#Local_News
Published-8 April 2023

ကျန်းမာရေးဝန်ကြီးဌာန၏ ဆေးပညာပိုင်း ရာထူးဝင်ရာ အလုပ်အကိုင်နေရာများအပါအဝင် ဝန်ကြီးဌာန ၄ခုက အလုပ်အကိုင် (၁၉၉)နေရာအတွက် လျှောက်လွှာများခေါ်ယူနေကြောင်း သိရသည်။

ယင်းကဲ့သို့ လစ်လပ်လျက်ရှိသည့် အလုပ်အကိုင်ရာထူး (၁၉၉)ခုအတွက် လျှောက်လွှာခေါ်ယူနေသည့် ဝန်ကြီးဌာန (၄) ခုမှာ ကျန်းမာရေးဝန်ကြီးဌာန၊ ပို့ဆောင်ရေးနှင့် ဆက်သွယ်ရေးဝန်ကြီးဌာန၊ လျှပ်စစ်စွမ်းအားဝန်ကြီးဌာနနှင့် စက် မှုဝန်ကြီးဌာနတို့လည်း ပါဝင်နေကြောင်း ပြည်ထောင်စု ရာထူးဝန်အဖွဲ့ ၏ ဧပြီ (၃) ရက်ကထုတ်ပြန်သည့် ကြေညာချက်အရ သိရသည်။

အဆိုပါ ကြေညာချက်အရ ကျန်းမာရေးဝန်ကြီးဌာန ကျန်းမာရေးလူ့စွမ်းအား အရင်းအမြစ် ဦးစီးဌာနအတွက် ဆရာဝန်(သရုပ်ပြ)ရာထူး (၉၇) နေရာ၊ ဆရာဝန် (သွားနှင့်ခံတွင်း) (သရုပ်ပြ) ရာထူး (၃၀) နေရာ၊ တိုင်းရင်းဆေးတက္ကသိုလ်၊တိုင်းရင်းဆေးပညာဦးစီးဌာနအတွက် ဆရာဝန် (သရုပ်ပြ) ရာထူး (၁၃) နေရာ၊ အစားအသောက်နှင့်ဆေးဝါးကွတ်ကဲရေး ဦးစီးဌာနအတွက် ဦးစီးအရာရှိ (အစားအသောက်)ရာထူး (၂၀) နေရာ၊ ဦးစီးအရာရှိ (ဆေးဝါး) ရာထူး (၁၆) နေရာ၊ ဦးစီးအရာရှိ (ဆေးပစ္စည်း/အလှကုန်) (၆)နေရာအတွက် လျှောက်လွှာများခေါ်ယူနေခြင်းဖြစ်ဦးစီးထို့အပြင် ပို့ဆောင်ရေးနှင့် ဆက်သွယ်ရေးဝန်ကြီးဌာန၊ ဗဟို ပို့ဆောင်ဆက်သွယ်ရေး ကျောင်းအတွက် ဆရာဝန် (၁) နေရာ၊ မြန်မာ့မီးရထားအတွက် လက်ထောက်ဆရာဝန် (၁၂) နေရာ၊ လျှပ်စစ်စွမ်းအားဝန်ကြီးဌာန/ရန်ကုန်လျှပ်စစ်ဓာတ်အားပေးရေး ကော်ပိုရေးရှင်းအတွက် ဆရာဝန်(အမျိုးသား) (၁) နေရာ၊ မန္တလေးလျှပ်စစ်ဓာတ်အားပေးရေးကော်ပိုရေးရှင်းအတွက် လက်ထောက်ဆရာဝန် (၁) နေရာ၊ စက် မှုဝန်ကြီးဌာန၏ မြန်မာ့ဆေးဝါးလုပ်ငန်းအတွက် အလုပ်ရုံခွဲမှူး (၂) နေရာတို့အတွက်လည်း ခေါ်ယူလျက်ရှိထားကြောင်း သိရသည်။

