#LocalNews
Published - 17 June 2022

မေရီချက်ပ်မင်း နားမကြားသောကလေးများကျောင်းတွင် ကျောင်းသား(၁၀၀)ကျော် ပြန်တက်နေပြီဖြစ်ပြီး အခုနှစ်မှာကျောင်းသား(၁၅၀)လောက် ပြန်တက်ဖို့မှန်းထားပြီး လာတက်မယ့်သူတွေကို စောင့်ဆိုင်းပေးနေတယ်လို့ သိရပါတယ်၊၊

#Yangon_Media_Group

#LocalNews
Published - 17 June 2022

နည်းပညာဆိုင်ရာဝါသနာပါသည့် မြန်မာလူငယ်များ အနေဖြင့်အာဆီယံဒစ်ဂျစ်တယ်နည်းပညာစွမ်းဆောင်ရည်မြှင့် အွန်လိုင်းသင်တန်းကို တက်ရောက်နိုင်ကြောင်းသိရသည်၊၊

အဆိုပါသင်တန်းကို အာဆီယံဖောင်ဒေးရှင်းနှင့် ဂျာမနီနိုင်ငံ SoftWare ကုမ္ပဏီ SAP တို့ ပူးပေါင်းဖွင့်လှစ်တာဖြစ်ပြီး မြန်မာအပါအဝင်အာဆီယံအဖွဲ့ဝင် နိုင်ငံတွေကအသက်(၁၈)နှစ်မှ (၃၀)ကြားလူငယ်များ တက်ရောက်နိုင်မည်ဖြစ်သည်၊၊

ပညာရေးသတ်မှတ်ချက်အနေဖြင့် အင်္ဂလိပ်စာ ကျွမ်းကျင်ပိုင်နိုင်စွာပြောဆိုရေးသားနိုင်ရမည်ဖြစ်ပြီး တက္ကသိုလ်နောက်ဆုံးနှစ်(ဒီပလိုမာ၊ ဘွဲ့ကြို ၊ဘွဲ့လွန်)နှင့် ဘွဲ့ရလူငယ်များ တက်ရောက်နိုင်မည်ဖြစ်ပြီး သင်တန်းကာလ(၆)လကြာမြင့်မည်ဖြစ်သည်၊၊

လျှောက်ထားလိုသူများ အနေဖြင့် ဇွန်လ၂၀ ရက်နောက်ဆုံးထား လျှောက်ထားရမည်ဖြစ်ပြီး bit.ly/ASEANDEForm မှ တစ်ဆင့်အမည်စာရင်းပေးသွင်းနိုင်ကြောင်း၊ilan.asqolani@aseanfoundation.
orgကို ဆက်သွယ်မေးမြန်းနိုင်သလို အားကစားနှင့်လူငယ်ရေးရာဝန်ကြီးဌာနကို မေးမြန်းစုံစမ်းနိုင်ကြောင်းသိရသည်၊၊

ymg/tthl
#Yangon_Media_Group

#LocalNews
Published _17 June 2022

ပြည်တွင်း အခေါက်ရွှေဈေးမှာ ကျပ်သိန်းနှစ်ဆယ့်ငါးသောင်းကျော်အထိ ဆက်လက်မြင့်တက်လာနေကြောင်း ရန်ကုန်ရွှေဈေးကွက်မှ သိရသည်။

၁၆ပဲရည် (အကယ်ဒမီ) အခေါက်ရွှေဈေးမှာ ဇွန်လ ၁၇ ရက်တွင် တစ်ကျပ်သားကို ကျပ် ၂၀,၅၅,၅၀၀ ဝန်းကျင်ဖြင့် ဈေးထပ်မံမြင့်တက်လာကြောင်း ရန်ကုန်တိုင်းဒေသကြီး ရွှေလုပ်ငန်းရှင်များအသင်း၏ ထုတ်ပြန်ထားသည့် ဈေးနှုန်းများအရ သိရသည်။

