#Daily_News
Published_ 22 June 2023

၁။ EV ကားများအားသွင်းလိုရင် Charging Station များကို ကြိုတင်အကြောင်းကြားရမည်ဆိုသည်မှာ ကောလလဟာသာဖြစ်ဟုဆို

၂။ ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့တွင် မုတ်သုံလေအားကောင်းနိုင်

၃။ မြိုင်ကြီးငူစစ်ဘေးရှောင်စခန်းအတွင်း စစ်ရှောင်ဉီးရေ ၅၀၀၀ ခန့်အထိရှိနေ၊ ယခင်နှစ်ထက် စစ်ရှောင်ဉီးရေ လျော့နည်းလာ

၄။ ဗြိတိန်တွင် ပါကစ္စတန် ဘာတီစားသောက်ဆိုင်များ ရှင်သန်ရန်ကြိုးပမ်းနေရ .... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Time #Daily_News #YMG

#Local_News
Published- 22 June 2023

ရန်ကုန်တိုင်းဒေသကြီး သာကေတမြို့နယ်၊ ကျောင်းကွေ့မီးပွိုင့်မှတ်တိုင်တွင် သက်ကြီးပိုင်းအမျိုးသမီးတစ်ဦးအား ကားတစ်စီးမှ တိုက်သွားကြောင်း သာကေတမြို့နယ်လူမှုကူညီရေးအသင်းက သိရသည်။

ဇွန်လ၂၂ရက် နံနက် ၈ နာရီ ၄၅ မိနစ်အချိန်ခန့်က သာကေတမြို့နယ်၊ ဧရာဝဏ်လမ်းမကြီး၊ ကျောင်းကွေ့မှတ်တိုင်အနီးတွင် အသက်၇၀ ဝန်းကျင်အမျိုးသမီး၁ဦးကို ကားတစ်စီးမှ တိုက်သွားခြင်းဖြစ်သည်။

အဆိုပါ ကားတိုက်မှုဖြစ်စဥ်ကြောင့်  သာကေတမြို့နယ် လူမှုကူညီရေးအဖွဲ့သို့ပြည်သူများမှ အကြောင်းကြားလာ၍ အချိန်နှင့် တစ်ပြေးညီထွက်ခွာပြီး ကူညီဆောင်ရွက်ပေးခဲ့ကြောင်း သိရသည်။

ထိခိုက်ဒဏ်ရာရရှိသည့် အမျိုးသမီးအား လူမှုစေတနာလူမှုကူညီရေးအသင်း လူနာတင်ယာဥ်ဖြင့် ရန်ကုန်ဆေးရုံကြီးသို့ ပို့ဆောင်ပေးခဲ့ကြောင်း သိရသည်။

#Local_News #ကျောင်းကွေ့မီးပွိုင့်မှတ်တိုင်တွင်အမျိုးသမီး၁ဦးကားတိုက်ခံရ
#Yangon_Times/BM

#Local_News

Published 21 June 2023
ရှမ်းပြည်နယ်(တောင်ပိုင်း)၊ ညောင်ရွှေမြို့အနီးရှိအင်းလေးကန် ရေရှည်ထိန်းသိမ်းစောင့်ရှောက်ရေးအတွက် ယခုဘဏ္ဍာနှစ်တွင် ပြည်ထောင်စုခွင့်ပြုရန်ပုံငွေ ကျပ်သန်း ၇၀၀ နဲ့ ဆောင်ရွက်သွားမည်ဖြစ်​ကြောင်း ဆည်မြောင်နှင့်ရေအသုံးချမှုစီမံခန့်ခွဲရေးဦးစီးဌာနမှ လက်ထောက်ညွှန်ကြားရေးမှူး ဦးကျော်ကျော်ဦးက ပြောသည်။

ပြည်တွင်းခရီးသွားများအထောက်အကူပြုစေရန်နှင့် အင်းလေးကန်ကို ရေရှည်တည်တံ့စေရန်ရည်ရွယ်၍ ထိန်းသိမ်းစောင့်ရှောက်ရေးလုပ်ငန်းများအတွက် ဆောင်ရွက်လျက်ရှိပြီး ယခုဘဏ္ဍာနှစ်တွင်လည်း ပြည်ထောင်စုရန်ပုံငွေဖြင့် ဆောင်ရွက်သွားမည်ဖြစ်ကြောင်း သိရသည်။

