‘မြန်မာမှာတော့ ရွှေထည်တွေကို ရွှေသားထူထူဝယ်ယူကြပေမယ့် နိုင်ငံတကာမှာတော့ ဒီဇိုင်းဦးစားပေးရွှေထည်ပါးပါးတွေနဲ့ 3D Cutting တွေကိုကြိုက်နှစ်သက်ကြတယ်။ လက်ရာပိုင်းကြိုက်ဖို့ လိုအပ်နေသေးတယ်’ ဦးမျိုးမြင့် (ရန်ကုန်တိုင်းဒေသကြီးရွှေလုပ်ငန်းရှင်များအသင်းဥက္ကဌ)

#Local_News
Published 7 July 2023
#မြန်မာ့ရွှေထည်
#Tthl
#Yangon_Time

#Local_News
Published 7 July 2023

ရန်ကုန်တိုင်း၊ လှိုင်သာယာမြို့နယ်၊ ရန်ကုန်-ညောင်တုန်းလမ်းမပေါ်တွင် အိမ်စီးကားနှင့်ဖယ်ရီကားတို့ဝင်တိုက်မိ၍ ထိခိုက်ဒဏ်ရာရရှိသူ ၃ ဦးရှိခဲ့ကြောင်း ဒေသခံလူမှုကူညီရေးအသင်းက သိရသည်။

ဖြစ်စဥ်မှာ ဇူလိုင်လ ၆ ရက် ည ၈ နာရီအချိန်ခန့်က လှိုင်သာယာအရှေ့ပိုင်း၊ ရန်ကုန်-ညောင်တုန်းလမ်း အောက်ထိပ်မှတ်တိုင်အနီး ဖယ်ရီကားကို အိမ်စီးကားက အရှိန်လွန်၍ဝင်တိုက်မိခဲ့ခြင်းဖြစ်ကြောင်းသိရသည်။

"ဖယ်ရီကားက တိမ်းမှောက်သွားခဲ့ပြီး ယာဥ်မောင်းက ခြေထောက် ၂ ဖက်လုံးထိသွားတယ်။ အိမ်စီးကားပေါ်က လူ ၂ ယောက်ကတော့ ဒဏ်ရာရပေမဲ့ စိုးရိမ်စရာမရှိပါဘူး"ဟု မေတ္တာပါရမီလူမှုကူညီရေးအသင်းက သိရသည်။

ယာဥ်တိုက်မှုဖြစ်ရာနေရာသို့ လှိုင်သာယာမြို့နယ်မီးသတ်စခန်းမီးသတ်တပ်ဖွဲ့ဝင်များသွားရောက်၍ ရှာဖွေကယ်ဆယ်ရေးလုပ်ငန်များဆောင်ရွက်ခဲ့ပြီး ထိခိုက်ဒဏ်ရာရရှိသူအား မေတ္တာပါရမီလူမှုကူညီရေးအသင်းယာဥ်ဖြင့် လှိုင်သာယာပြည်သူ့ဆေးရုံသို့ပို့ဆောင်ပေးခဲ့ကြောင်းသိရသည်။

#Local_News #ယာဥ်၂စီးတိုက်မိ၍၃ဦးထိခိုက်ဒဏ်ရာရ
#Yangon_Times/BM

#Local_News
Plublish- 7 -7 2023

မွန်ပြည်နယ်၊ ကျိုက်ထိုမြို့ရှိ ကျိုက်ထီးရိုးဆံတော်ရှင် တောင်တက်ကားလမ်းပေါ်ရှိ လေးဖာတော(ဒေသအခေါ်) တံတားတစ်စင်းမှာ  ယမန်နေ့  ညနေ (၃) နာရီ ခွဲအချိန်တွ မိုင်းခွဲဖျက်ဆီးခံရကြောင်း ဒေသခံလူမှုကူညီရေးအဖွဲ့ထံက သိရသည်။

ယင်းတံတားမှာ ကင်မွန်းချောင်း-ကျိုက်ထီးရိုးသွားတောင်တက် ကားလမ်းပေါ်တွင် ရှိပြီး၊  မိုင်းခွဲတိုက်ခိုက်မှုကြောင့်  တံတားအလယ်တွင် ခြောက်ပေပတ်လည် အပေါက်တစ်ခုဖြစ်ပွားခဲ့ကြောင်း သိရသည်။

“ ဖောက်ခွဲခံရတာတော့ မှန်ပါတယ်။ ကျန်တာတွေတော့ ကျွန်တော်တို့လည်း မသိသေးဘူး။ တံတားကိုလည်း ပြန်ပြင်ဆင်ဖို့ လုပ်နေကြတယ်လို့ သိရတယ်။ ကျန်တာတော့ဘာမှထပ်မကြားသေးဘူး”ဟု ဒေသခံလူမှု ကူညီရေးအဖွဲ့ က ပြောသည်။

