#Local_News
Published _ 29 November 2022

ရန်ကုန်တိုင်း၊ ရွှေပြည်သာမြို့နယ်၊ ၅/၃ ရပ်ကွက်တွင် နိုဝင်ဘာ ၂၉ ရက်(ယနေ့)နံနက်ပိုင်းတွင် ၅ ခန်းတွဲဆိုင်ခန်း၌ (Level 1) အဆင့်မီးလောင်မှုဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့ဌာနချုပ်နှင့် လူမှုဘဝစောင့်ရှောက်ရေး ပရဟိတအသင်းတို့ထံမှ သိရသည်။

ယနေ့ နံနက် ၁၁ နာရီ ၁၆ မိနစ်ခန့်က ရွှေပြည်သာမြို့နယ်၊ ၅/၃ ရပ်ကွက်၊ ဗိုလ်ချုပ်လမ်းနှင့်ငွေလမ်းထောင့်ရှိ ၅ ခန်းတွဲဆိုင်ခန်းတွင် မီးလောင် မှုဖြစ်ပွားခဲ့သဖြင့် ရွှေပြည်သာမြို့နယ်မီးသတ်တပ်ဖွဲ့နှင့် လူမှုကူညီရေးအသင်းများ၊ ရပ်ကွက်နေသူများက ဝိုင်းဝန်းငြှိမ်းသတ်ခဲ့ကြသည်။

မီးလောင်မှုကို (Level 1) အဆင့်သတ်မှတ်၍ ငြှိမ်းသတ်ခဲ့ကြသဖြင့် နံနက် ၁၁ နာရီ ၂၄ မိနစ်တွင် မီးထိန်းနိုင်ခဲ့ပြီး နံနက် ၁၁ နာရီ ၂၈ မိနစ်၌ မီးငြိမ်းသွားခဲ့ကြောင်း မြန်မာနိုင်ငံမီးသတ်တပ်ဖွဲ့ဌာနချုပ်မှ သိရသည်။

"မီးသတ်တွေနဲ့ အတူကျွန်တော်တို့အသင်းက ဝိုင်းငြှိမ်းပေးခဲ့ပါတယ် ဆိုင်ခန်းတွေကတော့ အကုန်လုံးနီးပါးပျက်စီးသွားပါတယ်။ အဲ့ထဲမှာ အလှပြင်ဆိုင်တွေ၊ အဝတ်လျှော်စက်ပြင်တဲ့ဆိုင်တွေ၊ electronics ဆိုင်တွေရှိတယ်လို့ သိရပါတယ်။ မီးလောင်မှုကို အဲ့ထဲကသူတွေပြောတာကတော့ ဝိုင်ယာရှော့ခ်ဖြစ်ပြီးလောင်တယ်လို့တော့ ပြောနေကြပါတယ်။ "ဟု လူမှုဘဝစောင့်ရှောက်ရေးပရဟိတအသင်း၏ ဥက္ကဋ္ဌကိုဇော်ကြီးက YMG ကိုပြောသည်။

ဖြစ်စဉ်တွင် ထိခိုက်ဒဏ်ရာရရှိသူ မရှိခဲ့သော်လည်း မီးငြှိမ်းသတ်ပေးသည့် မီးသတ်တပ်ဖွဲ့ဝင်တစ်ဦးတွင် မီးခိုးမွှန်ပြီးအသက်ရှူကြပ်သွားသဖြင့် လူမှုဘဝစောင့်ရှောက်ရေး ပရဟိတအသင်းက ပြစုကုသပေးခဲ့ကြကြောင်းလည်း သိရှိရသည်။

မီးလောင်မှုဖြစ်ပွားရသည့်အကြောင်းရင်းနှင့် ပျက်စီးဆုံးရှုံးမှုတန်ဖိုးအား မီးသတ်တပ်ဖွဲ့တာဝန်ရှိသူများ စစ်ဆေးလျက်ရှိကြောင်း သိရသည်။

#ymg/NN
#yangon_media _group

#Local_News
Published_ 29 November 2022

ပုဂံရွှေစည်းခုံစေတီတော်ကြီးအတွက် LED ဆလိုက်မီးများနှင့် ရွှေစည်းခုံစေတီရှိ ချူအင်လိုင်းတန်ဆောင်း၌ထားရှိရန် LED Screen Board များကို တရုတ်နိုင်ငံမှလှူဒါန်းခဲ့ကြောင်း သိရသည်၊၊