ဝင်ရောက်လျှောက်ထားလိုသူများအနေဖြင့် ပြည်ထောင်စု ရာထူးဝန်အဖွဲ့ရုံး (နေပြည်တော်)၊ ပြည်ထောင်စု ရာထူးဝန်အဖွဲ့ (ရန်ကုန်ရုံးခွဲ)၊ တိုင်းနှင့် ပြည်နယ်အစိုးရ အဖွဲ့ရုံးများတွင် လျှောက်လွှာများ ဝယ်ယူလျှောက်ထားနိုင်ပြီး လျှောက်ထားမည့်သူများအနေဖြင့် လူကိုယ်တိုင်(သို့မဟုတ်) စာတိုက် မှတစ်ဆင့်ဖြစ်စေ ပြည်ထောင်စုရာထူးဝန်အဖွဲ့၊ ရုံးအမှတ်(၁၇) နေပြည်တော်သို့ Online စနစ်ဖြင့် e-Recruitment and Selection System (e-R SS) (UCSBe-RSS Mobile Application နှင့် UCSBe- RSS Web Based) တို့ကို အသုံးပြုကာ မေ (၁၀) ရက်တွင်နောက်ဆုံးထား လျှောက်ထားရမည်ဖြစ်ကြောင်းသိရသည်။
#ymg/mt
#Local_News #ကျန်းမာရေးနှင့်လျှပ်စစ်ဝန်ကြီးဌာန #လျှောက်လွှာများခေါ်ယူနေ
#YMG #Yangon_Media_Group

#Local_News
Published_8 April 2023

သင်္ကြန်ပွဲတော်ရှိ၍ ဧပြီလ(၁၃)ရက်မှ (၁၆)ရက်အထိ ရန်ကုန်မြို့ရှိ မဟာဗန္ဓုလလမ်းနှင့် ဆူးလေဘုရားလမ်းအချို့ နေရာများအား ခေတ္တပိတ်ထားမည်ဖြစ် ကြောင်း ရန်ကုန်တိုင်းဒေသကြီး အစိုးရအဖွဲ့မှ ထုတ်ပြန်ထားသည်၊၊

ရန်ကုန်မြို့တော်ခန်းမရှေ့ မြို့တော်ဝန်မဏပ်တွင် ရေကစားခြင်း၊သင်္ကြန်ယိမ်းအကအလှဖြင့် ဖျော်ဖြေမည်ဖြစ်၍ ဧပြီလ(၁၃)ရက်မှ(၁၆)ရက်အထိမဟာဗန္ဓုလလမ်းအားဆူးလေဘုရားလမ်းမှပန်းဆိုးတန်းအထိလည်းကောင်း၊ ဆူးလေဘုရားလမ်းအား အနော်ရထာလမ်းမှ ကုန်သည်လမ်းအထိ လည်းကောင်း နံနက်၇နာရီညနေ၆နာရီအထိ ခေတ္တပိတ်ထားမည်ဖြစ်သည်ဟုဆိုသည်၊၊

ယင်းကဲ့သို့ လမ်းခေတ္တပိတ်ထားမည်ဖြစ်၍ မော်တော်ယာဉ်မောင်းသူများအနေဖြင့် လမ်းလွှဲများမှ သွားရန် ရန်ကုန်တိုင်းဒေသကြီး အစိုးရအဖွဲ့မှအသိပေးချက်ထုတ်ပြန်ထားသည်၊၊
ymg/tthl
#Local_News #သင်္ကြန်ပွဲတော် #ရန်ကုန်မြို့ #မဟာဗန္ဓုလလမ်း #ဆူးလေဘုရားလမ်း #ခေတ္တပိတ်မည် #YMG #Yangon_Media_Group

#World_Politics
Published_ 8 April 2023

တရုတ်က စနေနေ့ကစပြီး ထိုင်ဝမ်အနီးတဝိုက်မှာ စစ်ရေးလေ့ကျင့်မှုများ ၃ ရက်တိုင်အောင် ပြုလုပ်မှာဖြစ်ကြောင်း ထိုင်ဝမ်သမ္မတ'ဆိုင်အင်ဝမ်' အမေရိကန်ခရီးစဉ်မှ ပြန်ရောက်ပြီးနောက်နေ့မှာပဲ တရုတ်ပြည်သူ့လွတ်မြောက်ရေးတပ်မတော် အရှေ့တိုင်းစစ်ဌာနချုပ်က ကြေညာပြီး စစ်​ရေးလေ့ကျင့်မှုစတင် လိုက်ပါတယ်။