မိုင်းဖောက်ခွဲခံရအပြီးတွင် ကျိုက်ထီးရိုးတောင်ပေါ်မှ ပြန်လည်ဆင်းလာမည့် ဘုရားဖူးများနှင့် ဘုရားဖူးခရီးသည်များ သယ်ယူပို့ဆောင်နေသည့် ကား(၅) စီးခန့် ပိတ်မိနေကြောင်း သိရသည်။

ကျိုက်ထီးရိုးတောင်ပေါ်တွင် ပိတ်မိနေသော ဘုရားဖူးများနှင့် ဘုရားဖူးကားများကို ယနေ့ ဇွန်(၇)ရက်နေ့တွင် ပြည်နယ်အစိုးရအဖွဲ့နှင့် တောင်တက်ကားအသင်းတို့က တောင်ခြေသို့ ပြန်လည် ခေါ်ယူရန် စီစဉ်နေကြောင်း သိရသည်။

ယင်း ဖြစ်စဉ်နှင့်ပတ်သက်၍ ကျိုက်ထီးရိုးဘုရားဂေါပကအဖွဲ့ကို ဆက်သွယ်စုံစမ်းသော်လည်း ဆက်သွယ်၍ မရသေးပေ။

ပြီးခဲ့သော ဇွန် (၂၉) ရက်ကလည်း သထုံမြို့နယ်နှင့် ဘီးလင်းမြို့နယ်အစပ် ကျုံအိတ်ချောင်းတံတားမှာ မိုင်းခွဲဖျက်ဆီးခံခဲ့ရပြီး တံတား၏ အကျယ်ထက်ဝက်ကျော်ခန့် ပြိုကျပျက်စီမှု ဖြစ်ပွားခဲ့ကာ အိမ်စီးကား နှစ်စီးပြုတ်ကျ၍ အမျိုးသားတစ်ဦး သေဆုံးကာ တစ်ဦးထိခိုက်ဒဏ်ရာရရှိခဲ့ကြောင်း သိရသည်။

ဓာတ်ပုံ CJ
#YMG/MY #Local_News #လေးဖာတောတံတားတစ်စင်း မိုင်းခွဲဖျက်စီးခံရ
#Yangon_Times

#Local_News
Published 7 July 2023

ပြီးခဲ့သည့် ၂၀၂၀ ပြည့်နှစ်မှ ၂၀၂၂ ခုနှစ်အတွင်း ပုံမှန်ကာကွယ်ဆေးမထိုးရသေးသည့် ရောဂါ (၁၁) မျိုး ကာကွယ်ဆေး မထိုးလိုက်ရသည့် အသက် (၁) နှစ်မှ (၅)နှစ်အရွယ် ကလေးငယ်များကို စာရင်းကောက်ယူပြီး ကာကွယ်ဆေးထိုးခြင်းအစီအစဉ်တစ်ရပ် ပြုလုပ်သွားမည်ဖြစ်ကြောင်း ရန်ကုန်တိုင်းဒေသကြီး၊ ပြည်သူ့ကျန်းမာရေးဦးစီးဌာနမှ သိရသည်။

အဆိုပါ အမီလိုက်ကာကွယ်ဆေးထိုး အစီအစဉ်ပြုလုပ်ရန် ပြင်ဆင်ရခြင်းမှာ ပြီးခဲ့သည့် (၃) နှစ်အတွင်း အခြေအနေအမျိုးမျိုးကြောင့် အသက် (၁) နှစ်အောက်အရွယ် ကလေးများမှာ ပုံမှန်ထိုးပေးနေကြ ရောဂါ (၁၁)မျိုး ကာကွယ်ဆေးကို တစ်ကြိမ်မျှ မထိုးလိုက်ရသည့် ကလေးနှင့် အကြိမ်ပြည့် မထိုးလိုက်ရသည့်ကလေးများ ရှိနေခြင်းကြောင့် ဆောင်ရွက်ရခြင်းဖြစ်ကြောင်း ရန်ကုန်တိုင်းပြည်သူ့ကျန်းမာရေးဦးစီးဌာနမှ ဒုတိယကျန်းမာရေးဦးစီးဌာနမှူး ဒေါက်တာသက်စုမွန်က နိုင်ငံပိုင်မီဒီယာတွင် ပြောကြားထားသည်။