မန္တလေးမြို့အခြေစိုက် တရုတ်ပြည်သူ့သမ္မတနိုင်ငံ ကောင်စစ်ဝန်ချုပ်ရုံးမှ လှူဒါန်းခဲ့ခြင်းဖြစ်ပြီး 'ရွှေစည်းခုံစေတီတော် အလင်းမီးပူဇော်ခြင်းနှင့် ချူအင်လိုင်း တန်ဆောင်း LED Screen Board တပ်ဆင်ခြင်းဖွင့်ပွဲအခမ်းအနား'ကိုနိုဝင်ဘာလ(၂၈)ရက်ညနေတွင် ကျင်းပခဲ့သည်၊၊

အခမ်းအနား၌ သာသာနာရေးနှင့်ယဉ်ကျေးမှုဝန်ကြီးဌာန၊ ပြည်ထောင်စုဝန်ကြီး ဦးကိုကိုက"မြန်မာနိုင်ငံနှင့် တရုတ်နိုင်ငံတို့၏ ခင်မင်ရင်းနှီးမှုသည် ၁၉၆၁ ခုနှစ်က တရုတ်ဝန်ကြီးချုပ် ချူအင်လိုင်း၏ ရွှေစည်းခုံဘုရားတွင် ယခုတန်ဆောင်းတည်ဆောက်ရန် လှူဒါန်းပြီးနောက်ပိုင်းတွင် ပိုမိုခိုင်မြဲလာပါကြောင်း၊ တရုတ်ပြည်သူ့သမ္မတနိုင်ငံ ဝန်ကြီးချုပ် ချူအင်လိုင်းသည် မြန်မာနိုင်ငံကို ချစ်ကြည်ရေး ခရီးစဉ် (၉)ကြိမ်တိုင်တိုင် လာရောက်ခဲ့သည်ဟုလည်း သိရှိရပြီး ဝန်ကြီးချုပ် ချူအင်လိုင်း၏ မြန်မာနိုင်ငံ ပုဂံယဉ်ကျေးမှု အမွေအနှစ်ဒေသသို့ လာရောက်လည်ပတ်ခြင်း နှစ်ပတ်လည်အခမ်းအနားများကို ဤချူအင်လိုင်း တန်ဆောင်းတွင်ပင် ကျင်းပပြုလုပ်ခဲ့သည်ဟု သိရှိရပါကြောင်း၊ ယခုလို ပရဟိတ လှူဒါန်းမှုများနှင့် အထိမ်းအမှတ်အခမ်းအနား ဆောင်ရွက်ခြင်းသည်ပင် ဝန်ကြီးချုပ် ချူအင်လိုင်း၏ မြန်မာနိုင်ငံအပေါ် ထားရှိသည့်စေတနာကို အသိမှတ်ပြုခြင်းပင် ဖြစ်ပါကြောင်း၊ ချူအင်လိုင်း တန်ဆောင်းတွင် ဘုရားဖူးဧည့်သည်များ နားခိုနေနိုင်ခြင်းအပြင် ရွှေစည်းခုံစေတီတော်ကြီး၏ သမိုင်းကြောင်းအချက်အလက်များ၊ စေတီပုထိုးများ၊ မြန်မာမှုအနုလက်ရာများ၊ ပုဂံယဉ်ကျေးမှုအမွေ အနှစ်ဒေသ၏ ရှုခင်း အလှအပများကို ကြည့်ရှုနိုင်စေရန်အတွက် LED Board နှင့် ဆက်စပ်ပစ္စည်းများ တပ်ဆင်လှူဒါန်းခြင်း၊ LED မီးဆလိုက်များ တပ်ဆင်လှူဒါန်းခြင်းတို့နှင့် မြန်မာတို့၏ ယဉ်ကျေးမှု အမွေအနှစ်များကို ထိန်းသိမ်းစောင့်ရှောက်ရာတွင်ပါ ပံ့ပိုးကူညီပေးမှုတို့အတွက် မြန်မာနိုင်ငံအစိုးရ ကိုယ်စားလှိုက်လှဲစွာ ကျေးဇူးတင်ရှိပါကြောင်း"ပြောကြားခဲ့သည်။

