#Local_News
Published_ 26 December 2022

သထုံဆေးရုံနဲ့မော်လမြိုင်ဆေးရုံတွေမှာ ကျောက်ကပ်သန့်စင်တာနဲ့ အစာအိမ်မှန်ပြောင်းကြည့်တာတွေကို ပြန်လည်ဆောင်ရွက်နိုင်ပြီလို့ မွန်ပြည်နယ်ပြည်သူ့ကျန်းမာရေးဦးစီးဌာနမှ သိရပါတယ်၊၊

#Yangon_Media_Group

#Local_News
Published_ 26 December 2022

AFF Mitsubishi Electric Cup 2022 တတိယမြောက်အုပ်စုပွဲစဉ်ကို ဒီဇင်ဘာလ ၃၀ ရက်တွင် မြန်မာ့လက်ရွေးစင်ဘောလုံးအသင်းနှင့်လာအိုအသင်းတို့ ယှဉ်ပြိုင်ကစားမည်ဖြစ်ကြောင်း မြန်မာနိုင်ငံဘောလုံးအဖွဲ့ချုပ်(MFF)ထံမှ သိရသည်။

အဆိုပါ ပွဲစဉ်ကို မြန်မာနိုင်ငံ သုဝဏ္ဏဘောလုံးအားကစားကွင်း၌ ယှဉ်ပြိုင်ကစားသွားမည်ဖြစ်ပြီး၊ ယခုကစားမည့်ပွဲစဉ်သည် မြန်မာ့လက်ရွေးစင် ဘောလုံးအသင်း၏ တတိယမြောက်အုပ်စုပွဲစဉ်တစ်ခုလည်းဖြစ်ကြောင်း သိရသည်။

ပြီးခဲ့သော ဒီဇင်ဘာလ ၂၄ ရက်က မြန်မာ့လက်ရွေးစင်ဘောလုံးအသင်းအနေဖြင့် AFF Mitsubishi Electric Cup 2022 အုပ်စု ဒုတိယမြောက်ပွဲစဉ်အား စင်ကာပူနိုင်ငံ လန်ဘီဆာကွင်း၌ ယှဉ်ပြိုင်ကစားခဲ့ရာ အိမ်ရှင် အသင်းအား (၃-၂) ဂိုးဖြင့် ရှုံးနိမ်ခဲ့သည်။

မြန်မာအသင်းတွင် ဂိုး- မျိုးမင်းလတ်၊ နောက်တန်း – နန္ဒကျော်၊ သီဟထက်အောင်၊ ရဲမင်းသူ၊ ဟိန်းဖြိုးဝင်း၊ အလယ်တန်း – မောင်မောင်လွင်၊ ကျော်မင်းဦး၊ ဟိန်းထက်အောင်၊ လင်းထက်စိုး၊ လွင်မိုးအောင်၊ ရှေ့တန်း – အောင်ကောင်းမာန် တို့ဖြင့် ပွဲထွက်ခဲ့ပြီး ဘောလုံး ပိုင်ဆိုင်မှု အသာဖြင့် အိမ်ရှင်အသင်းအား ရင်ဆိုင်ကစားခဲ့ကြခြင်း ဖြစ်သည်။

#ymg/myn
#Yangon_Media_Group

#Local_News
Published_26 December 2022

ယခုဘဏ္ဍာနှစ်အတွင်း မြန်မာ-ဘင်္ဂလားဒေ့ရှ်နယ်စပ်ကုန်သွယ်ရေးမှ အမေရိကန်ဒေါ်လာ ၂၀ ဒသမ ၃၂ သန်းရရှိထားကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ဖော်ပြထားသည့် ကုန်သွယ်မှုစာရင်းများအရ သိရသည်။

ဘင်္ဂလားဒေ့ရှ်နယ်စပ်မှ အမေရိကန်ဒေါ်လာ ၂၀ ဒသမ ၁၇ သန်းပို့ကုန်ဝင်ငွေ ရရှိထားပြီး သွင်းကုန်တင်သွင်းမှုမှ အမေရိကန်ဒေါ်လာ ၀ ဒသမ ၁၆ သန်းဝင်ငွေရရှိထားကြောင်း ဖော်ပြထားသည့်စာရင်းများအရ သိရသည်။

