလ်များ၊ လွှတ်တော်ကိုယ်စားလှယ်များ၊ ပြည်တွင်းမှ နိုင်ငံရေးသုတေသီများ၊ မြန်မာနိုင်ငံအရေး စိတ်ဝင်စားကြသူများနှင့် တက်ရောက်လာသူများက သိရှိလိုသည်များကို မေးမြန်းဆွေးနွေးကြရာ ဆွေးနွေးပေးကြသူများက အသေးစိတ်ရှင်းလင်း ဖြေကြားပေးခဲ့ကြကြောင်းသိရသည်။

#YMG/NN #Yangon_Times

#World_Health
Published 14 March 2026

■ နော့ဝက်စတန်းဖိန်းဘာ့ဂ်ဆေးတက္ကသိုလ်ရဲ့ သုတေသနအသစ်မှာ ဘယ်အချိန် အစားစားခြင်းက နှလုံးကျန်းမာရေးနဲ့ ပတ်သက်နေပြီး ညနေစာလျှော့စားသူတွေကို လေ့လာရာမှာ သွေးပေါင်ချိန်လျော့ခြင်း၊ သွေးတွင်းသကြားဓာတ် တည်ငြိမ်ခြင်း၊ နှလုံးခုန်နှုန်း တည်ငြိမ်ခြင်းတို့ တွေ့ရှိရပါတယ်။

■ အစာမစားတဲ့ အချိန်ကာလကို ခန္ဓာကိုယ် နိုးထအိပ်စက်စက်ဝန်းနဲ့အညီ အချိန်ကိုက်ပြုလုပ်ပါက နှလုံး၊ ဇီဝဖြစ်စဉ်၊ အိပ်စက်မှုတို့ကြား ပူးပေါင်းဆောင်ရွက်နိုင်စေပြီး နှလုံးသွေးကြောကျန်းမာရေး ကာကွယ်နိုင်မှာဖြစ်တယ်လို့ ဒေါက်တာ ဒန်နီယယ်လာဂရီမယ်ဒီက ဆိုပါတယ်။

■ နှလုံးကျန်းမာရေး မကောင်းတဲ့အခါ ဆီးချို၊ နှလုံးရောဂါ၊ ကျောက်ကပ်ရောဂါ၊ အိပ်မပျော်ခြင်း၊ အချို့သော ကင်ဆာအန္တရာယ်တွေနဲ့ ဆက်စပ်နေပါတယ်။

■ အသက် ၃၆ နှစ်မှ ၇၅ နှစ်ကြားရှိပြီး အဝလွန်နေတဲ့ လူ ၃၉ ယောက်ကို ခေါ်ယူကာ အဖွဲ့တစ်ဖွဲ့ကို အိပ်ရာမဝင်ခင် ၃ နာရီခြားပြီး နောက်ဆုံးစားစေကာ အစာမစားချိန် ၁၃ နာရီမှ ၁၆ နာရီကြား ရှိစေခဲ့ပါတယ်။

■ အခြားအဖွဲ့ကတော့ ပုံမှန်အတိုင်း အစာမစားချိန် ၁၁ နာရီမှ ၁၃ နာရီကြား ရှိပါတယ်။

■ ရက်သတ္တပတ် ၇ ပတ်ခွဲကြာပြီးနောက် အိပ်ရာမဝင်ခင် ၃ နာရီနောက်ဆုံးထား စားတဲ့သူတွေက နှလုံးကျန်းမာရေးမှာ သိသိသာသာ တိုးတက်လာခဲ့တာ တွေ့ရပါတယ်။

■ ပျမ်းမျှအားဖြင့် သွေးပေါင်ချိန် ၃.၅ ရာခိုင်နှုန်း ကျဆင်းကာ ညဘက်မှာ နှလုံးခုန်နှုန်း ၅ ရာခိုင်နှုန်း ကျဆင်းစေသဖြင့် နှလုံးကျန်းမာရေးအတွက် အရေးပါပါတယ်။

■ ဒါကြောင့် နောက်ကျမှ အစားစားခြင်းကို ရှောင်ရှားမယ်ဆိုရင် ကိုယ်အလေးချိန် ထိန်းသိမ်းနိုင်ရန် ကူညီပေးနိုင်ပါတယ်။

■ သုတေသီတွေက တွေ့ရှိချက်တွေကို အတည်ပြုနိုင်ဖို့ ကျယ်ကျယ်ပြန့်ပြန့် စမ်းသပ်လေ့လာသွားရန် စီစဉ်နေပါတယ်။

Source: New York Post.