မန္တလေးမြို့အခြေစိုက် တရုတ်ပြည်သူ့သမ္မတနိုင်ငံကောင်စစ်ဝန်ချုပ် Mr. Chen Chen က ရွှေစည်းခုံစေတီတော် အလင်းမီးပူဇော်ခြင်းနှင့် ချူအင်လိုင်းတန်ဆောင်း LED Screen Boardတပ်ဆင်ခြင်း လှူဒါန်းခဲ့မှုအပေါ် ဝမ်းမြောက်ကြောင်းအမှာစကားပြောကြားခဲ့ပြီး ရွှေစည်းခုံစေတီတော် ဘဏ္ဍာတော်ထိန်း ဂေါပကအဖွဲ့ ကိုယ်စားဥက္ကဌ ဦးကျော်မြင့်က LED Board နှင့် ဆက်စပ်ပစ္စည်းများ တပ်ဆင်လှူဒါန်းခြင်း၊ LED မီးဆလိုက်များ တပ်ဆင် လှူဒါန်းခြင်းအတွက် ကျေးဇူးတင်စကားပြောကြားခဲ့ကြောင်းသိရသည်၊၊

#ymg/tthl
#Yangon_Media_Group

#Local_News
Published _ 29 November 2022

ရန်ကုန်တိုင်းဒေသကြီးအတွင်း မောင်းနှင်သွားလာနေကြသော လူနာတင်ယာဉ်များကို စစ်ဆေးမှုများ ပြုလုပ်နေပြီဖြစ်ကြောင်း ပရဟိတ လုပ်ငန်းလုပ်ကိုင်သူများထံမှ သိရသည်။

အသင်းမှတ်ပုံတင် မိတ္တူနှင့် ယာဉ်မောင်းလိုင်စင် ရှိမရှိ ကို စစ်ဆေးသည့်အပြင် ယာဉ်မောင်းတစ်ဦးနှင့်သတ်မှတ်ထားသော Volunteer နှစ်ဦးထက်ပိုမပို၊ ယာဉ်မောင်းနှင့် Volunteer များ တူညီဝတ်စုံ ဝတ်ဆင်ထားခြင်းရှိမရှိ စစ်ဆေးခြင်း၊ လူနာမှတ်တမ်း ပါရှိမရှိတို့ကို စစ်ဆေးကာ ယာဉ်ပေါ်တွင် လူနာမပါလျှင် မီးတန်းနှင့် အသံကိုလည်း မဖွင့်ရန် စစ်ဆေးလုပ်ဆောင်နေခြင်း ဖြစ်ကြောင်း သိရသည်။

"စစ်ဆေးတဲ့အခါတော့ အသင်းမှတ်ပုံတင် မိတ္တူတို့၊ လိုင်စင်တို့ကို စစ်တာပါ။ ကျွန်တော်တို့ကို သတ်မှတ်ထားတာက Volunteer နှစ်ယောက်ထက် မပိုရဘူး၊ ကားပေါ်မှာ လူနာ မပါရင် မီးတွေ ဖွင့်တာ၊ အသံတွေဖွင့်တာ မလုပ်ရဘူး၊ ယူနီဖောင်းဝတ်ရမယ်ဆိုတာ သတ်မှတ်ပြီးသားပါ"ဟု လူမှုကူညီရေးလုပ်ဆောင်နေသူက ပြောသည်။

#ymg/mt
#Yangon_Media_Group

#Local_News
Published _ 29 November 2022

အနည်းဆုံးအခကြေးငွေ(လုပ်ခလစာ) သတ်မှတ်ရေးဆိုင်ရာ အမျိုးသားကော်မတီအနေဖြင့် အနည်းဆုံးအခကြေးငွေ သတ်မှတ်ထုတ်ပြန်နိုင်ရေးကို စီစဉ်နေကြောင်း အလုပ်သမားဝန်ကြီးဌာန က ထုတ်ပြန်ထားသည်။

