Published 24 May 2022

တရုတ်နှင့် မြန်မာ နှစ်နိုင်ငံကို ချိတ်ဆက်ထားတဲ့ နိုင်ငံတကာ အထူးရထားအသစ်အဖြစ် တရုတ်နိုင်ငံ အနောက်တောင်ပိုင်း ချုံချင့်မြို့ကနေ  ရထားတစ်စီးဟာ တနင်္လာနေ့က ထွက်ခွာလာပါတယ်။ ဒါဟာ တရုတ်-အာဆီယံ ကုန်သွယ်ရေးစင်္ကြသစ်တစ်ခု ဖွင့်လှစ်လိုက်ခြင်းလည်းဖြစ်ပါတယ်။

စက်ပစ္စည်းတွေ၊အီလက်ထရွန်းနစ်နှင့်မော်တော်ကား အစိတ်အပိုင်းတွေပါဝင်တဲ့ TEUကွန်တိန်နာအလုံး(၆၀)ကို သယ်ဆောင်လာတဲ့ ရထားဟာ အနောက်တောင်ယူနန်ပြည်နယ်က လင်ချမ်းကိုဖြတ်သန်းပြီး မြန်မာနိုင်ငံမန္တလေးမြို့ကို ၁၅ရက်အကြာမှာ ရောက်ရှိပါမယ်။

ယခုကုန်ရထားလမ်းကြောင်းဟာ ပုံမှန်လမ်းကြောင်းတွေထက် ရက်ပေါင်း၂၀ အချိန်သက်သာပြီး ထောက်ပို့စရိတ်တွေကိုလည်း ၂၀ရာခိုင်နှုန်းလျှော့ချပေးနိုင်ပါတယ်။

ချုံကျင့်နှင့် အနီးတစ်ဝိုက်က ကုန်ပစ္စည်းတွေဟာ ဒီလမ်းကြောင်းအသစ်ကိုအသုံးပြုပြီး မြန်မာနိုင်ငံမှတစ်ဆင့် အိန္ဒိယသမုဒ္ဒရာကို တင်ပို့နိုင်မှာဖြစ်ပြီး ဥရောပ၊အာဖရိက၊အရှေ့အလယ်ပိုင်းနှင့် တောင်အာရှဒေသတွေဆီ ရောက်ရှိမှာဖြစ်ပါတယ်။

အဲဒီအပြင် လမ်းကြောင်းသစ်ဟာ  ချုံချင့်ကို အာဆီယံနှင့် RCEPအဖွဲ့ဝင်နိုင်ငံတွေနှင့် ချိတ်ဆက်မှု မြှင့်တင်ပေးနိုင်ဖို့ မျှော်လင့်ထားကြပါတယ်။

Source CCTV

#LocalNews
Published_24 May 2022

မျောက်ကျောက် (Monkeypox) ရောဂါမှာ သဘောသဘာဝအရ မြန်မာနိုင်ငံတွင် ဖြစ်ပွားနိုင်ခြေ နည်းပါးသော်လည်း အဆိုပါ ကျောက်ရောဂါများနှင့် ပတ်သက်၍လည်းကောင်း၊ ရှိရင်းစွဲ ကူးစက်ရောဂါများနှင့် ပတ်သက်၍လည်းကောင်း ရောဂါစောင့်ကြပ်ကြည့်ရှုခြင်း လုပ်ငန်းများ အရှိန်အဟုန်မြှင့်တင်‌ ဆောင်ရွက်ကြရန် လိုအပ်ကြောင်း ကျန်းမာရေးဝန်ကြီးဌာန ပြည်ထောင်စုဝန်ကြီး ပါမောက္ခ ဒေါက်တာသက်ခိုင်ဝင်းက ပြောသည်။

၂၀၂၂ ခုနှစ်အတွင်း သွေးလွန်တုပ်ကွေးရောဂါ ထူးကဲစွာအများအပြား (Outbreak) ဖြစ်ပွားမလာစေရေး ညှိနှိုင်းအစည်းအဝေးအတွင်း ပြည်ထောင်စုဝန်ကြီးက အထက်ပါအတိုင်း ပြောကြားလိုက်ခြင်းလည်း ဖြစ်သည်။

