Published 12 December 2023

ဒေါ်နယ်ထရမ့်ဟာ ၂၀၂၄ ရီပတ်ဘလစ်ကင် သမ္မတလောင်း အမည်စာရင်းယှဥ်ပြိုင်မှုမှာ ဆက်လက်ဦးဆောင်နေဆဲဖြစ်ပြီး ပါတီမဲဆန္ဒရှင်တဝက်ကျော်ရဲ့ ထောက်ခံမှုကို ရရှိထားကြောင်း တနင်္လာနေ့မှာ ပြီးစီးခဲ့တဲ့ Reuters/Ipsos ရဲ့ သဘောထားစစ်တမ်းအရ သိရှိရပါတယ်။

စစ်တမ်းများအရ ရီပတ်ဘလစ်ကင် ၆၁ ရာခိုင်နှုန်းဟာ ဒီမိုကရက်တစ်သမ္မတ ဂျိုးဘိုင်ဒင်ကို ယှဥ်ပြိုင်ရန်အတွက် ပြည်နယ်အလိုက် အမည်စာရင်းယှဥ်ပြိုင်မှုတွေမှာ သမ္မတဟောင်းကို မဲပေးသွားကြမယ်လို့ ကောက်ယူရရှိထားပါတယ်။

ထရမ့်ရဲ့မဲရာခိုင်နှုန်းရရှိမှုကို အနီးစပ်ဆုံး ယှဥ်ပြိုင်နိုင်သူ ရှိမနေဘဲ ဖလော်ရီဒါ အုပ်ချုပ်ရေးမှူး ရွန်ဒီဆန်းတစ်နဲ့ ကယ်လီဖိုးနီးယား တောင်ပိုင်းအုပ်ချုပ်ရေးမှူးဟောင်း နစ်ကီဟာလေတို့ကတော့ ရီပတ်ဘလစ်ကင် ၁၁ ရာခိုင်နှုန်းစီရဲ့ ထောက်ခံမှု ရရှိထားပါတယ်။

စွန့်ဦးတီထွင်သူ ရာမတ်စ်ရာဝီက ၅ ရာခိုင်နှုန်း၊ နယူးဂျာစီ အုပ်ချုပ်ရေးမှူးဟောင်း ခရစ္စခရစ္စတီက ၂ ရာခိုင်နှုန်းရှိနေပြီး ၈ ရာခိုင်နှုန်းက မဆုံးဖြတ်ရသေးပါဘူး။

၂၀၂၄ အမေရိကန်ရွေးကောက်ပွဲရဲ့ ပထမဆုံးမဲပေးမှုများကို ဇန်နဝါရီ ၁၅ ရက်နေ့ အိုင်အိုဝါပြည်နယ် ရီပတ်ဘလစ်ကင်အစည်းအဝေးမှာ ကြေညာသွားမှာ ဖြစ်ပါတယ်။

စစ်တမ်းများအရ ရီပတ်ဘလစ်ကင် မဲဆန္ဒရှင်များက ထရမ့်ရင်ဆိုင်နေရတဲ့ တိုင်းနဲ့ပြည်နယ် ရာဇဝတ်မှုများကြောင့် စိတ်ပြောင်းလဲယိမ်းယိုင်မှု သိပ်ပြီးမရှိဘူးလို့ တွေ့ရှိရပါတယ်။

စစ်တမ်းဖြေကြားသူ ရီပတ်ဘလစ်ကင် တွေထဲက ၄ ပုံ ၁ ပုံကတော့ ထရမ့်က ရွေးကောက်ပွဲလိမ်လည် စွပ်စွဲတာတွေ၊ ၂၀၂၁ ဇန်နဝါရီ ၆ ရက်နေ့ အမေရိကန် လွှတ်တော်အဆောက်အအုံကို တိုက်ခိုက်ရန် လူအုပ်ကြီးကို လှုံ့ဆော်ခဲ့တာတွေ စတဲ့ တရားစွဲချက်တွေကို ယုံကြည်ကြောင်း ဖြေကြားခဲ့ပါတယ်။

ထရမ့်ကိုဆန့်ကျင်တဲ့ ရီပတ်ဘလစ်ကင် လူနည်းစုက သူ့ရဲ့ပြိုင်ဘက် ဟာလေကို ထောက်ခံလာကြပြီး သူ့ရဲ့မဲဆန္ဒရပ်တည်ချက်က စတုတ္ထနေရာမှာ ၄ ရာခိုင်နှုန်းဖြင့် ရပ်တည်နေပါတယ်။