ကမ္ဘာ့ရွှေဈေးမှာမူ လတ်တလောတွင် အမြင့်ဈေး၌ ရှိနေပြီး ဇွန်လ ၁၇ ရက် တွက်ချက်နှုန်းအရ 1 Ounce ကို ၁၈၄၅ ဒေါ်လာအထိ မြင့်တက်နေကြောင်း သိရသည်။

လက်ရှိတွင် နိုင်ငံခြားငွေလဲလှယ်ဈေးကို ထိန်းချုပ်လိုက်ပြီး ရွှေဈေးကွက်အား ရည်ညွှန်းဈေးဖြင့် ဈေးကွက်ဖွင့်ရန် သတ်မှတ်ခဲ့ပြီးနောက် ရွှေဈေးသည် ပြင်ပပေါက်ဈေးနှင့် ကွာဟမှုအချို့ရှိ လာကာ ရွှေဆိုင်များအနေဖြင့် ဈေးနှုန်းဖော်ပြမှုမရှိဘဲ ဆိုင်သို့လာရောက်ဝယ်ယူမှသာ ဈေးနှုန်းပြော ရောင်းချမှုများ ရှိလာကြောင်း ယင်းစျေးကွက်မှတစ်ဆင့် သိရသည်။

ymg/NN
#Yangon_Media_Group

#LocalNews
Published 17 June 2022

ရှမ်းပြည်နယ်(အရှေ့ပိုင်း)၊ တာချီလိတ်မြို့၊ မိုင်းဖုန်း(က)ကျေးရွာအုပ်စု၊ ဝမ်ပုံဆိပ်ကမ်းတွင် လာအိုနိုင်ငံမှ နေရပ်ပြန်မြန်မာရွှေ့ပြောင်းအလုပ်သမား အမျိုးသား (၁၄၉)ဦး၊ အမျိုးသမီး(၄၀)ဦးစုစုပေါင်း(၁၈၉)ဦးကို ယနေ့နံနက်(၁၁)နာရီအချိန် မြန်မာတာဝန်ရှိသူများမှ လက်ခံခဲ့ကြသည်။

အဆိုပါ နေရပ်ပြန်များကို ခရိုင်လူဝင်မှုကြီးကြပ်ရေးဦးစီးဌာနမှ ဦးစီးမှူး ဦးသန့်ဇင်နှင့် တာဝန်ရှိသူများက လက်ခံခဲ့ကြပြီး စံလင်းဖြိုး Quarantine Centre တွင် (၄)ရက်ထားရှိကာ (၃)ရက်မြောက်နေ့တွင် ကိုဗစ် ၁၉ နှင့်ဗီဇပြောင်း အိုမီခရွန်ရောဂါပိုး ကူးစက် ရှိ/မရှိ ကျန်းမာရေးစစ်ဆေးပြီးနောက် ရောဂါပိုးကင်းစင်သူများကို နေရပ်သို့ပြန်လည်ပို့ဆောင်ပေးမည်ဖြစ်ကြောင်းသိရှိရသည်။

ရွေ့ပြောင်းမြန်မာအလုပ်သမားများကို စံလင်းဖြိုး Quarantine Centre ၌ ထားရှိစဥ်အတွင်း ခရိုင်/မြို့နယ် ကြက်ခြေနီအသင်းက အုပ်ချုပ်ရေးနှင့် လူမှုရေးကူညီစောင့်ရှောက်ပေးမှုများကို ဆောင်ရွက်ပေးသွားမည်ဖြစ်ကြောင်း သိရသည်။

ymg/ys-tcl
#Yangon_Media_Group

#LocalNews
Published - 17 June 2022

ဧရာဝတီမြစ်ရေတိုးလာ၍ ကချင်ပြည်နယ်၊ ဗန်းမော်မြို့နယ်နှင့် ရွှေကူမြို့နယ်များရှိ မြေနိမ့်ပိုင်းနေရာများသို့ ရေဝင်လာသောကြောင့် ဒေသခံများကို နေရာပြောင်းရွေ့ပေးနေရကြောင်း မီးသတ်ဦးစီးဌာနမှ သိရသည်၊၊

