#Local_News
Published 14 March 2026

■ နေပြည်တော်၌ မြန်မာ့မျက်နှာစာသစ် ဖိုရမ် ဒုတိယနေ့ ကို ယနေ့တွင် ဆက်လက် ကျင်းပနေကြောင်းသိရသည်။

■ အဆိုပါ “မြန်မာ့မျက်နှာစာသစ်ဖိုရမ်” (ယုံကြည်မှု၊ တည်ငြိမ်အေးချမ်းမှုနှင့် ဖွံ့ဖြိုးတိုးတက်မှု) “Forum on The Dawn of A New State”(Trust, Stability & Development) ပထမနေ့ကို ယမာန်နေ့က ပထမနေ့အဖြစ် နေပြည်တော်ရှိ မြန်မာအပြည်ပြည်ဆိုင်ရာကွန်ဗင်းရှင်းဗဟိုဌာန (၁) (MICC I) ၌ ကျင်းပခဲ့ခြင်းဖြစ်သည်။

■ ထိုသို့ကျင်းပရာတွင်ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးမောင်မောင်အုန်းက ကြိုဆိုနှုတ်ခွန်းဆက်စကားပြောကြားရာတွင် ကိုယ်စားလှယ်ကြီးများအနေဖြင့် ယနေ့ဖိုရမ်မှ ရင်းနှီးမြှုပ်နှံမှုဆိုင်ရာအခွင့်အလမ်းများ၊ စားနပ်ရိက္ခာဖူလုံရေးနှင့် ရေရှည်ပူးပေါင်းမှု၊ အသေးစား၊ အလတ်စား စက်မှုလုပ်ငန်းများဖွံ့ဖြိုးမှုနှင့် နိုင်ငံတကာစီးပွားရေးပူးပေါင်းဆောင်ရွက်မှုများကို မည်သို့ဖော်ဆောင်ကြမည်ဆိုသည့် အတွေးအမြင်သစ်များ ရရှိကြမည်ဖြစ်ပါကြောင်း၊ ထို့ပြင် လယ်ယာစီးပွားမှ စက်မှုစီးပွားရေးဆီကူးပြောင်းမှု၊ အခြေခံအဆောက်အုံနှင့် စွမ်းအင်ကဏ္ဍ၊ ဒစ်ဂျစ်တယ် စီးပွားရေးနှင့်ဆန်းသစ်တီထွင်မှု၊ လူ့စွမ်းအားအရင်းအမြစ် ပြုပြင်ပြောင်းလဲရေးစသည့် ဆွေးနွေးချက်များကိုလည်း ရရှိကြမည်ဖြစ်ပါကြောင်း။

■ ယခုကဲ့သို့ စိန်ခေါ်မှုများပြားသည့် ကမ္ဘာ့အခြေအနေတွင် မိမိတို့၏ အားသာချက်၊ အားနည်းချက်များကို သေချာဆန်းစစ်ပြီး ရေရှည်တည်တံ့မည့် လမ်းပြမြေပုံများ ရေးဆွဲကြရမည်ဖြစ်ပါကြောင်း၊ ပညာရှင်များ၏ အကြံပြုချက်များသည် လက်တွေ့အသုံးချ၍ ရသည့်ဗဟုသုတများဖြစ်သည့်အတွက် အလေးထားမှတ်သားဆောင်ရွက်ကြရမည် ဖြစ်ပါကြောင်း၊မိမိတို့အနေဖြင့် လယ်ယာကဏ္ဍမှ စက်မှုကဏ္ဍကို ကူးပြောင်းသည့်အခါ နည်းပညာနှင့် ဆန်းသစ်တီထွင် မှုကို မဖြစ်မနေအသုံးချရမည်ဖြစ်ပါကြောင်း၊ ယနေ့ခေတ်တွင် ဒစ်ဂျစ်တယ်စီးပွားရေးသည် ကမ္ဘာ့စံနှုန်း ဖြစ်လာသကဲ့သို့ မိမိတို့နိုင်ငံ၏ ကုန်ထုတ်လုပ်မှုကွင်းဆက်ကိုလည်း ပိုမိုမြန်ဆန်သွက်လက်စေမည် ဖြစ်ပါကြောင်း၊ စွမ်းအင်နှင့်အခြေခံအဆောက်အအုံဖွံ့ဖြိုးရေးသည် စက်မှုကဏ္ဍအတွက် အသက်သွေးကြော ဖြစ်ပါကြောင်း၊ နှစ်ရက်တာကျင်းပမည့် မြန်မာ့မျက်နှာစာသစ်ဖိုရမ်မှ မြန်မာနိုင်ငံဖွံ့ဖြိုးရေးအတွက် သဘောတရားရေးသာမက လက်တွေ့ကျသည့် သဘောထားအမြင်များ၊ အကြံပြုချက်များ၊ ထောက်ပြချက်များရရှိလာမည်ဟု မျှော်လင့်ပါကြောင်း၊ ပညာရှင်များ၏ အကြံပြုချက်များ၊ ဆွေးနွေးချက်များကိုလည်း အလေးထားဆောင်ရွက်သွားမည်ဖြစ်ပါကြောင်း ပြောကြားသည်။

■ ထို့နောက် ပြည်ထောင်စုဝန်ကြီးက အမျိုးသားလွှတ်တော်ကိုယ်စားလှယ် ၁၅၇ ဦး၊ ပြည်သူ့လွှတ်တော်ကိုယ်စားလှယ် ၂၆၃ ဦး၊ တပ်မတော်သားလွှတ်တော်ကိုယ်စားလှယ် ၁၆၆ ဦးအတွက် MRTV DTH အစုံ ၃၀၀ ၊ MRTV DVB T2 Set Top Box ၂၈၆ လုံး၊ Cannal+ DTH အစုံ ၃၀၀ နှင့် Cannal + T2 Set Top Box ၂၈၆ လုံးတို့ကို ပေးအပ်ရာ လွှတ်တော်ကိုယ်စားလှယ်များကိုယ်စား ကိုယ်စားလှယ်တစ်ဦးစီက လက်ခံရယူသည်။

■ ဆွေးနွေးပွဲ(ပထမပိုင်း)အဖြစ် မြန်မာနိုင်ငံ၏ စီးပွားရေးဖွံ့ဖြိုးတိုးတက်ရေးအတွက် နိုင်ငံတကာ အခွင့်အလမ်းများခေါင်းစဉ်ဖြင့် ဆွေးနွေးရာ မြန်မာ့ပုံရိပ်ဖော်ညွှန်းရေးအဖွဲ့မှ ဒေါက်တာဇော်ဦးက သဘာပတိအဖြစ် ဆောင်ရွက်ပြီး နိုင်ငံတကာ ပညာရှင်များဖြစ်သည့် Yunnan Academy of Social Sciences မှ Professor Mr. Lei Zhuning ၊ Jawaharlal Nehru University မှ Senior Professor Mr. Mahendra P. Lama ၊ Chiang Mai University မှ Distinguished Economist and Academic Leader Dr. Nisit Panthamit နှင့် Representative of Dale Carnegie & Associates Mr. Luc De Waegh တို့က ပါဝင် ဆွေးနွေးကြသည်။