ဒီဇင်ဘာ ၅ ရက်နေ့မှ ၁၁ ရက်နေ့အတွင်း ရီပတ်ဘလစ်ကင် ၁,၆၈၉ ဦးကို အွန်လိုင်းကနေ စစ်တမ်းကောက်ယူမှု လုပ်ခဲ့တာဖြစ်ပြီး ရာခိုင်နှုန်း ၃ ခုလောက် အလျော့အတင်း ရှိနိုင်ပါတယ်။
Source: Reuters
#World_News
#Published 12 December 2023
#Yangon_Times #Daily_News #YMG_News #Yangon_Media_Group

#World_Health
Published 12 December 2023

ဘရစ္စတိုလ်တက္ကသိုလ်မှ နောက်ဆုံးသုတေသနတစ်ခုမှာ HIV ဆေးတစ်မျိုးက SARS-CoV-2 မျိုးဗီဇကွဲများ အပါအဝင် ကိုရိုနာဗိုင်းရပ်စ် ရောဂါအတော်များများကို တားဆီးနိုင်တယ်လို့ ဆိုလိုက်ပါတယ်။

ရောဂါပိုးကူးစက်ထားတဲ့ ဆဲလ်တွေဆီကို သင့်တင့်မှန်ကန်တဲ့ ပမာဏပေးနိုင်ပါက တားဆီးနိုင်ဖွယ်ရှိတယ်လို့ ဖော်ပြထားပါတယ်။

ထိုဆေးဟာ လက်ရှိနဲ့ အနာဂတ် ကိုရိုနာဗိုင်းရပ်စ် ကပ်ရောဂါတွေကို တိုက်ဖျက်ရာမှာ ရှိပြီးသားဆေးဝါးတွေအတွက် အထောက်အကူ ဖြစ်စေနိုင်မယ်လို့ ဒီဇင်ဘာ ၅ ရက်နေ့က ဖော်ပြခဲ့ပါတယ်။

Cobicistat ဆေးဟာ SARS-CoV-2 မျိုးဗီဇကွဲတစ်မျိုးကို တိုက်ထုတ်နိုင်စွမ်းရှိတယ်လို့ ယခင်က တွေ့ရှိထားပါတယ်။

ဒီဆေးဟာ ပုံမှန်အားဖြင့် HIV ကုသဆေးတွေရဲ့ အာနိသင်ကို မြှင့်တင်ပေးတာ ဖြစ်ပါတယ်။

Cobicistat ရဲ့သက်ရောက်မှုတွေကို ပက်ဇ်လိုဗစ်ဆေးထဲက ပါဝင်ပစ္စည်းတစ်မျိုးနဲ့ တည်ဆောက်ပုံ ဆင်တူတဲ့ ritonavir နဲ့ နှိုင်းယှဥ်ခဲ့ကြပါတယ်။

ပက်ဇ်လိုဗစ်ဆေးဟာ လက်ရှိမှာ SARS-CoV-2 ကိုကုသဖို့အတွက် အကောင်းဆုံးဆေးဝါးအဖြစ် သတ်မှတ်ထားပါတယ်။

Cobicistat ရော ritonavir ဟာ ခံနိုင်ရည်ရှိတဲ့ ဆေးပမာဏဖြင့် ကိုရိုနာဗိုင်းရပ်စ်တွေကို ဆန့်ကျင်နိုင်ပြီး လက်ရှိမှာ HIV ကုသဆေးအတွက် လိုအပ်တဲ့ပမာဏထက်တော့ များပြားနေပါတယ်။

စမ်းသပ်ချက်များအရ cobicistat ဟာ လက်တွေ့အသုံးပြုချက်ထက် ပိုမိုမြင့်မားတဲ့ ပမာဏဖြင့် ဗိုင်းရပ်စ်ကိုဆန့်ကျင်နိုင်ကာ လက်ရှိနည်းလမ်းများထက် ပိုမိုထိရောက်တဲ့ နည်းလမ်း ဖြစ်လာနိုင်တယ်လို့ ဆဲလ်နှင့်မော်လီကျူးဆေးတက္ကသိုလ်မှ ဒေါက်တာ လာ့လူကာရှီတက်ဂျ်က ပြောပြသွားပါတယ်။