မြန်မာနိုင်ငံရှိ အလုပ်သမားများအတွက် နေရာဒေသနှင့် လုပ်ငန်းအမျိုးအစား မခွဲခြားဘဲ တစ်နိုင်ငံလုံး တစ်ပြေးညီ အလုပ်ချိန် ၈ နာရီ (တစ်ရက်)အတွက် ၄၈၀၀ ကျပ် (လေးထောင်ရှစ်ရာကျပ်) ကို ပြည်ထောင်စုအစိုးရအဖွဲ့၏ အတည်ပြုချက်ဖြင့် ပြီးခဲ့သည့် ၂၀၁၈ ခုနှစ် နိုဝင်ဘာခ ၁၄ ရက်တွင် အမိန့်ကြော်ငြာစာ ထုတ်ပြန်ကြေငြာခဲ့ပြီးဖြစ်၍ တတိယအကြိမ် အနည်းဆုံးအခကြေးငွေ သတ်မှတ်ထုတ်ပြန်နိုင်ရေး စီမံနေခြင်း ဖြစ်ကြောင်း ယင်းထုတ်ပြန်ချက်တွင် ဖော်ပြထားသည်။

လက်ရှိ၂၀၂၂-၂၀၂၃ ဘဏ္ဍာနှစ်တွင် ကျွမ်းကျင်လုပ်သား စစ်ဆေးအကဲဖြတ်ခြင်းကို လျာထားချက် ပြည့်မီစေရန်နှင့် ပြည်ပရောက် မြန်မာ လုပ်သားများ အလုပ်သမားအခွင့်အရေး အပြည့်အဝရရှိရေး၊ ပြည်တွင်းတွင် Labour Intensive Industry များ အလုံးအရင်းဝင်ရောက်လာစေရေးအတွက်လည်း မူဝါဒချမှတ် လုပ်ဆောင်နေကြောင်း သိရသည်။

#ymg/mt
#Yangon_Media_Group

#Local_News
Published_ 29 November 2022

မြန်မာအပါအဝင် မဲခေါင်ဒေသတွင်း လူငယ်များအား လူငယ်စွန့်ဦးတီထွင် လုပ်ငန်းများလက်တွေ့လုပ်ဆောင်ရန်ဆွေးနွေးခဲ့ကြောင်း မြန်မာနိုင်ငံဆိုင်ရာ တရုတ်သံရုံးမှ သိရသည်၊၊

မဲခေါင်ဒေသတွင်း လူငယ်များဆန်းသစ်စွန့်ဦးတီထွင်မှုကို လက်တွေ့ဖော်ဆောင်ရန်အားပေးသည့်အနေဖြင့် 'မဲခေါင်ဒေသတွင်းနိုင်ငံများ ဖွံ့ဖြိုးတိုးတက်ရန်အတွက် ဆန်းသစ်တီထွင်မှုနှင့် လူငယ်စွန့်ဦးတီထွင်ခြင်းဆိုင်ရာ နှီးနှောဖလှယ်ပွဲ'ကို နိုဝင်ဘာလ ၂၆ ရက်တွင်နေပြည်တော်၌ ကျင်းပခဲ့ပြီး(၃)ရက်ကြာ ကျင်းပခဲ့ခြင်းဖြစ်သည်။

အဆိုပါ နှီးနှောဖလှယ်ပွဲကို လန်ချန်း-မဲခေါင်ပူးပေါင်းဆောင်ရွက်မှု အထူးရန်ပုံငွေစီမံကိန်းဖြင့်ဆောင်ရွက်ခဲ့ခြင်းဖြစ်ပြီးမြန်မာနိုင်ငံမှတက်ရောက်သူများက နေပြည်တော်တွင်တက်ရောက်ကြပြီး အခြားနိုင်ငံမှ ပါဝင်သူများက အွန်လိုင်းမှ ပါဝင်ဆွေးနွေးခဲ့ကြသည်။

အဆိုပါ နှီးနှောဖလှယ်ပွဲဖွင့်ပွဲအခမ်းအနားသို့ မြန်မာနိုင်ငံဆိုင်ရာ တရုတ်သံမှူးကြီး Mr. Zheng Zhihong က အွန်လိုင်းမှတက်ရောက်ခဲ့ပြီး မြန်မာနိုင်ငံ စက်မှုဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းက နေပြည်တော်တွင် တက်ရောက်ခဲ့ကြသည်။