ကချင်ပြည်နယ်၊ ဗန်းမော်မြို့နယ်နှင့် ရွှေကူမြို့နယ်များရှိ မြေနိမ့်ပိုင်းနေရာများတွင် နေထိုင်ကြသည့်လူနေအိမ်ခြံဝန်းများအတွင်းသို့ ရေများဝင်ရောက်လာခြင်းဖြစ်သည်၊၊

မိုးလေဝသနှင့် ဇလဗေဒညွန်ကြားမှုဦးစီးဌာနမှ ဇွန်လ(၁၇)ရက်တွင် မြစ်ရေကြီးခြင်းသတိပေးချက် အနေဖြင့် ဧရာဝတီမြစ်ရေသည်ကသာမြို့တွင် နောက်(၃)ရက်အတွင်း ယင်းမြို့၏ စိုးရိမ်ရေမှတ်သို့ ရောက်ရှိနိုင်ကြောင်း သတိပေးချက်ထုတ်ပြန်ထားသည်၊၊

ဒီ့အပြင် မြစ်ရေခန့်မှန်းချက်တွင် ဧရာဝတီမြစ်ရေသည် ဗန်းမော်၊ ရွှေကူ၊ ကသာ၊ သပိတ်ကျင်း၊စစ်ကိုင်း၊ မြင်းမူ၊ မန္တလေး၊ ပခုက္ကူ၊ ညောင်ဦး၊ ချောက်၊ မင်းဘူး၊ မကွေး၊ အောင်လံ၊ ပြည်၊ ဆိပ်သာ၊ ဟင်္သာတ၊ ဇလွန်၊ သီပေါမြို့နယ်များတွင်လည်း မြစ်ရေတိုးမည်ဖြစ်ကြောင်း မိုး/ဇလက ဖော်ပြထားသည်၊၊

ymg/tthl
#Yangon_Media_Group

#LocalNews
Published_17 June 2022

မန္တလေးတိုင်းဝန်ကြီးချုပ်ဟောင်း ဒေါက်တာဇော်မြင့်မောင်ကို ယနေ့ ဇွန်လ ၁၇ ရက်တွင် အဂတိအမှု ၅ မှုအတွက် ထောင်ဒဏ် ၂၁နှစ် ချမှတ်လိုက်ကြောင်း သိရသည်။

အမှုအမှတ် ၆၊ ၇၊ ၈ အတွက် တစ်မှုစီ ထောင်ဒဏ် ၅ နှစ် ကျခံစေရန် ချမှတ်ကာ ကျန်နှစ်မှုကို ၃နှစ်စီချမှတ်လိုက်သောကြောင့် စုစုပေါင်း ထောင်ဒဏ် ၂၁နှစ်ချမှတ်လိုက်ခြင်း ဖြစ်ကြောင်း သိရသည်။

ဒေါက်တာဇော်မြင့်မောင် ရင်ဆိုင်နေရသော အမှု ၉ မှုအထဲမှ သဘာဝဘေးပုဒ်မအမှု ၂ ခုအတွက် ထောင်ဒဏ် ၄နှစ်ကို ပြီးခဲ့သည့်၂၀၂၁ ဒီဇင်ဘာလ ၈ ရက်တွင် ချမှတ်ခဲ့သေးသည်။

ဇွန်လ ၁၄ရက်တွင် ယနေ့ ချမှတ်သော အဂတိအမှု ၅ မှုအတွက် အပြီးသတ် လျှောက်လဲချက်ပေးခဲ့ခြင်း ဖြစ်ကြောင်း၊ ယင်းအမှု ၅ မှုတွင် စီးပွားရေးလုပ်ငန်းရှင် ဦးမောင်ဝိတ်နှင့် ပတ်သက်သည့်အမှုမှာ အမှုအမှတ်(၇)နှင့်(၈) ဖြစ်ကြောင်းလည်း သိရသည်။

ymg/mt
#Yangon_Media_Group