■ သဘာပတိ ဒေါက်တာဇော်ဦးက နိုင်ငံတစ်နိုင်ငံအတွက် စီးပွားရေးဆိုင်ရာ ချိတ်ဆက်မှုအခွင့်အလမ်းများ၊ သမားရိုးကျမဟုတ်သည့် စီးပွားရေးဆိုင်ရာအခြေအနေများကို ကိုင်တွယ်ဆောင်ရွက်မှုများ၊ တရားမဝင်လုပ်ကိုင်ဆောင်ရွက်နေသည့် စီးပွားရေးလုပ်ငန်းများကို မူဝါဒများချမှတ်၍ တရားဝင်လမ်းကြောင်းပေါ်သို့ ပြောင်းလဲလုပ်ကိုင်စေခြင်း၊ ရွှေ့ပြောင်းလုပ်သားများကို Brain Gain အဖြစ် နိုင်ငံ အပေါ် အကျိုးပြုနိုင်ရန် စီမံဆောင်ရွက်ခြင်း၊ ရွှေ့ပြောင်းလုပ်သားများ၏ လုပ်အားခများကို တရားဝင် ငွေလွှဲလမ်းကြောင်းဖြင့် စီးဝင်စေခြင်း၊ လုံခြုံသောစွမ်းအင်ကဏ္ဍရရှိအောင်စီမံခန့်ခွဲခြင်းနှင့် စီးပွားရေးကဏ္ဍတွင် ဒစ်ဂျစ်တယ်နည်းပညာ အသုံးပြု ခြင်းနှင့်စပ်လျဉ်း၍ ဆွေးနွေးခဲ့ ကြောင်းသိရသည်။

■ ထို့နောက် Yunnan Academy of Social Sciences မှ Professor Mr. Lei Zhuning က မြန်မာ-တရုတ် စီးပွားရေးစင်္ကြံ အကောင်အထည်ဖော်ဆောင်ရွက်မှု၊ နှစ်နိုင်ငံပူးပေါင်းဆောင်ရွက်မှုမှ ထွက်ပေါ်လာနိုင် သည့် အခွင့်အလမ်းသစ်များ၊ Greater Mekong Sub-Region (GMS) မှတစ်ဆင့် စီးပွားရေးအခွင့်အလမ်းများ ဖော်ဆောင်မှု၊ မြန်မာနိုင်ငံ၏ ပထဝီစီးပွားရေးဆိုင်ရာ အခွင့်အလမ်းများ၊ စီးပွားရေးစင်္ကြံများမှမြန်မာနိုင်ငံအနေဖြင့် ရရှိနိုင်သည့် အခွင့်အလမ်းများနှင့် စီးပွားရေးအကျိုးရလဒ်များ ဖော်ဆောင်နိုင်မည့် အခြေအနေ၊ တရုတ်နိုင်ငံအနေဖြင့် အာရှဒေသတွင်းမှ စိုက်ပျိုးရေးဆိုင်ရာထုတ်ကုန်များကို ပိုမိုတင်သွင်းခွင့်ပြုမည့် မူဝါဒ၊ မြန်မာ-တရုတ်နှစ်နိုင်ငံကုန်သွယ်မှုတွင် မြန်မာနိုင်ငံဘက်မှ စိုက်ပျိုး ရေးဆိုင်ရာ ထုတ်ကုန်များ၊ တန်ဖိုးမြှင့်ထုတ်ကုန်များထုတ်လုပ်၍ တရုတ်နိုင်ငံသို့ ပိုမိုတင်ပို့နိုင်ရေးနှင့် စပ်လျဉ်း၍ ဆွေးနွေးသည်။

■ ယင်းနောက် Jawaharlal Nehru University မှ Senior Professor Mr. Mahendra P. Lama က ကျေးလက်ဒေသ ဖွံ့ဖြိုးတိုးတက်မှုအခွင့်အလမ်းများ ဖော်ဆောင်ရာတွင် မဖြစ်မနေထည့်သွင်းစဉ်းစားရမည့် အစားအစာလုံခြုံရေး၊ တန်ဖိုးမြှင့်ထုတ်ကုန်များ တိုးတက်ထုတ်လုပ်ရေး၊ အိန္ဒိယနိုင်ငံသည် ပဲစားသုံးမှု မြင့်မားသည့်အတွက် မြန်မာနိုင်ငံမှ ပဲတင်ပို့နိုင်သည့် ဈေးကွက်အဖြစ်တည်ရှိမှု၊ ပဲတင်ပို့မှုတိုးမြှင့်နိုင်ရေးအတွက် အထွက်နှုန်းမြှင့်တင်‌ရေးအစီအမံများ၊ အော်ဂဲနစ်သီးနှံများအဖြစ် တိုးတက်ထုတ်လုပ်နိုင်ရေး၊ အာရှဒေသအတွင်း ပဲဈေးကွက်မြှင့်တင်တင်ပို့နိုင်မည့် အစီအမံများ၊ မြန်မာနိုင်ငံအတွက် အခွင့်အလမ်းများ ဖော်ဆောင်နိုင်ရန်အစိုးရ၊ လွှတ်တော်၊ ပြည်သူအားလုံး နိုင်ငံရေးဆန္ဒရှိရန်လိုအပ်မှု၊ စွမ်းအင်ဆိုင်ရာ မူဝါဒများခိုင်မာရေး၊ မြန်မာနိုင်ငံအနေဖြင့် စွမ်းအင်ရရှိရေး စီမံဆောင်ရွက်ရာတွင် ရေအားလျှပ်စစ်ကဲ့သို့ သန့်ရှင်းသည့် စွမ်းအင်စီမံကိန်းများ၊ ရေရှည်တည်တံ့သည့် စွမ်းအင်ကဏ္ဍဖြစ်ပေါ်ရေး ဆောင်ရွက်သင့်သည့် နည်းလမ်းများနှင့် စပ်လျဉ်း၍ ဆွေးနွေးသည်။