အင်းလေးကန် ရေရှည်ထိန်းသိမ်းစောင့်ရှောက်ရေး စီမံကိန်းဆောင်ရွက်ရာတွင် အင်းလေးကန်အတွင်းကို စီးဝင်သည့် ချောင်းသုံးခုမှ နုန်းဖမ်းဆည်ငယ်များ တည်ဆောက်ခြင်း၊ အင်းလေးကန်အတွင်း ကျွန်းမျောတွေ ရှင်းလင်း​ခြင်းနှင့် သဲနုန်းတူးဖော်သည့် လုပ်ငန်းများကို ဆောင်ရွက်သွားမည်ဖြစ်ပြီး ယခုကဲ့လို့ဆောင်ရွက်ခြင်းသည်  ရေစီးကြောင့် ချောက်ကမ်းပါးတွေပြိုကျပြီး သဲနုန်းပို့ချမှုများ လျော့နည်းသွားကာ ကန်အတွင်း ရေနည်းတဲ့ ရာသီတွင်လည်း လှေများသွားလာရန် ပိုမိုအဆင်ပြေ ချောမွေ့သွားမည်ဖြစ်ကြောင်း ဆိုသည်။

#Local_News #အင်းလေးကန်ထိန်းသိမ်းရန်သန်း၇၀၀အသုံးပြု
#Yangon_Times/BM

#Local_News
Published_22 June 2023

ရန်ကုန်တိုင်းဒေသကြီး၊ လှိုင်သာယာမြို့နယ်၊ ထိန်ပင်အမှိုက်ပုံတွင် မီးလောင်မှုဖြစ်ပွား​နေကြောင်း မြန်မာနိုင်ငံမီးသတ်ဌာနမှ သိရသည်။

အဆိုပါမီးလောင်မှုကိုငြှိမ်းသတ်ရန် Level 1 ယာဉ်အုပ်စုများ ထွက်ခွာလျက်ရှိကြောင်း ရွှေရုပ်လွှာ ပရဟိတအသင်း တာ၀န်ခံ ကိုရွှေမိုးအောင်ကပြောသည်။

အရင် ၂၀၁၈ ခုနှစ်ကလောင်ခဲ့ဖူးတဲ့နေရာမှာပဲ ထပ်မံလောင်ကျွမ်းတာဖြစ်တယ်လို့ ကိုရွှေမိုးအောင်က YMG ကိုပြောသည်။

ပြီးခဲ့တဲ့ ၂၀၁၈ ခုနှစ် ဧပြီလ တုန်းကလည်း အဆိုပါထိန်ပင်အမှိုက်ပုံမီးလောင်ကျွမ်းခဲ့ဖူးပြီး လနဲ့ချီမီးငြှိမ်းသတ်ခဲ့ဖူးသည်။

#ymg/ynzw #လှိုင်သာယာထိန်ပင်အမှိုက်ပုံမီးထပ်မံလောင်ကျွမ်း
#Yangon_Time

#Local_News
Published-22 June2023

ကိုရီးယားသမ္မတနိုင်ငံသို့ အစိုးရပြည်ပအလုပ်အကိုင်အေဂျင်စီမှတစ်ဆင့် EPS စနစ်ဖြင့် ကုန်ထုတ် လုပ်သားသစ် (၁၄၇) ဦးကို ဇွန်လ ၂၁ ရက်တွင် ထပ်မံစေလွှတ်ခဲ့ကြောင်း ဆိုလ်းမြို့၊ မြန်မာသံရုံးကသိရသည်။

အဆိုပါ အလုပ်သမားများရန်ကုန်မြို့မှ အင်ချွန်းအပြည်ပြည်ဆိုင်ရာလေဆိပ်သို့ ရောက်ရှိခဲ့ရာ မြန်မာသံရုံး၊ ဆိုးလ်မြို့မှ အလုပ်သမားသံအရာရှိက ကြိုဆို၍ အလုပ်သမားများ သိရှိလိုက်နာသင့်သည့်အချက်များကို မှာကြားခဲ့ပြီး လိုအပ်သည်များ ကူညီပံ့ပိုးပေးခဲ့ကြောင်း သိရသည်။

ကိုရီးယားသမ္မတနိုင်ငံသို့ အစိုးရပြည်ပအလုပ်အကိုင်အေဂျင်စီမှ တစ်ဆင့် EPS စနစ်ဖြင့် ဇွန်လ၂၀ရက်ကလည်း ကုန်ထုတ်လုပ်သားသစ် (၁၁၄) ဦး၊ စိုက်ပျိုးရေးနှင့် ‌မွေးမြူရေးလုပ်သားသစ် (၃၁) ဦးကိုစေလွှတ်ခဲ့ကြောင်း၊ဇွန်လ၁၃ရက်ကလည်း EPS စနစ်ဖြင့် ကုန်ထုတ်လုပ်သားသစ် (၁၄၆) ဦးကို စေလွှတ်ခဲ့ကြောင်း သိရသည်။
.