ထိုင်ဝမ်ရဲ့ မြောက်ဘက်၊ တောင်ဘက်၊ အရှေ့ဘက်နဲ့ ထိုင်ဝမ်ရေလက်ကြားအနားတဝိုက်မှာ တရုတ်တို့က တိုက်ခိုက်ရေးအသင့်ရှိကင်းလှည့်ခြင်းနဲ့ စစ်ရေးလေ့ကျင့်မှုများ ပြုလုပ်မယ်လို့ ကြေညာခဲ့တာဖြစ်ပါတယ်။

ဆိုင်အင်ဝမ်က လော့စ်အိန်ဂျလိစ်သို့ရောက်နေစဉ် ဗုဒ္ဓဟူးနေ့က အမေရိကန်အောက်လွှတ်တော်ဥက္ကဌ'ကီဗင်မက္ကာသီ'နဲ့ တွေ့ဆုံခဲ့ရာ တရုတ်အတွက် အမျက်ထွက်စရာ ဖြစ်ခဲ့ပါတယ်။

ထိုင်ဝမ်ဘက်မှ တုန့်ပြန်ချက်ထွက်မလာသေးဘဲ ပြီးခဲ့တဲ့ ၂၄ နာရီအတွင်းက ထိုင်ဝမ်လေကြောင်းခုခံရေးပိုင်နက်ထဲမှာ တရုတ်လေယာဉ် ၄ စင်းကို တွေ့ရှိခဲ့ကြောင်း ထိုင်ဝမ်ကာကွယ်ရေးဝန်ကြီးဌာနက စနေနေ့နံနက်ပိုင်းမှာ ပြောကြားလိုက်ပါတယ်။

ဆိုင်အင်ဝမ်ဟာ စနေနေ့နှောင်းပိုင်းမှာလည်း အောက်လွှတ်တော်နိုင်ငံခြားဆက်ဆံရေးကော်မတီဥက္ကဌ'မိုက်ကယ်မက်ကာလ်' ဦးဆောင်တဲ့ အမေရိကန်ဥပဒေပြုလွှတ်တော်အမတ်ကိုယ်စားလှယ်အဖွဲ့နဲ့ တွေ့ဆုံဦးမှာဖြစ်ပါတယ်။

ထိုင်ဝမ်ဘက်မှ လွတ်လပ်ခွင့်ရရှိရေးကြိုးပမ်းမှုမှန်သမျှကို တရုတ်ဘက်က ပြင်းပြင်းထန်ထန်ချေဖျက်နိုင်စွမ်းရှိတယ်လို့ တရုတ်အာဏာရကွန်မြူနစ်ပါတီရဲ့ တရားဝင်သတင်းစာ People's Daily က ဖော်ပြလိုက်ပါတယ်။

တရုတ်အစိုးရရဲ့ တန်ပြန်ဆောင်ရွက်ချက်တွေက နိုင်ငံတော်အချုပ်အခြာအာဏာနဲ့ နယ်မြေစိုးမိုးရေး ကာကွယ်ပိုင်ခွင့်အတိုင်း ဆောင်ရွက်တာဖြစ်ကြောင်း ဖော်ပြထားပါတယ်။

ထိုင်ဝမ်အပေါ် တရုတ်အာဏာသက်‌ရောက်မနေဘူးလို့ ပြင်းထန်စွာငြင်းဆိုထားပြီး တရုတ်နဲ့ဆွေးနွေးဖို့ အကြိမ်ကြိမ်ကမ်းလှမ်းထားပေမယ့် တရုတ်အစိုးရက သူမကို ခွဲထွက်ရေးသမားအဖြစ်မြင်နေကြောင်း ဆိုလိုက်ကာ ထိုင်ဝမ်ပြည်သူတွေကသာ အနာဂတ်ကိုဆုံးဖြတ်နိုင်ကြောင်း ပြောကြားခဲ့ပါတယ်။

ဩဂုတ်လက အောက်လွှတ်တော်ဥက္ကဌ'နန်စီပယ်လိုစီ' ထိုင်ပေသို့ လာရောက်စဉ်ကလည်း တရုတ်က ဒုံးကျည်များစမ်းသပ်ပစ်ခတ်ခဲ့ပါသေးတယ်။