သံမှူးကြီး Mr. Zheng Zhihong က" လူငယ်များသည် အတက်ကြွဆုံး၊ ဖန်တီးနိုင်မှုအရှိဆုံးအုပ်စုဖြစ်ပြီး ဆန်းသစ်တီထွင်ဖန်တီးမှု၏ ရှေ့ပြေးနေရာတွင် လျှောက်လှမ်းနေသင့်ကြောင်း၊ အထွေထွေအတွင်းရေးမှူး Xi Jinping က တရုတ်ကွန်မြူနစ်ပါတီ (၂၀) ကြိမ်မြောက် နိုင်ငံလုံးဆိုင်ရာ ပါတီညီလာခံအစီရင်ခံစာတွင် တရုတ်နိုင်ငံသည် ဆန်းသစ်တီထွင်မှုအား ခေတ်မီမှုတည်ဆောက်ရာတွင် အဓိကကျသည့်နေရာ၌တည်ရှိနေမှုကို စွဲမြဲစွာ ကိုင်စွဲ၍ ကမ္ဘာ့အရေးပါလူရည်ချွန်စင်တာနှင့် ဆန်းသစ်တီထွင်မှုစုစည်းရာနေရာအဖြစ် တည်ဆောက်မှုကို အရှိန်မြှင့်တင်ရမည်ဟုထောက်ပြပြောဆိုခဲ့ကြောင်း၊ တရုတ်နိုင်ငံသည် မိမိဆန်းသစ်တီထွင်ဖွံ့ဖြိုးတိုးတက်မှုကိုဖော်ဆောင်သည့် တစ်ချိန်တည်းတွင် မြန်မာနိုင်ငံအပါအဝင် မဲခေါင်မြစ်ဒေသနိုင်ငံများနှင့် ကူးလူးဖလှယ် အပြန်အလှန်အတုယူမှုကို မြှင့်တင်ကာ အကျိုးတူပူးပေါင်းဆောင်ရွက်မှုကို နက်ရှိုင်းစေပြီး အတူတကွဖွံ့ဖြိုးတိုးတက်မှုကို ဖော်ဆောင်လိုကြောင်း၊ မြန်မာနိုင်ငံက ကျင်းပသည့် နှီးနှောဖလှယ်ပွဲသည် လန်ချန်း-မဲခေါင်ဒေသနိုင်ငံများက ဆန်းသစ်စွန့်ဦးတီထွင်သည့်အပိုင်းတွင် ကူးလူးဖလှယ် ပူးပေါင်းဆောင်ရွက်ရေးအတွက် ကောင်းမွန်သည့်ပလက်ဖောင်း ဖန်တီးပေးလိုက်ပြီး လန်ချန်း-မဲခေါင်ပူးပေါင်းဆောင်ရွက်မှုယန္တရား၏ ဖွံ့ဖြိုးတိုးတက်မှုကိုဦးစားပေး၍ လက်တွေ့ကျထိရောက်မှုမြင့်မားသော သဘောတရားကို အပြည့်အဝ ထင်ဟပ်စေကြောင်း၊ နိုင်ငံအသီးသီးမှ ကိုယ်စားလှယ်များက ကူးလူးဖလှယ် အပြန်အလှန်အတုယူမှုကို နက်ရှိုင်းစေပြီး အောင်မြင်သည့်အတွေ့အကြုံနှင့် လက်တွေ့ဖော်ဆောင်မှုများကိုမျှဝေကာ အတွေးအခေါ်ထိတွေ့မှုအများအပြား ပေါ်ထွက်လာ၍ လန်ချန်း-မဲခေါင်ဒေသ နိုင်ငံနှင့်ဒေသအသီးသီး ဆန်းသစ်စွန့်ဦးတီထွင်မှုတွင် ပိုများသည့်ရလဒ်များရရှိကာ လန်ချန်း-မဲခေါင် သာယာလှပသည့်ဥယျာဉ် အတူတကွတည်ဆောက်ရန် မျှော်လင့်ကြောင်း" ပြောကြားခဲ့သည်။