တိရိစ္ဆာန်နဲ့ လက်တွေ့စမ်းသပ်မှုတွေမှာ အတည်ပြုနိုင်မယ်ဆိုရင် လက်ရှိနဲ့ အနာဂတ်ရဲ့ ကိုရိုနာဗိုင်းရပ်စ်ပျံ့ပွားမှုတွေကို ဆေးတွေရဲ့ တိုက်ဖျက်နိုင်စွမ်းနဲ့ အများပြည်သူကျန်းမာရေး ထိခိုက်မှုကို လျှော့ချရာမှာ အရှိန်မြှင့်တင်နိုင်မှာဖြစ်တယ်လို့ ရှီတက်ဂျ်က ပြောပြသွားပါတယ်။

#World_Health #HIV ကုသဆေးတစ်မျိုး #ကိုရိုနာဗိုင်းရပ်စ် #Source: WION

#World_Health
Published 12 December 2023

ညဘက်မှာ အိပ်ရေးမဝတာမျိုး လုံးဝမအိပ်ရတာမျိုး ကြုံခဲ့ရင် နောက်နေ့မှာ အရေးကြီးတဲ့ ဆုံးဖြတ်ချက်တွေ မချမှတ်သင့်ဘူးလို့ ကနေဒါသုတေသနက ဆိုလိုက်ပါတယ်။

စစ်ဘက်ဆိုင်ရာနဲ့ နိုင်ငံရေးခေါင်းဆောင်များ၊ ကပ်ဘေးအန္တရာယ်အတွင်း ဦးဆုံးလှုပ်ရှားဆောင်ရွက်သူများဟာ ဖိစီးမှုအလွန်များတဲ့ သူတွေဖြစ်ပြီး ညဘက်မအိပ်ရတဲ့အခါ နောက်တစ်နေ့မှာ အရေးကြီးတဲ့ ဆုံးဖြတ်ချက်တွေ ချမှတ်ခြင်းကို ရှောင်ရှားသင့်ပါတယ်။

လူသားတွေရဲ့ ကျန်းမာရေး၊ ဦးနှောက်သိရှိမှုစွမ်းရည်၊ စိတ်ခံစားချက် ထိန်းချုပ်မှုတွေမှာ အိပ်စက်ခြင်းရဲ့ အရေးပါပုံကို သိရှိနားလည်ထားပါတယ်လို့ အော့တာဝါတက္ကသိုလ်မှ အာရုံကြောသိပ္ပံ အချက်အလက် သိပ္ပံပညာရှင် ကျိုးဖန်က ပြောပြသွားပါတယ်။

အိပ်ရေးပျက်ခြင်းကြောင့် အမျိုးမျိုးသော ခန္ဓာကိုယ်ဖြစ်စဥ်တွေမှာ စွမ်းဆောင်ရည် ကျဆင်းလာတာကို တွေ့ရှိထားသလို အများပြည်သူ ကျန်းမာရေးကို ဆက်လက်ခြိမ်းခြောက်နေပြီး အသက်အရွယ်မရွေး ထိခိုက်စေနိုင်ပါတယ်။

၂၄ နာရီအချိန်အတွင်း အိပ်ရေးပျက်ခြင်းဟာ ရွေးချယ်လိုက်တဲ့ ရလဒ်တွေမှာ အာရုံကြောတုန့်ပြန်ခြင်းကို ထိခိုက်စေပြီး ဆုံးဖြတ်ချက်ချတဲ့ ဖြစ်စဥ်တွေကို သိသိသာသာ ထိခိုက်စေတယ်လို့ သုတေသီများ တွေ့ရှိခဲ့ပါတယ်။

တစ်ညအတွင်း ၇ နာရီလောက်မျှ မအိပ်ရဘူးဆိုရင် လူတွေရဲ့ ဦးနှောက်အသိဉာဏ် စွမ်းရည်၊ အာရုံစူးစိုက်မှု၊ စွမ်းဆောင်ရည်တွေ ကျဆင်းသွားသလို စိတ်ခံစားချက်ကိုလည်း ထိခိုက်စေပါတယ်။

ကျန်းမာသန်စွမ်းတဲ့လူ ၅၆ ဦးမှာ တစ်ညတာ အိပ်ရေးပျက်ခြင်းကို စမ်းသပ်ရာမှာ အမျိုးမျိုးသော ထွက်ပေါ်ချက်တွေကို ဦးနှောက်က တုန့်ပြန်ရာမှာ သိသိသာသာ ကျဆင်းသွားပြီး တစ်ညတာ အိပ်ရေးပျက်ခြင်းကြောင့် စွန့်စားဆုံးဖြတ်ချက်တွေမှာ အာရုံကြောတုန့်ပြန်မှုတွေကို ထိခိုက်စေပါတယ်။