Source: Reuters
#World_Politics #ထိုင်ဝမ်သမ္မတ #အမေရိကန်အောက်လွှတ်တော်ဥက္ကဌ #တရုတ်က စစ်ရေးလေ့ကျင့် #YMG #Yangon_Media_Group

#Local_News
Published_ 8 April 2023

ATM စက်များမှ ငွေထုတ်ယူမှုများကို အစိုးရဌာနများ၌ တိုးချဲ့ဆောင်ရွက်မည်ဖြစ်ကြောင်း စီမံကိန်းနှင့်ဘဏ္ဍာရေးဝန်ကြီးဌာနတွင် ပြုလုပ်ခဲ့သည့် နေပြည်တော်ရှိ နိုင်ငံ့ဝန်ထမ်း (အရာထမ်း)များ၏ လစာငွေများကို ATM စက်များမှ ထုတ်ယူနိုင်ရေးဆိုင်ရာ ညှိနှိုင်းအစည်းအဝေးက သိရသည်။

နေပြည်တော်ရှိ အရာထမ်းများ၏ လစာငွေများကို မြန်မာ့စီးပွားရေးဘဏ်၏ ATM စက်များနှင့် ပုဂ္ဂလိကဘဏ်များ၏ ATM စက်များမှ ATM ကတ် များဖြင့် ထုတ်ယူခြင်းကို ၂၀၂၁ ခုနှစ် ဇန်နဝါရီလအထိ ဆောင်ရွက်ပေးခဲ့ပြီးနောက် ယခုအခါ ATM စက်များ တပ်ဆင်ထားခြင်းမရှိသေးသည့် ဝန်ကြီးဌာနနှင့် အစိုးရအဖွဲ့အစည်းများတွင်တိုးချဲ့ တပ်ဆင်ရန် ဆုံးဖြတ်ခဲ့ကြခြင်း ဖြစ်ကြောင်း သိရသည်။

ယင်းကြောင့် မြန်မာ့စီးပွားရေးဘဏ်၏ ATM စက်များတပ်ဆင်နိုင်ရေးအတွက် စက်တပ်ဆင်မည့်နေရာသတ်မှတ်ပေးခြင်း ၊ လျှပ်စစ်မီးလိုင်းနှင့် အင်တာနက်လိုင်းများ သွယ်တန်းနိုင်ရေးဆောင်ရွက်ခြင်းတို့ကို မြန်မာ့စီးပွားရေးဘဏ်နှင့်ချိတ်ဆက်၍ ပေါင်းစပ်ညှိနှိုင်းဆောင်ရွက်ပေးရန် လုပ်ဆောင်နေကြကြောင်း သိရသည်။
ymg/mt
#Local_News #ATMစက် #အစိုးရဌာန
#YMG #Yangon_Media_Group

#Local_News
Published_ 8 April 2023

ရန်ကုန်တိုင်းဒေသကြီး၊ မရမ်းကုန်းမြို့နယ်၊ ကမ္ဘာအေးစေတီတော်ရင်ပြင်အနီးတွင် မွေးရာပါ နှုတ်ခမ်းကွဲ၊ အာခေါင်ကွဲဖြင့် တစ်လသားအရွယ် ကလေးငယ်တစ်ဦးအား ကမ္ဘာအေးစေတီရင်ပြင်အနီး စွန့်ပစ်ထားကြသည်ကို သွားရောက်ကူညီခဲ့ရကြောင်း မြန်မာ့ကြယ်ဖြူ လူမှုကူညီကယ်ဆယ်ရေးအဖွဲ့က သိရသည်။

ဧပြီလ ၇ ရက် ညနေပိုင်းအချိန် စေတီတော်ရင်ပြင်တွင် ဈေးရောင်းသူများက ကလေးငိုသံကြားသည့်အတွက် သွားကြည့်ရာ ကလေးငယ်အား ပုရွက်ဆိတ်များ ကိုက်ထားကြောင်း ၊ ယင်းကလေးငယ်မှာ သား ယောင်္ကျားလေးဖြစ်ကြောင်း သိရသည်။