■ ဆက်လက်၍ Chiang Mai University Distinguished Economist and Academic Leader Dr. Nisit Panthamit က စီးပွားရေးအခွင့်အလမ်းများဖော်ဆောင်ရန် အခြေခံအုတ်မြစ်များ ခိုင်မာစွာတည်ရှိရေး၊ နိုင်ငံ့စီးပွားရေးအတွက် MSME လုပ်ငန်းများက အထောက်အပံ့ပြုနေမှု၊ တစ်ခါတရံစီးပွားရေးအခွင့် အလမ်းသစ်များအတွက် Back to Basic နည်းလမ်းကို အသုံးပြုရေး၊ အထူးပြု စီးပွားရေးကဏ္ဍများ ဖော်ဆောင်ရန်လိုအပ်မှု၊ အိမ်နီးချင်းနိုင်ငံများနှင့် ကုန်သွယ်မှုပြုရာတွင် အပြန်အလှန် အထောက်အကူ ပြုစေနိုင်သည့် ငွေကြေးစနစ်ဖော်ဆောင်ရေး၊ ငွေလဲနှုန်းတည်ငြိမ်ရေး၊ စီးပွားရေးအခွင့်အလမ်းများ ဖော်ဆောင်ရာတွင် အတားအဆီးဖြစ်စေမည့်ကန့်သတ်ချက်များ နည်းနိုင်သမျှနည်းအောင် စီမံဆောင်ရွက်ရေး၊ စီးပွားရေးကဏ္ဍအတွက် စဉ်းစားဆောင်ရွက်ရမည့် ဆိုက်ဘာလုံခြုံရေးဆိုင်ရာ ကိစ္စရပ်များ၊ မြန်မာ-ထိုင်း နှစ်နိုင်ငံ ကုန်သွယ်မှုအခြေအနေ၊ ထိုင်းနိုင်ငံရှိ စီးပွားရေးလုပ်ငန်းများတွင် ပါဝင်နေသည့် မြန်မာလုပ်သားများ၏ အခန်းကဏ္ဍတို့နှင့် စပ်လျဉ်း၍ ဆွေးနွေးပြောကြားသည်။

■ ထို့နောက် Representative of Dale Carnegie & Associates Mr. Luc De Waegh က အလားအလာ များစွာရှိသည့် နိုင်ငံတစ်ခုအဖြစ် မြန်မာနိုင်ငံကို နိုင်ငံတကာက ပြောင်းလဲရှုမြင်လာမှု၊ မြန်မာနိုင်ငံအနေဖြင့် တိုးတက်မှုရရှိလာသည့် စီးပွားရေးအခြေအနေ၊ မြန်မာနိုင်ငံသို့ နိုင်ငံခြားရင်းနှီးမြှုပ်နှံမှု ဝင်ရောက်မှုအခြေအနေ၊ ခေတ်စနစ်နှင့်အညီ ပြောင်းလဲဖော်ဆောင်လာသည့် မြန်မာနိုင်ငံ၏ Tele Communication အခန်းကဏ္ဍ၊ အိပ်မက်စိတ်ကူးရှိသလောက် မြန်မာနိုင်ငံအနေဖြင့် တိုးချဲ့ဖော်ဆောင်နိုင်မည့် စီးပွားရေးအခွင့်အလမ်းများ၊ Multi National Company များ ဖော်ဆောင်ခြင်းဖြင့် စီးပွားရေးဖွံ့ဖြိုး တိုးတက်မှုရရှိနိုင်မည့် အခြေအနေကို ဆွေးနွေးပြောကြားသည်။

■ ထိုသို့ ဆွေးနွေးမှုများအပေါ် နိုင်ငံရေးပါတီများမှ ပုဂ္ဂိုလ်များ၊ လွှတ်တော်ကိုယ်စားလှယ်များ၊ ပြည်တွင်းမှ နိုင်ငံရေးသုတေသီများ၊ မြန်မာနိုင်ငံအရေးစိတ်ဝင်စားကြသူများ၊ တက်ရောက်လာကြသူများက သိရှိလိုသည်များ မေးမြန်းဆွေးနွေးကြရာ နိုင်ငံတကာပညာရှင်များက အသေးစိတ်ရှင်းလင်း ဖြေကြားပေးကြသည်။

■ ယင်းနောက် ဆွေးနွေးပွဲ(ဒုတိယပိုင်း)အဖြစ် မြန်မာနိုင်ငံ၏ ဖွံ့ဖြိုးတိုးတက်ရေးနှင့် တည်ငြိမ်အေးချမ်းရေးဆိုင်ရာအခွင့်အလမ်းများနှင့် စိန်ခေါ်မှုများ(၁) ခေါင်းစဉ်ဖြင့် ဆွေးနွေးရာ မြန်မာ့ပုံရိပ် ဖော်ညွှန်းရေးအဖွဲ့မှ ဒေါက်တာခင်မောင်လွင်က သဘာပတိအဖြစ် ဆောင်ရွက်ပြီး မြန်မာ့ပုံရိပ်ဖော်ညွှန်းရေးအဖွဲ့မှ ဒေါက်တာဇော်ဦး၊ ပြည်ထောင်စုဝန်ကြီး (ငြိမ်း) ဦးတင်နိုင်သိန်း၊ Green Economy Green Group မှ Executive Director ဦးတင်ဝင်းအောင်တို့က ပါဝင်ဆွေးနွေးကြသည်။

■ သဘာပတိ မြန်မာ့ပုံရိပ်ဖော်ညွှန်းရေးအဖွဲ့မှ ဒေါက်တာခင်မောင်လွင်က စီးပွားရေးဖွံ့ဖြိုးမှု ဖော်ဆောင်ရာတွင် အားလုံးပါဝင်လွှမ်းခြုံနိုင်သည့် ဖွံ့ဖြိုးတိုးတက်မှုဖြစ်စေရေးနှင့်စပ်လျဉ်း၍ ဆွေးနွေးသည်။

■ ဆက်လက်၍ မြန်မာ့ပုံရိပ်ဖော်ညွှန်းရေးအဖွဲ့မှ ဒေါက်တာဇော်ဦးက မက်ခရိုစီးပွားရေးအခြေအနေ၊ မြန်မာ့စီးပွားရေးဖွံ့ဖြိုးတိုးတက်မှုဆီ လှမ်းချီနိုင်ရေး အကြံပြုချက်များ၊ ကုန်ဈေးနှုန်း၊ ငွေလဲနှုန်း၊ ငွေကြေး ဈေးနှုန်း၊ စက်သုံးဆီဈေးနှုန်းတည်ငြိမ်ရေးအတွက် စီမံဆောင်ရွက်မှု၊ စက်သုံးဆီ ခြိုးခြံချွေတာရေး အစီအမံများ၊ ဘေးထွက်စရိတ်ကုန်ကျမှု လျှော့ချနိုင်မည့်အခြေအနေ၊ ကုန်ဈေးနှုန်းနှင့် ငွေကြေးဖောင်းပွမှုအကြောင်းရင်းများ၊ ငွေလဲနှုန်းနှင့်ကုန်သွယ်ရေး ကဏ္ဍဆက်စပ်နေမှု၊ မြန်မာနိုင်ငံ၏ GDP တိုးတက်နှုန်း၊ စိန်ခေါ်မှုများပြားလာသော ကမ္ဘာ့စီးပွားရေးစနစ်၊ အခြေခံလုပ်သားရှားပါးလာမှု၊ လုံခြုံစနစ်ကျသော ဒစ်ဂျစ်တယ်ငွေကြေးစနစ်ဖော်ဆောင်ရေး၊ နိုင်ငံခြားရင်းနှီးမြှုပ်နှံမှုစီးဝင်ရေး၊ တရားမဝင်ကုန်သွယ်ရေးနှင့် ပဋိပက္ခကြောင့် ဖြစ်ပေါ်လာနိုင်သည့် စီးပွားရေးသက်ရောက်မှုများ၊ မြန်မာ့နည်း၊ မြန်မာ့ဟန် စီးပွားရေးမဟာဗျူဟာများ ဖော်ဆောင်ရေးတို့နှင့် စပ်လျဉ်း၍ ဆွေးနွေးသည်။