အာရုံကြောတုန့်ပြန်မှုနဲ့ စွန့်စားမှုလုပ်ရတဲ့ အနေအထားကြား ဆက်စပ်မှုကို ဆိုးရွားစွာ ထိခိုက်စေပါတယ်။

ဒီလေ့လာချက်ရလဒ်တွေက လုံလောက်စွာ အိပ်စက်ရဖို့ ဘယ်လောက်အရေးကြီးကြောင်း၊ အိပ်ရေးပျက်တာမျိုး ကြုံတွေ့ရတဲ့အခါ အရေးကြီးဆုံးဖြတ်ချက်များ မပြုလုပ်ရန် လိုအပ်ကြောင်း ထောက်ပြနေတယ်လို့ ပန်ဆယ်လ်ဗေးနီးယားတက္ကသိုလ်မှ တီယန်ရှင်မောက်က ဖော်ပြခဲ့ပါတယ်။

#World_Health #ညအိပ်ချိန်(၇)နာရီလုံလောက်စွာအိပ်စက်ရ #အရေးကြီးဆုံးဖြတ်ချက် #Source: The Jerusalem Post

ဂျပန်နိုင်ငံမှာ ယခုနှစ် ရာသီဥတုပုံမှန် မဟုတ်တာကြောင့် ပုံမှန်ဆောင်းရာသီထက် ပူနွေးတဲ့ အခြေအနေ ကြုံတွေ့နေရပါတယ်။
#Asia_Climate
Published 11 December 2023
#ဆောင်းရာသီအပူချိန် #ဂျပန်တွင်ကြုံတွေ့နေရ
#Yangon_Times #YMG_News #Yangon_Media_Group

#Daily_News
Published 11 December 2023

၁။ စားအုန်းဆီဈေးပြန်ကျလာပြီး ကျပ် ၅၀၀၀ အောက်ရောက်ရှိကာ ကျပ် ၄၈၁၅ ကျပ်ဖြစ်သွား၊ ပေပါ(၉)ထောင်နီးပါးရောင်းချပေးထားဟုဆို

၂။ တညင်းကုန်းဈေးရှိ ဈေးရုံ (၅) အတွက် ဆိုင်ခန်းလျှောက်ထားသူများနေကာ  လက်ကားရောင်းချသူများကို အဓိကထားနေရာချပေးရန်စီစဉ်နေဟုဆို

၃။ ဒီဇင်ဘာလအတွက် ဆန်အမျိုးအစားအလိုက်ရောင်းရမည့် ဆန်ဈေးနှုန်းများသတ်မှတ်၊ ဧည့်မထတစ်အိတ်အမြင့်ဆုံး၆သောင်း၈ထောင်ဖြင့်သာ ရောင်းမည်

၄။ ပုံမှန်ထက်ပူနွေးသော ဆောင်းရာသီအပူချိန် ဂျပန်တွင်ကြုံတွေ့နေရ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

#World_News
Published 11 December 2023

အစ္စရေးလ်တို့က ဂါဇာကမ်းမြောင်တောင်ပိုင်း အဓိကမြို့ဖြစ်တဲ့ ခန်းယူနစ်မြို့ဆီ ချီတက်တိုက်ခိုက်လျက်ရှိရာ အစ္စရေးလ်တင့်ကားများက တနင်္ဂနွေနေ့မှာ မြို့ရဲ့ဗဟိုအချက်အခြာသို့ ရောက်ရှိလာကြောင်း ဂါဇာကျန်းမာရေး ဝန်ကြီးဌာနက ပြောကြားလိုက်ပါတယ်။

ဟားမတ်စ် တိုက်ခိုက်ရေးသမား ဒါဇင်ခန့် အညံ့ခံခဲ့ကာ နောက်ထပ်များစွာကိုလည်း အညံ့ခံရန် တိုက်တွန်းထားကြောင်း အစ္စရေးလ်ခေါင်းဆောင်တို့က ပြောခဲ့ပေမယ့် ပါလက်စ်တိုင်း စစ်သွေးကြွအဖွဲ့ကတော့ ဒါတွေဟာ အခြေအမြစ်မရှိတဲ့ သတင်းမှားတွေသာ ဖြစ်တယ်လို့ ဆိုပါတယ်။