"အကြောင်းကြောင်းကြောင့် (၁) နှစ်အောက်ကလေးတွေထဲမှာ ကာကွယ်ဆေး မထိုးလိုက်ရတဲ့ ကလေးတွေရှိတယ်။ ရန်ကုန်က မဟုတ်ဘဲ အခြားဒေသကနေ နယ်စွန်နယ်ဖျားသွားလာရခက်ခဲတဲ့ နေရာတွေက ကာကွယ်ဆေးမထိုးနှံရတဲ့ ကလေးတွေလည်း ဒီကိုရောက်ရှိလာတာတွေရှိပါတယ်။ ကိုဗစ်ကာလကလည်း ကပ်ရောဂါဖြစ်ထားတာကြောင့် ကာကွယ်ဆေးမထိုးနှံခဲ့ရတာတွေ၊ ကျန်းမာရေးဘက်ကလည်း ကိုဗစ်တိုက်ဖျက်ရေးကြောင့် ပုံမှန်ကာကွယ်ဆေးထိုး လုပ်ငန်းတွေမှာ အားနည်းသွားတာတွေရှိလို့ ဆေးမထိုးရတဲ့ ကလေးတွေက ၂၀၂၀ ကနေစပြီး တစ်နှစ်ထက်တစ်နှစ် စုပုံများပြားလာတာတွေရှိပါတယ်"ဟု ဒေါက်တာသက်စုမွန်က ပြောကြားထားသည်။

ဆေးမထိုးရသေးသည့် ကလေးငယ်များပြည်သူလူထုထဲများပြားလာ၍ ကူးစက်ရောဂါအစုလိုက် ဖြစ်လာမှုများရှိလာ‌သောကြောင့် ပုံမှန် အသက် (၁)နှစ်အောက်ကလေးငယ်များအားကာကွယ်ဆေးထိုးပေးနေသည့်အပြင် အသက်(၅)နှစ်အထိ ကာကွယ်ဆေး ပုံမှန်မထိုးရသေးသူ ကလေးငယ်များကိုလည်း ရှာဖွေပြီး ထိုးနှံရန် ကျန်းမာရေးဝန်ကြီးဌာနက ပြင်ဆင်နေကြောင်း ပြောကြားထားသည်။

#Local_News #ကာကွယ်ဆေးထိုးအစီအစဉ်ဆောင်ရွက်
#Yangon_Times/BM

#Daily_News
Published_ 6 July 2023

၁။ မြန်မာ့လက်ရွေးစင် အမျိုးသမီးဘောလုံးအသင်းအနေဖြင့် အုပ်စုအဆင့် ကျော်ဖြတ်နိုင်ရန် ပြိုင်ဘက်တိုင်းကို အလေးထား ယှဉ်ပြိုင်သွားရမည်ဟု နည်းပြချုပ် ဒေါ်သက်သက်ဝင်းပြော

၂။ ရွှေအရောင်းအဝယ်အေးပြီး ပြည်တွင်းရွှေဈေးကျနေ

၃။ ယနေ့ညနေအထိ နေပြည်တော်၊ အပါအဝင် အခြားပြည်နယ်နှင့်တိုင်းများတွင် ရာနှုန်းပြည့်မိုးကြီးနိုင်ဟုဆို

၄။ ဘရာဇီးလ်အမေဇုန်တွင်ကျင်းပသည့် ပါရင်တင်စ်ပွဲတော်တွင် လူပေါင်းထောင်ပေါင်းများစွာမှ ရိုးရာရောင်စုံအကအလှများဖြင့် ဖျော်ဖြေခဲ့ကြ .... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Time #Daily_News #YMG

#Local_News
Published- 6 July 2033

ရန်ကုန်တိုင်းဒေသကြီး၊တွံတေးခရိုင်၊ ဒလမြို့ပေါ်ရှိ ရပ်ကွက်နှစ်ခုတွင်ရှိနေသော အိမ်ထောင်စု ၁၂၀ ခန့် နှင့်ပတ်သက်၍ ရန်ကုန်မြို့တော်စည်ပင်သာယာရေးကော်မတီက စိစစ်မည်ဖြစ်ကြောင်း အဆိုပါ ကော်မတီ၏ အဆင့်မြင့် အရာရှိတစ်ဦးက ပြောသည်။

အဆိုပါ အိမ်ထောင်စုများနေသည့် နေအိမ်များကို ဖယ်ရှားပေးရန် လေလံအောင်ထားသည်ဆိုသော ကုမ္ပဏီတစ်ခုမှ လာရောက်၍ ခြံစည်းရိုးများလာခတ်ကာ နေအိမ်များကိုပါ ဖြိုဖျက်ရန် လာရောက်လုပ်ဆောင်ခဲ့ကြကြောင်း သိရသည်။

ယင်းရပ်ကွက်တည်ရှိရာ မြေနေရာမှာ လွန်ခဲ့သော၂၀၀၅ ခုနှစ်က ကြက်ဆူပင်စိုက်ပျိုးရန် စိမ်းလန်းမြေအဖြစ် သတ်မှတ်ပေးထားခဲ့သောမြေနေရာဖြစ်ပြီး ယခင်အစိုးရအဆက်ဆက်က အခွန်လွတ်ဈေးများတွင် ရောင်းချရန်ရာသီပေါ်သီးနှံများ စိုက်ပျိုးရသောမြေနေရာဖြစ်ကြောင်းလည်း သိရသည်။