"ကျွန်တော်တို့မြန်မာ့ကြယ်ဖြူ လူမှုကူညီကယ်ဆယ်ရေးအဖွဲ့ကိုအကြောင်းကြားလာတာကြောင့် ရောက်သွားတဲ့အခါ ကလေးငယ်က မွေးရာပါ နှုတ်ခမ်းကွဲပြီး တစ်ကိုယ်လုံးပုရွတ်ဆိတ်တွေကိုက်ခံထားလို့ နာကျင်နေတယ်။

ဒါကြောင့် ကျန်းမာရေး အခြေအနေကြောင့် ရန်ကင်းကလေးဆေးရုံကို ကူညီပို့ဆောင်ခဲ့ကြပါတယ်၊ပိုင်ရှင်မဲ့ကလေးဆိုတော့ ဆေးရုံက သိပ်လက်မခံချင်ဘူး၊စကားတွေအများကြီးပြောရတယ်၊လက်မှတ်တွေလဲ ထိုးရတယ်၊ဘာပဲဖြစ်ဖြစ် ကလေးအသက်အရေးကြီးလို့ လုပ်ပေးလိုက်ပါတယ်၊ကလေးငယ်ရဲ့ နာမည်ကို ဆေးရုံစာအုပ်မှာ မောင်ကြယ်ဖြူ လို့ ရေးပေးထားခဲ့ပါတယ်"ဟု အဆိုပါ အဖွဲ့၏ တာဝန်ရှိသူကပြောသည်။
ymg/mt
#Local_News #မွေးရာပါနှုတ်ခမ်းကွဲ၊အာခေါင်ကွဲ #ကလေးငယ်တစ်ဦး #ကမ္ဘာအေးစေတီအနီးစွန့်ပစ် #YMG #Yangon_Media_Group

#Local_News
Published_ 8 April 2023

မွန်ပြည်နယ်၊ သထုံခရိုင်၊ ဘီးလင်းမြို့နယ်၊ ကျောက်ရေတွင်းကျေးရွာ၊ အမှတ် (၂၂) အကြီးစားတာယာစက်ရုံအနီးတွင် ယနေ့ ဧပြီလ ၈ ရက် နံနက် ၇ နာရီခန့်အချိန်က ယာဉ်တိုက်မှုဖြစ်ပွားခဲ့ရာ တစ်ဦးသေဆုံးပြီး ၅ ဦး ဒဏ်ရာ ရရှိခဲ့ကြောင်း သိရသည်။

မြန်မာနိုင်ငံ မီးသတ်တပ်ဖွဲ့က ထုတ်ပြန်ရာတွင် ယာဉ်တိုက်မှုကြောင့် အမျိုးသားတစ်ဦး သေဆုံးဖြစ်ပြီး အမျိုးသား ၂ ဦး နှင့် အမျိုးသမီး ၃ ဦး ဒဏ်ရာရရှိသွားကြောင်း၊အမျိုးသမီးများ ဒဏ်ရာများမှာ စိုးရိမ်ရကြောင်း ဖော်ပြထားသည်။

အခင်းဖြစ်ရာနေရာသို့ ဘီးလင်းမြို့နယ်မီးသတ်စသခန်းမှ ရှာဖွေကယ်ဆယ်ရေးယာဉ် (၁)စီး၊ သန္ဓေမီးသတ်တပ်ဖွဲ့ဝင်များ ဖြင့် ရှာဖွေကယ်ဆယ်ရေးလုပ်ငန်းများဆောင်ရွက်ခဲ့ကာ ဒဏ်ရာရသူများနှင့် သေဆုံးသူ၏ ရုပ်အလောင်းကို စုစည်းအားမာန်လူမှုကူညီရေးအသင်းမှ သူနာတင်ယာဉ်ဖြင့် ဘီးလင်းမြို့နယ်ပြည်သူ့ဆေးရုံ သို့ပို့ဆောင်ပေးထားကြောင်း သိရသည်။
ymg/mt
#Local_News #ဘီးလင်းမြို့ #ယာဉ်တိုက်မှုဖြစ်ပွား
#YMG #Yangon_Media_Group