ပြည်ထောင်စုဝန်ကြီး ဒေါက်တာချာလီသန်းကလည်း " နှီးနှောဖလှယ်ပွဲ၏ ရည်ရွယ်ချက်သည် လူငယ်များ ဆန်းသစ်စွန့်ဦးတီထွင်မှုအား လက်တွေ့ဖော်ဆောင်ရန် အားပေး၍ လူငယ်စွန့်ဦးတီထွင်သူများ ကူးလူးဖလှယ် ပူးပေါင်းဆောင်ရွက်ရေးအတွက် ပလက်ဖောင်းထောက်ပံ့ပေးကြောင်း၊ နှီးနှောဖလှယ်ပွဲကတစ်ဆင့် လန်ချန်း-မဲခေါင်နိုင်ငံများ စွန့်ဦးတီထွင်မှု သက်ဆိုင်ရာကဏ္ဍများနှင့်ပေါင်းစပ်ကာ နိုင်ငံအသီးသီးဆန်းသစ်စွန့်ဦးတီထွင်မှု ဖွံ့ဖြိုးတိုးတက်ရေးအား ပံ့ပိုးရန်မျှော်လင့်ကြောင်း" ပြောကြားခဲ့သည်။

ယင်းအပြင်မြန်မာနိုင်ငံ စက်မှုဝန်ကြီးဌာန စက်မှုကြီးကြပ်ရေးနှင့်စစ်ဆေးရေးဦးစီးဌာနက မြန်မာနိုင်ငံ ကုန်ပစ္စည်း E-market Platform အကြောင်းမိတ်ဆက်ခဲ့ပြီး အဆိုပါ Platform တည်ဆောက်ပြီးစီးပြီးနောက် ကပ်ရောဂါအလွန်ကာလ မြန်မာနိုင်ငံ ဒီဂျစ်တယ်အဖြစ် အသွင်ကူးပြောင်းရေး၏ ကောင်းမွန်သောစံနမူနာ ဖြစ်လာမည်ဖြစ်ကြောင်း ပြောကြားခဲ့ကြောင်း မြန်မာနိုင်ငံဆိုင်ရာတရုတ်သံရုံး၏ထုတ်ပြန်ချက်အရသိရသည်၊၊

#ymg/tthl
#Yangon_Media_Group

#Local_News
Published_29 November 2022

ပြည်တွင်းဘဏ်ကြီးတစ်ခုဖြစ်သည့် ဧရာဝတီဘဏ် (AYA) သည် အများပိုင်ကုမ္ပဏီအဖြစ် ပြောင်းလဲရန်အတွက် ကုမ္ပဏီများဆိုင်ရာ မှတ်ပုံတင်အရာရှိထံ တင်ပြထားကြောင်း အသိပေးထုတ်ပြန်ထားသည်။

အဆိုပါ ဧရာဝတီဘဏ်လီမိတက်ကို အများနှင့် မသက်ဆိုင်သည့် ကုမ္ပဏီအဖြစ်ကနေ အများနှင့်ဆိုင်သည့် ကုမ္ပဏီအဖြစ်ပြောင်းလဲရန် ကုမ္ပဏီများဆိုင်ရာ မှတ်ပုံတင်အရာရှိမှ တင်ပြထားကြောင်း မြန်မာနိုင်ငံပြန်တမ်းက ထုတ်ပြန်ထားသည်။

ကုမ္ပဏီကိုအများပိုင်အဖြစ် ပြောင်းလဲရန်အတွက် အသေးစိတ်အချက်အလက်များကို ကုမ္ပဏီများဆိုင်ရာ မှတ်ပုံတင်အရာရှိကို တင်ပြထားပြီး တရားရုံးအမိန့်အရ တားမြစ်ခြင်း မရှိပါက ကုမ္ပဏီအမျိုးအစား ပြောင်းလဲခြင်းဆိုင်ရာ အချက်အလက်တွေကို ပြောင်းလဲပေးမည်ဖြစ်ကြောင်း ကြေညာချက်တွင် ဖော်ပြထားသည်။

AYA ဘဏ်ကို စီးပွားရေး လုပ်ငန်းရှင် ဦးဇော်ဇော် တည်ထောင်ထားသည့် ဘဏ်တစ်ခုဖြစ်ပြီး ၂၀၁၀ ပြည့်နှစ်တွင် စတင်တည်ထောင်ခဲ့ခြင်းဖြစ်ကြောင်း၊ အဆိုပါ AYA ဘဏ်သည် လက်ရှိတွင် မြန်မာနိုင်ငံတွင်း ဘဏ်ခွဲပေါင်း ၂၆၀ ကျော် ဖွင့်လှစ်ထားသည့် ပုဂ္ဂလိက ဘဏ်တစ်ခုဖြစ်သည်။

#ymg/sth
#Yangon_Media_Group