"အခုက အဲဒီနေရာနဲ့ ပတ်သက်ပြီး တရားဝင် မြေချထားပေးတာရှိတယ်။ ပြန်ပြီးတော့ ပြန်စစ်ရအုံးမယ်"ဟု ရန်ကုန်မြို့တော်စည်ပင်သာယာရေးကော်မတီ၏ အဆင့်မြင့် အရာရှိကြီးက ပြောသည်။

လက်ရှိတွင် မြို့မ(၄)ရပ်ကွက်အပိုင် အိမ်ခြေ(၆၂)လုံး၊ အောင်မင်္ဂလာရပ်ကွက်အပိုင်ရှိ အိမ်ခြေ (၄၆)လုံး ရှိသည့် မြေ ၂ ဒသမ ၀၆၆ ဧက ကို လေလံအောင်၍ မြေဂရံ ရရှိထားသည်ဆိုသူများက ယင်းမြေပေါ်ရှိ နေအိမ်များကို ဖျက်သိမ်းကာ နေရာအစားထိုးပေးရန် စီစဉ်နေကြခြင်း ဖြစ်ကြောင်း ဒေသခံများက ပြောသည်။

အစားထိုးမြေနေရာပေးမည့် နေရာမှာ ရန်ကုန်တိုင်းဒေသကြီး ကော့မှူးမြို့နယ်၊ တောင်ကြောင်ကျေးရွာပိုင်စားကျက်မြေပေါ်၌ ဖြစ်ကြောင်း၊ ယင်းနေရာကို ပြောင်းရွှေ့သူများအား ရွှေ့ပြောင်းစရိတ်အဖြစ် ငွေကျပ် ၂ သိန်း စီပေးမည်ဟု လက်ရှိနေရာကို လေလံရထားသည်ဟု ပြောသူများက ဆိုကြောင်းလည်း ဒေသခံများက ပြောသည်။

"ဇူလိုင်လ ၁ ရက်နေ့မှာ ဘူဒိူဇာနဲ့ ထိုးမယ်ဆိုပြီး လူတွေနဲ့ ကား ၉ စီးလောက်လာတယ် ၊ အခုနိုင်ငံတော်အဆင့်ဆင့်ကို အသနားခံစာလေး တိုင်စာလေးတင်ထားတယ်၊ ဒီနေရာလေးမှာဘဲ ဆက်ပြီးနေခွင့်ပြုဖို့ ၊ ကျွန်မတို့ကို ဘယ်လိုလုပ်ပေးမလဲ မေးကြည့်တော့ ကော့မှုးတောင်ကြောင်မှာ သူတို့ ဝယ်ထားတဲ့ လယ်မြေရှိလို့ အဲဒီကို ရွှေ့ပေးမယ် ၊ ပြောင်းရွှေ့စရိတ် နှစ်သိန်းပေးမယ်၊ ပြည်သူတွေကို အစ်မတို့ နားချပေးပါလို့ပြောတယ်၊ သူတို့ပြောတဲ့မြေကို ဒီကလူ ၁၃ ယောက်လောက် သွားကြည့်တော့ အဆင်မပြေဘူး၊ သူတို့ပြန်ပေးမယ့် လယ်မြေ စားကျက်မြေတွေဆိုတာ တစ်နှစ်လောက်နေရင်ပြန်ဖယ်ရမှာ၊ အကုန်ဒုက္ခရောက်ကုန်မယ်"ဟု အောင်မင်္ဂလာရပ်ကွက်နေသူ တစ်ဦးက ပြောသည်။

အငြိမ်းစားနိုင်ငံ့ဝန်ထမ်းများ၊ ကိုယ်လက်အင်္ဂါမသန်စွမ်းသူများ နှင့် သက်ကြီးရွယ်အိုအများစုနေထိုင်သည့် အဆိုပါ နေအိမ်များ ဖြိုဖျက်မခံရစေရေးအတွက် ရပ်ကွက်နေသူများက စုပေါင်း၍ နိုင်ငံတော် စီမံအုပ်ချုပ်ရေးကောင်စီ၊ ရန်ကုန်တိုင်းဒေသကြီးအစိုးရအဖွဲ့၊ ရန်ကုန်မြို့တော် စည်ပင်သာယာရေးကော်မတီတို့ထံ အကြောင်းကြားစာ ပေးပို့ အသနားခံထားကြောင်း သိရသည်။

#Local_News #ရန်ကုန်စည်ပင် စိစစ်မည်
#Yangon_Times / BM