■ ထို့နောက် ပြည်ထောင်စုဝန်ကြီး(ငြိမ်း) ဦးတင်နိုင်သိန်းက Nation Building နှင့် State Building ၊ လွတ်လပ်ရေးမရမီ မြန်မာ့နိုင်ငံရေးအခြေအနေ၊ နိုင်ငံရေးရာအယူဝါဒများနှင့် နိုင်ငံတည်ဆောက်ရေး အခန်းကဏ္ဍ၊ ယနေ့ခေတ် နိုင်ငံတည်ဆောက်ရေး Ideology များ၊ ပြည်သူ့ဆန္ဒ၊ ပြည်သူ့လိုလားချက်၊ ပြည်သူ့မျှော်မှန်းချက်များ၊ အမျိုးသားကာကွယ်ရေးနှင့် လုံခြုံရေးကောင်စီအစိုးရ၏ မျှော်မှန်းချက်များ၊ လွှတ်တော်တွင် နေရာအများဆုံးအနိုင်ရပါတီ၏ မျှော်မှန်းချက်များ၊ နိုင်ငံတော်၏ အခြေခံမူများ၊ အမျိုးသားရေး မျှော်မှန်းချက်နှင့် ပန်းတိုင်၊ အမျိုးသားရေးမျှော်မှန်းချက်နှင့်တာဝန်၊ ရည်မှန်းချက် တာဝန်များကို အကောင်အထည်ဖော်မြှင့်တင်မည့်သူများ၏ အခန်းကဏ္ဍ၊ နိုင်ငံတည်ဆောက်ရာတွင် အရေးကြီးသည့် မျှော်မှန်းချက်အမြင် တည့်မတ်မှန်ကန်မှုအပေါ် လေ့လာဆန်းစစ်ခြင်း၊ အမြင်သဘောထား မှန်ကန်တူညီရေး၊ ရည်မှန်းချက်တာဝန်များကို အကောင်အထည်ဖော်မြှင့်တင်ရာတွင် လိုအပ်သည့် အရင်းအနှီးစွမ်းအားများ၊ အမျိုးသားအကျိုးစီးပွားနှင့် ပြည်သူတို့၏ လူမှုစီးပွားလိုလားချက် ဖြည့်ဆည်းပေးနိုင်ရန်အတွက် အာဏာသုံးရပ်အပြန်အလှန်ထိန်းကျောင်းရေးတို့နှင့်စပ်လျဉ်း၍ အသေးစိတ် ရှင်းလင်းဆွေးနွေးသည်။

■ ယင်းနောက် Green Economy Green Group မှ Executive Director ဦးတင်ဝင်းအောင်က အစိမ်းရောင်စီးပွားရေးဖော်ဆောင်မှု ရည်ရွယ်ချက်၊ အစိမ်းရောင် စီးပွားရေး၏ အဓိကအကြောင်းအရာများ၊ အစိမ်းရောင်စီးပွားရေးဖော်ဆောင်မှုမှ လယ်ယာစိုက်ပျိုးရေးကဏ္ဍ၊ စိုက်ပျိုးရေးကဏ္ဍကို Innovative Idea များဖြင့် ပြောင်းလဲဖော်ဆောင်နိုင်ရေး၊ စားနပ်ရိက္ခာလုံခြုံမှုနှင့် ကျေးလက်ဒေသဖွံ့ဖြိုးရေးအစီအမံများ၊ မြန်မာနိုင်ငံ လူမှု-စီးပွားရေးဖွံ့ဖြိုးတိုးတက်မှုနှင့် အစိမ်းရောင်စီးပွားရေး၊ အစိုးရက ချမှတ်ဖော်ဆောင်သော မဟာဗျူဟာများတွင် ပုဂ္ဂလိကအခန်းကဏ္ဍအပါအဝင် ဘက်စုံ၊ ကဏ္ဍစုံက ပါဝင်ဖော်ဆောင်ရေးတို့နှင့် စပ်လျဉ်း၍ ဆွေးနွေးကြသည်။

■ ဆွေးနွေးမှုများအပေါ် နိုင်ငံရေးပါတီများမှပုဂ္ဂိုလ်များ၊ လွှတ်တော်ကိုယ်စားလှယ်များ၊ ပြည်တွင်းမှ နိုင်ငံရေးသုတေသီများ၊ မြန်မာနိုင်ငံအရေး စိတ်ဝင်စားကြသူများနှင့် တက်ရောက်လာသူများက သိရှိလိုသည်များကို မေးမြန်းဆွေးနွေးကြရာ ဆွေးနွေးပေးကြသူများက အသေးစိတ်ရှင်းလင်း ဖြေကြားပေးခဲ့ကြကြောင်းသိရသည်။

#YMG/NN #Yangon_Times

#World_Health
Published 14 March 2026

■ နော့ဝက်စတန်းဖိန်းဘာ့ဂ်ဆေးတက္ကသိုလ်ရဲ့ သုတေသနအသစ်မှာ ဘယ်အချိန် အစားစားခြင်းက နှလုံးကျန်းမာရေးနဲ့ ပတ်သက်နေပြီး ညနေစာလျှော့စားသူတွေကို လေ့လာရာမှာ သွေးပေါင်ချိန်လျော့ခြင်း၊ သွေးတွင်းသကြားဓာတ် တည်ငြိမ်ခြင်း၊ နှလုံးခုန်နှုန်း တည်ငြိမ်ခြင်းတို့ တွေ့ရှိရပါတယ်။

■ အစာမစားတဲ့ အချိန်ကာလကို ခန္ဓာကိုယ် နိုးထအိပ်စက်စက်ဝန်းနဲ့အညီ အချိန်ကိုက်ပြုလုပ်ပါက နှလုံး၊ ဇီဝဖြစ်စဉ်၊ အိပ်စက်မှုတို့ကြား ပူးပေါင်းဆောင်ရွက်နိုင်စေပြီး နှလုံးသွေးကြောကျန်းမာရေး ကာကွယ်နိုင်မှာဖြစ်တယ်လို့ ဒေါက်တာ ဒန်နီယယ်လာဂရီမယ်ဒီက ဆိုပါတယ်။