တစ်ညလုံး တိုက်ပွဲပြင်းထန်စွာ ဖြစ်ပွားပြီးနောက် တင့်ကားတွေဟာ တောင်-မြောက် အဓိကလမ်းမကြီးကို ရောက်ရှိလာကြောင်း၊ တိုက်ခိုက်မှုနေရာရဲ့ အနောက်ပိုင်းမှာ တိုက်လေယာဥ်တွေ ပစ်ခတ်နေကြကြောင်း ခန်းယူနစ်မြို့မှာ နေထိုင်သူတွေက ပြောပြသွားပါတယ်။

အခြားနေရာတွေကနေ ထွက်ပြေးတိမ်းရှောင်လာတဲ့ လူတွေအများအပြား ရှိနေတဲ့ မြို့ထဲမှာ ပေါက်ကွဲသံတွေ အဆက်မပြတ် ကြားနေရပြီး မီးခိုးလုံးတွေ တလူလူပျံတက်နေပါတယ်။

ဂါဇာမှာ အပစ်အခတ်ရပ်စဲဖို့ကို အောင်မြင်အောင် မတိုက်တွန်းနိုင်ခဲ့တဲ့ ကုလသမဂ္ဂ အထွေထွေအတွင်းရေးမှူး အန်တိုနီယိုဂူတာရက်စ်က မကြာခင်မှာ လူစုခွဲထွက်ပြေးဖို့ အမိန့်ပေးရန်နဲ့ ပိုမိုဆိုးရွားတဲ့ အခြေအနေကြောင့် ကပ်ရောဂါ ဖြစ်ပွားလာမှာတွေ အီဂျစ်သို့ အစုလိုက်အပြုံလိုက် ရွှေ့ပြောင်းဖို့ တွန်းအားတွေ ဖြစ်လာမှာကို စိုးရိမ်ရကြောင်း ပြောကြားလိုက်ပါတယ်။

ဒါဟာ ကြောက်ရွံ့စရာအကောင်းဆုံး ညတစ်ညဖြစ်ကြောင်း၊ ပြန်လည်ခုခံတိုက်ခိုက်မှုက အလွန်ပြင်းထန်ပြီး သေနတ်သံတွေ ပေါက်ကွဲသံတွေကို နာရီအတော်ကြာ ကြားနေရကြောင်း ဂါဇာမြို့မှ ထွက်ပြေးလာပြီး ခန်းယူနစ်မှာ ခိုလှုံနေတဲ့ ကလေး ၄ ယောက်အဖေက ပြောပြသွားပါတယ်။

အောက်တိုဘာ ၇ ရက်နေ့က နယ်စပ်ဖြတ်ကျော်ပြီး အစ္စရေးလ်ကို ဝင်ရောက်တိုက်ခိုက်ကာ လူပေါင်း ၁,၂၀၀ ခန့်သတ်ဖြတ်ခဲ့ပြီး ဓားစာခံ ၂၄၀ ကို ခေါ်ဆောင်သွားခဲ့တဲ့ ဟားမတ်စ်စစ်သွေးကြွတွေကို အစ္စရေးလ်တို့က အမြစ်ပြတ်ချေမှုန်းရန် ဆုံးဖြတ်ထားပါတယ်။

အစ္စရေးလ်တို့ရဲ့ တိုက်ခိုက်မှုကြောင့် ပါလက်စ်တိုင်းဘက်မှ လူပေါင်း ၁၈,၀၀၀ ခန့် သေဆုံးထားပြီး ၅ သောင်းနီးပါး ဒဏ်ရာရရှိခဲ့ကာ ထောင်ပေါင်းများစွာ ပျောက်ဆုံးနေပါတယ်။

ခန်းယူနစ်မြို့ရှိ အဓိကဆေးရုံကြီး နက်ဆာဆေးရုံမှာ သေဆုံးသူတွေ ဒဏ်ရာရသူတွေနဲ့ ပြည့်နှက်နေပါတယ်။

ဂါဇာမြို့ခံအများစုဟာ သူတို့ရဲ့နေအိမ်တွေကနေ စွန့်ခွာထွက်ပြေးနေရပြီး အစ္စရေးလ်တို့က အရပ်သားတွေကို အတတ်နိုင်ဆုံး ကာကွယ်ပေးမယ်လို့ ဆိုထားပေမယ့် ဒီကတိကို မထိန်းသိမ်းနိုင်ဘူးလို့ အနီးစပ်ဆုံးမဟာမိတ် အမေရိကန်ကပင် ဆိုထားပါတယ်။

#World_News #ဂါဇာတောင်ပိုင်း #အစ္စရေးလ်တင့်ကားများ #ခန်းယူနစ်မြို့လယ်သို့ရောက်ရှိ #Source: Reuters