မြန်မာ-ဘင်္ဂလားဒေ့ရှ်နယ်စပ်ကုန်သွယ်ရေးစခန်းများဖြစ်သည့် စစ်တွေဂိတ်မှ အမေရိကန်ဒေါ်လာ ၁၀၀ ဒသမ ၀၉ သန်း၊ဒသမ ၈၂ သန်းဖြင့်အများဆုံးကုန်သွယ်မှုပြုလုပ်ထားကြောင်း သိရသည်။ ယခုဘဏ္ဍာနှစ်အတွင်း စစ်တွေနှင့် မောင်တောနယ်စပ် ကုန်သွယ်ရေးစခန်း နှစ်ခုမှ ရေထွက်ကုန်အများဆုံးတင်ပို့ခဲ့ကြောင်း သိရသည်။

အဆိုပါ စခန်းနှစ်ခုမှ ရေထွက်ကုန် ၆၅ ရာခိုင်နှုန်း၊ ကုန်ခြောက် ၃၅ ရာခိုင်နှုန်း တင်ပို့နေပြီး ရေထွက်ကုန်တင်ပို့မှုတွင် မွေးမြူရေးငါးမြစ်ချင်း၊ ငါးမုန့်မည်း၊ ငါးသလောက်၊ ငါးနီတူခြောက်နှင့် ငါးမှုန့်ခြောက်များ ပါဝင်ပြီး ကုန်ခြောက်များတွင် မန်ကျည်းသီး၊ ချင်း၊ ကြက်သွန်၊ ထန်းလျက်အစရှိသည့် ကုန်ခြောက်များပါဝင်ကြောင်း သိရသည်။

#ymg/sth
#Yangon_Media_Group

#Local_News
Published_ 26 December 2022

ကရင်ပြည်နယ် ကော့ကရိတ်မြို့ ရွှေကြက်ယက်ဘုန်းတော်ကြီးကျောင်းအတွင်း ပေါက်ကွဲမှုတစ်ခုဖြစ်ပွားခဲ့ရာ သံဃာလေးပါးနှင့် ကလေးတစ်ဦး ပြင်းထန်ဒဏ်ရာရရှိခဲ့သည့်အနက် သံဃာတော်တစ်ပါး ပျံလွန်တော်မူခဲ့ကြောင်း ဒေသခံတစ်ဦးက YMG သို့ ပြောသည်။

ယင်းပေါက်ကွဲမှုမှာ ယနေ့ ဒီဇင်ဘာလ ၂၆ ရက် နံနက် ၁၁ နာရီ ခွဲခန့်အချိန်တွင် ပေါက်ကွဲခဲ့ခြင်းဖြစ်ပြီး၊ ဒေသခံများအဆိုအရ လက်နက်ကိုင်အဖွဲ့တစ်ဖွဲ့က Drone ဖြင့် ပစ်ချကာ ဖောက်ခွဲတိုက်ခိုက်ခံရခြင်းဖြစ်သည်ဟု ဒေသခံအချို့က ပြောသည်။

"ဗုံးသုံးလုံးကြဲသွားတယ်လို့ အဲဒီနားကဒေသခံတွေက ပြောတယ်။ သံဃာတစ်ပါးကတော့ပျံလွန်တော်မူသွားပြီလို့ကြားတယ်။ ကျန်တဲ့ ဘုန်းကြီးကျောင်းသားကလေးတစ်ဉီးနဲ့ သံဃာတစ်ပါးကိုတော့ ဘားအံပြည်သူ့ဆေးရုံကို ပို့မယ်လို့လည်းကြားပါတယ်။"ဟု ရှင်းပြသည်။

ပြီးခဲ့သော ဒီဇင်ဘာလ တတိယပတ်အတွင်းမှစတင်၍ ကော့ကရိတ်မြို့အနီး တိုက်ပွဲငယ်များဖြစ်ပွားလျက်ရှိပြီး၊ အရပ်သားပြည်သူအချို့ စစ်ဘေးရှောင်ရမှုများရှိသကဲ့သို့ ထိခိုက်သေဆုံးမှုအချို့လည်းရှိလာခဲ့သည်။

#ymg/myn
#Yangon_Media_Group

#Local_News
Published_ 26 December 2022

ကာကွယ်ရေးဦးစီးချုပ် (ရေ) ဗိုလ်ချုပ်ကြီးမိုးအောင်သည် မြန်မာနိုင်ငံသို့ ရောက်ရှိနေသော ရုရှားဒုတိယရေတပ်ဦးစီးချုပ် Vice Admiral Igor MUKHAMETSHIN ဦးဆောင်တဲ့ ကိုယ်စားလှယ်အဖွဲ့အား ဒီဇင်ဘာ ၂၅ ရက် နံနက်ပိုင်းတွင် ဧရာဝတီရေတပ်စခန်းဌာနချုပ် အရာရှိရိပ်သာ၌ လက်ခံတွေ့ဆုံစဉ် မြန်မာ-ရုရှား နှစ်နိုင်ငံရေတပ်အချင်းချင်း ပူးပေါင်း ဆောင်ရွက်ရေးကိစ္စရပ်များ ဆွေးနွေးခဲ့ကြောင်း သိရပါတယ်။