ယင်းအပြင် ဇွန်လ၇ရက်ကလည်း EPS စနစ်ဖြင့်ကုန်ထုတ်လုပ်သားသစ် (၁၂၁) ဦး၊ ဆောက်လုပ်ရေးလုပ်သားသစ် (၂၉)ဦး၊ စုစုပေါင်း (၁၅၀) ဦး ကိုးရီးယားနိုင်ငံသို့ မြန်မာလုပ်သားများစေလွှတ်ခဲ့ကြောင်း ဆိုလ်းမြို့ မြန်မာသံရုံးမှထုတ်ပြန်ထားသည်။

#Local_News #မြန်မာလုပ်သား ၁၄၇ ဦးကို EPSစနစ်ဖြင့်စေလွှတ်
#Yangon-Times/BM

#Local_News
Publushed- 21 June 2023

မကွေးတိုင်းဒေသကြီးနှင့် မန္တလေးတိုင်းဒေသကြီးများတွင် ဖော်ဆောင်မည့် လေအားစွမ်းအင်မှ လျှပ်စစ်ထုတ်လုပ်မည့်စီမံကိန်း(၃)ခုအတွက် ရုရှားအခြေစိုက် Nova Wind JSC ကုမ္ပဏီနှင့် လျှပ်စစ်စွမ်းအားဝန်ကြီးဌာနတို့ နားလည်မှုစာချွန်လွှာ Memorandum of Understanding (MOU)လက်မှတ်ရေးထိုးလိုက်ပြီဖြစ်ကြောင်း လျှပ်စစ်စွမ်းအားဝန်ကြီးဌာနမှ သိရသည်။

MOU အရ မကွေးတိုင်းဒေသကြီးအတွင်း ၁၁၆ မဂ္ဂါဝပ်ထွက်ရှိမည့် မင်းလှစီမံကိန်းနှင့် ၅၆ မဂ္ဂါဝပ်ထွက်ရှိမည့် မင်းတုန်းစီမံကိန်းများအတွက် ဖြစ်မြောက်နိုင်စွမ်း လေ့လာမှုလုပ်ငန်းများကို ရုရှားကုမ္ပဏီ Nova Wind JSC နှင့် နိုင်ငံသားပိုင် Primus Advanced Technologies Limited (PRIMUS)တို့ ပူးပေါင်းဆောင်ရွက်မည်ဟု သိရသည်။

နောက်ထပ် လေအားလျှပ်စစ်စီမံကိန်းတစ်ခုဖြစ်သည့် ၂၀၀ မဂ္ဂါဝပ်ထွက်ရှိမည့် ပုပ္ပါးလေအား လျှပ်စစ်စီမံကိန်းကို Nova Wind JSC နှင့် မြန်မာကုမ္ပဏီ Zeya & Associates တို့ပူးပေါင်း၍ မန္တလေးတိုင်းဒေသကြီးအတွင်းက ကျောက်ပန်းတောင်းမြို့နယ်နှင့် ညောင်ဦးမြို့နယ်များတွင် စီမံကိန်းဖြစ်မြောက်နိုင်စွမ်း လေ့လာမှုလုပ်ငန်းများ ဆောင်ရွက်သွားမည်ဟု သိရသည်။

လေအားလျှပ်စစ်စီမံကိန်း ၃ ခုမှ လျှပ်စစ်ဓာတ်အား မဂ္ဂါဝပ်ပေါင်း ၃၀၀ကျော် ထွက်ရှိမည်ဖြစ်ရာ ၎င်းစီမံကိန်းများဆောင်ရွက်ရန် ရုရှားအဏုမြူစွမ်းအင်ကော်ပိုရေးရှင်း ROSATOM အနေဖြင့် ယခုနှစ် မတ်လပိုင်းက  စီမံကိန်းအဆိုပြုလွှာ Project Proposal ကို သက်ဆိုင်ရာဝန်ကြီးဌာနသို့ လာရောက်တင်ပြခဲ့သည်ဟု သိရသည်။

#Local_News #လေအားလျှပ်စစ်စီမံကိန်း ၃ ခု #ရုရှားကုမ္ပဏီများနှင့်လျှပ်စစ်စွမ်းအင်ဝန်ကြီးဌာနတို့ MOU ရေးထိုး #Yangon_Times/BM