■ နှလုံးကျန်းမာရေး မကောင်းတဲ့အခါ ဆီးချို၊ နှလုံးရောဂါ၊ ကျောက်ကပ်ရောဂါ၊ အိပ်မပျော်ခြင်း၊ အချို့သော ကင်ဆာအန္တရာယ်တွေနဲ့ ဆက်စပ်နေပါတယ်။

■ အသက် ၃၆ နှစ်မှ ၇၅ နှစ်ကြားရှိပြီး အဝလွန်နေတဲ့ လူ ၃၉ ယောက်ကို ခေါ်ယူကာ အဖွဲ့တစ်ဖွဲ့ကို အိပ်ရာမဝင်ခင် ၃ နာရီခြားပြီး နောက်ဆုံးစားစေကာ အစာမစားချိန် ၁၃ နာရီမှ ၁၆ နာရီကြား ရှိစေခဲ့ပါတယ်။

■ အခြားအဖွဲ့ကတော့ ပုံမှန်အတိုင်း အစာမစားချိန် ၁၁ နာရီမှ ၁၃ နာရီကြား ရှိပါတယ်။

■ ရက်သတ္တပတ် ၇ ပတ်ခွဲကြာပြီးနောက် အိပ်ရာမဝင်ခင် ၃ နာရီနောက်ဆုံးထား စားတဲ့သူတွေက နှလုံးကျန်းမာရေးမှာ သိသိသာသာ တိုးတက်လာခဲ့တာ တွေ့ရပါတယ်။

■ ပျမ်းမျှအားဖြင့် သွေးပေါင်ချိန် ၃.၅ ရာခိုင်နှုန်း ကျဆင်းကာ ညဘက်မှာ နှလုံးခုန်နှုန်း ၅ ရာခိုင်နှုန်း ကျဆင်းစေသဖြင့် နှလုံးကျန်းမာရေးအတွက် အရေးပါပါတယ်။

■ ဒါကြောင့် နောက်ကျမှ အစားစားခြင်းကို ရှောင်ရှားမယ်ဆိုရင် ကိုယ်အလေးချိန် ထိန်းသိမ်းနိုင်ရန် ကူညီပေးနိုင်ပါတယ်။

■ သုတေသီတွေက တွေ့ရှိချက်တွေကို အတည်ပြုနိုင်ဖို့ ကျယ်ကျယ်ပြန့်ပြန့် စမ်းသပ်လေ့လာသွားရန် စီစဉ်နေပါတယ်။

Source: New York Post.

#World_Health
Published 14 March 2026

■ အင်္ဂလန်မှ သိပ္ပံပညာရှင်တွေဟာ ၂၀၂၄ ခုနှစ်က အသက် ၇၈ နှစ်ရှိခဲ့တဲ့ ရုပ်အလောင်းကို ခွဲစိတ်စစ်ဆေးခဲ့ကြရာမှာ လိင်တံ ၃ ချောင်းတောင် ပါနေတာကို တွေ့ရှိခဲ့ကြပါတယ်။

■ ဒီလိုမျိုး ကျားအင်္ဂါပုံမှန်မဟုတ်တဲ့ အခြေအနေကို တွေ့ရှိတာဟာ သမိုင်းမှာ ဒုတိယအကြိမ် ဖြစ်ပါတယ်။

■ ဒီလူဟာ အသက်ရှင်စဉ်တုန်းက ဒီလိုအပိုပါတာကို လုံးဝသတိမထားမိခဲ့တာပါပဲ။

■ ဒီအခြေအနေကို ဆရာဝန်တွေက လိင်အင်္ဂါအပိုပါခြင်းလို့ ခေါ်ကြပြီး အလွန်အမင်းရှားပါးတဲ့ မွေးရာပါအခြေအနေ ဖြစ်ပါတယ်။

■ ၁၆၀၆ ခုနှစ်မှ ၂၀၂၃ ခုနှစ်အတွင်း ထိုကဲ့သို့ လိင်တံ ၃ ချောင်းပါခြင်းဖြစ်စဉ် တစ်ဦးသာရှိခဲ့ပြီး ၃ လသားအရွယ် ကလေးရဲ့ ကပ္ပယ်အိတ်အပြင်ဘက်မှာ အပိုထွက်နေတဲ့အင်္ဂါတွေ ခွဲစိတ်ဖယ်ရှားခဲ့ကြပါတယ်။

■ ၇၈ နှစ်အရွယ် အလောင်းမှာတော့ အင်္ဂါအပိုတွေက အိတ်အတွင်းမှာပဲ ပုန်းကွယ်ရှိနေခဲ့တာကြောင့် သာမန်လိုပဲ ထင်ခဲ့ပါတယ်။

■ လိင်အင်္ဂါတွေဖြစ်စေတဲ့ ရှေ့ပြေးအရာက သုံးပင်ပွားပြီး အဓိကလိင်တံတစ်ခုနဲ့ အပိုနှစ်ခု ပေါ်ပေါက်ခဲ့တယ်လို့ သုတေသီတွေ ပြောပါတယ်။

■ ဒီလိုပုံမှန်မဟုတ်တဲ့ဖြစ်စဉ်တွေ သိရှိထားတာထက် အပြင်မှာ ပိုများနိုင်ကာ ပုန်းကွယ်နေတဲ့ ဖြစ်ရပ်မျိုးဆိုရင် မသိရှိဘဲဖြစ်နေမယ်လို့ သုတေသီတွေ ယူဆထားပါတယ်။

■ ဒီဖြစ်စဉ်တွေကနေ ဆီးလမ်းကြောင်း ရောဂါပိုးဝင်ခြင်း၊ ထောင်မတ်မှုပြဿနာရှိခြင်း၊ မျိုးပွားနိုင်စွမ်းပြဿနာများ ဖြစ်လာနိုင်ပါတယ်။

■ ခွဲစိတ်ဖယ်ရှားတာနဲ့ ပတ်သက်ပြီး လူကျင့်ဝတ်ဆိုင်ရာ စိုးရိမ်ပူပန်တွေအကြောင်း ကျွမ်းကျင်သူတွေ ဆွေးနွေးခဲ့ကြပါတယ်။

Source: New York Post.