မြန်မာနိုင်ငံတွင်လည်း ကလေးငယ်များတွင် ရေကျောက်ရောဂါ (chickenpox) ဖြစ်ပွား တွေ့ရှိမှုများရှိလာသဖြင့် ပြည်သူများအကြား စိုးရိမ်ထိတ်လန့်မှု မဖြစ်စေရေး၊ ယခုအခါ ဖြစ်ပွားမှုမရှိတော့သော ကျောက်ကြီးရောဂါ (smallpox)၊ အလွန်ပြင်းထန်ခြင်းမရှိသော ရေကျောက်ရောဂါနှင့် လတ်တလော နိုင်ငံအချို့တွင် ကူးစက်မှုအသစ်များအဖြစ် တွေ့ရှိရသော monkeypox ရောဂါတို့၏ ရောဂါဖြစ်ပွားရာတွင် တွေ့ရှိရသော ရောဂါလက္ခဏာများတွင် ကွာခြားမှု၊ ဖြစ်နိုင်ခြေတို့ကို ပြည်သူများ ကျယ်ကျယ်ပြန့်ပြန့် သိရှိကြစေရေး ကျန်းမာရေး အသိပညာများ မြှင့်တင်ပေးရမည် ဖြစ်ကာ ရောဂါသံသယရှိပါက နီးစပ်ရာကျန်းမာရေးဌာနများတွင် လာရောက်ပြသနိုင်ရေး၊ ဓာတ်ခွဲစမ်းသပ်စစ်ဆေးနိုင်ရေးနှင့် ဆေးကုသရေးလုပ်ငန်းများအတွက် ကြိုတင်ပြင်ဆင် ဆောင်ရွက်ထားရမည် ဖြစ်ကြောင်း ယင်းကဆိုသည်။

မျောက်ကျောက် (Monkeypox) ကူးစက်ရောဂါသည် တိရစ္ဆာန်များတွင် ဖြစ်ပွားမှုမှ လူသို့ကူးစက်တတ်သည်ဖြစ်၍ One Health Approach အရ မွေးမြူရေးနှင့် ကုသရေးကဏ္ဍ၊ ပတ်ဝန်းကျင်ထိန်းသိမ်းရေးကဏ္ဍနှင့် ကျန်းမာရေးကဏ္ဍတို့ ချိတ်ဆက်ပေါင်းစပ်ဆောင်ရွက်သွားရန် ၊ နိုင်ငံတကာတွင် ကူးစက်ဖြစ်ပွားမှုများကို ဆက်လက်စောင့်ကြည့်၍ နိုင်ငံတွင်း လက်ရှိရောဂါ စောင့်ကြပ်ကြည့်ရှုမှု စနစ်ကိုလည်း ကြိုတင်ပြင်ဆင် ဆောင်ရွက်ထားရန်ကျန်းမာရေးဝန်ကြီးဌာနအနေဖြင့် လုပ်ဆောင်နေကြောင်းလည်း သိရသည်။

လတ်တလောတွင် အာဖရိက၊ အမေရိက၊ ဥရောပရှိ နိုင်ငံအချို၌ မျောက်ကျောက် (Monkeypox) ကူးစက်ရောဂါ ဖြစ်ပွားမှုများ တွေ့ရှိလာရကြောင်း ကမ္ဘာ့ကျန်းမာရေးအဖွဲ့ကြီးက သတိပေးချက် ထုတ်ပြန်ထားသည်။

ymg/mt
#yangon_Media_Group

#LocalNews
Published_24 May 2022

ပုဂံရှေးဟောင်းယဉ်ကျေးမှုနယ်မြေက ခွင့်ပြုချက်မဲ့ လူနေတဲအိမ်တွေ အပါအဝင် ခြံဝင်းတွေကို ဖယ်ရှားဖို့ သက်ဆိုင်ရာ အဖွဲ့အစည်းတွေက စီစဉ်နေပါတယ်။

#Yangon_Media_Group

#LocalNews
Published_24 May 2022

ရခိုင်ပြည်နယ်၊ စစ်တွေမြို့နယ်၊ ကန်ပြင်ကျေးရွာတွင် နေထိုင်သော အသက် ၂၁ နှစ် နှင့် ၁၈ နှစ်အရွယ်ရှိ ဇနီးမောင်နှံနှစ်ဦး တစ်ပြိုင်နက်တည်းကြိုးဆွဲချသေဆုံးမှု ဖြစ်ပွားခဲ့ကြောင်း သိရသည်။

"ဒီနေ့မေလ ၂၄ ရက် မနက်ကမှ သိရတာ၊ ကောင်လေးက ထွန်းအေးကျော်၊ ကောင်မလေးက အသက် (၁၈)နှစ်ပဲ ရှိသေးတယ်။ မယုယုလှိုင်တဲ့။ ဘာကြောင့် သေရတယ်ဆိုတာတော့ မသိဘူး"ဟု ဒေသခံတစ်ဦးကပြောသည်။