ထို့အပြင် နှစ်နိုင်ငံရေတပ်မှစစ်ရေယာဉ်များ အပြန်အလှန် ချစ်ကြည်ရေးခရီးစဉ်များ လေ့လာလည်ပတ်နိုင်မှုနှင့် နှစ်နိုင်ငံရေတပ်များအကြား ချစ်ကြည်ရင်းနှီးမှု ပိုမိုတိုးတက် ခိုင်မာရေးအတွက် အဆင့်လိုက်ချစ်ကြည်ရေးခရီးစဉ်များ အပြန်အလှန် လေ့လာလည်ပတ် နိုင်ရေး၊ မြန်မာ့တပ်မတော်မှ ရုရှားဖက်ဒရေးရှင်းနိုင်ငံသို့ သင်တန်းသားများ စေလွှတ် သင်ကြား လျက်ရှိတဲ့ အခြေအနေများကိုလည်း ဆွေးနွေးခဲ့ကြောင်း သိရပါတယ်။

အဆိုပါ တွေ့ဆုံပွဲသို့ ကာကွယ်ရေးဦးစီးချုပ် (ရေ) နှင့်အတူ တပ်မတော် (ရေ) မှ အရာရှိကြီးများ တက်ရောက်ကြကြောင်း သိရပါတယ်။

ရုရှားဒုတိယရေတပ်ဦးစီးချုပ်ဦးဆောင်သော ကိုယ်စားလှယ်အဖွဲ့အား ရေတပ် လေ့ကျင့်ရေးဌာနချုပ်၌ တပ်မတော်(ရေ)မှ အရာရှိ၊ စစ်သည်များ၏ လေ့ကျင့်ရေးဆိုင်ရာ ဆောင်ရွက်ပေးနေမှုကို ရှင်းလင်းတင်ပြခဲ့ကြပြီး Ship Handling Simulator တွင် လေ့ကျင့်နေမှု၊ Engine Room Simulator တွင် လေ့ကျင့်နေမှုများကို ကြည့်ရှု လေ့လာ ကြကြောင်း သတင်းရရှိပါတယ်။

#ygm_mnn
#Yangon_Media_Group

#Local_News
Published_26 December 2022

စားအုန်းဆီအခြေခံလက်ကားရည်ညွှန်းဈေးနှုန်းကို တစ်ပိဿာ ကျပ် ၄၃၆၀ ကျပ်သတ်မှတ်ပေးထားကြောင်း သိရသည်။

အဆိုပါ အခြေခံလက်ကားရည်ညွှန်းဈေးနှုန်းကို ဒီဇင်ဘာလ ၂၆ ရက်မှ ဇန်နဝါရီလအထိ သတ်မှတ်ထားပြီး ပြီးခဲ့သည့် တစ်ပတ်ထက် ၅၀ ကျပ် နီးပါးကျဆင်းလာကြောင်း သိရသည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီအနေဖြင့် စားအုန်းဆီအဓိက ထုတ်လုပ်တင်ပို့သည့် မလေးရှားနိုင်ငံနှင့် အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ပြီး သယ်ယူပိုဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်အတွင်း ရောင်းဝယ်ဖောက်ကားရမည့် အခြေခံလက်ကား ရည်ညွှန်းဈေးနှုန်းကို ထုတ်ပြန်ပေးနေခြင်းဖြစ်ကြောင်း သိရသည်။

ပြည်တွင်း၌ စားအုန်းဆီသုံးစွဲမှုသည် တစ်နှစ်လျှင် တန်ချိန် ၁၀ သိန်းကျော်အထိရှိသည့်အတွက် နှစ်စဉ်တန်ချိန် ၆ သိန်းမှ ၇ သိန်းကြားကို မလေးရှားနိုင်ငံနှင့် အင်ဒိုနီးရှားနိုင်ငံကနေ အဓိထားတင်သွင်းနေရကြောင်း သိရသည်။

ယင်းအပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း သိရသည်။

#ymg/sth
#Yangon_Media_Group