တရုတ်ပြည်မှာ လွန်ခဲ့တဲ့ နှစ်သန်းပေါင်း ၄၀၀ ကျော်က ငါးရုပ်ကြွင်း ၂ ခုကို တွေ့ရှိခဲ့ပါတယ်။ တစ်ခုက အကောင်သေးငယ်ပြီး နောက်တစ်ခုက ထိုခေတ်က ဧရာမကြီးတွေထဲက တစ်ခုဖြစ်ပါတယ်။

#Asia_History
Published 13 March 2026
#တရုတ် #ငါးရုပ်ကြွင်း
#YMG #Yangon_Times #Yangon_Media_Group

မြန်မာနိုင်ငံခရီးသွားလုပ်ငန်းဖွံဖြိုး တိုးတက် ရေးကိုအကောင်အထည်ဖော်ဆောင်ရွက်ရာမှာ ခေတ်မီဖွံဖြိုးတိုးတက်လာတဲ့ နည်းပညာရပ်များ ကိုအသုံးပြုပြီးပြည်တွင်း/ပြည်ပခရီးသွားဧည့်သည်များ ပိုမိုတိုးတက်ဝင်ရောက်လာရေး၊ ဝန်ဆောင်မှု ကောင်းများပေးနိုင်ရေး၊ခရီးသွားများသွားလာလည်ပတ်ရာမှာ အဆင်ပြေချောမွေ့စေရေးတို့အတွက် ရည်ရွယ်ကာMyanmar Tourism Call Center စတင်လိုက်ကြောင်းဟိုတယ်နှင့်ခရီးသွားလာရေးဝန်ကြီးဌာနမှ သိရပါတယ်။

#Local_News
Published 13 March 2026
#Myanmar_Tourism_Call_Center
#YMG/SW #Yangon_Times

တစ်ပိသာကို ကျပ် ၆၀၀၀ခန့်အထိကျဆင်းခဲ့တဲ့ရန်ကုန်အထိုင်ဈေး စားအုန်းဆီအခြေခံလက်ကား ရည်ညွှန်းဈေးနှုန်းတွေဟာ ဖေဖော်ဝါရီလကုန်ပိုင်းကစတင် မြင့်တက်လာခဲ့ပြီး ယခုတစ်ပတ်အတွက် ထုတ်ပြန်တဲ့ဈေးနှုန်းဟာတစ်ပိဿာကို ကျပ် ၆၅၇၅ အထိရောက်ရှိလာခဲ့ပါတယ်။

#Local_News
Published 13 March 2026
#စားအုန်းဆီ #
#YMG/SW #Yangon_Times

ဒေသအများစုမှာ အချိန်အခါမဟုတ်မိုးရွာသွန်းနိုင်ပြီး ကချင်ပြည်နယ်နဲ့ စစ်ကိုင်းတိုင်းတိုမှာ မိုးလေကြီးနိုင်တယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနရဲ့ ဒီကနေ့မနက်ထုတ်ပြန်ချက်အရသိရပါတယ်။

#Local_News
Published 13 March 2026
#ကချင်_စစ်ကိုင်း #မိုးရွာသွန်း
#YMG/NN #Yangon_Times

စက်သုံးဆီအမျိုးအစားအလိုက် တစ်လီတာကို ကျပ် ၃၀၀ ကနေ ၆၀၀ကျပ် ကျော်အတွင်း မြင့်တက်လာတယ်လို့ စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီရဲ့ အခုတစ်ပတ်အတွက်ထုတ်
ပြန်တဲ့ စာရင်းတွေအရ သိရပါတယ်။

#Local_News
Published 13 March 2026
#စက်သုံးဆီ
#YMG/NN #Yangon_Times

#Daily_News
Published 13 March 2026

၁။‌ ‎ပြည်တွင်း/ပြည်ပခရီးသွားဧည့်သည်များ ပိုမိုတိုးတက်ဝင်ရောက်လာရေးMyanmar Tourism Call Center စတင်

‌‎၂။ ‌‌‌‌‌‌‌‌‌‌‌ရန်ကုန်အထိုင်ဈေး စားအုန်းဆီအခြေခံလက်ကား ရည်ညွှန်းဈေးနှုန်းမြင့်တက်

‎၃။‌‌‎ ‌‌‌‌‌‌‌‌‌‎ဒေသအများစု၌အချိန်အခါမဟုတ် မိုးရွာသွန်းနိုင်ပြီး ကချင်နှင့်စစ်ကိုင်း၌ မိုးလေကြီးနိုင်

‎၄။‎ ‌‌‌‌‌‌‌‌‌လွန်ခဲ့သောနှစ်သန်းပေါင်း(၄၀၀)ကျော်က အရေးပါသောငါးရုပ်ကြွင်းနှစ်ခုတရုတ်၌တွေ့ရှိ... အစရှိတဲ့ သတင်းတွေကိုတင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#Local_News
Published 13 March 2026

■ သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန အသေးစားစက်မှုလက်မှုလုပ်ငန်းဦးစီးဌာန၏ မဲခေါင်-လန်ချန်း ပူးပေါင်းဆောင်ရွက်မှုဆိုင်ရာ အထူးရန်ပုံငွေ (၂၀၂၄) ဖြင့် ဆောင်ရွက်သည့် “ဒေသတွင်း ဒီဂျစ်တယ်နည်းပညာနှီးနှောဖလှယ်ပွဲ” ဖွင့်ပွဲအခမ်းအနားကို ယမာန်နေ့ မနက်ပိုင်းက နေပြည်တော်ရှိ M-Gallery ဟိုတယ်၌ ကျင်းပခဲ့ကြောင်းသိရသည်။

■ ထိုသို့ကျင်းပရာ ပြည်ထောင်စုဝန်ကြီး ဦးလှမိုး၊ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်များ၊ မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံရုံးမှ တာဝန်ရှိသူများ၊ ဖိတ်ကြားထားသော ဧည့်သည်တော်များ၊ ဒစ်ဂျစ်တယ်နည်းပညာဆိုင်ရာပညာရှင်များနှင့် တာဝန်ရှိသူများတက်ရောက်သည်။