အဆိုပါ ဇနီးမောင်နှံမှာ မကြာသေးခင်ကမှ ထိုင်းနိုင်ငံတွင်အိမ်ထောင်ကျ၍ ပြန်လာခဲ့ကာ မောင်ထွန်းအေးကျော်၏နေအိမ်တွင် နေထိုင်ကြခြင်းဖြစ်ကြောင်း၊ ယင်းတို့နှစ်ဦးရုပ်အလောင်းကို စစ်တွေဆေးရုံကြီး၏ ရင်ခွဲရုံတွင်ရင်ခွဲစစ်ဆေး၍ စစ်တွေမြို့သုဿန်တွင် ညနေ ၅ နာရီ အချိန် မီးသင်္ဂြိုလ်ခဲ့ကြောင်း သိရသည်။

ymg/mt
#Yangon_Media_Group

#LocalNews
Published -24 May 2022

ရွှေတိဂုံစေတီတော်၊ တန်ဆောင်းတွေမှာရှိတဲ့ ပျက်စီးနေတဲ့ မြန်မာမှုပန်းပုရုပ်ကြွတွေကို အစား ထိုးလဲလှယ် သွားဖို့ရှိတယ်လို့ ရွှေတိဂုံစေတီတော်ဘဏ္ဍတော်ထိန်းဂေါပကအဖွဲ့ဝင် ဦးဘိုးသင်းကပြောပါတယ်၊၊

#Yangon_Media_Group

#LocalNews
Published - 24 May 2022

တရုတ်နိုင်ငံ၊ ချုံချင့်မြို့ကနေ ကွန်တိန်နာ အလုံးပေါင်း (၆၀)သယ်ဆောင်လာသည့် ရထားတွဲသည် ဇွန်လအတွင်း မန္တလေးမြို့သို့ရောက်ရှိလာမှာ ဖြစ်တယ်လို့ မြန်မာနိုင်ငံဆိုင်ရာ တရုတ်သံရုံးက ဒီကနေ့မှာ သတင်းထုတ်ပြန်လိုက်ပါတယ်။

အဆိုပါ ရထားတွဲသည် တရုတ်-မြန်မာလမ်းကြောင်းသစ် (ချုံချင့်-လင်ချန်း-မြန်မာ) နိုင်ငံတကာရထားလမ်းကနေ ခုတ်မောင်းမည်ဖြစ်ပြီး မေလ ၂၃ ရက်နေ့တွင် ချုံချင့်မြို့ ကော်ယွမ်ဆိပ်ကမ်း ယွီကြွေဘူတာမှ စတင်ထွက်ခွာလာခဲ့ တာဖြစ်ပါတယ်။

ရထားတွဲ၌ စံချိန်မီကွန်တိန်နာပေါင်း အလုံး (၆၀) သယ်ဆောင်လာပြီး စက်ပစ္စည်းများ၊ အီလက်ထရောနစ်အပိုပစ္စည်းများ၊ ကားနှင့်ဆိုင်ကယ်အပိုပစ္စည်းများ စသည်တို့ ပါဝင်တယ်လို့ ဆိုပါတယ်။

ရထားတွဲသည် ယူနန်ပြည်နယ် လင်ချန်းနယ်စပ်ဂိတ်မှတစ်ဆင့်ပြည်ထွက်၍ ကားလမ်းနှင့်ရထားလမ်း ပူးပေါင်းပို့ဆောင်သည့်ပုံစံဖြင့် (၁၅)ရက်အကြာတွင် မြန်မာနိုင်ငံ မန္တလေးမြို့သို့ရောက်ရှိမည်ဖြစ်ပြီး ဒါဟာ တရုတ်-မြန်မာလမ်းကြောင်းသစ် (ချုံချင့်-လင်ချန်း-မြန်မာ)စတင် လည်ပတ်ခြင်းကို ကိုယ်စားပြုနေတယ်လို့ တရုတ်သံရုံးက ဆိုပါတယ်။

ခရီးစဥ်ခန့်မှန်းတွက်ချက်မှုအရ ချုံချင့်နှင့်မြန်မာနိုင်ငံအကြား ကုန်စည်ပို့ဆောင်မှု ကြာချိန်သည် သမားရိုးကျနည်းလမ်းထက် ရက် ၂၀ လျော့နည်းသွားမည်ဖြစ်ပြီး ကုန်စည်စီးဆင်းမှုအရင်းအနှီး ၂၀ ရာခိုင်နှုန်းလျှော့ချနိုင်မှာဖြစ်တယ်လို့ တရုတ်သံရုံး၏ ဒီကနေ့ထုတ်ပြန်ချက်မှာ ဖော်ပြထားပါတယ်။

ဓါတ်ပုံ - မြန်မာနိုင်ငံဆိုင်ရာ တရုတ်သံရုံး

ymg/kg
#Yangon_Media_Group