■ ပြည်ထောင်စုဝန်ကြီး ဦးလှမိုးက ယနေ့ကမ္ဘာကြီးတွင် ဒစ်ဂျစ်တယ်နည်းပညာသည် နိုင်ငံဖွံ့ဖြိုးတိုးတက်ရေးအတွက် အရေးပါသည့် အခန်းကဏ္ဍက ပါဝင်နေသည်ကို တွေ့ရှိရပါကြောင်း၊ အဓိက အားဖြင့် နိုင်ငံတော်၏ လူမှုစီးပွားဘဝဖွံ့ဖြိုးတိုးတက်ရေးနှင့် အစိုးရဌာနများ၏ ဝန်ဆောင်မှုလုပ်ငန်းများ ပိုမိုအောင်မြင်အောင်ဆောင်ရွက်ရာတွင် ဒစ်ဂျစ်တယ်နည်းပညာက မရှိမဖြစ်လိုအပ်ပါကြောင်း၊ အသေးစားစက်မှုလက်မှုလုပ်ငန်းဦးစီးဌာနက မဲခေါင်-လန်ချန်း ပူးပေါင်းဆောင်ရွက်မှုဆိုင်ရာ အထူးရန်ပုံငွေ (၂၀၂၄) ဖြင့် မြန်မာနိုင်ငံရှိ စိုက်ပျိုးရေးအခြေခံ စက်မှုလုပ်ငန်းများ ရှင်သန်ကြီးထွားလာစေရန်နှင့် အရည်အသွေးမြင့်ထုတ်ကုန်များ ထုတ်လုပ်လာနိုင် စေရန်အတွက် “စိုက်ပျိုးရေးအခြေခံ အသေးစားကုန်ထုတ်လုပ်ငန်းများ မြှင့်တင်ပေးခြင်းစီမံကိန်း”၊ “MSMEs လုပ်ငန်းများမြှင့်တင်ရေးနှင့် ဒစ်ဂျစ်တယ်စီးပွားရေး စဉ်ဆက်မပြတ် ဖွံ့ဖြိုးတိုးတက်ရေးအတွက် အသေးစားနှင့် အငယ်စားစက်မှုလုပ်ငန်းများ၏ ဒစ်ဂျစ်တယ်နည်းပညာကျွမ်းကျင်မှုမြှင့်တင်ခြင်းစီမံကိန်း” တို့ကို စီမံကိန်းကာလနှစ်နှစ်ဖြင့် အကောင်အထည်ဖော် ဆောင်ရွက်လျက်ရှိပါကြောင်း၊ ယနေ့ကျင်းပပြုလုပ်သည့် “ဒေသတွင်း ဒစ်ဂျစ်တယ်နည်းပညာနှီးနှောဖလှယ်ပွဲ” သည် အသေးစားနှင့် အငယ်စားစက်မှုလုပ်ငန်းများကို ဒစ်ဂျစ်တယ်နည်းပညာကျွမ်းကျင်မှု မြှင့်တင်ခြင်းစီမံကိန်းအရ ဆောင်ရွက်ခြင်းဖြစ်ပါကြောင်း၊ အဆိုပါစီမံကိန်း၏ အဓိကလုပ်ငန်းစဉ်များတွင် အသေးစားစက်မှုလုပ်ငန်းများ လွယ်ကူလျင်မြန်စွာ လုပ်ငန်းမှတ်ပုံတင်နိုင်ရန်အတွက် အွန်လိုင်းမှတ်ပုံတင်ပလက်ဖောင်းတစ်ခုတည်ထောင်ခြင်းနှင့် အသေးစားစက်မှု ထုတ်ကုန်များအတွက် ဒစ်ဂျစ်တယ်စျေးကွက် (e-commerce) ပလက်ဖောင်းအား အဆင့်မြှင့်တင်ဆောင်ရွက်ခြင်းလုပ်ငန်းများပါဝင်ပါကြောင်း၊ ဒစ်ဂျစ်တယ်နည်းပညာသည် စီးပွားရေးလုပ်ငန်းများ အောင်မြင်ရေးအတွက်လိုအပ်သည့် ပညာရပ်တစ်ခုဖြစ်ပြီး မြန်မာ့ဒစ်ဂျစ်တယ်စီးပွားရေး ဖွံ့ဖြိုးတိုးတက်ရန်အတွက် ဆက်စပ်ဝန်ကြီးဌာနများ၊ အဖွဲ့အစည်း များက သက်ဆိုင်ရာကဏ္ဍအလိုက် ပူးပေါင်းဆောင်ရွက်ပေးကြရန် တိုက်တွန်းပြောကြားလိုပါကြောင်း၊ အလားတူ ဌာနဆိုင်ရာဝန်ထမ်းများနှင့်အသေးစားကုန်ထုတ်လုပ်ငန်းရှင်များကလည်း ဒစ်ဂျစ်တယ်နည်းပညာအသုံးပြုပြီး လုပ်ငန်းများပိုမိုဖွံ့ဖြိုးတိုးတက်အောင် ဆောင်ရွက်သွားကြရန်နှင့် ယခု နည်းပညာနှီးနှောဖလှယ်ပွဲမှရရှိလာသော အသိပညာဗဟုသုတများကို လက်တွေ့လုပ်ငန်းခွင်နယ်ပယ်၌ ပြန်လည်အသုံးပြုသွားကြရန် လိုအပ်ပါကြောင်း၊ မိမိတို့ဝန်ကြီးဌာနအနေဖြင့်လည်း လိုအပ်သည်များကိုစဉ်ဆက်မပြတ်ပံ့ပိုးကူညီဆောင်ရွက်ပေးသွားမည်ဖြစ်ကြောင်း ပြောကြားသည်။

■ ထို့နောက် မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံရုံးနှင့် နိုင်ငံခြားရေးဝန်ကြီးဌာနတို့မှ တာဝန်ရှိသူများက အမှာစကားပြောကြားကြပြီး မဲခေါင်-လန်ချန်းပူးပေါင်းဆောင်ရွက်မှုဆိုင်ရာ အထူးရန်ပုံငွေ (၂၀၂၄) ဖြင့် စီမံကိန်းအကောင်အထည်ဖော်ဆောင်ရွက်မှု Video Clip ကို ကြည့်ရှုအားပေးကြသည်။

■ အခမ်းအနားအစီအစဉ် ဒုတိယပိုင်းအနေဖြင့် ကုန်သွယ်ရေးဦးစီးဌာန၊ မြန်မာနိုင်ငံကွန်ပျူတာအသင်းချုပ်၊ UMFCCI မှ တာဝန်ရှိသူများနှင့် တရုတ်နိုင်ငံမှပညာရှင်များက MSME လုပ်ငန်းများ ဒစ်ဂျစ်တယ်အသွင်ကူးပြောင်းရေးအတွက် အဓိကဆောင်ရွက်နေမှုများ၊ အခွင့်အလမ်းများ၊ စိန်ခေါ်မှု များနှင့် ဒစ်ဂျစ်တယ်စီးပွားရေးကဏ္ဍတွင် လက်တွေ့အောင်မြင်နေသည့် လုပ်ငန်းများအကြောင်းကို မျှဝေဆွေးနွေးခဲ့ကြကြောင်း သိရသည်။

#YMG/NN #Yangon_Times

#World_Health
Published 13 March 2026

■ ရောဂါဖြစ်စေနိုင်တဲ့ ဘက်တီးရီးယားတွေ၊ ဓာတ်မတည့်အမှုန်တွေ၊ ဗိုင်းရပ်စ်တွေအမျိုးမျိုးကို ဘက်စုံကာကွယ်ပေးနိုင်မယ့် ကာကွယ်ဆေးတစ်မျိုးကို ကြွက်တွေမှာ စမ်းသပ်ခဲ့ကြပါတယ်။

■ အဆိုပါ နှာခေါင်းဖျန်းကာကွယ်ဆေးဟာ ကာကွယ်ဆေးအများစုထက် အလုပ်လုပ်ပုံ ကွဲပြားပါတယ်။

■ သာမန်ကာကွယ်ဆေးတွေဆိုရင် ကိုယ်ခံအားစနစ်က ရောဂါပိုးကို မှတ်မိစေကာ တိုက်ထုတ်တဲ့ပုံစံဖြစ်ပေမယ့် ကာကွယ်မှုလမ်းကြောင်း အလွန်ကျဉ်းမြောင်းသလို ရောဂါပိုးတွေကလည်း အချိန်ကြာလာရင် ဗီဇပြောင်းလဲလာနိုင်ပါတယ်။

■ ယခုနှာခေါင်းဖျန်းကာကွယ်ဆေးကတော့ ကိုယ်ခံအားစနစ် အလိုက်သင့် ပြောင်းလဲစေတဲ့အပြင် ပထမဆုံး ကာကွယ်မှုဖြစ်တဲ့ မျိုးဗီဇလမ်းကြောင်းစနစ်ကိုလည်း မြှင့်တင်ပေးပါတယ်။

■ ဒါဟာ မွေးရာပါကိုယ်ခံအားစနစ်က ရောဂါပိုးမွှား အမျိုးမျိုးကို ကာကွယ်နိုင်တာဖြစ်တယ်လို့ စတန်းဖို့ဒ်ဆေးတက္ကသိုလ်မှ အဏုဇီဝသက်ရှိဗေဒ ပရော်ဖက်ဆာ ဘာလီပူလင်ဒရန်က ပြောပါတယ်။

■ ဓာတ်ခွဲခန်းထဲက ကြွက်တွေကို ၃ ပတ်အတွင်း ထိုကာကွယ်ဆေးတွေ ပေးခဲ့ပြီးနောက် ကိုဗစ်ရောဂါပိုး၊ စတက်ဖလိုကော့ကပ်စ်အော်ရီယပ်စ်၊ အေစီနိုဘက်တာဘော်မန်နိုင် ဘက်တီးရီးယားတို့ဖြင့် ထိတွေ့စေခဲ့ရာ မွေးရာပါမူကိုယ်ခံအား တုံ့ပြန်မှုဖြင့် ကာကွယ်နိုင်ခဲ့တဲ့အပြင် အလိုက်သင့်တုံ့ပြန်တဲ့ ကိုယ်ခံအားစနစ်လည်း အလျင်အမြန် အလုပ်လုပ်ခဲ့ပါတယ်။

■ ကာကွယ်ဆေးစမ်းသပ်မှုတွေကို ဓာတ်ခွဲခန်းကြွက်တွေမှာသာ ပြုလုပ်ခဲ့တာဖြစ်ပြီး လူသားတွေမှာ သုတေသနလုပ်ဖို့အတွက်တော့ နောက်ထပ်လေ့လာရဦးမှာ ဖြစ်တယ်လို့ ပူလင်ဒရန်က ပြောပါတယ်။

■ ဒီကာကွယ်ဆေးက ရာသီအလိုက် ကာကွယ်ဆေးထိုးခြင်းတွေကို ပြောင်းလဲစေနိုင်ပြီး လူသားတွေမှာ ထိရောက်တယ်လို့ သက်သေပြနိုင်ပါက ရောဂါတွေ ကာကွယ်ရာမှာ အဆင်သင့်ရှိနေစေမှာ ဖြစ်တယ်လို့ သုတေသီတွေ ယူဆထားပါတယ်။

Source: LiveScience

#World_Health
Published 13 March 2026

■ ပါးစပ်ထဲမှာရှိတဲ့ တံတွေးမှာ ခန္ဓာကိုယ်အကြောင်းနဲ့ ပတ်သက်တဲ့ အဏုဇီဝပိုးမွှားအကြောင်းတွေ ပါဝင်သလို သွေးနမူနာထက်လည်း ရယူဖို့ လွယ်ကူပါတယ်။

■ တံတွေးစက်အနည်းငယ်ဖြင့် HIV နဲ့ ကိုဗစ်-၁၉ တို့လို ရောဂါတွေကို ရှာဖွေနိုင်မှာ ဖြစ်သလို ရင်သားကင်ဆာ ဖြစ်နိုင်ခြေတွေကိုလည်း အကဲဖြတ်နိုင်မှာ ဖြစ်ပါတယ်။

■ လာမယ့်နှစ်များအတွင်း ဒီစစ်ဆေးနည်းတွေဖြင့် ဆီးချို၊ ဆီးကျိတ်ကင်ဆာတို့လို အခြားရောဂါတွေလည်း ရှာဖွေနိုင်ဖွယ် ရှိပါတယ်။

■ ခံတွင်းစောင့်ရှောက်ရေးနည်းလမ်းထဲမှာ တံတွေးစစ်ဆေးချက် ပုံမှန်ထည့်သွင်းပါက ရောဂါတွေကို စောစီးစွာ သိရှိနိုင်ပြီး အသက်တွေနဲ့ ငွေကြေးကုန်ကျ သက်သာစေနိုင်မှာ ဖြစ်တယ်လို့ ဆေခရာမင်တိုမှ သွားဆရာဝန် ဝေါလေ့စ်ဘယ်လာမီက ပြောပါတယ်။

■ လက်ရှိ တံတွေးစစ်ဆေးနည်းတွေက HIV နဲ့ ကိုဗစ်-၁၉ တို့ကို ရှာဖွေနိုင်ပေမယ့် FDA အသိအမှတ်ပြုထားခြင်း မရှိသလို အာမခံထောက်ပံ့ပေးဖို့ လိုအပ်ပါတယ်။

■ ကုမ္ပဏီတွေအနေနဲ့ တံတွေးအခြေပြု ကင်ဆာအမျိုးမျိုး ရှာဖွေစစ်ဆေးနည်းများအတွက် FDA အသိအမှတ်ပြု ရရှိဖို့ ကြိုးပမ်းလာနိုင်ပါတယ်။

■ တံတွေးမှာပါဝင်တဲ့ အမျိုးမျိုးပြောင်းလဲမှုတွေကြောင့် စမ်းသပ်မှုပြုလုပ်ရန် ခက်ခဲနိုင်ပေမယ့် သုတေသီတွေက ရောဂါရှာဖွေရေးအတွက် စိတ်ချရတဲ့ ရောဂါအမှတ်အသားတွေ တွေ့ရှိနိုင်အောင် ကြိုးစားနေပါတယ်။

■ တံတွေးစစ်ဆေးနည်းတွေကို ဖြည့်စွက်စမ်းသပ်ဖို့အတွက်သာ အသုံးပြုသင့်ပြီး မူရင်းဆေးစစ်မှုတွေ၊ ခံတွင်းစစ်ဆေးမှုတွေနေရာမှာတော့ အစားမထိုးသင့်ပါဘူး။

Source: NPR.